Euskal Herriko Agintaritzaren Aldizkaria

219. zk., 2011ko azaroaren 18a, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

JUSTIZIA ADMINISTRAZIOA

Bilboko Lehen Auzialdiko 5 Zenbakiko Epaitegia

5628

EDIKTUA, ezkontzaz kanpoko seme-alabentzako neurrietarako 373/10 prozeduraren ondoriozkoa.

Bilboko (Bizkaia) Lehen Auzialdiko 5 zenbakiko Epaitegia.

Judizioa: 373/10 ezkontzaz kanpoko seme-alabentzako neurriak.

Demandatzailea: Angele Pokossy Moussissa.

Abokatua: Eduardo Saenz Manso.

Prokuradorea: Teresa Martinez Sanchez.

Demandatua: Serge Maurice Ekoule.

Gaia: KZ I.LIB. IV.-VII. TIT.

Judizio horretan epaia eman da, eta honakoa da epaitza:

Partez baietsi dut Teresa Martínez Sánchez prokuradoreak Angele Pokossy Moussissaren izenean eta ordez aurkeztu duen demanda, auzi-ihesean denSerge Maurice Ekouole-ren aurkakoa. Horiek horrela, neurri hauek erabaki ditut:

1.- Alaba adingabearen zaintza eta jagoletza amari esleitzen zaizkio eta adingabearen gaineko guraso-ahalari dagozkion gainerako ahalmenak, halaber, berak bakarrik izango ditu.

2.- Aita alabarekin harremanetan jartzeko eta berarekin egoteko modua bi gurasoek aho batez onartutakoa izango da.

3.- Aitak 150 euro ordainduko dizkio hilero amari, alaba adingabearen mantenu modura. Aurreratuta eta hil bakoitzaren lehenengo bost egunen barruan ordainduko du, amak izendatzen duen kontuan dirua sartuz; zenbateko hori urtero urtarrilean eguneratu beharko da Estatistikako Institutu Nazionalak edo hori ordezkatzen duen erakundeak argitaratutako prezioen aldaketen arabera, oinarritzat justu aurreko hamabi hilabeteak hartuz, eta lehen eguneratzea 2008ko urtarrilean burutuko da. Ordainketa egin ezean, bidezko legezko neurriak hartuko dira.

4.- Gurasoek erdibana ordainduko dituzte alabaren ohiz kanpoko gastuak. Halakotzat joko dira mediku-, farmazia-, optika-, odontologia-zerbitzuek sortutako gastuak, eta Gizarte Segurantzak edo mediku-aseguru pribatu batek bere gain hartzen ez dituen gainerako mediku-gastuak. Halakotzat joko dira, orobat, irakasle edo tutoreek gomendatuta, ikasketa-prozesuaren indargarri eta lagungarri alabak jaso behar dituen eskolak. Gainerako gastuak -premiazkoak ez badira, aisialdiak edo eskolak sortuak badira, eta guraso biek erabakitakoak ez badira- egitea erabaki duenak ordaindu beharko ditu, gasturik egin bada behintzat. Nolanahi ere, bi gurasoek aho batez hartutako erabakia izan bada, erdibana ordainduko dituzte.

5.- Auzi-izapide honetan ez da bestelako neurririk hartuko.

Prozedura hau izapidetzerakoan sortutako prozesu-kostuak ez zaizkio inori ezartzen.

Ebazpen honen aurka apelazio-errekurtsoa aurkez daiteke, epaitegi honetan. Errekurtsoa prestatzeko, idazkia aurkeztu behar da epaitegi honetan, jakinarazpena egin eta biharamunetik bost egun balioduneko epean. Idazki horretan, bestalde, honakoak adieraziko dira: apelatutako ebazpena, errekurritzeko nahia eta zein erabaki inpugnatzen den (Prozedura Zibileko 1/2000 Legea, 457.2 eta 774. artikuluak).

Errekurtsoa aurkeztu ahal izateko, 50 euroko gordailua jarri beharko da, eta baldintza hori bete ezean ez da hura izapidetzea onartuko. Gordailua gauzatzeko, epaitegi honek Banesto (Banco Español de Crédito) taldean duen Gordailu eta Kontsignazioen Kontuan (4709 zenbakia) kontsignatu beharko da aipatu zenbatekoa; errekurtsoa aurkeztean egiaztatu beharko da kontsignazioa (BJLO, 15. xedapen gehigarria).

Errekurtsoa jartzeko gordailua eratzetik salbuetsita daude aipatutako xedapenaren 5. paragrafoan aipatzen direnak eta doako laguntza juridikorako eskubidea aitortua dutenak.

Eta epai honen bidez, erabaki, agindu eta sinatzen dut.

Serge Maurice Ekoule demandatuaren egungo bizilekua ezezaguna denez, aipatutako ebazpena Euskal Herriko Agintaritzaren Aldizkarian ediktu bidez jakinaraztea erabaki da, Prozedura Zibilaren 1/2000 Legearen 497.2 artikuluan xedatutakoaren arabera (PZLb).

Ebazpen horren aurka, apelazio-errekurtsoa aurkez dezake auzi-ihesean den demandatuak.

Jakinarazten den ebazpenaren testu osoa interesdunaren eskura dago, epaitegi honetako bulego judizialean.

Bilbao (Bizkaia), 2011ko urriaren 14a.

IDAZKARI JUDIZIALA.