Euskal Herriko Agintaritzaren Aldizkaria

147. zk., 2018ko abuztuaren 1a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

OGASUN ETA EKONOMIA SAILA

3944

EBAZPENA, 2018ko uztailaren 2koa, Lehiaren Euskal Agintaritzako lehendakariarena, zeinaren bidez Gobernantza Publiko eta Autogobernu Saileko Administrazioko eta Zerbitzu Orokorretako sailburuordeari delegatzen baitzaio erakunde autonomoaren egoitzan kontratatzea behe-tentsioko energia elektrikoaren hornidura eta telefonia finkoarekin, komunikazio mugikorrekin, SMS zerbitzu masiboarekin eta Internetekin lotutako telekomunikazio-zerbitzuak.

Administrazioko eta Zerbitzu Orokorretako Sailburuordetzari dagokio kudeaketa bateratuaren arloan eta kudeaketa bateratukotzat deklaratutako higiezinen arloan kontratazioa egitea, hala ezarrita baitago Euskal Autonomia Erkidegoko Sektore Publikoaren kontratazio-araubidea onartzen duen uztailaren 27ko 116/2016 Dekretuaren 15. eta 17. artikuluetan eta Gobernantza Publiko eta Autogobernu Sailaren egitura organikoa eta funtzionala onartzen duen apirilaren 11ko 71/2017 Dekretuaren 19.d) artikuluan.

Bestalde, aipatutako 116/2016 Dekretuaren 20. artikuluan ezartzen denez, kontratazio zentralizatukotzat deklaratu ahal izango dira Euskal Autonomia Erkidegoko sektore publikoaren erakundeek orokorrean eta ezaugarri nagusi bertsuekin kontratatzen dituzten hornidura, obra eta zerbitzuak.

Badira urte batzuk modu zentralizatuan kontratatzen dela goi- eta behe-tentsioko energia elektrikoaren hornidura eta gas naturalaren hornidura kudeaketa bateratuko eraikinetan, Administrazioko eta Zerbitzu Orokorretako Sailburuordetzaren eskumeneko sare korporatiboaren telekomunikazio-zerbitzuetan, Euskal Autonomia Erkidegoko Administrazio Orokorreko gainerako sailei eta haren erakunde autonomo eta sozietate publikoei atxikitako eraikinetan eta, sektore publikokoak izanik, Euskal Autonomia Erkidegoko sektore publikoaren parte ez diren beste zenbait erakunderi atxikitakoetan. Hartara, zerbitzuak hobeto kudeatzeaz gainera, gastu publikoa arrazionalizatu egiten da.

Egun, kontuan hartuta aurrerago dekretu bat onartuko dela energia elektrikoaren horniduren kontratazioa modu zentralizatuan erostea xedatuko duena, eta aintzat hartuta telekomunikazioen arloko bateratze-prozesua, kontratazioa modu zentralizatuan egiteko bide egokiena 40/2015 Legearen 9. artikuluan eskumenak delegatzeko ezarritakoa da (urriaren 1eko 40/2015 Legea, Sektore Publikoko Araubide Juridikoarena). Honela dio artikulu horrek:

«1.– Administrazio publikoetako organoek beste organo batzuei delegatu diezazkiekete beren eskumenak, baldin eta organo horiek administrazio berekoak badira, nahiz eta hierarkikoki bata bestearen mendekoa ez izan.»

Horregatik, aintzat hartuta Lehiaren Euskal Agintaritzari buruzko otsailaren 2ko 1/2012 Legeak Lehiaren Euskal Agintaritzako lehendakariari esleitzen dizkion eskumenak, besteak beste erakunde autonomoaren kontratazio-organoa izatea –8. eta 22. artikuluen arabera–, hau

EBAZTEN DUT:

I.– Administrazioko eta Zerbitzu Orokorretako sailburuordeari delegatzea Bilboko (Bizkaia) Ercilla kaleko 4 zenbakiko 2. solairuko etxebizitza behe-tentsioko energia elektrikoz hornitzeko kontratazioaren eskumena 2019rako. Delegatze hori luzatu egingo da harik eta erosketa zentralizatuko prozeduraren ondoriozko kontratua indarrean jarri arte (kontratu hori erosketa zentralizatua deklaratzeko aurrerago onartuko den dekretuaren bidez gauzatuko da).

II.– Administrazioko eta Zerbitzu Orokorretako sailburuordeari delegatzea erakunde autonomoaren egoitzan –gaur egun, Bilboko (Bizkaia) Ercilla kaleko 4 zenbakiko 2. solairuan– honako hauek kontratatzeko eskumena 2019. eta 2020. urteetarako (beste urtebetez luzatu ahal izango da): telefonia finkoarekin, komunikazio mugikorrekin, SMS zerbitzu masiboarekin eta Internetekin lotutako telekomunikazio-zerbitzuak.

III.– Sektore Publikoko Kontratuei buruzko azaroaren 8ko 9/2017 Legean aurreikusitako arlo hauetara zabalduko da delegatzea, betiere kontratuari aplikatzekoak badira:

– Kontratua prestatzea (II. liburua, I. titulua, I. kapitulua, 1. atala).

– Kontratua esleitzea (II. liburua, I. titulua, I. kapitulua, 2. atala).

– Administrazioren prerrogatibak: aldatzea, azkentzea, lagapena eta azpikontratazioa (II. liburua, I. titulua, I. kapitulua, 3. atala).

– Kontratua formalizatzea (II. liburua, I. titulua, I. kapitulua).

– Eta, bereziki, II. liburuan, II. tituluko IV. kapituluan, hornidura-kontratuari buruz aurreikusitakoa.

IV.– Delegatzen duen organoaren barruan jarraituko dute kontratazio-organoari dagozkion gainerako eskumenek, eta, bereziki, egindako zerbitzuen betetzeari onespena emateko eta haien ordainketa agintzeko eskumenek.

V.– Euskal Herriko Agintaritzaren Aldizkarian argitaratuko da delegatze hau, eta argitara eman eta biharamunean jarriko da indarrean.

Bilbao, 2018ko uztailaren 2a.

Lehiaren Euskal Agintaritzako lehendakaria,

ALBA URRESOLA CLAVERO.

Azterketa dokumentala