Euskal Herriko Agintaritzaren Aldizkaria

64. zk., 2008ko apirilaren 4a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Nekazaritza, Arrantza eta Elikadura Saila

1952

AGINDUA, 2008ko otsailaren 22koa, Nekazaritza, Arrantza eta Elikadura sailburuarena, behien entzefalopatia espongiformea (BSE) antzemateko test azkarra egindakoan positibo eman duen kanalaren hilketa-kate bereko aurre-aurreko kanala, ondorengo biak eta hortik datozen azpi-produktuak galtzearren emango diren kalte-ordainetarako, 2008. urtean erabiliko den zenbateko osoa eta aplikatuko den kalte-ordainak emateko baremoa argitara ematekoa. Aipatutako kalte-ordain horiek martxoaren 2ko 42/2004 Dekretuan aurreikusita daude.

Martxoaren 2ko 42/2004 Dekretuak (2004ko maiatzaren 7ko EHAA, 85. zk.) Euskal Autonomia Erkidegoan, gizakiak kontsumitzekoa den animalia hildakoan (betiere, Euskal Autonomia Erkidegoan dauden eta baimen egokia duten hiltegietan hildako animaliez ari garelarik), entzefalopatia espongiformea (BSE) antzemateko test azkarra eginda positibo eman duen abereaz gainera suntsitu beharreko kanalak (alegia, hilketa-kate bereko aurre-aurretik joan den kanala eta ondoren datozen hurrengo biak) eta hortik eratorriko produktuak suntsitu eta galtzearren, abere horien jabeei kalte-ordainak emateko modua arautzen du.

Dekretuaren 3. artikuluak xedatzen du, urtero, ekitaldiko lehen hiru hilabeteen barruan, Nekazaritza eta Arrantza sailburuak agindua emango duela, eta, neurri hori betetzeko erabiliko den kopuru osoaz gainera, aplikatu beharreko baremoa ere ezarriko duela, dagokion ekitaldian ematekoak diren kalte-ordainetan bakoitzari dagokion diru-kopurua kalkulatzeko. Kalte-ordainak emateko baremoan, kanala bera ordaintzeaz gain, honako hauek ere sartuko dira: abere-hilketa, kanalak eta bere azpi-produktuak dagokion lekura eramateko eta suntsitzeko gastuak eta konfiskatutako larruaren balioa.

Bestalde, aurtengo laguntzetarako deialdia honako arau hauen babesarekin egin da: Euskal Autonomia Erkidegoko Ogasun Nagusiaren Antolarauei buruzko Legearen Testu Bategina onartzen duen azaroaren 11ko 1/1997 Legegintzako Dekretua, eta Euskal Autonomia Erkidegoko 2008ko ekitaldiko Aurrekontu Orokorrak onartzen dituen abenduaren 28ko 15/2007 Legea.

Horren indarrez, honako hau

XEDATU DUT:

Lehenengoa.– Xedea.

Honakoa da agindu honen helburua: behien entzefalopatia espongiformea (BSE) antzemateko test azkarra egindakoan positibo eman duen kanalaren hilketa-kate bereko aurre-aurreko kanala, ondorengo biak eta hortik datozen azpi-produktuak galtzearren emango diren kalte-ordainetarako, 2008. urtean erabiliko den zenbateko osoa eta aplikatuko den kalte-ordainak emateko baremoa argitara ematea. Aipatutako kalte-ordain horiek martxoaren 2ko 42/2004 Dekretuan aurreikusita daude (2004ko maiatzaren 7ko EHAA, 85. zk.).

Bigarrena.– Eskabideak aurkezteko epea.

Arestian aipatu den martxoaren 2ko 42/2004 Dekretuko 5. artikuluak ezarri duenaren arabera, eskabidea hiru hilabeteko epean aurkeztu behar da, kanala baimendutako transformazio-industria batera eramateko (gero han suntsitu dezaten), edo suntsipen-industria batera eramateko, kanala konfiskatu eta tindatzen den une horretatik hasita.

Hirugarrena.– Diru-laguntzen zenbatekoa, guztira.

Agindu hau betez emango diren laguntzen zenbateko osoa Euskal Autonomia Erkidegoko 2008ko ekitaldiko Aurrekontu Orokorren kontura joango da eta ez da 20.000 eurotik gorakoa izango. Edonola ere, indarrean dauden legeekin bat etorriz aurrekontuetan aldaketak egitea onesten bada, zenbateko hori eguneratu ahal izango da.

Halakorik gertatuz gero, aldaketa horietatik datorren aurrekontuko diru-izendapenaren berri emango da Euskal Herriko Agintaritzaren Aldizkarian argitaratutako Nekazaritzaren eta Arrantzaren Garapeneko sailburuordearen ebazpen baten bidez.

Laugarrena.– Kalte-ordainak emateko baremoa.

2008. urtean konfiskatu eta tindatu diren kanalak direla-eta emango diren kalte-ordainen baremoa honakoa izango da:

SAILKAPENA	KALTE-ORDAINA euro/kg (egurastuta)

A atala (24 hiletik beherako arrak, zikiratu gabeak)	3,95 euro

E atala (emeak, umerik egin gabeak)	4,26 euro

C eta B atala (idiak eta zezenak)	2,51 euro

DU eta DR atala (emeak, umea egindakoak)	3,23 euro

DO atala (emeak, umea egindakoak)	2,82 euro

DP atala (emeak, umea egindakoak)	1,49 euro

C atala (24 hiletik beherako arrak, zikiratuak)	4,05 euro

Bosgarrena.– Errekurtsoak.

Administrazio-bidea agortzen duen agindu honen aurka interesdunek aukerako berraztertzeko errekurtsoa aurkez diezaiokete Nekazaritza, Arrantza eta Elikadura sailburuari hilabeteko epean. Bestela, zuzenean administrazioarekiko auzi-errekurtsoa jar dezakete Euskal Autonomia Erkidegoko Auzitegi Nagusiko Administrazioarekiko Auzien Salan, bi hilabeteko epearen barruan. Kasu bietan, agindua argitaratu eta hurrengo egunetik hasiko da epea.

Seigarrena.– Indarraldia.

Agindu honek Euskal Herriko Agintaritzaren Aldizkarian argitaratzen den egunaren biharamunetik aurrera izango ditu ondorioak.

Vitoria-Gasteiz, 2008ko otsailaren 22a.

Nekazaritza, Arrantza eta Elikadura sailburua,

GONZALO SÁENZ DE SAMANIEGO BERGANZO.