Euskal Herriko Agintaritzaren Aldizkaria

233. zk., 2020ko azaroaren 23a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

5015

4/2020 FORU ARAUA, azaroaren 6koa, Gipuzkoako Lurralde Historikoko A-636 autobian Beasain-Bergara arteko zati batzuk erabiltzeagatik ordainduko den kanona arautzen duena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «4/2020 Foru Araua, azaroaren 6koa, Gipuzkoako Lurralde Historikoko A-636 autobian Beasain-Bergara arteko zati batzuk erabiltzeagatik ordainduko den kanona arautzen duena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2020ko azaroaren 6a.

Diputatu nagusia,

MARKEL OLANO ARRESE.

HITZAURREA

Kontuan hartuta, batetik, Euskal Herriaren Autonomia Estatutuaren 10.34 artikulua eta, bestetik, azaroaren 25eko 27/1983 Legeak, Autonomia Erkidego osorako erakundeen eta lurralde historikoetako foru organoen arteko harremanei buruzkoak, 7.a) artikuluaren 8. atalean xedatutakoa, Foru Aldundiaren eskumena da errepideak planifikatu, proiektua egin, eraiki, artatu, aldatu, finantzatu, erabileraz arduratu eta ustiatzea.

Gipuzkoako Errepide eta Bideen Foru Arauaren testu bateratuak (ekainaren 6ko 1/2006 Foru Dekretu Arau-emaileak onartutakoak) honako hau xedatzen du 38. artikuluan: «1. Herritar guztiek daukate Gipuzkoako errepide eta bideetan barrena ibiltzeko eskubidea, trafiko eta zirkulazioari buruzko lege, arau eta seinaleak errespetatuz. 2. Bidesaria edo erabilpen eskubideengatiko sari bat ezarri ahal izango da Gipuzkoako errepide eta bideetan barrena ibiltzeagatik.».

Urriaren 3ko 7/2002 Foru Arauaren bidez, bide azpiegiturak erabiltzeagatik Gipuzkoa osoan eska zitekeen kanona sortu zen, «Bidegi Gipuzkoako Azpiegituren Agentzia-Agencia Guipuzcoana de Infraestructuras SA» (aurrerantzean, Bidegi SA) foru sozietate publikoak bide azpiegituretan egingo dituen jarduketak finantzatzeko.

Bere estatutuetan xedatzen denez, foru sozietate publiko horren objektu soziala osatzen dute A-8 autobideak (Bilbao-Behobia), A-1 autobideak (Eibar-Gasteiz) eta beste autobide eta ahalmen handiko errepideek.

Gure lurraldea zeharkatzen duten Europaz gaindiko bi ardatz nagusiek (AP-8/AP-1 eta A-15/N-I) zerbitzua eman behar diete bai lurraldeko bertako mugikortasun beharrei bai bere kokapen geografikoak eskatutakoei, Gipuzkoa puntu estrategiko bat baita Iberiar penintsularen iparretik hegora Europako gainerakoarekin lotzeko.

Beasain eta Bergara artean A-636 autobiari amaiera ematen dion Antzuola-Bergara zatia irekita, zeinak hasiera batean eskualdeen arteko loturetarako trafikoari erantzuna ematen baitio, lehen aipatutako Europaz gaindiko bi ardatz horiek zeharkako ardatz batekin lotuta gelditzen dira hegoaldean.

Horri esker, Gipuzkoak autobideez eta ahalmen handiko errepideez (AP-8, AP-1, A-15, N-I eta A-636) osatutako Lehentasunezko Errepide Sare bat dauka, «Gipuzkoako biribilgunea» bezala ezagutzen den eraztuna eratuz.

Ahalmen handiko errepideak eraztun forman antolatzeak lurraldearen irisgarritasun maximoa ahalbidetzen du; eta, aldi berean, malgutasun gehigarria ematen du, ibilbide luzeko gainerako ardatzetan gerta daitezkeen ezusteko gorabeherei erantzuteko.

AP-8/AP-1 ibilbidean aspalditik ordaindu behar da bidesaria, baina Gipuzkoako Lurralde Historikoko ahalmen handiko A-15/N-I ibilbidean 2018ko urtarrilean ezarri zen kanona, zati batzuk erabiltzeagatik, soilik errepideko salgaien garraioan aritzen diren edo garraiorako diren ibilgailuentzat; betiere, 3,5 tona baino gehiagoko gehieneko pisu baimendua dutenentzat. Kanon hori ezarri zen Europako Parlamentuaren eta Kontseiluaren 1999ko ekainaren 17ko 1999/62/EB Zuzentarauak, azpiegitura batzuk erabiltzeagatik salgaien garraioko ibilgailu astunei kargak ezartzeari buruzkoak, xedatutakoaren arabera.

Koherentziagatik eta sarearen uniformetasunagatik, uste dugu, alde batetik, neurri eraginkorrena, bidezkoena eta koherenteena dela erabileragatik ordainketa sistema bat ezartzea zeharkako korridorean (A-636 autobia), motordun ibilgailu guztientzat, motozikletentzat izan ezik, sistema ireki baten arabera, N-1 eta A-15 errepideetako zenbait zatitan jada ezarrita dagoenaren antzeko teknologiarekin (free flow); izan ere, horrela errepidean jarriko diren arkuek identifikatu egingo dituzte ordainpeko tarteetatik zirkulatzen duten ibilgailuak, egin dituzten ibilbideei dagokien zenbatekoa egotziz. Neurri hori bat dator, batetik, Batzar Nagusien talde txostengileak, Gipuzkoan errepideak kudeatzeko sistema aztertzekoak, 2010eko martxoaren 4ko bileran onetsitako txostenarekin, eta bestetik, Europako 1999/62/EB Zuzentarauaren irizpideekin.

Horrek, aldi berean, azpiegiturak eraiki, mantendu, artatu eta ustiatzeak sortzen dituen kostuak ikusaraziko ditu, azpiegitura horien erabiltzaileei kargatuz; lurraldearen barne orekarako faktoreak sartuko ditu; eta gure errepideek behar dituzten artapen eta kudeaketa lanen kostuak berreskuratzen lagunduko du.

Kanonaren zenbatekoak azpiegitura kostuak berreskuratzeko printzipioa oinarri hartuta ezarri dira. Zehazki, kanonaren zenbatekoak zuzeneko lotura izango du azpiegituraren eraikuntza kostuekin eta ustiaketa kostuekin, kanona kudeatzeko kostuekin eta sarea garatu, hobetu eta mantentzeko kostuekin, egitura konpontzekoak barne. Horrela, erabileraren ondorioz jasandako narriadura arindu eta zerbitzu maila ezin hobea mantendu nahi da, bai eta Bidegi SAk egiten dituen bide azpiegiturako politiken jarduketak finantzatzen lagundu ere.

Bestalde, bidezkotzat jotzen da A-636 autobian, errepidea erabiltzeagatiko ordainketa araubidea ezartzearekin batera, Gipuzkoako Lurralde Historikoko AP-8 eta AP-1 autobideetan ibilgailu arinen erabiltzaile diren pertsona fisikoei aplikatzen zaizkien hileko deskontu gorakorrak eta hileko gastu mugak ere aplikatzea, baldin eta baldintza batzuk betetzen badituzte. Deskontu horiek araututa daude ekainaren 15eko 4/2010 Foru Dekretu-Arauan: 2. eta 3 bis artikuluetan, hain zuzen ere.

Kontuan hartuta Europako Parlamentuaren eta Kontseiluaren apirilaren 27ko 2016/679 (EB) Erregelamendua, datu pertsonalen tratamenduari dagokionez pertsona fisikoen babesari eta datu horien zirkulazio askeari buruzko arauak ezartzen dituena eta 95/46/EE Zuzentaraua indargabetzen duena (Datuak Babesteko Erregelamendu Orokorra), interes publikoko helburua, lortu nahi den xede legitimoaren araberakoa, betetze aldera egiten den datuen tratamenduari buruzko xedapen espezifikoak jasotzen ditu foru arau honek.

Arau honek free flow sistemak lortutako eta sortutako informazio pertsonalaren kudeaketari buruzko zehaztapenak errespetatzen ditu; horretarako, datu pertsonalen tratamenduaren eraginpean dauden agertokiak identifikatzen ditu; eta, artikuluetan zehar, arlo honetan eskatzen diren edukiak deskribatzen ditu, Datuak Babesteko Erregelamendu Orokorra betez.

Azkenik, kontuan hartuta ezen kobrantza-sistema ezartzeak izapidetze eta garapen konplexuak eskatzen dituela hura balidatu arte, bidezkotzat jotzen da Diputatuen Kontseiluari baimena ematea berak erabaki dezan zein egunetatik aurrera izango duten erabiltzaileek kanona ordaintzeko betebeharra.

Foru araua honela egituratzen da: 18 artikulu, bi titulutan banatuta, bi xedapen gehigarri eta amaierako bi xedapen.

Lehenengo tituluan kanonaren kobrantza arautzen da; bigarren tituluan, berriz, sistemak eskuratutako datuen tratamendua aurreikusten da.

Lehenengo xedapen gehigarria kobratzen noiz hasi erabakitzeko baimena ematen dio Diputatuen Kontseiluari; hala ere, hori ez da izango 2022ko ekainaren 30a baino beranduago.

Bigarren xedapen gehigarria adierazten du kanona ordaindu behar den A-636 autobiaren zatietako erabiltzaileei aplikatuko zaizkiela ekainaren 15eko 4/2010 Foru Dekretu-Arauak aurreikusitako deskontuak eta hileko gastu muga. Foru arau-dekretu horrek finkatzen ditu AP-1 eta AP-8 autobideak Gipuzkoako zatian 2010eko uztailaren 1etik aurrera erabiltzeko kanonaren zenbatekoak.

Azkenik, amaierako lehen xedapenak ahalmena ematen dio Diputatuen Kontseiluari foru arau hau garatzeko; eta bigarrenak, aldiz, foru araua indarrean noiz jarriko den xedatzen du.

Azaldutakoarekin bat etorriz, foru arau honen helburua da Gipuzkoako bide azpiegiturak behar bezala kudeatzen laguntzea, kudeaketa horrek berekin dakarren interes publikoko mekanismo gisa.

I. TITULUA

KANONAREN KOBRANTZA ARAUTZEA

1. artikulua.– Xedea.

Foru arau honen xedea honakoa da: Gipuzkoako Foru Aldundiaren Errepideen Katalogoan sartuta dagoen A-636 autobian (Beasaindik Durangora, Kanpanzarren barrena), Beasain eta Bergara artean, bide zati batzuk erabiltzeagatik ordaindu beharreko kanona arautzea.

2. artikulua.– Kanonaren ordainpeko zatiak.

A-636 autobian, Beasain eta Bergara artean, hauek dira hemen arautzen den kanonaren ordainpeko zatiak:

– Hasi Beasainen (0,000 KP) eta Ormaiztegiko lotuneraino (2,800 KP).

– Hasi Alegiko lotunean (Ormaiztegi) (5,000 KP) eta Zumarragako lotuneraino (10,400 KP).

– Hasi Urretxu/Legazpiko lotunean (12,500 KP) eta Bergarako Ekialdeko lotuneraino (19,800 KP).

3. artikulua.– Ordainpeko ibilgailuak.

Foru arau honetan araututako kanona aplikatuko zaie kanonaren ordainpeko bide zatietan dabiltzan ibilgailu motordunei edo ibilgailu talde artikulatuei, motozikletei izan ezik.

4. artikulua.– Salbuespenak.

Ez daude behartuta kanona ordaintzera:

a) Ertzaintzaren eta gainerako segurtasuneko indar eta erkidegoen ibilgailuak, eta A-636 autobian zerbitzuren bat egin behar duten agintari judizialen ibilgailuak.

b) Anbulantziak eta suhiltzaileen ibilgailuak, A-636 autobian zereginen bat egiten ari badira.

c) Gipuzkoako Foru Aldundiaren ibilgailuak eta Bidegi SAren ibilgailuak, baldin eta bi kasuotan A-636 autobia kontrolatu eta mantentzeaz arduratzen badira.

d) A-636 autobiaren azpiegitura artatu eta mantentzeko lanak adjudikatuta dituzten enpresen ibilgailuak, A-636 autobia artatu eta mantentzeaz arduratzen badira.

5. artikulua.– Sistemaren definizioa.

Ibilgailuak detektatzeko, identifikatzeko eta haiei kanona egozteko, free flow motako sistema ireki bat ezarriko da, ibilgailuak gelditu gabe.

6. artikulua.– Erabiltzaileen betebeharrak.

1.– Foru arau honen 3. artikuluan aipatzen diren ibilgailuekin A-636 autobian kanonaren ordainpeko zatietatik dabiltzan erabiltzaileak behartuta egongo dira 8. artikuluan ezarritako kanonari dagokion zenbatekoa ordaintzera, 4. artikuluaren arabera salbuetsita ez badaude behintzat.

2.– Kanona ordaintzeko, erabiltzaileek hura baldintza operatiboetan erabiltzea ahalbidetzen duten baliabide teknikoak eduki behar dituzte; edo, bestela, matrikula ordainbide batekin lotzea ahalbidetzen duen informazioa eman beharko dute, Bidegi SAk argitaratutako web informazioaren arabera.

7. artikulua.– Arkuak eta ibilbideen esleipena.

1.– Kobrantza gauzatu ahal izateko, 2. artikuluan deskribatzen diren ordainpeko bide zatietan ondoren zehazten diren arkuak jarriko dira. Arku bakoitzari bide zati eta ibilbide luzera jakin bat esleitzen zaio, honela:

a) Beasaingo arkua:

– Zatia: Beasain - Ormaiztegi.

– Luzera: 2,8 kilometro.

b) Ezkioko arkua:

– Zatia: Ormaiztegi - Zumarraga.

– Luzera: 5,4 kilometro.

c) Deskargako arkua:

– Zatia: Legazpi/Urretxu - Bergara.

– Luzera: 7,3 kilometro.

– Irteera/sarrera Antzuolako erdilotunean: 2,50 kilometro.

2.– «Legazpi/Urretxu - Antzuolako erdilotunea» ibilbidea aplikatu ahal izateko ezinbesteko baldintza izango da ibilgailuak TAG gailu bat erabiltzea bidaia ordaintzeko.

8. artikulua.– Kanonaren zenbatekoak.

Hauek dira aplikatuko diren kanonaren zenbatekoak (BEZa barne):

(Ikus .PDF)

9. artikulua.– Ibilgailuen sailkapena.

1.– Foru arau honek ezarritako kanonaren ondorioetarako, ibilgailuak edo ibilgailu talde artikulatuak honela sailkatzen dira:

– Arinak: 3,5 tonako edo gutxiagoko gehieneko masa baimendua (GMB) duten ibilgailu motordunak.

– Astunak 1: 3,5 tona baino gehiagoko eta 12 tona baino gutxiagoko gehieneko masa baimendua (GMB) duten ibilgailu motordunak.

– Astunak 2: 12 tonako edo gehiagoko gehieneko masa baimendua (GMB) duten ibilgailu motordunak.

2.– Sailkapen efektiborako, hau da, ibilgailu mota bakoitza hiru kategoria horietako batean sailkatzeko, ibilgailuaren bolumenaren eta gehieneko masa baimenduaren (GMB) arteko korrelazio bat ezarriko du sistemak, irizpide bolumetrikoen arabera (luzera, zabalera eta altuera).

Gehieneko masa baimenduaren (GMB) eta bolumenaren arteko korrelazioa ez bada zuzena, gehieneko masa baimenduak (GMB) izango du lehentasuna; eta, behar izanez gero, aplikatutako tarifa berriro kalkulatuko da, kanona kudeatzen duen enpresa edo, hala badagokio, Bidegi SA korrelazioa okerra dela konturatu eta 10 egun balioduneko epean, gehienez.

3.– Antzeko bolumena baina gehieneko masa baimendu desberdina duten ibilgailuen korrelaziorako, Bidegi SAk matrikularen eta kategoriaren erregistro bat edukiko du, erabiltzaileentzat borondatezkoa izango dena.

10. artikulua.– Ordainbideak.

Ordainbide hauek ezartzen dira foru arau honetan arautzen den kanona ordaintzeko:

a) TAG gailua.

b) Erregistro telematikoa, Bidegi SAren webgunearen bidez, garatu daitezkeen beste sistema telematikoen bidez, banku txartela edo erregistro telematikoak etorkizunean onar dezakeen beste edozein ordainbide adieraziz.

c) AP-8 edo AP-1 autobideetako ordainleku bideratuetan erabilitako banku txartela, Diputatuen Kontseiluaren erabaki bidez zehaztutakoaren arabera.

11. artikulua.– Kanona ordainaraztea, kudeatzea eta biltzea.

Bidegi SA foru sozietate publikoari dagokio kanona ordainaraztea, kudeatzea eta biltzea.

Dena den, Bidegi SAk hirugarren baten esku utzi ahal izango du kanonaren kobrantza kudeatzea.

12. artikulua.– Kanona ez ordaintzea.

1.– Bide azpiegitura erabiltzen den unean kanona ordaintzen ez bada, kanona kudeatzen duen erakundeak dagozkion izapideak egingo ditu hura kobratzeko, kudeaketa errekargua gehituta. Errekargu hori zordundutako kanonaren % 20 izango da.

2.– Bide azpiegitura erabili den datatik bi hilabete igaro ondoren zorra ordaindu gabe baldin badago, kanona ordainarazteaz arduratzen den erakunde kudeatzaileak salaketa igorriko dio Gipuzkoako Foru Aldundiari, zehapen espedientea has dezan eta, bidezko diren bilketa prozeduren bidez, ordaintzeke dagoen zorra eska dezan, ordaindu gabeko kudeaketa errekargua barne.

3.– Egitate horiek egiaztatzeko, azpiegituran instalatutako edozein sistema edo bitarteko tekniko, mekaniko edo irudi-erreproduzitzaile erabili ahal izango da, ibilgailuak argi eta garbi identifikatzen baditu. Irudi hori frogabidea izango da salaketan.

13. artikulua.– Kanona ez ordaintzeagatiko arau-haustea.

1.– Arau-hauste arina izango da kanona eta haren kudeaketa errekargua ez ordaintzea azpiegitura erabili den datatik bi hilabeteko epean.

2.– Arau-hauste horri Gipuzkoako Errepide eta Bideen Foru Arauaren testu bateratuan xedatutakoaren araberako zehapena aplikatuko zaio.

3.– Kanona ez ordaintzearen erantzulea ibilgailuaren titularra izango da; edo ohiko gidaria, baldin eta epe luzeko errentamendua Trafikoko Zuzendaritza Nagusiaren Ibilgailu Erregistroan jasota badago.

14. artikulua.– Biltzen diren funtsen erabilera.

1.– Ibilgailu motordunen edo ibilgailu artikulatuen multzoen joan-etorriengatik bildutako funtsak, salgaiak errepidez garraiatzeko baino ez badira eta 3,5 tonatik gorako baimendutako gehienezko pisua badute, erabiliko dira sistemaren eragiketa-kostuak eta A-636 autobiaren azpiegituraren kontserbazio arrunteko eta bereziko kostuak ordaintzeko, bai eta azpiegitura hori eta hari lotutako zerbitzuak hobetzeko ere.

2.– Bildutako gainerako funtsak, aurreko paragrafoan adierazitakoa finantzatzeaz gain, bide-azpiegituretako politikaren barruan Bidegi SAk egiten dituen jarduerak finantzatzeko erabiliko dira, urriaren 3ko 7/2002 Foru Arauaren 2. artikuluarekin bat etorriz. Foru arau horren bidez, bide azpiegiturak erabiltzeko kanona arautu eta Bidegi Gipuzkoako Azpiegituren Agentzia-Agencia Guipuzcoana de Infraestructuras SA foru sozietate publikoaren zerga araubide juridikoaren zenbait alderdi arautzen dira.

II. TITULUA

SISTEMAK ESKURATUTAKO DATUEN TRATAMENDUA

15. artikulua.– Datu pertsonalen tratamendua.

1.– Free flow sistema kudeatzeko, foru arau honen arabera kanona ordaintzera behartuta dagoen ibilgailuaren titulartasunari lotutako datu pertsonalak tratatu behar dira, kanon hori kobratzeko xedez.

2.– Datu tratamenduaren helburua izango da aipatu sistemapeko azpiegitura hori erabiltzeagatik dagokien kanona ordaintzera behartuta dauden ibilgailuak hautatzea, eta, zehazki, honako hauek: kanona kobratzeko prozesuak gauzatzea; fakturak egitea; ez ordaintzeak eta arau-hausteen ondorioak kudeatzea; egindako kudeaketa egiaztatzea, diskrepantziagatik, desadostasunagatik edo akatsagatik erreklamazioak jartzen badira; eta bide zati hori erabili bai baina kanona ordaindu behar ez duten ibilgailuak baztertzea.

3.– Jasotako datu pertsonalak ez dira erabiliko foru arau honetan aurreikusi ez den beste inolako helburuetarako.

Azpiegituraren erabilerari edo zerbitzu kalitateari buruzko estatistikak egiteko, ezabatu egingo da artikulu honen aurreko zenbakietan identifikatutako xedeak betetze aldera jasotako informazio pertsonal guztia.

4.– Artikulu honetan deskribatutako tratamenduen arduraduna Gipuzkoako Foru Aldundian bide azpiegituren arloan eskumena duen departamentua izango da.

16. artikulua.– Bildutako datu pertsonalak.

1.– Aurreko artikuluan adierazi diren xedeak betetzeko, datu pertsonal hauek behar dira: free flow sistemaren arkuak zeharkatzen dituen ibilgailuaren matrikularen irudia; ibilgailuari lotutako ordainbidea; bidaiari lotutako eguna eta ordua, eta ibilgailuaren titularraren identifikazioa; free flow sistemako alta edo erregistroa; eta informazioaren titularrek eskatu ahal dituzten fakturak egiteko behar diren datuak.

2.– Gainera, datu pertsonalak ez diren beste informazio batzuk ere jaso ahal izango dira, hala nola matrikulazio herrialdeari, ibilgailuaren marka eta modeloari, kategoriari eta fitxa teknikoari buruzkoak.

3.– Datu pertsonalak ez dira jakinaraziko, eta ez dira hirugarrenen esku jarriko, non eta ez den legezko arau bat betetzeko edo zerbitzuari euskarria emateko.

17. artikulua.– Datu pertsonalak gordetzeko epeak.

1.– Ordaintzera behartuta ez dauden ibilgailuei buruzko datuek aldi baterako tratamendua izango dute: bide-ardatza erabiltzeagatik dagokien kanona ordaindu beharrik ez dutela egiaztatu arte behar-beharrezkoa den denboran soilik.

2.– Joan-etorria egiteko unean, ibilgailuak free flow sistemari lotutako beste ordainbiderik ez badu, Diputatuen Kontseiluak erabaki bidez zehaztutako AP-8 autobideko edo AP-1 autobideko bidesari bideratuko ordainlekuetan erabilitako banku-txartela kobratzeko erabiliko da.

Txartel hau erabiliko da bidesari bideratua kobratzeko estazioetatik igaro aurreko edo ondoko 4 orduetan A-636 errepidean egindako igarotzeak kobratzeko, zirkulazioaren noranzkoaren arabera.

3.– Jasotako datuak gordeko dira kanona kobratzeko behar den aldirako soilik; eta, prebentzioz, ordaintzeko obligazioa sortzen den egunetik hasi eta urtebetez, jar litezkeen erreklamazioei erantzuteko. Urtebeteko epe hori igarota, datuak blokeatuta geldituko dira, legez dagozkion akzio administratibo edo judizialen preskripzio epea bete arte.

18. artikulua.– Zilegitasun titulua.

Garatutako jarduerak bildutako eta sortutako datu pertsonalak tratatzeko oinarri juridikoa edo zilegitasun titulua da Gipuzkoako Foru Aldundiari datu pertsonal horien tratamenduaren arduradun gisa emandako botere publikoak erabiltzea, Datuak Babesteko Erregelamendu Orokorraren 6.1.e) artikuluan xedatutakoaren arabera.

LEHENENGO XEDAPEN GEHIGARRIA.– Diputatuen Kontseiluari baimena ematea.

Diputatuen Kontseiluari baimena ematen zaio berak erabaki dezan zein egunetatik aurrera hasiko den kobratzen foru arau honetan arautzen den kanona. Nolanahi ere, data hori ez da izango 2022ko ekainaren 30a baino beranduago.

BIGARREN XEDAPEN GEHIGARRIA.– Aplikagarri diren deskontuak eta hileko gastu muga.

1.– Ekainaren 15eko 4/2010 Foru Dekretu-Arauak, AP-1 eta AP-8 autobideak Gipuzkoako zatian erabiltzeko kanonak ezartzekoak, 2. artikuluan aurreikusitako deskontuak aplikatuko zaizkie kanona ordaindu behar den A-636 autobiaren zatietako erabiltzaileei, baldin eta aipatutako artikulu horretan ezarritako baldintzak betetzen badituzte.

2.– Deskontu horiek aplikatzeko, A-636 autobian lehenengo arkutik azken arkura igaro arte gehienez 20 minutuz egiten diren bidaiak, noranzko berean, bidaia bakartzat hartuko dira, zein tartetatik igarotzen diren kontuan hartu gabe.

3.– Ekainaren 15eko 4/2010 Foru Dekretu-Arauak, AP-1 eta AP-8 autobideak Gipuzkoako zatian erabiltzeko kanonak ezartzekoak, 3.bis artikuluan aurreikusitako Deskontu Planari atxikitako pertsonentzako hileko gastu muga aplikatuko zaie kanona ordaindu behar den A-636 autobiaren zatietako erabiltzaileei, baldin eta foru dekretu-arau horren 2. artikuluan ezarritako baldintzak betetzen badituzte.

AZKEN XEDAPENETAKO LEHENENGOA.– Erregelamenduzko garapena.

Diputatuen Kontseiluari ahalmena ematen zaio foru arau hau garatzeko eta aplikatzeko beharrezkoak diren xedapenak eman ditzan.

AZKEN XEDAPENETAKO BIGARRENA.– Indarrean jartzea.

Foru arau hau indarrean jarriko da Gipuzkoako Aldizkari Ofizialean argitaratzen den egunaren biharamunean.

Azterketa dokumentala