EPE Euskadiko Administrazio Orokorra 2026

12 plaza honela banatuta:

a. Txanda irekian, sarbide orokorreko modalitatean:

2. hizkuntza–eskakizunarekin 2027an: 1

3. hizkuntza–eskakizunarekin 2027an: 10

Hizkuntza–eskakizunik gabe: 1

b. Hortaz gain, barne-sustapen gurutzatu txandarako hautagaiak gaur egun titular diren plazak esleituko zaizkie haien artean hautaketa-prozesua gainditzen dutenei.



1. Europar Batasuneko kide den edozein estatutako nazionalitatea edukitzea. Parte hartzeko aukera izango dute, halaber, Europar Batasunaren estatu kideetako herritarren ezkontideek, edozein dutela ere nazionalitatea eta, betiere, zuzenbidez bananduta ez badaude, haien ondorengoek eta, zuzenbidez bananduta ez badaude, ezkontidearenek, baldin eta hogeita bat urtetik beherakoak badira edo, adin horretatik gorakoak izanda ere, gurasoen kontura bizi badira. Era berean, Europar Batasunak izenpetu eta Espainiak berretsitako nazioarteko itunen aplikazio-eremuan dauden pertsonek ere parte hartu ahal izango dute, baldin eta itun horietan langileen zirkulazio askea aplikatzen bada.
2. Gaitasun funtzionala izatea, sartu nahi den kidegoko edo eskalako zereginak betetzeko.
3. 16 urte beteta izatea eta nahitaezko erretiro-adina beteta ez izatea.
4. Diziplina-espediente batez edozein administrazio publikotako edo autonomia-erkidegotako organo konstituzional edo estatutarioen zerbitzutik bereizita ez egotea; ezta, ebazpen judizial baten ondorioz, enplegu edo kargu publikoetarako desgaikuntza absolutua edo berezia izatea ere, bereizi edo desgaitu duten funtzionario-kidegoan edo eskalan sartzeko. Beste estatu bateko herritarra izanez gero, hautagaia ezingo da desgaituta edo egoera baliokidean egon, eta ezingo du ezarrita izan diziplina-zehapenik edo baliokiderik, bere estatuan, baldintza berberetan, enplegu publikorako sarbidea eragozten dionik.
5. Oinarri espezifikoetan eskatutako titulazioa izatea edo titulua eskuratzeko eskubideak ordainduta izatea. Titulazioak atzerrikoak badira, haien homologazioaren egiaztagiria eduki beharko da.
6. Indarrean dagoen araubidearen arabera, ezgaitasun edo bateraezintasuneko lege-kausaren batean sarturik ez egotea; hala ere, araudiak ematen duen aukera-eskubidea errespetatuko da.
7. Ordainduta izatea langileak hautatzeko deialdietan inskribatzeagatik ordaindu beharreko tasa, lehiatu nahi den prozesuaren eta kidegoaren nahiz eskalaren arabera. Tasaren zenbatekoa oinarri espezifikoetan zehaztuko da.
8. Kidego eta eskala bereko karrerako funtzionario ez izatea.
9. Oinarri espezifikoetan eskatzen den beste edozein betekizun.

Oinarri orokorretako 3.3.i) apartatuari dagokionez, parte hartzeko ondorengo betekizun hau ezartzen da:

Dolozko delituagatik askatasunaz gabetzeko hiru urtetik gorako zigorrik jaso ez izana, zigor–aurrekariak baliogabetzea edo errehabilitazioa lortu ez bada salbu.

Lanpostuak esleitzeko betekizun espezifikoak.

Deialdi honetako lanpostuetan, euskararen 2. eta 3. hizkuntza–eskakizunak izatea betekizun izan daiteke lanpostua betetzeko. Euskara jakitea betekizuna da derrigortasun–data igarota daukaten lanpostuetan.

Horrez gain, deialdi honetako lanpostuek betekizun espezifiko hauek izan ditzakete:

– B gidabaimena.

Merezimenduak alegatzeko izapidean deklaratu behar da.

Eskainitako lanpostuen zerrendan —oinarri orokorretako 15.2 apartatuan aipatzen da—, hauek zehaztu behar dira: lanpostu bakoitzaren izena, saila edo organismoa, zentro organikoa, lanpostua kokatuta dagoen herria, destino–osagarriaren eta berariazko osagarriaren mailak, hizkuntza–eskakizuna eta derrigortasun–data, eta lanpostua betetzeko bete behar diren betekizun espezifikoak.

Hautaketa–sistema oposizio–lehiaketa izango da.

• Oposizio–fasea.

Hiru proba egingo dira, bi fasetan banatuta.

• I. FASEA

• 1. proba. Teoriko-praktikoa izango da, eta bi zati izango ditu:

A zatia: Gai-zerrenda orokor eta espezifikoei buruzko galdera sorta bat izango da, eta galderek zenbait erantzun-aukera izango dituzte.

B zatia: Zenbait erantzun-aukera dituen galdera sorta bati erantzun beharko zaio hemen ere. Deialdiko lanpostuetako zereginekin lotutako kasu teoriko-praktikoei buruzkoak izango dira galderak, eta deialdi bakoitzaren oinarri espezifikoekin batera argitaratutako den gai-zerrenda espezifikoaren esparruan egongo dira kokatuta.

Erantzuten ez diren galderek ez dute baloraziorik izango, eta okerreko erantzun bakoitzeko penalizazio bat aplikatuko da: erantzun zuzen baten balioaren heren bat deskontutako da.

Hautaketa-prozesua egokiro garatu dadin, kontuan hartuta eskatutako gutxieneko maila, bai, halaber, proban erakutsitako ezagutza-maila eta deialdiko plaza kopurua, eta hautagaiak nor diren jakin aurretik, epaimahaiak puntuazio-atalase bat ezarriko du, proba gainditzeko behar den gutxieneko puntuazioa zein den zehazteko, eta jendaurrean emango da erabaki horren berri. Gutxieneko zuzeneko puntuazioa ezingo da izan zati bakoitzean gehienez lor daitekeen puntuazioaren ehuneko 35 baino txikiagoa eta ehuneko 65 baino handiagoa.

Proba bakoitza (edo probaren zati bat) gainditzeko epaimahaiak ezartzen dituen gutxieneko zuzeneko puntuazioak hura gainditzeko behar diren gutxieneko kalifikazioak izango dira.

Gehienez lor daitezkeen zuzeneko puntuazioak probako (edo probaren zatiko) gehieneko kalifikazioak izango dira.

Kalifikazioak (puntuazio bihurtuak) kalkulatzeko, formula hauek aplikatuko dira:

Hautagaiak lortutako zuzeneko puntuazioa epaimahaiak ezarritako gutxieneko zuzeneko puntuazioa baino handiagoa bada:

Hautagaiak lortutako zuzeneko puntuazioa epaimahaiak ezarritako gutxieneko zuzeneko puntuazioa baino txikiagoa bada:

Non:

b(z) – Hautagaiaren kalifikazioa (puntuazio bihurtua) z – Hautagaiaren zuzeneko puntuazioa

Gu – Ariketa edo ariketaren zati bat gainditzeko epaimahaiak ezarritako gutxieneko zuzeneko puntuazioa (gutxieneko nota)

Ge – Ariketan eta ariketa zati batean gehienez lor daitekeen zuzeneko puntuazioa

A – Ariketan edo ariketaren zati batean gehienez lor daitekeen kalifikazioa (gehieneko puntuazio bihurtua)

Probak gehienez 50 puntuko kalifikazioa izango du, eta zati bakoitza 0tik 25 puntura baloratuko da. Proba gainditzeko,12,5 puntuko kalifikazioa (puntuazio bihurtua) beharko da zati bakoitzean.

• II. FASEA

• 2. proba. Proba praktikoa izango da.

Lanpostuaren zeregin kritikoak simulatuko ditu; hala, balizko egoera bat edo batzuk azaldu edo aztertu beharko da/dira idatziz, galdera bati edo batzuei erantzun beharko zaie, deialdiko lanpostuko ohiko arazo bati konponbidea emateko diagnostikoa eta proposamena eratu beharko da edota txostena, irizpena edo beste edozein analisi egin, betiere bat etorrita deialdiaren xede diren lanpostuen gai-zerrendetan eta konpetentzia-profiletan jasotako edukiekin, plazari dagozkion abilezia teknikoekin eta hautaketa-prozesuan parte hartzeko eskatzen den prestakuntza akademikoarekin.

Epaimahaiak proba praktiko hau zer formatutan egin erabakiko du, deialdiko plazetan jarduteko behar diren abilezia teknikoak ahalik ondoen jasotzea helburutzat hartuta. Era berean, probaren iraupena ere zehaztuko du, zeina ezin izango baita hiru ordutik gorakoa izan.

Proba honek 45 puntuko balorazioa izango du gehienez.

Alderdi hauek baloratuko dira: ea erantzuna proban planteatu den egoerari egokitu zaion, plazari dagozkion abilezia teknikoak eta ezagutzak erakutsi diren eta ezagutza eta abilezia horiek uztartzeko gaitasuna erakutsi den. Beste alderdi hauek ere baloratuko dira: analisi- eta sintesi-gaitasuna izatea, erantzunak arrazoitzea, kontzeptu eta terminologia doiak erabiltzea, ideiak ordena egokian eta argitasunez garatzea eta idatzizko adierazpena zuzena izatea. Epaimahaiak aurreko balorazioirizpideak garatzeko beste irizpide batzuk adostuz gero, proba egin aurretik argitaratu beharko ditu.

Epaimahaiak zuzentze-irizpideen arabera kalifikatu beharko du ariketa hau, eta deialdiaren oinarrietan berariaz azaldu ez diren alderdiak zuzentzeko, baloratzeko eta gainditzeko erabiliko diren irizpideak proba egin aurretik argitaratuko ditu.

Bigarren proba gainditzeko, oro har, 22,5 puntu lortu beharko dira gutxienez.

Dena dela, ariketa gainditu duten hautagaien kopurua deialdiko plazen kopurua baino txikiagoa bada, 18 puntu edo gehiago lortu dituzten hautagaiei ere gainditutzat emango zaie ariketa.

• 3. proba. Konpetentziak ebaluatzeko proba.

Nahitaezkoa izango da eta ez baztertzailea, eta deialdiko lanpostuak betetzeko hautagaiek duten konpetentzia-profilaren elementuak baloratuko dira proba honen bitartez. Ariketan ebaluatu daitezkeen konpetentzien profilaren elementu zehatzak Enplegu Publikoaren Atarian argitaratutakoetako bat edo batzuk izango dira. Proba egin aurretik, ezagutzera emango da konpetentzien profileko zer elementu neurtu ahal izango diren, zer proba mota egingo den/diren (nortasunari, konpetentziei edo gaitasunei buruzko test edo galdetegiak, elkarrizketak, sarrera-ontziak, egoera-probak, talde-dinamikak, rol-probak, kasu-azterketak, ahozko aurkezpenak eta beste proba batzuk), zenbat iraungo duen probak eta haztapen eta baloraziorako zer irizpide erabiliko diren.

Proba honek 5 puntuko balorazioa izango du gehienez.



• Lehiaketa–fasea.

Lehiaketa–fasean, gehienez 45 puntu lor daitezke, baremo honen arabera lortutako puntuak batuz:

• Emandako zerbitzuengatiko esperientzia. Esperientziatzat hartzen dira edozein administrazio publikotan, organismo autonomotan, zuzenbide pribatuko erakunde publikotan, unibertsitate publikotan, estatutu–organoetan eta organo konstituzionaletan, edota justizia–administrazioan emandako zerbitzuak, funtzionario–harremanekoak nahiz lan–kontratuko harremanekoak izan:

Euskal Autonomia Erkidegoko Administrazio orokorrean eta haren administrazio instituzionalean emandako zerbitzuak:
– Indarrean dagoen lanpostu–zerrendan lehentasunezko eskala Espetxe Administrazioko Kidego Teknikoko Gizarte–laneko Eskala duten lanpostuetan.
– Espetxe Administrazioko Kidego Teknikoko Gizarte–laneko Eskalako izendapenarekin edo pareko kategoriako lan–kontratuarekin.

Gainerako administrazio eta erakundeetan emandako zerbitzuak: Kidego/eskala/aukerako izendapenarekin edo lan–kategoria kontratuarekin emandako zerbitzuak Espetxe Administrazioko Kidego Teknikoko Gizarte–laneko Eskalaren pareko funtzioekin..

Zenbaketa egiteko, eskatutako betekizunak betetzen dituzten azken 10 urteetako lan–aldiak batuko dira, eta, batu ondoren, hilabetetik beherako zatikiak kenduko dira. Horretarako, 30 eguneko multzoa hartuko da hilabetetzat.

Esperientzia hori baloratzeko, 0,45 puntu emango dira lan egindako hilabete bakoitzeko, eta gehienez 27 puntu lortu ahal izango dira.

Seme–alabak zaintzeko, senideak zaintzeko, genero–indarkeriagatiko edo indarkeria terroristagatiko eszedentzian emandako denbora esperientzia gisa baloratuko da erreserbako lanpostuan.
Esperientzia kidego eta eskala bakar batera sartzeko soilik alegatu ahalko da.

• Tituluak, gehienez 18 puntu.

Ez dira merezimendu gisa baloratuko sartzeko betekizuna den edo merezimendu gisa baloratu den goi–mailako titulu bat lortzeko behar diren tituluak. Aurreikuspen horretatik salbuetsita daude master ofizialeko titulua eta espezialista–tituluak lortzeko behar diren tituluak

– 10,80 puntu emango dira deialdiko lanpostuen eginkizunekin zerikusia duten master ofizialengatik. Hautaketa–prozesuko epaimahaiari dagokio balora daitezkeen masterrak zehaztea, Giza Baliabideen Zerbitzuak horretarako emango dituen txostenak aztertu ondoren.

– 7,2 puntu emango dira ikasketa–eremu hauetako titulu bakoitzeko (gradua, lizentzia edo diploma):

031301 Psikologia
011101 Pedagogia
011901 Gizarte–hezkuntza
031402 Kriminologia
042101 Zuzenbidea

Gradu–, lizentzia– edo diploma–tituluen kasuan, titulu bakarra baloratuko da ikasketa–eremu bakoitzeko. Era berean, aipatutako tituluen mailetan, ez dira baloratuko sartzeko betekizun gisa alegatutako tituluaren ikasketa–eremu berekoak direnak, master ofizialeko tituluak izan ezik.

Oinarri orokorretako 7.ean adierazitako lekuetan argitaratzen dira ikasketa–eremu bakoitzean sartzen diren tituluak. (PDF, 4 MB)

• Euskara jakitea.

Hizkuntza–eskakizunek derrigortasun–data igarota ez dutelako euskara jakitea betekizun gisa eskatzen ez den lanpostuetan bakarrik baloratuko da. Baremo honen arabera baloratuko da euskara jakitea:

Euskal Autonomia Erkidegoko Administrazio Orokorraren eta haren organismo autonomoen hizkuntza–eskakizunen baliokide diren ziurtagiri eta tituluak dekretu hauetan zehaztuta daude: 297/2010 Dekretua, azaroaren 9koa, Euskararen jakite–maila egiaztatzen duten tituluak eta ziurtagiriak baliokidetu, eta Hizkuntzen Europako Erreferentzia Marko Bateratuko mailekin parekatzeko dena, eta 47/2012 Dekretua, apirilaren 3koa, Euskaraz egindako ikasketa ofizialak aintzat hartzeko eta euskara–maila hizkuntza–tituluen eta ziurtagirien bidez egiaztatzetik salbuesteko dena.

Eskaerak eta hautaketa-prozesuen jarraipena

Eskabidea bide elektronikoz aurkezteko, Enplegu Publikoaren Atariko helbide elektronikoa erabili beharko da (https://www.euskadi.eus/enplegu–publikoa/), eskabidea bete ahala adierazten diren argibideei jarraituz. Horretarako, nork bere burua identifikatu beharko du, Euskal Autonomia Erkidegoko Administrazio Orokorrean onartutako edozein bitarteko erabiliz (https://www.euskadi.eus/identifikazio-elektronikorako-onartutako-bitartekoak/web01-sede/eu/), edo eskabidea bete ondoren aplikazioak berak ematen duen aldi baterako erabiltzailearen bidez. Aldi baterako erabiltzaile hori eskabidea kontsultatzeko bakarrik erabili ahal izango da. Gainerako izapideak egiteko, beharrezkoa izango da identifikazio elektronikorako onartutako bitartekoren bat edukitzea.

Eskabide elektronikoa Eusko Jaurlaritzako KZ–Gunea zentro publikoetan ere egin ahal izango da. KZguneen zerrenda eta kokapena helbide honetan ikus daitezke: www.kzgunea.eus.

• Oinarri orokorrak
• Oinarri espezifikoak

Espetxe-administrazioko Kidego Teknikoko gai-zerrenda orokorraren bibliografia (2026ko maiatza) (PDF, 377 KB)

1. Gizarte-zerbitzuen sistema publikoa gizarte-ongizateko politika baten esparruan. Gizarte-zerbitzuen definizioa eta helburuak. Pertsona ardatz duen arretaren printzipioak. Gizarte-langilearen eginkizunak barneratuei arreta ematean. Koordinazioa baliabide komunitarioekin eta gizarteratzeko programak.

2. Euskal Autonomia Erkidegoaren esparru juridikoa gizarte-zerbitzuen arloan. Gizarte Zerbitzuei buruzko EAEko Legea eta araudi osagarria. Gizarte Zerbitzuen Euskal Sistemaren xedapen orokorrak. Prestazioak, antolaketa funtzionala eta lurraldekoa. Funtzioen eta lurraldearen antolamendua. Gizarte-arloko esku-hartzearen plangintza eta koordinazioa.

3. Zerbitzuak eta prestazio ekonomikoak eskuratzeko betekizunak eta irizpideak. Hautagarritasun-irizpideak eta dokumentu-betekizunak. Eskaera eta gizarte-ebaluazioa egiteko prozedurak. Koordinazioa espetxe- eta udaletako gizarte-zerbitzuekin.

4. Gizarte-zerbitzuen erabiltzaileen eskubide eta betebeharrak. Informazioa jasotzeko, parte hartzeko eta laguntzeko eskubideak. Laguntzeko eta arauak betetzeko betebeharrak. Erreklamazioak eta kexak egiteko prozedurak.

5. Inklusiorako eta Diru-sarrerak Bermatzeko Euskal Sistema. Diru-sarrerak bermatzeko errenta. Gizarte-larrialdietarako laguntzak. Koordinazioa aske utzitakoak gizarteratzeko programekin.

6. Mendekotasuna: arau- eta zuzenbide-esparrua. Mendekotasun-egoeran dauden pertsonentzako arreta. Laguntza eta zerbitzu motak. Balorazioa, etxeko programak eta mendekotasunaren eta espetxe-sarearen arteko koordinazioa.

7. Gizarte Segurantzaren egungo prestazioak. Aldi baterako ezintasuna eta ezintasun iraunkorra: mailak, betekizunak eta zenbatekoa. Kotizazio gabeko erretiro- eta ezintasun-pentsioak. Langabezia-prestazioak eta gizarte-laguntza osagarria.

8. Etika profesionala, konfidentzialtasuna eta datuen babesa. Gizarte-laneko kode deontologikoa. Informazioaren kudeaketako jardunbide egokiak. Datu pertsonalen babesa eta konfidentzialtasuna espetxean.

9. Gizarte-lanean esku-hartzeko ereduak. Pertsona ardatz duen arreta integralaren eredua. Banan-banako ikuspegia eta familiako ikuspegia. Koordinazioa beste profesional batzuekin eta baliabide komunitarioekin.

10. Gizarte-lana banakako eta familiako arretan. Gizarte-arloko esku-hartzea egiteko metodologia, banan-banako esku-hartze planak, helburuen jarraipena, ebaluazioa eta laguntza.

11. Gizarte-arloko esku-hartzea egiteko funtsezko teknikak. Gizarte-arloko elkarrizketa, behatzea, etxez etxeko bisitak, informazio bilketa eta balorazio-tresnen erabilera.

12. Gizarte-lana talde-eremuan. Taldeen metodoa, dinamika, antolaketa eta barneratu-taldeen koordinazioa espetxeetan. Taldekako emaitzen ebaluazioa.

13. Gizarte-lana eremu komunitarioan eta sarean. Gizarte-arloaren diagnostiko komunitarioa, sarean esku-hartzeko programen plangintza, koordinazioa udaletako gizarte-zerbitzuekin, GPEekin eta hirugarren sektorearekin.

14. Espetxeko gizarte-langilearen eginkizunak eta rola. Lanpostuaren definizioa, eskumenak eta bilakaera historikoa. Gizarte Laneko Prozeduraren Eskuliburua.

15. Barneratuentzako eta aske utzitakoentzako asistentzia-laguntzak. Prestazio ekonomikoak eta asistentzialak. Familiaren arreta. Koordinazioa kanpoko baliabideekin.

16. Hirugarren sektoreko erakundeak eta boluntarioak espetxe-testuinguruan. Boluntarioen eginkizunak. Gizarte-laguntzako programak. Koordinazioa gizarte-zerbitzuekin.

17. Etxerik gabeko pertsonekin esku-hartzea. Ezaugarri psikosozialak. Ostatu baliabideak. Gizarte-langilearen esku-hartzeko estrategiak.

18. Zailtasun-egoeran dauden emakumeekiko esku-hartzea. Faktore espezifikoak. Esku-hartzeko eta laguntza integrala emateko programak.

19. Adinekoen arreta espetxeen testuinguruan. Zahartzaroa eta premia espezifikoak Arreta programak.

20. Droga-mendekotasunak: esku-hartzea eta espetxeetako programak. Alderdi bio psikosozialak. Mendekotasuna gainditzeko programak. Esku-hartzea.

21. Desgaitasuna: motak eta laguntzak. Desgaitasun fisikoak, psikikoak eta sentsorialak. Irisgarritasuna eta laguntza-baliabideak.

22. Desgaitasuna duten pertsonentzako laguntza-neurriak eta gaitasun juridikoa. Kuradoretza, defendatzaile judiziala eta izatezko zaintza. Eskubideen babesa.

23. Gaixo mentalen arreta espetxean. Beharrizanak identifikatzea. Laguntza-programak. Koordinazioa sanitarioa eta soziala.

24. Barneko etorkinekin esku hartzea. Egoera administratiboa, lan-baimenak eta egoitza. Laguntza soziala.

25. Informazioaren teknologia berriak gizarte-lanari aplikatuta.
IKTen erabilera. Dokumentuen kudeaketa. Koordinazioa eta jarraipena.

26. Barneratuen profila eta espetxeetako tipologiak. Sailkapena, profil soziodemografikoak, gizarte-zaurgarritasunaren faktoreak.

27. Barneratuaren gizarte-arloko ebaluazioa eta txostenak. Elkarrizketak, tresnak, txostenak lantzea.

28. Barne-gatazken kudeaketa, bitartekaritza eta indarkeriaren prebentzioa. Bitartekaritza, ebazpen baketsua eta prebentzioa.

29. Jokabide autolesiboen eta suizidioaren prebentzioa. Alerta-faktoreak, prebentzio-protokoloak.

30. Askatasunerako prestatzea eta gizarteratzearen ebaluazioa. Aske geratzeko unea planifikatzea. Gizarte-babesa eta jarraipena.