Egoitza elektronikoa

Kontsulta

Kontsulta erraza

Zerbitzuak


Azken aldizkaria RSS

Euskal Herriko Agintaritzaren Aldizkaria

50. zk., 2023ko martxoaren 13a, astelehena


Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

SPRI-ENPRESEN GARAPENERAKO EUSKAL AGENTZIA
1298

EBAZPENA, 2023ko otsailaren 28koa, SPRI-Enpresen Garapenerako Euskal Agentziako zuzendari nagusiarena, «Industria Digitala» 2023ko laguntza-programaren oinarri arautzaileak onartzeko, argitaratzeko eta horien deialdia egiteko agintzen duena.

SPRI-Enpresen Garapenerako Euskal Agentziak, Eusko Jaurlaritzako Ekonomiaren Garapen, Jasangarritasun eta Ingurumen Sailaren mendeko zuzenbide pribatuko erakunde publikoak, Euskal Autonomia Erkidegoan industria eta enpresa arloko jarduera bultzatzera bideratutako jardunbideak bideratzeko eta lehiakortasuneko bektore gisa honako hauen arteko trantsizioak Euskadiko enpresetan txertatzen laguntzeko ardura du: teknologia-digitala, energia-ingurumena eta demografia-gizartea. Horretarako, enpresen jarduera ekintzailean inbertsioa, berrikuntza, nazioartekotzea eta jarduera sustatzea bultzatzen ditu.

Ildo horretatik, Euskadi 2025 Eraldaketa Digitalerako Estrategia bultzatzera bideratutako hainbat ekintza garatu ditu SPRI-Enpresen Garapenerako Euskal Agentziak. Ekintza horien artean, aipatzekoak dira Euskadiko eraldaketa digitala bultzatzera bideratutako askotariko laguntza-programak.

Ondorioz, Informazioaren Gizartearen garapena sustatzea da laguntza-programa honen helburu nagusia eta, horretarako, enpresa industrialetan eta produktu-prozesu industrialekin lotutako zerbitzu-enpresetan EIKTak txertatzen laguntzea.

Bestetik, Euskal Autonomia Erkidegoko Ogasun Nagusiaren Antolarauei buruzko Legearen testu bategina onartzen duen azaroaren 11ko 1/1997 Legegintzako Dekretuaren 48.5 artikuluak agintzen duenez, autonomia-erkidegoko aurrekontu orokorrek finantzatutako entitate guztiek publizitate-printzipioaren arabera egokitu behar dute haien dirulaguntza-jarduera. Horrenbestez, hau

EBAZTEN DUT:

Lehenengoa.– «Industria Digitala» 2023ko laguntza-programari dagozkion oinarri arautzaileak eta deialdia onartzea, zeinen edukia atxikita baitago ebazpen honen eranskinean.

Bigarrena.– «Industria Digitala» 2023ko programari dagozkion oinarri arautzaileak onartzen dituen ebazpen hau Euskal Herriko Agintaritzaren Aldizkarian osorik argitaratzea.

Hirugarrena.– Ebazpen honen kontra, berraztertzeko errekurtsoa jar daiteke SPRI-Enpresen Garapenerako Euskal Agentziaren Zuzendaritza Nagusiaren aurrean, hilabeteko epean, ebazpen hau argitaratu eta hurrengo egunetik kontatzen hasita, edo administrazioarekiko auzi-errekurtsoa, administrazioarekiko auzien epaitegietan, bi hilabeteko epean, ebazpen hau argitaratu eta hurrengo egunetik kontatzen hasita.

AZKEN XEDAPENA

Ebazpen honek ondorioak izango ditu Euskal Herriko Agintaritzaren Aldizkarian argitaratu eta hurrengo egunetik aurrera.

Bilbao, 2023ko otsailaren 28a.

SPRI-Enpresen Garapenerako Euskal Agentziako zuzendari nagusia,

AITOR URZELAI INZA.

ERANSKINA
INDUSTRIA DIGITALA 2023ko LAGUNTZA-PROGRAMAREN OINARRI ARAUTZAILEAK

SPRI-Enpresen Garapenerako Euskal Agentziak, Eusko Jaurlaritzako Ekonomiaren Garapen, Jasangarritasun eta Ingurumen Sailaren mendeko erakunde publikoak, hainbat ekintza gauzatzen ditu Euskal Autonomia Erkidegoan (EAE) industria, lehiakortasuna, enpresen arteko lankidetza, ikerketa eta enpresen garapena sustatzeko, besteak beste.

Euskadi 2025 Eraldaketa Digitalerako Estrategian (EEDE2025) definitutako jardute-politikekin bat datorren tresna bat da «Industria Digitala» programa.

Programa hori Euskadi Basque Country 2030 Agendarekin lerrokatuta dago; hau da, 2015eko irailaren 25ean Nazio Batuek onartutako Garapen Jasangarrirako 2030 Agendari egindako euskal ekarpenarekin. Bertan, enpresek funtsezko rola bete behar dute. Ardura bat da hori, eta, aldi berean, aurrekaririk gabeko aukera da negozio baten helburuak ekitatearen eta jasangarritasunaren helburuekin lerrokatzeko. Azken finean, garapen jasangarriaren arloko munduko erronkarik handienei aurre egiteko aukera ematen duten soluzioak eta teknologiak garatzeko eta inplementatzeko aukera eskaintzen dute garapen jasangarrirako helburuek (GJH).

Ildo horretatik, erronka horiei aurre egitera bideratutako hainbat ekintza garatu izan ditu SPRIk. Enpresa txiki eta ertainetan (ETEak) eta tamaina handiko enpresa industrialetan zein produktu-prozesu industrialekin lotutako zerbitzu-enpresetan elektronikaren, informazioaren eta komunikazioen teknologiak (EIKT) txertatzearen erronkari erantzun nahi dio Industria Digitala programak. Halaber, adierazi behar da programa jasota dagoela erakundearen 2023ko ekitaldirako Dirulaguntzen Plan Estrategikoan, zeina Administrazio Kontseiluak onetsi baitzuen 2022ko abenduaren 21ean hartutako erabakien bidez.

1. artikulua.– Xedea.

Enpresa industrialek eta produktu-prozesu industrialekin lotutako zerbitzu-enpresek barne-prozesuetan eta bezeroekiko, hornitzaileekiko eta administrazioarekiko harremanen prozesuetan elektronikaren, informazioaren eta komunikazioen teknologiak (EIKTak) txerta ditzaten laguntzea da programaren helburua, enpresen lehiakortasuna hobetzeko xedez.

2. artikulua.– Laguntzen izaera.

1.– Programa hau Dirulaguntzen azaroaren 17ko 38/2003 Lege Orokorraren 8.3 artikuluak xedatutako printzipioen mende dago.

2.– Laguntzak emateko, behar bezala jasotako laguntzen segidako lehiaren prozedura erabiliko da. Ondorioz, banaka eta modu ordenatuan ebatziko dira, oinarri hauetan zehaztutako dokumentazio guztiarekin eskaera osatu den unea kontuan hartuta.

3.– Programa hau aplikatzearen ondorioz emandako laguntzek garrantzi txikiko edo de minimis laguntzen izaera dute. Ondorioz, 2013ko abenduaren 18an Batzordeak onartutako 1407/2013 (EB) Erregelamenduak xedatutakoaren mende egongo dira.

4.– Programa honen bidez ematen diren laguntzak itzuli beharrik gabeko dirulaguntzak izango dira.

5.– Programa honen baitan emandako dirulaguntzak ez daude esportatutako kopuruei, banaketa-sare bat ezartzeari eta ustiatzeari, edo esportatzeko jarduerari lotutako beste gastu arrunt batzuei zuzenean lotuta.

3. artikulua.– Baldintzak eta definizioak.

Programa honen ondorioetarako, definizio hauek ezarri dira:

1.– Kanpoko aholkularitza eta/edo ingeniaritza espezializatuarekin lotutako gastuak eta inbertsioak. Aurkeztutako proiektuaren arloan adituak diren eta proiektuaren exekuzioan parte hartzen duten kanpoko enpresen kontratazioarekin lotutako gastua. Proiektuarekin zerikusia duten hardware edo softwareetan egindako inbertsioak.

2.– Laguntzaren intentsitatea. Laguntzaren zenbatekoa, aukera daitezkeen gastuen eta/edo inbertsioen onartutako gehieneko aurrekontuen ehuneko gisa adierazita.

3.– Enpresa handiak. Ondorengo puntuan ezarritako atalaseak gainditzen dituzten enpresak.

4.– Enpresa txikiak eta ertainak (ETEak), Batzordearen 2003ko maiatzaren 6ko 2003/361/EB Gomendioaren arabera.

a) 250 langile baino gutxiago dituzten eta urtean 50 miloi euroko negozio-bolumena gainditzen ez duten enpresak, edo urteko balantze orokorra 43 miloi eurokoa baino handiagoa ez dutenak.

b) Enpresa ertainak: 50 eta 249 langile artean dituzten eta urtean 10 eta 50 miloi euro arteko negozio-bolumena duten enpresak, edo 10 eta 43 miloi euro arteko urteko balantze orokorra dutenak.

c) Enpresa txikiak: 50 langile baino gutxiago dituzten eta urtean 10 miloi eurotik beherako negozio-bolumena duten enpresak edo 10 miloi eurotik beherako urteko balantze orokorra dutenak.

d) Langile kopurua, zenbateko finantzarioak eta erreferentzia-epea zehazteko garaian, Europako Batzordearen 651/2014 (EB) Erregelamenduaren I. eranskinean ezarritakoa aintzat hartuko da.

4. artikulua.– Baliabide ekonomikoak.

1.– Dirulaguntza-programa honen helburura bideratutako 2023ko baliabide ekonomikoak 6.100.000 eurokoak dira, eta SPRI-Enpresen Garapenerako Euskal Agentziaren aurrekontuetan horretarako ezarri diren aurrekontu-zuzkiduretatik etorriko dira. SPRIren aurrekontuak 2023rako Euskal Autonomia Erkidegoko Aurrekontu Orokorretan sartuta daude.

2.– Funtsak mugatuak direnez, programa honen bitartez lortu nahi da ahalik eta denbora tarte txikiena igarotzea laguntza eskatzen denetik ematen den arte, eta, horrenbestez, espedientea osatua dagoenean eta era ordenatuan egingo da esleipena. Programaren guztizko zenbatekoa gainditzen duten laguntzei ezezkoa emango zaie, ebazpen baten bidez.

3.– Programarako funtsak agortzen badira, programari amaiera emango zaio, eta horren berri emango du SPRIren zuzendari nagusiak, sozietatearen web-orrian (www.spri.eus) eta EHAAn argitaratuko den ebazpen baten bidez.

4.– Behin aurrekontu-kreditua bukatuta, ezingo da beste dirulaguntzarik eman eta, hori dela eta, aurkeztu diren baina ebazteke dauden eskaerak ezetsi egingo dira.

5.– Eskualde Garapeneko Europako Funtsak kofinantzatzen ditu laguntzak (diruz lagundutako zenbatekoaren % 50 ordainduko du EGEFek). Hori dela eta, Europako Parlamentuaren eta Batzordearen 2013ko abenduaren 17ko 1303/2013 (EB) Erregelamenduaren xedapenen menpe daude laguntzak, eta, EGEFek kofinantzatzen dituenez, gutxienez, honako betebehar hauek bete behar dira:

– Onuradunak Estatuko eta Europar Batasuneko legedia bete behar du kontrolari, erantzukizunari, zehapen-araubideari eta arauak ez betetzeari dagokienez.

– Euskadiko 2021-2027 aldirako EGEF Programa Operatiboaren barruan kofinantzatuko da laguntza, eta alderdi hori aditzera eman beharko da, 1303/2013 (EB) Erregelamenduaren 115. artikuluko 3. apartatuaren eta XII. eranskinaren 2.2 apartatuaren arabera. Ildo horretatik, diruz lagundutako ekintzen berri emateko eta haien komunikazioa eta hedapena egiteko sortutako material/euskarri guztietan jakinarazi beharko da ekintza hori Europar Batasunak kofinantzatu duela EGEFen bidez, eta, Europar Batasunari erreferentzia egiteaz gain, haren ikurra gehitu beharko da; eta, ekintza garatzen den bitartean, haren deskribapen labur bat egingo da dagokion webgunean, Europar Batasunaren laguntza finantzarioa nabarmenduz, eta, gutxienez, proiektuaren gaineko informazio-kartel bat jarriko da –gutxienez, A3 neurrikoa–, non Europar Batasunaren laguntza finantzarioa aipatuko den, publikoak ongi ikusteko moduko leku batean.

– Laguntza onartzeak esan nahi du, era berean, onartu egiten dela 1303/2013 (EB) Erregelamenduaren 115. artikuluko 2. apartatuan jasotako eragiketen zerrenda publikoan sartzea.

EGEFen kofinantzaketak berekin dakar aurrera eramandako ekintzen finantzaketaren, administrazioaren eta jarraipenaren gaineko informazioa gordeta izateko betebeharra; 3 urtez gorde beharko da informazio hori, eragiketa-gastuen kontuak aurkeztu eta hurrengo abenduaren 31tik kontatzen hasita. Testuinguru horretan, onuradunaren betebeharra da informazio hori erraz eskuratzeko moduan izatea ere (bereizitako kontabilitate-sistema edo kodifikazio espezifikoa).

5. artikulua.– Erakunde onuradunak eta izaera hori lortzeko eskakizunak.

1.– Enpresa industrialek eta produktu-prozesu industrialekin lotutako zerbitzu-enpresek eskura ditzakete programa honetan aurreikusitako laguntzak, baita Euskal Autonomia Erkidegoko talde industrialen eta produktu-prozesu industrialekin lotutako zerbitzu-taldeen enpresa nagusiek ere, betiere haien osotasunean aipatutako ezaugarriak betetzen badituzte, haien egoera ekonomiko kontsolidatua kontuan izanda, eta 6. artikuluaren arabera dirulaguntza jaso dezaketen ekintzak egiteko proiektuak aurkezten badituzte. Hori guztia, baldin eta:

a) Euskal Autonomia Erkidegoan jarduera-zentro industrial bat badute. Hain zuzen ere, aurkeztutako proiektuak zentro horretan izan beharko du inpaktua eta bertan egin beharko da diruz laguntzekoa den jarduera.

b) Euskadiko ekonomia-jardueren gaineko zergaren epigrafe industrialean alta emanda badago.

2.– Ezingo dituzte deialdi honetan aurkezten diren dirulaguntzak jaso:

a) Oinarri hauetan azaltzen diren dirulaguntzaren eragin-eremuetan zerbitzuak eskaintzen dituzten aholkularitza informatikoko enpresekin eta ingeniaritza-enpresekin lotura zuzena edo zeharkakoa dutenek, akzioen edo partaidetzen bidez.

b) Berezko nortasun juridikodun entitate, administrazio publikoen mendeko entitate edo haiei lotutako entitate izaera dutenek.

c) Dirulaguntzen azaroaren 17ko 38/2003 Lege Orokorraren 13.2 artikuluan aurreikusitako egoeraren batean daudenek; horien artean daude:

– Zerga-betebeharrak eta Gizarte Segurantzarekiko betebeharrak egunean ez izatea.

– Dirulaguntzak itzultzeko betebeharrarekin lotutako ordainketak egunean ez izatea.

– Zigor penalak edo administratiboak izatea, eta ondorioz dirulaguntzak edo laguntza publikoak jasotzeko aukerarik ez izatea; edo laguntzak jasotzeko desgaitzen dituen legezko debekua izatea.

d) Armamentuaren ekoizpenean, merkaturatzean eta finantzaketan jarduten dutenek.

e) Europako Batzordeak laguntza bat legez kanpokoa dela edo barne-merkatuarekin bateraezina dela erabaki ondoren, laguntzak errekuperatzeko agindu baten menpe daudenek.

f) Sexuan oinarritutako diskriminazioa egin dutenek, Emakumeen eta Gizonen Berdintasunerako otsailaren 18ko 4/2005 Legearen azken xedapenetako seigarrenean ezarritakoaren arabera. Eta sexuan oinarrituta diskriminatzeagatik edo emakumeen eta gizonen berdintasunari buruzko araudia ez betetzeagatik zigor administratiboa edo penala jaso dutenek, zigor horretan ezarritako aldian zehar. Honako erakunde hauek ere ezingo dute jaso laguntzarik edo dirulaguntzarik: Estatuko araudiaren arabera berdintasun-plan bat izatera behartuta egon arren, halakorik ez dutenek; eta 50 langile baino gehiago izanik, sexu-jazarpena edo sexuan oinarritutako jazarpena prebenitzeko eta hari aurre egiteko neurriak ezarri izana ziurtatzen ez duten enpresek, emakumeen eta gizonen berdintasunari buruzko Estatuko legediak ezarritako baldintzetan.

3.– Laguntza-eskaera aurkezten den unetik hasi eta emandako dirulaguntza likidatu arte bete beharko dira aurreko apartatuetan laguntzen onuradun izateko aipatutako eskakizunak.

4.– Aurreko ataletan aurreikusitako alderdiak modu honetan egiaztatuko dira:

a) SPRIk ofizioz egiaztatuko du honako eskakizunak betetzen direla:

– Euskal Autonomia Erkidegoan jarduera-zentro bat dutela, zeinean proiektuak eragina izango duen.

– Euskadiko ekonomia-jardueren gaineko zergaren epigrafe industrialean alta emanda daudela.

– Zerga-betebeharrak eta Gizarte Segurantzarekiko betebeharrak egunean dituztela.

Dena den, eskatzaileak berariaz uko egin diezaioke baimena emateari. Hala bada, kasu bakoitzean eskumena duen organoaren administrazio-ziurtagiri positiboak eman beharko ditu.

b) Gainerako eskakizunak eskaera egiteko inprimaki elektronikoan txertatuta dagoen erantzukizunpeko aitorpenaren bidez egiaztatuko dira. Haren egiazkotasuna, egoki izanez gero, ikuskapeneko bisitan edo dokumentazioa eskatuz egiaztatu ahal izango da.

6. artikulua.– Diruz lagundu daitezkeen jarduerak.

EIKTak ezartzeko edo EIKTak aukeratzeko eta ebaluatzeko diagnostikoa egiteko honako proiektu hauek lagundu ahal izango dira diruz:

1.– Sentsorika, SCADA, serbitizazioa, produkzio-prozesuen automatizazioa, Bigdata eta blockchain.

2.– Errealitate birtuala, areagotua eta mistoa, eta ikusmen artifiziala.

3.– Smart Factory. Industria-prozesuen simulazioa, gaitasun fisikoak eta birtualak konbinatuta.

4.– Fabrikazio gehigarria: ingeniaritza- eta aholkularitza-zerbitzuak, hasierako ideiatik eta diseinutik ekoizpenera arteko prozesuan laguntzeko.

5.– Gamifikazioa. Erabiltzaileak fidelizatzeko, motibatzeko eta haien konpromisoa lortzeko, jokoetatik hartutako teknikak aplikatzea aurreikusten duten aholkularitza-proiektuak.

6.– Merkataritza elektronikoa: erosketa elektronikoak, salmenta elektronikoak, B2B (Business to Business) edo B2C (Business-to-Consumer) proiektuak.

7.– Lantegian produkzioa automatizatuko edo hobetuko duten eta egoeraren analisia eta erabakiak hartzea erraztuko duten EIKTak txertatzeko proiektuak, aurreko ataletan jasota ez daudenak.

8.– Enpresaren kudeaketa aurreraturako sistemak, hala nola ERPak, Business Intelligence, SMC, prebentziozko mantentze-lanak, hornidura-katearen kudeaketa logistikoa eta administrazio- eta kudeaketa-prozesuen automatizazioa.

9.– Produktuaren bizi-zikloaren kudeaketa (CAM, CAE, PDM, DMF moduko aplikazioak ezartzea).

10.– Telelana: tresna kolaboratiboak, enpresako sistemetarako eta aktiboetarako urruneko sarbideak, negozioaren jarraitutasuna.

11.– «Epe luzean datuak gordetzeko zerbitzuak» ezartzea, Europako eIDAS (electronic IDentification, Authentication and trust Services) erregelamenduko TS 119 511 (2019/06) eta TS 119 512 (2020/01) estandarren arabera.

Enpresa handien kasuan, ez dira diruz lagunduko 8., 9. eta 10. puntuetan deskribatutako jarduerak.

Orokorrean:

– Ez dira diruz lagunduko aurrez SPRIren programa baten barruan diruz lagundutako proiektuak eguneratzeko edo mantentzeko jarduerak. Laguntza-eskaera berria aurkezten den egunetik kontatzen hasita, aurreko 7 urteetan SPRIren laguntza jaso duten proiektuek berriro ere jaso dezakete programa honen laguntza, betiere ikuspuntu teknologikotik proiektuak jauzi kualitatiboa izango duela ziurtatzen badute.

– Ez dira diruz lagunduko artikulu honetan deskribatzen diren eta erakunde onuradunaren beraren katalogoaren barruan dauden produktuak/zerbitzuak, «serbitizazioarekin» zerikusia duten proiektuak salbu.

– Inola ere ez da diruz lagunduko Europar Batasuneko kide diren beste herrialde batzuetara edo hirugarren herrialdeetara esportatzea; eta, ondorioz, programa honen testuinguruan diruz lagundutako dirulaguntzek ezingo dute zuzenean lotuta egon esportatutako kantitateekin, banaketa-sare bat martxan jarri eta ustiatzearekin, edo esportazio-jarduerarekin lotutako beste gastu arrunt batzuekin.

– Programa honen barruan emandako dirulaguntzek ezingo dute baldintzatu inportatutako produktuen ordez bertako produktuak erabiltzea.

7. artikulua.– Gastu hautagarriak eta gastu hautagarriei aplikatzeko baldintzak.

1.– Gastu edo/eta inbertsio hautagarritzat hartuko dira 6. artikuluan deskribatutako aholkularitza, ingeniaritza, hardware eta software gastuak, baldintza hauek betetzen badituzte:

a) SPRIn laguntza-eskaera aurkezten denetik aurrera sortutakoak edo fakturatutakoak, proiektua gauzatzeko ezarritako epean. Epe hori ezin izango da 12 hilabetetik gorakoa izan.

2023ko urtarrilaren 1az geroztik hasitako proiektuetan, laguntza-eskaerak aurkeztu aurretik sortu edo fakturatutako gastuak onartuko dira, betiere oinarri hauek Euskal Herriko Agintaritzaren Aldizkarian argitaratu eta bi hilabeteko epean aurkeztu badira eskaerak.

b) Kanpoko enpresa adituek eginak.

2.– SAAS (Software as a Service) formatuko kudeaketa-aplikazioak ezartzea aurreikusten duten proiektuei dagokienez, gastu hautagarritzat hartu ahal izango dira era horretako zerbitzuei egozteko moduko gastuak ere, gehienez 12 hilabetean, baldin eta artikulu honetan deskribatutako baldintzak betetzen badituzte eta 6. artikuluan deskribatutako proiektu moten barruan badaude.

3.– Fakturan aplikatutako balio erantsiaren gaineko zerga ez da gastu hautagarria izango.

4.– Honako hauek ez dira gastu eta inbertsio hautagarriak izango: eskatzaileak berak edo taldeko enpresek egindako lanak, aholkulariak egindako joan-etorrien gastuak, material didaktikoak egitea edo aretoak alokatzea, dietak eta antzekoak. Gastu horiek fakturen kontzeptutik bereizita aurkeztu beharko dira.

5.– Kanpoko enpresa adituek baldintza hauek bete behar dituzte:

a) Ez dira izango ez sozietate publikoak, ez zuzenbide publikoko entitateak, ez elkarteak, ez profesionalen elkargoak, ez eta Zientzia, Teknologia eta Berrikuntzaren Euskal Sareko kideak eta antzeko izaerako I+G sareetakoak ere.

b) Ez dute izango zuzeneko edo zeharkako akzio- edo partaidetza-loturarik laguntza eskatzailearekin.

6.– Gastu eta inbertsio hautagarriak baloratzeko, irizpide hauek izango dira kontuan:

a) Lotura zuzena izango dute programa honen helburu den jarduerarekin.

b) Deskontuak eta antzekoak izanez gero, gastua gutxitu egingo da.

c) Gastu hautagarriaren balioespena kutxako irizpidearen araberakoa izango da.

d) Antzeko proiektuen batez besteko gastuekin alderatuta, proiektuaren gastu-aurrekontua handiegia dela irizten bada, gastu hautagarrien zenbatekoa murriztuko da, gastu egokitzat eta proportzionatutzat jotzen den zenbatekoaren arabera.

e) Dirulaguntza jaso dezaketen lanen exekuzioa, egoki den kasuetan, enpresa espezializatuei azpikontrata dakioke. Hala eginez gero, Dirulaguntzen Lege Orokorraren 31.3 artikuluan aurreikusitakoa betez, diruz lagun daitekeen zenbatekoak gainditu egiten baditu kontratazio publikoaren arloan indarrean dagoen araudiak kontratu txikirako ezarritako kopuruak, onuradunak gutxienez hiru hornitzaileren eskaintzak eskatu beharko ditu lana egiteko, zerbitzua emateko edo ondasuna entregatzeko konpromisoa hartu aurretik, salbu eta, bere ezaugarriak bereziak izateagatik, merkatuan ez badago lana egiteko, zerbitzua emateko edo ondasuna entregatzeko behar beste erakunde, edo gastua dirulaguntza eman baino lehen egin bada.

f) Dirulaguntzen Lege Orokorraren 29. artikuluan ezarritakoaren arabera, onuradun batek azpikontratatu egiten duela ulertuko da, hirugarren batekin adosten duenean dirulaguntzaren xede den jarduera osorik edo zati batean gauzatzea. Kontzeptu horretatik kanpo da onuradunak diruz lagundutako jarduera bere kabuz gauzatzeko egin beharreko gastuen kontratazioa. Hori horrela, azpikontratazioa edo hirugarrenen kontratazioa diruz lagundutako jardueraren zenbatekoaren % 100era iritsi ahal izango da, eta diruz lagundutako jardueren azpikontrataziorako edo hirugarren kontrataziorako aplikagarri izango dira Dirulaguntzen Lege Orokorraren 29. artikuluan jasotako gainerako aurreikuspenak.

8. artikulua.– Laguntzen modalitatea eta zenbatekoa.

Laguntzak dirulaguntza gisa egituratuko dira.

Dirulaguntza kalkulatzeko, kontuan hartuko dira definizio hauek:

– «Proiektuaren aurrekontu global onartua» bi aurrekonturen batura izango da: onartutako aholkularitza- edota ingeniaritza-gastuen aurrekontua eta onartutako hardwarearen edota softwarearen aurrekontua.

– Diruz lagundu daitekeen kontzeptu bakoitzeko «onartutako gehieneko aurrekontua», ehunekoak aplikatzeko eta dirulaguntza kalkulatzeko erabiliko dena, aurreko puntuan azaldutako bi kontzeptuen (aholkularitza- edota ingeniaritza-gastuak, eta hardware- eta software-gastuak) batura izango da.

Aholkularitza- edota ingeniaritza-gastuak, gutxienez, proiektuaren aurrekontu global onartuaren % 50 izango dira.

Onartutako gehieneko gastu eta inbertsioen aurrekontuaren barruan, diruz lagun daitekeen kontzeptu bakoitzari egokitzen zaion dirulaguntzaren ehunekoak (artikulu honetan bertan deskribatzen den moduan) honako hauek dira:

a) Mikroenpresak eta enpresa txikiak: % 50.

b) Enpresa ertainak: % 35.

c) Enpresa handiak, % 25.

Proposatutako dirulaguntza % 5 gehiago handituko da, laguntzen gehieneko muga gainditu gabe, baldin eta enpresak honako baldintza hauetakoren bat betetzen badu:

–Bikain euskararen kalitate-ziurtagiria izatea, zeinak enpresan euskara erabiltzen eta kudeatzen dela eta haren presentzia dagoela ziurtatzen duen.

– Berdintasun-plana izatea, 50 langile baino gutxiagoko enpresen kasuan soilik; izan ere, langile gehiagokoak legez behartuta daude berdintasun-plana izatera.

– Programa honek diruz lagun ditzakeen jardueren barruan, softwarea euskaraz erabiltzea bultzatzen duten proiektuak izatea.

Proiektuarekin lotutako aholkularitza-ingeniaritza, hardware eta software gastuak dituen eta diruz laguntzeko modukoa den jarduera bat edo gehiago egiteko, 18.000 euroko dirulaguntza emango da, gehienez, enpresa onuradun bakoitzeko eta urteko.

Dirulaguntzaren 18.000 euroko gehieneko mugaren barruan, diruz lagun daitekeen kontzeptu bakoitzeko gehieneko dirulaguntzak hauek izango dira:

– Hardwarea eta/edo softwarea: gehienez 9.000 euro.

– Aholkularitzako eta/edo ingeniaritzako gastuak: gehienez 18.000 euro.

9. artikulua.– Laguntzak metatzea eta mugak.

1.– Programa honetan jasotako laguntzak eskuratzen dituzten erakundeek beste laguntza bateragarri batzuk edo Europar Batasuneko beste finantzabide batzuk eskura ditzakete, betiere gastu hautagarrietarako gehieneko laguntzaren intentsitatea errespetatzen badute.

2.– Laguntzaren zenbatekoa ez da inola ere izango erakunde onuradunak garatzeko asmoa duen jardueraren kostua baino handiagoa, soilik laguntza hori aintzat hartuta edo edozein administraziok edo horien sektore publikoek xede bererako emandako beste laguntza batzuk edota bestelako sarrera mota batzuk, publiko nahiz pribatuak, gehituta. Baldin eta beste laguntza publiko edo pribatu batzuk eta programa honen bidez emandako laguntza metaturik lortzen den zenbatekoak gainditu egiten badu kostu hori, murriztu egingo da programa honetan araututako laguntzaren zenbatekoa, jardueraren gehiegizko finantzaketa saihesteko behar den neurrian.

3.– Programa hau aplikatuz emandako laguntzek garrantzi gutxiko laguntzen edo de minimis laguntzen izaera dute.

4.– Erakunde onuradun batek jaso dezakeen de minimis guztizko laguntzak ezingo du 200.000 euro baino handiagoa izan, abian den ekitaldi ekonomikoak eta aurreko bi ekitaldiek osatzen duten aldi osoan zenbatuta. Onuraduna salgaien errepide-garraioko lanak besteen kontura egiten dituen enpresa bat bada, gehieneko zenbateko hori 100.000 eurora gutxituko da (gainera, laguntza ezingo da erabili salgaiak errepidez garraiatzeko ibilgailuak erosteko). Hori dela eta, ez da programa honetako laguntzarik emango, baldin eta emandako laguntzak, onuradunak jaso izan ditzakeen beste de minimis laguntza batzuei gehituta, muga hori gainditzen badu, laguntza horiek eman dituen administrazioa edo administrazioak edozein izanda ere.

5.– De minimis laguntzak ez zaizkio metatuko Estatuko inongo dirulaguntzari, diruz lagun daitezkeen gastu horiei dagokienez, baldin eta metatze horrek gainditzen badu laguntzaren intentsitatea edo dagokion gehieneko laguntzaren kopurua. Gehieneko kopuru hori kasu bakoitzaren ezaugarri zehatzen arabera dago ezarrita, kategorien araberako salbuespen-araudi baten edo Batzordeak harturiko erabaki baten bitartez.

6.– Aurrez aipatutako muga horiek edo programa honek zehazten dituen beste batzuk gaindituz gero, programa honen bidez emandako laguntza murriztu egingo da, gehiegizko zenbatekoaren arabera.

7.– De minimis laguntzak emandakotzat joko dira, enpresari aitortzen zaionean baduela legezko eskubidea laguntza jasotzeko.

10. artikulua.– Laguntza-eskaera.

1.– Eskaerak, errekerimenduak, jakinarazpenak, zuzenketak eta oinarri hauen ondoriozko gainerako kudeaketak bitarteko elektronikoak erabiliz egingo dira SPRI-Enpresen Garapenerako Euskal Agentzia erakundearen webguneaz baliaturik.

2.– Aurrez ikusitako laguntzetara irispidea izateko baldintzak betetzen dituzten erakundeek SPRIren webgunean gaitutako Laguntza Eskaera formularioak bete beharko dituzte.

3.– Eskaera hori sinadura elektroniko aurreratuaren bidez (ziurtagiri elektroniko aitortu batekin) sinatu beharko du erakundea ordezkatzeko nahikoa ahalorde duen pertsonak. SPRIren sistemetan egindako eskaerako sinadura elektronikoaren eguna hartuko da aurkezpen-egun modura.

4.– Erakunde eskatzailearen eta haren legezko ordezkariaren identifikazio-datuak jaso beharko dira laguntza-eskaeran.

5.– Eskaerarekin, espresuki baimena ematen zaio SPRIri, eska dezan zerga-betebeharrak eta Gizarte Segurantzari dagozkionak egunean dituela egiaztatzen duen ziurtagiria eta, era berean, kontsulta dezan enpresa zer epigrafetan dagoen alta emanda EJZn (ekonomia-jardueren gaineko zergan). Dokumentu horiek kontsultatzeko baimena ukatzen bada, eskatzaileak aurkeztu beharko ditu agiriak, laguntza-eskaerarekin batera.

6.– Laguntza-eskaerarekin batera agiri hauek aurkeztu behar dira:

a) Erakundearen lege-ordezkariaren adierazpena, eskaerari atxikitako ereduaren arabera egina, hauek egiaztatzen dituena:

– Erakundearen lege-ordezkariaren izen-abizenak eta nortasun-agiri nazionalaren zenbakia (NAN) edo atzerritarraren identifikazio-zenbakia (AIZ).

– Erakundearen izena, identifikazio fiskaleko zenbakia (IFZ) eta egoitza soziala.

– Laguntza-eskaeran jasotako diruz laguntzeko moduko jarduerak egingo dituzten eta Euskal Autonomia Erkidegoan dagoen jarduera ekonomikoko zentro baten helbidea (gutxienez).

– Euskadiko ekonomia-jardueren gaineko zergaren kasuan kasuko epigrafean alta emanda egotea.

– Egunean egotea Ogasunarekiko eta Gizarte Segurantzarekiko edota haren kolaboratzaileekiko zerga betebeharretan, eta baita Eusko Jaurlaritzarekin dauzkan betebeharretan ere, eta ez izatea iraungitako, erreklamatutako edo ordaindu gabeko zorrik SPRI Taldeko ezein enpresarekin.

– Aurreko bi ekitaldi fiskaletan eta laguntza eskatzen den ekitaldi fiskalean jasotako de minimis laguntzen zerrenda; bertan adierazi beharko da laguntza hori noiz eman zen, zer erakundek eman zuen, zein programaren baitan eta laguntzaren zenbatekoa.

– Proiektu hori bera gauzatzeko beste erakunde publiko zein pribatu batzuei eskatutako edo/eta haiek emandako dirulaguntzak; bertan adierazi beharko da laguntza hori noiz eskatu zen, eta, hala badagokio, noiz eman zen eta zein organismok eman zuen, zein programaren baitan eta laguntzaren zenbatekoa.

– Enpresaren tamaina zehazteko datuak.

– Ez egotea oinarri hauen 5. artikuluaren 2. apartatuan adierazitako egoeraren batean.

– Enpresa eskatzaileak ez duela zehapen penal edo administratiborik ezarrita eta, beraz, ez duela galdu dirulaguntzak edo laguntza publikoak lortzeko aukera. Halaber, adierazi beharko du ez daukala aipatutakoak eskuratzeko desgaitzen duen legezko debekurik, ezta sexu-diskriminazioa egiteagatik ezarritako debekurik ere, Emakumeen eta Gizonen Berdintasunerako otsailaren 18ko 4/2005 Legearen azken xedapenetako seigarrenean xedaturikoari jarraikiz, eta Emakumeen eta Gizonen Berdintasunerako Legea bigarrenez aldatzen duen martxoaren 3ko 1/2022 Legearen azken xedapenetako laugarrenean jasotako aurreikuspenak betetzen dituela.

– Armarik ez produzitzea, merkaturatzea edo finantzatzea, Herrialde Pobretuekiko Justizia eta Elkartasunerako Gutunari buruzko abenduaren 28ko 14/2007 Legeak ezarritakoarekin bat etorriz.

– Konpromisoa hartzea oinarri hauen 7.6.e) artikuluan adierazitakoa betetzeko.

b) Legezko ordezkariaren notario-ahalordearen kopia. Onuraduna langile autonomoa baldin bada, dagokion foru-aldundiko edo udaleko ogasun-sailaren ziurtagiri eguneratua, jarduera ekonomikoa egiaztatuko duena.

c) Erakunde onuradunaren IFZ.

e) Proiektuaren eskaintza teknikoa eta ekonomikoa, puntu hauei buruzko informazio zehatza eduki behar duena:

– Enpresaren jarduera eta egungo egoera (teknologiari dagokionez).

– Detektatutako arazoa/premia. Lortu nahi diren helburuak.

– Egin beharreko ingeniaritza edota aholkularitza lanen eta produktuaren/zerbitzuaren nahiz proiektuan sortuko diren dokumentuen azalpena.

– Dirulaguntza jasoko duen proiektuaren bidez egingo diren hardware- eta software-inbertsioen azalpena. Argitu proiektuarekin duen lotura eta zergatik den beharrezkoa.

– Ezarriko den EIKT soluzioaren azterketa zehatza. Proiektuan erabiliko diren teknologiak.

– Aurrekontu banakatua, bere baitan hartuz aholkularitza edo/eta ingeniaritza kostuak, sistemaren lizentziak eta mantentze-lanak eta hardwarea (hala badagokio).

– Egin behar den zeregin bakoitzarentzat balioetsitako ordu kopurua (dedikazioak).

– Proiektua gauzatzeko egutegia.

e) Enpresa onuraduna laguntza-eskaera aurkeztu aurreko 12 hilabeteetan sortu bada, enpresaren «negozio-plana» aurkeztu beharko da.

f) Enpresa onuradunak 8. artikuluan deskribatutako % 5eko dirulaguntza osagarria eskatuz gero, dokumentu hauetakoren bat aurkeztu beharko du:

– Bikain euskararen kalitate-ziurtagiriaren kopia, enpresan euskararen erabilera, presentzia eta kudeaketa egiaztatzeko.

– Berdintasun-planaren kopia, plantillan 50 langile baino gutxiago dituzten enpresen kasuan bakarrik; izan ere, enpresa handienek legez eduki behar dute berdintasun-plana.

– Programa honek diruz lagun ditzakeen jardueren barruan, softwarea euskaraz erabiltzen dela egiaztatuko duen agiria.

7.– Enpresa onuradunak eta SPRIk baliozkotzat joko dituzte laguntza-eskaeran adierazitako harremanetarako pertsonaren helbide elektronikora bidaltzen diren jakinarazpen guztiak. Laguntzaren onuradun gisa agertzen den enpresaren posta elektronikoa bakarrik onartuko da harremanetarako helbide gisa.

8.– Eskatzaileek bermatuta izango dute beren hizkuntza –euskara edo gaztelania– ahoz nahiz idatziz erabiltzeko eskubidea, programa honen ondorioz SPRIrekin izango dituzten harreman guztietan.

11. artikulua.– Laguntza-eskaerak aurkezteko epea.

Oinarri hauek Euskal Herriko Agintaritzaren Aldizkarian argitaratu eta hurrengo egunean hasiko da laguntza-eskaerak aurkezteko epea, eta 2023ko azaroaren 6an bukatuko da. Dena den, eskatzaileei zuzendutako arreta teknikoa 2023ko azaroaren 6ko 15:00etan amaituko da (Espainiako penintsulako ordua).

Laguntzaren eskaera eta aurreko artikuluan eskatutako dokumentazioa diruz lagun daitekeen jarduera hasi aurretik aurkeztu beharko dira.

Era berean, tramitaziora onartuko dira 2023ko urtarrilaren 1az geroztik hasitako proiektuen laguntza-eskaerak, baldin eta eskaera horiek oinarri hauek Euskal Herriko Agintaritzaren Aldizkarian argitaratu eta bi hilabeteko epean aurkeztu badira.

12. artikulua.– Ebaluazio- eta ebazpen-prozedura.

1.– Espedienteak osaturik daudenean ebaluatu eta ebatziko dira laguntza-eskaerak, zuzeneko esleipenaren bidez. Aurkezten diren hurrenkeran ebatziko dira eskaerak, aurrekontu-kreditua gastatu bitartean.

2.– Aurkeztutako laguntza-eskaerak onartzeko irizpide erabakigarriak 6. eta 7. artikuluetan jasota daudenak dira.

3.– Ebazpena SPRIko Zuzendaritza Nagusiak egingo du, segidako lehiaren erregimenean, eta erakunde eskatzaileari jakinaraziko zaio gehienez ere 10 egun balioduneko epean, ebazpena eman denetik zenbatzen hasita. Baiespen- edo ezespen-ebazpen hori SPRIko zuzendari nagusiak emango du, eta eskatzaileari jakinaraziko zaio; ebazpenaren aurka, berraztertze-errekurtsoa aurkeztu ahal izango zaio SPRI-Enpresen Garapenerako Euskal Agentziaren zuzendari nagusiari, Administrazio Publikoen Administrazio Prozedura Erkidearen urriaren 1eko 39/2015 Legean ezarritako epean eta moduan.

4.– Ebazteko epea. Ebazteko gehieneko epea 6 hilabetekoa izango da, agiri guztiak aurkezten diren egunetik kontatzen hasita. Aipatutako epean ebazpenik ematen ez bada, eskaera ezetsi egin dela ulertuko da.

5.– Ebazpenen berri ematean jakinaraziko dira dirulaguntzaren zenbatekoak, baldintzak, Batzordearen 1407/2013 (EB) Erregelamenduaren mende daudela (de minimis laguntzei buruzko erregelamendua), bai eta jarduera hori garatzeko beharrezkoa den beste edozein baldintza ere.

6.– Ebazpena SPRIren webgunean eta EHAAn argitaratuko da, denek izan dezaten emandako laguntzen berri.

13. artikulua.– Dirulaguntzaren justifikazioa.

1.– Diruz lagundu daitekeen jarduera amaitu eta 90 egun naturaleko epearen barnean, erakunde onuradunek proiektua burutu izana justifikatu beharko dute, SPRIren webguneko likidazio-eskaeraren inprimakiak betez.

2.– Eskaera hori sinadura elektronikoaren bidez sinatu beharko du erakundea ordezkatzeko ahalorde nahikoa duen pertsona batek. SPRIren sistemetan emandako sinadura elektronikoaren eguna hartuko da aurkezpen-egun modura.

3.– Erakunde eskatzailearen eta haren legezko ordezkariaren identifikazio-datuak jaso beharko dira likidazio-eskaeran.

4.– Likidazio-eskaerarekin batera agiri hauek aurkeztu behar dira.

a) Gastu eta inbertsio hautagarrien fakturen kopia, banakatuta ageriko direlarik aholkularitza edota ingeniaritzako kostuak eta hardware- eta software-kostuak.

b) Finantza-erakundearen ordainketa-frogagirien kopia.

c) Egindako lanak egiaztatzeko memoria teknikoa. Erakunde hornitzaileak egingo du behin proiektua gauzatu ondoren, eta informazio hau jasoko du:

– Konpondutako arazoa/premia. Lortutako helburuak. Aurkeztutako proiektuarekiko desbideratzeak, baleude, eta haien justifikazioa.

– Eginiko ingeniaritza- edota aholkularitza-lanak eta proiektuan sortutako dokumentuak.

– Aholkularitza-zerbitzuaren barruan eginiko lanen deskargu zehatza, eskainitako ordu kopurua bertan adieraziz (aholkulariaren/teknikariaren izena, data, zeregina, eskainitako denbora...).

– Dirulaguntzaren xede den proiektuarekin lotutako hardware eta software arloko inbertsioen azalpena eta frogak (pantaila-argazkiak, argazkiak...). Azaldu erlazioa eta zergatik diren beharrezkoak.

– Fakturatutako zenbatekoak banakatuta, orobat adieraziz aholkularitza edo/eta ingeniaritza kostuak, sistemaren lizentziak eta mantentze-lanak eta hardwarea (hala badagokio).

d) Finantza-erakundearen egiaztagiriaren fotokopia, kontu-korrontearen titulartasuna onuradunaren izenean dagoela frogatzeko eta kontuaren zenbakia zein den zehazteko (IBAN).

Likidazio-eskaerarekin, espresuki baimena ematen zaio SPRIri, eska dezan zerga-betebeharrak eta Gizarte Segurantzari dagozkionak egunean dituela egiaztatzen duen ziurtagiria eta, era berean, kontsulta dezan enpresa zer epigrafetan dagoen alta emanda EJZn (ekonomia-jardueren gaineko zergan).

5.– Ebazpena Zuzendaritza Nagusiak emango du, eta haren aurka berraztertze-errekurtsoa aurkeztu ahal izango zaio SPRI-Enpresen Garapenerako Euskal Agentziaren zuzendari nagusiari, Administrazio Publikoen Administrazio Prozedura Erkidearen urriaren 1eko 39/2015 Legean ezarritako epean eta moduan.

14. artikulua.– Laguntza- edo likidazio-eskaerak zuzentzea.

1.– Laguntza- edo likidazio-eskaerak ez badaude behar bezala beteta puntu guztietan edo ez bada eskatutako dokumentazio osoa ekartzen, SPRIk 10 egun balioduneko epea emango dio erakundearen legezko ordezkariari akatsa zuzentzeko edo nahitaezkoak diren agiriak helarazteko.

2.– Erakunde onuradunak epe horretan akatsa zuzendu ez badu, eskaeran atzera egin duela joko da, aurrez horretarako ebazpen bat onartuta.

15. artikulua.– Laguntza ordaintzea.

1.– Dirulaguntzak SPRIk formalizatu eta emango ditu, laguntza esleitu zaion erakunde onuradunari ordainketa bakarra eginda, likidazio-eskaera eta 13. artikuluan eskatzen den justifikaziorako dokumentazioa modu egokian aurkeztu ondoren.

2.– Baldin eta gastu hautagarria dirulaguntza emateko ebazpenean onartutako aurrekontuan adierazitakoa baino txikiagoa bada, dirulaguntza proportzionalki doituko zaio gastuari, 8. artikuluan ezarritako irizpideen arabera.

16. artikulua.– Erakunde onuradunen betebeharrak.

1.– Oinarri hauen testuinguruan esleituko diren dirulaguntzen erakunde onuradunak Dirulaguntzen azaroaren 17ko 38/2003 Lege Orokorraren 14. eta 46. artikuluetan eta Euskadiko Ogasun Nagusiaren Antolarauei buruzko Legearen testu bateginaren (azaroaren 11ko 1/1997 Legegintzako Dekretuaren bidez onetsia) 50.2 artikuluan ezarritako betebeharrei daude lotuta, eta, zehazki honako hauei:

a) Emandako laguntza onartzea. Horri dagokionez, dirulaguntza eman izanaren jakinarazpena jasotzen duenetik hamar egun balioduneko epean erakunde onuradunak ez badio laguntzari espresuki uko egiten SPRIren aurrean, laguntza onartuta egin dela ulertuko da.

b) Zer jarduera-plan egiteko eman den laguntza, horretarako erabiltzea.

c) SPRIk beharrezkotzat jotako dokumentazio osagarria eska dezakeela eta SPRIk izendatutako langileek, erakundearen edozein instalaziotan, beharrezkotzat eta egokitzat jotako egiaztapen guztiak egin ditzaketela onartzea. Horien guztien helburua izango da emandako laguntzaren xede den proiektua gauzatu dela eta eskatutako baldintzak bete direla egiaztatzea.

d) Faktura osoak gordetzea eta SPRIren eta Euskal Autonomia Erkidegoko Administrazio Orokorraren esku jartzea bost urtez, gastu hautagarriak gauzatzen direnetik aurrera.

e) Laguntzen erabilera fiskalizatzeko eginkizuna betetzen duten aldetik, eskatutako informazioa ematea Eusko Jaurlaritzako Kontrol Ekonomikoko Bulegoari eta Herri Kontuen Euskal Epaitegiari edo Estatu zein Europa mailako beste kontrol-organo eskudun batzuei.

f) SPRIri berehala jakinaraztea laguntzak edo dirulaguntzak edota beste edozein diru-sarrera edo baliabide eskatu edo jaso dutela xede berbererako beste administrazio edo erakunde publiko edo pribatu batzuetatik.

g) Dirulaguntza esleitzeko aintzat hartu den inguruabarren bat aldatu bada, horren berri ematea SPRIri.

h) SPRIk emandako laguntzaren berri ematea, egindako proiektuaren edozein zabalkunde-jarduera potentzialetan.

i) Hizkuntzaren eta irudien erabilera ez-sexista bermatzea, diruz lagundutako proiektua gauzatu bitartean sortzen diren dokumentu eta euskarri guztietan.

17. artikulua.– Laguntzak aldatzea.

1.– Laguntza emateko baldintzetan edozein aldaketa gertatzen bada eta, edozein kasutan, beste erakunde publiko edo pribatu batzuek emandako laguntzak edo dirulaguntzak edota beste edozein diru-sarrera edo baliabide jaso badira xede berbererako, laguntza esleitzeko ebazpena aldatu ahal izango da, betiere programa honetan ezarritako gutxieneko baldintzak betetzen jarraitzen bada.

2.– Halaber, programaren kudeatzaileak jarduerak gauzatzeko luzapen bat eman dezake, baldin eta erakunde eskatzaileek hala eskatu eta behar bezala justifikatzen badute; luzapen horren ondorioz, gehienez, 12 hilabetez atzeratu ahal izango da proiektuak gauzatzeko gehieneko epea (12 hilabetekoa da epe hori).

3.– Jarduketak laguntza-eskaeran eta aurkeztutako dokumentazio osagarrian jasotakoak izango dira, eta SPRIk aldaketak baimendu ahalko ditu, betiere aldaketa horiek aldez aurretik justifikatu baditu erakunde onuradunak, amaitu aurretik, eta ez bada hutsaltzen programa honek hasiera batean ezarritako jarduketa eta helburuen izaera.

18. artikulua.– Ez-betetzeak.

1.– Ikusiko balitz erakunde onuradunek ez dutela bete oinarri hauetan, aplikatzekoak diren gainerako arauetan eta, hala badagokio, laguntzen ebazpenean ezarritako baldintzaren bat, emandako laguntza eskuratzeko eskubidea galduko dute eta SPRIri itzuli beharko dizkiote ordura arte kobratu dituzten laguntzen diru-kopuruak gehi dagozkien berandutze-interesak, eta, behar balitz, legezko akzioak abiaraziko dira diru-kopuru horiek itzul ditzaten. Era berean, aholkularitza-enpresak faltaren bat egin badu, programa honi atxikitako beste proiektu batzuetan parte hartzea debeka dakioke.

2.– Edonola ere, artikulu honetan adierazitako ondorioetarako, ez-betetzea izango da honako hau:

a) Laguntza-eskaeran eta dokumentazio osagarrian jasotako ekintzak aldatzea SPRIren baimenik gabe. Halaber, ez betetzea izango da SPRIri ez jakinaraztea proiektuaren exekuzioan gertatutako aldaketak, baldin eta aldatu egiten badituzte laguntza emateko aztertu ziren baldintzak. Posible da aldaketak baimentzea, betiere erakunde onuradunak baimena eskatu badio SPRIri, eta justifikatu baditu aldaketa horiek, ahal dela, proiektuan aplikatu baino lehen, eta betiere, programa honek lagundutako jardueren eta lortu nahi dituen helburuen izaera aldatzen ez badute.

b) Gastu hautagarriak epe barruan ez justifikatzea edo programa honetan eta laguntza emateko ebazpenean jasotako eskakizunak ez betetzea.

c) Diruz lagundutako proiektua egiteko epeak gainditzea, aldatzeko baimena edo luzapena eman ez bada.

d) Laguntza eskuratzea programa honetan ezarritako baldintza eta eskakizunak edo laguntza emateak berekin zekartzan baldintzak bete gabe.

e) Programan edo laguntza emateko ebazpenean aurreikusitako kontrol-neurriak ez onartzea edo horien garapena oztopatzea.

f) Proiektua beste zerbaitetara desbideratzea edo laguntzak emateko ebazpenean ezarritako beste edozein betebehar ez betetzea.

g) Dirulaguntzen Lege Orokorraren 37. artikuluan eta Euskadiko Ogasun Nagusiaren Antolarauei buruzko Legearen testu bateginaren 53.1 artikuluan aurreikusitako kausak.

3.– SPRIri dagokio ez-betetzea egiaztatzeko espedientea hasi, izapidetu eta ebaztea.

4.– Ez badira betetzen deialdi honetan eta aplikatzekoak diren gainerako arauetan jasotako betekizunak edo, hala badagokio, dirulaguntza emateko ebazpenean ezartzen direnak, dirulaguntza ezeztatuko da ez-betetze espedientea ireki ondoren eta, dirulaguntza edo berandutze-interesak itzuli beharko zaizkio SPRI-Enpresen Garapenerako Euskal Agentziari, 1/1997 Legegintzako Dekretuan eta abenduaren 17ko 698/1991 Dekretuko II. tituluan ezarritakoari jarraikiz (698/1991 Dekretua, Euskal Autonomia Erkidegoaren Aurrekontu Orokorren pentzudan ematen diren dirulaguntzen bermeei eta horiek itzultzeari buruzko erregimen orokorra arautzen duena eta horien kudeaketan parte hartzen duten erakunde laguntzaileek bete beharreko baldintzak, erregimena eta eginbeharrak ezartzen dituena), nahiz eta horrek ez duen eragotziko kasuan kasuko legezko akzioak abiaraztea eta dagozkion zigorrak ezartzea. SPRI-Enpresen Garapenerako Euskal Agentziako Zuzendaritza Nagusiari dagokio dirulaguntza ezeztatzeko –eta, hala badagokio, partzialki edo guztiz itzularazteko– espedienteak abiarazi eta ebaztea.

5.– Halaber, gainfinantzaketa badago ordainketaren ostean beste laguntza batzuk jaso izanagatik, programaren xede den jardueraren kostua gainditzen duen laguntza-zatia itzuli beharko da, 9. artikuluan araututakoari jarraikiz. Kasu horretan, itzuli beharreko zenbatekoa zehaztuko da gertaera hori adierazteko eta itzulketa erabakitzeko emango den ebazpenean.

AZKEN XEDAPENETAKO LEHENENGOA.– Aplikatu behar den araudia.

Programa honi araudi hau aplikatuko zaio:

1.– Dirulaguntzen azaroaren 17ko 38/2003 Lege Orokorra eta lege hori garatzen duen Erregelamendua (uztailaren 21eko 887/2006 Errege Dekretua), dirulaguntzen arloko oinarrizko legeriari dagokion guztian.

2.– 1/1997 Legegintza Dekretua, Euskadiko Ogasun Nagusiaren Antolarauei buruzkoa.

3.– 698/1991 Dekretua, abenduaren 17koa, Euskal Autonomia Erkidegoaren Aurrekontu Orokorren pentzudan ematen diren dirulaguntzen bermeei eta horiek itzultzeari buruzko erregimen orokorra arautzen duena eta horien kudeaketan parte hartzen duten erakunde laguntzaileek bete beharreko baldintzak, erregimena eta eginbeharrak ezartzen dituena.

4.– Europako Batzordearen 1407/2013 (EB) Erregelamendua, abenduaren 18koa, Europar Batasunaren Funtzionamenduari buruzko Itunaren 107. eta 108. artikuluak de minimis laguntzei aplikatzeari buruzkoa (EBAO 2013 L 352/1).

5.– Europako Parlamentuaren eta Batzordearen 1303/2013 (EB) Erregelamendua, 2013ko abenduaren 17koa, Eskualde Garapeneko Europako Funtsen inguruko xedapen arruntak ezartzen dituena, besteak beste.

AZKEN XEDAPENETAKO BIGARRENA

Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan (aurrerantzean, DBLO), Europako Parlamentuaren eta Kontseiluaren 2016ko apirilaren 27ko Datuak Babesteko (EB) 2016/679 Erregelamendu Orokorrean (aurrerantzean, DBEO) eta datu pertsonalak babestearen arloan aplikatu behar den gainerako araudian ezarritakoarekin bat etorriz, jakinarazten da emandako datuak SPRIk tratatuko dituela eta haren Tratamendu Jardueren Erregistroan sartuko direla.

Tratamendu horren helburua, deialdiaren interes publikoan eta parte hartzeko eskabidean oinarritua, eskatutako laguntzaren espedientea kudeatzea da. Datu pertsonalak tratatzeko oinarri juridikoa da SPRIk duen interes publikoa, SPRI-Enpresen Garapenerako Euskal Agentzia sortzeko estatutuetan ezarritako helburuak betetzeko.

Informazio hori gaian eskumena duen administrazio publikoari eta SPRI Taldeko enpresei laga ahal izango zaie.

Laguntza emateko espedientea izapidetzen den bitartean eta legez eska daitekeen epean gordeko dira datuak, legezko betebeharrak bete ahal izateko.

Interesdun guztiek eskubidea izango dute datuak zuzentzeko edo ezerezteko, tratamendua mugatzeko, hari aurka egiteko, datuen eramangarritasun-eskubidea egikaritzeko edo tratamendu automatizatuan soilik oinarritutako erabaki baten xede ez izateko, bai eta datuak babesteko araudi aplikagarrian aurreikusitako beste edozein eskubide ere, eskubide horiek aplikagarriak direnean, honako helbide elektroniko honetara mezua bidalita: lopd@spri.eus. Era berean, interesdunak datuak babesteko gure ordezkariarekin harremanetan jarri ahal izango dira, idatzizko komunikazioaren bidez, helbide elektroniko honetan: dpd@spri.eus

Era berean, interesdun orok du edozein erreklamazio aurkezteko eskubidea dagokion kontrol-agintaritzan; SPRIren kasuan, Datuak Babesteko Euskal Bulegoan: www.avpd.eus

SPRIk datu pertsonalen babeserako esparruan egiten duenaren gaineko informazio gehigarriaren eta xehakatuaren berri izateko, jo https://agenda.spri.eus/es/aviso-legal/privacidad/ web-orriko pribatutasun-politikaren atalera.

AZKEN XEDAPENETAKO HIRUGARRENA

SPRI-Enpresen Garapenerako Euskal Agentziak oinarri hauei buruz hartzen dituen erabaki guztiak administratiboak dira eta, beraz, administrazioarekiko auzien jurisdikzioa da jurisdikzio eskuduna.


Azterketa dokumentala