Euskal Herriko Agintaritzaren Aldizkaria

Bilbao Bizkaia Ur Partzuergoaren Zuzendaritza Batzordeak, 2004ko maiatzaren 25ean hartutako erabakiaren bidez, behin betiko onetsi zuen "Laukizko sare nagusian hoditeria hobetzeko proiektua".

Erabakia hartu aurretik, jendaurrean jarri ziren bai proiektua bai proiektuak ukitutako ondasun eta eskubideen zerrenda; izan ere, hori horrela zehaztuta dago Nahitaezko Desjabetzeari buruzko Legearen 17. artikuluan eta ezar daitezkeen gainontzekoetan.

Bilbao Bizkaia Ur Partzuergoaren eskaerari erantzunez, eta Lurralde Antolamendu, Etxebizitza eta Ingurumen Zuzendaritzak aldeko txostena emanda, irailaren 28ko 181/2004 Dekretuaren bidez, aipatutako proiektua egiteko beharrezko ondasun eta eskubideak lehenbailehen hartu behar zirela adierazi zen. Horrek, era berean, aipatutako ondasun eta eskubideak hartzea dakar, Nahitaezko Desjabetzeari buruzko Legearen 52. artikuluan ezarritakoaren arabera.

Legea betez, Ur Partzuergoak erabaki du honi erantsitako zerrendan agertzen diren ondasun eta eskubideen titularrei deia egitea, adierazitako egunean eta orduan eta aurretiaz ukitutako Udaletxeetara bertaratuta, finken kokalekuaren arabera, ukitutako ondasunen hartu aurreko agiriak egiteko xedez.

Interesdun guztiak eta ukitutako ondasunengan edozein motatako eskubide edo interesen titularrak, edo behar bezala baimendutako ordezkariak, bertaratu beharko dira. Bertaratutakoek titulartasuna egiaztatzen duten agiriak eraman beharko dituzte (eskritura publikoak, pribatuak, egiaztagiriak, Jabetza Erregistroko informazio-oharrak...), bai eta kontribuzioaren azken ordainagiria ere. Titularrek, euren kargura, peritua eta notarioa eraman ahal izango dituzte, hala nahi izanez gero.

Ondasuna hartu aurreko agiriak 2004ko azaroaren 30ean egingo dira. Titular guztiei zitazio-zedula bidaliko zaie agiriok egiteko tokia, eguna eta ordua jakinarazteko. Era berean, Nahitaezko Desjabetzeari buruzko Legearen 52. artikuluan zehaztutako gainontzeko argitalpenak ere egingo dira.

Halaber, interesdunek, bai eta eskubide erreal edo interes ekonomikoen titular izanik argitaratutako zerrendan agertu ez direnek ere, alegazioak egin ahal izango dituzte idatziz Bilbao Bizkaia Ur Partzuergoan (San Vicente 8, Albia eraikina 1-4. solairua, 48001 Bilbao). Alegazioak aurkezteko azken eguna ondasunak hartu aurreko agiria egiteko zehaztu den eguna izango da, eta horien helburu bakarra ukitutako ondasunen eta eskubideen zerrendan egindako okerrak zuzentzea izango da. Hori guztiori bat dator Nahitaezko Desjabetzeari buruzko Legearen 56.2. artikuluan zehaztutakoarekin.

Bilbao, 2004ko urriaren 28a.

ZUZENDARIORDE JURIDIKO ADMINISTRATIBOA.