1998ko apirilaren 7ko 66. zenbakiko EHAA aldizkarian argitaratutako adintsuentzako etxeetako gizarte-zerbitzuei buruzko martxoaren 10eko 41/1998 Dekretuak zerbitzu horiek Euskal Autonomia Erkidegoaren eremuan duten erregulazioa ezartzen du.

Dekretu honen bidez, zehaztasun handiagoz biribildu eta egokitu nahi dira adintsuentzako etxeetako gizarte-zerbitzuek bete beharreko gutxieneko baldintza teknikoak, materialak eta funtzionalak, era horretan erabiltzaileen eskubideen erabilera zuzena bermatzeko. Arreta berezia eskaintzen die egoiliar bakoitzak behar duen espazio fisikoari eta jaso behar duen asistentziaren kalitateari.

Martxoaren 10eko 41/1998 Dekretuaren 7. artikuluan, titulartasun pribatuko adintsuentzako etxeetako gizarte-zerbitzuek Administrazio eskudunaren aldetik behar duten baimena erregulatzen da eta, bertan adierazten denez, zerbitzu horiek dekretuaren I. eranskinetik IV.era bitartean ezarritako baldintza materialak eta funtzionalak bete beharko dituzte baimen hori lortzeko. Halaber, baldintza horiek titulartasun publikoko zerbitzuek ere bete beharko dituztela xedatzen da.

Dekretuaren lehen xedapen iragankorraren lehen puntuan, dekretua indarrean sartzen denetik urtebeteko epearen aurreikuspena ezartzen da funtzionatzen ari diren adintsuentzako etxeetako gizarte-zerbitzuen titular diren erakundeek Administrazio eskudunari funtzionamendurako aginduzko baimena eskatzeko, betiere aldez aurretik dagokien sailkapenaren arabera aplikagarri zaizkien baldintza materialak eta funtzionalak beteta badituzte.

Xedapen iragankor horren bigarren puntuan, gainera, bost urteko gehieneko epea ezartzen da Administrazio eskudunak adintsuentzako etxeetako gizarte-zerbitzuei behin-behineko baimena emateko, eraikuntza-arrazoi teknikoengatik edo beste arrazoi batzuengatik dekretuan ezarritako baldintza materialak eta funtzionalak betetzen ez dituztenean, betiere ikuskapen-txostenak egoera horrek osasunaren edo segurtasunaren arloko alderdiak eraginpean hartzen ez dituela eta erabiltzaileen bizi-kalitatean kalte larririk eragiten ez duela zehazten badu.

Dekretuaren lehen xedapen iragankorraren bigarren puntu horretan bertan gaineratzen denez, bost urteko epe hori igaro eta adintsuentzako etxeetako gizarte-zerbitzuek beren tipologiaren arabera aplikagarri zaizkien baldintza teknikoak bete ez badituzte, edota, beteta izanda ere, aginduzko behin betiko funtzionamendu-baimena eskatu ez badute, administrazio eskudunak itxi egingo du zerbitzu horiek ematen dituen zentroa.

Martxoaren 10eko 41/1998 Dekretuaren 8. artikuluan, titulartasun pribatuko adintsuentzako etxeetako gizarte-zerbitzuen homologazioa arautzen da eta, bertan adierazten denez, zerbitzu horiek dekretuaren V. eranskinean ezartzen diren irizpideak bete beharko dituzte horretarako.

Dekretuaren bigarren xedapen iragankorraren lehen puntuan, dekretua indarrean sartzen denetik urtebeteko epea ezartzen da dekretuaren lehen xedapen iragankorraren 1. idatz-zatian aipatzen diren eta EAEko edozein herri-administraziorekin itunduta dauden adintsuentzako etxeetako gizarte-zerbitzuen erakunde titularrek administrazio eskudunari aginduzko homologazioa eskatzeko, betiere dekretuaren V. eranskinean ezarritako irizpideak betetzen badituzte.

Bigarren xedapen iragankorraren bigarren puntuan ezartzen denez, adintsuentzako etxeetako gizarte-zerbitzuen behin-behineko baimenaren indarraldian administrazio eskudunak behin-behinean homologatu ahal izango ditu, betiere aurrez itunduta badaude.

Puntu horretan bertan adierazten denez, bost urteko epe hori igaro eta adintsuentzako etxeetako gizarte-zerbitzuen erakunde titularrek behin betiko homologaziorako irizpideak bete ez badituzte, edota, beteta izanda ere, homologazioa eskatu ez badute, administrazio eskudunak hautsi egingo du itun-erregimena.

Bestalde, 1998ko apirilaren 3an Euskal Autonomia Erkidegoko gizarte-zerbitzuen baimena, erregistroa, homologazioa eta ikuskapena arautzen dituen martxoaren 10eko 40/1998 Dekretua sartu zen indarrean. Dekretu hori, martxoaren 10eko 41/1998 Dekretua bezalaxe, gizarte-zerbitzuei buruzko urriaren 18ko 5/1996 Legea garatzeko egin zen.

Martxoaren 10eko 40/1998 Dekretua indarrean sartzean, herri-administrazio eskudunek gizarte-zerbitzuak ikuskatzeko zerbitzuak martxan jarri zituzten. Zerbitzu horietako teknikariek martxoaren 10eko 41/1998 Dekretuak araututako adintsuentzako etxeetako gizarte-zerbitzu guztien azterketa zorrotza, dokumentala, materiala eta funtzionala egin dute, araudi horrekin duten egokitzapen-maila zehazteko. Lehen aldiz, ikuskapenaren xede diren zerbitzuen egoera zehatza ezagutu ahal izan da. Ikuskapen-jardueraren ondorioz, martxoaren 10eko 41/1998 Dekretua indarrean sartu zenean funtzionatzen ari ziren adintsuentzako etxeetako gizarte-zerbitzuei dekretuaren II. eranskinean barne hartutako baldintza teknikoren bat zorrotz aplikatuz gero (arkitekturako eta hirigintzako oztopoei buruzko 2 zk. zehaztapen teknikoa eta/edo gelei buruzko 6 zk. zehaztapen teknikoa, zehazki) zenbait kasutan betetzea ezinezkoa dela egiaztatu da. Osterantzean, gainerako baldintza teknikoak ongi betetzen dituztela ikusi da eta, zenbaitetan, adierazitako dekretuak exijitutako gutxienekoak gainditu dira. Halaber, beste kasu batzuetan egokitze-obrak bideragarriak direla, eta horien bidez oraingoz betetzen ez diren baldintza tekniko jakin batzuk bete ahal izango direla ikusi da (arestian aipatutakoak, funtsean).

Horrela, beraz, administrazio eskudunen ikuskapen-zerbitzuek martxoaren 10eko 41/1998 Dekretua indarrean sartu zenetik metatutako praktikak lehen xedapen iragankorraren enuntziatua aldatzea (indarraldia amaitu delako), eta eraginkorrago bat idaztea gomendatzen du. Ildo horretan, lehen xedapen iragankorraren testua, hiru idatz-zatitan bereizia, dekretua indarrean sartu aurretik funtzionatzen ari ziren adintsuentzako etxeetako gizarte-zerbitzuen baimenari buruzkoa da. Arrazoi beragatik, testuan lehen xedapen iragankorraren beharrezko aldaketa sartzeak martxoaren 10eko 41/1998 Dekretuan homologazioa aipatzen duen bigarren xedapen iragankorrari dagokionez antzeko neurri bat hartzea (testu berria bi idatz-zatitan egituratuta dago) eta herri-administrazioekiko itunari buruzko xedapen gehigarri bat gaineratzea eskatu du.

Ondorioz, Etxebizitza eta Gizarte Gaietako sailburuak proposatuta, eta Eusko Jaurlaritzako Aholku Batzorde Juridikoarekin bat etorriz eta Jaurlaritzaren Kontseiluaren 2005eko maiatzaren 31n egindako bilkuran eztabaidatu eta onartu ondoren,