Euskal Herriko Agintaritzaren Aldizkaria

56. zk., 2010eko martxoaren 24a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

Xedapen Orokorrak

Hezkuntza, Unibertsitate eta Ikerketa Saila

1721

AGINDUA, 2010eko otsailaren 19koa, Hezkuntza, Unibertsitate eta Ikerketako sailburuarena, lanbide-heziketako heziketa-zikloen ezarpena eta ebaluazioa arautzen duena.

Hezkuntzari buruzko maiatzaren 3ko 2/2006 Lege Organikoak ezarritako hezkuntza-sistemaren antolamendu berria aplikatzeko egutegia ezartzen duen ekainaren 30eko 806/2006 Errege Dekretuak xedatzen duenez, adierazitako hezkuntzari buruzko maiatzaren 3ko 2/2006 Lege Organikoaren aplikazio-epearen barruan gauzatu beharko da lanbide-heziketako ikasketei dagozkien tituluen eta horien curriculumen ezarpena. Gaineratzen du, aurreko paragrafoan aurreikusten den ezarpena gauzatzen ez den artean, indarrean jarraituko dutela hezkuntza-sistemaren antolamendu orokorrari buruzko urriaren 3ko 1/1990 Lege Organikoaren ondoriozko titulazioek eta curriculumek.

Bestalde, Hezkuntza Sistemako Lanbide Heziketaren antolamendu orokorra ezartzen duen otsailaren 26ko 32/2008 Dekretuaren helburua da heziketa-zikloek bete beharreko egitura, antolamendua eta arauak ezartzea eta ziklo horien tituluak eta curriculuma Euskal Autonomia Erkidegoan garatzea.

Tituluak ezartzen dituzten eta gutxieneko ikaskuntzak finkatzen dituzten Errege Dekretuak Estatuko Aldizkari Ofizialean argitaratzen hasita, Agindu honen helburua da titulu berriek Euskal Autonomia Erkidegoan izango duten ezarpena eta ikasleen ebaluazioa arautzea, betiere dagozkien curriculumak ezartzen dituzten Dekretuak indarrean jarri ondoren. Horrenbestez, honakoa

XEDATU DUT:

1. artikulua.- Helburua eta aplikazio-esparrua.

Agindu honen helburua da Hezkuntzari buruzko maiatzaren 3ko 2/2006 Lege Organikoaren ondoriozko lanbide-heziketako heziketa-zikloek Euskal Autonomia Erkidegoko ikastetxe publikoetan eta pribatuetan izango duten ezarpena eta ebaluazioa arautzea.

2. artikulua.- Heziketa-ziklo berrien ezarpena.

1.- Urtero finkatuko dira Hezkuntzari buruzko maiatzaren 3ko 2/2006 Lege Organikoaren ondoriozko zer heziketa-ziklo ezarriko diren.

2.- Hezkuntza-sistemaren antolamendu orokorrari buruzko urriaren 3ko 1/1990 Lege Organikoaren ondoriozko heziketa-zikloetako ikasleek, heziketa-ziklo berria ezartzeko unean, gerta daiteke 2. kurtsora igarotzea eragozten dieten modulu kopuru jakin bat gainditu gabe edukitzea. Ikasle horiek, beraz, Hezkuntzari buruzko Lege Organikoaren ondoriozko heziketa-ziklo berriaren lehen kurtsoan matrikulatu beharko dute. Kasu horretan, titulua eta dagozkion gutxieneko ikaskuntzak ezartzen dituen Errege Dekretuan aurreikusten diren baliozkotzeak aplikatuko dira.

3.- Bigarren kurtsoa ikasteko baldintzak betetzen dituzten ikasleek lehen kurtsoko lanbide-moduluren bat gainditu ez badute, bi deialdi izango dituzte segidako hurrengo bi ikasturteetako bakoitzean lanbide-modulu horiek gainditu ahal izateko. Aldi hori amaitutakoan, titulua eta dagozkion gutxieneko ikaskuntzak ezartzen dituen Errege Dekretuan aurreikusten diren gainditutako moduluetarako baliozkotzeak aplikatuko zaizkie. Ikastetxe bakoitzari dagokio probak deitzea eta egitea, eta proba horietara ikastetxe horietan matrikulatutako ikasleak soilik bertaratu ahal izango dira.

4.- Hezkuntzari buruzko maiatzaren 3ko 2/2006 Lege Organikoaren garapenean ezarritako heziketa-zikloa ezartzen den ikasturtea amaitzean, gerta daiteke bigarren kurtsoan matrikulatuta zegoen ikasleren batek ordezkatzen den titulua lortzeko eskatzen diren baldintzak ez betetzea (Hezkuntza-sistemaren antolamendu orokorrari buruzko urriaren 3ko 1/1990 Lege Organikoaren garapenean ezarritako titulua). Ikasle horiek bi deialdi izango dituzte segidako hurrengo bi ikasturteetako bakoitzean lanbide-modulu horiek gainditu ahal izateko. Aldi hori amaitutakoan, titulua eta dagozkion gutxieneko ikaskuntzak ezartzen dituen Errege Dekretuan aurreikusitako modulu gaindituetarako baliozkotzeak aplikatuko zaizkie. Ikasle horiek heziketa-zikloaren bigarren kurtsoan matrikulatuta egon diren ikastetxeari dagokio probak deitzea eta egitea. Proba horietara aipatutako ikasleak soilik bertaratu ahal izango dira.

5.- Plan zaharreko zikloan hasi ziren eta ziklo berrian txertatu diren ikasleen ziurtagirian, ziklo berriari dagozkion moduluak baino ezin izango dira azaldu.

3. artikulua.- Ebaluazioaren izaera.

1.- Lanbide-heziketako ikasleen ikaskuntzaren ebaluazioa Hezkuntza Sistemako Lanbide Heziketaren antolamendu orokorra ezartzen duen otsailaren 26ko 32/2008 Dekretuaren VI. kapituluan ezarritakoaren arabera egingo da. Etengabea izango denez gero, heziketa-zikloetako lanbide-moduluetarako programatutako jardueretara eta eskoletara erregulartasunez bertaratu beharko da.

2.- Eskoletara eta jardueretara askotan ez bertaratzeagatik, ikastetxeak onartutako etengabeko ebaluazioko metodoak eta irizpideak aplikatzea ezinezkoa izan daiteke ikasle batzuen kasuan. Ikasle horiek kurtsoaren amaierako lehen ebaluazioko probetara aurkeztuta ebaluatuko dira. Ikastetxeek beren antolamendu eta funtzionamenduko araudian zehaztuko dute zein kausengatik jo daiteke justifikatutzat eskoletara eta jardueretara ez bertaratzea, baita bertaratze erregularrerako baldintzak ere -etengabeko ebaluaziorako eskubideari eusteko ez da inola ere % 80tik beherakoa izango-.

3.- Ikasleen errendimendua objektibotasun osoko irizpideen arabera baloratzeko eskubidea bermatuko bada, ikastetxeek kurtsoaren hasieran eman beharko dituzte aditzera lanbide-moduluak gainditzeko beharrezko helburuak eta edukiak, baita ikaskuntzaren emaitzak ebaluatzeko aplikatuko diren tresnak, prozedurak eta irizpideak ere.

4. artikulua.- Irakaskuntzaren ebaluazioa.

1.- Irakasleek irakaskuntza-prozesuak eta haien irakaskuntza-praktika bera ebaluatuko dituzte, betiere curriculumaren heziketa-helburuen lorpenari eta curriculumaren eta programazioen garapenari dagokionez.

2.- Dagokien espezialitateko irakasleen esku dago lanbide-moduluen programazioak ebaluatzea. Ebaluazio-saioetako emaitzak kontuan izanik, ikasturtearen amaieran berraztertuko dituzte hasierako programazioak. Programazioan adostutako aldaketak hurrengo ikasturterako programazioan txertatuko dira. Ebaluazioaren mende egongo diren programazioen elementuen artean honako hauek daude:

- Edukiak lanbide-moduluen barruan hautatzeko, banatzeko eta sekuentziatzeko aukera.

- Ikasleek erabiltzeko proposatutako material didaktikoen eta erabilitako metodoen egokitasuna.

- Ebaluazio-irizpideen egokitzapena.

5. artikulua.- Hiruhileko ebaluazio-saioak.

Ikasleek heziketa-zikloaren eta dagozkion moduluen helburu orokorren lorpenean izan duten aurrerapena baloratzeko, etengabeko ebaluazio-saioak egingo dira lehen kurtsoko lehen eta bigarren hiruhilekoan eta bigarren kurtsoko lehen hiruhilekoan. Saio horien ondoriozko ebaluazio-txostena egingo da, eta txosten hori ikasleei helaraziko zaie. Aldian behingo ebaluazio-saio horiez gain, irakaskuntza-taldearen bilerak ere egingo dira ikasle-taldearen eta/edo ikasleetako bakoitzaren bilakaerari buruz gogoeta egiteko. Bilera horiek Saileko edo Zikloko bileren barruan egingo dira, edo bilera horiez kanpo.

6. artikulua.- Lehen kurtsoko azken ebaluaziorako saioak.

Saio horietan ebaluazioaren mende dauden lanbide-moduluen kalifikazioa egingo da.

1.- Heziketa-zikloaren lehen kurtsoan, azken ebaluazioko honako saioak egingo dira: lehen kurtsoko azken ebaluazioko lehen saioa eta lehen kurtsoko azken ebaluazioko bigarren saioa. Bi saio horien artean gutxienez zazpi egun pasa beharko dira.

2.- Lehen kurtsoko azken ebaluazioko lehen saioan, ikasitako lanbide-moduluen ebaluazioa eta kalifikazioa egingo da. Lanbide-modulu guztiak gainditu dituztenak bigarren kurtsora igaroko dira. Kalifikazioa zenbakizkoa izango da beti.

3.- Lehen kurtsoko azken ebaluazioko bigarren saioan, berriz, gainditu gabe dauden lanbide-moduluen ebaluazioa eta kalifikazioa egingo da, eta horien arteko zer ikasle igaroko diren bigarren kurtsora erabakiko da. Deialdi honetara bertaratu ez direnak ez aurkeztu (EA) gisa kalifikatuko dira.

7. artikulua.- Bigarren kurtsoko azken ebaluazioaren saioak.

1.- Heziketa-zikloaren bigarren kurtsoan, azken ebaluazioko honako saioak egingo dira: bigarren kurtsoko azken ebaluazioko lehen saioa eta lehen kurtsoko azken ebaluazioko bigarren saioa.

2.- Bigarren kurtsoko azken ebaluazioko lehen saioan, ikastetxean bigarren kurtsoan ikasitako lanbide-moduluen ebaluazioa eta kalifikazioa ez ezik, lehen kurtsotik gainditzeko dituen lanbide-moduluena ere egingo da. Bigarren kasu honetan, prozesura bertaratu ez direnak ez aurkeztu (EA) gisa kalifikatuko dira. Era berean, Lantokiko prestakuntzako lanbide-modulura eta, hala badagokie, Proiektuko lanbide-modulura zer ikasle sartuko diren finkatuko da.

Bigarren kurtsoko azken ebaluazioko lehen saio horretan, berriz, irakasleek, lanbide-modulu bakoitza kalifikatzeko garaian, tituluaren lanbide-konpetentzia bereizgarriaren lorpena eta Lantokiko Prestakuntzan sartzeko heldutasun pertsonala eta profesionala izango dute kontuan.

3.- Bigarren kurtsoko azken ebaluazioko bigarren saioan, Lantokiko prestakuntza modulua eta, hala badagokio, Proiektuko modulua ebaluatzeari eta kalifikatzeari ekingo zaio, betiere kurtso horretan lanbide-modulu horiek egin dituzten ikasleen kasuan. Era berean, gainditu gabe dauden lehen kurtsoko eta bigarren kurtsoko lanbide-moduluak ebaluatu eta kalifikatuko dira. Modulu horietan, prozesura bertaratu ez direnak ez aurkeztu (EA) gisa kalifikatuko dira. Ebaluazio-saio horren ondoren, heziketa-zikloko lanbide-modulu guztiak gainditu dituzten ikasleek dagokien titulua eskatu ahal izango dute.

Lantokiko prestakuntza ebaluatzen den bigarren kurtsoko ebaluazio horretan -eta, goi-mailako heziketa-zikloetan, Proiektuko modulua ebaluatzen den ebaluazio horretan-, lanpostuan izandako jardun-maila, profesionaltasunaren osotasunaren ulermen-maila eta egindako proiektuaren integrazioa hartu beharko da aintzat.

4.- Ebaluazio-saio horien ondoren, ikastetxean ikasitako lanbide-modulu guztiak gainditu dituzten ikasleen kasuan, Lantokiko prestakuntza eta, hala badagokio, Proiektua egitea antolatuko du ikastetxeak. Edonola ere, hurrengo ikasturtearen hasieran jarriko da abian horretarako aldia.

5.- Bigarren kurtsoko azken ebaluazioko lehen saioarekin bat eginik, aparteko aldi horretan Lantokiko prestakuntzako eta Proiektuko lanbide-moduluak egin dituzten ikasleen lanbide-modulu horietako jarduna ebaluatu eta kalifikatuko da. Bigarren kurtsoko azken ebaluazioko lehen saioan lanbide-modulu horiek gainditzen ez dituztenek, bigarren kurtsoko ikasleen ohiko aldian egingo dituzte, eta bigarren kurtsoaren amaierako bigarren ebaluazioan ebaluatuko dira. Kalifikazioak III. eranskinean jasotzen den aktaren ereduan islatuko dira. Aipatutako modulua edo moduluak gainditu dituzten ikasleek dagokien titulua eskatu ahal izango dute.

8. artikulua.- Ohiko deialdia.

1.- Bertaratze bidezko erregimenean, lanbide-modulu bakoitza lau deialditan ebaluatu ahal izango da, Lantokiko prestakuntza eta Proiektua lanbide-moduluak izan ezik. Bi modulu horiek bi deialditan ebaluatu ahal izango dira.

2.- Azken ebaluazioko lehen eta bigarren saioetako deialdiak, lehen kurtsokoak zein bigarren kurtsokoak, 15 egun naturaleko aurrerapenarekin egingo ditu ofizialki ikastetxeko zuzendaritzak. Probak irakastaldia amaitu ondoren egingo dira.

9. artikulua.- Aparteko deialdia.

1.- Salbuespen gisa, oinarrizko arauan ezartzen diren lau deialdiak agortu dituzten pertsonek aparteko deialdi bat ere izan dezakete, baldin eta honako kausetakoren bat gertatu bada: amatasuna, mendeko pertsonen zaintza, gaixotasuna, minusbaliotasuna, edo ikasketak ohi bezala garatzea baldintzatu edo eragotzi duten beste kausa batzuk. Horretarako, dagokien eskaera aurkeztu beharko dute matrikulatuta dauden ikastetxearen idazkaritzan. Eskaerak I. Eranskinean agertzen den inprimaki-ereduari jarraituko dio, eta Lanbide Heziketako Zuzendaritzari zuzendu beharko zaio.

2.- Ikastetxeko zuzendaritzak Lanbide Heziketako zuzendariari helarazi beharko dio eskaera, eta, horrekin batera, kausa gisa alegatzen duen zirkunstantzia egiaztatzen duen dokumentazioa eta txosten bat. Aparteko deialdia onartzearen edo ukatzearen ebazpena, bestalde, eskaera bideratu duen ikastetxeko idazkaritzaren bitartez jakinaraziko da. Ikastetxeko idazkaritzak interesdunari helaraziko dio ebazpena eta kopia bat gordeko du espediente akademikoan.

3.- Aparteko ebaluazioa onartzen duen ebazpenak ez du ekarriko eskoletara bertaratzeko eskubidea, eta espedientean bertan finkatuko da eskatzailea zein saiotan ebaluatu eta kalifikatuko den.

10. artikulua.- Ebaluazio-prozesuaren dokumentuak.

1.- Espediente akademikoa, ebaluazio-aktak eta banakako ebaluazio-txostenak dira ebaluazio-prozesuaren dokumentuak. Ebaluazio-txostenak eta ziurtagiri akademikoak dira ikaslearen mugikortasuna bermatuko duten oinarrizko dokumentuak. Espediente akademikoa, ebaluazio-aktak eta ziurtagiri akademikoak bat etorriko dira forman eta edukian II., III., IV. eta V. eranskinetan txertatu diren ereduekin.

2.- Ziurtagiri akademikoak bi motatakoak izan daitezke. Lehena titulua osatzen duten lanbide-modulu guztiak gainditu dituzten eta titulua lortzeko eskakizun guztiak betetzen dituzten ikasleei emango zaie (IV. eranskina). Bigarrena titulua osatzen duten lanbide-modulu guztiak gainditu ez dituzten ikasleei emango zaie (V. eranskina). Ziurtagiri hori ikastetxe batetik beste batera aldatzeko izango da baliagarria.

3.- Ziurtagiri akademikoa eskatzen duen pertsona matrikulatuta dagoen ikastetxeak jaulkiko ditu ziurtagiri akademiko horiek. Edonola ere, ikaslea ikastetxe pribatu batean matrikulatuta egonez gero, ikastetxe pribatua hori atxikita dagoen ikastetxe publikoak jaulkiko ditu ziurtagiri akademikoak.

4.- Ebaluazio-dokumentuen zaintza, bestalde, ikaslea matrikulatuta dagoen ikastetxeari dagokio edo matrikulatuta dagoen ikastetxe pribatua atxikita dagoen ikastetxe publikoari. Ikastetxe publikoek, bestalde, luzatzen dituzten ziurtagiri akademikoen kopia bat gordeko dute. Ikastetxe pribatuek ebaluazio-akten kopia konpultsatua eman beharko diote atxikita dauden ikastetxe publikoari, horrek gorde dezan.

5.- Ikasle bat ikasturtea hasi, eta amaitu aurretik, beste ikastetxe batera lekuz aldatuz gero, jatorrizko ikastetxeak helburu den ikastetxeari -hala eskatzen badu- banako ebaluazio-txostena helarazi beharko dio eta, hala badagokio, ziurtagiri akademikoa. Ikastetxe pribatuen kasuan, une horretan helarazi beharko diote ikaslearen espedientea atxikita dauden ikastetxe publikoari. Espedienteak hurrengo atalean aditzera ematen den dokumentazio guztia bildu beharko du.

6.- Ikastetxe pribatuek, bigarren kurtsoaren amaieran, ikastetxeko zuzendariaren ziurtagiria igorri beharko diote atxikita dauden ikastetxe publikoari. Ziurtagiri horretan honakoak jasoarazi beharko dira: heziketa-zikloa amaitu duten ikasleen zerrenda, titulua eskuratzeko aukera ematen dieten eskakizunak, lanbide-moduluak zein deialditan gainditu dituzten, lortutako kalifikazioak, eta baliozkotzeen eta/edo salbuespenen mende izan diren.

11. artikulua.- Hurrengo kurtsora igarotzea.

1.- Ezin izango dute heziketa-zikloko lehen kurtsotik bigarrenera igaro lehen kurtsoko amaierako bigarren ebaluazioaren ondoren, hiru lanbide-modulu edo gehiago gainditu gabe dituztenak, edo lanbide-modulu gutxiago, baldin eta gainditu gabeko moduluaren edo moduluen iraupenaren batura 300 ordutik gorakoa bada.

2.- Bigarren kurtsoan, ikastetxean egindako 1. kurtsoko zein 2. kurtsoko modulu guztiak gainditu dituztenak igaro ahal izango dira Lantokiko prestakuntzako modulura edo, hala badagokio, Proiektuko modulura. Ondorio horretarako ez da aintzat hartuko tituluaren curriculuma ezartzen duen Dekretuan aurreratzea aurreikusi den Lantokiko prestakuntzako moduluaren zatia.

3.- Tituluetako bakoitzaren curriculuma ezartzen duen Dekretuan finkatuko da lanbide-moduluek izango duten iraupena eta heziketa-zikloko bi kurtsoetan izango duten banaketa.

12. artikulua.- Baliozkotzeak eta salbuespenak.

1.- Hezkuntza Sistemako Lanbide Heziketaren antolamendu orokorra ezartzen duen otsailaren 26ko 32/2008 Dekretuaren 27. artikuluan ezarritakoari eta titulu horietako bakoitzaren curriculuma ezartzen duen Dekretuan xedatutakoari egokituko zaizkio baliozkotzeak eta salbuespenak. Ingeleseko B2 maila egiaztatzen duten pertsonei ingeles teknikoko lanbide-modulua baliozkotu egingo zaie. Baliozkotzeei eta salbuespenei dagokienez, oinarrizko araudian eta dagokien tituluko Dekretuan xedatutakoari jarraituko zaio.

2.- Titulu bakoitzaren curriculuma ezartzen duen Dekretuan definitzen diren baliozkotzeko edo salbuesteko eskaerak -eta aurreko atalean jasotzen den ingeles teknikoari dagokiona- ikaslearen espediente akademikoan jasoarazi den ikastetxeko zuzendariari zuzenduko zaizkio. Ikastetxeko zuzendariak Ebazpen bidez onartu edo ukatuko du baliozkotzea edo salbuespena. Ebazpen horren berri eman beharko dio pertsona eskatzaileari. Ikaslearen espediente akademikoari gaineratuko zaio Ebazpen horren kopia bat.

3.- Lantokiko prestakuntzako lanbide-modulua lan-esperientziagatik salbuesteko kasu berezian, ikaslea matrikulatzen den unean bertan deklaratu ahal izango da salbuespen totala edo partziala, eta, edonola ere, Lantokiko prestakuntzako aldiari hasiera eman baino 7 egun lehenago deklaratu beharko da. Salbuespen partzialari dagokionez, ebazpena Lantokiko prestakuntzako tutoreari ere jakinaraziko zaio, eta bertan salbuespen partzialaren ordu kopurua ere eman beharko da aditzera.

4.- Tituluak ezartzen dituzten eta horien gutxieneko irakaskuntzak finkatzen dituzten Errege Dekretuetan eta Euskal Autonomia Erkidegorako curriculumak ezartzen dituzten Dekretuetan xedatzen diren konpetentzia-atalen eta lanbide-moduluen arteko egokitasuna aplikatuta ere baliozkotu ahal izango dira lanbide-moduluak. Baliozkotze horiek matrikulatuta dagoen ikastetxeko zuzendariak onartu beharko ditu, aurreko atalean aditzera ematen den moduan.

13. artikulua.- Matrikula ezeztatzea eta deialdiari uko egitea.

1.- Matrikula ezeztatzeak pertsona hori matrikulatuta dagoen lanbide-modulu guztietan baja hartzea ekarriko du eta, horrenbestez, pertsona hori ez da ebaluatuko, ezta kurtso amaierako ebaluazio-aktetan agertuko ere. Ikastetxe publikoetan matrikulatuta dauden pertsonen kasuan, ikastetxeko zuzendariari zuzenduko zaio matrikula ezeztatzeko eskaera. Pertsona eskatzailea ikastetxe pribatu batean matrikulatuta badago, eskaera atxikita dagoen ikastetxe publikoaren zuzendariari zuzenduko zaio. Nolanahi ere, VIII. eranskinean agertzen den ereduaren arabera aurkeztu beharko da eskaera, eta abenduaren 31 baino lehen egin beharko da. Aldeko ebazpena izango da honako zirkunstantzia hauetakoren bat gertatzen bada:

- Ikaslearen gaixotasun luzea.

- Ikasketarako dedikazio normala eragotziko duen lanpostu batean hastea.

- Ikasketarako dedikazio normala eragotziko duten obligazio pertsonalak edo familiarrak izatea.

- Eskaera zuzentzen den ikastetxearen zuzendariak aintzat hartutako beste ezohiko zirkunstantzia batzuk.

2.- Ikastetxe publikoko zuzendariak Ebazpen bidez onartu edo ukatuko du matrikula ezeztatzea. Ebazpenaren berri emango dio pertsona eskatzaileari. Ikastetxe pribatuan matrikulatutako pertsonen kasuan, ebazpena matrikulatuta dauden ikastetxera igorriko da, eta ikastetxe horrek eman beharko dio Ebazpena pertsona interesdunari. Ikaslearen espediente akademikoari gaineratuko zaio Ebazpen horren kopia bat.

3.- Lanbide-modulu bakoitzerako aurreikusitako deialdiak ez agortzearren, ikasleek bi aldiz uko egin ahal izango diote heziketa-zikloetako lanbide-moduluetako bakoitzaren ebaluazioari eta kualifikazioari. Eskaerak IX. eranskinean agertzen den eskaeraren araberakoa izan beharko du, eta ikastetxeko zuzendariari zuzendu beharko zaio dokumentu bidezko egiaztapenarekin batera. Uko egiten den ebaluazioa baino hilabete aurretik, gutxienez, helarazi beharko zaio eskaera ikastetxeko zuzendariari. Matrikulatuta dagoen ikastetxe publikoko edo pribatuko zuzendariak ebatzi beharko du eskaera. Ebazpena aldeko izango da artikulu honetan bertan lehentxeago aditzera emandako zirkunstantzietakoren bat gertatzen bada. Horrez gain, eta ebaluazio-batzordearen proposamenez, ikastetxeko zuzendariak ofizioz, hau da, ikaslearen eskaerarik gabe, eman ahal izango dio ukoa deialdiari.

4.- Ikaslearen espediente akademikoari gaineratuko zaio Ebazpen horren kopia bat. Eskaeraren aldeko ebazpena gertatzen den kasuetan, ebaluazio-aktetan jasoaraziko da zirkunstantzia hori.

5.- Ikasle eskatzailea ukoa eskatu duen moduluetan bitan matrikulatuta egon bada, ez du eskoletara bertaratzeko eskubiderik izango.

14. artikulua.- Urrutiko eskaintza.

Urrutiko eskaintzaren matrikulazioak eta ebaluazioak berezko antolamendua izango du gisa horretako irakaskuntza arautzen duen Aginduan. Agindu horretan arautzen ez diren alderdietan, honako Agindu honetan xedatzen dena izango da aplikatzekoa.

15. artikulua.- Aplikazio informatikoa.

Ikaslea matrikulatzen den ikastetxeak Agindu honen aplikazioaren ondoriozko datu guztiak sartu beharko ditu Hezkuntza, Unibertsitate eta Ikerketa Sailak zehazten duen aplikazio informatikoan.

XEDAPEN IRAGANKORRAK

Lehenengoa.- Hezkuntzari buruzko maiatzaren 3ko 2/2006 Lege Organikoaren ondoriozko heziketa-zikloak ezartzen amaitzen ez den artean, Bigarren Hezkuntzako Institutuetako eta Goi-mailako Lanbide Heziketako Berariazko Institutuetako lanpostuen zerrenda osatzeko irizpideak arautzen dituen Lanbide Heziketako eta ikastetxeetako zuzendarien ebazpenak ezarriko du ezarritako heziketa-ziklo berrietako ordu-karga. Ordu-karga horrek ordezkatu egingo du Hezkuntza, Unibertsitate eta Ikerketa sailburuak 2000ko urtarrilaren 12ko Aginduaren (2000-01-12 EHAA) VII. eranskinean ezartzen den ordu-karga.

Bigarrena.- Hezkuntza-sistemaren antolamendu orokorrari buruzko urriaren 3ko 1/1990 Lege Organikoaren ondoriozko heziketa-zikloak osatzen dituzten lanbide-modulu guztiak gainditu dituzten eta dagokien titulua eskatzeko baldintza guztiak betetzen dituzten ikasleei luzatutako ziurtagiri akademikoa X. eranskineko ereduari egokituko zaio.

Lanbide-modulu guztiak gainditu ez dituztenei edo titulua lortzeko baldintza guztiak betetzen ez dituztenei, berriz, XI. eranskinean ezarritako ereduaren araberako ziurtagiri akademikoa emango zaie.

Hirugarrena.- Hezkuntza-sistemaren antolamendu orokorrari buruzko urriaren 3ko 1/1990 Lege Organikoaren (LOGSE) ondoriozko heziketa-zikloak hasi baina amaitu ez dituzten pertsonek titulua eskuratu ahal izan dezaten, teknikariari eta goi-mailako teknikariari dagozkion tituluak lortzeko probak deitzen jarraituko da. Alabaina, aurreko lege hori ordezkatzen duen Hezkuntzari buruzko Lege Organikoaren heziketa-zikloa ezartzen den ikasturtean eta hurrengo ikasturtean soilik jarraituko dira deitzen proba horiek. Era berean, aldi horretan heziketa-ziklo horiek eskaintzen jarraitu ahal izango da eskaintza partzialaren modalitatean.

Laugarrena.- Hezkuntzari buruzko maiatzaren 3ko 2/2006 Lege Organikoaren ondoriozko heziketa-zikloa ezarrita dagoenean, ordezkatzen den aurreko araudi horren arabera heziketa-ziklo hori emateko baimena duten ikastetxeek automatikoki izango dute heziketa-ziklo berria emateko baimena.

Ikastetxe horiek ziklo berria ezarri eta gehienez bi urteko epea izango dute espazioak eta ekipamenduak egokitzeko. Izatez, Lanbide Heziketako irakaskuntzen curriculumak Euskal Autonomia Erkidegorako ezartzen duen Dekretuan finkatzen diren eskakizun berrietara egokitu beharko dira espazioak eta ekipamenduak. Egokitzapen horren arabera eta zikloaren ordu kopuruaren arabera -gehitu egiten badira- aldatu ahal izango da ikastetxearen ahalmena.

AZKEN XEDAPENAK

Lehenengoa.- Bide administratiboa agortzen duen Agindu honen aurka aukerako berraztertzeko errekurtsoa jarri ahal izango zaio Hezkuntza, Unibertsitate eta Ikerketako sailburuari, eta, horretarako, hilabeteko epea izango da EHAAn argitara eman eta biharamunetik hasita. Edonola ere, administrazioarekiko auzi errekurtsoa ere jarri ahal izango zaio Euskal Autonomia Erkidegoko Justizia Auzitegi Nagusiari, eta horretarako bi hilabeteko epea izango da EHAAn argitaratu eta biharamunetik hasita.

Bigarrena.- Prozeduraren alorrean Agindu honetan arautzen ez den guztian Herri Administrazioen Araubide Juridikoaren eta Administrazio Prozedura Erkidearen azaroaren 26ko 30/1992 Legean xedatutakoa izango da aplikatzekoa.

Hirugarrena.- Agindu hau Euskal Herriko Agintaritzaren Aldizkarian argitaratu eta biharamunean izango da indarrean.

Vitoria-Gasteiz, 2010eko otsailaren 19a.

Hezkuntza, Unibertsitate eta Ikerketako sailburua,

MARÍA ISABEL CELAÁ DIÉGUEZ.

Azterketa dokumentala