Bilboko Udaleko Osasun eta Kontsumo Sailak sustatuta, azarotik abendura bitartean kalistenia saioak antolatu ziren Susterra elkartearentzat. Elkarte hori Bilboko 5. barrutian dago, eta hiru helburu nagusi ditu: gazteen gizarteratzea, komunitate-partaidetza eta helduarorako trantsizioa bultzatzea.

Kalistenia programan 17 gaztek parte hartu zuten, 16 mutil eta neska bakarrak, herrialde eta kultura desberdinetakoak. Parte-hartzaile gehienak magrebtarrak ziren eta ez zuten etxerik, eta horrek batzuetan saioetara bertaratzea zailtzen zien. Era berean, parte-hartzaile batzuek oraindik ez zuten gaztelania behar bezala ulertzen, eta, beraz, beste ikaskide batzuek begiralearen eta gainerako ikaskideen arteko komunikazioa errazten laguntzen zuten.

Saioak jarduera mota hau praktikatzeko espazioetan egin ziren, eta eskuragarri zeuden materialez eta ekipamenduez baliatu ziren. Horrela, gaitasun fisikoak lantzea lortu zen modu integralean. Saioak kalisteniaren hastapenetatik garatu ziren, eta, horri esker, bertaratutako guztiek parte hartu ahal izan zuten, beren mailen arabera edo aldez aurreko ezagupenen arabera. Horrela, ezagutza zabala lortu ahal izan zen, parte-hartzaileei gaitasun fisikoak landu eta kalistenia modu autonomo eta egokian praktikatzeko aukera emanez.

Prozesuan zehar landutako helburuei dagokienez, lehenik eta behin, jarduera eta ariketa fisikoa eginez gizarteratzea sustatu zen, parte-hartzaileen gizarte-harremanak erraztuz eta hobetuz. Horretarako, une oro giro inklusiboa eta lagunkoia sustatu zen, parte-hartzaile guztiek beren gizarte-loturak sendotzeko aukera izan zezaten.

Bigarrenik, parte-hartzaileak kontzientziatu nahi izan ziren gure eguneroko bizitzan ariketa fisikoa egiteak duen garrantziaz eta onurez, ikuspegi fisiko, sozial eta kognitibotik osasuna mantentzeko.

Prozesu horrek esperientzia oso aberasgarria ekarri zuen, bai parte-hartzaileek bai begiraleek eskuratutako ikaskuntzei esker.