Liburutegi Zerbitzua

Dekretu honen xedea Deba eta Zumaia arteko itsasertza babesteko araubide juridiko berezia ezartzea da. Horretarako, Babestutako Biotopo izendatu da, Euskal Herriko Natura Babesteko ekainaren 30eko 16/1994 Legearen 15. artikuluan ezarritakoaren babesean.

Deba eta Zumaia arteko itsasertzaren eremuko Natura Baliabideak Antolatzeko Plana otsailaren 10eko 33/2009 Dekretuaren bidez onartu zen, eta plan horretan ezarritako jarraibideetan, araubide juridiko bereziak helburu hauek izango ditu:

1. Labarren aurrealdeko geologia-ondarea zaindu egingo dela bermatzea.

2. Eremuan sortzen diren geomorfologia-prozesuak mantendu egingo direla ziurtatzea: bereziki, zabalguneari eta labarrei lotuak.

3. Itsasbazterreko eremuko paisaia kudeatzea, eta andeatu eta sinplifikatzea ekiditea.

4. Eremuko sistema eta prozesu ekologiko berezien iraunkortasuna ziurtatzea eta marea barneko zerrendatik hurbil daudenei arreta berezia eskaintzea.

5. Zaintzarekin bateragarriak diren ohiko erabilerak mantendu eta garatzea.

6. Natura-ingurunea, zaintzarekin bateragarriak izango diren ikerketa eta aisialdiko erabileretarako gune izatea bermatzea.

1. Deba eta Zumaia arteko itsasertzeko Babestutako Biotopoan, 33/2009 Dekretuan onartutako Natura Baliabideak Antolatzeko Planean deskribatu eta irudikatutako geografia-eremua sartuko da.

2. Deba eta Zumaia arteko itsasertzeko Babestutako Biotopoak 4.299,7 ha-ko azalera hartzen du Deba eta Zumaiako udalerrietan, Gipuzkoako Lurralde Historikoan.

1. Natura baliabideen babes osoa bermatzeko eta ekologia nahiz paisaiaren alorretan kanpotik etor daitezkeen eraginak saihesteko, babeserako gune periferikoa ezarri da. Otsailaren 10eko 33/2009 Dekretuan onartutako Natura Baliabideak Antolatzeko Planean dago deskribatuta eta irudikatuta gune hori.

2. Babeserako gune periferikoan, Deba eta Zumaia arteko itsasertza Babestutako Biotopo izendatzeko adierazpenaren oinarri diren helburuak edo Natura Baliabideak Antolatzeko Planean ezarritako helburuak lortzea eragotzi edo zaildu dezakeen jarduera oro, organo kudeatzaileak baimendu beharko du.

3. Errealitate fisikoan edo biologikoan ondorioak izan ditzakeen edo aldaketak eragin ditzakeen edozein jarduera mugatu edo eten ahal izango du Babestutako Biotopoa kudeatzeko organoak, babeserako gune periferikoan, xedapen honetan ezarritakoaren arabera: Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legearen 54.1.f) artikulua.

1. Deba eta Zumaia arteko itsasertzeko Babestutako Biotopoa Gipuzkoako Lurralde Historikoan eskumena duen foru-organoak kudeatuko du.

2. Deba eta Zumaia arteko itsasertzeko Babestutako Biotopoa kudeatzeko organoak biotopoaren zuzendari-artatzaile bat izendatuko du. Bere zereginak, Euskal Herriko Natura Babesteko ekainaren 30eko 16/1994 Legearen 34. artikuluan ezarritakoak eta berariaz agintzen zaizkionak izango dira.

16/1994 Legearen 35.2. artikuluan aipatzen den lankidetzaren esparruan, organo kudeatzaileak hitzarmenak izenpetuko ditu beste administrazio publikoekin: bereziki, Nekazaritza, Arrantza eta Elikadura Saileko Arrantza Sailburuordetzarekin, itsasoko ingurunean zaindu eta ikuskatzeko. Zumaiako Udalak kudeatzen duen Algorri ezagutzeko zentroaren ibilbidea kontuan izanda, lankidetza-hitzarmenak izenpetuko ditu udal horrekin, bi erakundeen artean behar den koordinazioa bermatzeko.

1. Deba eta Zumaia arteko itsasertza Babestutako Biotopo izendatzeko adierazpenak berekin dakar erabilera publikoaren adierazpena, dagozkion ondasun eta eskubideak desjabetzeari begira.

2. Dekretu honetan edo Natura Baliabideak Antolatzeko Planean ezarritako xedapenak ezartzeko jabetza pribatua edo eskubideak eta legezko ondare-interesak kentzean, kalte-ordaina jasotzeko eskubidea izango dute ondare eta eskubideen titularrek, indarrean dagoen legerian ezarritakoaren arabera.

Eskumena duen organoaren bitartez lehentasunez erosteko eta atzera eskuratzeko eskubideak egikaritzea Gipuzkoako Foru Aldundiari dagokio, Babestutako Biotopoaren barnean dauden lursailak bizidunen artean kostu bidez eskualdatzeko egintza guztietan.