Uniqualek Euskal Unibertsitate Sistemaren Gradu-Tituluen Ikasketa-Planei buruzko aldez aurretiko txostena egiteko protokoloa.

Espainiar unibertsitateek Goi-mailako Hezkuntzaren Europar Esparru berria sortzeko daukaten partaidetzak Europa eraikitzeko funtsezkoa den proiektu hori inspiratzen duten oinarrietara egokitutako gradu-titulu berriak garatzea eskatzen du.

Zeregin horretan honakoek hartzen dute parte: Espainiako gobernuak, legedia bultzatzeko eta tituluak Unibertsitate, Zentro eta Tituluen Erregistro berrian erregistratzeko lanetan; Eusko Jaurlaritzak, tituluak baimentzeko arduradun; Unibertsitateen Kontseiluak eta Anecak, ikasketen egiaztapen akademikoaren arduradun, eta Uniqualek, Eusko Jaurlaritzak ematen duen baimenaren aurreko txostena egiteko arduradun, eta hori dena, 4/2007 Legeko 35. artikuluan, 3/2004 Legeko 48. eta 80.3.c) artikuluetan, 1393/2007 EDko 24., 25. eta 26. artikuluetan eta Euskal Autonomia Erkidegoaren 11/2009 Dekretuan xedatutakoaren arabera.

Euskal Unibertsitate Sistemaren 3/2004 Legeak, 48. artikuluan, xedatzen duenez, derrigorrezkoa da Uniqualen aldez aurretiko txostena izatea goi-mailako irakaskuntzako titulu ofizialak lortu ahal izateko ikasketa-plan berriak onartzeko. Ondoren, Gradu, Master eta Doktoretza tituluak lortu ahal izateko unibertsitateko irakaskuntza ofizialak ezartzeari eta ezabatzeari buruzko 11/2009 Dekretuak, txosten hori prestatzeko prozedura eta irizpideak ezarri ditu.

Aipatu manua eta Euskal Unibertsitate Sistemaren 3/2004 Legeko 80.3.c) artikuluan eta Uniqualen Estatutuetako 5.b) eta 9.d) artikuluetan (ekainaren 27ko 138/2006 Dekretua) xedatutakoa kontuan hartuta, Agentziak honako protokoloa prestatu du.

1. Uniqualek euskal unibertsitate-sistemako unibertsitateen gradu-tituluen ikasketa-planei buruzko aldez aurretiko txostena egiteko prozedura.

   Uniqualek gradu-titulu ofizialak lortu ahal izateko ikasketa-plan berriak onartzeko egindako aldez aurretiko txostena ikasketa-plan berriak egiaztatzeko prozesuaren zati bat da. Uniqualek egiten duen ebaluazio-prozesua Agentziaren kode etikoko oinarriek zuzendu behar dute: independentziak, gardentasunak, eraginkortasunak eta zuzentasunak.

   Irizpide eta prozedura horiek zehazten honakoek hartzen dute parte: Uniqualen Aditu Batzordeak, organo zientifiko-tekniko gisa, Uniqualen Estatutuetako 14.4.a) artikuluan xedatutakoaren arabera, eta Administrazio Batzordeak, gobernu organo gisa, Estatutuetako 8 eta 9.d) artikuluen arabera, eta Uniqualen zuzendaritzak, Estatutuetako 12.2.a) artikuluaren arabera.

1. Prozesuaren deskribapena.

   Aldez aurretiko txostena egiteko prozesua Unibertsitateek txostena egiteko eskabidea aurkezten dutenean hasten da.

   1. Unibertsitateak, txosten-eskabidearekin batera, honako agiriak aurkeztuko ditu:

      Nahi den graduko unibertsitateko irakaskuntza ofizialaren justifikazioko memoria; bertan, 11/2009 Dekretuko eranskinean azaldutako irizpideen arabera, honako alderdiak sartu behar dira:

      • Titulu ofiziala lortu ahal izateko ikasketa-planen justifikazioa.

      • Prestakuntza-programa.

      • Antolakuntza akademikoa.

      • Baliabide erabilgarriak.

      • Kalitatea bermatzeko sistemak.

      • Memoria ekonomikoa: unibertsitate-irakaskuntza ofizialari lotutako sarrerak, gastuak eta inbertsioak.

        Halakorik balego, graduko unibertsitate-irakaskuntza ofizialak antolatzen diren nazioko edo atzerriko unibertsitateekin batera antolatzeko hitzarmena. Hitzarmen horretan, gutxienez, ikasleen txostenak eta ikasleak zaintzeko eta titulua egiteko eta erregistratzeko ardura duen Unibertsitatea zein den eta ikasketa-planak aldatzeko edo deuseztatzeko prozedura zehaztuko dira. Atzerriko unibertsitateekin hitzarmenak egonez gero, edonola ere, Euskal Herriko Autonomia Erkidegoko unibertsitateak egiten dituen tituluen txostenak zainduko ditu.

        Eskabidea aurkezteko unean arestian aipatu hitzarmenak formalizatu gabe badaude, unibertsitateek, Unibertsitate eskatzaileak harekin sinatuko baitu hitzarmena, elkarrekin aritzeko asmoa dutela jasotzen duen agiria erantsi beharko da. Edonola ere, hitzarmen horiek irakaskuntza hasi aurretik sinatu beharko dira.

   2. Uniqualek titulu bakoitzari buruzko txostena egingo du. Horretarako Protokolo honetan ezarritako 11/2009 Dekretuko eranskineko irizpideei jarraituko die.

      Txostena lau hileko epean egingo da, 2009ko azaroaren 1etik edo eskabidea aurkeztutako datatik, hura lehengo dataren ondorengoa bada, zenbatzen hasita.

   3. Txostena aldekoa bada, behin betikotzat joko da, eta Unibertsitate eskatzaileari eta Hezkuntza, Unibertsitate eta Ikerketa Sailari jakinaraziko zaie.

   4. Txostena kontrakoa bada, hura Hezkuntza, Unibertsitate eta Ikerketa Sailari eta Unibertsitate eskatzaileari jakinaraziko zaie hamabost eguneko epean egoki deritzona argudia dezan.

   5. Aurkeztutako alegazioak ikusita Uniqualek, bi hileko epean alegazioak jasotzen direnetik zenbatzen hasita, behin betiko txostena egin, eta Hezkuntza, Unibertsitate eta Ikerketa Sailari eta Unibertsitate eskatzaileari jakinaraziko die.

2. Ebaluazio-organoak.

   Uniqualek horretarako izendatutako ebaluazio-batzordeen bidez egingo ditu txostenak. Haien kideek erabateko inpartzialtasuna izan beharko dute euren jardunean, eta egon litezkeen interes-gatazkak argitu eta, beharrezkoa balitz, prozesu osoan edo zati batean parte hartzeari uko egin beharko diote.

   Ebaluazio-prozesuan ezagututako informazio guztia sekretupekoa da.

   Ebaluazio-batzordeak ebaluazio-prozesuaren organo koordinatzailea dira, eta prozesu osoaren plangintza, kontrol eta azterketa lanak egin eta emandako iritzi teknikoen arabera banakako txostenak egingo dituzte.

   Ebaluazio-batzorde bakoitza zazpi kidek osatuko dute, eta doktore irakasle eta ikerlarien artean hautatu beharko dira; kideek gutxienez euren irakaskuntza jarduerari buruzko aldeko bi/hiru ebaluazio-(laneko hamar/hamabost urteri dagozkienak) eta gutxienez aitortutako ikerketa laneko bi/hiru aldi (seiurtekoak) izan beharko dituzte. Gainera, kudeaketa eta ebaluazioko esperientzia frogatu beharko du. Publikoak ez diren unibertsitateetako irakasleei dagokienez, Unibertsitate pribatuko doktore irakaslea edo parekoa izatearen ziurtagiria eta Unibertsitate publikoetako irakasleentzat aipatutako merituen parekoak, kanpotik ziurtatuak, eskatuko dira.

   Uniqualeko zuzendariak, ebaluazio-batzorde bakoitzeko kideen artean, lehendakaria eta idazkaria izendatuko ditu, eta haiek taldeko organoetan holako karguei dagozkien eginkizunak beteko dituzte.

   Ebaluazio-batzordeko kideek independentzia, inpartzialtasun eta gardentasuneko betekizunak bete beharko dituzte euren jardunean, eta aldi berean zeregin hori eta Euskal Herriko Autonomia Erkidegoko unibertsitateetako kudeaketa akademikoko esparruetako pertsona bakarreko edo taldeko kudeaketa karguak betetzea bateraezinak izango dira. Kideetako hiruk, gutxienez, Euskadiko unibertsitateetako irakasleak izan beharko dute. Halaber, eta Emakume eta Gizonen arteko Berdintasunerako otsailaren 18ko 4/2005 Legeko 3. artikuluaren arabera, ebaluazio-batzorde bakoitzean sexu biek gutxienez %40ko ordezkapena izateko ahalegina egingo da.

   Egin beharreko ebaluazio-prozesuaren ezaugarrien eta Uniqualen Administrazio Batzordearen Akordioak onartutako Ezagutza Arloen Katalogoaren arabera, eta Agentziaren estatutuetan xedatutakoaren arabera beti, zientzia-arlo handiei lotutako ebaluazio-batzordeak eratuko dira, ezagutza arlo guztiak hartzeko:

1. Zientziak.

2. Osasun-zientziak.

3. Arkitektura eta Ingeniaritza.

4. Gizarte- eta lege-zientziak.

5. Arte eta Giza zientziak.

   Ebaluatu beharreko titulu-kopuruaren eta gai aniztasunaren arabera, batzordeek eskatuta Uniqualen zuzendariak izendatutako aholkulari akademikoak izan ahalko dituzte batzordeek; aholkulariak batzordekide titularren baldintza berak betetzen dituzten irakasle eta ikerlarien artean izendatuko dira. Batzordeek beharrezkotzat jotzen badute, tituluari dagokion eremuko ospeko adituen artean hautatutako aholkulariak ere izan ahalko dira; aholkulari horiek batez ere tituluaren justifikazioari, haren gaitasunei, irakaskuntzen edukiari, irakasleen egokitzapenari eta kalitatea bermatzeko barne-sistemari lotutako kontuak ebaluatuko dituzte. Bestalde, memoria ekonomikoa baloratzeko aholkulariak izendatu ahalko dira.

   Izendapena: batzordekideak Uniqualen zuzendariak izendatuko ditu, Adituen Batzordeak proposatuta, eta Administrazio-Batzordeak onartu ondoren (Agentziaren 12.2.1) artikulua). Izendatutako hautagaia ordeztu ahal izateko, behar den postu bakoitzeko hiru hautagai izendatuko dira, eta denek jaso beharko dute burutu beharreko prozesuari buruzko informazio egokia batzordekideak izendatu aurretik.

   Batzordekideen agintaldia bi urtekoa izango da, eta bigarren agintaldi baterako baino ezingo dira berriz hautatu; hura bukatutakoan, ezin dira berriz hautatu kargua uzten dutenetik bi urte igaro arte. Agintaldia bukatutakoan, batzordekideek euren eginkizunak betetzen jarraituko dute, ordeztuko dituzten kide berriak hautatu eta izendatu arte.

   Batzordearen osaketa Euskal Herriko Agintaritzaren Aldizkarian eta Uniqualen webgunean argitaratuko da.

3. Ebaluazio-organoen funtzionamendua.

   Ebaluazio-batzordeak, prozesuaren koordinazio-organo gisa, izendatua izan ondoren, ebaluazio-prozesuaren plangintza orokorra egingo du.

   Bertan, batzordeek euren ebaluazio-lanak egiteko dauzkaten epeak adieraziko dira, unibertsitateei Uniqualen txostena protokolo honetan adierazitako gehienezko epean iritsiko zaiela bermatzeko. Batzordeak adostutako plangintzaren arabera, eskabideak Uniqualen jasotzeko denbora ordenari jarraituz ebaluatuko dira.

   Aurkeztutako eskabideak Unibertsitate eskatzaileak adierazitako ezagutza-eremuaren arabera esleituko zaizkio dagokion ebaluazio-batzordeari.

   Batzordeen ebaluazioa: Uniqualen administrazio-zerbitzuek, behar bezala ordenatuta eta sailkatuta utziko dituzte ebaluatu beharreko eskabideak eta haien laburpen zerrenda ebaluatzaile bakoitzaren esku. Batzorde bakoitzeko kideek banaka eta askatasunez egingo dute txostenen ebaluazioa, aldez aurretik ezarritako egutegian finkatutako epeen barruan.

   Orokorrean, eskabide bakoitza bi batzordekide edo aholkularik ebaluatuko dute. Horretarako, banakako azterketa eta ebaluazioa egindakoan, batzorde bakoitzaren lehendakariak batzordekide guztien saioa egiteko eguna eta ordua finkatuko ditu, txostenen taldeko ebaluazioa egiteko.

   Bilera horren emaitza ebaluatu beharreko eskabide bakoitzarentzako txosten bakarra izango da; txostena ebaluazio-batzordearen lehendakariak eta idazkariak sinatuko dute. Idazkariak bilera horren batzar-agiria egingo du; agiri horrek ebaluazioaren gorabeherak eta batzordeak egindako txosten guztiak jasoko ditu. Batzordeen txostenek aldeko txostena, hobekuntzak sartzearen baldintzapeko aldeko txostena edo kontrako txostena izango dituzte. Kasu guztietan batzordearen ebazpena arrazoitu egin behar da. Hobekuntzak sartzearen baldintzapeko aldeko txostenari dagokionez, hobekuntzak argi zehaztu beharko dira Unibertsitate eskatzaileari igortzeko. Kontrako txostenari dagokionez, hura ebazpen horretarako zioak zehaztasunez azalduz argudiatu beharko da.

   Batzordeak ebaluazioa eta txostena egin ondoren, eta txostena, bertan izan behar den iritzi teknikoari dagokionez, loteslea dela kontuan izanda, hura Uniqualen zuzendariari igorriko zaio.

2. Euskal unibertsitate-sistemako unibertsitateen gradu-titulu ofizialen ikasketa-planak aldatzeko prozedura.

   Unibertsitateek graduko unibertsitate-titulu ofizialak lortu ahal izateko ikasketa-planen aldaketak Uniquali igorriko dizkiote hiru hileko epean txostena egin dezan.

1. Txostena aldekoa bada, behin betikotzat joko da, eta Unibertsitate eskatzaileari eta Hezkuntza, Unibertsitate eta Ikerketa Sailari jakinaraziko zaie.

2. Txostena kontrakoa bada, hura Hezkuntza, Unibertsitate eta Ikerketa Sailari eta Unibertsitate eskatzaileari jakinaraziko zaie hamabost eguneko epean egoki deritzona argudia dezan.

3. Aurkeztutako alegazioak ikusita Uniqualek, bi hileko epean alegazioak jasotzen direnetik zenbatzen hasita, behin betiko txostena egin eta Hezkuntza, Unibertsitate eta Ikerketa Sailari eta Unibertsitate eskatzaileari jakinaraziko die.

   Txosten hori egiteko Uniqualek arestiko atalean azaldutako ebaluazio-organoak izango ditu, eta organook atal horretan bertan azaldu den bezala jardungo dute.

3. Ebaluazio-irizpideak eta arauak.

   Titulu-proposamenen ebaluazioa honako kalitate-irizpide eta arauen arabera egingo da. Agiri honetan jasotako irizpide eta arauak aurkeztutako ikasketa-planen kalitatea baloratzeko tresnak dira, honakoak aintzat hartuz:

   Tituluaren justifikazioa.

   Proposatutako prestakuntza-programa, bereziki helburu orokorren eta ikasleek lortuko dituzten gaitasunen egokitasuna baloratuz.

   Ikasleak sartzea eta onartzea arautzen dituzten sistemen argitasuna eta nahikotasuna.

   Diseinatutako antolakuntza akademikoa.

   Aurreikusitako plangintzaren koherentzia.

   Langile akademikoen kalitatea eta egokitasuna.

   Baliabide material eta zerbitzu erabilgarriak.

   Aurreikusitako eraginkortasuna itxarondako emaitzei dagokienez.

   Kalitatea bermatzeko aurreikusitako sistema titulua ebaluatzeari eta hura hobetzeko proposamenak egiteari begira.

   Aurreikusitako ezarpen egutegiaren egokitasuna.

   Memoria ekonomikoa.

   Proposatutako kalitate-irizpide eta -arauak 1393/2007 Errege Dekretuan, Euskal Autonomia Erkidegoaren 11/2009 Dekretuan, eta Bergengo Ministro Bileran unibertsitate-irakaskuntzaren ebaluaziorako ezarritako irizpide eta arauetan (2005eko maiatzaren 19 eta 20an) eta International Network for Quality Assurance Agencies in Higher Educationek Unibertsitateen Ebaluazio-Agentzientzako jardunbide onen kodean xedatutakoari jarraituz definitu dira.

   Irizpide eta arau horiek «a priori» daude ezarrita, unibertsitateek eta ebaluatzaileek, hurrenez hurren, ikasketa-planetarako proposamenak diseinatzeko edo ebaluatzeko eredu argiak izan ahal izateko.

1. Tituluaren azalpena.

   Irizpidea.

   Titulu-proposamen bakoitzak mailarekin edo ondorio akademikoekin bat datorren azalpen egokia jaso behar du, bere edukiari eta, kasuaren arabera, lanbide-ondorioei buruzko nahasmenik ez sortzeko.

   Arauak.

   Titulu-proposamenak ezaugarri orokorren azalpena izan behar du (izena, Unibertsitate eskatzailea, irakaskuntza mota, etab.).

   Informazio hori ematerakoan, 2007/1393 Errege Dekretuan jasotako graduko mailetarako deskribatzaileak izan behar dira kontuan. Atal horretan emandako informazioa erreferentzia izango da Titulu-proposamenaren gainontzeko atalak baloratzerakoan.

   Proposamenak honakoak bete behar ditu:

   Tituluaren izena jaso, izena proposatutako ikasketa-planarekin bat etortzeko eta haren mailari edo ondorio ekonomikoei buruz ez okerrarazteko eta edukiari eta, kasuen arabera, lanbide-ondorioei buruzko nahasmenik ez sortzeko moduan.

   Unibertsitate eskatzailea eta programaren ardura duen zentroa, saila edo institutua jaso.

   Irakaskuntza motari buruzko informazioa (presentziazkoa, erdi presentziazkoa edo distantziakoa) jaso.

   Eskainitako sarrera berriko plaza-kopurua. Kopuru horrekin batera aurreikusitako plaza-kopurua ere jaso. Graduak ordezten duen tituluak euskara eta gaztelania taldeetarako aurreko 5 urteetan (2005-2006, 2006-2007, 2007-2008, 2008-2009, 2009-2010 ikasturteak) izandako matrikula berriaren batez bestekoaren bidez lortzen da.

   Lehen aldiz proposatutako irakaskuntzei dagokienez, ikasle sartu berrien eskariaren aurreikuspenak azken urteetan antzeko tituluetan egondako eskaera aipatu beharko du.

   Kreditu-kopurua eta matrikulatzeko betekizunak. Edonola ere, atal horretan proposatutako betekizunek hezkuntza-premia berezietatik eratorritako kontuei erantzuten dietela egiaztatuko da. Beharrezkoa bada, ikasleei ikasketak zati bateko jardunaldian egiten uzten diela egiaztatuko da.

   Arautegiaren arabera Titulurako Europar Osagarria egiteko behar den gainontzeko informazioa jaso. Egiteko behar den informazioaren barruan, gradua atxikitzen zaion ezagutza arloa adierazi behar da. Diziplina bati baino gehiagori lotutako tituluei dagokienez, atxikipena adar nagusiari lotuz egin beharko da.

2. Justifikazioa.

   Irizpidea.

   Titulu-proposamen bakoitzak garrantzia izan behar du prestakuntza eta ikerketa esperientzien arabera, eta dagokion esparru akademikoarentzat egokia izan edota diren antzeko ikasketekin bat etorri behar du.

   Arauak.

   Titulu-proposamenak arrazoituta aurkeztu behar zaie gizarteari, herri-administrazioei eta unibertsitate-erakundeari berari. Titulu-proposamena laguntzen duten erreferenteek edo justifikazioek akademikoki, zientifikoki edo profesionalki bermatzen duten argudioak eman behar dituzte.

   Proposamenak honakoak bete behar ditu:

   Tituluaren interesa eta garrantzi akademiko, zientifiko eta profesionala agerian uzten dituzten ebidentziak eman.

   Proposatutako graduko tituludunen lan eskaintza, eskaria eta laneratzeari buruzko ebidentzien berri eman.

   Proposatutako tituluari lotuta eremu akademiko, zientifiko eta profesionalean lehenagoko irakaskuntza, ikerketa eta kudeaketa esperientziak aipatu.

   Proposatutako tituluaren prestakuntza arloan dagoen eskaintzaren azterketa aurkeztu.

   Gizarteari zein ikasleei dagokienez, benetako eskaera dagoen kontuan hartu; eskaera hori kanpoko ikerketa eta bermeetan oinarritu beharko da. Bereziki eskaera urria izan arren euskal gizartearen premiak asetzeko behar diren tituluak aztertuko dira.

   EHUk sustatuko tituluei dagokienez, titulu bera Unibertsitate beraren zentro batean baino gehiagotan eskaini nahi bada, azalpen arrazoitua behar da, bikoiztasun horien premiari eta gizarte-egokitasunari buruzko ebidentzietan oinarrituz.

   Tituluak Espainian araututako lanbide-jarduera bat burutu ahal izateko gaitzen badu, titulua Gobernuak eta Hezkuntza eta Zientzia Ministerioak ezarritako baldintza eta edukiei lotu beharko zaie.

   Bai nazio mailan bai nazioartean ikasketa-plana egiteko erabili diren barneko eta kanpoko aholkularitza prozesuak azaldu. Aholkua profesionalei, ikasleei edo bestelako taldeei eska dakieke.

   Unibertsitate proposatzailetik kanpoko erreferenteak eman beharko dira; erreferenteok proposamena antzeko ezaugarri akademikoko tituluentzako nazioko edo nazioarteko irizpideei egokitzen zaiela bermatu beharko dute. Honakoak izan daitezke:

   Anecaren Europar Bateratasunerako Programaren liburu zuriak (www.aneca.es; liburu zurien atala).

   Espainiako unibertsitateen, europar unibertsitateen, beste herrietakoen edo nazioartekoen ikasketa-planak, Anecak Unibertsitate tituluak egiaztatzeko eskabiderako prestatutako Memoria betetzeko laguntza gidan azaldutakoaren arabera.

   Espainiako, Europako, bestelako herrietako edo nazioarteko profesionalen elkarte edo elkargoen txostenak.

   Unibertsitateei buruzko abenduaren 21eko 6/2001 Lege Organikoa aldatzen duen apirilaren 12ko 4/2007 Lege Organikoa indarrean sartzean indarrean dauden katalogoko tituluak.

   Beste batzuk, haien kalitatea edo interes ekonomikoa justifikatuz.

3. Helburuak.

   Irizpidea.

   Tituluaren helburuek egokiak izan behar dute eta ikasleek lortu beharreko gaitasunek bat etorri behar dute titulua emateko eska daitezkeenekin eta Goi-mailako Hezkuntzaren Europar Esparruan ezarritako kualifikazioekin.

   Arauak.

   Tituluaren helburu orokorrek hari eman nahi zaion joera akademiko, profesional edo espezializatuari, eta abarri erantzun behar die.

   Ikasleak lortu beharreko gaitasunek ebaluagarriak izan eta gradu-mailari dagozkionekin bat etorri behar dute.

   Proposamenak honakoak bete behar ditu:

   Tituluaren helburu orokorrak ezarri.

   Ikasleek ikasketak bukatutakoan lortu behar dituzten gaitasunen zerrenda zehaztu. Proposatutako gaitasunek bat etorri behar dute graduari dagokion mailarentzat 1393/2007 Errege Dekretuak jasotzen dituenekin.

   Ikasleek tituluaren gaitasun orokor eta zehatzak lortzeko arlo bakoitzak dauzkan zeregina eta eginkizuna arrazoituta justifikatu. Oso garrantzitsua izango da arlo bakoitzak bereziki tituluaren zer gaitasun zehatzetan laguntzen duen zehaztea.

   Ikasketa-planeko arloen arteko balizko errepikapenak eta gainjarpenak aztertu, halakorik egonez gero, haien irismena zehaztuz eta haien zentzua eta beharra argudiatuz.

   Ikasketa-planeko arlo guztietan «genero ikuspegia» dagoela egiaztatu.

   Tituluak Espainian araututako lanbide-jarduera bat burutu ahal izateko gaitzen badu, ikasketa-plana Gobernuak dagozkion fitxetan titulu horretarako ezarritako xedapenei lotu beharko zaie.

   Helburu orokorrak oinarrizko eskubideak eta gizonen eta emakumeen arteko aukera berdintasuneko eskubideak, desgaitasuna duten pertsonen aukera berdintasuneko eta irisgarritasun unibertsaleko oinarriak eta bake eta balio demokratikoetako kulturari dagozkion balioak kontuan hartuz finkatu beharko dira.

4. Ikasleak sartzea eta onartzea.

   Irizpidea.

   Tituluak sistema irisgarriak izan beharko ditu sartzeko, onartzeko eta ikasketen hastapenean ikaslea bideratzeko bide guztiak arautzeko eta haien berri emateko.

   Arauak.

   Ikasle sartu berriei matrikulatu aurretik tituluaren ezaugarriei buruzko informazioa eman behar zaie, unibertsitatean eta tituluan errazago sar daitezen.

   Halaber, administrazio eskudunak hala baimenduz gero, sartzeko baldintza edo froga bereziei buruzko informazio-sistemak izan behar dira.

   Tituluak kredituak transferitzeko eta onartzeko sistema egokiak izan behar ditu; sistema horiek azalduta egon behar dute, bai ezagutza adar bereko edo beste adar bateko oinarrizko arloei, bai egindako beste kredituei dagokienez.

   Proposamenak honakoak bete behar ditu:

   Tituluan sartzeko bideak eta betekizunak adierazi, baita ikasleei sartzeko gomendatzen zaizkien ezaugarriak ere.

   Matrikulatu aurreko informazio-sistemak eta ikasle sartu berriei abegi egiteko eta bideratzeko prozedurak adierazi, unibertsitatean eta tituluan errazago sar daitezen.

   Garrantzitsua da ikasleek, ikasturtea hasi aurretik, informazio akademiko nahikoa izatea beren ikasketa prozesua planifikatu ahal izateko (arloen irakaskuntza-gidak, tutoretzen ordutegiak, azterketen egutegia...). Urrutiko irakaskuntzaren kasuan, irakaskuntzan erabilitako bitartekoei (Internet, telebista, irratia, etab.) eta irakaskuntza-material erabilgarriei eta ikaslearentzako arreta-puntuei buruz informatzeko prozedurak izan beharko dira.

   Hala dagokionean, administrazio eskudunak baimenduta beti, baldintza bereziak edo sartzeko frogak adierazi.

   Kredituak transferitzeko eta onartzeko tresna egokiak izan, betiere funtsezko honako arauak errespetatuz:

   Helmugako titulua jatorrizkoaren adar berekoa den guztietan, adar horretako oinarrizko prestakuntzako arloei dagozkien kredituak onartu egingo dira.

   Helmugako adarrari dagozkion ikasitako oinarrizko prestakuntzako beste arloei dagozkien kredituak ere onartu egingo dira.

   Helmugako unibertsitateak gainontzeko kredituak onartzeko ikasleak ikasitako gainontzeko arloei lotutako gaitasunen eta ezagutzen, eta ikasketa-planean aurreikusitakoen arteko egokitasuna edo zeharkakoak izatea hartuko du kontuan.

   Unibertsitateei buruzko abenduaren 21eko 6/2001 Lege Organikoko 46.2.i) artikuluaren arabera, ikasleek kredituetako onarpena lortu ahalko dute honako jardueretan parte hartzeagatik: unibertsitateko kultura-jarduerak, kirol-jarduerak, ikasleen ordezkaritzakoak, elkartasunekoak eta lankidetzakoak; gehienez ere ikasketa-plan osoko 6 kreditu onartuko zaizkie. Unibertsitatearen kredituen transferentzia eta onarpeneko sistemak beren-beregi aipatu beharko du puntu hori.

   Onarpen-prozesuak lehenagoko prestakuntzari buruzko betekizunak ezar ditzake, hala nola txosten akademikoaren gutxieneko mailak, lan esperientzia, eta zenbait gaitasun egiaztatzea.

5. Irakaskuntzen plangintza.

   Irizpidea.

   Ikasketa-planak koordinatuta diseinatutako prestakuntza proposamena osatu beharko du, eta diseinu horrek garai jakin batean ikasleek izan beharreko arduraldia hartuko du aintzat.

   Arauak.

   Ikasketa-planaren modulu-, arlo- eta kreditu-egiturak helburu orokorrekin eta ezarritako gaitasunekin bat etorri behar du eta irakasleen koordinaziorako tresnen laguntza izan behar du.

   Modulu edo arlo bakoitzean ezarritako edukiek, prestakuntza-jarduerek, ebaluazio-sistemak eta lehenagoko betekizunek egokiak izan behar dute modulu edo arlo horretan ezarritako gaitasunak lortzen laguntzeko.

   Irakaskuntzen plangintzak eta denborako sekuentziazioak moduluen edo arloen arteko koordinazioa eta ikasleen benetako arduraldia aurreikusitakoari egokitzea ahalbidetu behar ditu.

   Proposamenak honakoak bete behar ditu:

   Ikasketen egiturak eta antolakuntzak bat etorri behar dute helburu orokorrekin eta irakasleen arteko koordinazioaren laguntza izan behar dute, ikasleek gaitasunak eskuratzen dituela bermatu ahal izateko.

   Gehiegizko espezializazio goiztiarra saihestu; gomendagarria da ikasketak honelako eredu baten arabera egituratzea: zenbait ikasketetako lehen ikasturteetan partekatutako arloak jarri eta azkenetan dibertsifikazio egokia egin; horrela errazagoa da ikasleak aukeren artean mugitu ahal izatea eta baliabideen erabileraren eraginkortasuna hobetu egiten da.

   Titulu-proposamena osatzen duten moduluen edo arloen laburpena eman, lortu beharreko gaitasunak eta haien ebaluazioa azpimarratuz; bertan oinarrizko prestakuntzako arloak, derrigorrezko eta hautazko arloak, kanpoko praktikak eta titulazioaren xedea den lana sartu.

   Hautatutako oinarrizko arloek bat etorri behar dute tituluaren ezagutza adarrarekin.

   Egokia den ikasketa-planetan, oinarrizko eskubideei eta gizon eta emakumeen arteko berdintasun eskubideei, desgaitasuna duten pertsonen aukera berdintasuneko eta irisgarritasun unibertsaleko oinarriei eta bake eta balio demokratikoetako kulturari dagozkion balioei lotutako irakaskuntzak sartu beharko dira.

   Modulu edo arlo bakoitza zehaztasunez azaldu, haien denborako plangintza zehaztuz.

   Unibertsitatearen beraren ikasleen eta abegikoen eta tituluari atxikitako langileen mugikortasuna antolatzeko prozedurak ezarri, ECTS kredituak onartzeko eta pilatzeko sistema sartuz.

   Matrikulatu ondoren ikasleei abegia egiteko berariazko laguntza eta bideratze tresnak azaldu. Desgaitasunetik eratorritako hezkuntza-premia bereziak dauzkaten ikasleei dagokienez, laguntza eta aholkularitza zerbitzu egokiak sartu beharko dira.

   Ikasleen egonaldi araubidea ezarri.

   Lanbide-graduei dagokienez, oso garrantzitsua izango da lanbide-praktika egokiak proposatzea eta enpresekin eta bestelako erakundeekin praktika horiek egiteko lankidetza-hitzarmenak ezartzea.

   Erakunde laguntzaileek sinatutako hitzarmenak azaldu, koordinazio-organoen egitura, osaketa eta eginkizuna ezarriz.

   Proposatutako titulua irakasteko hizkuntzei buruzko informazioa eman:

   Euskaraz eskainitako arlo eta kreditu eskaintza.

   Hirugarren hizkuntza baten sustapena.

6. Langile akademikoak.

   Irizpidea.

   Titulu bakoitzeko irakasleek eta laguntzako bestelako giza baliabideek egokiak izan behar dute titulu-proposamenean ezarritako helburu orokorrak eta gaitasunak lortzeko.

   Arauak.

   Tituluan nahastutako langile akademikoek nahikoak izan behar dute eta haien arduraldi maila, kualifikazioa eta esperientzia egokiak izan behar dute proposatutako ikasketa-plana burutzeko.

   Proposamenak honakoak bete behar ditu:

   Langile akademiko erabilgarria zehaztu, haien maila akademikoa, unibertsitatearekiko lotura mota, irakaskuntza eta ikerketa edo lan-esperientzia eta tituluari lotutako ezagutza eremuekiko egokitasuna zehaztu. Irakasleen maila zehaztu; kategoriak eta irakasle eta ikerlari lanaren aldeko ebaluazioa. Edonola ere, Uniqualek alderdi horri buruzko informazio osagarria eskatu ahalko du proposamena ebaluatu bitartean.

   Laguntzako langile erabilgarriak, unibertsitatearekiko lotura, lan esperientzia eta tituluari lotutako ezagutza eremuekiko egokitasuna zehaztu. Edonola ere, Uniqualek alderdi horri buruzko informazio osagarria eskatu ahalko du proposamena ebaluatu bitartean.

   Presentziazkoa ez den irakaskuntzari dagokionez, garrantzitsua da justifikatzea besteak beste honako kontuak konpondu ahal izateko langileak daudela: ikasle eta irakasleei laguntza eta orientazioa emateko zerbitzuak behar bezala betetzea; beharrezko laguntza teknologikoa ematea, e-learningeko plataforma jakinen bat erabiltzen bada; irakaskuntza-materialak prestatzerakoan irakasleei laguntzea urrutiko hezkuntzarako berariazko euskarri teknologikoak erabiliz.

   Irakasleen eta behar diren bestelako giza baliabideen aurreikuspena ikasketa-planaren egitura, irakatsi beharreko kreditu kopurua, lotutako ezagutza adarrak, ikasle-kopurua eta garrantzizko bestelako aldagaiak aintzat hartuz definitu.

   Baterako tituluei dagokienez, parte hartzen duten unibertsitateetatik etorritako irakasleen partaidetza antolatzeko moduari buruzko informazioa sartu beharko da.

   Irakasleak gizonen eta emakumeen arteko berdintasuneko eta desgaitasuna duten pertsonak ez diskriminatzeko irizpideen arabera kontratatuko direla bermatzeko dauden tresnak zehaztu.

   Titulua lanbidekoa bada edo harantz zuzentzen bada, ezinbesteko betekizuna izango da proposamenak nahikoa esperientzia eta lanbide sektorearekiko harremana dauzkan irakasle taldea izatea.

7. Baliabide materialak eta zerbitzuak.

   Irizpidea.

   Aurreikusitako jarduerak burutzeko behar diren baliabide materialek eta zerbitzuek egokiak izan behar dute ikasketa-planean ezarritako helburuak eta gaitasunak lortzeko.

   Arauak.

   Ikasketa-planak hura garatzeko azpiegitura eta baliabide material egokiak izan behar ditu.

   Arau orokorra, baliabide materialak irakatsitakoei dagozkien zerbitzuen ibilera bermatzeko egokiak izatea, aurreikusitako taldeen tamaina eta irakaskuntza-ikaskuntza-metodologiei egokitzea ahalbidetzea, etab. da.

   Liburutegirako, irakurketa eta talde-lanerako geletarako esparruek eta baliabide bibliografikoek nahikoak eta irisgarriak izan beharko dute arloen programetan ezarritakoa betetzeko.

   Presentziazkoak ez diren irakaskuntzei dagokienez, urrutiko irakaskuntzari dagozkion baliabideen premia, hala nola irakasle eta ikasleen arteko harremanetarako sistemak eta tresnak, izango dira kontuan. Holako irakaskuntzetan ebaluazioan garrantzi handiagoa izango dute ikasleak esparru birtualetan sartu ahal izateko baliabideek edo plataformek.

   Egokia denean, elkartutako zentroen baliabideak eta zerbitzuak hartuko dira kontuan.

   Proposamenak honakoak bete behar ditu:

   Bai Unibertsitate parte hartzaileetan, bai erakunde laguntzaileetan, ekipamendu eta azpiegitura hornidura nahikoa aurreikusi, prestakuntza helburuei nola egokitzen zaizkien justifikatuz. Zehazki, tituluaren helburuak betetzeko funtsezkoak diren baliabide materialak eta zerbitzuak (laborategiak, gela eta ekipamendu bereziak, berariazko liburutegiak...) identifikatu eta deskribatu behar dira. Edonola ere, irisgarritasun unibertsaleko eta guztientzako diseinuko irizpideak bete behar dira, desgaitasuna duten pertsonen aukera berdintasunei, ez diskriminazioari eta irisgarritasun unibertsalari buruzko abenduaren 2ko 51/2003 Legean xedatutakoaren arabera.

   Presentziazkoak ez diren irakaskuntzei dagokienez, urrutiko irakaskuntzaren berezko baliabideen premia izango da kontuan, hala nola irakasle eta ikasleen arteko noranzko biko komunikazio sistemak eta tresnak. Holako irakaskuntzetan ebaluazioan garrantzi handiagoa izango dute ikasleak esparru birtualetan sartu ahal izateko baliabideek edo plataformek.

   Beharrezkoa denean, prestakuntza-jardueren garapenean bestelako erakundeek daukaten partaidetza arautzeko hitzarmenei buruzko informazioa eman. Edonola ere, erakunde laguntzaileetan erabilgarri dauden baliabide materialek eta zerbitzuek planifikatutako prestakuntza-jarduerak egitea ahalbidetzen dutela justifikatu beharko da.

   Unibertsitateko eta erakunde laguntzaileetako material eta zerbitzuen ikuskatzea eta mantentze-lana egiteko edo bermatzeko tresnak eta haiek eguneratzeko tresnak zehaztu.

   Titulu-proposamena egiteko unean behar diren baliabide material eta zerbitzu guztiak izan ezean, programako prestakuntza-jarduerak burutzeko ezinbestekoak diren azpiegiturak berriztatzeko eta hobetzeko eta ekipamendu berriak lortzeko planak azaldu. Edonola ere, Uniqualek baliabide materialei eta zerbitzuei buruzko informazio osagarria eskatu ahalko du proposamena ebaluatu bitartean.

8. Aurreikusitako emaitzak.

   Irizpidea.

   Titulu-proposamenak tituluaren eraginkortasunari lotutako emaitzen aurreikuspena eta ikasleen ikaskuntzaren emaitzak baloratzeko tresna orokorrak izan behar ditu.

   Arauak.

   Egiaztatzea berritzeko fasean, balioespen horiek aztertuko dira, unibertsitateak emandako justifikazioei eta jarraipenetik eratorritako ekintzei kasu eginez.

   Tituluak ikasleen ikaskuntzaren aurrerapena eta emaitzak baloratzeko prozedura multzo bat izan behar ditu prest.

   Proposamenak honakoak bete behar ditu:

   Tituluaren aurreikusitako emaitzei lotutako adierazle-multzo bat balioetsi; balioespen hori sartzeko gomendatutako ezaugarrien, ikasketa-planean sartzen diren ikasle motaren, ezarritako helburuen, ikasleek ikasketetarako daukaten arduraldi mailaren eta egokitzat jotzen diren testuinguruko bestelako elementuen arabera justifikatuko da. Egiaztatzea berritzeko fasean, balioespen horiek aztertuko dira, unibertsitateak emandako justifikazioei eta jarraipenetik eratorritako ekintzei kasu eginez. Proposamenak, gutxienez, graduazio tasari, uzte-mailari eta eraginkortasun mailari buruzko balioak jaso behar ditu. Ondorio horietarako, honela ulertuko dira kontzeptuok:

   Graduazio-tasa: Euren sarrera multzoari dagokionez, irakaskuntza ikasketa-planean aurreikusitako epean (d) edo urtebete beranduago (d+1) bukatzen duten ikasleen portzentajea. Probetxu akademikoaren batez bestekoa da.

   Uzte-tasa: sarrera-multzo bateko ikasleei dagokienez, aurreko ikasturtean titulua bukatu behar zuten guztietatik ez ikasturte horretan ez aurrekoan matrikulatu ez direnen ehunekoa.

   Eraginkortasun-tasa: Ikasketa-planean ezarritako kreditu-kopuru osotik, ikasturte jakin batean titulatu diren ikasleek euren ikasketetan matrikulatu behar izan duten kreditu kopuru osoaren ehunekoa.

   Unibertsitateak ikasleen ikaskuntzaren aurrerapena eta emaitzak baloratzeko daukan prozedura orokorra azaldu. Haien artean, kanpoko frogen emaitzak, titulu amaierako lanak, etab. har daitezke kontuan.

9. Kalitatea bermatzeko sistema.

   Irizpidea.

   Titulu-proposamenak kalitatea bermatzeko sistema izan behar du haren etengabeko kontrola, berrikusketa eta hobekuntza ziurtatzeko.

   Arauak.

   Titulua ematen den zentroak, edo bestela Unibertsitateak, kalitatearen bermeari lotutako prozedurak izan eta titulua onartzeko, kontrolatzeko, aldian-aldian berrikusteko eta hobetzeko tresna formalak izan behar ditu.

   Halaber, ikasleei eta gizarteari begira, titulu berriari eta haren helburuei buruzko informazio tresnak ezarri behar dira.

   Proposamenak honakoak bete behar ditu:

   Ikasketa-planaren kalitatea bermatzeko sistemaren organo edo unitate arduraduna (egitura eta osaketa) eta haren araudia edo lan egiteko arauak zehaztu. Atal horretan organo horretan irakasleek, ikasleek, arduradun akademikoek, langile laguntzaileek eta kanpoko bestelako eragileek parte hartzeko nola egituratzen den zehaztuko da.

   Kontuan hartu titulu bakoitzak enplegu-emaileekin eta, oro har, titulurako garrantzia duen ingurune ekonomiko eta profesionalarekin elkarrizketa irekia izateko batzordea sortu ahal izatea.

   Tresna eta prozedura egokiak erabiliz ikasketa-planaren bilakaera (helburuak, gaitasunak, plangintza...) nola berrikusiko den ezarri; tresna eta prozedura horiek aldian-aldian erabiliko dira honakoei buruzko informazioa jasotzeko:

   Irakaskuntzaren eta irakasleen kalitatea.

   Kanpoko praktiken eta mugikortasun programen kalitatea.

   Graduatuen laneratzea eta jasotako prestakuntzari buruzko asetze-maila.

   Inplikatutako talde guztien (ikasleak, langile akademikoak eta administrazio eta zerbitzuetakoak, etab.) asetze-maila eta iradokizun eta erreklamazioekiko arreta.

   Ikasketa-planaren hobekuntza bermatzen duten erabakiak hartzeko tresna eta prozedura egoki eta sistematikoak izan; honakoak hartu beharko dituzte:

   Irakaskuntzaren eta irakasleen kalitatea.

   Kanpoko praktiken eta mugikortasun programen kalitatea.

   Tresna eta prozedura horiek, gutxienez, arduradunak, erabakiak onartzeko eta haien jarraipenak egiteko moduak jaso beharko dituzte.

   Titulua azkenean gainditu gabe geratzeko mugak jarriko dituzten irizpideak zehaztu. Horretarako, lehenago zentro/unibertsitatean irizpide horiek ezartzeko, berrikusteko, onartzeko eta aldian-aldian eguneratzeko sortutako sistema azaltzen duen prozedura ezarri behar da.

   Ikasketa-planari, haren garapenari eta emaitzei buruzko informazioa argitaratzeko tresnak ezarri, inplikatu edo interesdun guztiei (ikasleei, irakasleei, langile laguntzaileei, etorkizuneko ikasleei, kanpoko eragileei, eta abarri) iristeko.

   Genero ikuspegia sartzea bermatzeko prozedura egokiak finkatu.

10. Ezartzeko egutegia.

    Irizpidea.

    Titulu berriak ezartzeko prozesua denboran planifikatu behar da, eta, beharrezkoa denean, lehenagoko planetatik datozen ikasleak ikasketa-plan berrira egokitzeko tresna aurreikusi behar da.

    Arauak.

    Kronograma bat eman behar da; bertan titulazio berriak ezartzeko egutegia jaso behar da, Unibertsitate, Zentro eta Tituluen Erregistroan sartuko dela aurreikusten den urtetik aurrera.

    Dagokionean, lehenagoko kurtsoetako ikasleak ikasketa-plan berrietara egokitzeko hautatu den prozedura zehaztuko da. Halaber, proposatutako tituluaren ezarpenagatik desagertzen diren irakaskuntzak zehaztuko dira.

    Titulu bakoitzak honakoak bete behar ditu:

    Titulua ezartzeko egutegia jasotzen duen kronograma jaso.

    Beharrezkoa denean, lehenagoko ikasketetako ikasleak ikasketa-plan berrira egokitzeko prozedura zehaztu.

    Desagertu ondorengo zenbait urte akademikoz, desagertutakoan ikasleei irakaskuntzak gainditzen ahalbidetuko dien tresna ezarri.

    Proposatutako tituluaren ezarpenagatik desagertuko diren irakaskuntzak zehaztu.

11. Memoria ekonomikoa.

    Irizpidea.

    Titulu berriak ezartzeko prozesuari denborako plangintza ekonomiko egokiak eman behar dio sostengua.

    Arauak.

    Proposatutako tituluari lotutako sarrera, gastu eta inbertsioen aurreikuspenaren denborazko azalpena sartu behar da.

    Euskal Herriko Unibertsitateak bultzatu nahi duen titulu bakoitzeko memoria ekonomiko xehatua aurkeztu beharko du; memoriak azpiegitura materialari, irakasle eta ikertzaileei eta administrazio eta zerbitzuetako langileei, eta finantzabideei buruzko datuak izango ditu.

    Vitoria-Gasteiz, 2009ko azaroaren 5a.

    Uniqualeko zuzendaria,

    MIKEL URQUIJO GOITIA.