Euskal Herriko Agintaritzaren Aldizkaria

127. zk., 2021eko ekainaren 29a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HERRI-KONTUEN EUSKAL EPAITEGIA

3694

ERABAKIA, Herri-Kontuen Euskal Epaitegiaren Osokoak 2021eko martxoaren 25eko bilkuran hartutako Zaldibiako Udalaren fiskalizazio txostena, 2019koa, behin betiko onesten duena.

Herri-Kontuen Euskal Epaitegiaren Osokoak 2021eko martxoaren 25ean egindako bilkuran

ERABAKI DU:

Zaldibiako Udalaren fiskalizazio txostena, 2019koa behin betiko onestea, erabaki honen eranskin modura ageri dena.

HKAEEren 1/1988 Legearen 13.2 artikuluak aurreikusten duena betez, txostenaren ondorioak dagozkion aldizkari ofizialetan argitaratzeko xedatzea.

Vitoria-Gasteiz, 2021eko martxoaren 25a.

HKEEren lehendakaria,

José Luis Bilbao Eguren.

HKEEren idazkari nagusia,

JULIO ARTETXE BARKIN.

ERANSKINA

zaldibiako UDALAREN FISKALIZAZIO TXOSTENA, 2019

Laburdurak:

24/2018 LED: sektore publikoko ordainsarien arloko premiazko neurriak.

AASS: Arau Subsidiarioak.

BEZ: Balio Erantsiaren gaineko Zerga.

EAE: Euskal Autonomia Erkidegoa.

EHJAN: Euskal Autonomia Erkidegoko Auzitegi Gorena.

EIOZ: Eraikuntzen, Instalazioen eta Obren gaineko Zerga.

GAO: Gipuzkoako Aldizkari Ofiziala.

GFA: Gipuzkoako Foru Aldundia.

HILBIZ: hiri izaerako lursailen balio igoeraren gaineko zerga.

HKEE: Herri-Kontuen Euskal Epaitegia.

JEZ: Jarduera Ekonomikoen gaineko Zerga.

LZ: Lanpostuen zerrenda.

OHZ: Ondasun Higiezinen gaineko Zerga.

TAOAL: 7/1985 Legea, Toki Araubidearen Oinarriak Arautzen dituena.

UFFF: Udal Finantzaketarako Foru Funtsa.

I.– Sarrera.

Herri-Kontuen Euskal Epaitegiak otsailaren 5eko 1/1988 Legeak agindutakoari eta Epaitegiaren Osoko bilkurak onetsitako Lan Programari jarraikiz, Zaldibiako Udalaren 2019ko ekitaldiko Kontu Orokorraren fiskalizazio lana mamitu du.

HKEEk gauzatutako Zaldibiako Udalaren Kontu Orokorraren aurreko fiskalizazio lana 2006ko ekitaldiaren gainekoa izan zen.

Fiskalizazio-lan honek honako alderdi hauek besarkatzen ditu:

– Legezkotasuna: aurrekontuaren honako atal hauetan ezargarria den arautegia bete izana: aurrekontua, zuzenbide publikoko sarrerak, zorpetzea eta finantza-eragiketak, langileria, obren kontratazioa, zerbitzuak eta hornidurak eta dirulaguntzen emakida. Azterketa lan hau fiskalizazio-gai den ekitaldiari dagokio, beharrezko irizten diren beste ekitaldi batzuei buruzko egiaztatzeak egitea eragotzi gabe, fiskalizazio-gai den ekitaldian eragina dutelako.

– Kontabilitatea: Kontu Orokorra ezargarri zaizkion kontularitzako printzipioekin bat datorrela egiaztatzea. Kontu Orokorrak Udalaren aurrekontuko balantzeak, ekonomia eta ondarearen emaitzen kontuak, oroitidazkiak eta likidazioak besarkatzen ditu.

– Lanaren zabalak ez du gastuaren efikazia eta efizientziari buruzko azterlan berariazkorik besarkatu; ezta, kudeaketa-prozedurei buruzkorik ere. Nolanahi den ere, fiskalizazioan sortu diren alderdi partzialak txosten honen III. idazpuruan aztertu ditugu.

– Udalaren egoera ekonomikoaren finantza analisia.

Zaldibiako udalerriak 1.613 biztanle zituen 2019ko urtarrilaren 1ean. Udala Sasietako Mankomunitateko eta Gipuzkoako Ur Kontsortzioko partaide da; Sasietak hondakinen bilketa kudeatzen du 23 udalerritan eta Ur Kontsortzioak bideraketa sareko zerbitzua ematen du. Berebat, Goierriko Ekimena SA sozietatean ere parte hartzen du (% 4), zeinak Goierri eskualdeko 18 udalen sustapen ekonomikoko eskumenak kudeatzen baititu.

II.– Iritzia.

II.1.– Legea betetzeari buruzko iritzia.

1.– Udalak 2019an % 2,33ko ordainsari igoera onartu zuen eta lanpostu guztien balorazioa egin zuen; horrek % 6,9ko ordainsari igoera osagarria eragin zuen. Aurrekontuko araudiak ordainsari igoeraren mugak gainditzeko bide ematen du ordainsari-egokitzapen berezi eta apartekoetarako (24/2018 Legegintzako Errege Dekretuaren 3.7 artikulua). Ezaugarri hori ez da betetzen, balorazioak lanpostu publiko guztiei eragiten baitie.

Epaitegi honen ustetan, Zaldibiako Udalak, aurreko paragrafoetan aipatutako ez-betetzeak alde batera, zuzentasunez bete du 2019ko ekitaldian ekonomia eta finantzaren jarduera arautzen duen lege arautegia.

II.2.– Urteko kontuei buruzko iritzia.

1.– Hona hemen Zaldibiako Udalaren 2019ko abenduaren 31ko Gastu Orokorretarako Diruzaintza Geldikinean eta Ondare Garbian eragina duten doiketak:

(Ikus .PDF)

2.– Udalak ez du ibilgetua eragiten duten egintza ekonomiko guztien kontularitzako erregistroa bermatuko duen jarraipenik egiten eta zehazki, ez du ibilgetuaren elementu bakoitzeko xehakapenik, ez amortizaziorako zuzkidurarik egiten. Horregatik guztiagatik, ezin esan daiteke Udalaren Balantzeko aktibo ez arruntaren saldoek, guztira 12,8 milioi euro, islatzen duten Udalaren ondasun eta eskubideen egiazko egoera 2019ko abenduaren 31n.

3.– 2011n, arau subsidiarioetara ez egokitzeagatik xehetasun-azterlan bat onartzen zuen akordioa baliogabetzat jo zen. Epaia betearazteko prozesuan, Euskal Autonomia Erkidegoko Justizia Auzitegi Nagusiak kalte-ordaina emateko prozedura abiaraztea erabaki zuen 2019ko azaroan, eta Udalari 303.013 euro eskatu zizkion. Udalak zenbateko hori aurkaratu du, baina EAEANk ez du ebazpenik eman txosten hau idatzi dugun datan. Erantsitako Kontuek ez dute kalte-ordaina etorkizunean ordaintzeko zuzkidurarik jaso eta horri buruzko informaziorik ere ez da barne hartu Oroitidazkian.

Epaitegi honen iritzira, aurreko salbuespenak alde batera, Zaldibiako Udalaren Kontu Orokorrak alderdi esanguratsu guztietan erakusten du 2019ko ekitaldiaren jarduera ekonomikoa eta 2019ko abenduaren 31ko ondarearen eta finantza egoeraren isla zuzena; baita, data horretan amaitutako urteko ekitaldiari dagozkion bere eragiketen eta eskudiruzko fluxuen emaitzena ere, ezargarria den finantza informazioaren arau-esparruaren arabera eta, zehazki, arauan jasotako kontularitzako printzipio eta irizpideen arabera.

III.– Barne kontroleko sistemei eta kudeaketa-prozedurei buruzko irizpenak.

Atal honetan jaso dira ekonomia eta finantza jarduera arautzen duten printzipioak betetzea nabarmen eragiten ez duten akatsak ez ezik, baita kudeaketa hobetzeko azpimarratu nahi diren prozedurazko alderdiak ere.

III.1.– Aurrekontua, kontabilitatea eta diru-sarrerak.

– Onartutako aurrekontuan ez zegoen idazkari-kontuhartzailearen nahitaezko txostenik, eta langileen eta dirulaguntzen eranskinak ez zetozen bat gastu-kapitulu horietako diru-izendapenekin.

– 2019ko aurrekontuari 2017ko kredituak txertatu zaizkio, 48.057 euro; ordea, horiek ezin ziren hor jaso araudiak mugatu egiten dituelako txertaketa jarraituak. Gainera, 8.111 euroren transferentzia batek % 25 baino gehiago murriztu zuen gastu-programa bat, eta halakoetan nahitaez onartu behar du Udalbatzak.

– 2. kapituluaren aurrekontuko egiturak ez du araudiak finkatutakoa betetzen eta kapitulu horretako gastuen % 75 araudiaren arabera bulego-materialaren erosketei esleitzen dien gastu-kontzeptuan sailkatzen du.

– Gastuaren esleipen fasea ez da kontularitzan erregistratzen eta ondorioz, Aurrekontuaren likidazio egoerak ez du kreditu konprometituen berri ematen, zeinak 2019ko abenduaren 31n 1,3 miloi euro ziren. Halaber, Oroitidazkian ez dira jasotzen data horretan konprometituak zeuden geldikinak.

– Oroitidazkiak ez zuen 2020rako onartutako 66.646 euroren konpromiso-kredituaren egoeraren berri eman, 2019ko abenduaren 31n konprometitu gabe zegoena. Halaber, jakinarazi beharko litzateke kutxa-irizpidea aplikatu dela OHZ eta EJZren diru-sarreren erregistroan. Geroko gertakarien atalean, jakinarazi behar zen 2020ko apirilean 200.000 euroren dirulaguntza eman zela eraikitzen ari zen eraikin berrirako.

– Udalaren zerga-zordun nagusia likidazio-prozesuan dagoen enpresa bat da, zeinaren instalazioak hirugarren batek erosi baitzituen 2018an. Instalazio horien OHZren likidazioak, 2016tik 2018ra bitartekoak, 122.400 eurorenak dira, eta eraikin horiei lotuta daude; beraz, jabe berriari eskatu behar zaizkio, zorrak bideratzeko dagokion prozedura gauzatu ondoren.

– Atzerapenak hauteman dira ordainagiriak eta likidazioak GFAren agentzia exekutibora bidaltzean: trakzio mekanikoko ibilgailuen gaineko zergatik egiteke zeuden likidazioak, 2017tik 2020ra bitartekoak, 2020an bidali ziren.

III.2.– Langileria.

– 2019ko ordainsarien igoera onartu zuen Udalbatzaren erabakia argitara eman behar zatekeen GAOn.

– Udalak idazkari-kontuhartzaile lanpostua dedikazio osoko kalifikatu du, baina lanpostua partekatzeko beste toki-erakunde bateko partaidea da; % 90eko dedikazioa izatea aurreikusi da. Udalak aldaketa hori GFAri eta taldeko beste udalari planteatu behar dio.

– 2019ko abenduaren 31n indarrean zeuden 1989 eta 2012 bitartean formalizatutako aldi baterako 5 kontratu. Kontratuen iraupenak erakusten du garatutako egitekoek iraunkortasun izaera dutela eta honenbestez, egoera hori zuzendu egin behar da.

– Udalak 2018an Giza Baliabideetako Plan Estrategiko bat onartu zuen, langileen erretiro aurreraturako pizgarrien ordainketa ezartzen zuena. Ez zen, baina, nahitaezko txostena egin hura eragin zuten arrazoi objektiboak, lortu beharreko helburua eta ondorio ekonomikoak zehaztuz.

III.3.– Kontratazioa.

Fiskalizazio-gai den urtean esleitutako kontratu nagusia berrikustean, udaletxe berriaren eraikuntza-lana, 2019ko ekainean 1,5 milioi euroan esleitutakoan, honako alderdi hauek azaleratu dira:

– Obraren aurrekontuak askotariko kapituluak barne hartu zituen (igogailua, klimatizazio-ekipoak...) eta xedea lotetan ez zatitzea erabaki zen; ordea, erabaki hori espedientean justifikatu behar zatekeen.

– Balorazio-irizpideei dagokienez, kontratua sinatu zenetik obra hilabeteko epean abiaraztea baloratu zen (% 2); epe hori, baina, araudiak eskatzen duen bera da. Gainera, enpresek euskararen erabilerari buruzko ziurtagiri jakin batzuk izatea (% 3) eska daiteke baldintza modura, baina ez balorazio-irizpide modura. Azkenik, langileek antzeko eraikin publikoen eraikuntzan zuten eskarmentua baloratu zen (% 15); irizpide hori, baina, ez zen justifikatu eta baztertzailea izan liteke.

– Kontratazio-mahaian aholkularitza teknikoko zerbitzuak ematen dituen kanpoko aholkulari bat barne hartu zen; araudiak dio Udaleko langileek eta hautesleek osatuko dutela mahaia. Gainera, 2 bokal izendatu ziren, baina arautegiak gutxienez 3 izan beharko dutela dio.

– Prezioa balioztatzeko baliatutako proportzionaltasun sinpleko formulak murriztu egin zuen faktore honen egiazko balioa, lizitazio prezioa berdintzen zuten eskaintzei puntuak emanez.

– Lizitatzaile ez-esleipendunari bidalitako jakinarazpenak egindako hautaketaren motibazioa zehaztu behar zukeen.

– Adjudikazioaren ebazpena eta gauzatutako kontratua kontratatzailearen profilean argitaratu behar ziratekeen.

Erosketa txikiak.

– 2019an 140.594 euroren kostua izan zuten erosketak erosketa txiki modura esleitu zirela ikusi dugu, prozedura ireki bidez izapidetu beharrean. 80.000 eta 35.000 euro baino txikiagoko obra bat eta bi erosketa txiki, hurrenez hurren, prozedura ireki sinplifikatu laburtu bidez izapidetu zitezkeen. Kontratu txiki horietatik bitan esleipenak ez ziren transkribatu alkatearen Ebazpen-liburuan.

– Kontratu txikiei dagokienez (40.000 euroren muga obretarako eta 15.000 euro zerbitzu eta horniduretarako), araudiak agintzen du kontratatzailearen profilean argitaratuko direla ekitaldian gauzatutakoak eta ez du halakorik egin Udalak. Kontratazioari buruzko Oroitidazkiaren atalean ere ez zen kontratu-jardueraren berri eman, 5 esleipen baino ez baitziren zehaztu.

III.4.– Transferentziak eta dirulaguntzak.

– 6.620 euroren dirulaguntza izendun bat aztertu ondoren ikusi dugu ez zela zegokion hitzarmen edo ebazpen xehakatuarekin arautu. Ordainagiri edo agiri baliokideak justifikatzeari dagokionez, dirulaguntzaren zenbatekoa gainditzen dute, baina ez zen sarrera eta gastuen nahitaezko zerrenda txertatu eta jaso izanaren agiriak barne hartu direla ikusi da.

– Udalak 16.985 euroren dirulaguntzak eman zizkien kultura eta kiroletako 10 kultura-erakunderi, webgunean argitaratutako oinarri-arau eta deialdiaren bitartez; ordea, Dirulaguntzen Datu-base Nazionala edo lurraldeko aldizkari ofiziala erabili behar zukeen. Udalak 400 eta 4.000 euro bitarteko laguntzak banatu zituen, dirulaguntzen oinarri-arauek banaketarako irizpideak zehaztu gabe.

III.5.– Beste alderdi batzuk.

– Gardentasunari eta informazio publikoa eskuratzeari buruzko araudiak informazio jakin bat udalaren webgunean argitaratzea eskatzen du. Informazio ekonomikoari dagokionez, ez dira Udalaren webgunean barne hartzen urteko kontuak eta ez da aurrekontuaren egonkortasun helburuak bete izanari buruzko informaziorik ematen. Berebat, emandako dirulaguntzen informazio xehakatua eskaini behar litzateke eta baliatutako kontratazio-moldeei buruzko estatistikak jaso. Azkenik, Udalbatzaren erabakiak eta udalkideen ordainsariak eta aitorpenak xehakatu behar lirateke.

– Ordainketa epeen gaineko hiruhileko txostenek erakusten dute Udalak 2019an egindako ordainketen % 19,4k gainditu egin zuela araudiak zehaztutako epea (30 egun onartu zenetik).

IV.– Finantzaren Analisia.

Udalak azken ekitaldietan likidatutako magnitude nagusien bilakaera honako taula honetan dago zehaztua.

(Ikus .PDF)

Sarrera arruntak: % 8,3 egin dute gora 2017ko urtearen aldean.

– Zerga zuzenak, zeharkakoak eta tasak: % 16,2 egin dute gora; nabarmentzekoak dira EIOZek eta HILBIZek izandako hobekuntza. Gainera, 2018-2019 ikasturtean, musika-eskolako zerbitzua kobratzeari ekin zitzaion, izan ere aurretik zerbitzua ematen zuen erakundearen dirulaguntza bidez finantzatzen baitzen.

– Transferentziak eta dirulaguntzak: % 4,5 egin dute gora 2017-2019 aldian, handitu egin delako osagai nagusi den Udal Finantzaketarako Foru Funtsa (% 13,6), nahiz Artxanberrin lokalak gaitzeko dirulaguntza 2017an eskuratzeak murriztu egin duen hirurtekoaren hazkuntza.

Funtzionamendu-gastuak: % 4,5 egin dute gora 2017 eta 2019 bitartean, honako xehakapenarekin:

– Langile-gastuek % 4,9 egin zuten behera 2019 eta 2017 bitartean, nahiz soldatek gora egin azken bi urteetan, 2018an administrari batek erretiroa hartu zuelako eta Gizarte Segurantzaren kuotak % 10,8 murriztu zirelako.

– Ondasun arrunt eta zerbitzuen kontratazioak % 17,8 egin zuen gora 2017koaren aldean eta azpimarratzekoa da Idiazabalgo Udalari musika-eskolagatik ordaintzen hasi izana eta Gipuzkoako Ur Kontsortzioari uren arazketagatik ordainketen igoera. Horren aldean, konponketa eta zaintza gastuek % 42,9 egin dute behera, 2017an uraren hornidura-sarean eta udal bideetan uneko jarduera garrantzitsuak egin izanaren ondorioz.

– Transferentziek eta dirulaguntzek bere horretan eutsi diote eta % 16,5 igo dira Sasietako Mankomunitateari, kapitulu honetako osagai nagusi denari, egindako ekarpenak; ordea, berdindu egiten da musika-irakaskuntzaren zerbitzua ematen zuen entitateari ematen zitzaizkion dirulaguntzak kentzearekin.

Aurrezki gordina: erakundearen autofinantzaketa maila neurtzen duen aldaki honek 2017an sarrera arrunten % 20,5 egiten zuen eta pixka bat onera egin du 2019an; honenbestez, Udalak urte horretan sarrera arrunten % 23,3 izan zuen finantza zamari aurre egiteko eta inbertitzeko.

Aurrezki garbia eta zorpetzea: udalak 2018an mailegu bat kontratatu zuen, 2020an baliatu duena, eta 2034 arte urteko 72.919 euroren finantza zama balioetsia eragingo duena.

Kapital-eragiketen emaitza: aldi horretako inbertsioek (1,1 milioi euro) diru-sarrera arrunten % 18,3 egin dute, eta udal-eraikin berriak sortutako obrak izan dira jomuga: behin-behineko lokalak gaitzea, kultura-etxe zaharra eraistea eta instalazio berriko obrak egitea, aurreko inbertsioen gainean % 60,6 egin dutenak. 2019an eraikin berria eraikitzen hasi ziren, 1,5 milioi euroan esleitu zena eta ekitaldi horretan 245.620 euroren gastua eragin zuena. Inbertsioak nagusiki berezko baliabideekin finantzatu dira eta 2020an zorpetu egin behar izan da 2019an abiarazitako obra amaitzeko.

Gastu orokorretarako diruzaintza geldikina: 2018an gora egin du kontrataturiko maileguaren eraginaren ondorioz. Kontratua aintzat hartu gabe, geldikinak behera egin du 2018ko eta 2019ko inbertsioak finantzatzeko baliatu delako; fiskalizazioan azaleratu diren doiketak egin eta gero 147.383 euro gelditzen dira.

Ondorioa: aurrezki-mailak hobera egin du pixka bat aztertutako aldiko diru-sarrera arruntak funtzionamendu-gastuen gainetik hazi direlako. Udalak 2019an abiarazitako obrarekin hartutako konpromisoei aurre egin beharko die, 1,3 milioi euro, eta horretarako zorpetu eta autofinantzatu beharko du. Kontratatu den mailegua erabiltzeak (2020an gertatu dena) zorpetze-maila 2019ko sarrera arrunten gainean % 48,2an jarriko luke, EAEko udalen batez bestekoa baino handiagoa dena (% 16,9, 2018an). 2020ko krisi ekonomikoak aldaketa esanguratsuak ekarriko ditu urte horretan eta ondorioz, udalak duen diru-sarrera nagusia, UFFF alegia, 144.366 euro murriztuko da, 2020ko azaroan egindako aurre-likidazioaren arabera eta ekitaldi horretan eragiketa arruntek sortutako aurrezki-mailan eragina izango du.

Aurrekontuaren egonkortasuna: udalaren kontu-hartzailetza atalak egindako txostenak egiaztatu du Likidazioari dagokionez, aurrekontuaren egonkortasunaren araua bete dela, eragiketa ez finantzarioetan superabita izan duelako eta gastu zenbagarriek behera egin dutelako 2018koen aldean. Zorpetzeari dagokionez, berriz, kontrataturiko milioi 1 euroren maileguak 2019ko sarrera arrunten % 48,2 egin zuen, ezarritako muga baino txikiagoa (% 72).

V.– Urteko Kontuak.

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

ALEGAZIOAK

Herri Kontuen Euskal epaitegiak Zaldibiako udalaren 2019ko ekitaldiko kontu orokorraren fiskalizazioa mamitu ondoren bere iritzia aurkeztu digu 15 eguneko epean beharrezko irizten badugu arrazoibideak aurkezteko aukera emanez.

Iritziak laburbilduz honako hauek esaten ditu:

– Lege betetzeari buruz: 2019ko ekitaldian ekonomia eta finantzaren jarduera arautzen duen lege arautegia zuzentasunez bete duela langileen ordainsari igoerari dagokionean izan ezik.

– Kontu orokorrak 2019ko abenduaren 31ko ondarearen eta finantza egoeraren isla zuzena egiten du, nahiz eta ez izan ibilgetuaren elementu bakoitzeko xehapenik, ez amortizaziorako zuzkidurarik egiten eta Euskal Autonomia Erkidegoko Justizia Auzitegi Nagusian eztabaidan dagoen kalte ordainari buruz ez du ezer islatzen.

– Barne kontroleko sistemei eta kudeaketa prozedurei buruzko iritzia: printzipioak betetzen dira nahiz eta betetze nabarmen eragiten ez duten akatsak izan. Era berean, prozedurak hobetzeko iradokizunak egiten dira.

– Aurrekontua, Kontabilitatea eta diru sarrerak.

– Idazkari kontu-hartzailearen txostenaren falta eta langilearen eranskina ez zetorren bat gastu kapituluarekin.

– 2017ko kredituak txertatu ziren.

– 2. Kapituluaren aurrekontuko egiturak ez da egokia.

– Gastuaren esleipena fasea ez da kontularitzan.

– Memorian ez da ezer esaten konpromiso kredituari buruz.

– Zerga zordun Nagusiak jabe berria du, jabe berriari eskatu behar zaizkio OHZren likidazioak ordaintzea.

– GFAren agentzia exekutibora bidaltzen atzerapena.

– Langileria.

– Ordainsariaren igoera ez zen GAOn argitaratu.

– Idazkari kontu-hartzailearen lanpostu partekatuta du eta Zaldibiako udalak % 100 era du.

– Aldi-baterako lan kontratuen egoera zuzendu beharra.

– Giza baliabideetako plan estrategikoa onartuta du baina ez du ez txostenik ez lortu beharreko helbururik.

– Kontratazioa.

– Udaletxe berria eraikitzearen esleipen prozesuan egindako akatsak zehazten dira.

– Erosketa txikiak: hainbat erosketa egin ziren txiki bezala eta prozedura irekia jarraitu behar zen. Kontratazio profilean argitaratu behar dira.

– Transferentziak eta dirulaguntzak.

– Dirulaguntza zuzenak hitzarmenik gabe.

– Dirulaguntzaren araudian banaketarako irizpideak ez dira sartzen.

– Beste alderdi batzuk.

– Web gunean jasotzen diren datuak baina gehiago argitara eman beharko litzateke.

– Hiruhileko txostenean ikusten da ordainketen % 19,4 gainditu egin zuela.

– Finantzaren analisia: aurrekontuaren egonkortasuna betetzen da. Azpimarratu behar da udala 2019an udaletxe berria eraikitzeko proiektua dela eta kreditu operazioa onartu zen.

Iritzia hau jaso ondoren emandako epean honako alegazioak aurkeztu nahi dituela:

Nahiz eta egia izan udalaren langileriak igoera izan zuela azken 16 urtetan lanpostuen antolaketa eta balorazioa egiteko zeukan. Lanketa honek urtebete baino gehiago iraun ondoren 2019ako uztailean udalbatzak onartu zuen bai antolaketa berria, lanpostuen ezaugarri berriak eta bai beraien balorazioa.

Antolaketa berri honen arabera Zaldibiako udalak denboraldi baterako kontratuak eta urte askotan lanean ari ziren hauen egoera zuzentzeko bidean jarri gara, beharren araberako azterketa sakona egin delako.

Jarraitzeko, kontuan izanik Barne kontroleko sistemei eta kudeaketa prozedurei buruzko azterketan hainbat akats eta hobetu beharrak somatu direla, esan behar dugu akatsak zuzentzeko bidean jarri garela, hauek hain zuzen:

– Aurrekontua, Kontabilitatea eta diru sarrerei dagokionez somatutako kasuan 2. kapituluaren aurrekontu egitura hobeto egin da eta GFAren agentzia exekutibora bidaltzeko atzerapenak eguneratu dira eta hemendik aurrera Gastuaren esleipena fasea kontabilizatuko da. Bukatzeko, esan behar dugu Zaldibiako Udala ahalegin guztiak egiten ari dela Zerga zordun nagusiak, Bilore, OHZaren likidazioa ordaindu ditzan, baina ez dago Zaldibiako udaleko eskuan bakarrik ze OHZaren kudeaketa Foru Aldundiaren esku dago. Dena den dokumentazio osoa Bilore likidatu dutenen esku artean daude.

– Kontratazioa: Zaldibiako udalak 2019an kontratazio espediente bakarra ireki zuen, Udaletxe berria eraikitzearena eta kasu horretan udalak exekuzio proiektua bere horretan esleitu zuen, eraikuntza bakarra delako eta lotetan zatitzeko lote bakoitzak ez zuelako nahiko funtsik bakarka esleitzeko. Era berean, 2020tik aurrera kontratu txikien erlazioa argitaratzen da kontratazio profilean.

– Dirulaguntzei dagokionez somatutako akatsak zuzentzen ari gara, hain zuzen behar diren hitzarmenak sinatuko dira eta oinarriak osatuko dira 2021 urterako.

Azterketa dokumentala