Euskal Herriko Agintaritzaren Aldizkaria

104. zk., 2021eko maiatzaren 28a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HERRI-KONTUEN EUSKAL EPAITEGIA

3075

ERABAKIA, Herri-Kontuen Euskal Epaitegiaren Osokoak 2021eko apirilaren 29ko bilkuran hartua Getxoko Udalaren 2019ko ekitaldiko Kontu Orokorraren fiskalizazio txostena, behin betiko onesten duena.

Herri-Kontuen Euskal Epaitegiaren Osokoak 2021eko apirilaren 29an egindako bilkuran

ERABAKI DU:

Getxoko Udalaren 2019ko ekitaldiko Kontu Orokorraren fiskalizazio txostena behin betiko onestea, Erabaki honen eranskin modura ageri dena.

HKEEren 1/1988 Legearen 13.2 atalak aurreikusten duena betez, txostenaren ondorioak dagozkion aldizkari ofizialetan argitaratzeko xedatzea.

Vitoria-Gasteiz, 2021eko apirilaren 29a.

El Presidente del TVCP,

JOSÉ LUIS BILBAO EGUREN.

HKEEren idazkari nagusia,

JULIO ARTETXE BARKIN.

ERANSKINA

GETXOKO UDALAREN 2019KO EKITALDIKO KONTU OROKORRAREN FISKALIZAZIO TXOSTENA

Laburdurak:

10/2003 FA: 21/2003 Foru Araua, abenduaren 2koa, Bizkaiko Lurralde Historikoko Toki-erakundeen aurrekontuei buruzkoa.

15/2010 Legea: 15/2010 Legea, uztailaren 5ekoa, abenduaren 29ko 30/2004 Legea aldarazten duena, merkataritzako eragiketetan berankortasunaren aurkako neurriak ezartzen dituena.

AG: Auzitegi Gorena.

BEZ: Balio Erantsiaren gaineko Zerga.

BFA: Bizkaiko Foru Aldundia.

BPG: Barne Produktu Gordina.

DLO: 38/2003 Lege Orokorra, azaroaren 17koa, Dirulaguntzei buruzkoa.

EAE: Euskal Autonomia Erkidegoa.

EBAO: Europar Batasuneko Aldizkari Ofiziala.

EHJAN: Euskal Autonomia Erkidegoko Auzitegi Gorena.

EHU: Euskal Herriko Unibertsitatea.

EIN: Estatistikako Institutu Nazionala.

EIOZ: Eraikuntzen, Instalazioen eta Obren gaineko Zerga.

EPE: Enplegu Publikoaren Eskaintza.

FAGDG: Finantzaketa atxikia duten gastuetarako diruzaintza-geldikina.

GODG: Gastu orokorretarako diruzaintza-geldikina.

HILBIZ: Hiri izaerako Lursailen Balio Igoeraren gaineko Zerga.

HKEE: Herri-Kontuen Euskal Epaitegia.

JEZ: Jarduera Ekonomikoen gaineko Zerga.

JU: Jardun Unitatea.

LOP: Lurraren Ondare Publikoa.

LZ: Lanpostuen zerrenda.

MLBN: Merkatuen eta Lehiaren Batzorde Nazionala.

OHZ: Ondasun Higiezinen gaineko Zerga.

PI: Prozedura irekia.

PIH: Prozedura Ireki Harmonizatua.

SPKL: 9/2017 Legea, azaroaren 8koa, Sektore Publikoko Kontratuei buruzkoa.

I.– Sarrera.

Herri-Kontuen Euskal Epaitegiak otsailaren 5eko 1/1988 Legeak eta Epaitegiaren Osokoak onetsitako Lan Programak agindutakoari jarraikiz, Getxoko Udalaren 2019ko Kontu Orokorraren fiskalizazio-lana mamitu du.

HKEEk gauzatutako aurreko fiskalizazio lana 2011ko ekitaldiaren gainekoa izan zen.

2019ko ekitaldiko aurrekontuak Alkatetzaren Dekretu bidez luzatu zituzten 2019ko urtarrilaren 23an. Udalbatzak onartutako azken Aurrekontu Orokorrak 2016koak izan ziren.

Fiskalizazio-lan honek honako alderdi hauek besarkatzen ditu:

– Legezkotasuna: aurrekontuaren honako atal hauetan ezargarria den arautegia bete izana: aurrekontua, zuzenbide publikoko sarrerak, zorpetzea eta finantza-eragiketak, langileria, obren kontratazioa, zerbitzuak eta hornidurak eta dirulaguntzen emakida. Azterketa lan hau fiskalizazioaren ekitaldiari dagokio, beharrezko irizten diren beste ekitaldi batzuei buruzko egiaztatzeak egitea kaltetu gabe, fiskalizazio-gai den ekitaldian eragina dutelako.

– Kontabilitatea: Kontu Orokorra ezargarri zaizkion kontularitzako printzipioekin bat datorrela egiaztatzea. Kontu Orokorrak Udalaren, bere erakunde autonomoen eta sozietate publikoaren –zeinetan udala kapital sozialaren % 50etik gorako ehunekoaren jabe baita- balantzea, ekonomia eta ondarearen emaitza-kontua eta memoria besarkatzen ditu, baita Udalaren eta bere erakunde autonomoen aurrekontuen likidazioa ere.

Sozietate publikoaren kontuei dagokienez, gure lana kanpoko enpresek gauzatutako auditoretzako txostenak aztertzea izan da eta horretarako, beharrezko iritzitako proba osagarriak edo auditoretzako beste zenbait prozedura gauzatu ditugu.

– Lanaren zabalak ez du gastuaren efikazia eta efizientziari buruzko azterlan berariazkorik besarkatu; ezta, kudeaketa prozedurei buruzkorik ere. Alabaina, fiskalizazioan sortu diren alderdi partzialak Txosten honen III. Idazpuruan aztertu ditugu.

– Udalaren egoera ekonomikoaren finantza analisia.

Getxoko udalerriak 2019ko urtarrilaren 1ean 77.946 biztanle zituen Estatistikako Institutu Nazionalaren arabera. Udalak bere egituran honako erakunde hauek barne hartzen ditu:

– Getxoko Kultur Etxea Erakunde Autonomoa: kultur jardueren sustapena eta udal Euskaltegiaren kudeaketa.

– Andrés Isasi Musika Eskola Erakunde Autonomoa: musika-jardueraren ezagutza eta irakaskuntza.

– Getxo Kirolak Erakunde Autonomoa: kirola egitea eta lehiaketa sustatu eta indartzea.

– Jesusen Bihotzaren Udal Egoitza Erakunde Autonomoa: adinekoen egoitza-arreta.

– Puerto Deportivo El Abra-Getxo S.A. (% 66,75): kirol-portuen plangintza, sustapena, garapena eta ustiapena.

Gainera, Bilbao Bizkaia Uren Partzuergoko eta Bizkaiko Garraio Partzuergoko kide da.

2019ko ekitaldian Juan Bautista Zabala Fundazio Publikoa azkendu eta likidatu da.

II.– Iritzia.

II.1..– Legeak Betetzeari Buruzko Iritzia.

Aurrekontua.

1.– 2019ko ekitaldiko Aurrekontuen Proiektua ez zitzaion Udalbatzari aurkeztu onartu, zuzendu edo itzultzeko eta horrek 10/2003 FAren artikulua urratzen du.

Kontratazioa.

2.– «La Terraza» udal-eraikina ustiatzeko zerbitzuen emakida-kontratua Udalbatzak 2018ko irailean esleitu zuen 10 urtetarako eta 5 urteko luzapenarekin, 2 milioi euroren zenbatekoan; kontratu hori, baina, ez da EBAOn argitaratu, kontratuaren balio zenbatetsia kalkulatu baita esleipendunak ordaindu beharreko kanonaren arabera, bideragarritasun-azterketan kalkulatutako negozio-zifraren zenbateko garbiaren ordez (24 milioi euro) (SPKLren 20. eta 101. artikulua).

3.– Getxo Antzokiaren ekipamendu eszenikoko kontratua aldatu egin da 2018ko azaroan, organo eskudunak nahitaezkoa den onespena eman gabe, pleguetan aurreikusi ez diren eta kontratu-aldaketen klausuletan jaso ez diren elementuak barne hartuta, guztira 219.296 euroren zenbatekoan; horrek kontratuaren xedea aldatzen du eta administrazio-kontratazioa arautzen duten printzipioak urratzen.

4.– Udalak eta Getxo Kirolak-ek 194.129 euroren gastua egin dute 2019ko ekitaldian, kontratuak amaituta zituzten 3 zerbitzuri dagokiena.

5.– Udalak, aplikazio informatikoak mantentzeko zerbitzuaren kontratua 2018ko azaroan mugaeguneratu ondoren, 2019ko ekitaldian 77.167 euroren gastua egin zuen kontratuaren helburua 5 kontratu txikitan zatituz, eta prozedura ireki berria izapidetzen hasi zen 2019ko urrian.

6.– Getxoko Kultura Gelak, Muxikebarri arte, kultura eta kongresuen zentroa ireki ondoren, 2019ko ekitaldian zehar, hainbat jarduera gauzatzeko argiztapen- eta soinu-ekipoak alokairu-erregimenean muntatu, desmuntatu eta hornitzea 4 kontratu txikiren bidez esleitu zuen, 65.490 euroren gastua eginez eta ez ziren bete kontratazio administratiboa arautzen duten publizitate- eta lehia-printzipioak.

Epaitegi honen iritzira, Getxoko Udalaren Kontu Orokorra osatzen duten erakundeek, 1etik 6ra bitarteko paragrafoetan aipatutako ez-betetzeak alde batera, zuzentasunez bete dute 2019ko ekitaldian ekonomia eta finantzaren jarduera arautzen duen lege arautegia.

II.2.– Urteko Kontuei Buruzko Iritzia.

1.– Udalaren Egoera Balantzeko Ibilgetu ez finantzarioaren zenbatekoek 2019ko abenduaren 31n ez dute data horretan inbentarioan jasotako ondasun eta eskubideen egiazko egoera islatzen.

Epaitegi honen iritzira, aurreko paragrafoan adierazitako salbuespena alde batera, Getxoko Udalaren Kontu Orokorra osatzen duten erakundeen kontuek alderdi esanguratsu guztietan erakusten dute 2019ko ekitaldiaren jarduera ekonomikoa eta 2019ko abenduaren 31ko ondarearen eta finantza egoeraren isla zuzena; baita, data horretan amaitutako urteko ekitaldiari dagozkion bere eragiketen eta eskudiruzko fluxuen emaitzena ere, ezargarria den finantza informazioaren arau-esparruaren arabera eta, zehazki, araudian jasotako kontularitzako printzipio eta irizpideen arabera.

III.– Barne Kontroleko Sistemei eta Kudeaketa-Prozedurei Buruzko Irizpenak.

Atal honetan jasotzen dira jarduera ekonomikoa eta finantzarioa arautzen duten printzipioak betetzea nabarmen eragiten ez duten akatsak eta kudeaketa hobetzeko agerian jartzen diren prozedura-alderdiak.

III.1.– Aurrekontua eta Kontabilitatea.

– Udalaren 2019ko ekitaldiko aurrekontu-emaitza doitua, 18,1 milioi eurorena, 4,8 milioi euro gutxitu behar da, izan ere, aipatutako magnitudera oker doitu dira FAGDGrekin finantzatutako obligazioak.

– 2017az geroztik atzerapenak izan dira erroldaren araberakoak ez diren zerga-sarreren likidazioetan. Zehazki, 2020ko irailean likidatzeko daude HILBIZaren 2017-2019 aldiko egitate zergagarrien % 55,8 eta EIOZaren 486 espediente guztira.

– 2019ko abenduaren 31n zerga-zorren kontzeptuan aurrekontuan kobratzeko dagoen zenbatekoa handiagoa da hirugarrenen xehapenetik eskuratzen dena baino eta azpimarratzekoak dira fiskalizatutakoaz lehenagoko ekitaldietatik datozen Ondasun Higiezinen gaineko Zergan eta Jarduera Ekonomikoen gaineko Zergan dauden aldeak. Gomendagarria litzateke alde horien jatorria identifikatu eta aldian behin horiek bateratzea.

III.2.– Langileria.

Getxoko Kultur Etxean eta Jesusen Bihotzaren Udal Egoitza erakunde autonomoetan behin-behinekotasun tasa, hurrenez hurren, % 47 eta % 67 da (27 eta 41 plaza); txosten hau idatzi dugun datan, baina, onartu gabe daude bakoitzaren Enplegu Publikoko Eskaintzak.

III.3.– Kontratazioa.

Udalaren eta erakunde autonomoen kontratazio administratiboa aztertu dugu eta honako alderdi hauek bereizi ditugu:

– Udalak esleitutako kontratuen pleguetan, prezio irizpidea kalkulatzeko baliatzen den formulak (izaera orokorrarekin 2013ko Alkatetzak onartutakoak) puntuak ematen dizkie lizitazio-prezioa berdintzen duten eskaintzei eta horrek murriztu egiten du irizpide ekonomikoaren garrantzia.

– Udalak administrazioko kontratu berezi modura kalifikatu zuen bide-garbiketa eta hondakin-bilketako kontratua, 2014an 80,8 milioi euroan esleitu zena 8 urtetarako, beste 4 urtez luzatzeko aukerarekin. Arrisku-osagairik ez dagoenez, zerbitzu-kontratutzat hartu behar da, eta lizitazioaren unean gehienez ere 6 urteko indarraldia izango du (9. espedientea).

– Udalak 2 milioi euroan esleitutako «La Terraza» udal-eraikinaren ustiapen-zerbitzuen emakida-kontratuan, pleguek langileak subrogatzeko betebeharra ezartzen dute, eta ez dago jasoa aplikagarri den hitzarmenean. Betekizun hau enpresa eta langile arteko sektoreko hitzarmenetatik soilik erator daiteke (18. espedientea).

– Udalak eta Getxo Kirolak-ek 13,7 milioi euroren zenbatekoan esleitutako 7 kontratutan honako akats hauek azaleratu dira pleguetan barne hartutako esleipen-irizpideetan:

– Getxo Antzokiaren mantentze integraleko zerbitzuaren kontratuan, Udalak 1,1 milioi euroan esleitutakoan, esleipen-irizpide modura eraginkortasun energetikoaren ISO ziurtagiria edukitzea jasotzen da. Ziurtagiri hauek izatea, enpresaren ezaugarri den aldetik eta kontratuaren xedeari zuzenean lotzen ez zaion aldetik, kaudimen-irizpidea dela uste dugu eta ez daiteke esleipen irizpide modura balia (14. espedientea).

– Udalak eta Getxo Kirolak-ek 11,5 milioi euroan esleitutako 5 kontratutan, inbertsio gehigarriak egiteagatik hobekuntza-irizpideari esleitutako puntuak neurriz kanpokoak dira eskaintza ekonomikoaren irizpideari esleitutakoekin alderatuta (4, 5, 10, 16 eta 23 espedienteak).

– Udalak 4,5 milioi euroan esleitutako etxez etxeko laguntza-zerbitzuaren kontratuaren pleguetan, proposamen ekonomikoarekin batera justifikazio-azterketa ekonomiko bat aurkezteko betebeharra jasotzen da, zerbitzu teknikoek proposamen teknikoaren eta ekonomikoaren arteko koherentzia baloratu ahal izan dezaten; halaber, proposamena baztertzeko arrazoia izan daiteke. Neurriz kanpoko merketzeak dituzten eskaintzen balioespena berariaz jaso behar da pleguetan, parametro objektiboen arabera, eta nahitaez lizitatzaileari entzungo zaio, bere eskaintzaren baldintzak justifika ditzan (11. espedientea).

– Udalak 7 milioi euroren zenbatekoan esleitutako 2 kontratutan, pleguek eskaintzei 3 hilabetez eutsiko zaiela agintzen duten arren, esleipena egin da epe hori 5 eta 3 hilabetetan gaindituta (7 eta 12 espedienteak).

– Kultur Etxeak eta Jesusen Bihotza Udal Egoitzak 725.645 euroan esleitutako 3 kontratutan ez dira sartu esleipen-ebazpenetan enpresa esleipendunek kontratuaren xede den jarduera egiten duten langileei aplikagarritzat jo dizkieten hitzarmen kolektiboak (19, 20 eta 25 espedienteak).

– Udalak 1,7 milioi euroan esleitutako kontratu baten obrak 14 asteko atzerapenarekin jaso dira aurreikusitako epearen aldean, kontratazio-organoak epea luzatzea onartu gabe (1. espedientea).

III.4.– Dirulaguntzak.

– Enplegua sortzeko Udalak emandako 252.573 euroren dirulaguntzak eskabideak iritsi ahalako hurrenkeran oinarritutako prozedura baten bidez izapidetu dira, eta 15 eguneko epean agortu dira. Gomendagarria litzateke beste emakida-sistema bat aplikatzea, diruz lagundutako jarduerarekin lotutako irizpideak barne hartuko dituena eta dagokion dokumentazioa azkar aurkeztea soilik sarituko ez duena.

– Udalak lankidetza humanitarioko proiektuetarako eta dinamizazio ekonomikorako emandako 549.113 euroren dirulaguntzak ebazteko epea 2 eta 5 hilabete artean luzeagoa izan da oinarri arautzaileetan ezarritakoa baino.

– Getxoko Kultur Etxeak kultur elkarteei beren ohiko jarduerarako emandako dirulaguntzetan (130.000 euro), hasierako banaketaren ondoren banatzeke dagoen % 22,5 oinarri arautzaileetan ezarritakoaz bestelako formula batekin banatu da.

– Getxo Kirolak-ek kirol federatua finantzatzeko emandako 596.999 euroren dirulaguntzetan, onuradunei ez zaie eskatzen diruz lagundutako jardueran sortutako gastuen % 100 justifikatzeko, deialdiaren oinarrietan agintzen den bezala.

– Getxo Kirolak-ek 140.000 euroan ekipamendu eta ontzi nautikoak erosteko emandako dirulaguntzetan, ez da eskatu gutxienez 3 hornitzaileren eskaintzak aurkezteko, baldin eta diruz lagun daitekeen gastuak DLOren 31.3 artikuluan ezarritako zenbatekoak gainditzen baditu.

III.5.– Beste Alderdi Batzuk.

– 2019ko ekitaldian merkataritza-eragiketak ordaintzeko legezko epeak betetzeari buruzko 15/2010 Legean aurreikusitako Diruzaintzako hiru hilean behingo txostenetan, agerian jarri da Getxoko Udalak 13,4 milioi euroren fakturak ordaindu dituela, eta faktura horiek onartzeko 30 egunetik gorako epea igaro dela; halaber, 2,1 milioi euroren ordainketak egin direla, onartu zirenetik 30 egunetik gorako epea igaro ondoren.

IV.– Finantzaren Analisia.

Udalak azken ekitaldietan likidatutako magnitude nagusien bilakaera honako taula honetan dago zehaztua.

(Ikus .PDF)

Sarrera arruntak: 2019ko ekitaldian kitatutako sarrera arruntak % 0,6 hazi dira 2018ko ekitaldiaren aldean eta % 10,8, berriz, 2017koaren aldean.

– Zergak, tasak eta bestelako sarrerak 2017ko ekitaldiaren aldean izan duen igoera, nagusiki, informatikako eta zerga-kudeaketako lanabes berri bat ezarri izanari zor zaio; programa hori abian jartzeak atzerapenak eragin ditu HILBIZ eta EIOZen likidazioak sortu eta erregistratzean. 2019ko ekitaldian, tipo zergagarriek, tasak eta prezio publikoek ez dute inongo aldaketarik izan aurreko ekitaldiaren aldean.

– Transferentziak eta dirulaguntza arruntak: Udalkutxako diru-sarrerak dira aurrekontuko kapitulu honetan esanguratsuenak. Ez da aldaketarik izan 2018ko ekitaldiarekiko. 2019ko ekitaldian kontabilizatutako diru-sarrerak Bizkaiko Foru Aldunditik jasotako konturako ekarpenei dagozkie soilik; izan ere, Udalaren aldeko behin betiko likidazioaren ordainketa, 1,5 milioi eurorena, 2021eko ekitaldira atzeratu da.

Funtzionamendu-gastuak: 2019ko ekitaldian obligazio aitortuak % 5 igo dira 2018ko ekitaldiaren aldean eta % 7,4, 2017koaren aldean. Hona hemen bariazio adierazgarrienak:

– Langile-gastuak: Aurrekontuko kapitulu honek % 2,9 egin du gora 2019ko ekitaldian, batik bat ekitaldi horretarako onartutako soldata-igoeren ondorioz.

– Ondasun arrunten eta zerbitzuen kontratazioa: % 6,2ko igoera izan da 2018ko ekitaldiarekiko. Besteak beste, aipatzekoak dira 2019ko martxoan inauguratu zen Muxikebarri arte, kultura eta biltzar zentroaren mantentze-lanen eta garbitze-lanen gastuak, 760.000 euro inguru, eta 360.000 euro araututako aparkatzeko kontratuan.

– Transferentziak eta dirulaguntza arruntak: % 5,9 igo dira udal erakunde autonomoei egindako transferentzien ondorioz, nagusiki Getxo Kirolaki.

Aurrezki gordina eta garbia: 2019ko ekitaldian diru-sarrera arrunten igoera funtzionamendu gastuena baino txikiagoa izan da eta horrek aurrezki gordina eta garbia aurreko ekitaldiaren aldean 3 milioi euro inguru murriztea ekarri du. 2019ko aurrezki garbia sarrera arrunten % 12 da.

Kapital-eragiketen emaitza: 2019ko ekitaldiko kapital-eragiketen emaitzaren saldoa negatiboa da 16,2 milioi eurotan, eta beste administrazio publiko batzuen dirulaguntzekiko mendekotasun-indizea % 5,9 da. Gauzatutako kapital-inbertsioak Udalbatzak 2018ko eta 2019ko ekitaldietan onartutako kreditu gehigarriak onartzetik datoz; kreditu horiek, funtsean, aurreko ekitaldiko diruzaintzako geldikinarekin finantzatu ziren.

Zorpetzea: Udalak, 2019ko eta 2018ko ekitaldietan, hurrenez hurren, 1,8 eta 1,4 milioi euroren amortizazio aurreratuak egin ditu, eta 2 mailegu ezeztatu ditu finantza-erakundeekin, 2019tik aurrerako ekitaldietarako mugaeguneratzea aurreikusita zeudenak. Horri esker, zorpetze-maila % 56 murriztu da 2017ko ekitaldiarekin alderatuta.

Diruzaintza-geldikina: 2019ko ekitaldia 35,6 milioi euroren diruzaintza-geldikinarekin likidatu da eta hortik % 44 erabili da 2020ko ekitaldian kredituak txertatzeko. Ekitaldi bakoitzaren amaieran zorpetzea murriztuta, diruzaintza-geldikinak konstante eutsi dio aztertutako aldian.

Ondorioa: Udalak zorra murriztu du, 2017ko ekitaldian likidatutako diru-sarrera arrunten % 18,1etik 2019ko ekitaldian% 7,2 izatera aldatuz. GODGri dagokionez, 2020ko ekitaldiko kreditu-gehikuntzak finantzatu ondoren, 15,3 milioi euroren saldo erabilgarria du.

COVID-19ak 2020an eragindako osasun-larrialdiko egoerak eragin negatiboa izan du haren finantzaketa-iturri nagusian, Udalkutxan (diru-sarrera arrunten % 52,7 egin du 2019ko ekitaldian); izan ere, 2020ko ekitaldiko konturako entregak % 6,8 txikiagoak dira 2019koak baino (3,4 milioi euro). Gastuei dagokienez, nabarmentzekoa da «transferentzia arruntak» atalak izan duen 3,6 milioi euroren igoera hirugarren hiruhilekoaren amaieran, familientzako nahiz udalerriko jarduera ekonomikoetarako eman diren aparteko laguntzengatik, bai eta Getxo Kirolak-i egindako transferentziak ere, COVID delakoaren ondorioak arintzeko.

Aurrekontuaren egonkortasuna: Udalaren Kontu-hartzailetzak txostena jaulki zuen Udalak, erakunde autonomoek eta sozietate publikoak 2019ko ekitaldiko aurrekontuaren likidazio bateratuan aurrekontuaren egonkortasun, gastuaren arau, eta zorraren muga bete dutela egiaztatuz, eta bertan esaten da:

Aurrekontuaren egonkortasunari buruzko helburua bete da, behin GODG bidez finantzatutako gastuak doitu ondoren eragiketa ez finantzarioen superabita eskuratu baita.

Gastuaren araua bete da, izan ere 2018ko ekitaldiaren aldean zenbakarria den gastuaren bariazioak ez zuen Espainiako ekonomiaren epe ertaineko BPGaren erreferentziazko hazkuntza tasa gainditu (% 2,7).

Zorraren printzipioa bete da, 2019ko abenduaren 31n zor bizia % 6,4koa izan baita sarrera ez finantzarioen gainean, % 60ko mugaz beheiti.

V.– Urteko Kontuak.

V.1.– Udala.

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

(Ikus .PDF)

V.2.– Erakunde Autonomoak.

(Ikus .PDF)

(Ikus .PDF)

(Ikus .PDF)

(Ikus .PDF)

V.3.– Puerto Deportivo El Abra-Getxo S.A. Sozietatea.

(Ikus .PDF)

(Ikus .PDF)

ALEGAZIOAK

1.– II.1.1.

Justifikazioa:

2019ko ekitaldia udal-aurrekontu orokorra luzatuta kudeatu zen. 2019ko maiatzean udal-hauteskundeak egin ziren, eta urte bereko azaroaren 29an onartu zen 2020rako udal-aurrekontu orokorra.

2.– II.1.2.

Justifikazioa:

Gaur egun, HKEEk adierazitako irizpidea aplikatzen da udal-lizitazioetan.

3.– II.1.3; II.1.4; II.1.5; II.1.6.

Justifikazioa:

Aipatutako lau ez-betetze horietan, antolakuntzako eta/edo prozedura-aldaketako neurriak hartu ziren, arriskua are gehiago murrizteko edo geroko beste espediente batzuetan halakoak gertatzeko aukera ezinezko egiteko.

4.– III.1.

Justifikazioa:

Aipatutako likidazioetan izandako atzerapenei dagokienez, adierazi behar da, 2015-2019 legegintzaldian aipatutako zergen kudeaketa- eta bilketa-prozesuko eraginkortasunik ezak eta gabeziak identifikatu ondoren, berrantolaketa-neurriak, prozedura-aldaketak, modernizazio teknologikoa eta langileen errefortzuak baimendu eta ezarri zirela. Eguneratze-prozesua amaitu gabe dago gaur egun, baina nabarmen egiten du aurrera, 2020ko aurrekontuaren likidazioan egiazta daitekeenez.

5.– III.3.

Alegazioak:

1.– 18. espedientea, La Terraza eraikinaren ustiapena. Lizitazioaren unean indarrean zegoen Bizkaiko ostalaritzako hitzarmen kolektiboak, III. eranskineko 3. puntuan, berme bat ezartzen du enpresaburua aldatzeagatik. Berme horren bidez, berariaz onartzen da lan-subrogazioaren printzipio orokorra emakiden titulartasun-aldaketetan.

Justifikazioak:

Txostenean kontratazioari buruz jasotako gainerako gogoetak iturri juridiko gisa txertatzen ditugu arlo horretan aldizka egiten ditugun legezkotasun-berrikuspenetan.

6.– III.4.

Justifikazioak:

2020-2023 aldiko udal dirulaguntzen plan estrategikoa 2020-09-29ko osoko bilkuran onartu zen, eta urtero berrikusiko da. Txostenean egindako gogoetak aldizkako berrikuspen honetara eramango ditugu.

7.– III.5.

Justifikazioa:

2019an epez kanpo ordaindutako fakturak, guztira, 17 izan dira, 5.116 fakturetatik, hau da, % 0,33. Kopuru osoaren% 99,67 30 egun baino gutxiagoko epean ordaindu zen. Ordaintzeko batez besteko epea, gehien gehinetan, 10 egunetik beherakoa da.

Azterketa dokumentala