Euskal Herriko Agintaritzaren Aldizkaria

61. zk., 2011ko martxoaren 29a, asteartea

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Justizia Administrazioa

Barakaldoko Lehen Auzialdiko 5 Zenbakiko Epaitegia

1792

EDIKTUA, ezkontzaz kanpoko seme-alabenganako neurriei buruz bideratutako 838/10 prozeduraren ondoriozkoa.

JAKINARAZPEN-ZEDULA

Epaia eman da Barakaldoko Lehen Auzialdiko 5 zenbakiko Epaitegian (Bizkaia) bideratutako 838/10 prozeduran (ezkontzaz kanpoko seme-alabenganako neurriak). N.M.P.P.-k sustatua da prozedura, Jorge Ricardo Cadenillas Silvaren aurka (guraso eta seme-alaben arteko harremanak). Hona hemen idazpurua eta epaitza, kopiatuta:

127/11 EPAIA

Barakaldo, bi mila eta hamaikako otsailaren hogeita bia.

Nik, M.ª Jesús Gómez Soriak, Barakaldoko (Bizkaia) Lehen Auzialdiko (Familia) 5 zenbakiko Epaitegiko magistratu-epaile naizen aldetik, ikusi ditut guraso eta seme-alaben arteko neurrietarako 838/10 autoak. Auto horiek N.M.P.P.-k -Suárez prokuradoreak ordezkatuta eta Fernández letratuak lagunduta- aurkeztutako demanda dela-eta bideratu dira, auzi-ihesean dagoen Jorge Ricardo Cadenillas Silvaren aurka. Ministerio Fiskalak parte hartu du.

EPAITZA

Partez baietsi dut N.M.P.P.-ren ordezkariak aurkeztutako demanda, José Ricardo Cadenillas Silvaren aurkakoa. Horregatik, bien alaba S.-ri dagokionez, ondoko neurriak hartzea erabaki dut:

- Amari izendatu zaio alabaren zaintza eta babespea; guraso-ahala, berriz, aitak eta amak edukiko dute. Zuzenbidezko bigarren oinarriak ezarritako bisita-erregimena izango du aitak.

- Aitari ezartzea alabarentzako elikagai-pentsio bat, hilean 300 eurokoa. Zenbateko hori aurreratuta ordaindu beharko du, hil bakoitzaren lehenengo bost egunen barruan, amak izendatzen duen kontuan. Zenbatekoa urtero egunera daiteke, Estatistikako Institutu Nazionalak edo hori ordezkatzen duen erakundeak argitaratutako Kontsumoko Prezioen Indizearen arabera. Guraso biek erdibana ordainduko dituzte adingabeak sortzen dituen aparteko gastuak.

Ez da kosturik ezarri.

Jakinaraz bekie epai hau alderdiei, eta aditzera eman ez dela irmoa eta apelazio-errekurtsoa aurkez dezaketela epaitegi honetan bost eguneko epean. Probintzia Auzitegia arduratuko da errekurtsoaz.

Errekurtsoa jarri ahal izateko, 50 euroko gordailua aurkeztu beharko da, eta baldintza hori bete ezean ez da hura izapidetzea onartuko. Gordailua egiteko, diru hori kontsignan utzi beharko da Epaitegi honek Banesto taldean (Banco Español de Crédito) duen Kontsignazio eta Gordailu Kontuan. Kontsignazio hori frogatu beharko da errekurtsoa prestatu ahal izateko (BJLOko 15. XG).

Errekurtsoa jartzeko, gordailua eratzetik salbuetsita daude aipatutako xedapenaren 5. paragrafoan aipatzen direnak eta doako laguntza juridikorako eskubidea aitortua dutenak.

Ebazpen honen ziurtagiria egin eta jarduketei erants bekie, eta sar bedi jatorrizkoa Epaien Liburuan.

Hala erabaki, agindu eta sinatu dut.

Jorge Ricardo Cadenillas Silva demandatuari behar bezalako jakinarazpena egiteko balio dezan eman eta sinatzen dut ediktu hau, Barakaldon (Bizkaia), bi mila eta hamaikako otsailaren hogeita bian.

IDAZKARIA.