Deialdi honen xedea da euskal unibertsitate-sistemari buruzko 2004ko otsailaren 25eko 3/2004 Legearen Bigarren Xedapen Iragankorrean irakasle lankide edo agregatuak kontratatzeko aurreikusten den txosten espezifikoa eskuratzeko oinarriak ezartzea, 2008ko uztailaren 29ko 149/2008 Dekretuaren VIII. eta IX. eranskinetan ezarritakoari jarraituz.

Lankide eta/edo agregatu irudietarako, txosten espezifikoaren eskabidea aurkezteko epea hilabetekoa izango da, deialdi hau Euskal Herriko Agintaritzaren Aldizkarian argitaratu eta biharamunetik hasita, Herri Administrazioen Araubide Juridikoaren eta Administrazio Prozedura Erkidearen 1992ko azaroaren 26ko 32/1992 Legearen 48. artikuluan aurreikusitakoari jarraituz.

1. – Eskabideak Uniqualen aurkeztuko dira, eta, interesdunaren curriculumarekin batera, aplikazio informatiko baten bidez sortuko dira. Aplikazio hori Agentziaren web gunean dago eskuragarri (www.uniqual.org).

   Eskabidea, halaber, deialdi honen I. eranskin gisa gaineratutako eredua bete ondoren aurkez daiteke. Hala ere, espedientearen izapideak motelagoak dira kasu horietan.

2. – Eskabidea, halaber, Herri Administrazioen Araubide Juridikoaren eta Administrazio Prozedura Erkidearen 1992ko azaroaren 26ko 30/1992 Legearen 38.4 artikuluan ezarritako edozein baliabideren bidez aurkeztu ahal izango da.

3. – Posta-zerbitzuak emateko araudia onartzen duen 1999ko abenduaren 3ko 1829/1999 Errege Dekretuaren 31. artikuluan ezarritakoari jarraitu behar diote eskabidea posta-bulegoetan aurkezten duten interesdunek. Artikuluak honako hau dio:

   “Herritarrek edo erakundeek posta-zerbitzu unibertsala emateko agindua jaso duen operadorearen bitartez herri-administrazioen organoetara bidaltzen dituzten eskabideak, idazkiak eta komunikazioak gutun-azal irekian aurkeztuko dira, eta bulegoaren izena eta onarpenaren lekua, ordua eta minutua jasoaraziko dira, argi eta garbi, bidali nahi den dokumentuaren lehen orriaren goiburuan. Halaber, bidali nahi den dokumentu nagusiaren kopiaren, fotokopiaren edo beste erreprodukzio mota baten lehen orrialdean bidalketaren zirkunstantziak jasoaraztea eskatu ahal izango du igorleak, identitatea jatorrizkoarekin konparatu ondoren. Dokumentua administrazio-organo eskudunari aurkeztu izana egiaztatuko duen agiri gisa aurkeztuko da.

   Adierazitako eginbideen ondoren, igorleak berak itxiko du gutun-azala, eta enplegatuak onarpenaren ordezkagiria egin eta emango du. Ordezkagiri horren jatorrizkoa bulegoan artxibatuko da.

   Artikulu honetan aurreikusitako betebeharrei jarraiki, posta-zerbitzu unibertsala emateko agindua jaso duen operadoreak onartutako bidalketak behar bezala aurkeztutzat hartuko dira, Herri Administrazioen Araubide Juridikoaren eta Administrazio Prozedura Erkidearen 1992ko azaroaren 26ko 30/1992 Legearen 38. artikuluan eta haren garapen-araudian aurreikusitako ondorioetarako”.

1. – Eskabidean, txostena egiteko eskaera zer kontratu-motari dagokion adierazi behar da.

2. – Txostenaren eskaerarekin batera, Agentziaren web guneko aplikazio informatikoaren bidez egindako curriculuma igorri behar da (www.uniqual.org). Curriculuma, halaber, deialdi honen II. eranskin gisa gaineratutako eredua bete ondoren aurkez daiteke. Agentziaren web gunean ere eskuratu ahal izango da.

   Halaber, eskatutako titulazioa eta interesdunaren historial akademikoa osatzen duten meritu guztiak egiaztatzen dituen dokumentazioaren kopia aurkeztu beharko da, eta, hala badagokio, baita doktore izatea egiaztatzen duen dokumentazioa ere.

3. – Interesdunek ez dituzte, ezein kasutan, jatorrizko dokumentuak aurkeztu behar, ez baitira itzuliko.

   Aurrekoa alde batera utzi gabe, legez eskatutako baldintzak edo alegatutako merituak betetzen direla egiaztatzeko beharrezkoa den guztietan eskatu ahal izango die Uniqual agentziak eskatzaileei dokumentazioa aurkeztea.

4. – Dagokion espedientearen aipamen zehatza eginda, ebaluazioa edo txostena egiteko beste eskabide batzuekin batera aurkeztu izanagatik Uniqual agentziak dagoeneko baduen egiaztatzeko dokumentazioaren kopiak aurkeztea salbuetsi ahal izango da.

5. – Txosten espezifikoarekin batera, aurkeztutako dokumentuaren egiazkotasunaren deklarazioa aurkeztu behar dute interesdunek. Deklarazio horretan, aurkeztutako dokumentu guztien zerrenda sartu behar da. Deklarazio hori egiteko, Uniqual agentziaren web gunean argitaratutako formularioa erabil daiteke.

Uniqualen jasotzen den eskaera bakoitza identifikazio-kode batekin erregistratuko da, identifikazio-kodea jarriz eskatzaile eta postu-mota bakoitzeko, eta espedientea irekiko da sarrera-data adierazteko.

1. – 2008ko uztailaren 29ko 149/2008 Dekretuaren VIII. eta IX. eranskinetan aurreikusitakoaren arabera sortuko da horretarako batzorde espezifikoa eta diziplina anitzekoa, eta hark egingo du txosten espezifikoa, euskal unibertsitate-sistemari buruzko 2004ko otsailaren 25eko 3/2004 Legearen bigarren Xedapen Iragankorraren lehen atalean aipatzen dena.

2. – Uniqualek 2008ko uztailaren 29ko 149/2008 Dekretuaren VI eta II eranskinetan onartutako irizpideen arabera egingo dute lan batzorde espezifikoko kideek, lankide eta agregatu kontratu-irudietarako, hurrenez hurren.

1. – Txostenak Uniqualen zuzendariaren ebazpen bidez formalizatuko dira. Eskaera bakoitzak bere ebazpena izango du. Ebazpen horren aurka berraztertzeko errekurtsoa jarri ahal izango da, nahi izanez gero, adierazitako Agentzian, hilabeteko epean, edota, zuzenean, administrazioarekiko auzi-errekurtsoa jarri ahal izango da Administrazioarekiko Auzietako Epaitegi eskudunetan, bi hilabeteko epean (bi kasuetan, ebazpena jakinarazten denetik aurrera kontatzen hasita).

2. – Ebazpenetan, ebaluazioa zer kontratu-irudirako egin den, ebaluazioa positiboa edo negatiboa izan den, eta txostena aldekoa edo kontrakoa izan den adierazi beharko da.

3. – Eskatzaileek, irakasle lankide eta agregatu irudietarako ebaluazio positiboa lor dezakete, beti ere aurkeztutako merituekin hurrengo puntuazio minimoak lortzen dituztenean:

   • Irakasle lankidea: guztira 55 puntu baino gehiago lortzea eta, horrez gain, Prestakuntza akademikoa eta irakaskuntzako esperientzia eta Jarduera profesionala eta ikerketa-jarduera atalen artean gutxienez 50 puntu lortzea.

   • Irakasle agregatua: guztira 65 puntu baino gehiago lortzea eta, horrez gain, Ikerketa-jarduerak eta ezagutza transferitzea atalean gutxienez 30 puntu lortzea eta Irakaskuntza-jarduera eta esperientzia profesionala atalean gutxienez 20 puntu lortzea.

4. – Ebaluazioaren ebazpenak deialdi honetan eskabideak aurkezteko ezarritako epea amaitu eta hurrengo sei hilabeteen barruan jakinarazi beharko zaizkie interesdunei, Herri Administrazioen Araubide Juridikoaren eta Administrazio Prozedura Erkidearen 1992ko azaroaren 26ko 30/1992 Legearen 42.5 artikuluan xedatutakoa aparte utzi gabe.

5. – Aurreko atalean adierazitako epearen barruan ebazpenik izan ezean, Herri Administrazioen Araubide Juridikoaren eta Administrazio Prozedura Erkidearen 1992ko azaroaren 26ko 30/1992 Legearen 44.1 artikuluan aurreikusitako ondorioak sortuko dira.

1. – Datu pertsonalak babesteari buruzko 1999ko abenduaren 13ko 15/1999 Lege Organikoari jarraiki, interesdunek emandako datuak Uniqual agentziaren titulartasunpeko fitxategi automatizatu pertsonal batean sartuta geratu ahal izango dira Agentziak deitutako beste prozesu batzuk garatzeko, betiere interesdunak prozesu horietan parte hartzen badu.

2. – Fitxategi pertsonala Uniqual agentziaren Zuzendaritzaren erantzukizunpean geratuko da (San Prudentzio kalea, 8, 01005 Gasteiz).

3. – Datu pertsonalak babesteari buruzko 1999ko abenduaren 13ko 15/1999 Lege Organikoa garatzeko Araudia onartzen duen 2007ko abenduaren 21eko 1720/2007 Errege Dekretuan ezarritakoari jarraiki tratatuko dira datu pertsonalak, eta informazioaren konfidentzialtasuna eta osotasuna bermatzeko beharrezkoak diren segurtasun-neurriak hartuko dira.

   Gainera, tratamendu egokia jasoko dute datu horiek, Datu Pertsonaletarako Jabetza Publikoko Fitxategiei eta Datuak Babesteko Euskal Bulegoa Sortzeari buruzko 2004ko otsailaren 25eko 2/2004 Legean eta Lege hori garatzen duen 2005eko urriaren 18ko 308/2005 Dekretuan xedatutakoaren arabera.

4. – Interesdunek eskuratzeko, zuzentzeko, deuseztatzeko eta aurka egiteko eskubideak baliatu ahal izango dituzte Uniqual agentziaren bulegoetan, Datu Pertsonalak Babesteari buruzko Lege Organikoan ezarritakoa betez.

Deialdi hau eta haren oinarriak behin betikoak dira administrazio-bidean, eta horien aurka administrazioarekiko auzi-errekurtsoa jarri ahal izango diete interesdunek Euskal Autonomia Erkidegoko administrazioarekiko auzietako jurisdikzio-organoei bi hilabeteko epean, Euskal Herriko Agintaritzaren Aldizkarian argitaratu eta hurrengo egunetik aurrera kontatzen hasita, Herri Administrazioen Araubide Juridikoaren eta Administrazio Prozedura Erkidearen 1992ko azaroaren 26ko 30/1992 Legearen 109. artikuluan eta Administrazioarekiko Auzietarako Jurisdikzioa arautzen duen 1998ko uztailaren 13ko 29/1998 Legearen 14. eta 46. artikuluetan ezarritakoari jarraiki. Halaber, nahi izanez gero, berraztertzeko errekurtsoa jarri ahal izango diote Agentziari hilabeteko epean, adierazitako 30/1992 Legearen 116. eta 117. artikuluei jarraiki.

Ebazpen hau indarrean jarriko da Euskal Herriko Agintaritzaren Aldizkarian argitaratzen den egunaren biharamunean.

Vitoria-Gasteiz, 2008ko uztailaren 15a.

Uniqual Euskal Unibertsitate Sistemaren Kalitatea Ebaluatu eta Egiaztatzeko Agentziaren zuzendaria,

ANA ISABEL FERNÁNDEZ SAINZ.