Egoitza elektronikoa

Kontsulta

Kontsulta erraza

Zerbitzuak


Azken aldizkaria RSS

Euskal Herriko Agintaritzaren Aldizkaria

171. zk., 2020ko irailaren 1a, asteartea


Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

LAN ETA JUSTIZIA SAILA
3467

AGINDUA, 2020ko uztailaren 31koa, Lan eta Justiziako sailburuarena, uztailaren 29ko 191/2003 Dekretuan aurreikusitako laguntzen deialdia egiteko dena. Dekretu horrek enpresaburuen elkarteei eta erakunde sindikalei dirulaguntzak emateko modua arautzen du, enpresa-elkarteen eta sindikatuen giza baliabideen kualifikazioa haien jarduera-eremuen berezko gaietan hobetzera zuzendutako prestakuntza-planak garatzeko.

Uztailaren 29ko 191/2003 Dekretuak (2003ko irailaren 1ean Euskal Herriko Agintaritzaren Aldizkarian argitaratua, 169. zenbakia) Enpresaburuen Elkarteei eta Erakunde Sindikalei dirulaguntzak emateko aukera arautzen du, Enpresaburuen Elkarteen eta Erakunde Sindikalen giza baliabideen kualifikazioa haien jarduera-eremuen berezko gaietan hobetzera zuzendutako prestakuntza-planak garatzeko. Dekretu horrek Justizia, Lan eta Gizarte Segurantza Sailak 1996. urteko urriaren 29an 244/1996 Dekretuarekin hasitako laguntza-neurriei jarraipena emateko helburua du. Adierazitako neurriak prestakuntza-jarduerak gauzatzen laguntzeko dira, Enpresaburuen Elkarteen eta Erakunde Sindikalen berezko helburuen barnean. Dekretu horren bitartez enpresaburuen elkarteen eta erakunde sindikalen prestakuntzako barne-programak indartzera, integratzera eta koherentzia ematera zuzendutako finantzaketa publikoko sistema bat ezartzen da, horiek beren koadroen eta langileen prestakuntzarako tresna egoki izan daitezen, modu horretan egoera soziolaboralari beharrezko laguntza emanez.

Aipatutako arauak indarraldi mugagabea du, hain zuzen ere arauaren 9.3 artikuluak ezartzen du Justizia, Lan eta Gizarte Segurantzako sailburuaren Aginduaren bitartez urtero aipatutako Dekretuan aurreikusitako laguntzen deialdia egingo dela, horiek finantzatzeko erabiliko diren eskaeren eta gehienezko kopuru globalaren aurkezteko epea adieraziz, entitate onuradunen bi kategorien artean banatuta.

Deialdi hau COVID-19k eragindako osasun publikoko larrialdi-egoerak baldintzatu du. Osasunaren Mundu Erakundeak, 2020ko martxoaren 11n, egoera nazioarteko pandemia-mailara igo zuen, eta horri lurralde-mailako beste osasun-alerta batzuk gehitu zitzaizkion. Alerta horiek agerian utzi dute birusaren hedapenari eusten lagunduko duten ezohiko eta premiazko neurriak hartu behar direla, larrialdi-egoerei berehala erantzun ahal izateko.

Euskal Autonomia Erkidegoaren eremuan, martxoaren 14ko 463/2020 Errege Dekretuak, COVID-19k eragindako osasun-krisiaren egoera kudeatzeko alarma-egoera deklaratzen duenak, mugatu egin du, 2020ko martxoaren 14tik aurrera, pertsonen zirkulazio-askatasuna, eta euste-neurriak ezarri ditu hezkuntzaren, prestakuntzaren eta jardueraren esparruan. Merkataritza, kultura-ekipamenduak, establezimenduak eta jolas-jarduerak, ostalaritza- eta jatetxe-jarduerak eta beste batzuk.

Pertsonen mugikortasunaren mugek, hezkuntza- eta prestakuntza-jardueren eta jarduera ekonomikoen murrizketek, eta kutsatzeak saihesteko osasun-gomendioak betetzeko betebeharrak, bereziki gizarte-urruntzeak, gizarte-eragileak behartu dituzte orain arte aplikazio mugatua zuten baina une honetan normaltasunera itzultzeko funtsezko diren ohiko jarduerak orokortzera.

Horien artean dago teleprestakuntza. Baliabide horrek, ondo kudeatuta, kalitatezko prestakuntza ahalbidetzen du, bai eta enpresa-elkarteen eta erakunde sindikalen giza baliabideen kualifikazio-maila hobetzea ere.

Pandemiaren bilakaera ikusita, gizarte- eta lan-jardueraren hainbat arlotan pixkanaka normaltasunera itzuliko den agertoki berri baterantz aurrera egiten ari gara, baina oraindik ez gara iritsi alarma-egoera deklaratu aurreko egoerara.

Horregatik, 2020ko ekitaldi honetako deialdian, beharrezkoa da uztailaren 29ko 191/2003 Dekretuaren 7.3 artikuluan aurreikusitako aurrekontu-banaketa ekintza motaren arabera aldatzea, artikulu horretan aurreikusitako ehunekoak aldatuz, uztailaren 29ko 191/2003 Dekretuaren 3.b) artikuluko prestakuntza-ekintza ez-presentzialetarako eta 3.c) artikuluan aurreikusitako prestakuntza-jardueretara laguntzeko ekintzetarako.

Lan eta Justizia Sailaren egitura organiko eta funtzionalari buruzko apirilaren 11ko 84/2017 Dekretuak, maiatzaren 28ko 81/2019 Dekretuaren bidez aldatuak, 9.1.w) artikuluan Lan eta Gizarte Segurantza Zuzendaritzari esleitzen dio gizarte-eragileen giza baliabideen kualifikazioa sustatzeko eginkizuna, gizarte-eragileek gizartearen garapen ekonomikoari eta ongizateari egiten dioten ekarpena bultzatuko duten prestakuntza-planak sustatuz.

191/2003 Dekretuko 16. artikuluak ezartzen duenez, Euskal Autonomia Erkidegoko Aurrekontu Orokorretan propio ezarritako aurrekontu-kredituetatik aterako dira Dekretuaren helburua betetzeko behar diren aurrekontu-baliabideak.

Azaroaren 11ko 1/1997 Legegintzako Dekretuko 49.5 artikuluan ezarrita dagoenez -Euskal Autonomia Erkidegoko Ogasun Nagusiaren Antolarauei buruzko Legearen Testu Bateratua onartu zen dekretu horren bidez-, Euskal Autonomia Erkidegoaren ekonomia-ekitaldi bakoitzeko aurrekontu orokorrak indarrean jartzen direnean, dirulaguntzak arautzeko behar diren xedapenak emango dira, eta egon daudenak gaurkotu edo aldatu egingo dira; orobat, bere garaian indarraldi mugagabekotzat jo ziren dirulaguntzak iragarriko dira.

Euskal Autonomia Erkidegoko 2020ko ekitaldirako Aurrekontu Orokorrak onartzen dituen abenduaren 27ko 13/2019 Legean, 45499 azpikontzeptuan (Irabazi-asmorik gabeko beste erakunde batzuentzako transferentziak eta dirulaguntzak), 3112 Lan programan (11. Zerbitzua, Lan eta Gizarte Segurantza Zuzendaritza), enpresa-elkarteen eta sindikatuen prestakuntza-planak izeneko 005 partida esleitu da, 751.129 euroko zenbatekoarekin.

Xedapen honek deitutako dirulaguntzen ildoa Lan eta Justiziako sailburuaren 2020ko otsailaren 11ko Aginduan dago aurreikusita, zeinaren bidez onartzen baita Lan eta Justizia Sailaren 2020rako Dirulaguntzen Plan Estrategikoa, Dirulaguntzei buruzko azaroaren 17ko 38/2003 Lege Orokorraren 8.1 artikuluak ezartzen duen bezala, eta agindu horretan adierazitako edukiarekin.

Hori guztia dela-eta, eta aipatutako uztailaren 29ko 191/2003 Dekretuko 9.3 artikuluan aurreikusitako gaikuntza baliatuz, honako hau

EBAZTEN DUT:

Lehenengoa.– Helburua.

Uztailaren 29ko 191/2003 Dekretuan xedatutako laguntzak eskuratzeko 2020ko deialdia egitea. Dekretu horren bidez, enpresarien elkarteei eta erakunde sindikalei beren jarduera eremuetako berezko gaiei dagokienez, giza baliabideen trebakuntza hobetzeko prestakuntza-planak egiteko emango zaizkien dirulaguntzak arautu ziren.

Bigarrena.– Eskabideak aurkezteko epea.

Eskabideak aurkezteko epea hilabetekoa izango da Agindu honek ondorioak sortzen dituenetik aurrera.

Hirugarrena.– Diru-baliabideak.

Deialdi honen xede den finantziazioari bideratutako baliabide ekonomikoak, 2020rako, 751.129 eurokoak dira; horietatik 525.790 euro 2020. urteko aurrekontu arruntetik ordainduko dira eta 225.339 euro 2021erako konpromisoko aurrekontutik, 3112 Lana 11 zerbitzua, Lan eta Gizarte Segurantza Zuzendaritza programaren kontura.

Zenbateko hori entitate onuradun izan daitezkeen kategoria bien artean banatuko da, banaketarako formula honakoa izango dela:

a) Enpresaburuen elkarteei gehienezko kopuru globalaren % 40 emango zaie, hau da, 300.452 euro.

b) Erakunde sindikalei gainerako % 60a emango zaie, hau da, 450.677 euro.

Laugarrena.– Dirulaguntza kuantifikatzeko irizpideak.

2020ko deialdian, eta uztailaren 29ko 191/2003 Dekretuaren 7.3 artikuluarekin bat etorriz, 3.b) artikuluko prestakuntza-ekintza ez-presentzialetarako prestakuntza-plan beraren barruan onartutako dirulaguntzak amaierako dirulaguntzaren % 100 ere izan ahalko du.

Bestalde, 3.c) artikuluan aurreikusitako prestakuntza-jardueretara joateko ekintzei egotz dakiekeen zenbatekoa azken dirulaguntzaren % 100era artekoa izan daiteke.

Bostgarrena.– Dirulaguntzak emateko eta eskuratzeko baldintzak.

1.– Honako hauek dira aipatutako dirulaguntzak jasotzeko baldintzak:

– Uztailaren 29ko 191/2003 Dekretuan aurreikusitakoak. Dekretu horrek enpresaburuen elkarteei eta erakunde sindikalei dirulaguntzak emateko modua arautzen du, enpresa-elkarteen eta sindikatuen giza baliabideen kualifikazioa haien jarduera-eremuen berezko gaietan hobetzera zuzendutako prestakuntza-planak garatzeko.

– Zerga-betebeharrak eta Gizarte Segurantzarekiko betebeharrak egunean eduki beharko dituzte.

– Ezingo dute eduki zigor- edo administrazio-mailako zehapenik, laguntza publikoak edo dirulaguntzak eskuratzeko aukera galarazten dienik, eta, halaber, ezingo dira egon horretarako gaitasuna kentzen dien legezko debekuren batean, ezta sexu-diskriminazioaren zioz sortu direnetan ere ez, Emakumeen eta Gizonen Berdintasunerako Legeak (otsailaren 18ko 4/2005 Legeak) azken xedapenetatik seigarrenean ezarritakoaren arabera.

– Ezingo dira egon Dirulaguntzei buruzko Lege Orokorrak (azaroaren 17ko 38/2003 Lege Orokorrak) 13. artikuluko 2. apartatuetan aurreikusten duen egoera batean ere.

2.– Nolanahi ere, azaroaren 11ko 1/1997 Legegintza Dekretuak (Euskadiko Ogasun Nagusiaren Antolarauei buruzko Legearen Testu Bategina onartzen duenak) 50.4. atalean ezarritakoaren arabera, Euskal Autonomia Erkidegoko administrazio orokorrak edo erakunde autonomiadunek ezaugarri bereko beste laguntza edo dirulaguntzaren batzuk eman izana dela-eta horiek itzultzeko edo zigortzeko prozesuren bat oraindik ere izapidetzen ari bada, prozesu hori amaitu egin beharko da onuradunei dirulaguntzak edo laguntzak eman eta ordaindu ahal izateko. Euskal Autonomia Erkidegoko Administrazio Orokorrari dirulaguntzak itzultzeko betebeharrak betetzeke dituztenak ezingo dira onuradun izan.

3.– Artikulu honetan onuradun izateko ezartzen diren baldintzak betetzen direla justifikatzeko, bestalde, erantzukizunpeko adierazpena aurkeztu ahalko da. Salbuespen bakarra zerga-betebeharrak edo Gizarte Segurantzarekikoak egunean direla ziurtatzeko agiria izango da.

Seigarrena.– Kudeaketa-organoa.

Lan eta Justiziako Saileko Lan eta Gizarte Segurantza Zuzendaritza da eskaerak kudeatzeko eta izapidetzeko ardura duen organoa, eta ebazteko eskumena duena Lan eta Gizarte Segurantzako zuzendaria.

Zazpigarrena.– Ebaluazio-batzordea.

Agindu honetan ezarritakoaren babesean aurkeztutako proiektuak analizatu eta ebaluatzeko, ebaluazio-batzorde bat sortuko da. Lan eta Gizarte Segurantzako Zuzendaritzako hiru teknikarik, titularrak izendatuak, osatuko dute.

Batzorde horrek ebazpen-proposamena egingo dio Lan eta Gizarte Segurantzako zuzendariari, uztailaren 29ko 191/2003 Dekretuaren 12.1 artikuluan ezarritakoaren arabera.

Zortzigarrena.– Dirulaguntzen tramitazio telematikoa.

1.– Eskabideak, errekerimenduak, jakinarazpenak, zuzenketak, justifikazioak eta laguntzak emateko deialdi honetan inplikatutako gainerako kudeaketak bitarteko elektronikoen bidez egingo dira.

2.– Eskabidea eskuratzeko eta betetzeko, Euskal Autonomia Erkidegoko Administrazio Publikoaren egoitza elektronikoa erabili beharko da, honako helbide honetan.

https://www.euskadi.eus/diru_laguntza/2020/formakuntzarako-enpresaburuen-elkarteei-eta-erakunde-sindikalei-dirulaguntzak-191/2003-dekretua-2020/web01-tramite/eu

Aipatutako egoitza elektronikoan egongo dira eskuragarri izapidetzeari buruzko jarraibideak, bai eta eskabideak, erantzukizunpeko adierazpenak eta gainerako ereduak ere.

3.– Espedienterako sarbidea, errekerimenduak, jakinarazpenak, zuzenketak, justifikazioak eta agindu honetan inplikatutako eskabidearen ondorengo gainerako izapideak Euskal Autonomia Erkidegoko Administrazio Publikoaren egoitza elektronikoko «Nire karpeta» ren bidez egingo dira (https://www.euskadi.eus/nirekarpeta).

Bederartzigarrena.– Eskaeren aurkezpena eta egiaztagirien ekarpena eta dokumentazioa.

1.– Eskabidea, erantzukizunpeko adierazpenak barne, Euskal Autonomia Erkidegoko Administrazio Publikoaren egoitza elektronikoan eskuragarri dagoen inprimakian beteko da.

2.– Dirulaguntzaren eskabidearekin batera, honako agiri hauek aurkeztu behar dira:

– Prestakuntza-planaren inprimaki deskribatzailea, Dekretuak 10.a) artikuluan ezartzen dituenak barnebilduta eta Agindu honen 1. eranskinak jasotzen duen formatuan. Memoria horrek 1 eta 2 dokumentuak jasoko ditu, baita 3 dokumentuaren ale bat ere eskatzen den prestakuntza-jarduera bakoitzeko.

– Eskabidearen sinatzaileak erakunde eskatzailea ordezkatu, bere izenean dirulaguntza eskatu eta berau jasotzeko duen legezko gaitasuna egiaztatzen duten agiriak.

3.– Honako hauek jasoko erantzukizunpeko adierazpenak:

3.1.– Erantzukizunpeko adierazpena, beste dirulaguntza batzuen egoerari buruzkoa, baldin eta horiek administrazio batzuei nahiz erakunde publiko nahiz pribatuei eskatu bazaizkie, eta jadanik edo tramitatzeke badaude, prestakuntza -plan berbera betetzeko edota eskabidepeko plan horren alderdietatik edozein betetzeko.

3.2.– Erantzukizunpeko adierazpena, itzulketa prozeduren edota prozedura zehatzailearen egoerari buruzkoa: baldin eta halako prozedura hasi badira, Euskal Autonomia Erkidegoko Administrazio Orokorrak eta bere erakunde autonomiadunek izaera bereko dirulaguntza eman eta gero, eta prozedura horiek oraindik tramitatzeke badaude.

3.3.– Erantzukizunpeko adierazpena, sexu-arrazoiengatiko bereizkeria egin izanagatik administrazioaren nahiz zehapenen eremuan zigorra jaso ez izana eta Emakumeen eta Gizonen Berdintasunerako otsailaren 18ko 4/2005 Legearen izenean debeku horrekin zehaturik ez egotea adierazten dueña.

3.4.– Erantzukizunpeko adierazpena, dirulaguntzak edo laguntza publikoak jasotzea eragozten duen administrazio-zehapenik ez izatea edo horretarako gaitasuna kentzen duen legezko debekurik ez izatea adierazten dueña.

3.5.– Dirulaguntzak itzultzeagatiko betebeharren ordainketa egunean duelako erantzukizunpeko adierazpena, araudiaren arabera zehazten den moduan.

3.6.– Dirulaguntzen Lege Orokorraren 13.1 eta 2. artikuluan xedatutako ezein inguruabarretan ez dagoelako erantzukizunpeko adierazpena.

3.7.– Uztailaren 19ko 191/2003 Dekretuan eta Dirulaguntzen Lege Orokorraren 14. eta 46. artikuluetan ezarritako betekizun eta baldintza guztiak betetzeko konpromisoa.

3.8.– Abenduaren 17ko 698/191 Dekretuaren 2.3 artikuluan ezarritako formetatik edozein erabiliz, berme erreala eratzeko konpromisoa hartzea.

4.– Dirulaguntza jasotzeko eskaera aurkeztean baimena emango diote organo kudeatzaileari zerga-betebeharretan eta Gizarte Segurantzarekikoetan egunean egon behar duela dioen betekizuna betetzen duela egiaztatzeko behar beste ziurtagiri eskatzeko. Horretarako, ez da beharko erakunde eskatzailearen oniritzirik Kasu horretan, ziurtagiri horiek aurkeztu beharko ditu, araudian aurreikusitako terminoetan.

5.– Administrazioak laguntzak ordaindu ahal izateko, erakunde eskatzaileak Eusko Jaurlaritzaren Ogasuna eta Ekonomia Saileko Kontrol Ekonomikoko Bulegoaren Hirugarrenen Erregistroan egon beharko du.

Erakundea ez badago erregistratuta edo Ogasuna eta Ekonomia Saileko Hirugarrenen Erregistroan dauden bankuko datuak aldatu nahi baditu, elektronikoki izapidetu beharko du Euskal Autonomia Erkidegoko Administrazio Publikoaren egoitza elektronikoan (https://www.euskadi.eus/hirugarrenaren-datuen-aldaketa/web01-tramite/eu/).

Hamargarren.– Entitate onuradunen betebeharrak.

Uztailaren 29ko 191/2003 Dekretuak ezartzen dituen betebeharrez gain, laguntza hauen onuradun suertatzen diren erakundeek bete egin beharko dute azaroaren 17ko 38/2003 Legeak (Dirulaguntzei buruzko Lege Orokorrak) 14. 18. eta 46. artikuluetan ezarritakoa, bai eta azaroaren 11ko 1/1997 Legegintza Dekretuak (Euskadiko Ogasun Nagusiaren Antolarauei buruzko Legearen Testu Bategina onartzen duenak) 50. artikuluan ezarritako betebeharrak ere.

AZKEN XEDAPENETAKO LEHENENGOA

Uztailaren 29ko 191/2003 Dekretuan (dekretu horren bidez, beren jarduera-eremuetako gaiei dagokienez giza baliabideen trebakuntza hobetzeko prestakuntza-planak gara ditzaten, enpresa-elkarteentzako eta sindikatuentzako dirulaguntzen emakida arautzen da) ezarritakoari ez ezik honako hauek xedatutakoari ere men egingo diote agindu honek hizpide dituen dirulaguntzek: Administrazio Publikoen Administrazio Prozedura Erkidearen Legea (urriaren 1eko 39/2015 Legea); Sektore Publikoaren Araubide Juridikoaren Legea (urriaren 1eko 40/2015 Legea); Euskadiko Ogasun Nagusiaren Antolarauei buruzko Legearen testu bategineko (azaroaren 11ko 1/1997 Legegintzako Dekretuaren bidez onartua) VI. titulua eta VII. tituluko III. kapitulua; eta Dirulaguntzen Lege Orokorrean (38/2003 Legea) eta 887/2006 Errege Dekretuan (azken horren araudia onartzen duena) jasotako oinarrizko arauketa.

AZKEN XEDAPENETAKO BIGARRENA

Deialdi honen izapidean jasotzen diren datu pertsonalak (parte-hartzaileek tratatzeko baimendutakoak) fitxategi batera sartuko dira. Dirulaguntzen deialdi hau edo honekin zerikusia daukan bestelako edozein administrazio-prozedura edo -espediente kudeatzea izango da fitxategi horren xedea, bai eta deialdian parte hartu duten pertsonei deialdiaren garapenaren berri ematea ere. Lan eta Justizia Sailaren Laneko eta Gizarte Segurantzako Zuzendaritza da fitxategi horren arduraduna. Datuak begiratzeko, zuzentzeko eta ezeztatzeko eskubideak erabili ahalko dira,http://www.euskadi.eus web-orrialdean datuen babesari buruz jasotzen den informazio gehigarri eta xehean azaltzen den bezala.

AZKEN XEDAPENETAKO HIRUGARRENA

Administrazio-bidea agortzen duen Agindu honen aurka berraztertzeko aukerako errekurtsoa jarri ahalko diote interesdunek Lan eta Justiziako sailburuari, Euskal Herriko Agintaritzaren Aldizkari Ofizialean argitaratu eta hurrengo egunetik zenbatzen hasita, edo zuzenean administrazioarekiko auzietarako errekurtsoa Euskal Autonomia Erkidegoko Justizia Auzitegiaren Administrazioarekiko Auzietarako Salan, aldizkari ofizial berean argitaratu eta hurrengo egunetik zenbatzen hasita, Administrazio Publikoen Administrazio Prozedura Erkidearen urriaren 1eko 39/2015 Legearen 123. eta 124. artikuluek ezarritakoaren arabera.

AZKEN XEDAPENETAKO LAUGARRENA

Euskal Herriko Agintaritzaren Aldizkarian argitaratzen den egunaren biharamunetik zenbatzen hasita izango ditu ondorioak agindu honek.

Vitoria-Gasteiz, 2020ko uztailaren 31.

Lan eta Justiziako sailburua,

MARÍA JESÚS CARMEN SAN JOSÉ LÓPEZ.

(Ikus .PDF)

Azterketa dokumentala