1. – Unibertsitate-masterreko irakaskuntza ofizialak egiteko, Espainiako unibertsitate-titulu ofiziala edo Europako Goi Mailako Hezkuntza Eremuko goi-mailako hezkuntza-erakunde batek egindako beste titulu bat eduki beharko da, masterreko irakaskuntzak egiteko eskumena ematen dutelako titulua eskaintzen duen herrialdean.

2. – Era berean, Europako Goi Mailako Hezkuntza Eremukoak ez diren hezkuntza-sistemen arabera titulatutakoek ere egin ahal izango dituzte, eta, horretarako, ez dituzte euren tituluak homologatu beharko. Dena dela, unibertsitateak egiaztatu egingo du euren prestakuntza-maila Espainiako unibertsitate-titulu ofizialen eta titulua ematen duen herrialdean graduondoko irakaskuntzetarako sarbidea ematen duten tituluen parekoa dela. Nahiz eta horrelaxe sartu, interesdunak aldez aurretik duen titulua masterreko irakasgaiak egiteko baino ez da homologatuko eta onetsiko.

EHUko unibertsitate-masterreko ikasketak egin nahi dituzten ikasleek baldintza hauek bete beharko dituzte:

1. Titulu hauetako bat izatea: lizentziatua, ingeniaria, arkitektoa, diplomatua, arkitekto teknikoa edo ingeniari teknikoa.

2. Master ofizialaren proposamenean ezarritako baldintza espezifikoak betetzea.

3. Unibertsitate-masterrean onartua izatea, arautegi honetako 2. artikuluan eta hurrengoetan zehaztutako prozeduraren arabera.

1. – Unibertsitate-master batean matrikula egiteko prozesua baino lehen, izena emateko epea irekiko da. Izena emateko prozesuan ikasleak hautatzeko erabiliko diren irizpideak unibertsitate-master bakoitzean ezarritakoak izango dira, arautegi honetako 4. artikuluak 1. idatz-zatian dioen moduan.

2. – Masterreko arduradunak argitara emango ditu irizpide horiek masterra irakatsiko duen ikastegiaren, sailaren edo institutuaren iragarki oholean, eta bertan egongo dira jarrita eskariak aurkezteko epea amaitu arte. Masterreko arduradunak, era berean, ikastaroak noiz eta non emango diren argitaratuko du, bai eta eskolen ordutegia ere.

3. – Ezarritako prozeduraren arabera izena emateko, ikasleak unibertsitate-master bakoitzak zehaztuko duen idazkaritzan ematen dizkioten agiriak erabiliko ditu, eta agiri bakoitzean adierazitako epean aurkeztuko ditu.

   EHUren web orrian eta Graduondoko Ikasketetako eta Etengabeko Prestakuntzako Unitateak zehaztutako idazkaritzetan azalduko da ikasturte bakoitzean zer agiri aurkeztu behar diren izena emateko orduan.

Ikasleok ez dute homologatu beharko EGHEtik kanpoko titulu atzerritarra, graduondoko ikasketa ofizialetan sartu ahal izateko. Halakoetan, titulua eta gainerako agiriak legeztatu egin beharko dira, eta, beharrekoa izanez gero, itzulpen ofiziala egingo da EAEko hizkuntza ofizialetara. Arautegi honi erantsi zaizkio agiriak legeztatu eta itzultzeko argibideak.

Atzerriko titulua homologatzeke daukaten ikasleak onartzeko, beharrezkoa izango da Doktoretzako Azpibatzordearen onespena lortzea.

Master bakoitzeko arduradunak Doktoretzako Azpibatzordera bidali beharko du atzerriko titulua homologatzeke daukaten ikasleen dokumentazioa. Izena emateko epea bukatu eta 10 egunera bidali beharko da dokumentazioa, beranduenez.

1. – Graduondoko programa ofizialak osatu eta onartzeko prozedurari buruzko arautegiaren arabera, master bakoitzeko batzorde akademikoak hautatuko ditu ikasleak, unibertsitate-masterra justifikatzeko memorian merituak ebaluatzeko zehaztuta dauden irizpideak kontuan hartuta.

2. – Hautatutako ikasleen zerrendak argitaratzea:

   Ikasleak hautatzeko prozesua behin bukatuta, master ofizialaren arduradunak gestio hauek egin beharko ditu:

   • Ikasle onartuen eta ez onartuen behin-behineko zerrendak argitaratu, ikasleak onartzeko epea bukatu eta, gehienez ere, 5 lan eguneko epean.

   • Erreklamazioak aurkezteko epea ezarri (gehienez ere hurrengo 4 lan egunak).

   • Erreklamazioak aurkezteko epea amaitu eta hurrengo sei lan egunen barruan, ikasle onartuen behin betiko zerrenda argitaratuko du, horretarako dagoen ereduari jarraiki. Gora jotzeko errekurtsoa aurkeztu ahal izango zaio errektoreari behin betiko zerrenden kontra, zerrendak argitaratu eta biharamunean hasiko den hilabeteko epearen barruan.

   • Masterretan onartutako ikasle guztiek tutore bana izango dute, masterreko irakaslea izango dena.

   • Tutore horrek zehaztuko du ikasle bakoitzak egin beharreko ikasketa-plana. Horrez gain, jarraibideak emango ditu, ikasle bakoitzaren aholkularitza akademiko eta profesionalerako.

   • Dena dela, ikasleek, onartuak izateko, matrikula egin beharko dute.

   • Master bakoitzeko arduradunak Doktoretzako Azpibatzordera bidali beharko du atzerriko titulua homologatzeke daukaten ikasleen dokumentazioa. Izena emateko epea bukatu eta 10 egunera bidali beharko da dokumentazioa, beranduenez.

Master eta Doktoretzako Atalak ezarritako prozeduraren arabera egingo da matrikula. Prozesu horretan, EHUren web orrian eta Graduondoko ikasketetako eta Etengabeko Prestakuntzako Unitateak zehaztutako idazkaritzetan azalduko da ikasturte bakoitzean zer agiri aurkeztu behar diren izena emateko orduan.

28 urtetik beherako ikasle guztiei eskola asegurua kobratuko zaie. 28 urtetik gorako ikasleek, berriz, asegurua egin beharko dute nahitaez. Unibertsitateak borondatezko asegurua dauka kontratatuta, premia duten ikasleentzat. Aseguru hori ikasleek eurek kontratatuko dute zuzenean kasuan kasuko konpainiarekin.

Matrikula aldatu nahi izanez gero, eskari arrazoitua aurkeztu beharko da, eta Unibertsitate-masterreko tutoreak eta arduradunak baimendu beharko dute. Batzorde akademikoak baimena ematen ez badu, erreklamazioa aurkeztu ahal izango zaio graduondoko batzorde akademikoari eta, beharrezkoa izanez gero, EHUko Doktoregoko Azpibatzordeari Aldaketa hori adierazitako epeetan egingo da beti.

Bi epe egongo dira matrikula egiteko, eta egutegiak Doktoretzako Azpibatzordeak onartuko ditu. Matrikula egiteko lehenengo epea irailean hasiko da, eta bigarrena, lauhilekoa hasi baino lehen. Epealdi hori matrikula berriak egiteko izango de, eta, ez, lehendik dauden matrikulak luzatzeko.

Salbuespen moduan, Master eta Doktoretzako Ataleko arduradunak ontzat ematen badu, eta behar bezala justifikatutako arrazoiengatik, EHUko Doktoretzako Azpibatzordeak baimena eman dezake, zenbait ikaslek matrikula ikasturte bakoitzerako onartutako egutegitik kanpo egiteko.

Matrikula egiteko epea amaitu ondoren, Master eta Doktoretzako Atalak Doktoretzako Azpibatzordeko kideei jakinaraziko die master bakoitzean zenbat ikasle matrikulatu diren eta eskolak noiz hasiko diren. Doktoretzako Azpibatzordeak aztertu egingo ditu aurkeztutako dokumentuak, eta masterrak irakasteko baimena emango du. Azken bi ikasturteetan 10 ikasle baino gutxiago izan dituzten masterrak EHUren eskaintzatik kanpo geratu ahal izango dira. Jarduera akademikoa ez da hasiko matrikula egiteko epea bukatu arte.

1. – Ikasleek unibertsitateari ordaindu beharrekoa Eusko Jaurlaritzako Hezkuntza, Unibertsitate eta Ikerketa Sailak urte bakoitzerako zehaztutakoa izango da.

2. – Prezio publiko murriztuak ordaintzeko edo preziook ordaintzetik salbuetsita egoteko eskubidea izateko, matrikula egiteko epearen barruan bete beharko dira horretarako baldintzak.

3. – Ikasleak epeka ordaintzea erabakitzen badu, Eusko Jaurlaritzak prezio publikoei buruzko aginduan zehaztutako epeak errespetatu beharko ditu.

4. – Salbuespenezko matrikulaldia egiten denean eta beka ukatzen denean, matrikula ezin izango da zatika ordaindu.

5. – Eskola asegurua, ikaslearen txartela eta gainerako tasa administratiboak epe bakarrean ordainduko dira (matrikula egiterakoan).

6. – Kredituak baliozkotzeko kontuan hartuko da arautegi honetako II. kapitulua. Dena dela, kreditu horiei dagozkien prezioak ordaindu egin beharko dira, Eusko Jaurlaritzako Hezkuntza, Unibertsitate eta Ikerketa Sailak ikasturte bakoitzerako ezarriko duenaz bat.

7. – Aurkeztutako matrikulak behin-behinean onartuko dira, EHUko Doktoretzako Azpibatzordeak masterra irakasteko baimena eman arte. Matrikula aurkeztu denetik hiru hilabete igarotzen badira Master eta Doktoretzako Atalak horren kontra ebatzi eta jakinarazpenik eman barik, matrikula onartu egin dela ulertuko da.

Ikasleek zenbat ordaindu behar duten zehazteko orduan, Eusko Jaurlaritzako Hezkuntza, Unibertsitate eta Ikerketa Sailak ikasturte bakoitzeko zehaztutako Prezio Publikoei buruzko Aginduaren arabera dituzten baldintzak hartuko dira kontuan.

Funtzionarioek edo lan-kontratudun langileek, ezkontideek, agiri fede-emailearen bidez egiaztatzen duten izatezko bikoteek eta, EHUn egonda, funtzionarioek edo lan-kontratudun langileek ardurapean dituzten seme-alabek unibertsitateko organoek matrikulako tasak itzultzeko zehaztutako inprimakiak eskatu ahal izango dituzte matrikula egiteko orduan, Unibertsitateko Gerentziak ikasturte bakoitzerako onartutako zirkularra kontuan hartuta.

1. – Aurkeztutako matrikulak ordaintzen diren unean hartuko dira onartutzat, baina matrikula aurkeztu denetik hiru hilabete igarotzen badira Master eta Doktoretzako Batzordeak horren kontra ebatzi eta jakinarazpenik eman barik, matrikula onartu egin dela ulertuko da, eta erabaki irmoa izango da ondorio guztietarako.

2. – EAEko Tasa eta Prezio Publikoei buruzko maiatzaren 29ko 13/1998 Legean xedatutakoaren arabera, legez aurreikusitako epeetan eta moduan ikasleak matrikula baliogabetzeko eskatzen badu, ez zaizkio inolaz ere ordaindutako prezio publikoak itzuliko.

3. – Unibertsitateak ikaslearen matrikula atzera botatzen badu, zergatik azaldu beharko du, eta halakoetan baino ez dira itzuliko interesatuak ordaindutako prezio publikoak. Matrikula atzera bota duen ebazpen horren aurka gorako errekurtsoa jarri ahal izango diote interesdun guztiek EHUko errektoreari, edo berak eskuordetutako agintariari.

   Matrikula baliogabetzeko arrazoiak honako hauek dira:

   1. Matrikula ez ordaintzea: tasak ez ordaintzeagatik matrikula baliogabetzen zaien ikasleek galdu egingo dute ordura arte ordaindutako dirua, eta ordaintzeko geratzen zaiena zortzat hartuko da, unibertsitatearen alde. Ebazpen batean zehaztuko da zorra zenbatekoa den, eta horren berri emango zaio ikasleari. EHUrekin zorrak dituztenek ezingo dituzte erabili unibertsitatearen zerbitzuak, bereziki honako hauek: ezingo dute egin beste ikasketarik, ez zaie emango titulurik edo ziurtagiririk, ezta espediente akademikoari buruzko informaziorik ere, eta ezingo dute egin beste matrikularik. EHUri zor dioten dirua ordaindu bezain laster berreskuratuko dituzte eskubideok. Eskubide horiek indarrean dagoen ikasturtean berreskuratu nahi dituzten ikasleek, urte horretako ekainaren 1a baino lehen ordaindu beharko dute diru kopurua.

   2. Matrikula egiteko eskatzen den baldintzaren bat ez betetzea: eskakizuna egingo zaio interesatuari hamar eguneko epean akatsa zuzentzeko edo gainerako tramiteak bideratzeko, azaroaren 26ko 30/1992 legeko 71.1 artikuluan adierazitako moduan.

   3. Beste alde batetik, interesatuak horrelaxe eskatuz gero, matrikula baliogabetuko da, beti ere eskaera hori urte bakoitzeko abenduaren 31 baino lehen egin bada. Gainera, ordaindutako diru kopurua unibertsitate-masterra oraindik hasi ez denean baino ez da itzuliko, edota ikastegi, sail edo institutu antolatzaileak arautegi honetakoa urreko artikuluetan ezarritako baldintzaren bat betetzen ez duenean.

   4. Ikasle berriek matrikula baliogabetu badute, inskripzio berria eskatu beharko dute, ikasketa horiek berriro egin nahi badituzte.

   5. Bekadun ikasle moduan matrikulatu ahal izateko, ikasleek beken deialdian zehaztutako baldintzak bete beharko dituzte matrikula egiten duten unean, beti ere beka-eskabidea baino lehen bideratu badute. Izan ere, bekaren ordezkagiria eta gainerako matrikula-agiriak aurkeztu beharko dituzte. Bestela, beka-eskabidea egiteko aukera izan arren, matrikulako ikasgaien prezioak ordaindu beharko dituzte.

      Nolanahi ere, eskakizun akademikoak betetzeagatik bekadun moduan matrikulatutako ikasleak ez dira zordunak izango, beka ukatu dietela jakin ondoren matrikula baliogabetzeko eskatzen badute.

1. – EHUko graduondoko ikasketa ofizialean matrikulatuko diren ikasle guztiek ordaindu beharko dute eskola-asegurua. Eskola-aseguruak 28 urteetara arte babesten ditu ikasleak.

2. – Eskola-aseguruak ere babesten ditu atzerriko ikasleak, baldin eta elkarrekikotasun hitzarmena eginda badago, adierazi gabe edo beren-beregi, euren herrialdeekin.

Unibertsitateak borondatezko asegurua dauka kontratatuta, horren beharra izan dezaketen ikasleentzat. Aseguru hori kontratatu nahi duten ikasleek zuzenean jo behar dute kasuan kasuko aseguru-etxera.

Egindako ikastaro eta mintegien ziurtagiriak emateko eskaerak leku hauetan aurkeztuko dira: Master eta Doktoretzako Atalean eta horretarako jarriko diren bulegoetan. Era berean, EHUren web orrian eta Graduondoko Ikasketako eta Etengabeko Prestakuntzako Unitateak zehaztutako idazkaritzetan azalduko da ikasturte bakoitzean zer agiri aurkeztu behar diren.

Graduondoko titulu ofizialak eta ziurtagiriak ematearren ordaindu beharreko tasak Eusko Jaurlaritzako Hezkuntza, Unibertsitate eta Ikerketa Sailak zehaztutakoak izango dira.

Tasa horiek EHUk eskabidea egiten adierazitako kontuetako batean ordainduko dira.

Master ofizialen BGGei dirua emango zaie aurrekontutik, ezarriko diren parametroen arabera, masterraren gastuei aurre egiteko. Ekitaldi ekonomikoan zehar kanpoko deialdietatik etor daitezkeen diru-laguntzak masterretako diru-sarreren aurrekontuan sartuko dira.

Masterraren irakasle arduradunak hitzarmena egiten badu erakunde publiko edo pribaturen batekin diru-laguntzak lortzeko, diru hori EHUren aurrekontuen kontuan sartzeko eskatuko dio. Ondoren, jakinaren gainean jarriko du Master eta Doktoretzako Atala, diru-laguntza jasoko duela egiaztatzen dituen dokumentuak aurkeztuta. Master eta Doktoretzako Atalak, dokumentuak aztertu ondoren, Kontabilitate Zerbitzura bidaliko ditu, kontabilizatu eta aurrekontuan jasotzeko.

Unibertsitate-masterreko BGGren aurrekontua masterreko arduradunek kudeatuko dute.

Master ofizialen irakaskuntzako gastuak guztiz ordaindu beharko dira master bakoitzak bere aurrekontuan jasoko duen diru-kopuruarekin. Gastuen gestioa unibertsitatearen aurrekontuei buruzko arau orokorretara lotuko da, honako hauek kontuan hartuta:

Gastu arruntak kasuan kasuko kontzeptuari atxikiko zaizkio, unibertsitatearen kontuen planaren arabera.

EHUkoak ez diren langileen ordainketak ez ohiko finantziazioaren bidez egingo dira (kanpoko ekarpenak, diru-laguntzak...), eta kasu bakoitzean ezarri daitekeen kudeaketarako araudiaren bidez arautuko dira.

Aipatutako langileei honako diru-kopuru hauek ordainduko zaizkie, gehienez ere:

1. – Masterrean eskolak ematearren, orduko 120 euroraino.

2. – Bidaiak, joan-etorriak eta mantenua justifikatzeko, berriz, aurrekontua kudeatzeko EHUn indarrean egongo den arautegiak dioena beteko da.

   Erositako material inbentariagarria gastuen kasuan kasuko kontzeptuan kontabilizatuko da eta unibertsitatearen ondarean sartuko da. Horrexegatik, inbentario ofizialean agertu beharko da, arlo horretako arautegiak xedatutakoaren arabera.