Eusko Jaurlaritzak 2017ko Enpresentzako Europako Ingurumen Sariak iragarri ditu
2017.eko urriak 17
- Hautagaitzak aurkezteko epea datorren azaroaren 30ean amaituko da
Eusko Jaurlaritzaren Ingurumen, Lurralde Plangintza eta Etxebizitza Sailak Europako Batzordeak antolatzen dituen 2017-2018ko Enpresentzako Europako Ingurumen Sarien Euskadiko Atalaren 2017ko deialdia egin du. Sariok negozioaren bideragarritasun ekonomikoa eta ingurumenaren babesa arrakastaz uztartzen dituzten enpresak saritzen dituzte; enpresok, horretarako, ekoberrikuntzak sartzen dituzte zenbait arlotan, tartean: kudeaketan, prozesuetan, produktu eta zerbitzuetan, enpresa-lankidetzan, negozio-konbinazioan eta biodibertsitatean.
Euskal Autonomia Erkidegoan egoitza duten eta haien hautagaitza Euskadiko Atalean aurkezten duten enpresek Euskadiko, Espainiako edo Europako esparruan saria jasotzeko aukera izango dute.
Kategoriak
Enpresak kategoria hauetara aurkeztu ahal izango dira: kudeaketa, produktua eta/edo zerbitzua, prozesua, nazioarteko enpresa-lankidetza. Kudeaketa-kategorian, enpresa mikro eta txikiek eta enpresa ertain eta handiek jaso dezakete saria. Gainera, baldintzak betetzen dituzte enpresa guztiak aurkeztu ahal izango dira Estatuko Ataleko «Enpresa eta Biodibertsitatea» kategoria berezira eta, Euskadiko «Ekonomia zirkularra» kategoria berezira.
Helbide fiskala Euskal Autonomia Erkidegoan duten eta jarduera nagusia han garatzen duten enpresek parte hartu ahal izango dute. Enpresa publikoek, gobernuz kanpoko erakundeek (GKE), instituzioek eta irabazi-asmorik gabeko erakundeek enpresa baten bazkide gisa soilik parte har dezakete Garapen Jasangarrirako Nazioarteko Lankidetzaren kategorian. Kasu horretan, enpresa izango da hautagaitza aurkeztuko duena.
2001ean sari hauen lehen edizioa egin zenetik, ehun euskal enpresak baino gehiagok aurkeztu dute hautagaitza sari hauetara, eta Espainiako Ataleko sarien % 25 lortu dituzte, baita Europako Ataleko zenbait sari eta accesit ere.
Hautagaitzek aurkezteko inprimaki ofizialak bete beharko dituzte (Ihobe sozietate publikoaren webgunean eskuragarri), eta 2017ko azaroaren 30eko 23:45era arteko epea izango dute horiek aurkezteko. Sariak 2018ko hasieran emango dituzte.
Sari hauei buruzko informazio guztia Ihobe sozietate publikoaren webgunean dago eskuragarri: www.ihobe.eus
2001az geroztik, Eusko Jaurlaritzaren Ingurumen, Lurralde Plangintza eta Etxebizitza Sailak kudeatzen du, bere Ihobe sozietate publikoaren laguntzarekin, Enpresentzako Europako Ingurumen Sarien Euskadiko Atala, Nekazaritza eta Arrantza, Elikadura eta Ingurumen Ministerioko Biodiversidad fundazioarekin koordinazioan –azken horrek kudeatzen du Espainiako Atala 2013tik–.
