Euskal Herriko Agintaritzaren Aldizkaria

12. zk., 2017ko urtarrilaren 18a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

GIPUZKOAKO FORU ALDUNDIA

264

5/2016 FORU ARAUA, azaroaren 14koa, 2016. urtean zerga aldaketa jakin batzuk onartzen dituena.

GIPUZKOAKO DIPUTATU NAGUSIAK

Jakinarazten dut Gipuzkoako Batzar Nagusiek onartu dutela «2016ko azaroaren 14ko 5/2016 Foru Araua, 2016. urtean zerga aldaketa jakin batzuk onartzen dituena»; eta nik aldarrikatu eta argitara dadin agintzen dut, aplikagarria zaien herritar guztiek, partikularrek nahiz agintariek, bete eta betearazi dezaten.

Donostia, 2016ko azaroaren 14a.

Diputatu nagusia,

MARKEL OLANO ARRESE.

HITZAURREA

Indarrean bi urte baino gehiagotan egon eta gero, 2014. urtean pertsona fisikoen errentaren gaineko zergan eta sozietateen gaineko zergan izandako erreformek ikustarazten dute beharrezkoa dela bi zerga horien erregulazioan aldaketa jakin batzuk egitea, haien aplikazioan elusio egoerak edo ekitate gabezia saihestu nahi baitira.

Gainera, tributuz kanpoko beste arau esparru batzuetan egin diren aldaketek badutenez zer ikusirik tributuen erregulazioan zuzenean edo zeharka eragiten duten alderdiekin, aldaketa horietara egokitu beharra dago araudia, haren koherentzia eta egitura zaintzeko. Horretarako, beharrezkoa da esandako aldaketak jasoko dituen foru arau bat onartzea.

Bestetik, tributuen aplikazioaz arduratzen diren organoek haien araudia etengabe aplikatzeak zenbait kasutan agerian uzten du beharrezkoa izaten dela kasuan-kasuko aldaketak egitea lurralde historikoko erakunde eskudunek arautu ditzaketen tributuen erregulazioetan.

Aurrekoa eragotzi gabe, aldian-aldian sumatzen da zerga sisteman aldaketak sustatzea beharrezkoa dela, haren barruan hobekuntzak sartzeko eta sistema hori une bakoitzean dagoen egoera ekonomiko eta sozialera egokitzeko.

Arrazoi horiengatik, onartu beharrekoa da foru arau hau, hain zuzen Gipuzkoako lurralde historikoko zerga sistemaren bost tribututan zerga aldaketak jasotzen dituena: pertsona fisikoen errentaren gaineko zerga, sozietateen gaineko zerga, oinordetza eta dohaintzen gaineko zerga, ondare eskualdaketen eta egintza juridiko dokumentatuen gaineko zerga eta jarduera ekonomikoen gaineko zerga. Gainera, hainbat doikuntza sartzen ditu kooperatiben zerga araubidean, irabazi asmorik gabeko entitateen eta mezenasgoaren aldeko zerga pizgarrien zerga araubidean eta lehentasunezko partaidetzen zerga araubidean. Horretarako, foru araua 8 artikulutan banatuta dago, eta aipatutako zerga, araubide eta arauen aldaketak jasotzen dira bertan.

Pertsona fisikoen errentaren gaineko zergari dagokionez, azpimarratzekoak dira jarraian aipatuko diren neurriak. Horietako batzuek 2016ko urtarrilaren 1etik aurrerako ondorioak izango dituzte, eta beste batzuek, aldiz, 2017ko urtarrilaren 1etik aurrera.

Salbuespenen esparruan, hainbat aldaketa sartzen dira. Prestazio familiarrei dagokienez, salbuetsitzat hartzen dira 2015eko urriaren 30eko 8/2015 Legegintzako Errege Dekretuak onartutako Gizarte Segurantzaren Lege Orokorraren testu bategin berrian araututako prestazioak. Prestazio horiek minbiziak edo beste gaixotasun larri batek eragindako adingabeen zaintzari lotuta daude. Era berean, bi salbuespen kasu berri sartzen dira. Lehendabizikoa lotuta dago Espainian nahiz atzerrian hezkuntza sistemaren maila eta gradu guztietan ikasketa arautuak egiteko banku fundazioek emandako bekekin, bai eta fundazio berberek Ikertzaile bekadunaren Estatutuari buruzko urtarrilaren 27ko 63/2006 Errege Dekretuaren esparruko ikerketak eta, orobat, herri administrazioetako funtzionarioei eta gainerako langileei nahiz unibertsitateetako irakasle eta ikertzaileei ikerketak egiteko emandako bekekin ere. Bigarren salbuespen kasua lotuta dago begirale, arbitro, epaile, ordezkari, kirol arduradun, federazio zuzendari tekniko edo entrenatzaile eginkizunak betetzeagatik jasotako etekinekin, betiere Gipuzkoako Foru Aldundiak baimendutako eskola kiroleko programa edo eskola adineko kirolarientzako jarduerak edo lurraldeko kirol federazioen jarduerak egiteari dagokionez, eta salbuespenaren muga lanbide arteko gutxieneko soldata izango da.

Salbuespenen esparruarekin jarraituz eta ordainketa bakarreko langabezia prestazioaren kasuan, aurrerantzean ez da beharrezkoa izango akzioari edo partaidetzari edota jarduera ekonomikoari bost urtez eustea, baldin eta epe hori ezin bada bete enpresa edo jarduera ekonomikoa likidatu egin delako, konkurtso baten deklarazio judizialaren ondorioz, edo langile autonomoen jarduera amaitu izanaren lege egoera gertatzen delako, Gizarte Segurantzari buruzko legerian aipatutako kontabilitate galeren ondorioz.

Merkatuarekin bat eginez eta aseguru produktu jakin batzuen bitartez bideratutako aurrezkiaren tratamendu fiskal homogeneoa mantentzearren, tratamendu fiskal sustatzaile berezi bat ezartzen da inbertsore txikiei zuzendutako epe luzerako aurrezki plana deritzon tresna berriaren alde. Hori horrela, salbuetsitzat hartzen dira aurrezki hori antolatzeko erabiltzen den gordailu kontuak edo bizi aseguruak sortutako errentak, baldin eta planean 5.000 euro baino gutxiago jartzen badira urtean, eta 5 urteko epean gutxienez.

Giza baliabideen plan estrategikoak herri administrazioek giza baliabideen egitura arrazionalizatzeko bitarteko bat dira, eskura dituzten baliabideak beren behar objektiboetara egokitzeko, zerbitzu publikoak eman eta horiei arreta eskaintzeko xedea betetze aldera. Hori horrela, Langileen Estatuan jasotako kaleratze kolektiboekin eta arrazoi objektiboek eragindako kaleratzeekin edo kargu uzteekin parekatzen dira herri administrazioek estatu horretako 51. artikuluan jasotako arrazoietako batean oinarrituta egiten dituzten giza baliabideen plan estrategikoak.

Jarduera ekonomikoen etekinen esparruan, gehitu egiten da Gizarte Segurantzako norberaren konturako langileen edo autonomoen araubide berezian sartu gabe dauden profesionalek gizarte aurreikuspeneko mutualitateei ordaindutako diru kopuruengatik jarduera ekonomikoetan kengarria den gastuaren muga. Aurrerantzean, gehieneko kopurua ez da izango 4.500 euro, baizik eta norberaren konturako langileen edo autonomoen araubide bereziko kontingentzia arruntengatik dagokion urte bakoitzeko gehieneko kuotaren 100eko 100 izango da.

Kapitalaren etekinei dagokienez, Pertsona Fisikoen Errentaren gaineko Zergaren 3/2014 Foru Arauaren hitzaurrean parekatu egin ziren etxebizitzen azpierrentamenduaren tratamendua eta etxebizitzen errentamenduak duena, eta, horretarako, 1994ko azaroaren 24ko 29/1994 Legeko 2. artikuluan xedatutakoaren arabera jotzen dira halakotzat. Bada, orain, muga bat ezarriko zaie gastu kengarriei, hain zuzen, azpierrentamendutik datozen etekinen 100eko 20, eta, horrela, mugatu egingo da etekin negatiboa edo zero etekina sortzeko zegoen aukera, kasu batzuetan fiktizioa ere bazena. Izan ere, errealitate ekonomikoak erakutsi du muga hori ez datorrela bat azpierrentatzaileak benetan aurre egin behar dion gastuarekin, eta, horregatik, doikuntzak egiten dira gastu kengarrietan.

Kapital higigarriaren etekinaren esparruan, berrikusi egiten da negoziaziora onartu gabeko baloreen akzioen jaulkipen primaren banaketak duten tratamendu fiskala. Izan ere, lortu nahi da antzeko tributazioa izan dezatela, batetik, partaidetza eduki den denboran entitateak sortutako erreserbei prima horietan dagokien zatiak eta, bestetik, erreserba horien zuzeneko banaketak.

Zuzendu egiten da euskarazko testuan jasotako 34. artikuluaren b) letraren edukia. Gaztelaniazko bertsioa da zuzena, eta horretara egokitzen da euskarazko bertsioa.

Kapital geroratuko aseguru kontratuetatik datorren etekinaren zehaztapenean, xehetasun bat sartzen da, alegia, kontratuan biziraupen kontingentzia eta heriotza edo ezintasun kontingentziak konbinatzen badira eta jasotako kapitala biziraupen kontingentziari badagokio, etekina zehazteko, jasotako kapitalaren eta ordaindutako primen arteko diferentzia kontuan hartu ez ezik, kendu ere egingo da momentura arte kontsumitu den heriotza edo ezintasunagatiko arriskuko kapitalari ordaindutako primetan dagokion zatia, baldin eta kontratuaren indarraldi osoan arriskuko kapitala hornidura matematikoaren 100eko 5 edo txikiagoa bada.

Ondare irabazi eta galeren esparruan, sartu egiten dira doikuntza tekniko jakin batzuk eta erreferentzia terminologikoen doikuntza jakin batzuk. Gainera, aldatu egiten da kapital sozialaren murriztapenen tratamendua, murriztapen horiek negoziaziora onartu gabeko baloreei dagozkien banatu gabeko mozkinetatik ez datozen ekarpenak itzuliz egiten direnean. Kasu horietan, kapital higigarriaren etekintzat hartuko da lortutako zenbatekoa edo jasotako ondasun edo eskubideen merkatu balioa. Eta muga izango da murriztapena egin aurretik itxitako azken ekitaldiari dagokion akzio edo partaidetzen funts propioen balioaren eta horien eskurapen balioaren arteko diferentzia positiboa. Muga horren gaineko soberakinak akzio edo partaidetzen eskurapen balioa gutxituko du.

Nazioarteko gardentasun fiskalaren araubidean errentak egozteari dagokionez, indartu egin dira araubide hori eta pertsona juridikoen tributazioari dagokionez ezartzen dena modu koordinatuan aplikatzeko baldintzak, Ekonomia Lankidetza eta Garapenerako Antolakundeak (ELGA) egindako azken lanei jarraituz. Denboraren araberako egozpenari buruzko irizpidea edozein diru laguntza publiko lortzearen ondoriozko ondare irabaziari dagokionez zehazten da.

Gizarte Segurantzaren esparruan, doikuntza jakin batzuk sartzen dira arauetara bidaltzean, eta zuzenketa teknikoak egiten dira.

Atxikipena egiteko betebeharrari eta betebehar formalak betetzeari dagokionez, aurreko erregulazioa egokitu egiten zaio Europar Batasuneko Justizia Auzitegiak C-678/11 gaian 2014ko abenduaren 11n emandako Epaiari. Izan ere, auzitegiak adierazi zuen Europako araudiaren kontrakoa zela honako hauek, ondorio fiskaletarako, ordezkari bat izendatu beharra Espainian: Espainiako lurraldean Espainiako legeriaren mende dauden enpleguko pentsio planak aurrera daramatzaten Europar Batasuneko beste estatu batean helbideratutako pentsio funtsek, batetik, eta Espainian zerbitzuak emateko askatasunez diharduten Europako esparru ekonomikoko beste estatu kide batean helbideratutako aseguru entitateek, bestetik. Gainera, informazioa emateko betebehar berriak ezartzen dira sortzen diren aurreikuspen produktu berrientzat. Era berean, informazio betebeharrak ezartzen dira epe luzeko aurrezpen planak merkaturatzen dituzten entitateentzat.

Oro bat, eta konturako ordainketei dagokienez, erregela argigarriak sartzen dira oker egin diren edo oraindik ordaindu gabe dauden atxikipenen eta konturako sarreren konputuari buruz.

Azkenik, eta sozietate zibilei dagokienez, Sozietateen gaineko Zergaren azaroaren 27ko 27/2014 Legeak zerga horren zergaduntzat jotzen ditu, 2016ko urtarrilaren 1etik aurrera, merkataritzako xedea duten sozietate zibilak. Hurrenez hurren, egokitu da 2006ko azaroaren 28ko 35/2006 Legea, Pertsona Fisikoen Errentaren gaineko Zergari eta Sozietateen gaineko Zergari, Ez-egoiliarren Errentaren gaineko Zergari eta Ondarearen gaineko Zergari buruzko legeen alderdi batzuk aldatzen dituena. Hori horrela, foru arau honetan adierazten da egun hartatik aurrera sozietate zibil horietako bazkideei ez zaiela aplikatuko errentak esleitzeko araubidea; horrela, lerrokatu egiten da tributu bien erregulazioa. Kontuan hartu arren Gipuzkoako araudiak ez duela aldatzen merkataritzako xedea duten sozietate zibilen tributu tratamendua eta, beraz, haien errentek berdin jarraitzen dutela errentak esleitzeko araubidearen pean, ezin da saihestu Gipuzkoako zergadunetako batzuk –pertsona fisikoak edo juridikoak– Sozietateen gaineko Zergaren Legearen pean dauden sozietate zibiletako bazkideak izan daitezkeenik. Horrenbestez, foru arau honek zehazten du zergadun horiek zer tributazio araubide aplikatu beharko duten pertsona fisikoen errentaren gaineko zergari eta sozietateen gaineko zergari dagokienez, eta errentak esleitzeko araubidea aplikatzetik salbuesten ditu; aldi berean, tributu tratamendu berezia ezartzen du halako zergadunek sozietate zibilak lortutako errenta positiboa egozteko, eta tratamendu horrek berariazko mekanismoak ditu zergadunok izan lezaketen zergapetze bikoitza saihesteko. Honela, lortu nahi da aipatutako bazkideen zergapetze baldintzak lurralde erkidean sozietate zibilen araubidea aldatu aurretik ziren berberak izatea.

Sozietateen gaineko zergan sozietate zibilei buruz adierazitakoaz gain, zerga horretan sartzen dira aldatu diren edo xedapen berriez ordezkatuta dauden antolamendu juridikoko beste esparru batzuetan xedapenetara zuzen bidaltzea helburu duten aldaketa jakin batzuk. Bestetik, pertsona fisikoen errentaren gaineko zergan gertatu den bezala, sartutako aldaketen artetik batzuek 2016ko urtarrilaren 1etik aurrera hasitako zergaldietarako ondorioak dituzte eta beste batzuek, aldiz, 2017ko urtarrilaren 1etik aurrerako zergaldietarako ondorioak.

Sartutako aldaketen artean, nabarmentzekoa da Kontu Auditoretzari buruzko ekainaren 20ko 22/2015 Legeak aldatu egin zuela, 2016ko urtarrilaren 1etik hasitako ekitaldietarako, aktibo ukiezinen eta merkataritza funts esplizituaren tratamendua. Izan ere, aktibo ez-materialak, merkataritza funtsa barne, amortizagarriak izango dira, eta, ondorioz, Kontabilitatearen 2008ko erreformaren aurreko erregulaziora itzuliko da. Gainera, kontabilitatean aitortutako ibilgetu ukiezinak kategoria bakarrekoak izango dira: balio bizitza definitukoak izango dira. Hori dela eta, foru arau honek lege horrek eragindako erreformara egokitzen du halako aktiboen tratamendu fiskala, baina tratamendu fiskal foral berezia mantentzen du lurralde erkideko sozietateen gaineko zergan indarrean dagoen araudiarekin alderatuta, bai merkataritza funts finantzarioarentzat bai merkataritza funts esplizituarentzat.

Eragiketa lotuen tratamendu fiskala elementu garrantzitsua da nazioartean, eta haren azterketan ahalegin berezia egiten dute bai Europar Batasunak bai ELGAk. Horri lotuta, kontuan hartu behar da ELGAk transferentzia prezioen arloan emandako jarraibideekin zein Transferentzia Prezioen gaineko Europar Batasuneko Baterako Foroak egindako gomendioekin bat etorrita egin behar dela gai horri buruz Sozietateen gaineko Zergaren Foru Arauan jasotako manuen interpretazioa.

Horrenbestez, aldaketak sartzen dira lotura perimetroari dagokionez. Izan ere, agerian geratu da gero eta behar handiagoa dagoela murrizteko zer kasutan dagoen lotura bazkidearen eta sozietatearen artean; horrenbestez, partaidetzaren 100eko 25ean jarri da orain lotura hori.

Elkarri lotutako pertsona edo entitateen arteko dokumentazio betebeharrei dagokienez, foru arau honek jasotzen ditu ELGAren esparruan elkarri lotutako entitate eta eragiketei buruzko informazioaren eta dokumentazioaren inguruan hartzen ari diren konklusioak.

Bestalde, eragiketak balioztatzeko metodologiari berari dagokionez eta osatzearren zergari buruzko araudian eragiketa lotuen merkatu balioa zehazteko jasotzen diren metodoak, espresuki jasotzen da jadanik modu subsidiarioan aplikatzen ari den kasu bat, erregulazio aplikagarria argitzeko asmoz foru arauan sartuta dagoena. Era berean, gehieneko muga ezartzen zaie dokumentazio obligazioak ez betetzeagatik ezartzekoak diren zehapenei, baloraziozko zuzenketarik egin beharrik gabe.

Berrikuntza moduan, kenkari bat sartzen da beste zergadun batzuek ikerketari, garapenari edo berrikuntza teknologikoari lotuta egindako proiektuen finantzaketan parte hartzen duten zergaren zergadunentzat, baldin eta horiek betetzen badituzte zergaren foru arauaren 62.etik 64.era bitarteko artikuluetan finkatutako kenkarietarako eskubidea sortzeko bertan jasotako beharkizunak. Kenkari horiek bateraezinak izango dira, erabat edo partzialki, aipatutako xedapenetan jasotakoa aplikatuz beste zergadun haiek eskubidezkoak lituzketen kenkariekin; eta kenkariaren errentagarritasun efektu finantzario-fiskalak mugatuko dira. Zentzu horretan, nabarmentzekoa da, proiektua egiten duten zergadunek ez bezala, haren finantzaketan parte hartzen duten zergadunek kontuan hartu beharko dituztela, kenkariaren aplikazioaren ondorioetarako, zergaren foru arauaren 59.3 artikuluan jasotako gutxieneko tributazioko erregela eta foru arau horren 67.1 artikuluan zehaztutako baterako muga.

Sozietateen gaineko zergaren inguruko beste berritasunetako baten jatorrian, inbertsore batzuek lortzen dituzten errentagarritasun finantzario-fiskal bidegabeak daude. Ondorioz, –ekonomia intereseko taldeen bidez– egitura fiskal jakin batzuen aplikazioan gertatzen diren gehiegikeriak saihestearren, muga bat jartzen da zerga oinarri negatiboak zein kuotako kenkariak egozteko, bazkideek ekonomia intereseko taldeei egindako ekarpenak –kontabilitateko irizpideak aplikatuta– ezaugarri bereziak dituzten ondare tresna gisa kalifikatu behar direnean. Zerga oinarri negatiboak eta kenkariak egozteko muga hori berdin aplikatuko zaie Gipuzkoako lurralde historikoko foru araudiaren pean ez dauden ekonomia intereseko taldeetako bazkideei ere, eta, hala, parekatu egingo da lurralde historiko honetako araudiaren peko zergadun guztiek jasotzen duten tratamendua. Gainera, aurrekoa osatzeko, errenta finantzario-fiskal hori bazkideei egozteko erregelak ezartzen dira.

Nabarmentzekoak dira balorazio erregelei eta abusuaren aurkako neurriei dagokienez sartutako aldaketak, bai eta denboraren araberako egozpenari eta kontabilitate inskripzioari buruzko erregelei dagokienez sartutakoak ere. Horiek guztiak Konkurtso arloko presazko neurriei buruzko irailaren 5eko 11/2014 Errege Lege Dekretuak Konkurtso Legean sartutako aldaketek eragindakoak dira.

Sozietateen gaineko zergaren beste tratamendu tributario batzuk ere aldatu dira. Izan ere, besteak beste, doikuntzak sartzen dira zergapetze bikoitza deuseztatzean edo mikroenpresetarako 100eko 20ko forfaita zerga araubide berezi batzuei dagokienez aplikatzean; edo gastu kenkagarritzat hartzen dira zerga arloko berandutze interesak.

Azkenik, pertsona fisikoen errentaren gaineko zergaren araudian egin den bezala, erregela argigarriak sartzen dira oker egin diren edo ordaindu ez diren atxikipenen eta konturako sarreren konputuari buruz.

Oinordetza eta dohaintzen gaineko zergaren esparruan, deuseztatu egiten da gerorapen kasu bat, alegia, jabetza soileko herentzia edo legatu batetik ateratzen diren kuoten ordainketa jabaria kontsolidatu arte geroratzeko aukera ematen zuena. Izan ere, uste da zerga-bilketari buruzko araudiak erantzun nahikoa ematen diela horrelako kasuei.

Eskualdaketen eta egintza juridiko dokumentatuen gaineko zergaren kasuan, Lan sozietateei eta sozietate partaidetuei buruzko urriaren 14ko 44/2015 Legeak ezartzen du onura fiskal bakar bat izango dutela lege horren arabera lan sozietate gisa kalifikatutako sozietateek, alegia, 100eko 99ko hobaria izango dute kostu bidezko ondare eskualdaketak direla-eta sortzen diren kuotetan, baldin eta lan sozietateko bazkide langile gehienen sorburu den enpresaren ondasunak eta eskubideak eskuratzen badituzte. Gure inguruko araudiarekin koherentziaz jokatze aldera, komenigarria da pizgarri hori sartzea, antzeko moduan, Ondare Eskualdaketen eta Egintza Juridiko Dokumentatuen gaineko Zergaren Foru Arauan.

Jarduera ekonomikoen gaineko zergari dagokionez, zehaztapen tekniko jakin batzuk sartzen dira, jarduera baten ariketa hasteagatik ezarritako salbuespena lehendabiziko bi zergaldietan aplikatzeari dagokionez.

Bai kooperatiben zerga araubidean bai irabazi asmorik gabeko entitateen eta mezenasgoaren aldeko zerga pizgarrien araubide fiskalean, osatu egiten da zerga pizgarrien erregulazioa, sozietateen gaineko zergaren autolikidazioa aurkeztean egin behar diren aukeren araubidera egokitzearren –Sozietateen gaineko Zergaren Foru Arauan ezartzen da–.

Gainera, eguneratu egiten da 5/2011 Foru Arauan lehentasunezko partaidetzentzat araututako zerga araubidea, Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeak ekarritako aldaketen ondorioz. Horrela, zabaldu egiten da zerga araubide hori aplikatu dezaketen jaulkitzaileen sorta, eta zehaztasun tekniko garrantzitsuak egiten dira; azken horien artean, nabarmentzekoa da definitu egiten dela baloreek zer merkatutan kotizatu behar duten zerga araubide hori aplikatu ahal izateko. Bada, jaulkitzaileen eremu subjektiboa zabaltzearen ondorioz, Espainiako egoiliarrak diren sozietateek eta Espainiako entitate publiko enpresarialek jaulkitako zor tresnek aplikatu ahal izango dute zerga araubide hori.

1. artikulua.– Aldatzea pertsona fisikoen errentaren gaineko zerga.

Lehenengoa.– 2016ko urtarrilaren 1etik aurrerako ondorioekin, aldatu egiten dira Gipuzkoako Lurralde Historikoko Pertsona Fisikoen Errentaren gaineko Zergaren urtarrilaren 17ko 3/2014 Foru Arauaren xedapen hauek:

Bat.– Honela idatzita gelditzen da 9. artikuluaren 5. zenbakia:

«5.– Langilea kaleratu edo kargugabetzeagatik ematen diren kalte-ordainak, Langileen Estatutuan, bere erregelamenduzko garapenean edo, halakorik balego, epaiak betearazteko araudian nahitaezko izaeraz ezarritako zenbatekoan. Ezin izango da halakotzat hartu hitzarmen, itun edo kontratu bidez ezarritakoa. Era berean, Euskadiko Kooperatibei buruzko ekainaren 24ko 4/1993 Legeak 103.2 artikuluan xedatutakoaren aplikazioz, kooperatiban baja hartzeagatik bazkideak jasotzen dituen kalte-ordainak ere salbuetsita egongo dira, lan araudiak Langileen Estatutuko 52. artikuluaren c) letran aipatzen den kargugabetze kasuetarako nahitaezko izaeraz ezartzen duen zenbatekoan.

Aurreko paragrafoan xedatutakoa eragotzi gabe, Langileen Estatutuaren 51. artikuluan xedatutakoaren arabera egiten diren kaleratze kolektiboen kasuan edo aipaturiko estatutuaren 52. artikuluaren c) letran aurreikusitako arrazoiak direla medio amaitutako kontratuetan, betiere bai kasu batean bai bestean arrazoiak ekonomikoak, teknikoak, antolaketakoak, produkziokoak edo halabeharrezkoak badira, edo sektore publikoko lan arloko langileei dagokionez Estatutuak hogeigarren xedapen gehigarrian aurreikusitako kaleratzeetan, jasotako kalte-ordaina salbuetsita geratuko da estatutu horretan bidegabeko kaleratzeetarako zehaztutako nahitaezko mugak gainditzen ez dituen zatian. Ordezkapen kontratu baten indarrez lan harremana deuseztatu eta jarduera laborala lehenago uzteagatik langileek jasotzen dituzten kopuruak ere muga horiekin egongo dira salbuetsita.

Zenbaki honetan xedatutakoaren ondorioetarako, herri administrazioek Langileen Estatutuko 51. artikuluan ezarritako arrazoietako batean oinarrituta giza baliabideen arloan egiten dituzten plan estrategikoak parekatuta egongo dira aurreko paragrafoan adierazitako kaleratze kolektiboekin eta arrazoi objektiboetan oinarritutako kaleratze edo kargugabetzeekin.

Aurreko paragrafoetan aurreikusitako edozein kasutan salbuetsitako gehienezko kopurua ez da 180.000 euro baino gehiago izango. Muga hori bakarra izango da kaleratze edo kargugabetze bakoitzeko, edozein dela ere kalte-ordaina ordaintzeko modua.»

Bi.– Honela idatzita gelditzen da 9. artikuluaren 9. zenbakia:

«9.– Beka publikoak, irabazi asmorik gabeko entitateek emandako bekak eta Aurrezki kutxei eta banku fundazioei buruzko abenduaren 27ko 26/2013 Legeko II. tituluan arautzen diren banku fundazioek beren gizarte ekintzaren barruan emandako bekak, betiere Espainian nahiz atzerrian hezkuntza sistemaren maila eta gradu guztietan (unibertsitateko hirugarren zikloraino) ikasketak egiteko jasotzen badira. Irabazi asmorik gabeko entitateen kasuan, baina, haien bekak salbuetsita daude irabazi asmorik gabeko entitateen zerga araubideari eta mezenasgorako zerga pizgarriei buruzko araudia aplikagarri zaienean.

Honako hauek ere salbuetsita egongo dira: batetik, aurreko paragrafoan aipatutako irabazi asmorik gabeko entitateek eta banku fundazioek 2006ko urtarrilaren 27ko 63/2006 Errege Dekretuak definitzen duen alorreko ikerketetarako emandako bekak (errege dekretu horrek Ikertzaile bekadunaren Estatutua onartzen du); bestetik, entitate eta fundazio horiek administrazio publikoetako funtzionarioei eta gainerako langileei nahiz unibertsitateetako irakasle eta ikertzaileei ikerketak egiteko emandakoak.»

Hiru.– Honela idatzita gelditzen da 9. artikuluaren 12. zenbakiko lehen paragrafoa:

«12.– 2015eko urriaren 30eko 8/2015 Legegintzako Errege Dekretuak, Gizarte Segurantzari buruzko Lege Orokorraren testu bategina onartzen duenak, II. tituluko X. eta XV. kapituluetan eta VI. tituluko I. kapituluan arautzen dituen familia prestazioak, eta Gizarte Segurantzaren eta klase pasiboen araubide publikoetatik jasotzen diren zurztasun pentsioak nahiz hartzeko pasiboak, eta hogeita bi urtetik beherako biloben eta anai-arreben alde edo lan orotarako desgaituen alde onartutakoak.»

Lau.– Honela idatzita gelditzen da 9. artikuluaren 13. zenbakiko bigarren paragrafoa:

«Zergaduna lan sozietateetan edo lan elkartuko kooperatibetan sarturik badago edo ekarpen bat egin badu merkataritzako entitate baten kapitalera, aurreko paragrafoan adierazi den salbuespena aplikatu ahal izateko, ezinbestekoa izango da akzioari edo partaidetzari bost urtez eustea. Langile autonomoen kasuan, salbuespena aplikatu ahal izateko nahitaezkoa izango dute bost urteko epean ere jarduerarekin jarraitzea. Ez da beharrezkoa izango akzioari edo partaidetzari bost urtez eustea, baldin eta ezin bazaio eutsi enpresa likidatu egin delako konkurtso prozedura baten ondorioz. Langile autonomoei ez zaie galdatuko epe hori betetzea, baldin eta epeari ezin bazaio eutsi Gizarte Segurantzaren Lege Orokorraren testu bategineko 331. artikuluko 1. apartatuko a) letrako 1. eta 3. zenbakietan zehazten diren inguruabarren ondorioz (testu bategin hori 2015eko urriaren 30eko 8/2015 Legegintzako Errege Dekretuaren bidez onetsi zen). Erregelamendu bidez zehaztuko da zergadunak zer justifikazio dokumental aurkeztu behar duen ez-betetzearen arrazoiak justifikatzeko, eta, bereziki, zehaztuko da kontabilitateko zer agiri aurkeztu behar diren 331. artikuluko 1. apartatuko a) letrako 1. zenbakian eskatzen den galera maila justifikatzeko.»

Bost.– 9. artikuluaren 33. zenbakia gehitzen da. Hona hemen horren edukia:

«33.– Gipuzkoako Foru Aldundiak baimendutako eskola kiroleko programa edo eskola adineko kirolarientzako jarduerak egitean edo lurraldeko kirol federazioen jarduerak egitean begirale, arbitro, epaile, ordezkari, kirol arduradun, federazio zuzendari tekniko edo entrenatzaile eginkizunak betetzeagatik jasotako etekinak, betiere lanbide arteko gutxieneko soldataren mugapean.»

Sei.– Honela idatzita gelditzen da 11. artikuluko 1. apartatua:

«1.– Sozietate zibilen –nortasun juridikoa izan ala ez–, banatu gabeko herentzien, ondasun erkidegoen eta Gipuzkoako Lurralde Historikoko Zergen Foru Arau Orokorrak 35. artikuluaren 3. apartatuan jasotako gainerako entitateen errentak bazkide, oinordeko, erkide edo partaideei esleituko zaizkie, hurrenez hurren, foru arau honetako IV. tituluko VI. kapituluaren 2. sekzioan ezarritakoari jarraikiz.

Apartatu honetan ezarritakoa ez zaie aplikatuko foru arau honetako hogeita hamahirugarren xedapen gehigarrian aipatzen diren sozietate zibiletako bazkideei.»

Zazpi.– Honela idatzita gelditzen da 18.a).3 artikuluaren b) letra:

«b) Pentsio planen onuradunek jasotako prestazioak, barruan sartuta, baita ere, 2002ko azaroaren 29ko 1/2002 Legegintzako Errege Dekretuak onartutako Pentsio Plan eta Funtsei buruzko Legearen testu bateginaren 8. artikuluko 8. apartatuan jasotako kasuetan modu aurreratuan erabilitako kopuruak, eta Europako Parlamentuak eta bertako Kontseiluak 2003ko ekainaren 3an enpleguko pentsio funtsen jarduerei eta ikuskapenari buruz emandako 2003/41/EE Zuzentarauan araututako pentsio planetatik jasotakoak.»

Zortzi.– Honela idatzita gelditzen da 18.a) artikuluaren 7. zenbakia:

«7.– Aurreikuspen plan aseguratuen onuradunek jasotako prestazioak, barruan sartuta, baita ere, 2002ko azaroaren 29ko 1/2002 Legegintzako Errege Dekretuak onartutako Pentsio Plan eta Funtsei buruzko Legearen testu bateginaren 8. artikuluko 8. apartatuan jasotako kasuetan modu aurreratuan erabilitako kopuruak.»

Bederatzi.– Honela idatzita gelditzen da 19.2 artikuluaren b) letrako hirugarren paragrafoa:

«Apartatu honetan finkatutako tratamendua aplikatuko zaie 2002ko azaroaren 29ko 1/2002 Legegintzako Errege Dekretuak onartutako Pentsio Plan eta Funtsei buruzko Legearen testu bateginaren 8. artikuluko 8. apartatuan jasotako kasuetan modu aurreratuan erabilitako kopuruei ere.»

Hamar.– Honela idatzita gelditzen da 27. artikuluko 1. erregela:

«1.– Sozietateen gaineko Zergaren Foru Arauak 31. artikuluaren 5. apartatuan aipatzen dituen kontzeptuak eta enpresari edo profesionalak berak gizarte aurreikuspeneko mutualitateei egindako ekarpenak ez dira gastu kengarriak izango, foru arau honetako 70. artikuluan jasotakoa eragotzi gabe.

Hala ere, norberaren konturako langileen edo autonomoen Gizarte Segurantzako araubide berezian sartu gabeko profesionalek diru kopuruak ordaintzen dituztenean gizarte aurreikuspeneko mutualitateekin sinatutako aseguru kontratuengatik, ordaindutako kopuru horiek gastu kengarritzat joko dira, Gizarte Segurantzak estaltzen dituen kontingentziak hartzen dituen zatian, baldin eta, Aseguru Pribatuen Antolamendu eta Ikuskapenari buruzko azaroaren 8ko 30/1995 Legeak hamabosgarren xedapen gehigarrian aurreikusitako obligazioa betetzeko, mutualitate horiek Gizarte Segurantzako araubide bereziaren ordez aritzen badira, araubide berezi horrek estaltzen dituen gorabeherak hartzen dituen zatian. Araubide berezi horretan kontingentzia arruntengatik ekitaldi ekonomiko bakoitzerako ezarrita dagoen gehieneko kuota izango da muga.»

Hamaika.– Honela idatzita gelditzen da 34. artikuluaren b) letraren euskarazko testua:

«b) Mota guztietako aktiboetatik datozen etekinak ––salbu akzio liberatuen entrega–, baldin eta haiek ahalmena ematen badute, estatutuen arabera edo sozietateko organoen erabakiz, entitate baten mozkinetan, salmentetan, eragiketetan, diru sarreretan edo antzeko kontzeptuetan parte hartzeko, lan pertsonalaren ordainketarekin zerikusirik ez duten arrazoiengatik.»

Hamabi.– Honela idatzita gelditzen da 39.2. artikuluaren hirugarren paragrafoa:

«Apartatu honetako lehenengo paragrafoan xedatutakoa xedatuta ere, Hiri Errentamenduei buruzko azaroaren 24ko 29/1994 Legearen 2. artikuluan aipatzen diren etxebizitzen azpierrentamendutik datozen etekinak direnean, etekin garbia lortzeko soilik izango da kengarria azpierrentatzaileak errentamendu gisa ordaindutako zenbatekotik azpierrentan hartutako elementuari dagokion parte proportzionala, eta, gainera, 100eko 20ko hobaria aplikatuko zaio azpierrentan emandako higiezin bakoitzeko lortutako etekin osoen eta gastu kengarri gisa konputatuko zenbatekoaren arteko diferentziari.»

Hamahiru.– Honela idatzita gelditzen da 41. artikuluko 1. apartatua:

«1.– Honako kasu hauetan, ondarearen osaera ez dela aldatzen ulertuko da, baldin eta ez bada gertatzen adjudikazio soberakinik:

a) Gauza erkidea zatikatzen denean.

b) Irabazpidezko ondasunen sozietatea edo ezkontzaren partaidetza araubide ekonomikoa azkentzen denean, edo izatezko bikote baten ondare araubide ekonomikoa azkentzen denean, baldin eta aurreko ondare araubide ekonomikoetako bat itundu badute.

c) Ondasun erkidegoak desegitean edo erkideak banantzen direnean.

Apartatu honetan aipatzen diren kasuek ezingo dute inola ere ekarri jasotako ondasunen edo eskubideen balioak eguneratzea.»

Hamalau.– Honela idatzita gelditzen dira 47.1 artikuluaren b) letra eta d) letrako lehendabiziko bi paragrafoak:

«Benetan ordaindutako zenbatekoa alderdi independenteek merkatuko baldintza arruntetan hitzartuko luketenarekin bat datorrela frogatu ezean, eskualdaketa balioak ezingo du honako bi hauetako handiena baino txikiagoa izan:

– Eskualdatutako baloreei dagokien ondare garbiaren balioa, zergaren sortzapen data baino lehen itxitako azken ekitaldiko balantzetik ateratakoa.

– Zergaren sortzapen eguna baino lehen itxi diren hiru ekitaldi sozialetako mozkinen batez bestekoa 100eko 20an kapitalizatzetik ateratzen den balioa. Azken ondorio horretarako, banatutako dibidenduak eta erreserbetarako esleipenak mozkin gisa konputatuko dira, balantzeak erregularizatu edo eguneratzekoak kanpoan utzita.»

«Balioa aldatzen bada inbertsio kolektiboko erakundeen kapital edo ondarearen akzio edo partaidetzen kostu bidezko eskualdaketa edo itzulketagatik, akzio partaidetzon eskurapen balioaren eta eskualdaketa balioaren arteko diferentzia izango da eragiketa horretako irabazia edo galera. Eskualdaketa balioa eskualdaketa edo itzulketa egiten den egunean aplikagarria den likidazio balioak emango du, edo, halakorik ezean, argitaratutako azken likidazio balioak. Likidazio baliorik ez badago, eskualdatutako baloreei edo partaidetzei dagokien ondare garbiaren balioa hartuko da, zergaren sortzapen data baino lehen itxitako azken ekitaldiko balantzetik ateratakoa.

Partaidetzak berreskuratzea ez den kasuetan, horrela kalkulatutako eskualdaketa balioa ezingo da izan ondoko bi hauetako handiena baino txikiagoa:

– Eskualdaketan benetan itundutako prezioa.

– Europako Parlamentuak eta Kontseiluak 2004ko apirilaren 21ean emandako 2004/39/EE Zuzentarauan –finantza tresnen merkatuari buruzkoan– definitutako bigarren mailako balore merkatu ofizialetako kotizazio balioa eta, bereziki, 2015eko urriaren 23ko 4/2015 Legegintzako Errege Dekretuaren bidez onartutako Balore Merkatuari buruzko Legearen testu bategineko 43. artikuluko 4. apartatuan aurreikusitakoarekin bat etorriz baimendutako baloreen negoziaziorako sistema antolatuetako kotizazio balioa, eskualdaketaren datan.»

Hamabost.– Hirugarren paragrafo bat eransten zaio 53. artikuluari. Hona hemen haren edukia:

«Sekzio honetan ezarritakoa ez zaie aplikatuko foru arau honetako hogeita hamahirugarren xedapen gehigarrian aipatzen diren sozietate zibiletako bazkideei.»

Hamasei.– Honela idatzita gelditzen dira 57.2.h) artikuluaren B) letrako bigarren apartatuko 2. eta 3. beharkizunak:

«2.– Hornidura horiek, hain zuzen, hornidura teknikoak inbertitzeko gai diren aktiboetan inbertitu behar dira, alegia, Aseguru eta berraseguru erakundeen antolamendu, ikuskapen eta kaudimenari buruzko azaroaren 20ko 1060/2015 Errege Dekretuan bildutakoetan; baina salbuespen dira ondasun higiezinak eta higiezinen gaineko eskubide errealak.

3.– Aktibo multzo bakoitzeko inbertsioek bete egin behar dituzte dibertsifikazioa eta barreiadura direla-eta aseguru kontratuetarako ezarritako mugak; oro har, honako hauetan ezartzen dira muga horiek: Aseguru eta berraseguru erakundeen antolamendu, ikuskapen eta kaudimenari buruzko uztailaren 14ko 20/2015 Legean, Aseguru eta berraseguru erakundeen antolamendu, ikuskapen eta kaudimenari buruzko azaroaren 20ko 1060/2015 Errege Dekretuan eta lege hura garatzeko ematen diren arau guztietan.

Dena den, aktibo multzoek baldintza horiek betetzen dituztela ulertu behar da, baldin eta haien helburua hau bada: Europar Batasuneko bigarren mailako balore merkatu ofizialetako baten adierazgarri den burtsako edo errenta finkoko indize jakin bat erreproduzitzera zuzenduta dagoen inbertsio politika bat garatzea.»

Hamazazpi.– Beste letra bat gehitzen zaio, k) letra, 57.2. artikuluari. Hona hemen haren edukia:

«k) Laguntza publikoen ondoriozko ondare irabaziak kobratzen diren zergaldian egotziko dira.»

Hamazortzi.– Honela idatzita gelditzen da 70.1.5) artikuluaren e) letra:

«e) Erregelamendu bidez ezarriko dira hornidura matematikoa beste aurreikuspen plan aseguratu batera aldatzeko betekizunak eta baldintzak.

Foru arau honetan eta araua garatzeko arauetan berariaz erregulatuta ez dauden alderdietan, kontratu horien ekarpen, kontingentzia eta prestazioen araubidea pentsio planen araudi erregulatzailearen araberakoa izango da, salbu hornidura teknikoen alderdi finantzario eta aktuarialetan. Zehazki, aurreikuspen plan aseguratu batean jasotako eskubideak ezin izango dira enbargatu, ez eta epailearen edo Administrazioaren trabarik jaso ere, harik eta prestaziorako eskubidea sortu arte edo gaixotasun larria edo iraupen luzeko langabezia gertatzean edo gutxienez hamar urteko antzinatasuna duten prima ordainduei egokitzeagatik haiek erabilgarriak izan arte.»

Hemeretzi.– Honela idatzita gelditzen da 70.6 artikuluaren lehen paragrafoa:

«Halaber, gizarte aurreikuspeneko sistemei egindako ekarpen eta kontribuzioei dagokienez (aurreko 1. apartatuan aipatzen dira), halakoak egiten diren ekitaldi berean kapital moduan jasotako prestazioak jasotzen badira erretiroagatik edo estalitako kontingentziak baino beste arrazoi batzuengatik edo 1/2002 Legegintzako Errege Dekretuaren bidez onartutako Pentsio Plan eta Funtsei buruzko Legearen testu bateginak 8. artikuluko 8. apartatuan aipatzen dituen egoerengatik baino beste arrazoi batzuengatik –8. apartatu horren bigarren paragrafoan jasotako kasua salbuetsita–, bada, orduan, murriztapenean muga izango dute ekitaldian egindako ekarpenek; hain zuzen, ekitaldiko zerga oinarrian benetan integratutako pertzepzioen zenbatekoa izango da muga hori.»

Hogei.– Honela idatzita gelditzen da 89. bis.2 artikuluaren a) letra:

«a) Batetik, sozietate anonimo, erantzukizun mugatuko sozietate, lan sozietate anonimo edo erantzukizun mugatuko lan sozietate anonimoaren forma izan behar dute, Kapital Sozietateen Legearen testu bateginean (2010eko uztailaren 2ko 1/2010 Legegintzako Errege Dekretuaren bidez onartu zen) eta Lan sozietateei eta partaidetutako sozietateei buruzko urriaren 14ko 44/2015 Legean ezarritako moduan, eta, bestetik, ezin egongo dira negoziatzeko onartuta ezein merkatu antolatutan. Baldintza hori nahitaez bete behar da akzioa edo partaidetza edukitzen den urte guztietan.»

Hogeita bat.– Honela idatzita gelditzen dira 115. artikuluaren f) eta g) letrak:

«f) Espainian zerbitzuak libre emateko araubidean diharduten Europako esparru ekonomikoko beste estatu kide batean helbideratutako aseguru entitateei, Espainian egiten diren eragiketei dagokienez.

g) Foru arau honetako 106. artikuluko 1. apartatuko c) letrako azken aurreko paragrafoan jasota dauden entitateei, Espainian egiten diren eragiketei dagokienez.»

Hogeita bi.– Hogeita hamahirugarren xedapen gehigarria eransten da. Hona hemen bere edukia:

«Hogeita hamahirugarren xedapen gehigarria. Sozietateen gaineko zergari lotutako sozietate zibilak.

1.– Sozietateen egoitza fiskalari buruzko araudia dela-eta sozietateen gaineko zergaren zergadun diren sozietate zibiletako bazkideek beren pertsona fisikoen errentaren gaineko zergaren zerga oinarriaren barruan sartu beharko dute sozietate zibilak lortutako errenta positiboa, bakoitzari dagokion proportzioan, eta erregela hauek aplikatuko zaizkie:

a) Errenta positibo hori beren zerga oinarrian sartuko dute, hain zuzen, sozietate zibilak bere ekitaldi soziala bukatzen duen egunaren ostean amaitzen den zergaldian.

b) Zerga oinarriaren barruan sartu beharreko errenta positiboaren zenbatekoa kalkulatzeko, zerga oinarria zehazteari buruz foru arau honetan bertan zein zerga honi buruzko beste xedapenetan ezarritako printzipio eta irizpideak jarraituko dira. Horretarako, errentatzat joko da, hain zuzen, irizpide eta printzipio horiek aplikatzetik ateratzen den zerga oinarriaren zenbatekoa.

c) Xedapen gehigarri honetan ezarritakoa aplikagarria zaien zergadunek zerga honen kuota osotik kendu ahal izango dituzte sozietateen gaineko zergaren antzeko edo pareko zerga edo kargengatik sozietate zibilak benetan ordaindutako zenbatekoak, zerga oinarrian sartutako errenta positiboari dagokion partean.

Letra honetan aipatutako kenkariak ezin du gainditu zerga oinarrian sartutako errenta dela-eta zerga honetan ordaindu beharreko kuota osoa, eta atzerrian ordaindutako zergak kenduz gero, kenkariaren zenbatekoa ezin da izan errenta Gipuzkoako lurralde historikoko sozietateen gaineko zergaren araudiaren menpean dagoen entitate batek ordainduz gero errenta hori dela-eta ordaindu beharreko kuota osoa baino gehiago.

2.– Xedapen gehigarri honetan jasotakoa aplikagarria zaien zergadunek, zerga honen aitorpenarekin batera, sozietate zibilari buruzko datu hauek aurkeztu behar dituzte:

a’) Izena edo sozietate izena, eta egoitza soziala.

b´) Administratzaileen zerrenda.

c’) Balantzea, eta galera-irabazien kontua.

d’) Sozietateen gaineko zergaren aitorpena, zerga oinarriaren barruan sartu beharreko errenta positiboaren zenbatekoa akreditatzen duena.

e’) Zerga oinarrian sartu beharreko errenta positiboari dagokionez ordaindutako zergen justifikazioa.

3.– Ez dira zerga oinarrian sartuko sozietate zibiletatik jasotako dibidenduak edo mozkinetako partaidetzak, ez eta sozietate horietako partaidetza eskualdatuz lortutako errentak ere, baldin eta errenta horiek zerga honen zerga oinarrian integratu badira xedapen gehigarri honetan ezarritakoa aplikatuz.

Tratamendu bera aplikatuko zaie konturako dibidenduei.

Errenta positibo bera behin bakarrik integratu daiteke, nola eta zer entitatetan sortzen den kontuan hartu gabe.»

Hogeita hiru.– Honela idatzita gelditzen da lehen xedapen iragankorraren bat apartatuko 1. erregelaren b) letra:

«b) Eskualdatutako ondare elementuak ondasun higiezinak, haien gaineko eskubideak edo 2015eko urriaren 23ko 4/2015 Legegintzako Errege Dekretuaren bidez onartutako Baloreen Merkatuari buruzko Legearen testu bategineko 314. artikuluan aipatutako entitateen baloreak badira –kanpoan utzita higiezinen merkatutan inbertitzeko sozietate edo funtsen kapital sozialaren edo ondarearen akzio edo partaidetzak–, murriztapena 100eko 11,11 izango da, aurreko letran adierazitako iraupen aldiko urte kopurua bi baino handiagoa den urte bakoitzeko.»

Hogeita lau.– Beste xedapen iragankor bat gehitzen da, hogeita hamaikagarrena. Hona hemen bere edukia:

«Hogeita hamaikagarren xedapen iragankorra. 2006ko azaroaren 28ko 35/2006 Legearen hemeretzigarren xedapen iragankorrean xedatutakoaren arabera desegin eta likidatutako sozietate zibiletako bazkideen araubidea (lege horrek pertsona fisikoen errentaren gaineko zerga arautzen du, eta sozietateen gaineko zergari, ez-egoiliarren errentaren gaineko zergari eta ondarearen gaineko zergari buruzko legeen alderdi batzuk aldatzen ditu).

2006ko azaroaren 28ko 35/2006 Legearen hemeretzigarren xedapen iragankorrean xedatutakoa aplikatu behar zaien sozietate zibiletako bazkide diren pertsona fisikoen errentaren gaineko zergaren, sozietateen gaineko zergaren eta ez-egoiliarren errentaren gaineko zergaren zergadunek xedapen iragankor horretako 2. apartatuko c) letran ezarritakoa aplikatuko dute (35/2006 Legeak pertsona fisikoen errentaren gaineko zerga arautzen du, eta sozietateen gaineko zergari, ez-egoiliarren errentaren gaineko zergari eta ondarearen gaineko zergari buruzko legeen alderdi batzuk aldatzen ditu).»

Bigarrena.– 2017ko urtarrilaren 1etik aurrerako ondorioekin, aldatu egiten dira Gipuzkoako Lurralde Historikoko Pertsona Fisikoen Errentaren gaineko Zergaren urtarrilaren 17ko 3/2014 Foru Arauaren xedapen hauek:

Bat.– 34. zenbaki bat gehitzen zaio 9. artikuluari da. Hona hemen haren edukia:

«34.– Foru arau honetako hogeita hamalaugarren xedapen gehigarrian aipatzen diren epe luzerako aurrezki planak eratzeko erabiltzen diren bizi aseguru, gordailu eta finantza kontratuetatik datozen kapital higigarriaren etekin positiboak, baldin eta zergadunak ez badu plan horretako kapitala erabiltzen hura irekitzen denetik bost urte igaro baino lehen.

Epe hori amaitu baino lehen erabiltzen bada kapitalen bat edo betetzen ez bada foru arau honetako hogeita hamalaugarren xedapen gehigarrian zehaztutako betekizunetako edozein, aurreko paragrafoan aipatzen diren etekinak, plana indarrean egon den bitartean sortuak, ez-betetzea gertatzen den ekitaldiko zergaldian hartu behar dira kontuan.»

Bi.– Honela idatzita gelditzen da 34. artikuluaren e) letra:

«e) Akzio edo partaidetzen jaulkipen primaren banaketa. Banaketatik lortutako zenbatekoak eragindako akzio edo partaidetzen eskurapen balioa gutxituko du, hori deuseztatu arte, eta handik atera daitekeen soberakina kapital higigarriaren etekin gisa zergapetuko da.

Aurreko paragrafoan ezarritakoa ezarrita ere, Europako Parlamentuak eta Kontseiluak 2004ko apirilaren 21ean emandako 2004/39/EE Zuzentarauan –finantza tresnen merkatuari buruzkoan– definitzen diren balore merkatu arautuetako batean negoziatzeko onartuta ez dauden eta sozietate edo entitateen funts propioetako partaidetza ordezkatzen duten baloreen jaulkipen prima banatzen bada eta akzio edo partaidetza horiei prima banatu aurretik itxitako azken ekitaldian dagozkien funts propioen balioaren eta haien eskurapen balioaren arteko diferentzia positiboa bada, lortutako zenbatekoa edo jasotako ondasun edo eskubideen merkatu balio normala kapital higigarriaren etekintzat hartuko da, diferentzia positibo horren mugarekin.

Ondorio horietarako, aurreko paragrafoan aipatzen diren funts propioen balioari kendu egingo zaizkio, batetik, jaulkipen prima banatu aurretik emandako etekinen zenbatekoa, funts propio horietan sartutako erreserbetatik badatoz, eta, bestetik, funts propio horietan sartutako erreserba legalki baliaezinen zenbatekoa, akzio edo partaidetzak eskuratu ostean sortuak badira.

Muga horretatik gorako soberakina akzio edo partaidetzen eskurapen balioa murrizteko erabiliko da, e) letra honetako lehenengo paragrafoan ezarritakoaren arabera.

Baldin eta e) letra honetako bigarren paragrafoan ezarritakoa aplikatuz jaulkipen primaren banaketak ekarri badu kapital higigarriaren etekin gisa zenbatzea lortutako zenbateko osoa edo zati bat edo jasotako ondasun edo eskubideen merkatu balio normal osoa edo zati bat eta, ondoren, zergadunak dibidenduak edo mozkinetako partaidetzak lortzen baditu –artikulu honetako a) letran ezarritakoaren arabera–, entitate beretik badatoz eta jaulkipen prima banatu zenetik zergadunaren ondarean egon diren akzio eta partaidetzei badagozkie, dibidenduen edo mozkinetako partaidetzen bidez lortutako zenbatekoak gutxitu egingo du haien eskurapen balioa, e) letra honetako lehenengo paragrafoan ezarritakoaren arabera, baina kontuan hartuta akzio edo partaidetza horiek direla-eta aurretik konputatu diren kapital higigarriaren etekinak.»

Hiru.– Honela idatzita gelditzen da 36.1 artikuluaren a) letra:

«a) Kapital geroratua jasotzen denean, jasotako kapitalaren eta ordaindutako primen arteko diferentzia izango da kapital higigarriaren etekina.

Aurretik jasotakoa jasota ere, aseguru kontratuak biziraupenaren kontingentzia, batetik, eta heriotza edo ezintasunaren kontingentziak, bestetik, konbinatzen baditu eta jasotako kapitala biziraupenaren kontingentziari badagokio, ordaindutako primetatik kendu egin ahal izango da ordura arte heriotzaren edo desgaitasunaren arriskua dela-eta kontsumitu den kapitalari dagokion zatia, betiere, kontratuaren indarraldi osoan, arriskuan dagoen kapitala hornidura matematikoaren ehuneko bost edo gutxiago bada. Ondorio horietarako, hau izango da arriskuan dagoen kapitala: heriotza edo ezintasunerako aseguratutako kapitala ken hornidura matematikoa.»

Lau.– Honela idatzita gelditzen da 41.2 artikuluaren a) letra:

«a) Kapital murriztapenetan. Kapital murriztapenak, edozein xede duela ere, balore edo partaidetzak amortizatzea dakarrenean, eskuratutako lehenak joko dira amortizatutzat, eta horien eskurapen balioa proportzionalki banatuko da zergadunaren ondarean segitzen duten gainontzeko balore homogeneoen artean. Kapital murriztapenak ez badie zergadunaren balore edo partaidetza guztiei maila berean eragiten, lehenengo eskuratutakoei dagokiela ulertuko da.

Kapital murriztapenaren helburua ekarpenen itzulketa denean, itzulketaren zenbatekoak edo jasotako ondasun edo eskubideen merkatuko balio normalak gutxitu egingo du ukitutako balore edo partaidetzen eskurapen balioa, aurreko paragrafoan ezarritako erregelei jarraikiz, balio hori deuseztatu arte. Soberakina badago, kapital higigarriaren etekin gisa integratuko da, eta edozein motatako entitateen funts propioetan parte hartzeagatik lortu dela joko da. Integrazioa jaulkipen primen banaketarako ezarritako eran egingo da, salbu eta kapital murriztapena banatu gabeko mozkinen ondorio denean, kontzeptu honengatik jasotzen diren kopuru guztiak foru arau honen 34. artikuluko a) letran xedatutakoaren arabera zergapetuko baitira orduan. Ondorio horietarako, iritziko da kapital murriztapenek, beren xedea zeinahi dela ere, banatu gabeko mozkinetatik ez datorren kapital sozialaren zatiari eragiten diotela lehenik, kapital soziala deuseztatu arte.

Aurreko paragrafoan ezarritakoa ezarrita ere, kapital murriztapenaren xedea ekarpenak itzultzea bada eta haren jatorria ez badago Europako Parlamentuak eta Kontseiluak 2004ko apirilaren 21ean emandako 2004/39/EE Zuzentarauan –finantza tresnen merkatuari buruzkoan– definitzen diren balore merkatu arautuetako batean negoziatzeko onartuta ez dauden eta sozietate edo entitateen funts propioetako partaidetza ordezkatzen duten baloreetan eta, gainera, akzio edo partaidetza horiei kapital murriztapena egin aurretik itxitako azken ekitaldian dagozkien funts propioen balioaren eta haien eskurapen balioaren arteko diferentzia positiboa bada, lortutako zenbatekoa edo jasotako ondasun edo eskubideen merkatu balio normala kapital higigarriaren etekintzat hartuko da, diferentzia positibo horren mugarekin.

Ondorio horietarako, aurreko paragrafoan aipatzen diren funts propioen balioari kendu egingo zaizkio, batetik, kapital murriztapena eta egin aurretik emandako etekinen zenbatekoa, funts propio horietan sartutako erreserbetatik badatoz, eta, bestetik, funts propio horietan sartutako erreserba legalki baliaezinen zenbatekoa, akzio edo partaidetzak eskuratu ostean sortuak badira.

Muga horretatik gorako soberakina akzio edo partaidetzen eskurapen balioa murrizteko erabiliko da, a) letra honetako bigarren paragrafoan ezarritakoaren arabera.

Baldin eta a) letra honetako hirugarren paragrafoan ezarritakoa aplikatuz kapital murriztapenak ekarri badu kapital higigarriaren etekin gisa zenbatzea lortutako zenbateko osoa edo zati bat edo jasotako ondasun edo eskubideen merkatu balio normal osoa edo zati bat eta, ondoren, zergadunak dibidenduak edo mozkinetako partaidetzak lortzen baditu –foru arau honetako 34. artikuluko a) letran ezarritakoaren arabera–, entitate beretik badatoz eta kapital murriztapena egin zenetik zergadunaren ondarean egon diren akzio eta partaidetzei badagozkie, dibidenduen edo mozkinetako partaidetzen bidez lortutako zenbatekoak gutxitu egingo du haien eskurapen balioa, a) letra honetako bigarren paragrafoan ezarritakoaren arabera, baina kontuan hartuta akzio edo partaidetza horiek direla-eta aurretik konputatu diren kapital higigarriaren etekinak.»

Bost.– Aldatu egiten dira 51. artikuluaren 2. eta 3. apartatuak, eta hari 14. apartatu berri bat gehitzen zaio:

«2.– Egoitza Espainiako lurraldean ez duen entitate batek lortutako errenta positibo osoa zergadunei egotziko zaie, baldin eta entitate horrek ez badu errenta hori gauzatzeko baliabide materialen eta giza baliabideen antolaketa egokirik, nahiz eta eragiketa errepikariak izan. Nolanahi ere, dibidenduen, mozkinetako partaidetzen edo entitateen partaidetzak eskualdatuta lortzen diren errenten kasuan, zenbaki honen azken hiru paragrafoetan ezarritakoa beteko da beti.

Errenta osoa izango da, hain zuzen, Sozietateen gaineko Zergaren Foru Arauan zein zerga horri buruzko gainerako xedapenetan zerga oinarria zehazteko ezartzen diren irizpideak eta printzipioak aplikatuz ateratzen den zerga oinarriaren zenbatekoa.

Aurreko paragrafo bietan ezarritakoa ez da aplikatuko baldin eta zergadunak egiaztatzen badu eragiketa horiek Merkataritzako Kodearen 42. artikuluan ezarritako irizpideen arabera talde berekoa den eta egoitza Espainiako lurraldean ez duen entitate baten baliabide material eta giza baliabideekin egiten direla, entitateon egoitzaren lurraldea eta urteko kontu bateratuak egiteko betebeharra kontuan hartu gabe, edo egiaztatzen badu arrazoi ekonomiko baliodunak daudela entitatea eratzeko eta haren jardunerako.

Apartatu honen lehenengo bi paragrafoetan ezarritakoa aplikatzen ez bada, dela haietan ezarritako inguruabarrak betetzen ez direlako dela aurreko paragrafoan ezarritakoa aplikatu delako, bakarrik egotziko da honako iturri hauetako bakoitzetik datorren errenta positiboa:

a) Landa zein hiri ondasun higiezinen edo haiei dagozkien eskubide errealen titulartasunetik datorrenean, salbu jarduera ekonomiko bati lotuta badaude –foru arau honetan xedatutakoaren arabera– edo Merkataritzako Kodeko 42. artikuluari jarraituz titularraren sozietate talde berekoak diren entitate ez-egoiliarrei laga bazaie haien erabilera.

b) Edozein entitate motaren funts propioetan parte hartzea eta hirugarren batzuei kapital propioak lagatzea, foru arau honetako 34. eta 35. artikuluetan aurreikusitako eran.

Ez da letra honetan sartuko honako aktibo finantzario hauetatik eratorritako errenta positiboa:

a') Jarduera ekonomikoak egiteagatik sortutako legezko eta arauzko obligazioak betetzeko edukitako aktibo finantzarioak.

b') Jarduera ekonomikok egitearen ondorioz finkatutako kontratu harremanetatik sorturiko kreditu eskubideak jasotzen dituzten aktiboak.

c’) Baloreen merkatu ofizialetan bitartekaritza jarduerak egitearen ondorioz edukitako aktiboak.

d’) Kreditu eta aseguru entitateek beren jardueren ondorioz edukitako aktiboak, jarraian datorren c) letran finkatutakoa eragotzi gabe.

Kapital propioak hirugarrenei lagatzetik eratorritako errenta positiboa hurrengo c) letran aipatuko diren kreditu eta finantza jarduerak egitetik datorrela ulertuko da, baldin eta lagatzailea eta lagapen hartzailea sozietate talde batekoak badira, Merkataritzako Kodeko 42. artikuluak zehaztutakoaren arabera, eta lagapen hartzailearen diru sarreren 100eko 85 gutxienez jarduera ekonomikoak egitetik badator.

c) Kreditu, finantza, aseguru eta zerbitzu jarduerak (esportazio jarduerekin zuzenean lotutakoak izan ezik), baldin eta jarduera horiek zeharka edo zuzenean egin badira Espainiako lurraldean egoiliar diren eta Sozietateen gaineko Zergaren Foru Arauaren 42. artikuluko 3. apartatuan ezarritakoaren arabera lotuak diren pertsona edo entitateekin, eta baldin eta entitate egoiliar horientzat fiskalki kengarriak diren gastuak zehazten badituzte.

Errenta positiboa ez da kontuan hartuko, baldin eta entitate ez-egoiliarrak egindako kreditu, finantza, aseguru eta zerbitzu jardueren (esportazio jarduerekin zuzenean lotutako zerbitzuena izan ezik) sarreren 100eko 50 baino gehiago lortu bada entitate horrek Sozietateen gaineko Zergaren Foru Arauaren 42. artikuluko 3. apartatuan ezarritakoaren arabera lotuak ez diren pertsona edo entitateekin egindako eragiketetatik.

d) Kapitalizazio eta aseguru eragiketak, haien onuraduna entitatea bera bada.

e) Jabetza intelektuala eta industriala, laguntza teknikoa, ondasun higigarriak, irudi eskubideak eta negozio edo meategien errentamendu edo azpierrentamendua, foru arau honetako 37. artikuluan ezarritako baldintzetan.

f) Finantza tresna deribatuak, salbu eta jarduera ekonomikoak egitetik datorren eta berariaz identifikatuta dagoen arrisku bat estaltzeko izendatutakoak

g) Aurreko a), b), d) eta e) letretan aipatutako ondasun eta eskubideen eskualdaketak, ondare irabazi eta galerak eragiten badituzte.

Ez dira kontuan hartuko aurreko b) eta g) letretan ezarritako errentak (entitate ez-egoiliarrak lortutakoak), baldin eta errenta horiek badatoz edo entitate horrek zuzenean edo zeharka 100eko 5eko partaidetza baino handiagoa duen entitateetatik, edo 100eko 3ko partaidetza baino handiagoa duen entitateetatik –partaidetutako sozietatearen akzioek bigarren mailako merkatu antolatu batean kotizatzen badute-–, eta, gainera, honako bi baldintza hauek betetzen badira:

Lehenengoa.– Entitate ez-egoiliarrak partaidetzak zuzentzea eta kudeatzea, baliabide materialak eta giza baliabideak antolatuz.

Bigarrena.– Errenten sorburu diren entitateen sarrerak (100eko 85, gutxienez) jarduera ekonomikoen ondoriozkoak izatea.

Horretarako, honako errenta hauek jarduera ekonomikoen ondoriozkoak direla ulertuko da: aurreko b) eta g) letretan aurreikusitako errentak, baldin eta errenton jatorria aurreko bigarren baldintza konplitzen duten entitateetan dutenak, eta, zuzenean nahiz zeharka, beste entitate batena baldin bada entitate horietako partaidetzaren 100eko 5 baino gehiago, edo partaidetzaren 100eko 3 baino gehiago –partaidetutako sozietatearen akzioek bigarren mailako merkatu antolatu batean kotizatzen badute–.

Merkataritzako Kodearen 42. artikuluan ezarritako irizpideen arabera talde berekoak diren entitateen kasuan, entitateon egoitzaren lurraldea eta urteko kontu bateratuak egiteko betebeharra kontuan hartu gabe, partaidetza portzentajeari buruzko betekizunak zein partaidetza eta kudeaketa egoteko betekizuna betetzen diren zehazteko, taldearen parte diren entitate guztiak hartuko dira kontuan.

3.– Artikulu honetako 2. apartatuan adierazitako errentak egotzi gabe geratuko dira beren zenbatekoen batura txikiagoa bada entitate ez-egoiliarrak lortutako errenta osoaren 100eko 15 baino, apartatu horretako c) letrako errenten kasuan izan ezik, halako errentak osorik egotziko baitira.

Merkataritzako Kodeko 42. artikuluaren araberako sozietate talde batean Espainiako lurraldean ez-egoiliarrak diren entitateen multzoak lortutako errentari buruzkoa izan daiteke aurreko paragrafoan ezarritako muga.

Inoiz ere ez da sartuko entitate ez-egoiliar baten errenta osoa baino zenbateko handiagoa.

Sozietate ez-egoiliarrak sozietateen gaineko zergaren berdina edo antzekoa den zergaren batengatik ordaindutakoa ez da egotziko zergadunaren zerga oinarrian, sartu beharreko errenta zatiari dagokionez.

Artikulu honetako 2. apartatuan aipatutako iturri bakoitzeko errenta positiboak zerga oinarri orokorrean egotziko dira, foru arau honetako 62. artikuluan aurreikusitakoaren arabera.»

«14.– Artikulu honen ondorioetarako, Merkataritzako Kodearen 42. artikuluan aipatzen den sozietate taldean entitate taldeaniztunak eta elkartutako entitateak ere sartzen direla ulertuko da, entitateok merkataritzako legerian definituta dauden moduan.»

Sei.– Honela idatzita gelditzen da 82.2. artikuluaren hirugarren paragrafoa:

«Ondorengoak, aurrekoak edo laugarren gradura arteko (hau barne) odolkidetasuna duten albo ahaideak egoitzetan bizi badira, kenkaria mailarik gertueneko ahaideek egingo dute, baldin eta frogaturik uzten badute ahaide horien egoitzako egonaldi gastuak eurek ordaindu dituztela. Gastu horiek maila bereko ahaide batek baino gehiagok ordaindu badituzte, kenkaria zati berdinetan hainbanatu eta aplikatuko da haien artean.»

Zazpi.– Aldatu egiten da 108. artikuluaren 1. apartatua, eta hari 3. apartatu bat gehitzen zaio. Hona hemen horien edukia:

«1.– Zerga honen kontura atxiki beharreko errenten jasotzaileak horiek sortutako kontraprestazio osoa izango du kontuan.

Atxikipenik egin ez denean edo behar baino gutxiago egin denean, atxikitzaileari edo kontura sartzera behartutakoari bakarrik egotzi dakiokeen arrazoi batengatik, atxiki beharreko kopurua kenduko du kuotatik jasotzaileak.

Sektore publikoak ordaindutako legezko ordainsariak direnean, jasotzaileak benetan atxikitako kopuruaren kenkaria egin dezake bakarrik.

Kontraprestazio osoa ezin denean frogatu, Zerga Administrazioak kopuru oso moduan konputatu dezake kopuru jakin bat, behin horretatik bidezko atxikipena kendu ondoren benetan jasotakoa ematen duena. Kasu horretan, benetan jasotakoaren eta kopuru osoaren arteko diferentzia kenduko du kuotatik, konturako atxikipen gisa.»

«3.– Atxikipenari lotuta dauden eta entitate batek bere bazkideei edo berari lotutako pertsonei ordaindu dizkien etekinen kasuan, atxikipenak kengarriak izango dira, bazkidearen edo hari lotutako pertsonaren zerga pertsonalean, atxikipenak haiek egin eta Zerga Administrazioan benetan sartu diren neurrian bakarrik.»

Zortzi.– Beste letra bat gehitzen zaio, l) letra, 115. artikuluari. Hona hemen haren edukia:

«l) Jaulkipen prima banatzen duten edo ekarpenak itzuliz kapitala murrizten duten entitateei, atxikipenik ez duten banaketei dagokienez.»

Bederatzi.– e) letra bat gehitzen zaio hamargarren xedapen gehigarriaren 3. apartatuari, honako testu hau duena:

«e) Foru arau honen hogeita hamalaugarren xedapen gehigarrian arautuko kontratuak merkaturatzen dituzten entitateak.»

Hamar.– Honela idatzita gelditzen da hamazazpigarren xedapen gehigarriaren 1. apartatuko a) letraren azken aurreko paragrafoa:

«Aipatutako mugaren gaineko soberakinak gutxitu egingo du eragindako akzioen eskurapen balioa, foru arau honetako 41. artikuluaren 2. apartatuko a) letraren bigarren paragrafoko erregelei jarraituz, balio hori deuseztatu arte. Ildo beretik, sor daitekeen soberakina edozein entitate motaren funts propioetako partaidetzatik jasotako kapital higigarriaren etekin gisa integratuko da, foru arau honetako 34. artikuluaren e) letran jaulkipen primaren banaketarako aurreikusitako modu berean.»

Hamaika.– Beste xedapen gehigarri bat eransten da, hogeita hamalaugarrena. Hona hemen bere edukia:

«Hogeita hamalaugarren xedapen gehigarria. Epe luzerako aurrezki planak.

1.– Epe luzerako aurrezki plana zergadunaren eta aseguru edo kreditu entitate baten arteko kontratu bat da, baldintza hauek betetzen dituena:

a) Epe luzerako aurrezki plan batera ekarritako baliabideak honela bideratu behar dira: edo bizi aseguru indibidual baten edo segidako aseguru batzuen bidez –xedapen gehigarri honetako 2. apartatuan aipatzen dira, eta epe luzerako bizi aseguru indibidual deritze–, edo, bestela, finantza gordailu edo kontratuen bidez –xedapen gehigarri honetako 3. apartatuan aipatzen dira, eta epe luzerako aurrezkirako kontu indibidual batean sartuko dira–.

Zergadun bat, aldi berean, epe luzerako aurrezki plan baten titular soilik izan daiteke.

b) Epe luzerako aurrezki plana irekiko da lehenengo prima ordaintzen denean edo epe luzerako aurrezkirako kontu indibidualerako lehenengo ekarpena egiten denean –kasu bakoitzean dagokiona–, eta iraungi, berriz, plan horretako dirua erabiltzen denean edo apartatu honetako c) letran ekarpenentzat ezarritako muga betetzen ez denean iraungiko da.

Ondorio horietarako, epe luzerako aurrezkirako aseguru indibidualen kasuan ez da ulertuko aseguru horretako dirua erabili denik baldin eta aseguruaren mugaegunera ailegatutakoan aseguru entitateak prestazioaren zenbateko osoa eskualdatzen badu, zergadunak aginduta, zergadun horrek entitate berarekin kontratatutako epe luzerako aurrezkirako beste aseguru indibidual batera. Kasu horietan, aseguru berrira eramandako prestazioaren zenbatekoa ez da kontuan hartuko apartatu honetako c) letran ezartzen den 5.000 euroko mugari begira, eta foru arau honetako 9. artikuluko 34. zenbakian zehazten den epea zenbatzeko, berriz, planerako ekarpenak egiteko erabili zen lehenengo aseguruko lehenengo prima noiz ordaindu zen hartuko da aintzat.

c) Epe luzerako aurrezki plan batean ezin dira inoiz 5.000 euro baino gehiago jarri urtean, plana indarrean dagoen urte guztietan.

d) Zergadunak kapital moduan bakarrik erabil dezake planean metatutako kapitala, osorik, eta ezin du planeko dirua zatika erabili.

e) Aseguru entitateak edo kreditu entitateak bermatu behar du zergadunak, bizi aseguru indibiduala mugaeguneratzen denean edo finantza gordailu edo kontratu bakoitza mugaeguneratzen denean, gutxienez, ordaindutako primen edo finantza gordailu edo kontratuari egindako ekarpenen 100eko 85aren baliokidea den kapitala jasoko duela.

Aurretik xedatutakoa xedatuta ere, bermea 100eko 100 baino txikiagoa bada, kontratatutako finantza produktuaren mugaeguna gutxienez urtebetekoa izan behar da.

2.– Epe luzerako aurrezkirako aseguru indibiduala (ELAAI) bizi aseguru indibiduala da, baina ez da foru arau honetako 36. artikuluan aurreikusten diren bizi aseguruen modukoa, ez ditu biziraupena edo heriotza ez diren kontingentziak estaliko, eta zergaduna bera izango da kontratatzailea, aseguratua eta onuraduna, heriotzaren kasuan izan ezik.

Kontratuaren baldintzetan berariaz eta modu nabarmenean adierazi behar da epe luzerako aurrezkirako aseguru indibidual bat dela. Plan horren siglak (ELAAI) gordeta gelditzen dira 2017ko urtarrilaren 1etik aurrera sinatzen diren kontratuetarako, foru arau honetan ezarritako baldintzak betetzen badituzte.

3.– 3. Epe luzerako aurrezki kontu indibiduala diruaren gordailu kontratu bat da, zergadunak kreditu entitate batekin egiten duena. Haren kargura diru gordailu bat edo gehiago eratu daitezke, bai eta azaroaren 10eko EHA/3537/2005 Aginduak, urriaren 23ko 4/2015 Legegintzako Errege Dekretuaren bidez onartutako Balore Merkatuari buruzko Legearen testu bategineko 37.6 artikulua garatzen duenak, bigarren artikuluaren 1. apartatuko azken paragrafoan definitzen diren moduko finantza kontratuak ere, baldin eta haien baldintzetan zehazten bada bai ekarpenak bai mugaegunean egingo den likidazioa dirutan eta dirutan bakarrik egingo direla. Epe luzerako aurrezki kontu indibiduala ireki duen kreditu entitate berarekin kontratatu behar ditu zergadunak finantza gordailu eta kontratuok. Kontuaren etekinak, nahitaez, kontu indibidualean bertan sartuko dira, eta ez dira zenbatuko aurreko 1. apartatuko c) letran ezarritako mugari dagokionez.

Epe luzerako aurrezkirako kontu indibiduala bereziki identifikatu behar da, beste ezarpen modu batzuetatik bereizita. Gainera, kontuan sartuta dauden finantza gordailu eta kontratuon identifikazioan kontuari berari buruzko aipamena jaso behar da.

Kontratuaren baldintzetan berariaz eta modu nabarmenean adierazi behar da epe luzerako aurrezkirako kontu indibidual bat dela. Plan horren siglak (ELAKI) gordeta gelditzen dira 2017ko urtarrilaren 1etik aurrera sinatzen diren kontratuetarako, foru arau honetan ezarritako baldintzak betetzen badituzte, eta bertan sartuko dira egun horretatik aurrera kontratatutako finantza gordailu eta kontratuak.

4.– Entitate kontratugileek kontratuan bereziki adierazi behar dute, berariaz eta modu nabarmenean, xedapen gehigarri honetako 1. apartatuko e) letrako bermeak zer zenbateko izango duen eta zer data hartuko duen kontuan; halaber adierazi behar dute bizi aseguru indibidualeko edo finantza gordailu edo kontratuko kapitala zer baldintzatan erabil daitekeen mugaeguneratu aurretik edo noiz eta nola egin daitekeen ekarpen gehiago.

Entitate kontratugileek, gainera, kontratuan berariaz eta modu nabarmenean ohartarazi behar dituzte zergadunak, eta adierazi behar diete aldi berean epe luzerako aurrezkirako plan bakarraren titular soilik izan daitezkeela, urtean ezin dituztela 5.000 eurotik gorako ekarpenak egin, ez eta plan horretan eratzen den kapitala zatika erabili ere. Halaber, jakinarazi behar diete zer ondorio fiskal dituen planean metatutako dirua planera lehenengo ekarpena egin zenetik bost urte igaro aurretik edo ondoren erabiltzeak.

5.– Erregelamendu bidez garatu ahal izango dira epe luzerako aurrezkirako aseguru indibidualetako eskubide ekonomiko guztiak eta epe luzerako aurrezkirako kontu indibidualetan metatutako funts guztiak mobilizatzeko baldintzak, baina horrek ez du esan nahi baliabideak erabiliko direnik foru arau honetako 9 artikuluko 34. apartatuan ezarritakoari begira.

6.– Foru arau honetako 9 artikuluko 34. zenbakian ezarritako epea amaitu aurretik metatutako kapitalaren zatiren bat erabiltzen bada edo ez bada betetzen xedapen honetako 1. apartatuko c) letran ekarpenentzat ezarritako muga, entitateak erregelamenduz ezartzen den zenbatekoaren besteko atxikipena edo konturako ordainketa egin beharko du plana ireki zenetik lortutako kapital higigarriaren etekin positiboak direla eta, plana iraungitzeak sor litzakeen etekinak ere kontuan hartuta.

7.– Epe luzerako aurrezkirako plana indarrean dagoen urteetan lortzen diren kapital higigarriaren etekin negatiboak –plana iraungitzeak sor litzakeen etekinak barne– plana iraungitzen den zergaldian egotziko dira, baina bakarrik egotziko dira salbuespena aplikatu zaien plan horretako etekin negatiboen batura gainditzen duten etekin negatiboak.»

2. artikulua.– Aldatzea sozietateen gaineko zerga.

Lehenengoa.– Honako xedapen hauek aldatzen dira, 2016ko urtarrilaren 1etik aurrera hasitako zergaldietarako ondorioekin, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauan:

Bat.– Honela idatzita gelditzen da 10. artikuluko 1. apartatua:

«1.– Sozietate zibilek (nortasun juridikoa izan zein ez), jaraunspen jasogabeek, ondasun erkidegoek eta 2005eko martxoaren 8ko 2/2005 Foru Arauak, Gipuzkoako Lurralde Historikoko Zergen Foru Arau Orokorrak, 35. artikuluko 3. apartatuan aipatutako gainerako entitateek lortutako errentak, bai eta jasandako atxikipenak eta konturako sarrerak ere, Gipuzkoako Lurralde Historikoko Pertsona Fisikoen Errentaren gaineko Zergaren urtarrilaren 17ko 3/2014 Foru Arauaren IV. tituluko VI. kapituluko 2. sekzioan ezarritakoaren arabera esleituko zaizkie bazkideei, jaraunsleei, erkideei edo partaideei, hurrenez hurren.

Apartatu honetan ezarritakoa ez zaie aplikatuko foru arau honetako hogeigarren xedapen gehigarrian aipatzen diren sozietate zibiletako bazkideei.»

Bi.– Honela idatzita gelditzen dira 11. artikuluaren 1. apartatuko h), i) eta j) letrak:

«h) Titulizazio funtsak, Enpresen finantzaketa sustatzeari buruzko apirilaren 27ko 5/2015 Legean arautuak.

i) Inbertsioen berme funtsak, 2015eko urriaren 23ko 4/2015 Legegintzako Errege Dekretuaren bidez onartutako Baloreen Merkatuari buruzko Legearen testu bateginean arautuak.

j) Banku-aktiboen funtsak, Kreditu entitateak berregituratu eta desegiteari buruzko azaroaren 14ko 9/2012 Legearen hamargarren xedapen gehigarrian aipatuak.»

Hiru.– Edukirik gabe uzten da 11. artikuluaren 1. apartatuko k) letra.

Lau.– Honela idatzita gelditzen da 12. artikuluaren 2. apartatuko e) letra:

«e) Gizarte Segurantzaren kolaboratzaile diren mutualitateak, 2015eko urriaren 30eko 8/2015 Legegintzako Errege Dekretuaren bidez onartutako Gizarte Segurantzaren Lege Orokorraren testu bateginean arautuak.»

Bost.– Honela idatzita gelditzen dira 20. artikuluaren 1. eta 2. apartatuak:

«1.– Ibilgetu ez-materialaren balio bizitzarekin bat datozen ibilgetu hori amortizatzeko zuzkidurak kengarriak izango dira.

Dena dela, balio bizitza ezin bada modu fidagarrian balioztatu, urtean gehienez ere amortizazio zuzkiduren hamarren bat izango kengarria.

Kenkari hau aplikatzeko, beharrezkoa da entitate eskuratzailea eta eskualdatzailea ez izatea sozietate talde bereko kide, Merkataritzako Kodeko 42. artikuluan ezartzen diren irizpideen arabera, kontuan hartu gabe non dagoen entitateon egoitza eta ea urteko kontu bateratuak egiteko betebeharra duten. Entitate biak talde bereko kide badira, kenkaria honen gainean egingo da: entitate eskualdatzaileak ibilgetua pertsona edo entitate ez-lotuei erosterakoan ordainduko zukeen eskurapen prezioa.

2.– Aurreko apartatuan ezarritakoa gorabehera, merkataritza funtsa amortizatzeko zuzkidurak ez dira kengarriak; hala ere, kasu batzuetan foru arau honetako 25. artikuluan ezarritakoa aplikatu beharko da.»

Sei.– Honela idatzita gelditzen da 23. artikuluko 2. apartatua:

«2.– Aurreko apartatuan xedatutakoa gorabehera, aipatutako entitateetako kapitalaren gaineko partaidetza 100eko 5etik gorakoa bada (edo 100eko 3tik gorakoa, partaidetutako sozietatearen akzioek bigarren mailako merkatu antolatu batean kotizatzen dutenean), kenkari horren zenbatekoa ezin da handiagoa izan partaidetza horren eskurapen prezioaren eta partaidetutako entitatearen ondare garbiaren arteko kendura baino, partaidetzaren proportzioan eta balorazio egunean dauden isilbidezko gainbalioekin zuzenduta. Balio hori kalkulatzean, eta enpresak partaidetzarik badu beste batean, kontuan eduki beharko da urteko kontu bateratuetan jasotzen den ondare garbia, Merkataritzako Kodean eta hura garatzen duten arauetan ezarritako irizpideak aplikatuz ateratzen dena.

Eskurapen prezioa eta partaidetutako entitatearen ondare garbiaren balioa partaidetzaren proportzioan eta balorazio egunean dauden isilbidezko gainbalioekin zuzenduta– zehazterakoan, ez da kontuan hartuko foru arau honetako 24. artikuluko 1. apartatuan aipatzen den diferentzia, entitatearen ondasun eta eskubideei egotzi ezin bazaie.

Apartatu honetan xedatutakoa ez zaie aplikatuko partaidetzaren balio narriaduragatiko galerei, foru arau honetako 34. artikuluan xedatutakoa aplikatu zaion zenbatekoaren mugaraino, salbu eta xedapen horretako 6. apartatuan araututako kasuetan, partaidetzaren aurreko eskualdaketa batean, balio narriaduragatiko galera hori partaidetza eskuratzen den unean dauden isilbidezko gainbalioen balio galerari dagokionean.»

Zazpi.– Honela idatzita gelditzen da 24. artikuluko 5. apartatua:

«5.– Artikulu honetan xedatutakoaren arabera aplikatutako kenkarien zenbatekoa zerga oinarriari gehituko zaio partaidetzen eskualdaketa gertatzen denean, baina inoiz ere ezingo da foru arau honetako 33. eta 34. artikuluetan jasotakoa aplikatu.»

Zortzi.– Honela idatzita gelditzen da 25. artikulua:

«25. artikulua.–Merkataritza funtsaren tratamendu fiskala.

1.– Zerga oinarria kalkulatzean kengarria izango da merkataritza funtsetako ibilgetu ez-materialaren jatorrizko eskurapen prezioa, baina urteko gehieneko muga zenbateko horren 100eko 12,50 izango da, betiere entitate eskuratzailea eta eskualdatzailea ez badira sozietate talde bereko kide, Merkataritzako Kodeko 42. artikuluan ezartzen diren irizpideen arabera, kontuan hartu gabe non dagoen entitateon egoitza eta ea urteko kontu bateratuak egiteko betebeharra duten. Entitate biak talde bereko kide badira, kenkaria egingo da, hain zuzen ere, entitate eskualdatzaileak merkataritza funtsa eskuratzeko ordaindu duen prezioaren gainean, pertsona edo entitate ez-lotuei erosi dienean.

Aurreko paragrafoan zehazten den baldintza betetzen ez bada, merkataritza funtsaren balioak izan duen narriatzea dela-eta sortzen diren galeren artetik bakarrik izango dira kengarriak benetan egiaztatu daitezkeenak.

2.– Artikulu honetan aipatutako zenbatekoen kenkaria aplikatzeko (aurreko apartatuko azken paragrafoan araututako zenbatekoarena izan ezik) ez da beharrezkoa izango zenbatekook kontabilitateko galera-irabazien kontuan egoztea.

3.– Artikulu honetako goiko bi apartatuetan xedatutakoa dela bide zerga oinarria zehazterakoan aplikatzen diren kenkariak zerga oinarriari gehituko zaizkio, baldin eta, narriaduraren edo eskualdaketaren ondorioz, zuzendu egiten bada merkataritza funtsaren balioa.

4.– Merkataritza funtsaren eskualdaketan sortutako errentekin foru arau honetako 36. artikuluan aparteko mozkinen berrinbertsioari buruz xedatzen dena egiten bada, honako errenta honek bakarrik izango du zerga onura hori: haren eskualdaketa balioaren eta kontabilitateko balioaren arteko kendurak, monetaren balio galeraren araberako zuzenketa egin eta gero.»

Bederatzi.– Ezabatu egiten da 31.1 artikuluaren j) letra.

Hamar.– Honela idatzita gelditzen da 32. artikuluko 4. apartatua:

«4.– Foru arau honetako 13. artikuluko 1. apartatuan aipatutako mikroenpresek euren zerga oinarritik kendu ahal izango dute, beren tamainak eragiten dituen zailtasunen zerga konpentsazio gisa, honako eragiketa hauek egin aurretik zehaztutako beren zerga oinarri positiboaren 100eko 20:

– Apartatu honetan jasotako zerga konpentsazioa egin,

– 48. artikuluan jasotako errenta positiboak sartu,

– Hogeigarren xedapen gehigarrian jasotako errentak sartu; eta

– 55. artikuluan jasotako zerga oinarri negatiboak konpentsatu.

Apartatu honetan xedatutakoa ez da aplikatuko, mikroenpresa ekonomia intereseko espainiar edo europar taldea denean edo aldi baterako enpresa elkartea denean, betiere VI. tituluko III. kapituluan jasotako araubide berezian zergapetuta badago.

Apartatu honetan xedatutakoa aplikatzea bateraezina izango da titulu honetako V. kapituluan ezarritako zuzenketak egitearekin. »

Hamaika.– Honela idatzita gelditzen da 33. artikuluko 3. apartatua:

«3.– Nolanahi ere, honako kasu hauetan ez da aplikatuko artikulu honen aurreko apartatuetan xedatutakoa:

a) Sozietateen gaineko zergan edo zerga horren izaera berdina edo antzekoa duen beste zerga batean 100eko 10etik beherako karga tasa izan duten entitateek banatutako errentak, inguruabar hauek gertatzen direnean izan ezik: partaidetutako entitateak egoitza duen herrialdeak nazioarteko zergapetze bikoitza saihesteko hitzarmena sinatuta izatea Espainiako Erresumarekin, hitzarmen hori aplikagarria izatea eta hitzarmen horrek informazioa trukatzeko klausula jasotzea.

b) Foru arau honetako 14. artikuluan aipatutako ondare sozietateek banatutako dibidenduak eta mozkinetako partaidetzak, entitate banatzaileak izaera hori eduki duen ekitaldietan sortutako mozkinen kargura banatuak badira.

c) Foru arau honetako 14. artikuluan aipatzen diren ondare sozietateek jasotako dibidenduak eta mozkinetako partaidetzak.»

Hamabi.– 9. apartatu bat gehitzen zaio 39. artikuluari. Hona hemen haren edukia:

«9.– Foru arau honetako 64. bis artikuluan ezarritakoaren ondorioz aplikatutako kenkariak handiagoak badira zergadunak artikulu horretan aipatzen diren ikerketa eta garapeneko proiektuetan zein berrikuntza teknologikokoetan inbertitutako kopuruak baino, zergadunaren zerga oinarrian sartuko da aplikatutako kenkarien eta proiektu horiek finantzatzeko ordaindutako kopuruen arteko diferentzia positiboa.»

Hamahiru.– Honela idatzita gelditzen dira 40. artikuluaren 2. apartatuko b) letra eta azken paragrafoa:

«b) Entitateei ekarritakoak eta kontraprestazioan hartutako baloreak, artikulu honetako 11. apartatuan ezarritakoa aplikatu behar denean izan ezik.»

«Merkatuko balio normaltzat hartuko da alderdi independenteek merkatuko baldintza arruntetan adostuko luketena. Balio hori kalkulatzeko, foru arau honetako 42. artikuluko 4. apartatuan aurreikusitako metodoak aplikatu ahal izango dira.»

Hamalau.– Honela idatzita gelditzen da 40. artikuluaren 3. apartatuko lehen paragrafoa:

«3.– Aurreko apartatuko a), b), c) eta d) letretan aurreikusitako kasuetan, entitate eskualdatzaileak bere zerga oinarrian sartuko du eskualdatutako elementuen merkatuko balioaren eta kontabilitateko balioaren arteko diferentzia. Nolanahi ere, kapitala edo funts propioak kredituak konpentsatuz handitzen badira, entitate eskualdatzaileak bere zerga oinarrian sartuko du –dagokion proportzioan– kapitalaren edo funts propioen handitzearen eta kapitalizatutako kreditu fiskalaren arteko diferentzia.»

Hamabost.– 11. apartatu berri bat eransten zaio 40. artikuluari. Hona hemen haren edukia:

«11.– Kapitala edo funts propioak kredituak konpentsatuz handitzeko eragiketak fiskalki balioztatzeko, kontuan hartuko da handitze horrek zer zenbateko duen merkataritzako ikuspuntutik, kontabilitatean duen balioa edozein dela ere.»

Hamasei.– Honela idatzita gelditzen da 42. artikuluko 3. apartatua:

«3.– Honako hauek izango dira pertsona edo entitate lotuak:

a) Entitate bat eta bertako bazkide edo partaideak.

b) Entitate bat eta haren kontseilari edo administratzaileak, beren eginkizunak betez jasotzen dituzten ordainsariei dagokienez izan ezik.

c) Entitate bat eta haren bazkide, partaide, kontseilari edo administratzaileen ezkontideak, 2003ko maiatzaren 7ko 2/2003 Legearen arabera eratutako izatezko bikoteko bikotekideak, edo ahaidetasun harreman batek lotutako pertsonak. Harreman hori zuzenekoa zein zeharkakoa izan daiteke, odolkidetasunekoa, ezkontza bidezkoa edo izatezko bikotea eratzearen ondoriozkoa, hirugarren mailara artekoa betiere.

d) Talde bereko bi entitate.

e) Entitate bat eta beste entitate bateko kontseilari edo administratzaileak, baldin eta bi entitateak talde berekoak badira.

f) Bi entitate, baldin eta lehenengoak, gutxienez, 100eko 25eko zeharkako partaidetza baldin badu bigarrenaren kapital sozialean edo haren funts propioetan.

g) Bi entitate, baldin eta haietako bazkideek edo partaideek edo haien ezkontideek, 2003ko maiatzaren 7ko 2/2003 Legearen arabera eratutako izatezko bikoteko bikotekideek, edo ahaidetasun harreman batek lotutako pertsonek, zuzenean edo zeharka, gutxienez 100eko 25eko partaidetza baldin badute kapital sozialean edo funts propioetan. Harreman hori zuzenekoa zein zeharkakoa izan daiteke, odolkidetasunekoa, ezkontza bidezkoa edo izatezko bikotea eratzearen ondoriozkoa, hirugarren mailara artekoa betiere.

h) Egoitza Espainiako lurraldean duen entitate bat eta hark atzerrian dituen establezimendu iraunkorrak.

i) Espainiako lurraldean egoitzarik ez duen entitate bat eta lurralde horretan dituen establezimendu iraunkorrak.

j) Talde bereko bi entitate, talde horrek sozietate kooperatiboen taldeen araubidean tributatzen duenean.

Lotura hori bazkide edo partaideen eta entitatearen arteko harremanaren arabera definitzen bada, partaidetzak 100eko 25ekoa edo handiagoa izan beharko du. Administratzaileei buruz egindako aipamenak zuzenbidezkoak nahiz izatezko administratzaileei eragiten die.

Taldea dago baldin eta entitate batek beste baten edo beste batzuen gaineko kontrola badu (edo kontrola egin badezake), Merkataritzako Kodeak 42. artikuluan ezarritako irizpideen arabera, entitateon egoitzaren lurraldea eta urteko kontu bateratuak egiteko betebeharra kontuan hartu gabe.»

Hamazazpi.– Amaierako paragrafo berri bat gehitzen zaio 42. artikuluaren 4. apartatuari. Hona hemen haren edukia:

«Balio hori kalkulatzeko ezin badira aurreko metodoak aplikatu, oro har onartutako beste metodo eta teknika batzuk erabili ahal izango dira, lehia askearen printzipioa errespetatzen badute.»

Hamazortzi.– Honela idatzita gelditzen dira 43. artikuluaren 3. eta 4. apartatuak:

«3.– Honako hauek jaso behar dira taldeari buruzko dokumentazioan:

a) Taldearen antolaketa egituraren, egitura juridikoaren eta egitura operatiboaren deskripzio orokorra, bai eta egitura horietan izandako edozein aldaketa garrantzitsu ere.

b) Taldea osatzen duten eta eragiketa lotuak egiten dituzten entitateen identifikazioa, baldin eta zergadunak egindako eragiketei zuzenean edo zeharka eragiten badiete.

Horrez gainera, zergaldian zehar aktiboak berrantolatzeko eta eskuratzeko edo lagatzeko egin diren eragiketa esanguratsuen deskripzio bat ere jaso behar da.

c) Taldeko entitateen arteko eragiketa lotuen izaeraren, zenbatekoen eta fluxuen deskripzio orokorra, baldin eta eragiketa horiek zergadunak egindako eragiketei zuzenean edo zeharka eragiten badiete.

Bereziki, esplizitatu behar da zeintzuk diren taldearen jarduera nagusiak, eta hauek deskribatu behar dira: taldeak jarduten duen merkatu geografiko nagusiak, mozkinen iturri nagusiak eta taldeak zergaldian izandako eragiketa bolumenaren 100eko 10 gutxienez ordezkatzen duten ondasun eta zerbitzuen hornidura katea.

d) Taldeko entitateek betetzen dituzten eginkizunen eta entitateok hartzen dituzten arriskuen deskripzio orokorra, baldin eta zergadunak egindako eragiketei zuzenean edo zeharka eragiten badiete; aurreko zergaldiarekin alderatuta izandako aldaketak ere jaso behar dira.

e) Patente, marka, izen komertzial eta gainerako aktibo ez-materialen titularren zerrenda, baldin eta zergadunak egindako eragiketei zuzenean edo zeharka eragiten badiete, bai eta haiek erabiltzean izandako kontraprestazioen zenbatekoa ere.

Horrela, taldeak aktibo ez-materialen garapen, jabetza eta ustiapenerako duen estrategia orokorraren deskripzio orokorra eskainiko da, ikerketa eta garapeneko jarduerak egiten diren instalazio nagusien kokapena eta haien helbidea barne; taldeko entitateek aktibo ez-materialen inguruan dituzten akordioen zerrenda ere jasoko da, non kostuak banatzeko akordioak, ikerketa zerbitzuetarako akordio nagusiak eta lizentzien inguruko akordioak sartuko diren; eta, gainera, zergaldian zehar aktibo ez-materialekin egindako transferentzia garrantzitsuei buruzko deskripzio orokorra ere emango da, entitateak, herrialdeak eta zenbatekoak adierazita.

f) Taldeak transferentzia prezioen alorrean duen politikaren deskripzioa, politika hori lehia askearen printzipioarekin bat datorrela justifikatzearren; deskripzioan jaso behar da taldeak zer metodo onartu dituen prezioak finkatzeko.

g) Taldeko entitateen artean zerbitzuak emateko egindako kontratuen eta taldeko entitateen artean kostuak banatzeko hartutako akordioen zerrenda, baldin eta akordio eta kontratu horiek zergadunak egindako eragiketei zuzenean edo zeharka eragiten badiete.

h) Taldeko entitateei buruz egindako aurretiazko balorazio akordioen eta entitateen artean egin diren edo aribidean dauden adiskidetasunezko prozeduren zerrenda eta deskripzio laburra, baldin eta zergadunak egindako eragiketei zuzenean edo zeharka eragiten badiete.

Horrez gainera, beste edozein agintari fiskalekin batera hartutako erabakiak jaso behar dira, eragina badute taldearen mozkinak herrialdeen artean banatzeko.

i) Taldearen urteko finantzako egoera orri bateratuak, betiere nahitaezkoak badira taldearentzat edo borondatez egiten baditu.

Apartatu honetan dokumentazioa dela-eta ezartzen diren betebeharrak zergadunak taldeko beste edozein entitaterekin eragiketa lotuak egin dituen zergaldiari buruzkoak dira, eta foru arau honetako 13. artikuluko 1. eta 2. apartatuetan xedatutakoa betetzen ez duten taldeei galdatuko zaizkie, artikulu bereko 7. apartatuan ezarritakoa aintzat hartuta.

Zergaldi baterako prestatutako dokumentazioak hurrengo beste batzuetan ere baliozkoak izaten jarraitzen badu, ez da beharrezkoa izango dokumentazio berria prestatzea, baina, behar izanez gero, egokitzapenak egingo dira.

4.– Zergadunaren dokumentazio espezifikoan honako hauek jaso behar dira:

a) Zergadunaren eta harekin batera eragiketa egiten duten pertsona edo entitateen izen-abizenak edo sozietatearen izena edo izendapen osoa, egoitza fiskala eta identifikazio fiskaleko zenbakia, bai eta eragiketaren izaeraren deskripzio zehatza, ezaugarriak eta zenbatekoa ere.

Era berean, paradisu fiskaltzat hartutako herrialde edo lurraldeetan egoiliar diren pertsona edo entitateekin egindako eragiketak direnean, identifikatu behar da zer pertsonak hartu duten parte eragiketa horretan beste pertsona edo entitate horien izenean, eta, eragiketak entitateekin egiten badira, haien administratzaileak ere identifikatu behar dira.

b) Alderagarritasunaren azterketa, foru arau honetako 42. artikuluaren 1. apartatuan azaldutako moduan egina.

c) Aukeratutako balorazio metodoa hautatzeari buruzko azalpena; bertan adierazi behar da zergatik hautatu den metodo jakin hori, metodoa nola aplikatuko den, eta zehaztu behar da zein den hartatik eratorritako balioa edo balio tartea.

Horrez gainera, eragiketa lotuen izaera, ezaugarri eta zenbatekoen deskripzio zehaztua jaso behar da.

d) Hainbat pertsona edo entitate loturi elkarrekin emandako zerbitzuengatiko gastuak banatzeko irizpideak, eta hartarako dauden akordioak, halakorik badago, eta kostuak banatzeko akordioak, foru arau honetako 44. artikuluan aipatzen direnak, alegia.

e) Zergadunak bere eragiketa lotuen balorazioa zehazteko erabilitako beste edozein informazio garrantzitsu, eta beste bazkide batzuekin sinatutako itun parasozialak.

Horrenbestez, zuzendaritza egiturari, organigramari eta zergadunaren jardueren bilakaerari buruzko txostenen jasotzaile diren pertsona edo entitateei buruzko informazioa ere sartu behar da, eta adierazi behar da pertsona edo entitate horiek zer lurralde edo herrialdetan duten egoitza fiskala; orobat deskribatu behar dira zergadunaren jarduerak, haren negozio estrategia eta, halakorik badago, zergaldian zehar berregituratze eragiketetan edo aktibo ez-materialak laga edo eskualdatzeko eragiketetan izandako partaidetza.

Aurrekoez gainera, hauek ere jaso behar dira: zergadunaren urteko finantzako egoera orriak; transferentzia prezioen metodoak aplikatzeko erabilitako datuen eta urteko finantzako egoera orrien arteko berdinkatzea, hala egin behar bada eta esanguratsua bada; eta erabilitako alderagarrien datu finantzarioak eta haien iturria.

Azkenik, merkatu balioa zehazteko foru arau honetako 42. artikuluko 4. apartatuko a) eta e) letren artean aipatutako metodoen ordez oro har onartutako beste balorazio metodo eta -teknika batzuk erabiltzen badira –esaterako, etorkizuneko diru fluxu zenbatetsien deskontu metodoak–, zehatz-mehatz deskribatu behar da zer metodo edo teknika aukeratzen den eta zergatik aukeratzen den.

Hain zuzen ere, deskribatu behar da metodo eta teknika horiek zer magnitude, portzentaje, ratio, interes tasa, eguneratze tasa eta beste aldagaitan oinarritzen diren, eta justifikatu behar da ea arrazoizkoak eta koherenteak diren datu historikoei, negozio planei edo balioa zuzen zehazteko funtsezkotzat jotzen den beste edozein elementuri buruz onartutako hipotesiak, bai eta lehia askearen printzipioari egokitzen zaizkion ere.

Maximizatu egin behar da merkatuko datu behagarrien erabilera –datuok egiaztatuz betiere–, eta ahal den gutxien erabili behar dira kontsiderazio subjektiboak eta behagarriak eta kontrastagarriak ez diren datuak.

Zerga Administrazioaren eskura mantendu behar den dokumentazioak hauek hartuko ditu: balorazio metodoa zuzen aplikatu dela eta balorazioaren ondorioz lortutako merkatu balioa zuzena dela egiaztatzeko beharrezkoak diren txostenak, dokumentuak eta euskarri informatikoak.

Dokumentazioa dela-eta apartatu honetan ezartzen diren betebeharrak zergadunak eragiketa lotua egin duen zergaldiari buruzkoak dira.

Zergaldi baterako prestatutako dokumentazioak hurrengo beste batzuetan ere baliozkoak izaten jarraitzen badu, ez da beharrezkoa izango dokumentazio berria prestatzea, baina, behar izanez gero, egokitzapenak egingo dira.

Apartatu honetan dokumentazioa dela-eta ezarritako betebeharrak osorik galdatuko dira, salbu eta eragiketan esku hartzen duen alderdietako bat foru arau honetako 13. artikuluko 1. eta 2. apartatuetan aipatzen diren entitateetako bat denean edo pertsona fisikoa denean eta egoitza paradisu fiskaltzat jotzen diren herrialde edo lurraldeetan duten pertsona edo entitateekin egindako eragiketak ez direnean; izan ere, kasu horretan, dokumentazio betebehar espezifikoak, erraztuak, ezarri ahal izango zaizkio zergadunari, erregelamendu bidez.»

Hemeretzi.– Amaierako paragrafo bat gehitzen zaio 45. artikuluaren 2. apartatuari, eta honela idatzita gelditzen da:

«Apartatu honetan ezarritakoa ez da aplikatuko ondare itzulketa egiten bada pertsona edo entitate lotuen artean, erregelamenduz ezartzen diren baldintzetan. Itzulketa dela-eta ez da errentarik sortuko alderdientzat.»

Hogei.– Honela idatzita gelditzen da 46. artikuluaren 2. apartatuko a) letra:

«a) Zerga Administrazioak ez duenean balio zuzenketarik egin behar sozietateen gaineko zergaren, pertsona fisikoen errentaren gaineko zergaren edo ez-egoiliarren errentaren gaineko zergaren kargapeko eragiketei dagokienez, diruzko isun finkoa jarriko da: isilean gordeta, zehaztu gabe edo faltsututa dagoen datu bakoitzeko, 1.500 euro, eta 15.000 euro, berriz, datu multzo bakoitzeko, eta taldearentzat edo entitate bakoitzarentzat, zergaduna den aldetik, foru arau honetako 43. artikuluan dokumentazio betebehar bakoitzari dagokionez.

Zehapen horren gehieneko muga zenbateko bi hauetako txikiena izango da:

– Zergaldian egin diren zerga honen, pertsona fisikoen errentaren gaineko zergaren edo ez-egoiliarren errentaren gaineko zergaren kargapeko eragiketen baterako zenbatekoaren 100eko 10.

– Entitatearen eragiketa bolumenaren 100eko 1.

Letra honetan ezarritakoaren ondorioetarako, datu multzo bereizitzat hartuko dira, taldeari buruzko dokumentazioari dagokionez, foru arau honetako 43. artikuluaren 3. apartatuko a), c), d), f) eta i) letretan jasotako informazioak. Ondorio horietarako, datutzat joko da apartatuko horretako b) eta e) letretan aipatzen diren pertsona, entitate edo zenbatekoetako bakoitzari buruzko informazioa. Datutzat hartuko da, halaber, apartatu horretako g) eta h) letretan jasota dauden hauetako bakoitza: kostuak banatzeko akordioak, zerbitzuak emateko kontratuak, aurretiazko balorazio akordioak eta adiskidetasunezko prozedurak.

Bestalde, zergadunaren dokumentazio espezifikoa dela eta, eragiketa bakoitzari edo eragiketa multzo bakoitzari dagokionez, eragiketek elkarrekin lotura estua badute edo zergapekoak etenik gabe egin baditu, datu multzo bereizitzat hartuko dira foru arau honetako 43. artikuluko 4. apartatuko b), c), d) eta e) letretan aipatzen diren informazioak. Ondorio horietarako, datutzat joko da aurreko zenbaki horretako a) letran aipatzen den pertsona edo entitate bakoitzari buruzko informazioa.

Baldin eta, foru arau honetako 43. artikuluaren 4. apartatuko azken paragrafoan ezarritakoaren babesean, dokumentazio betebehar erraztuak ezartzen badira, erregelamendu bidez, apartatu horretan aipatutako zergadunentzat, erregelamendu bidezko garapenean zehaztuko da galdatzen diren informazioetatik zeintzuek osatzen dituzten datu bereiziak, letra honetan xedatutakoa aplikatzeari dagokionez.»

Hogeita bat.– 10. apartatu berri bat gehitzen zaio 54. artikuluari. Hona hemen haren edukia:

«10.– Konkurtso Legea aplikatzearen ondoriozko kita eta itxaronaldien kontabilitateko erregistroari dagokion sarrera zordunaren zerga oinarrian egotziko da, zor beraren ondoriozko finantza gastuak ondoren erregistratzeko beharra egon ahala eta sarrera horren mugaraino betiere.

Nolanahi ere, aurreko paragrafoan aipatzen den sarreraren zenbatekoa handiagoa bada zor beraren ondorioz erregistratzeko dauden finantza gastuen zenbateko osoa baino, sarrera hori modu proportzionalean egotziko da zerga-oinarrian, kontuan hartuta zergaldi bakoitzean erregistratutako finantza gastuak zenbat diren zor beraren ondorioz erregistratzeko dauden finantza gastu osoei dagokienez.»

Hogeita bi.– Beste artikulu bat gehitzen da, 64. bis. Hona hemen bere edukia:

«64.– bis artikulua. Ikerketa eta garapeneko edo berrikuntza teknologikoko proiektuetan parte hartzea.

1.– Zerga honen zergadunek edo establezimendu iraunkorrarekin diharduten ez-egoiliarren errentaren gaineko zergaren zergadunek parte hartzen badute beste zergadun batzuek egindako ikerketako, garapeneko edo berrikuntza teknologikoko proiektuen finantzaketan eta proiektu horiek bete egiten badituzte foru arau honetako 62.etik 64.era bitarteko artikuluetan ezarritako kenkarietarako eskubidea izateko artikulu horietan bertan ezartzen diren baldintzak, bada, orduan, zergadunok eskubidea izango dute kenkaria egiteko beren kuota likidoan, artikulu honetan ezarritako baldintza eta betekizunekin; nolanahi ere, kenkari hori bateraezina izango da, osorik edo zati batean, zergadunok manu horietan ezarritakoaren ondorioz aplika litezkeen kenkariekin.

2.– Artikulu honetan ezarritakoa aplikatzeko, beharrezkoa da bai ikerketako, garapeneko edo berrikuntza teknologikoko proiektua egiten duten zergadunek bai haren finantzaketan parte hartzen duten zergadunek aurretik finantzaketa kontratu bat izenpetzea, non, besteak beste, honako hauek zehaztu behar dituzten:

a) Zer zergadunek parte hartuko duten proiektuan.

b) Ikerketako, garapeneko edo berrikuntza teknologikoko proiektuaren deskripzioa.

c) Proiektuaren aurrekontua.

d) Proiektua nola finantzatuko den, eta bereizita adierazi behar da zer zenbateko jarriko dituen proiektua egiten duen zergadunak, zer zenbateko jarriko dituen proiektuaren finantzaketan parte hartuko duen zergadunak eta zer zenbateko dagozkien finantza erakundeen kredituei, diru laguntzei eta bestelako babes neurriei.

e) Erregelamendu bidez zehazten diren gainerako guztiak.

3.– Proiektuaren finantzaketan parte hartzen duten zergadunek ezingo dute inoiz eskuratu proiektuaren emaitzen gaineko jabetza intelektualeko edo industrialeko eskubiderik, ez eta beste modu bateko eskubiderik ere; izan ere, eskubide horien gaineko jabetza beti izan behar da proiektua egiten duen zergadunarena.

4.– Zergadunek artikulu honetan ezarritako araubidea aplikatzea aukeratzen badute, ikerketako, garapeneko edo berrikuntza teknologikoko proiektua egiten duen zergadunak ez du eskubiderik izango foru arau honetako 62.etik 64.era bitarteko artikuluetan ezarritako kenkariak osorik edo zati batean aplikatzeko, eta, haren ordez, proiektuaren finantzaketan parte hartzen duen zergadunak eskubidea izango du bere autolikidazioan egiaztatzeko xedapen horietan ezarritako kenkaria; kenkariaren zenbatekoa, berriz, proiektua egiten duen zergadunari aplikatuko litzaizkiokeen baldintza beretan kalkulatuko da.

Aurretik jasotakoa jasota ere, proiektuaren finantzaketan parte hartzen duen zergadunak kuotan gehienez ere aplika dezakeen kenkariaren zenbatekoa hau da: zergadunak berak proiektua finantzatzeko ordaindutako zenbatekoa bider 1,20 eginez ateratzen den zenbatekoa. Soberakina, egonez gero, ikerketako, garapeneko edo berrikuntza teknologikoko proiektua egiten duen zergadunak berak aplikatu ahal izango du.

5.– Ikerketako, garapeneko edo berrikuntza teknologikoko proiektuaren finantzaketan parte hartzen duen zergadunak kenkari honen aplikazioa kontuan hartu beharko du, foru arau honetako 59. artikuluko 3. apartatuan jasotako gutxieneko tributazioko erregelaren ondorioetarako eta 67. artikuluko 1. apartatuan zehaztutako baterako mugaren aplikazioaren ondorioetarako.

6.– Artikulu honetan ezarritakoa aplikatzeko, aurreko 2. apartatuan aipatzen den finantzaketa kontratua sinatu aurretik nahitaez lortu behar da foru arau honetako 64. artikuluko 2. apartatuan aipatzen den txosten arrazoitua. Txosten hori, ondoren, kontratuarekin batera, komunikazio batean aurkeztu behar zaio Zerga Administrazioari, ikerketako, garapeneko edo berrikuntza teknologikoko proiektua egiten duen zergadunak zein haren finantzaketan parte hartzen duen zergadunak sinatuta, proiektua garatzen hasiko den zergaldia amaitu baino lehen, eta erregelamenduz ezartzen den eran aurkeztu behar da.»

Hogeita hiru.– Honela idatzita gelditzen da 73. artikuluaren 1. apartatuko b) letra:

«b) Espainiar lurraldean bizi diren bere bazkideei egotziko zaizkie:

a') Entitate horiek lortutako zerga oinarri positibo zein negatiboak. Bazkideei egozten zaizkien zerga oinarri negatiboak ezin izango ditu lortu zituen entitateak konpentsatu.

b’) Entitateak eskubidez kuotan jaso ditzakeen kenkariak. Kenkarien oinarriak bazkideen likidazioan sartuko dira, eta kuota murriztuko da, zerga honen edo pertsona fisikoen errentaren gaineko zergaren arauei jarraituz.

Nolanahi ere, foru arau honetako 62.tik 64.era bitarteko artikuluetan aurreikusitako kenkariak ez dira sartuko bazkideen likidazioan baldin eta bazkideek ekonomia intereseko taldeari egindako ekarpenak ezaugarri berezidun ondare-tresna gisa kalifikatu behar badira, kontabilitate irizpideen arabera

c’) Entitateari dagozkion atxikipenak eta konturako ordainketak.

Nolanahi ere, bazkideek ekonomia intereseko taldeei egindako ekarpenak ezaugarri berezidun ondare tresna gisa kalifikatu behar direnean, kontabilitate irizpideen arabera, zerga oinarri negatiboen zein kuotako kenkarien egozpenak ezin du gainditu, kuotari dagokionez, bazkideak elkartzearen kapitalari ordaindutako ekarpenen zenbatekoa bider 1,20 eginez ateratzen den zenbatekoa. Soberakina ezin zaie inola ere egotzi bazkideei.»

Hogeita lau.– Amaierako paragrafo berri bat eransten zaio 73. artikuluaren 3. apartatuari. Hona hemen haren edukia:

«Era berean, eskurapen balioari kendu egingo zaio bazkideei egotzi zaizkien galera sozialen zenbatekoa. Nolanahi ere, kontabilitateko irizpideetan hala ezartzen bada, eskurapen balioari kendu egingo zaio haiek eskuratzen direnetik eskualdatzen diren arte igarotako denboran bazkideei egotzitako zerga oinarri negatiboen eta kenkarien zenbatekoa, harik eta eskurapen balioa deuseztatu arte, eta eragiketa horri dagokion finantza sarrera ere zerga oinarrian sartu behar da.»

Hogeita bost.– Honela idatzita gelditzen da 77. artikuluaren 1. apartatuko lehen paragrafoa:

«1.– Arrisku kapitaleko entitateek, zeinak 2014ko azaroaren 12ko 22/2014 Legean arautzen diren (lege horrek arrisku kapitaleko entitateak, inbertsio kolektiboko bestelako entitate itxiak eta inbertsio kolektiboko entitate itxien sozietate kudeatzaileak arautzen ditu, eta Inbertsio kolektiboko erakundeen azaroaren 4ko 35/2003 Legea aldatzen du), foru arau honetako 34. artikuluko 1. apartatuan ezarritako araubidea aplikatu ahal izango diete lege horretako 2. artikuluan aipatzen diren enpresen kapitaleko edo funts propioetako partaidetza ordezkatzen duten baloreak eskualdatuz lortzen dituzten errentei, edozein izanda ere partaidetzaren ehunekoa edo antzinatasuna, betiere hamabost urte baino gutxiago igaro badira partaidetza eskuratu zenetik.»

Hogeita sei.– Honela idatzita gelditzen da 78. artikuluaren 2. apartatuko b) letrako lehen paragrafoa:

«b) Inbertsio Kolektiboko Erakundeei buruzko azaroaren 4ko 35/2003 Legearen bidez araututako higiezinetako inbertsio sozietateek eta higiezinetako inbertsio funtsek, hurrengo c) letran ageri ez direnek, baldin eta beharrezko akziodun edo partaide kopurua lege horretako 5. eta 9. artikuluetako laugarren apartatuetan ezarritakoa bada, gutxienez, eta, inbertsio kolektiboko erakunde ez-finantzarioak izanik, sozietatearen xede bakarra era guztietako hiri ondasun higiezinetan inbertitzea bada, gero errentan emateko.»

Hogeita zazpi.– Aldatu egiten da 102. artikuluaren 1. apartatuko d) letra, eta e) letra berri bat gehitzen zaio. Hona hemen horien edukia:

«d) Espainiako lurraldean ez-egoiliar diren entitateek Espainiako lurraldean egoiliar diren entitateen partaidetzak beren herrialde edo lurralde bereko entitateei edo Europar Batasuneko lurraldean egoiliar diren entitateei eskualdatzean agerian jartzen diren errentak, baldin eta, azken kasu horretan, entitate eskualdatzaileak zein entitate eskuratzaileak Kontseiluaren urriaren 19ko 2009/133/EE Zuzentarauko I. eranskineko A zatian zehaztutako formetako bat badute, Zuzentarauko I. eranskineko B zatian aipatzen diren tributuetako baten kargapean badaude eta ez badaude salbuetsita (zuzentarau horretan zerga araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako kooperatiba sozietate batek sozietatearen egoitza Europar Batasuneko estatu kide batetik beste batera aldatzen duenerako).

e) Egoitza Espainian duten entitateek Europar Batasuneko estatu kideen lurraldean kokatuta dauden establezimendu iraunkorrak egoitza estatu horietan duten entitateei eskualdatzean agerian jartzen diren errentak, baldin eta eskualdaketa horiek Kontseiluaren urriaren 19ko 2009/133/EE Zuzentarauko I. eranskineko A zatian zehaztutako formetako bat badute, Zuzentarauko I. eranskineko B zatian aipatzen diren tributuetako baten kargapean badaude eta ez badaude salbuetsita (zuzentarau horretan zerga araubide bateratua ezarri zen Batasuneko estatu ezberdinetako sozietateen arteko bat-egite, zatiketa, zatiketa partzial, aktibo-ekarpen eta akzio-trukeetarako eta Europako sozietate batek edo Europako kooperatiba sozietate batek sozietatearen egoitza Europar Batasuneko estatu kide batetik beste batera aldatzen duenerako).»

Hogeita zortzi.– Amaierako paragrafo bat gehitzen zaio 126.3. artikuluari. Hona hemen haren edukia:

«Nolanahi ere, alderdi politikoek ez dituzte aitortu behar beraiek lortutako errenta salbuetsiak.»

Hogeita bederatzi.– Honela idatzita gelditzen da 128.1. artikuluaren f) letra:

«f) Merkataritza funtsari dagozkion zenbatekoak murriztea zerga oinarrian (25. artikulua).»

Hogeita hamar.– Xedapen gehigarri berri bat eransten da, hogeigarrena. Hona hemen bere edukia:

«Hogeigarren xedapen gehigarria. Sozietateen gaineko zergari lotutako sozietate zibilak.

1.– Sozietateen egoitza fiskalari buruzko araudia dela-eta sozietateen gaineko zergaren zergadun diren sozietate zibiletako entitate bazkideek beren sozietateen gaineko zergaren zerga oinarriaren barruan sartu beharko dute sozietate zibilak lortutako errenta positiboa, bakoitzari dagokion proportzioan, eta erregela hauek aplikatuko zaizkie:

a) Errenta positibo hori zerga oinarrian sartuko dute, hain zuzen, sozietate zibilak bere ekitaldi soziala amaitzen duen egunaren ostean amaitzen den lehen zergaldian.

b) Zerga oinarrian sartu beharreko errenta positiboaren zenbatekoa kalkulatzeko, foru arau honetan nahiz zerga honi buruzko gainerako xedapenetan zerga oinarria zehazteko finkatu diren printzipio eta irizpideei jarraituko zaie. Horretarako, errentatzat joko da, hain zuzen, irizpide eta printzipio horiek aplikatzetik ateratzen den zerga oinarriaren zenbatekoa.

c) Xedapen gehigarri honetan ezarritakoa aplikagarria zaien zergadunek zerga honen kuota osotik kendu ahal izango dituzte sozietateen gaineko zergaren antzeko edo pareko zerga edo kargengatik sozietate zibilak benetan ordaindutako zenbatekoak, zerga oinarrian sartutako errenta positiboari dagokion partean.

Benetan ordaindutako zergatzat joko dira, alegia, sozietate zibilak nahiz hark partaidetutako sozietateek ordaindutakoak, baldin eta haien gaineko partaidetza-portzentajea Sozietateen gaineko Zergari buruzko Foru Arauko 33.1 artikuluko a) letran ezarritako portzentajea bera bada.

Letra honetan aipatutako kenkariak ezin izango du gainditu zerga oinarrian sartutako errenta dela-eta zerga honetan ordaindu beharreko kuota osoa, eta atzerrian ordaindutako zergak kenduz gero, kenkariaren zenbatekoa ezingo da izan errenta Gipuzkoako lurralde historikoko sozietateen gaineko zergaren araudiaren menpean dagoen entitate batek ordainduz gero errenta hori dela-eta ordaindu beharreko kuota osoa baino handiagoa.

2.– Xedapen gehigarri honetan jasotakoa aplikagarria zaien zergadunek, zerga honen autolikidazioarekin batera, sozietate zibilari buruzko datu hauek aurkeztu behar dituzte:

a’) Izena edo sozietate izena, eta egoitza soziala.

b´) Administratzaileen zerrenda.

c’) Balantzea, eta galera-irabazien kontua.

d’) Sozietateen gaineko zergaren aitorpena, zerga oinarriaren barruan sartu beharreko errenta positiboaren zenbatekoa akreditatzen duena.

e’) Zerga oinarrian sartu beharreko errenta positiboa dela-eta ordaindutako zergen frogagiriak.

3.– Ez dira zerga oinarrian sartuko sozietate zibiletatik jasotako dibidenduak edo mozkinetako partaidetzak, ez eta sozietate horietako partaidetza eskualdatuz lortutako errentak ere, baldin eta errenta horiek zerga honen zerga oinarrian integratu badira xedapen gehigarri honetan ezarritakoa aplikatuz.

Tratamendu bera aplikatuko zaie konturako dibidenduei.

Errenta positibo bera behin bakarrik integratu daiteke, nola eta zer entitatetan sortzen den kontuan hartu gabe.»

Hogeita hamaika.– Beste xedapen gehigarri bat eransten da, hogeita batgarrena, honela dioena:

«Hogeita batgarren xedapen gehigarria. Beste araudi baten pean dauden ekonomia intereseko taldeetako bazkideak.

Foru arau honetako 2. artikuluko 4. apartatuan ezarritakoaren arabera ekonomia intereseko taldeak ez badaude Gipuzkoako lurralde historikoko foru araudiaren pean baina talde horietako bazkideei, aldiz, Gipuzkoako lurralde historikoko foru araudia aplikatu behar bazaie zerga honetan edo pertsona fisikoen errentaren gaineko zergan, bazkideoi beti aplikatuko zaie foru arau honetako 73. artikuluko 1. apartatuk b) letrako b’) azpiletrako bigarren paragrafoan zein b) letra horretako azken paragrafoan ezarritakoa.»

Hogeita hamabi.– Beste xedapen iragankor bat eransten da, hogeita hirugarrena, honela dioena:

«Hogeita hirugarren xedapen iragankorra. Ekonomia intereseko taldeak.

Ekonomia intereseko taldeen partaidetzei, kontabilitate irizpideen arabera ezaugarri bereziak dituzten ondare tresnatzat hartu behar badira, ez zaie aplikatuko foru arau honek 73. artikuluaren 1. apartatuko b) letraren azken paragrafoan jasotakoa, ekonomia intereseko taldeen bazkideek 2016. urtean zerga aldaketa jakin batzuk onartzen dituen 2016ko azaroaren 14ko 5/2016 FORU ARAUA indarrean jarri aurretik eskuratuak izan direnean.»

Bigarrena.– Honako xedapen hauek aldatzen dira, 2017ko urtarrilaren 1etik aurrera hasten diren zergaldietarako ondorioekin, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauan:

Bat.– Honela idatzita gelditzen da 13.4. artikuluaren lehen paragrafoa:

«Artikulu honetako aurreko apartatuetako a) letran xedatutakoari dagokionez, entitate batek ustiapen ekonomikoa egiten duela joko da baldin eta ekitaldian lortzen dituen sarreren 100eko 85, gutxienez, enpresa edo lanbide jardueretatik datozen errentak badira; ez dira errenta horietan inola ere sartuko foru arau honetako 48. artikuluaren 2. apartatuko a), b), d), e), f) eta g) letretan, entitate ez-egoiliarren errenta positibo batzuk zerga oinarrian sartzeari buruzkoan, aipatzen diren errenta motak.»

Bi.– Honela idatzita gelditzen da 33.1 artikuluaren c) letrako lehen paragrafoa:

«c) Banatzen diren edo parte hartzen den mozkinak enpresa jardueretatik etortzea. Horretarako ezinbestekoa izango da dibidendua banatzen duen entitateak ekitaldian lortutako sarreren 100eko 85, gutxienez, horrelako errenta motak izatea; ez dira errenta horietan inola ere sartuko foru arau honetako 48. artikuluaren 2. apartatuko a), b), d), e), f) eta g) letretan, entitate ez-egoiliarren errenta positibo batzuk zerga oinarrian sartzeari dagokionez, aipatzen diren errenta motak.»

Hiru.– Honela idatzita gelditzen da 39. artikuluaren 2. apartatua:

«2.– Zerga honen kontura atxikipena egin behar zaien kopuruen hartzaileak sortutako kontraprestazio osoaz zenbatuko ditu kopuru haiek.

Atxikipena egin ez bada edo behar adinatik beherako zenbatekoz egin bada, atxikitzaileari bakarrik egotzi dakiokeen arrazoi batengatik, jasotzaileak atxiki behar izan zen kopurua kenduko du kuotatik.

Legez ezarriak eta arlo publikoak ordainduak diren ordainsarietan, jasotzaileak benetan atxikitako kopuruak soilik kendu ahal izango ditu.

Sortutako kontraprestazio osoa frogatzerik ez badago, Zerga Administrazioak zenbatu ahal izango duen zenbateko osotik dagokion atxikipena kentzerakoan benetan jasotakoa geratu beharko da. Kasu horretan, kuotatik kenduko da, konturako atxikipen moduan, benetan jasotakoaren eta zenbateko osoaren arteko diferentzia.

Entitate batek foru arau honen 42. artikuluaren arabera berarekin lotutako beste entitate bati ordaindu dizkion atxiki beharreko errenten kasuan, atxikipenak azken entitate horren zergan kengarriak izango dira, horiek egin eta Zerga Administrazioan benetan ordaindu diren neurrian bakarrik.»

Lau.– Honela idatzita gelditzen dira 48. artikuluaren 2., 3. eta 4. apartatuak:

«2.– Egoitza Espainiako lurraldean ez duen entitate batek lortutako errenta positibo osoa zergadunei egotziko zaie, baldin eta entitate horrek ez badu errenta hori gauzatzeko baliabide materialen eta giza baliabideen antolaketa egokirik, nahiz eta eragiketa errepikariak izan. Nolanahi ere, dibidenduen, mozkinetako partaidetzen edo entitateen partaidetzak eskualdatuta lortzen diren errenten kasuan, artikulu honetako 3. apartatuan ezarritakoa beteko da beti.

Errenta osoa izango da, hain zuzen, foru arau honetan zein zerga honi buruzko gainerako xedapenetan zerga oinarria zehazteko ezartzen diren irizpideak eta printzipioak aplikatuz ateratzen den zerga oinarriaren zenbatekoa.

Aurreko paragrafo bietan ezarritakoa ez da aplikatuko baldin eta zergadunak egiaztatzen badu eragiketa horiek Merkataritzako Kodearen 42. artikuluan ezarritako irizpideen arabera talde berekoa den eta egoitza Espainiako lurraldean ez duen entitate baten baliabide material eta giza baliabideekin egiten direla, entitateon egoitzaren lurraldea eta urteko kontu bateratuak egiteko betebeharra kontuan hartu gabe, edo egiaztatzen badu arrazoi ekonomiko baliodunak daudela entitatea eratzeko eta haren jardunerako.

Apartatu honen lehenengo bi paragrafoetan ezarritakoa aplikatzen ez bada, dela haietan ezarritako inguruabarrak betetzen ez direlako dela aurreko lerroaldean ezarritakoa aplikatu delako, bakarrik egotziko da honako iturri hauetako bakoitzetik datorren errenta positiboa:

a) Landa zein hiri ondasun higiezinen edo haiei dagozkien eskubide errealen titulartasunetik datorrenean, salbu jarduera ekonomiko bati lotuta badaude –Pertsona Fisikoen Errentaren gaineko Zergaren Foru Arauan xedatutakoaren arabera– edo Merkataritzako Kodeko 42. artikuluari jarraituz titularraren sozietate talde berekoak diren entitate ez-egoiliarrei laga bazaie haien erabilera.

b) Edozein entitate motaren funts propioetan parte hartzea eta hirugarren batzuei kapital propioak lagatzea, Pertsona Fisikoen Errentaren gaineko Zergaren Foru Arauan aurreikusitako eran.

Ez da letra honetan sartuko honako aktibo finantzario hauetatik eratorritako errenta positiboa:

a') Jarduera ekonomikoak egiteagatik sortutako legezko eta arauzko obligazioak betetzeko edukitako aktibo finantzarioak.

b') Jarduera ekonomikoak egitearen ondorioz finkatutako kontratu harremanetatik sorturiko kreditu eskubideak jasotzen dituzten aktiboak.

c') Baloreen merkatu ofizialetan bitartekaritza jarduerak egitearen ondorioz edukitako aktiboak.

d') Kreditu eta aseguru entitateek beren jardueren ondorioz edukitako aktiboak, jarraian datorren c) letran finkatutakoa eragotzi gabe.

Kapital propioak hirugarrenei lagatzetik eratorritako errenta positiboa hurrengo c) letran aipatuko diren kreditu eta finantza jarduerak burutzetik datorrela ulertuko da, baldin eta lagatzailea eta lagapen hartzailea sozietate talde batekoak badira, Merkataritzako Kodeko 42. artikuluak zehaztutakoaren arabera, eta lagapen hartzailearen diru sarreren 100eko 85 gutxienez jarduera ekonomikoak egitetik badator.

c) Kreditu, finantza, aseguru eta zerbitzu jarduerak (esportazio jarduerekin zuzenean lotutakoak izan ezik), baldin eta jarduera horiek zeharka edo zuzenean egin badira Espainiako lurraldean egoiliar diren eta foru arau honetako 42. artikuluko 3. apartatuaren arabera lotuak diren pertsona edo entitateekin, eta baldin eta pertsona egoiliar horientzat fiskalki kengarriak diren gastuak zehazten badituzte.

Errenta positiboa ez da kontuan hartuko, baldin eta entitate ez-egoiliarrak egindako kreditu, finantza, aseguru eta zerbitzu jardueren (esportazio jarduerekin zuzenean lotutako zerbitzuena izan ezik) sarreren 100eko 50 baino gehiago lortu bada entitate horrek foru arau honetako 42. artikuluko 3. apartatuaren arabera pertsona edo entitate ez-lotutzat jotzen direnekin egindako eragiketetatik.

d) Kapitalizazio eta aseguru eragiketak, haien onuraduna entitatea bera bada.

e) Jabetza intelektuala eta industriala, laguntza teknikoa, ondasun higigarriak, irudi eskubideak eta negozio edo meategien errentamendu edo azpierrentamendua, Pertsona Fisikoen Errentaren gaineko Zergaren Foru Arauko 37. artikuluan ezarritako baldintzetan.

f) Finantza tresna deribatuak, salbu eta jarduera ekonomikoak egitetik datorren eta berariaz identifikatuta dagoen arrisku bat estaltzeko izendatutakoak.

g) Aurreko a), b), d) eta e) letretan aipatutako ondasun eta eskubideen eskualdaketak, errentak eragiten badituzte.

3.– Ez dira zerga oinarrian sartuko artikulu honetako aurreko apartatuko b) eta g) letretan ezarritako errentak (entitate ez-egoiliarrak lortutakoak), baldin eta errenta horiek badatoz edo entitate horrek zuzenean edo zeharka 100eko 5eko partaidetza baino handiagoa duen entitateetatik, edo 100eko 3ko partaidetza baino handiagoa duen entitateetatik –partaidetutako sozietatearen akzioek bigarren mailako merkatu antolatu batean kotizatzen badute–, eta, gainera, honako bi baldintza hauek betetzen badira:

a) Entitate ez-egoiliarrak partaidetzak zuzentzea eta kudeatzea, baliabide materialak eta giza baliabideak antolatuz.

b) Errenten sorburu diren entitateen sarrerak 100eko 85, gutxienez jarduera ekonomikoen ondoriozkoak izatea.

Horretarako, honako errenta hauek jarduera ekonomikoen ondoriozkoak direla ulertuko da: artikulu honetako aurreko apartatuko b) eta g) letretan aurreikusitako errentak, baldin eta errenton jatorria b) letra honetan ezarritako baldintza konplitzen duten entitateetan dutenak, eta, zuzenean nahiz zeharka, entitate ez-egoiliarrarena baldin bada entitate horietako partaidetzaren 100eko 5 baino gehiago, edo partaidetzaren 100eko 3 baino gehiago –partaidetutako sozietatearen akzioek bigarren mailako merkatu antolatu batean kotizatzen badute–.

Merkataritzako Kodearen 42. artikuluan ezarritako irizpideen arabera talde berekoak diren entitateen kasuan, entitateon egoitzaren lurraldea eta urteko kontu bateratuak egiteko betebeharra kontuan hartu gabe, partaidetza portzentajeari buruzko betekizunak zein partaidetza eta kudeaketa egoteko betekizuna betetzen diren zehazteko, taldearen parte diren entitate guztiak hartuko dira kontuan.

4.– Artikulu honetako 2. apartatuan adierazitako errentak egotzi gabe geratuko dira beren zenbatekoen batura txikiagoa bada entitate ez-egoiliarrak lortutako errenta osoaren 100eko 15 baino, apartatu horretako c) letrako errenten kasuan izan ezik, halako errentak osorik egotziko baitira.

Merkataritzako Kodeko 42. artikuluaren araberako sozietate talde batean Espainiako lurraldean ez-egoiliarrak diren entitateen multzoak lortutako errentari buruzkoa izan daiteke aurreko paragrafoan ezarritako muga.

Inoiz ere ez da sartuko entitate ez-egoiliar baten errenta osoa baino zenbateko handiagoa.»

3. artikulua.– Aldatzea oinordetzen eta dohaintzen gaineko zerga.

Honela idatzita gelditzen da Oinordetzen eta Dohaintzen gaineko Zergaren urtarrilaren 11ko 3/1990 Foru Arauaren 38. artikuluko 1. apartatua:

«1.– Organo eskudunek heriotzagatik aurkeztutako autolikidazioen kuoten ordainketa urtebetera arte geroratzea erabaki dezakete, betiere likidatutako kuotak ordaintzeko eskudiruzko inbentariaturik edota diru bilakatzen erraza den ondasun nahikorik ez badago eta erregelamenduzko ordainketa epea amaitu baino lehen eskatzen bada. Gerorapena onartzeak berarekin berandutze interesa ordaintzeko obligazioa ekarriko du.»

4. artikulua.– Aldatzea ondare eskualdaketen eta egintza juridiko dokumentatuen gaineko zerga.

Lehenengoa.– Edukirik gabe uzten da, 2015eko azaroaren 14tik aurrerako ondorioekin, Ondare Eskualdaketen eta Egintza Juridiko Dokumentatuen gaineko Zergaren abenduaren 30eko 18/1987 Foru Arauaren 41.I.B artikuluaren 29. zenbakia.

Bigarrena.– Aldatu egiten dira, foru arau hau indarrean jartzen denetik aurrerako ondorioekin, Ondare Eskualdaketen eta Egintza Juridiko Dokumentatuen gaineko Zergaren abenduaren 30eko 18/1987 Foru Arauaren xedapen hauek:

Bat.– Honela idatzita gelditzen da 6.Bat.A).1 artikuluaren bigarren paragrafoa:

«Baloreen Merkatuari buruzko Legearen testu bategineko 314. artikuluan ageri diren kasuetan, eskualdatzen diren baloreei dagokien entitatearen aktiboa osatzen duten ondasun higiezinak Gipuzkoako lurraldean daudenean (testu bategin hori 2015eko urriaren 23ko 4/2015 Legegintzako Errege Dekretuaren bidez onartu zen).»

Bi.– Honela idatzita gelditzen da 41.I.B) artikuluaren 28. zenbakia:

«28.– Subrogazio eragiketak jasotzen dituzten notario eskrituren lehen kopiak, martxoaren 30eko 2/1994 Legeak, mailegu hipotekarioak subrogatu eta aldatzeari buruzkoak, ezartzen dituen eran eta baldintzetan.

Era berean, hartzekodun eta zordunaren arteko akordioz hitzarturiko mailegu hipotekarioak aldaberritzeko eskritura publikoak salbuetsita egongo dira zergaren modalitate horretan, baldin eta hartzekoduna martxoaren 30eko 2/1994 Legeak, mailegu hipotekarioak subrogatu eta aldatzeari buruzkoak, 1. artikuluan aipatutako entitateetako bat bada eta aldaketa aipatu legeak 4. artikuluaren 2. apartatuan jasotako baldintzetako bati edo batzuei buruzkoa bada.

Apartatu honetan jasotako salbuespenak kreditu hipotekarioei ere aplikatuko zaizkie, beharkizun eta baldintza berdinetan.»

Hiru.– Honela idatzita gelditzen da 41.I artikuluaren C) letra:

«C) Sozietate laboral eta partaidetuei buruzko urriaren 14ko 44/2015 Legearen arabera lan sozietate gisa kalifikatutako sozietateek 100eko 99ko hobaria izango dute zerga honetan doako ondare eskualdaketak direla-eta sortzen diren kuotetan, baldin eta zuzenbidean onartzen den edozein bide erabiliz eskuratzen badituzte lan sozietateko bazkide langile gehienen sorburu den enpresaren ondasunak eta eskubideak.

Sozietate bati lan sozietate kalifikazioa kentzen bazaio, aurreko paragrafoan aipatutako legean ezarritakoaren arabera, sozietate horrek galdu egingo ditu lan sozietate izateagatik izandako tributu onurak, deskalifikatzeko arrazoia gertatzen denetik galdu ere, eta erabilitako onurak zein haiei dagozkien berandutze interesak itzuli beharko ditu.»

5. artikulua.– Aldatzea jarduera ekonomikoen gaineko zerga.

Jarduera Ekonomikoen gaineko Zergaren testu bateginari buruzko apirilaren 20ko 1/1993 Foru Dekretu Araugilearen 5.1 artikuluaren b) letra aldatu egiten da, eta honela idatzita gelditzen da:

«b) Beren jarduera hasten duten subjektu pasiboak, jarduera garatzen duten zerga honen lehen bi zergaldietan.

Ez da ulertuko jarduera ekonomiko bat hasi denik zergadunak aurretik hura zuzenean edo zeharka egina duenean. Horretarako, ulertuko da zergadunak jarduera bera egiten duela jarduera hori testu bategin honen I. eranskinaren barruko talde berean sailkatuta dagoenean.

Gainera, kasu hauetan ulertuko da jarduerari ez zaiola hasierarik eman:

a’) Jarduera batean lehenago beste titulartasun batekin aritu denean; zirkunstantzia hori betetzen dela joko da, besteak beste, bat-egiteak, zatiketak edo jarduera adarren ekarpenak egiten badira.

b’) Subjektu pasiboa Merkataritza Kodeko 42. artikuluaren arabera sozietate talde bateko kide denean, non eta ez den taldeko enpresetako batek lehenago garatu gabeko jarduera berri bat.

c’) Jarduera bera egin duten enpresek 100eko 25eko edo hortik gorako partaidetza badute.»

6. artikulua.– Aldatzea kooperatiben zerga araubidea.

Aldatu egiten dira, 2016ko urtarrilaren 1etik aurrera hasitako zergaldietarako ondorioekin, Kooperatiben Zerga Erregimenari buruzko maiatzaren 22ko 2/1997 Foru Arauaren xedapen hauek:

Bat.– Honela idatzita gelditzen da 26. artikuluaren 3. apartatua:

«3.– Halaber, sozietateen gaineko zergan amortizazio askatasuna izan dezakete aktibo ez-korronteko elementu berri amortizagarriek, hain zuzen ere kooperatiben erregistro egokian inskribatu direnetik hiru urteko epealdian eskuratu badira.

Amortizazio askatasunaren kontzeptuan fiskalki kengarria den zenbatekoa ezin izango da handiagoa izan, behin ekitaldi bakoitzeko amortizazio normala gutxienekoa baino txikiagoa ez den kopuruan egin ondoren, emaitzen kontuaren saldoaren zenbatekoa baino, betiere nahitaez derrigorrezko erreserbako funtsari egin beharreko aplikazioak eta soldatapeko langileen partaidetzak gutxituta.

Elementu berberetarako, onura hau bateragarria da, hala badagokio, Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren V. tituluko III. kapituluan ezarritako inbertsio kenkariekin.

Apartatu honetan aipatzen den amortizatzeko askatasuna aukerakoa da, eta autolikidazioa aurkezten denean gauzatuko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 128. artikuluan ezarritakoaren ondorioetarako, eta artikulu horretako 1. apartatuko c) letran araututakoaren tratamendu bera jasoko du.»

Bi.– Honela idatzita gelditzen da 27. artikuluko 2. apartatua:

«2.– Sozietateen gaineko zergan, kuota likidoaren 100eko 50eko kenkaria izan ahal izango dute.

Nekazaritzako ustialekuak modernizatzeari buruzko uztailaren 4ko 19/1995 Legeak 5. artikuluan lehentasunezkotzat jotzen dituen ustialeku elkartuak foru arau honen arabera bereziki babestutako nekazaritza kooperatibatzat hartzen direnean, 100eko 75eko kenkaria izango dute kuota likidoan.

Era berean, foru arau honen 26. artikuluko 2. apartatuko hirugarren eta laugarren paragrafoetan ezarritako portzentajeak zuzenduko dira zenbaki honetan ezarritako kenkari portzentajeetatik eratorritako proportzioak aplikatuz.

Apartatu honetan aipatzen den kenkaria aukerakoa da, eta autolikidazioa aurkezten denean gauzatuko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 128. artikuluan ezarritakoaren ondorioetarako, eta ezin da aldatu borondatezko aitorpen epea amaituta badago.»

7. artikulua.– Aldatzea irabazi asmorik gabeko entitateen zerga araubidea eta mezenasgoaren aldeko zerga pizgarriak.

Aldatu egiten dira, 2016ko urtarrilaren 1etik aurrera hasitako zergaldietarako ondorioekin, Irabazi asmorik gabeko entitateen zerga erregimenari eta mezenasgoaren aldeko zerga pizgarriei buruzko apirilaren 7ko 3/2004 Foru Arauaren xedapen hauek:

Bat.– Honela idatzita gelditzen da 19.1. artikuluaren e) letra:

«e) Kalitate bermatuko kultur ondasunen emaitzak, dohaintzak edo aldi baterako doako lagapenak, kalitatea Gipuzkoako Foru Aldundian kultura arloan eskumena duen departamentuak baloratuta, baldin eta museo jarduerak egitea eta ondare historiko-artistikoa sustatzea eta zabaltzea xede duten entitateen alde egiten badira:

Aldi baterako doako lagapenen aldia ezin izango da 25 urtetik gorakoa izan.»

Bi.– Honela idatzita gelditzen da 20.1. artikuluaren g) letra:

«g) Kalitate bermatuko artelanen emaitzetan edo dohaintzetan, Gipuzkoako Foru Aldundian kultura arloan eskumena duen departamentuak egindako balorazioa. Departamentu horrek aldi baterako doan lagatzen diren ondasunen balorazioa zehaztu ere egingo du, eta, kasu horretan, kenkariaren oinarria kalkulatzeko, urte oso bakoitzeko ehuneko biko portzentajea aplikatuko zaio balorazioari.»

Hiru.– Honela idatzita gelditzen da 22. artikulua:

«22. artikulua.–Emaitzen kenkaria sozietateen gaineko zergaren zerga oinarria zehaztean.

Sozietateen gaineko zergaren zerga oinarria zehazteko, partida kengarritzat hartu ahal izango da foru arau honen 20. artikuluan jasotakoaren arabera baloratutako emaitzen, dohaintzen, ekarpenen eta zerbitzuen doako prestazioen zenbatekoa.

Artikulu honetan aipatzen den partida kengarriaren aplikazioa aukerakoa da, eta autolikidazioa aurkezten denean gauzatuko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 128. artikuluan jasotakoaren ondorioetarako, eta ezin izango da aldatu borondatezko aitorpen epea amaituta badago.»

Lau.– Honela idatzita gelditzen da 26. artikuluko 2. apartatua:

«2.– Ordaindutako diru kopuruak edo egindako gastuak kengarritzat hartu ahal izango dira, honako hauek zehazteko: sozietateen gaineko zergan entitate laguntzailearen zerga oinarria, ez-egoiliarren errentaren gaineko zergan establezimendu iraunkor baten bitartez diharduten zergadunen zerga oinarria eta pertsona fisikoen errentaren gaineko zergan zuzeneko zenbatespenaren metodoa erabili ohi duten zergadunen jarduera ekonomikoaren etekin garbia.

Apartatu honetan aipatzen den gastu kengarriaren aplikazioa aukerakoa da, eta autolikidazioa aurkezten denean gauzatuko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 128. artikuluan jasotakoaren ondorioetarako, eta ezin izango da aldatu borondatezko aitorpen epea amaituta badago.»

Bost.– Honela idatzita gelditzen da 27. artikuluaren 1. apartatua:

«1.– Interes orokorreko xedeetarako egindako gastuak kengarritzat hartu ahal izango dira, honako hauek zehaztean: sozietateen gaineko zergaren zerga oinarria, establezimendu iraunkor baten bitartez diharduten zergadunen ez-egoiliarren errentaren gaineko zergaren oinarri ezargarria eta pertsona fisikoen errentaren gaineko zergan zuzeneko zenbatespenaren metodoa erabili ohi duten zergadunen jarduera ekonomikoaren etekin garbia.

Apartatu honetan aipatzen den gastu kengarriaren aplikazioa aukerakoa da, eta autolikidazioa aurkezten denean gauzatuko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 128. artikuluan jasotakoaren ondorioetarako, eta ezin izango da aldatu borondatezko aitorpen epea amaituta badago.»

Sei.– Aldatu egiten da 28. artikuluaren 1. apartatuko lehen paragrafoa, haren egungo 5. apartatua 6. apartatua izatera pasatzen da eta 5. apartatu berri bat eransten zaio artikulu horri. Hona hemen haien edukia:

«1.– Partida kengarritzat hartu ahal izango da foru arau honen III. tituluko I. kapituluan aipatutako entitateei dohaintzan emateko erosiak diren artelanen eskurapen balioa, sozietateen gaineko zergaren zerga oinarria, establezimendu egonkorraren bitartez jarduten diren ez-egoiliarren errentaren gaineko zergaren zerga oinarria eta, zuzeneko zenbatespen araubidea duten enpresari eta profesionalen kasuan, pertsona fisikoen errentaren gaineko zergaren zerga oinarria zehazteko.»

«5.– Apartatu honetan aipatzen den partida kengarriaren aplikazioa aukerakoa da, eta autolikidazioa aurkezten denean gauzatuko da Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 128. artikuluan jasotakoaren ondorioetarako, eta ezin izango da aldatu borondatezko aitorpen epea amaituta badago.»

Zazpi.– Honela idatzita gelditzen da 29.1 artikuluaren b) letra:

«b) Sozietateen gaineko zergaren zergadunek eta establezimendu iraunkorraren bitartez jarduten diren ez-egoiliarren errentaren gaineko zergaren zergadunek lehentasunezkotzat hartutako jardueretarako diren kopuruen 100eko 18ko kenkaria egin ahal izango dute kuota likidoan, baita publizitate babesa emateko kontratuen kasuan ere.

Letra honetan jasotako kenkariari aplikagarriak izango zaizkio Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 67. artikuluan jasotako arauak. Kenkariaren aplikazioa aukerakoa da, eta autolikidazioa aurkezten denean gauzatuko da foru arau horren 128. artikuluan jasotakoaren ondorioetarako, eta ezin izango da aldatu borondatezko aitorpen epea amaituta badago.»

Zortzi.– Honela idatzita gelditzen da 30.3.Lehena artikuluaren azken paragrafoa:

«Lehen zenbaki honetan jasotako kenkariari aplikagarriak izango zaizkio Gipuzkoako Lurralde Historikoko Sozietateen gaineko Zergaren urtarrilaren 17ko 2/2014 Foru Arauaren 67. artikuluan jasotako arauak. Kenkariaren aplikazioa aukerakoa da, eta autolikidazioa aurkezten denean gauzatuko da foru arau horren 128. artikuluan jasotakoaren ondorioetarako, eta ezin izango da aldatu borondatezko aitorpen epea amaituta badago.»

8. artikulua.– Aldatzea 2011ko abenduaren 26ko 5/2011 Foru Araua, Pertsona Fisikoen Errentaren gaineko Zerga ekitatea lortzeko bidean aldatu eta beste neurri tributario batzuk onartzen dituena.

Idazkera berria ematen zaio, 2015eko urtarrilaren 1etik aurrerako ondorioekin, Pertsona Fisikoen Errentaren gaineko Zerga ekitatea lortzeko bidean aldatu eta beste zerga neurri batzuk onartzen dituen abenduaren 26ko 5/2011 Foru Arauaren lehen xedapen gehigarriari. Honela idatzita gelditzen da:

«Lehenengoa.– Lehentasunezko partaidetzen zerga araubidea.

1.– Hau da Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehen xedapen gehigarriko 1., 2. eta 5. apartatuetan ezarritako betekizunak betez jaulkitzen diren lehentasuneko partaidetzen zerga araubidea:

a) Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehen xedapen gehigarriko 3. apartatuko a) letran aipatzen den ordainsaria gastu kengarria izango da entitate jaulkitzailearentzat.

b) Lehentasunezko partaidetzen ondorioz lortzen diren errentak norberaren kapitala hirugarrenei lagaz lortutako etekintzat hartuko dira, Pertsona Fisikoen Errentaren gaineko Zergaren urtarrilaren 17ko 3/2014 Foru Arauko 35. artikuluan ezarritakoaren arabera.

c) Jaulkipena egiten duena sozietate filial bat bada, lortutako baliabideak kreditu entitate nagusian gordailuan uzteak sortutako etekinei ez zaie inolako atxikipenik egingo, eta, hala badagokio, Ez-egoiliarren Errentaren gaineko Zergaren abenduaren 10eko 16/2014 Foru Arauko 14. artikuluko 1. apartatuko e) letran ezartzen den salbuespena aplikatuko zaie.

d) Ez-egoiliarren errentaren gaineko zergaren zergadunek, establezimendu iraunkorrik gabe, lehentasunezko partaidetzetatik lortzen dituzten errentak salbuetsita egongo dira, Ez-egoiliarren Errentaren gaineko Zergaren abenduaren 10eko 16/2014 Foru Arauko 14. artikuluaren arabera zor publikotik eratorritako etekinak salbuetsita dauden bezala.

e) Lehentasunezko partaidetzak jaulkitzearen ondoriozko eragiketak salbuetsita daude ondare eskualdaketen eta egintza juridiko dokumentatuen gaineko zergako sozietate eragiketen modalitatean.

2.– Kreditu entitateen talde edo azpitalde kontsolidagarri bat ordezkatzen duen kreditu entitateak informazioa eman behar dio Zerga Administrazioari, erregelamenduz ezarritako eran. Batetik, jakinarazi behar dio zer jarduera egin duten Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehen xedapen gehigarriko 2. apartatuko a) letran aipatzen diren filialek. Bestetik, Administrazioari esan behar dio filial horiek jaulkitako baloreen titularretatik zeintzuk diren pertsona fisikoen errentaren gaineko zergaren zergadunak eta zeintzuk sozietateen gaineko zergaren zergadunak. Eta, azkenik, adierazi behar dio ez-egoiliarren errentaren gaineko zergaren zer zergadunek lortzen dituzten balore horien ondoriozko errentak helbidea Gipuzkoan duen establezimendu iraunkorraren bidez.

3.– Xedapen honetako 1. eta 2. apartatuetan ezartzen den araubidea aplikatuko zaie Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehen xedapen gehigarriko 2. apartatuko a), b), c), d) eta e) letretan aipatzen diren eskakizunak bete eta merkatu antolatuetan kotizatzen duten kreditu entitateek egiten dituzten zor tresnen jaulkipenei ere. Kasu horietan, 10/2014 Legearen lehen xedapen gehigarriko 2. apartatu horretako a) letran aipatzen den jarduera edo xede bakarra lehentasunezko partaidetzak jaulkitzeari zein beste finantza tresna batzuk jaulkitzeari dagokio.

Araubide horixe bera aplikatuko zaie merkatu arautuetan, negoziazio sistema aldeaniztunetan edo beste merkatu antolatu batzuetan kotizatzen duten eta gainera, Enpresen finantzaketa sustatzeari buruzko apirilaren 27ko 5/2015 Legean arautzen diren titulizazio funtsen kargura jaulkitako baloreei.

4.– Xedapen gehigarri honetan xedatutakoa aplikatuko zaie, halaber, Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehen xedapen gehigarriko 7. apartatuan aipatzen diren lehentasunezko partaidetzei.

5.– Xedapen honetako 1. eta 2. zenbakietan jasotzen den zerga-araubidea Espainiako egoiliarrak diren sozietateek eta enpresa-erakunde publikoek jaulkitako zor-tresnei ere aplikatuko zaie. Kasu horietan, zor tresnek Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehenengo xedapen gehigarriko 2. apartatuko c), d) eta e) letretan ezarritako betekizunak bete beharko dituzte.

Era berean, zerga araubide hori aplikatuko zaie Europar Batasuneko lurralde bateko egoiliarra den sozietate batek jaulkitako zor tresnei ere, baldin eta lurralde hori ez bada paradisu fiskaltzat jotzen eta sozietate horren boto eskubide guztiak, zuzenean edo zeharka, aurreko paragrafoan aipatzen diren Espainiako entitate egoiliarrei badagozkie. Kasu horietan, zor tresnek Kreditu entitateen antolamendu, gainbegiraketa eta kaudimenari buruzko ekainaren 26ko 10/2014 Legeko lehenengo xedapen gehigarriko 2. apartatuko b), c), d) eta e) letretan ezarritako betekizunak bete beharko dituzte.»

XEDAPEN IRAGANKORRA.– Lehentasunezko partaidetzen eta zor tresnen zerga araubide iragankorra.

Foru arau honek 8. artikuluan jasotakoa indarrean jartzeak ez du aldatuko artikulu horren ondorio dataren aurretik jauki diren lehentasunezko partaidetzei eta beste zor tresna batzuei aplikagarri zaien zerga araubidea.

XEDAPEN INDARGABETZAILEA

Indarrik gabe gelditzen dira foru arau honetan xedatutakoarekin bat ez datozen maila bereko edo txikiagoko xedapen guztiak.

AMAIERAKO XEDAPENA.– Indarrean jartzea eta ondorioak izatea.

Foru arau hau Gipuzkoako Aldizkari Ofizialean argitaratu eta biharamunean jarriko da indarrean, bere xedapenetan berariaz jasotako ondorioak eragotzi gabe.

Azterketa dokumentala