Euskadiko Ingeniaritza, Zientzia eta Teknologiako unibertsitate heziketarako Klusterra eratu da
2017.eko uztailak 20
Gaur arratsaldean, Euskadiko Ingeniaritza, Zientzia eta Teknologiako unibertsitate heziketarako klusterra eratu da.
Cristina Uriarte Hezkuntzako sailburua presidente duela, Klusterra Euskadiko heziketa zentroen lehen elkarte handia da, eta bi helburu nagusi ditu:
- Unibertsitate/ikerketa eragileen eta enpresen arteko aliantza egonkorrak sortzea, beren arteko lankidetza eta berrelikadura segurtatzeko eta, hartara, ezagutza sortu eta transferitzeko; baita Euskadiko zientzia, teknologia eta berrikuntza politikei buruzko informazioa partekatzea ere.
- Graduko prestakuntza eta gradu ondoko bizitza osoko prestakuntza eskaintzak garatzea, erantzun eraginkorrak eman eta moldakortasun handia eta enplegagarritasun handia duten profesionalak prestatzeko.
Euskadin finkatutako Ingeniaritza, Zientzia eta Teknologiako Eskola eta Fakultateek ez ezik, Klusterrean parte hartuko dute CONFEBASK Euskadiko Enpresarien Konfederakuntzak eta Industria 4.0ko Gidaritza Taldeak, azken hau Zientzia, Teknologia eta Berrikuntza planean integratuta.
Gaur eratutako Klusterrak, jada aipatutako helburu nagusiez gain, beste batzuk ere baditu:
- Euskadiko unibertsitate ikastetxeen arteko koordinazioa sustatzea, unibertsitate ikastetxe bakar baten eremua gainditzen duten estrategiek behar dituzten prestakuntza beharrizanei eta ikertzaileei erantzuna emateko.
- Graduatuen lan-munduratzea hobetu eta horien jarraipena egitea.
- Unibertsitate heziketako nazioartekotzea eta berrikuntza sustatzea.
Klusterreko kideen ustez, beharrezkoa da produkzio sareak dituen premiak sakonago ezagutzea, Euskadiko enpresa eta erakundeekin harreman estua izango duen unibertsitate heziketan aurreratzeko. Horregatik, Klusterrak gogoeta bat bultzatuko du Euskadiko unibertsitate heziketak alde horretatik behar dituen aldaketak eta hobekuntzak zehazteko. Horretarako, Klusterrak bere gogoetak adieraziko dizkio Hezkuntza Sailari ikasketa dual izatera luze gabe pasa beharko liratekeen unibertsitate heziketei buruz.
Uda eta gero, Klusterrak lehen ekimenei ekingo die; Eusko Jaurlaritzaren Unibertsitatea-Enpresa estrategiak bultzatuta, aurreikusi da, adibidez, AIC- Automotive Intelligence Center-en enpresa-unibertsitate ikasgela bat martxan jartzea. Irakaskuntza arloan eta ikerketa arloan ere lankidetza-prestakuntza proiektuak garatuko dituen ikasgela bat da.
Klusterraren sorrerak joan den urrian Donostian izandako topaketa batean du jatorria, Eusko Jaurlaritzak eta Europako Batzordeak elkarrekin antolatutako Unibertsitatea-Enpresa Foruma baliatuz. Lehendabiziko aldiz, Hezkuntza Sailak Euskadiko Ingeniaritza Eskola eta Informatika Fakultateetako arduradunak bildu zituen. Bilkura hartan, aurkezle guztiek fakultate guztien arteko lankidetza hobetu eta bultzatzearen garrantzia nabarmendu zuten, hurrengo urratsa industrien arteko koordinazioa izan dadin. Lehen topaketa horren ondorioz, joan den ekainaren 6an Urkullu lehendakariak “Euskadiko Unibertsitatea-Enpresa estrategia” aurkeztu ez ezik, Euskadiko ingeniaritza, zientzia eta teknologiako unibertsitate heziketarako klusterra sortu da.
Klusterraren osaera
Presidentetza
Eusko Jaurlaritzako Hezkuntza Saila
Idazkaritza
Euskampus
Eragileak
Industria 4.0 AIC Gidaritza Taldea
CONFEBASK (SEA-ADEGI-CEBEK)
Heziketa zentroak
Informatika Fakultatea, UPV/EHU
Kimika Zientzien Fakultatea, UPV/EHU
Zientzia eta Teknologia Fakultatea, UPV/EHU
Bilboko Ingeniaritza Eskola, UPV/EHU
Gipuzkoako Ingeniaritza Eskola, UPV/EHU
Vitoria-Gasteizko Ingeniaritzako Unibertsitate Eskola, UPV/EHU
Ingeniaritza Fakultatea, Deustuko Unibertsitatea
Eskola Politeknikoa, Mondragon Unibertsitate
Makina Erremintaren Institutua, IMH
Tecnum
Vitorias-Gasteiz, 2017ko uztailaren 20a