RSS
73. zk., 2018ko apirilaren 17a, asteartea
- Bestelako formatuak:
- PDF (223 KB - 2 orri.)
- EPUB (195 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
EKONOMIAREN GARAPEN ETA AZPIEGITURA SAILA
2005
EBAZPENA, 2018ko martxoaren 7koa, Ekonomiaren Garapen eta Azpiegitura Sailaren Bizkaiko lurralde-ordezkariarena, 13,2kV-ko goi-tentsioko linea elektriko bat onura publikokoa dela deklaratzeko dena. Helburua «STR Ganguren Cto. 3» izenekoaren zuhaitzik gabeko zerrenda zabaltzea da, Bilbao, Etxebarri, Zamudio, Lezama eta Galdakaoko udalerrietan.
Erreferentzia: L-8124 IFT/MBA.
Espedientea: AT-H-2017-24.
AURREKARIAK
1.– 2017ko ekainaren 8an, Iberdrola Distribución Eléctrica SAU enpresak, Bilboko San Adrian etorbideko 48an helbideratuta dagoenak, eskatu zuen gorago zehaztutako linea onura publikokoa deklaratzea, linea horren zortasuna handitzearen eraginpeko ondasunak eta eskubideak premiaz okupatzeko, zuhaitzik gabeko zerrenda zabaltzearen ondorioz. Halaber, enpresak dokumentazio egokia aurkeztu zuen Energia eta Meategietako zuzendariaren 2011ko martxoaren 8ko Ebazpena betearazteko xedez.
2.– Abenduaren 3ko 282/2002 Dekretuaren 10. artikuluan (2002-12-23ko EHAA) eta abenduaren 1eko 1955/2000 Errege Dekretuaren 144. artikuluan (2000-12-27ko BOE) xedatutakoaren ondorioetarako, aipatutako eskaera jendaurrean erakusteko iragarkia argitaratu zen, 2017ko uztailaren 27ko BAOn, 2017ko abuztuaren 1eko EHAAn eta 2017ko uztailaren 28ko Deia egunkarian. Harekin batera, enpresa horrek desjabetu beharrekotzat jotzen dituen ondasunen eta eskubideen zerrenda argitaratu zen.
3.– 2017ko uztailaren 10ean, Bilboko eta Alonsotegiko Udalei ofizioak bidali zitzaizkien aipatutako jarduketaren iragarkia udaletxeko iragarki-oholean jar zezaten; halaber, instalazioa onura publikokoa deklaratzea egokia zen ala ez azaltzeko txostena egitea eskatu zitzaien.
4.– Jendaurrean jartzeko epean ez da partikularren alegaziorik edo kexarik jaso.
OINARRI JURIDIKOAK
1.– Espedientean, xedapen hauetan ezarritako arauzko izapideak bete dira: Sektore Elektrikoari buruzko abenduaren 26ko 24/2013 Legea; Energia elektrikoko instalazioen garraiorako, banaketarako, merkaturatzeko eta hornitzeko jarduerak eta baimentze-prozedurak arautzen dituen abenduaren 1eko 1955/2000 Errege Dekretua; Nahitaezko desjabetzeari buruzko 1954ko abenduaren 16ko Legea; Eusko Jaurlaritzaren abenduaren 3ko 282/2002 Dekretua; eta Goi-tentsioko linea elektrikoak zuhaiztietatik igarotzeko berariazko betekizunak xedatzen dituen Energia eta Meategien zuzendariaren 2011ko martxoaren 8ko Ebazpena (2011-05-31ko EHAA).
2.– Aipatutako Sektore Elektrikoari buruzko 24/2013 Legearen 54. artikuluak energia-banaketarako instalazioen onura publikoa deklaratzen du, nahitaezko desjabetu beharrekotzat jotzen dituen ondasunen eta eskubideen xedeetarako, baita dagokion bide-zorraren ezarpena eta jarduketa ere, Legearen 56. artikuluan, eta Nahitaezko desjabetzeari buruzko Legearen 52. artikuluan, aipatutako berehalako okupazio beharrari buruzko adierazpena inplizituki daramalarik.
EBAZTEN DU:
Berariaz deklaratzea onura publikokoa dela «STR Ganguren Cto. 3» izeneko linea elektrikoaren inguruko eremua, zuhaitzik gabeko zerrenda zabaltzeko, Bilboko, Etxebarriko, Zamudioko, Lezamako eta Galdakaoko udalerrietan.
Sektore Elektrikoari buruzko abenduaren 26ko 24/2013 Legearen 55. artikuluan xedatutakoaren arabera, deklarazio honek berekin dakar eraginpeko ondasunak okupatu edo eskubideez jabetu beharra, eta haien okupazioa lehenbailehen egin beharra. Deklarazioak, halaber, Nahitaezko desjabetzeari buruzko 1954ko abenduaren 16ko Legearen 52. artikuluan presaz okupatzeko deklarazioari dagokionez ezartzen diren ondorioak dakartza, 53. artikuluan zehaztutako erregistro-ondorioekin.
Ebazpen honek ez dio amaiera ematen administrazio-bideari, eta, beraren aurka, gora jotzeko errekurtsoa jar dakioke Saileko zerbitzu-zuzendariari, hilabeteko epean, ebazpen hau jakinarazi eta hurrengo egunetik hasita, eta hori guztia Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluari eta hurrengo artikuluei jarraikiz.
Bilbao, 2018ko martxoaren 7a.
Bizkaiko lurralde-ordezkaria,
ADOLFO GONZÁLEZ BERRUETE.
