Material arkeologiko edota paleontologikoen inbentarioa egiteko diru-laguntzak.

Diruz lagunduko dira agindu honetako 1. artikuluko baldintzak betetzen dituzten material arkeologiko eta paleontologikoak inbentariatzeko tratamendu-prozesuko jarduerak. Hona “inbentariatzea” zer den: esku-hartze arkeologiko baten esparruan lortutako material arkeologiko eta paleontologikoak zehatz-mehatz deskribatuta eta zerrendatuta jasotzen dituen dokumentua lantzea helburu duen jarduera, betiere dagokion gordailu-zentroan entregatzeari begira, Euskal Autonomia Erkidegoko esparruan aurkitutako interes arkeologikoa edo paleontologikoa duten ondasunak garraiatu, entregatu eta gordailuan uzteko baldintzei buruzko aurriaren 5eko 341/1999 Dekretuko 10.1 artikuluan xedatutakoarekin bat.

Proiektuen helmenak, oro har, aztarnategi batean edo gehiagotan egindako esku-hartzeetan lortutako material guztiak hartuko ditu; hala ere, aztarnategi bat baino gehiago badira, horiek denak kultura-ondasun deklaratutako –edo deklarazioaren espedientea hasita duen– arkeologia gune berean egon behar dute, uztailaren 3ko Kultura Ondarearen Legearen arabera. Horrek ez du esan nahi, alabaina, arkeologia gune berean dauden aztarnategietako materialak inbentariatzeko proiektuak banatuta aurkeztu ezin direnik.

Diruz lagundu ahal izango dira, baita ere, material arkeologiko eta paleontologikoen aurretiko inbentarioak agindu honetan ezarritako eredura egokitzeko jarduerak, baldin eta egokitu nahi den inbentarioa egiteko lanek ez badute aurrez diru-laguntzarik jaso 2000. urteaz geroztik programa honen jarduera eman diren aginduen babesean. Egokitu nahi den inbentarioko informazioa nahikoa ez delako egokitze-lanetarako materiala katalogatzea beharrezkoa bada, generoari, tipologia orokorrari eta tipologia espezifikoari eta deskribapen anatomiko-morfologikoari buruzko datuak egokitzerakoan, inbentariatze-lana dela joko da, eta ez egokitze-lana, agindu honetako babesean emandako diru-laguntzaren diru-kopuruaren muga ezartzearen ondorioetarako.  Dena dela, materialek beti bete beharko dute agindu honetako 1. artikuluan esku-hartzearen bukaera-egunari buruz edo, hala badagokio, urteanitzeko programaren bukaera-egunari buruz xedatutakoa. Aurretiko inbentarioak egokitzeko jarduerak proiektu orokortzat hartuko dira, halako moduan non lan-programa batean aztarnategi batean egindako esku-hartzeetan –baita 2004ko urtarrilaren 1a baino lehen egindakoetan ere– lortutako materialen fitxa edo inbentario guztiak agindu honetako I. eranskinean adierazitako datu-formatuaren araberako dokumentu bakar batean integratuko baitira. Baina agindu honen kargura soil-soilik lagundu ahal izango dira 2004ko urtarrilaren 1etik 2011ko urtarrilaren 1era bitartean bukatutako esku-hartzeetan lortutako materialen inbentarioak egokitzeko berariaz sorturiko gastuak.

Bai inbentario berriak lantzeari dagokionez, bai agindu honen aurretik egindako material arkeologikoen edota paleontologikoen inbentarioak egokitzeari dagokionez ere, Kultura Sailak egindako eta I. eranskinean jasotako eredura egokitu beharko dira.

Aztarnategi batean edo gehiagotan egindako esku-hartze batean edo gehiagotan lortutako materialen zati bat inbentariatzeko proiektuak honelako kasuetan baino ez dira diruz lagunduko:

a) Bilduma osoak pieza ugari dituelako –alegia 15.000 pieza baino gehiago–, justifikatzen denean. Kasu honetan, proiektuaren helburua diren materialak irizpide logiko baten arabera hautatu beharko dira, ahal dela izaera, tipologia eta kronologiaren arabera, eta material horiek bilduma osoko piezen %50 egingo dute gutxienez.

b) Aurkeztutako proiektuari esker aurrez hasitako inbentariatze-prozesu bat osatzea eta burutzea ahalbidetzen denean, agindu honetan esku-hartze bateko edo gehiagoko materialei dagokienez ezarritako ereduari jarraiki, halako moldez non esku-hartze batean edo urteanitzeko programa batean lortutako material guztia agindu honetan xedatutako ereduaren arabera inbentariatuko baita.

c) Esku-hartzean lortutako materialen zati bat ezin denean inbentariatze-proiektuan sartu, zeren eta katalogatu aurretik banakatze edo kontserbazio tratamenduak behar dituztenez gero, eta tratamendu horiek luzeak direnez gero, ezinezkoa baita garaiz inbentariatzea edo gordailu-zentroan entregatzea, agindu honetan ezarritako epearen barruan. Gorabehera hori tratamenduok egiten dituzten pertsonek edo aurretiko azterketa diagnostikoak egin dituzten pertsonek sinaturiko txostenaren bidez egiaztatuko da.

Dena den, baldin eta diru-laguntza bat eskatzen bada bilduma baten inbentarioari ekiteko, eta bilduma horretako materialaren zati bati buruzko lanak garatzeko epemuga hainbat urtetakoa bada, lan-epeen aurreikuspenaren txosten bat sartuko da, eta planifikazio horretarako erabilitako irizpideak ere bai.

Gordailu-zentroan entregatzeari begira, materialaren tratamenduarekin loturiko beste zeregin batzuk ere materialak inbentariatzeko prozesuaren barruan daudela ulertuko da, hala nola, prebentziozko kontserbazioarekin loturikoak, inbentariatzearen edo haren dokumentazio grafikoaren aurretiko edo ondotiko siglatzea eta antolatzea. Jarduera horiek, ordea, osagarritzat joko dira, eta ez dira inoiz diruz lagunduko bakarka, ezpada proiektu orokor baten baitan, zeinak nahitaez jaso behar baitu inbentario bat lantzeko eginkizuna eta, hala badagokio, materialak gordailu-zentroan entregatzea.