• Zerrenda bakoitzak Lurralde Historiko bakoitzeko 25 pertsona izango ditu, eta horien erdiak, gutxienez, emakumeak izan beharko dira
• EHAAk martxoaren 26an argitaratuko ditu Eusko Legebiltzarrerako hauteskunde hauetan parte hartuko duten alderdi politikoen, koalizioen eta hautesle-elkarteen behin betiko izenak

Gaur, martxoak 18, alderdi politikoek, koalizioek eta hautesle-elkarteek Eusko Legebiltzarrerako datozen hauteskundeetarako zerrendak hiru lurralde historikoetako hauteskunde-batzordeetan aurkeztu ahal izateko azken eguna da. Hauteskunde-batzordeek zerrenda horiek aztertuko dituzte, eta, irregulartasunen bat izanez gero, jakinarazi egin beharko dute martxoaren 22tik 24ra bitartean zuzentzeko. Okerrak zuzentzeko epe hori amaitzen denean, datorren astelehenean, martxoaren 25ean, hauteskunde-batzordeek behin betiko hautagai-zerrendak aldarrikatuko dituzte, eta, hurrengo egunean, martxoaren 26an, argitaratuko dira EHAAn, ofizialak izan daitezen.

Emakumeak gutxienez % 50 izango dituzten hautagai-zerrendak bakarrik aldarrikatuko dira, emakumeen eta gizonen berdintasunaren arloko Euskadiko araudiak ezartzen duenari jarraituz.

Prozedura

Hautagai-zerrenda bakoitzak Lurralde Historiko bakoitzeko 25 pertsona izan beharko ditu. Era berean, alderdi politikoek, koalizioek edo hautesle-elkarteek gutxienez hiru eta gehienez bost ordezko ere gehitu beharko dituzte. Hautagai-zerrendak inskribatzeko, hauteskunde-araudian zehazten den dokumentazioa aurkeztu behar da, eta inprimakiak formatu elektronikoan eta editagarrian daude eskuragarri Eusko Jaurlaritzaren webgunean. Bertan adierazi behar dira:

• Hautagai-zerrendaren izena, siglak eta identifikazio-ikurra. Item horiek ezingo dira aldatu hauteskunde-prozesua garatzen den bitartean.
• Hautagaien eta ordezkoen izen-abizenak, helbide zehatza eta zerrendan izango duten ordena.
• Hautagai-zerrendako lurralde-ordezkariaren izen-abizenak; Lurralde Historikoko hiriburuan izango du helbidea.
• Hautagai-zerrendaren parte izatea onartzen dutela egiaztatzeko dokumentua, hautagai eta ordezko bakoitzak sinatua, eta hautagaiak Euskal Autonomia Erkidego osoan zerrenda bakarrean parte hartzen duela aitortzeko adierazpen formala.
• Hautagaia indarrean dagoen Euskal Autonomia Erkidegoko hauteskunde-erroldan inskribatuta dagoela dioen egiaztagiria.

Informazio gehiago Irekia atarian (Leiho berrian irekiko da)