Seme-alabak zaintzeko eszedentzia edo lanaldi-murrizketa duten langileentzako laguntzak (N lerroa)

Laguntzaren helburua bizitza pertsonala, familiakoa eta lanekoa bateratzen laguntzea da. Horretarako, seme-alaba adingabeak zaintzeko eszedentzia edo lanaldi-murrizketa baten ondorioz izandako diru-sarreren galera partzialki konpentsatu nahi da.

Diruz lagundu daitezkeen jarduerak

Oro har, honako hauek lagunduko dira diruz:

• 3 urtetik beherakoak zaintzeko eszedentzia.
• 12 urtetik beherakoak zaintzeko lanaldia % 33 edo gehiago murriztea*. % 33 hori bi gurasoen murrizketak batuta lor daiteke.

*Adingabeak % 33ko desgaitasuna edo handiagoa badu, 18 urte bete arte eskatu ahal izango da murrizketagatiko laguntza.

A) Enplegu-aniztasuneko egoerak:

Diruz lagundu beharreko aldian indarrean dauden kontratu guztiak hartuko dira kontuan. Hasierako lanaldiaren arabera, dagokion laguntza kalkulatuko da.

Kontratu guztietan eszedentzia izanez gero, gehienez ere % 100eko eszedentzia lagunduko da diruz. Ez da inolaz ere portzentaje handiagorik ordainduko.

Eszedentziak kontraturen bati bakarrik eragiten dionean, lanaldi-murrizketatzat hartuko da (ikus hurrengo paragrafoa).

Lanaldi-murrizketagatiko laguntza eskatuz gero, murrizketa (k) aplikatu ondoren benetan lan egiten den ehunekoa kalkulatuko da, eta hasierako lanaldiaren gainean kalkulatuko da (murrizketaren aurretik).

• Hasierako kontratuen baturatik % 100 edo gehiagoko lanaldia ateratzen bada, lanaldi-murrizketak aplikatu ondoren lan egindako ehunekoak % 67 edo txikiagoa izan beharko du.
• Hasierako kontratuen batura % 100etik beherakoa bada, hasierako lanaldi horren % 33 murriztu beharko da gutxienez.

B) Jarduera anitzeko egoerak:

Besteren kontura lan egiteaz edo kooperatiba-sozietateetako bazkide langile edo lan-bazkide izateaz gain, aldi berean Langile Autonomoen Araubide Berezian alta emanda egotea baimentzen da.

Laguntzaren gehieneko mugak

Seme-alaba bakoitza zaintzeko gehienez ere egun bateko laguntza dago, eta egun horiek familia-unitateko gurasoen artean bana daitezke.

• Eszedentzia: 900 egun natural familia-unitate bakoitzeko, adingabe bakoitza zaintzeko.
• Murrizketa: 2.700 egun natural familia-unitate bakoitzeko, adingabe bakoitza zaintzeko.
• Biak konbinatuz gero, eszedentzia bi eguneko murrizketatzat hartuko da, eta murrizketaren gehieneko muga erabiliko da (2.700 egun).

Honako kasuistika hauetan muga horiek aldatu egiten dira:

• Erditze, adopzio, tutoretza edo adopzio edo harrera anizkoitzeko helburuko zaintza kasuetan, eszedentziak 160 egun luzatuko dira, eta murrizketak 320 egun (seme-alaba bakoitzeko, bigarrenetik aurrera).
• Zaintza eta jagoletza partekatuko kasuetan, egunak zati berdinetan banatuko dira gurasoen artean, bakoitzak eskatzen duena gorabehera: 450 egun eszedentzian eta 1.350 egun murrizketan.
• Guraso bakarreko familientzat, laguntza mugagabea izango da adingabearen 3 urtera arte eszedentzien kasuan, eta 12 urtera arte lanaldia murriztuz gero.
• Adingabeak % 33ko desgaitasuna edo handiagoa badu, laguntza mugagabea izango da adingabearen 3 urtera arte eszedentzien kasuan, eta 18 urtera arte lanaldia murriztuz gero.

Laguntzaren zenbatekoa

Laguntzaren zenbatekoa kalkulatzeko, honako aldagai hauek hartzen dira kontuan:

• Familia-errenta estandarizatua (FE).
• Kontratu mota (lanaldia).
• Laguntza mota: eszedentziagatik edo lanaldi-murrizketagatik.
• Murrizketaren kasuan, murrizketaren ehunekoa.
• Espediente bakoitzean diruz lagunduko diren egunen kopurua.

Taula honetan lanaldi osoko ( % 100) eta urte osoko (365 egun) kontratu bati dagozkion zenbatekoak agertzen dira, FEE eta murrizketa-tartearen arabera.

Esteka honetan zure kontratuaren arabera dagokion zenbatekoa eta laguntza-egunen kopurua kalkulatzeko simulagailu bat aurkituko duzu.

Zenbateko gehikuntzak

Laguntzaren zenbatekoak % 30 igoko dira (ez dira metatuko) honako kasu hauetan:

• Guraso bakarreko familiak.
• Familia ugariak.
• Mendetasun larria (II. gradua), mendetasun handia (III. maila) edo % 50eko desgaitasuna edo handiagoa duen kideren bat duten familia-unitateak.
• Genero-indarkeriaren edo sexu-indarkeriaren biktimaren bat duten familia-unitateak.

Eskatzeko epea

Laguntza-ildo horretan, beti ordaintzen dira igarotako eta egiaztatutako aldiak, inoiz ez etorkizunera begirako egunak. Horregatik, aldian-aldian aurkeztu ahal izango dira eskaerak, egiteke dauden aldiak betetzeko.

Eskatzaileak erabaki ahal izango du, bere beharren arabera, nola antolatu bere espedienteak eta noiz egin eskaera berri bat. Behar diren eskabide guztiak aurkez daitezke dagokion gehieneko laguntzara iritsi arte (diruz lagundu daitekeen jarduera amaitzeagatik, gehieneko mugara iristeagatik, etab.).

Eskabideak nola antolatu jakiteko, irizpide hauek hartu behar dira kontuan:

Lehenengo eskaera:

• Lehenengo eskabidea aurkez daiteke diruz laguntzeko moduko jarduketan (eszedentzia edo lanaldi-murrizketa) 59 egunez egon ondoren; egun solteak izan daitezke.
• Espediente bakoitzean, gehienez, eskaera egin aurreko 365 egunetan emango dira dirulaguntzak. Beraz, laguntza-egunik ez galtzeko, eszedentzia edo lanaldi-murrizketa hasi zenetik 365 egun igaro baino lehen eskatu behar duzu.

Ondorengo eskaerak:

• Ondorengo eskabideak aurkezteko, gutxienez 4 hilabete itxaron beharko da, emandako azken espedientea eskatzen den egunetik zenbatzen hasita.
• Espediente bakoitzean, gehienez ere, eskaera egin baino 365 egun lehenagoko dirulaguntzak ematen direla kontuan hartuta, diruz laguntzeko moduko jarduketako egun bakoitza 365 egun igaro baino lehen eskatu behar da.
• Beraz, laguntza-egunik ez galtzeko, ondorengo eskaerak emandako aurreko espedientetik 4 hilabete eta urte arteko epean (365 egun) aurkeztu beharko lirateke.

Ordainketa ebazpena jakinarazi eta gehienez 2 hilabeteko epean egingo da.

Hirugarrenen alta (ezinbestekoa laguntza kobratzeko)

Ordainketa egin ahal izateko, eskatzaileak alta emanda egon behar du Eusko Jaurlaritzako Ekonomia eta Ogasun Saileko Kontrol Ekonomikoko Bulegoko hirugarrenen erregistroan.

Hirugarrenen alta modu elektronikoan izapidetu daiteke (hirugarrenen erregistro telematikoaren bidez) edo aurrez aurre (herritarren arretarako bulegoetan):

• Hirugarren erregistro telematikoa: online hirugarren erregistroan alta emateko, esteka hau erabili dezakezu. Horretarako, identifikazio elektronikorako bitarteko bat eduki behar da.
• Alta presentziala hirugarren erregistroan: alta emateko edo bankuko datuak aldatzeko, aurrez aurreko bidea erabiliz, bete ezazu dagokion inprimakia ("dokumentazioa eta eranskinak" ataleko C eranskina), eta "laguntza non eskatu" atalean deskribatutako edozein lekutan eman.

Garrantzitsua: hirugarrenen alta-inprimakiak behar bezala beteta, data jarrita eta sinatuta egon behar du.

Pertsona bakoitzak banku-kontu bakarra izan dezake elkartuta.

Kontu-zenbakia aldatu nahi izanez gero, eskatzaileak lehenbailehen izapidetu beharko du aldaketa, aurretik azaldutako bi moduetako edozeinetan: telematikoki edo aurrez aurre.