Euskal Herriko Agintaritzaren Aldizkaria

38. zk., 2021eko otsailaren 22a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

DONOSTIA / SAN SEBASTIÁNGO LEHEN AUZIALDIKO 6 ZENBAKIKO EPAITEGIA

1001

EDIKTUA, ezkontzaz kanpoko seme-alabentzako neurriei buruzko adostasun gabeko 1648/2019 prozeduraren ondoriozkoa.

Donostiako Lehen Auzialdiko 6 zenbakiko Epaitegia – Zuzeneko Laguntza emateko Unitate Prozesal Zibila.

Judizioa: ezkontzaz kanpoko seme-alabentzako neurriei buruzko adostasun gabeko 1648/2019 prozedura.

Gaia: ezkontzaz kanpoko seme-alabentzako neurriak.

Demandatzailearen prokuradorea: Itziar Mujika Atorrasagasti.

Judizio horretan epaia eman da 2020-12-11n. Horren bidez amaiera eman zaio prozesuari.

EPAITZA

Mujika Atorrasagasti andreak Karla Patricia Molina andrearen izenean eta hura ordezkatuz Ismael Núñez jaunaren aurka jarri duen demandaren funtsa baiestea, eta, hortaz, harremana haustearen ondoriozko neurri hauek hartzea, XXXXXXXXXXXXXX seme adingabekoari dagokionez:

1.– Seme adingabearen zaintza eta jagoletza amari, hots, Karla Patricia Molina andreari egoztea, guraso-ahalaren titulartasuna partekatua izanik, nahiz eta guraso-ahal horren betearazpena soilik amari egozten zaion.

2.– Bisita, egonaldi eta komunikazioen erregimena. Ez da bisita-araubiderik ezartzen aitaren eta seme adingabearen artean. Aitak adierazten badu harremana izan nahi duela semearekin, bisitak guraso biek adostu beharko dituzte eta, ados ez badaude, legez ezarrita dagoen prozeduraren bidez aldatu beharko da neurri hau.

Edonola ere, horrek ez die eragingo aitak bere semearekin telefonoz edo ordenagailuz izan ditzakeen komunikazioei, hala badagokio.

3.– Mantenu-pentsioa. Aitak pentsio bat ordaindu behar du seme adingabearen mantenurako kontribuzio moduan, hilean 150 eurotan, harik eta semea adinez nagusia izan arte, ekonomikoki independentea izan arte edo independentzia hori lortzeko moduan egon arte, fede onaren eskakizunekin bat eginez. Pentsio hori aurretiaz ordainduko du, amak hautatzen duen kontuan, urteko hamabi hilabeteetako bakoitzaren lehen bost egunen barruan. Pentsioa urtero eguneratuko da, horretarako errekerimendua egin beharrik izan gabe, Estatistikako Institutu Nazionalak edo horren ordezko erakundeak aurreko urtean zehar ezarritako Kontsumoko Prezioen Indizeak abendutik abendura bitartean izandako aldaketen arabera; 2022. urtean eta urtarrilaren 1etik aurrera izango ditu ondorioak eguneraketak.

Aitak zuzenean ordaindu behar dituen era horretako gastuak ez dira kenduko ebazpen honen arabera ordaindu behar duen pentsiotik.

4.– Aparteko gastuak. Ekonomikoki burujabea ez den semeak bere bizimoduan izaten dituen ezohiko gastuak erdibana ordaindu beharko dituzte gurasoek. Ebazpen honen oinarri juridikoetan ezarritakoarekin bat etorriz, kontzeptu horretatik kanpo utziko dira, esaterako, eskola-uniformearen edo -liburuen gastuak (urtero errepikatzen badira); baina beste batzuk berriz sartuko dira, eta katalogo posiblea osorik adierazteko asmorik gabe, honako hauek dira horietakoak: gastu medikoak, kirurgikoak, ospitalekoak, ortopedikoak, dentistarenak, psikologikoak, farmazeutikoak, ortodontziakoak, logopediakoak, eta, oro har, osasun-sistema publikoan edo dagokion medikuntza-erakundetan sartzen ez diren gaixotasun fisiko edo mentalei lotutakoak, bai eta –prestakuntza-arloan– eskolan atzeratuta egonez gero derrigorrezko ikasgaiei buruzko klase partikularretakoak ere. Egin beharreko gastua medikoa bada eta Gizarte Segurantzak edo dagokion erakunde medikoak ordaintzen ez badu eta beharrezkoa bada, erdibana ordainduko dute aitak eta amak; horretaz gain, fakultatiboa eta tratamendua bi gurasoek elkarrekin adostutakoak izango dira.

Aurreko paragrafoan zerrendatutako aparteko gastuak egiteko erabaki ahal izango du demandatzaileak, alde bakarrez, kontuan hartuta guraso-ahala bakarrik betetzen duela. Edonola ere, hala badagokio, aita erabaki horren aurka agertu ahal izango da, borondatezko jurisdikzio-prozedura egokiaren bidez.

Aparteko gastuak ordaintzeko obligazioa amaitu egingo da semeak –adin nagusikoa edo legez emantzipatua izanik– ekonomikoki independentea izatea lortzen duenean, Kode Zibilaren 150. eta 152. artikuluetako azkentze-kausak baztertu gabe.

Ismael Nuñez demandatua gaur egun non bizi den ez dakigunez, ebazpena Euskal Herriko Agintaritzaren Aldizkarian argitaratutako ediktu baten bidez jakinaraztea erabaki da, Prozedura Zibilaren 1/2000 Legeak 497.2 artikuluan xedatzen duenarekin bat etorriz.

Ebazpen horren aurka apelazio-errekurtsoa jar daiteke, hogei egun balioduneko epean, ediktu hau argitaratzen denetik hasita, jakinarazitako ebazpenean bertan adierazten den eran.

Interesdunak eskuragarri dauka jakinarazten den ebazpenaren testu osoa, epaitegi honetako bulego judizialean, eta, han, osorik aztertu ahal izango du.

Donostia, 2020ko abenduaren 15a.

JUSTIZIA ADMINISTRAZIOAREN LETRADUA.

Azterketa dokumentala