Euskal Autonomi Elkarteko patataren laborantzari, biltegiratzeari eta merkaturatzeari dirulaguntzak.

1.– Onuradunek betekizun hauek bete beharko dituzte kasu guztietan:

a) Arau honetan jasotako jardueretako batean jardutea.

b) Zerga betebeharrak zein Gizarte Segurantzarekiko betebeharrak egunean izatea.

c) Beste erakunde edo administrazio batzuei laborantza honetarako eskatutako edo horiengandik jasotako laguntzak adieraztea.

d) Hazitarako patata hazi, biltegiratu, kontserbatu eta ontzikiratzeari buruzko araudia betetzea.

e) Diru-laguntza edo laguntza publikoak jasotzeko aukera galtzera zigortuta ez egotea, ez zigor arloan ez administrazio arloan, eta ez izatea horretarako ezgaitzen duen legezko debekurik, sexuaren ziozko bereizkeria egiteagatik ezarritakoak barne, 2005eko otsailaren 18 4/2005 Legeko (Gizonen eta Emakumeen Berdintasunerakoa) seigarren azken xedapenean ezarritakoarekin bat.

2.– Onuradunak nekazaritza ustiategiaren titularrak badira, aurrekoez gain, betekizun hauek ere bete beharko dituzte:

a) «Lehentasunezko nekazaritza ustiategia» kalifikazioa izatea, 1995eko uztailaren 4ko 19/1995 Legean (Nekazaritzako Ustiategiak Modernizatzeari buruzkoa) eta 1997ko uztailaren 8ko 168/1997 Dekretuan (Euskal Autonomia Erkidegoko lehentasunezko  ekazaritza ustiategiak eta EAEko eskualdeetako eta lurralde historikoetako laborantzarako gutxieneko unitateak zehazten dituena) agindutakoaren arabera.

b) Birosi indizeari dagokionez, % 7 gainditzen ez duen hazi ziurtatua erabiltzea.

c) Gutxienez, patata hazteko 4 hektarea izatea.

d) Diruz laguntzeko patata sailak «eskabide bakarra » delakoan adieraztea, apirilaren 25eko 86/2006 Dekretuan arauturik dagoenez. Izan ere, dekretu horren bidez ordainketa bakarreko diru-laguntzak eta nekazaritza eta abeltzaintzarako bestelako zuzeneko laguntza
komunitarioak garatu eta ezarri dira Euskal Autonomia Erkidegoan.

e) Merkaturatzeko laguntzak eskatuta dituztenen kasuan, salerosketako kontratuak sinatuta izatea salerosketako kontratu homologatuaren ereduarekin bat.

f) Patatagintzako ustiapen bakoitzerako landa koadernoa betetzea. Patatagintzako sail guztietan egindako jarduera eta tratamenduak jaso beharko dira. Era berean, Nekazaritza eta Abeltzaintza Zuzendaritzaren esku eduki beharko da, kontsulta dezan, eta baimendun teknikari arduradunaren bisita guztiak jasoko dira.

g) Ustiategian kudeaketa tekniko eta ekonomikoa egitea, baimenduriko kudeaketa zentro batek gainbegiratuta, edo bestela Ustiategiak Aholkatzeko Sisteman parte hartzeko ardura norbere gain hartzea (2007an ezartzekoa), 1782/2003 Arautegiarekin bat. Aholkularitza horretan, gutxienez, kudeaketako legezko betekizunak eta nekazaritzarako eta ingurumenerako jardunbide egokiak sartuko dira.

h) Patatagintzako sail bakoitzean hiru urteko gutxieneko txandaketa egitea. Patata hazi aurretik, laboreak, olio landareak edo lekadunak haztea; txandaketatik salbuetsiko dira berrogeialdia behar duten patataren gaitzak dituzten ustiapenak, berrogeialdiak iraun bitartean.

i) Nekazaritzako ustiapenei dagokien Laneko Arriskuen Prebentziorako Planari buruz zehaztuko diren ikastaro edo prestakuntza jardueretara joatea, Patatagintzaren Planak hartzen duen aldian.

3.– Onuradunak hazitarako patata ekoizten diren erakundeak direnean, betekizun hauek guztiak bete beharko dituzte: a) Erakundeak «hazitarako patata ekoiztu eta ugaltzeko titulua» izatea, eta bere eginkizunak betetzeko beharrezkoak diren langile teknikoak eta laborategiko ekipamendua zein instalazioak izatea.

b) Ereiteko erabiliko den haziari aldez aurreko kontrolak egitea.

c) Elite edo Superelite motetako haziak ereitea, eta kalitate horretako hazirik ez duten barietateetan, A hazi ziurtatua.

d) Ereingo diren sailen zerrenda Hazien Zerbitzura bidaltzea, organismo kaltegarrien laginketa egin ahal izateko.

e) Landa ikuskapenak egitea eta, gero, kalifikazio proposamenak Hazien Zerbitzura bidaltzea.

f) Haziak ekoizten dituzten eta laguntza eskatzen duten erakundearekin kolaboratzen duten ekoizle guztiek hauek betetzea:

– «Lehentasunezko nekazaritza ustiapena» kalifikazioa izatea, 4. artikuluko 2.a) puntuan jasota dagoenez.

– Landa koaderno bat betetzea, hazitarako patata ekoizten den sail guztietan egiten diren jarduera guztiak jasota gera daitezen, besteak beste: landaketak, ongarriketak, ureztaketak, tratamenduak, eta abar.

– Lur sail guztiak eskabide bakarrean adierazita egotea.