Liburutegi Zerbitzua

1. – Dekretu honen helburua da etxe eta merkataritza erabilerako eta erabilera kolektiboko gasa hartzeko instalazioak erabili edo zerbitzuan hasi ostean egin beharreko aldizkako kontrolak arautzea.

2. – Dekretu honetako xedapenak era guztietako gas instalazioei aplikatuko zaizkie. Beraz, gas naturaleko nahiz petrolio-gas likidotuko instalazioei aplikatuko zaizkie, eta berdin dio gasa hornitzeko edo banatzeko era zein den, kanalizatua ala enbasatua.

3. – Dekretu honetan aurreikusitako kontrol sistema honako instalazio hauei aplikatuko zaie: instalazio hartzaileei eta gasa kontsumitzen duten aparailuei, hartuneko giltzaren eta horien artean dauden gas-bide eta akzesorioak barne, hartuneko giltza bera izan ezik.

1. – Dekretu honen ezarpen eremuan dauden instalazioak, instalazio mota kontuan hartuta, aldizka ikuskatu edo berrikusi beharko dira.

2. – Instalazioen aldizkako ikuskapenak egitea gasa banatu eta merkaturatzen duen enpresaren baten bete beharra ez bada, halakoetan ezinbestean egin beharko da instalazioaren berrikusketa.

1. – Hornidura-kontratuen titularrek edo, halakorik egon ezik, instalazioen erabiltzaileek izango dute Dekretu honetan aurreikusitako aldizkako kontrolak egiteko erantzukizuna, bai eta instalazioak erabiltzeko moduan mantentzeko erantzukizuna ere.

2. – Ondorio horietarako, gasa banatu eta merkaturatzen duten enpresekin elkarlanean arituko dira ikuskapenak egin ahal izateko, edo bestela, instalazioa egin duen enpresarekin kontratu bat egingo dute berrikusketak enpresak egin ditzan. Horrez gain, enpresari instalazioetan sartzen uzteaz gain, instalazioetan ikusten diren akatsak konpontzeko egin beharreko guztiak egingo dituzte.

   Gainera, gasa banatu edo merkaturatzen duen enpresek edo aparailuen fabrikatzaileek ematen dizkieten segurtasunari buruzko gomendioak aintzat hartu beharko dituzte.

1. – Oro har ikuskapenak eta berrikusketak egiten direnean, erregelamendua betetzen den ala ez ikusi beharko da, beti ere aplikagarria den araudian aurreikusita dauden irizpideak kontuan hartuta; eta horretarako, nola funtzionatzen duen eta zein egoeratan dagoen ikusteko egin beharreko proba eta egiaztapen guztiak egingo dira.

2. – Ikuskapena edo berrikusketa instalazio indibidualari eta instalazio komunari, halakorik egonez gero, egingo zaizkio.

3. – Proba horiek egiteko ekipamendua behar bezala kalibratuta eta erabiltzeko moduan egon beharko da erabili behar den bakoitzean.

4. – Ikuskatu edo berrikusi beharreko atala kontuan hartuz gero, honakoa izango da bakoitzaren helmena:

1. – Instalazio indibidualak.

   1. Gas-zirkuitua.

      Instalazioaren egoera ikusteko azterketa bat egingo da, eta horrez gain, egiaztatuko da ea gas-zirkuituaren estankotasuna zerbitzuko presioarekiko egokia den, hasi abonatuaren giltzatik eta aparailu guztiek funtzionatzeko behar duten ixte-elementuetara arte. Azterketa hau egiteko, doitasun egokiko manometroak edo bentometroak, kontagailuaren metrika edo zeregin honetarako egokia den beste edozein tresna erabili ahal izango dira. Bestalde, trazatu guztira heltzea erraza bada, gas detektorea erabili ahal izango da, eta aurreko guztiak ezin badira erabili, gas-ihesa detektatzeko sistemaren bat erabiliko da.

      Petrolio-gas likidotuko botilarik badago biltegiratuta, eta 35 kg-ko edo gutxiagoko edukierako bada, egiztatu egin beharko da ia erregelamenduzko baldintzak betetzen dituzten.

   2. Aparailuen funtzionamenduaren gaineko segurtasuna.

      Instalatutako aparailu guztien erregailuen errekuntza eta funtzionamendu egonkorra egiaztatu beharko dira, eta erabilera posizio guztiak hartuko dira kontuan. Horrez gain, garra itzaltzeko sistemaren segurtasuna ere egiztatu beharko da, era horretako gailuak behar dituzten aparailuetan. Aparailuetara doan elikadura-presioa egokia dela egiaztatu beharko da, baina egiaztapena egiteko, elementu finkoak desmuntatu beharrik ez badago.

      Hustuketa bideratua duten zirkuitu irekiko aparailuak lokal itxietan badaude, edo garra ezkutuan duten aparailuak badira,(bitrozeramikasukaldeak, frigigailuak eta abar) CO-aren isurketa neurtu beharko da, bai eta lokaleko giroan dagoen CO-aren kontzentrazioa ere. Neurketa egiteko, ateak eta leioak itxita egon beharko dira eta aparailu guztiak martxan gehinezko potentzian. Detektore egokia erabili beharko da, eta detektorea aparailutik metro batera eta lurretik 1,80 metrora egon beharko da gutxi gora-behera, eta aparailua martxan hasten denetik 5 minutura egin beharko da neurketa.

      Zirkuitu irekiko galdarak dauden lokalean ke-kanpairik egonez gero, egiaztatu egin beharko da ea segurtasuneko katigamendua erabiltzeko moduan dagoen eta ea behar bezala dabilen.

   3. Lokalaren aireberritze sistema.

      Lokalean instalatuta dauden aparailuak ikusita, aireberritzea egokia den ala ez egiaztatu beharko da.

   4. Errekuntzako produktuentzako hustuketa sistema.

      Hustuketa sistemak beharrezkoak badira, egiaztatu beharko da ea hustuketa sistemarik dagoen eta ea eraginkorrak diren, eta ke-kanpaiak duen eragina bereziki egiaztatu beharko da. Bestalde, erregelamenduzko aireberritzea baino ez bada erabiltzen, hustuketa bideratua duten aparailuak martxan dabiltzan bitartean, ezin izango da errekuntzako produkturik atzera bota.

   5. Lokala.

      Aparailuak dauden lokalak eta konduktuek zeharkatzen dituzten lokalak egokiak diren ala ez egiaztatu beharko da.

2. – Instalazio komunak.

   1. Gas-zirkuitua.

      Instalazioaren egoera ikusteko azterketa bat egin beharko da eta, horrez gain, egiaztatuko da ea gas-zirkuituaren estankotasuna egokia den, instalazio indibidualak hasten diren lekura arte. Horretarako, gas-detektorea, doitasun egokiko manometroak edo bentometroak, kontagailuaren metrika edo zeregin honetarako egokia den beste edozein tresna erabili ahal izango dira.

   2. Erregulazioa eta kokapena.

      Lokala eraikin barruan egonez gero, lokalaren erregulazioa eta aireberritze baldintzak egiaztatu beharko dira, bai eta erregulazio-presioa eta haren segurtasunak ere.

   3. Kontagailuak zentralizatzeko armairua edo esparrua.

      Egiaztatu beharko da kontagailuak zentralizatzeko armairua edo esparrua egokia dela, hau da, erregelamenduaren araberakoa dela.

Aurreko artikuluan aurreikusitako kontrolaz gain, bi urtean behin berrikusi egin beharko dira 15 kW baino potentzia gehiago duten kontsumoko aparailuak, hartara, segurtasun betekizunak mantendu eta funtzionamendu baldintzak hobetzeko, bai eta isuri atmosferikoak gutxitzeko ere. Berrikusketa hau aparailuaren Asistentzia Teknikoko Zerbitzuak (SAT) edo aparailuaren fabrikatzaileak behar bezala baimendutako entitateren batek egin beharko du, eta fabrikatzaileak baimena eman duela egiaztatzen duen agiria luzatu beharko du.

1. – Instalazioak ikusi ostean, ikuskatzaileak esan beharko du zeintzuk akats ikusi dituen eta akatsak ebaluatu beharko ditu. Horrez gain, ikuskatzaileak adierazi beharko dio instalazioaren titularrari edo erabiltzaileari zein epe duen gasa banatu eta merkaturatzen duen enpresaren aurrean akatsa konpondu duela egiaztatzeko.

2. – Akatsak ebaluatzean, akatsok ekar dezaketen arriskua hartuko da kontuan, eta indarrean dagoen araudi teknikoetan adierazitako irizpideak erabiliko dira.

3. – Hala ere, beharrezkotzat jotzen bada, behin-behineko segurtasun neurriak hartuko dira harik eta akatsak konpondu arte.

4. – Dekretu garatzen duten xedapenetan zehaztuko dira akats bakoitzaren sailkapena eta akatsa konpondu dela egiaztatzeko epea.

Instalazioak ikuskatu eta berrikusi ostean, Dekretu hau garatzen duten xedapenetan zehazten den agiri-ereduetan adierazi beharko dira emaitzak. Ikuskapena edo berrikusketa egin eta gero, akta erabiltzaileari emango zaio.

1. – Ikusten diren akatsak ahalik eta arinen konpondu beharko dira, eta derrigorrezkoa izango da akatsak konpondu direla egiaztatzea gasa banatu edo merkaturatzen duen enpresaren aurrean. Gainera, kontroleko aktan adierazitako epeetan egiaztatu beharko dira, eta akatsa konpondu dela egiaztatzeko, konponketa-egiaztagiria aurkeztu beharko zaio enpresari.

2. – Akatsa aparailu batean ikusi bada, baimendutako enpresa instalatzaile batek edo asistentzia teknikoko zerbitzuak konpondu beharko du, eta akatsaren konponketa-egiaztagiria luzatu beharko du. Salbuespen moduan, erabiltzaileak aukera izango du berak egiaztatzeko honako akatsak hauek konpondu dituela: elastomerozko tutu malguak aldatzea, aire-berritze arazoak konpontzea edo ke-kanpaiaren eta galdararen arteko katigamendua instalatzea.

Gasa banatu edo merkaturatzen duen enpresako pertsonalak eta enpresa instalatzaileko pertsonalak gas instalatzailearen lanbide karneta beharko du instalazioak ikuskatu edo berrikusi ahal izateko. Bestalde, lanbide karnetaren kategoria instalazio motaren araberakoa izan beharko da.

Gasa banatzen duten enpresek kontrol prozeduraren bat izan beharko dute, egiten diren ikuskapen edo berrikusketen eta akats-konponketen jarraipena egiteko. Bestalde, industria gaietan eskumena duen organoak onartu beharko du prozedura hori, eta prozedura onartzeko, Dekretu hau garatzen duten xedapenetan ezartzen dena hartu beharko du kontuan.

1. – Hidrokarburoen arloari buruzko urriaren 7ko 34/1998 Legearen 79. artikuluan xedatutakoak dioenez, ordainketa-polizan edo hornidura-kontratuan argi eta garbi jaso beharko dira honako hauek: batetik, instalazioaren titularrek edo erabiltzaileek instalazioa behar bezala mantentzeko betebeharra dutela, eta bestetik, instalazioa ikuskatu eta berrikusteko betebeharra dutela, eta Dekretu honetan aurreikusten diren epeetan egin beharko dutela.

2. – Horrez gain, Dekretu honetan ezarritakoa kontuan hartuta, poliza berrietan gogorarazi beharko da zein den gas hornidura eteteko erregimena, eta erregimen hori aplikatuko dela baldin eta instalazioren batean ikuskapenik edo berrikusketarik egiten ez bada erabiltzailearen edo titularraren erruagatik.

1. – Mota honetako instalazioei aplikatu ahal zaien araudian jasota dago gasa banatzen duten enpresek noiz eten dezaketen gas hornidura. Hala ere, kasu horietaz gain, honako hauek gertatuz gero ere, eten egin ahal izango dute hornidura:

   1. Kontroletan akats larriak ikusten badira.

   2. Titularrak ez badu betetzen instalazioa ikuskatu edo berrikusteko eginbeharra, hau da, ez badu Dekretu honetan ezarritakoa betetzen.

2. – Hornidura etenda egongo da akatsak konpondu arte edo ikuskapena edo berrikusketa egin dela egiaztatzen den arte.

3. – Dekretu hau garatzen duten xedapenetan ezartzen dena kontuan hartuta, gasa banatu edo merkaturatzen duten enpresek industria gaietan eskumena duen lurralde organoari jakinarazi beharko dizkiote hornidura eteteko hartu dituzten erabakiak, eta argi eta garbi adierazi beharko dute zergatik hartu duten erabaki hori eta zein prozedura erabili duten.

4. – Hornidura ezin bada eten, eta horren errua instalazioaren titularrak edo erabiltzaileak badu, gasa banatu edo merkaturatzen duen enpresak horren berri eman beharko dio industria gaietan eskumena duen lurralde organoari, eta egindako izapideak adierazi beharko dizkio, bai eta zergatik ezin izan den hornidura eten ere.

Erabiltzaileak ez badaude ados enpresa instalatzaileek edo gasa banatu edo merkaturatzen duten enpresek burututako jarduerekin, erreklamazioak aurkeztu ahal izango dituzte industria gaietan eskumena duen lurralde organoan.

Gasa banatzen duen enpresak ikuskatu beharko ditu kanalizazio bidezko banaketa sareetatik elikatzen diren instalazio hartzaileak, dekretu honetan xedatutakoakoaren arabera.

Era berean, erabiltzaile bati baino gehiagori zerbitzua ematen dien petrolioaren gas likidotuen (PGL) edukiontzietatik hornitutako instalazio hartzaileei dagokionean, gasa banatzen duen dena delako enpresa arduratuko da ikuskatzeaz.

1. – Gerta daiteke kontratu bat baino gehiago egotea, eta, horregatik, gasa banatzen duten enpresak bik hornitzea instalazio bera. Horrelakoetan, nahikoa da enpresa bakar batek ikuskatzea instalazioa.

2. – Ikuskapena egiteko epea bukatzen den unean instalazioa hornitzen ari den enpresak berak ikuskatuko du instalazioa.

1. – Ikuskapena gasa banatu edo merkaturatzen duten enpresek egingo dute, eta zuzenean egin dezakete, hau da, haien langileen bitartez, edo enpresa instalatzaile baten bitartez edo arauzko arlo honetan behar bezala baimendutako kontrol erakunde baten bitartez.

2. – Ondorio horietarako, enpresa instalatzaile batek edo kontrol erakunde batek egindako ikuskapenak gasa banatu edo merkaturatzen duen enpresak egindako ikuskapenak duen balio bera izango du, eta azken hori izango da erantzule bakarra bai erabiltzaile edo titularraren aurrean bai administrazioaren aurrean.

1. – Hornidura-kontratua duten guztiek egin beharko dute 4 urtean behin ikuskapena. Kontrola epealdi hori bukatzen den urte naturalaren barruan egin beharko da.

2. – Gas kanalizatua banatu edo merkaturatzen duen enpresak aurretiaz jakinarazi beharko dio instalazioaren titularrari edo erabiltzaileari noiz egingo den ikuskapena.

1. – Ikuskapena ezin izan bada egin gasa banatu edo merkaturatzen duen enpresak esandako egunean, eta berdin dio zergatik ezin izan den egin, enpresak eskatu beharko dio titularrari enpresarekin harremanetan jartzeko, eta horretarako hilabeteko epea emango dio. Horrela, bien artean adostuko dute kontrola zein astegun eta zein lanordutan egingo duten.

2. – Titularra ez bada enpresarekin harremanetan jartzen, instalazioaren titularrak bere gain hartu beharko ditu kontrola egiteko jarduera guztiak, eta ikuskapena egiteko gestio guztien ardura hartu beharko du, gehienez ere hiru hilabeteko epean ikuskapena egin dezan. Aurreko paragrafoan adierazitako epea bukatu eta gero hasiko da 3 hilabeteko epea.

3. – Hiru hilabeteko epea igarotzen bada, eta ikuskapenik ez bada egin, gasa banatu edo merkaturatzen duen enpresak eten egin beharko du hornidura, eta Dekretu honetako 12. artikuluan adierazitako moduan etengo du hornidura.

4. – Hornidura eten baino lehen edo eteten den unean bertan gasa banatu edo merkaturatzen duen enpresak hornidura eteteko erabakiaren berri eman behako dio titularrari edo erabiltzaileari.

Gasaren enpresa instalatzaile baimenduak egin beharko dituzte gas enbasatuko (botilak) instalazioen eta GLP biltegiratzeko edukiontzi finkoetako aldizkako berrikusketak.

1. – Hornidura-kontratuen titularrek lau urtean behin egin berrikusi beharko dute instalazioa, eta lau urteko epea bukatzen den urte naturalaren barruan egin beharko dute.

2. – Gas enbasatua banatzen duen enpresak aurretiaz jakinarazi beharko dio instalazioaren titularrari edo erabiltzaileari instalazioa berrikusi behar duela nahitaez, eta argi eta garbi adierazi beharko dio berrikusketa egiteko epea noiz bukatzen den.

1. – Enpresa instalatzaileren batek gas enbasatuko instalazioetan Dekretu honetan jasotako berrikusketak egiteko asmoa badu, era horretako jarduerak egiten hasi baino lehen, ezinbestez eskuratu behar du gasaren enpresa instalatzailearen ziurtagiria (ikusi maiatzaren 17ko 175/1994 Dekretuan xedatutakoa), eta, horrez gain, dekretu hau garatzen duten xedapenetan ezartzen diren bitartekoak eta baliabide teknikoak dituela egiaztatu beharko du.

2. – Era berean, berrikusketa egiten duen enpresa instalatzaileak berrikusketa-aktaren kopia bat bidali beharko dio gasa banatzen edo merkaturatzen duen enpresari eta beste kopia bat gordeko du artxiboan, harik erregelamendu bidez ezartzen den epea bukatu arte.

1. – Berrikusketa ezin izan bada egin gasa banatu edo merkaturatzen duen enpresak esandako egunean, eta berdin dio zergatik ezin izan den egin, enpresak adierazi beharko dio titularrari hiru hilabeteko epea duela berrikusketa egiaztatzeko. Berrikusketa egiaztatzeko, titularrak Dekretu honetako 7. artikuluan aipatutako berrikusketa-akta aurkeztu beharko dio gasa banatu edo merkaturatzen duen enpresari.

2. – Hiru hilabeteko epea bukatzen bada eta ez bada aktarik aurkeztu, gasa banatu edo merkaturatzen duen enpresak berriro eskatuko dio titularrari akta aurkezteko, eta horretarako hilabeteko epea emango dio. Horrez gain, enpresak titularrari jakinaraziko dio epea bukatzen denean, horniketa eten egingo dela.

3. – Aurreko paragrafoan adierazitako epea ere bukatzen bada eta ez bada egiaztatu berrikusketa egin denik, gasa banatu edo merkaturatzen duen enpresak eten egingo du hornidura, eta titularrak edo erabiltzaileak dauzkan botila edo ontziak kenduko ditu.

4. – Hornidura eten baino lehen edo eteten den unean bertan gasa banatu edo merkaturatzen duen enpresak hornidura eteteko erabakiaren berri eman behako dio titularrari edo erabiltzaileari.