Euskal Herriko Agintaritzaren Aldizkaria

174. zk., 2010eko irailaren 9a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Bestelako Xedapenak

Justizia eta Herri Administrazio Saila

4150

AGINDUA, 2010eko maiatzaren 24koa, Justizia eta Herri Administrazioko sailburuarena, Vitoria-Gasteizko «Fundación Sancho El Sabio» fundazioaren estatutuetako 14. eta 20. artikuluetan egindako aldaketak onartu eta inskribatzeko dena.

Ikusita eta aztertuta geratu da «Fundación Sancho El Sabio» fundazioaren estatutuen aldaketa Euskal Autonomia Erkidegoko Fundazioen Erregistroan inskribatzeko eskaerari buruzko espedientea.

AURREKARIAK

Lehenengoa.- 2010eko maiatzaren 13an, Justizia eta Herri Administrazio Saileko Erregistroan, sarrera eman zaio José Ignacio Besga Zuazola jaunak «Fundación Sancho El Sabio» fundazioaren izenean eta ordezkaritzan aurkeztutako idazkiari.

Eskaerarekin batera, fundazioaren eskritura publikoaren kopia eskuetsia eta bikoitza aurkeztu da; hain zuzen, 2005eko apirilaren 4an José Ignacio Besga Zuazolak, fundazioaren patronatuko idazkariak, Alfredo Pérez Ávila Vitoria-Gasteizko notario jaunaren aurrean egiletsi zuen eskritura publikoarena (protokolo-zenbakia: 1.113).

Eskritura publikoan 2004ko ekainaren 24an egindako bileraren aktaren ziurtagiria dator erantsita. Bilera horretan fundazioaren estatutuetako 14. eta 20. artikuluak aldatzea erabaki zen. Ziurtagiria 2005eko martxoaren 17an José Ignacio Besga Zuazolak, «Fundación Sancho El Sabio» fundazioaren patronatuko idazkariak, egina da, eta Gregorio Rojo patronatuko presidente jaunaren oniritzia du.

Ziurtagirian, fundazio-estatutuetan aldatutako artikuluen osoko berridazketa bat jasotzen da.

Bigarrena.- Euskal Autonomia Erkidegoko Fundazioen Erregistro, Aholkularitza eta Kontrol Unitateko Zerbitzu Teknikoek aztertu dute espedientea eta, ondoren, ebazpen-proposamena egin dute.

OINARRI JURIDIKOAK

Lehenengoa.- Justizia eta Herri Administrazioko sailburuari dagokio fundazioaren estatutuen aldaketa inskribatzeko espedientea agindu bidez ebaztea. Hala ezarrita dago: Euskal Autonomia Erkidego Fundazioen Legeko 40. artikuluan; Euskal Autonomia Erkidegoko Fundazioen Erregistroaren Erregelamendua onartzen duen ekainaren 19ko 101/2007 Dekretuaren 3. artikuluan; eta, lehendakariak 2009ko maiatzaren 8an Euskal Autonomia Erkidegoaren Administrazioko sailak sortu, ezabatu eta aldatzeko eta horien egitekoak eta jardun-arloak finkatzeko eman zuen 4/2009 Dekretuaren 9,1.e) artikuluan.

Bigarrena.- Estatutuen aldaketa onartzeko eta aldaketa hori Euskal Autonomia Erkidegoko Fundazioen Erregistroan inskribatzeko espedienteari funtsezko iritzitako datu eta agiriak erantsi zaizkio, eta bereziki, hauek: Euskal Autonomia Erkidegoko Fundazioei buruzko ekainaren 17ko 12/1994 Legearen 31. artikuluan eskatutakoak eta Euskal Autonomia Erkidegoko Fundazioen Erregistroaren Erregelamenduaren 44. artikuluan eskatutakoak. Azken erregelamendu hori ekainaren 19ko 101/2007 Dekretuaren bidez onartu zen.

Euskal Autonomia Erkidegoko Fundazioei buruzko ekainaren 17ko 12/1994 Legeko 31. artikuluan ezarritako araudian jasotakoa betez, estatutuen aldaketak ez baditu Fundazioaren helburuak aldatzen, eta fundatzaileak ez badu beren-beregi debekurik jartzen, Fundazioaren helburuei eutsi egiten zaiela ulertuko da, Babeslaritzaren Aholkularitza Batzorde Teknikoak 2009ko irailaren 10ean egindako bilkuran ezarritako irizpide berrien arabera, eta ez da beharrezkoa izango Babeslaritzaren aldez aurretiko onarpena, aipatutako artikuluko 4. zenbakian adierazitakoa hain zuzen ere. Hori horrela da ezen, uste baita, debekurik ez egotea segurtasun eta argitasun juridikoko arrazoiengatik baino ezin dela ezarri fundazioaren negozioa gauzatzerakoan.

Aipatu artikuluak eta aplikagarriak diren gainerako arauak ikusi dira.

Justizia eta Herri Administrazioko sailburuak hau

EBATZI DU:

Lehenengoa.- «Fundación Sancho El Sabio» fundazioaren estatutuen 14. eta 20. artikuluetan egindako aldaketak onartzea.

Bigarrena.- Fundazioaren estatutuen aldaketa inskribatzeko agintzea, agindu honen data duela, eta 2004ko ekainaren 24an fundazioko patronatuak egindako bileran hartutako erabakiak publiko egiteko eman zen eskritura publikoan ezarritakoarekin bat etorriz. Eskritura publiko hori Alfredo Pérez Ávila Vitoria-Gasteizko notario jaunak eskuetsi zuen, 2005eko apirilaren 4an, 1.113 protokolo-zenbakia emanda.

Hirugarrena.- Agindu hau Euskal Herriko Agintaritzaren Aldizkarian argitaratzea.

Agindu honek administrazio-bidea amaitzen du; beraz, bere aurka aukerako berraztertzeko errekurtsoa aurkez dakioke Justizia eta Herri Administrazioko sailburuari, hilabeteko epean, agindua jakinarazten den egunaren biharamunetik aurrera; bestela, administrazioarekiko auzi-errekurtsoa aurkez daiteke, Euskal Autonomia Erkidegoko Auzitegi Nagusiko Administrazioarekiko Auzietako Salan, bi hilabeteko epean, agindua jakinarazten den egunaren biharamunetik aurrera.

Vitoria-Gasteiz, 2010eko maiatzaren 24a.

Justizia eta Herri Administrazioko sailburua,

IDOIA MENDIA CUEVA.