Turismo-dinamizaziorako laguntzak. 2010

Agindu honetan araututako laguntzak jaso ahal izango dituzte EAEn kokatutako udalek, mankomunitateek eta beste hainbat erakunde publikok, garapen-agentziek, turismo-partzuergoek eta berezko izaera juridikoa duten eta turismoa sustatzen duten bestelako eskualde-erakundeek, eta irabazi-asmorik gabeko elkarte edo erakunde pribatuek, betiere horien helburuetako bat turismo-jardueraren garapena bada.

Diru-laguntza jaso dezaketen jardunak.
Agindu honetan aurreikusitako laguntzen izaera diru-laguntza ez-itzulgarriena izango da, eta laguntza horiek honako jardun-ildo hauetako batera ego gehiagotara bideratu beharko dira:

1.- Turismo-kudeaketarako erakundeak eta egiturak sortzera eta mantentzea.
a) Turismo-lankidetzarako erakundeak sortzen eta mantentzen lagunduko da, eta baita turismo-kudeaketarako egiturak edo unitateak ere, betiere 3. artikuluan adierazitako erakunde onuradunek sustatzen badituzte, eta ondoren ezarritakoa betetzen badute:

Merkataritza eta Turismo Sailburuordetzaren Marketin Planean identifikatutako helmugaren eta/edo produktuen turismo-dinamizaziorako planen bitartez turismo-garapena sustatzeko helburua izatea.

Lankidetza-akordioen edota bestelako formulen bitartez, turismo-sektorearekin zuzenean edo zeharka lotuta dauden eragile publiko eta pribatuak sartzea, betiere eragile horiek eskualde batean edota eskualdez gaindiko tokiren batean badihardute; azken kasu horretan, 1. artikuluan identifikatutako produktu batekin lotuta egon behar dute adierazitako eragileek.

Gaitasun teknikoa eta kudeaketa-gaitasuna izatea. Horretarako, turismo-alorreko gaitasun frogagarria –espezifikoki turismo-alorrekoa den titulazio akademikoa duelako, edota sektorean gutxienez 3 urtez lan egin duelako– duen kudeatzaile arduradun bat izan behako du, eta kudeatzaile horrek esklusiboki egin beharko du lan helmugaren eta/edo turismo-produktuaren turismo-dinamizaziorako planean (kudeatzaile hori kontratatu izanaren xede den planean, hain zuzen).

Turismo-kudeaketarako egiturak edo unitateak, aurreko baldintzak betetzen badituzte, 3. artikuluan erakunde onuradun gisa jasotako mankomunitateen, garapen-agentzien eta bestelako erakundeen zati izan daitezke.

Adierazitako turismo-kudeaketarako egiturek edo unitateek berezko izaera juridikorik ez badute, erakunde bat izendatu beharko dute beren kideen artean, betiere 3. artikuluan xedatutakoari jarraiki erakunde onuradun izateko baldintzak betez, erakunde hori solaskidea eta ordezkaria bada, laguntzak eskatzeari, kudeatzeari, kobratzeari eta hala badagokio, Agindu honetan araututako laguntzetako bat lortzearen ondoriozko erantzukizunak bere gain hartzeari dagokionez. Izendapen hori behar bezala jaso beharko da horretarako sinatutako lankidetza-dokumentuan.

b) Horri dagokionez, honako jardun hauek lagundu ahal izango dira diruz:
1- Lehen adierazitako erakundeak txertatzeko aurretiko azterlana, erakunde horiek berezko izaera juridikoa izango badute: erakunde horiek xedatzeko, eta hala badagokio, eratzeko laguntza teknikoa (proiektuaren azterketa eta bideragarritasuna, eratze-plana, eta abar).
2-Eratzeagatiko eta lehen ezarpenagatiko gastuak, lehen urteko ekipamendu eta altzariengatiko gastuak, berezko izaera juridikoa duten erakundeak sortzen badira.
3- Turismo-kudeaketarako erakundeen funtzionamenduagatiko eta kudeaketagatiko gastuak.
4- Idatz-zati honetan zehaztutako turismo-kudeaketarako erakundeetan eta egituretan eta turismo-dinamizaziorako aurreko aginduaren babespean sortutako turismo-lankidetzarako erakundeetan lan egiten duten langile kualifikatuengatiko gastuak, zuzenekoak edota laguntza teknikoaren bitartekoak.
5- Sareko lana erraztuko duten plataformak garatzeko eta ezartzeko ekipamendu informatikoa erosteagatiko edota laguntza teknikoagatiko gastuak. 

2.- Helmugen Turismo Kalitatearen Sistema Integrala txertatzea.
Basquetour Turismoaren Euskal Agentzia SA erakundearekin (hemendik aurrera, Basquetour) lankidetzan, Helmugen Turismo Kalitatearen Sistema Integralaren ereduarekin –Turismo Kalitatera Hurbiltzeko Eredua” (MACT) metodologia, Espainiako “Helmugen Turismo Kalitatearen Sistema Integrala” (SICTED), eta abar– lotutako turismo-helmugen kalitate-programetan parte hartzen duten turismo-erakundeek, zerbitzuek eta enpresek osatutako taldeei kudeaketa, laguntza eta/edo aholkularitza emateko langile teknikari kualifikatuak edota laguntza teknikorako langileak kontratatzeagatiko gastuak lagunduko dira.
Kasu guztietan, deialdi bakoitzeko eskabideak aurkezteko epea amaitu baino lehen, Helmugen Turismo Kalitatearen Sistema Integrala txertatzeko programari atxikitzeko protokoloa sinatuta izan behar du erakunde eskatzaileak Basquetour/Turespaña-rekin, laguntza horren onuradun izateko aukera edukitzeko.

3.- Produktuaren Turismo Dinamizaziorako Planak lantzea eta garatzea, eta Helmugaren Turismo Dinamizaziorako Planak berrezartzea eta garatzea.

Agindu honetan finkatutako Helmugaren edo Produktuaren Dinamizaziorako Planen barruan identifikatutako proiektuak lagunduko dira diruz, Merkataritza eta Turismo Sailburuordetzak Basquetour Agentziaren bitartez garatu edo garatzen dituen turismo-produktuak ezartzeko eskatutakoak izan ezik; horrelako kasuetan, laguntzak eskatu dituzten erakundeek Basquetour erakundearekin horretarako formalizatutako lankidetza-akordioetan hitzartutakoa bete beharko dute. Halakoa da, esate baterako, honako hauen kasuak: “Euskadiko Zidor Sarea”, “Euskadiko Lur Orotako Bizikleten Sarea”, “Birding Euskadi”, eta “Surfing Euskadi”.

Horretarako, honako hauetarako jaso ahal izango dira laguntzak:
1- Eskualdez gaindiko, eskualdeko eta tokiko Produktuen Turismo Dinamizaziorako Planak lantzeko eta/edo eguneratzeko laguntza teknikoa, Turismo-alorreko 2010-2013ko Marketin Planarekin eta Merkataritza eta Turismo Sailburuordetzak turismoa dinamizatzeko garatutako eta web-orrian argitaratutako (www.euskadi.net/turismo) bestelako planekin bat etorraraziz.
2- Eskualdeetako nahiz hiru euskal hiriburuetako Helmugaren Turismo Dinamizaziorako Planak eguneratzeko eta berbideratzeko laguntza teknikoa, Turismo-alorreko 2010-2013ko Marketin Planarekin eta Merkataritza eta Turismo Sailburuordetzak turismoa dinamizatzeko garatutako eta web-orrian argitaratutako (www.euskadi.net/turismo) bestelako planekin bat etorraraziz.
3- Aurreko idatz-zatietan aipatutako planetan identifikatutako eta zehaztutako produktuen edota proiektuen azterlan espezifikoak.
4.- Aurreko idatz-zatian xedatutakoaz gain, Helmugaren Turismo Dinamizaziorako Planetan finkatutako eta onetsitako edota Produktuen Turismo Dinamizaziorako Planetan xedatutako jardunak eta Basquetour Agentziarekin horrek sustatutako turismo-produktuen garapenerako sinatutako lankidetza-akordioetan jasotako jardunak ere diruz lagun daitezke, zehazki, honako hauek:
Ondare-elementu bereziak turismo-erabilerarako egokitzea, betiere berezitasun hori behar bezala justifikatuta badute, eta ondarea bera birgaitzeko eta zaharberritzeko obrak alde batera utzita. Bisitarako, harrera-azpiegituretarako eta informazio-euskarrietarako egokitzapenean eragina duten inbertsioak ere diruz lagunduko dira.

Turismo-baliabideen seinaleztapena, "EAEko Turismoko Seinaleen Eskuliburuan" ezarritako gomendioei jarraiki, eta hala badagokio, Merkataritza eta Turismo Sailburuordetzaren webgunean jasotako gomendioei ­­-Produktuaren Turismo Dinamizaziorako Planei buruzkoa, EAEko Turismoko Marketin Plana- eta abarri jarraiki. Seinaleak diseinatzeari, egiteari, eta instalatzeari batera eragiten dieten jardunak diruz lagundu ahal izango dira.

Zidorren seinaleztapena eta tematizazioa diruz lagunduko dira, betiere zidorrak "Euskadiko Zidorren" sarean edota "Ibilbide Berdeen" sarean identifikatuta badaude edo horien barrukoak badira. Seinaleak diseinatzeari, egiteari, eta instalatzeari batera eragiten dieten jardunak diruz lagundu ahal izango dira.

1. artikuluan identifikatutako turismo-produktu estrategikoekin bat etortzeaz gain, daudenen osagarriak diren eta lurraldeko kultura-nortasunarekiko eta/edo lurralde-eremu horretako turismo-produktuekiko koherentziari eusten dioten turismo-azpiegiturak sortzea.

Baliabide edo zona turistikoetara garraiatzeko turismo-zerbitzuak.

Batetik, bisitariei arreta ematen dieten profesionalen prestakuntza teknikoa, Itourbask sareko langileei zuzendutakoa izan ezik, eta bestetik, oro har biztanleriari zuzendutako sentsibilizazioa, betiere hori guztia helmugako turismo-produktuei lotuta badago.

Sare nazionaletan eta nazioarteko sareetan turismo-baliabideak edo -produktuak txertatzearen ondoriozko gastuak eta inbertsioak.

Ebaluazio Batzordearen balioespenaren arabera, Agindu honen 1.3 artikuluan jasotako turismo-produktu estrategikoak sortzeko eta garatzeko beharrezkotzat jotako bestelako jardun oro.

2.672.028 euro.