1. – Fakultateko Batzarreko osakideak Dekanoa, Dekanordeak, Idazkari Akademikoa, Fakultateko Administratzailea, eta 32 kide izango dira, azken hauek unibertsitateko kidegoen artean era honetan banatukoak: 17 osakide Unibertsitatearekin behin betiko lotura duten irakasleen kidegoetako artean hautatuak, 4 osakide gainontzeko irakasleen eta ikertzaileen artean hautatuak, 3 kide administrazio eta zerbitzurako pertsonalaren artean hautatuak eta 8 kide ikasleen artean hautatuak.

2. – UPV/EHUko estatutuek ezartzen dituzten ordezkarien portzentaiak bermatzeko, Dekanoaz gain, Dekano-taldearen bi kide gutxienez Unibertsitatearekin behin betiko lotura duten irakasleak izango dira.

3. – Fakultateko Batzarra honako arautegi honek gidatuko du eta bere kide hautatuak lau urterik behin aldatuko dira. Salbuespena ikasleen ordezkariak izango dira, horiek urtero aldatuko baitira.

1. – Fakultateko Batzarra ikastegiko kide anitzeko ohiko gobernu-organoa da ikastegian.

2. – Fakultateko Batzarrak ikastegiaren bizitza akademikoan eragina daukaten oinarrizko erabakiak hartu behar ditu, batez ere honakoak:

   1. Fakultatearen arautegia prestatu eta Gobernu-kontseiluari proposatzea, hark onar dezan.

   2. Fakultateko Dekanoa hautatzea.

   3. Gobernu-organoei Fakultateko irakasleen eta administrazio eta zerbitzuetako pertsonalaren plantillako beharrizanak aurkeztea.

   4. Unibertsitateko planetan biltzen diren helburuak Fakultatera egokitzeko plana onartzea.

   5. Hizkuntza-normalkuntzarako planak betetzeko eta plan horiei jarraipena egiteko Fakultateak dauzkan premien memoriak aurkeztea Campuseko Errektoreordetzari, hark Errektoreari edo, hala dagokionean, Gobernu-kontseiluari bidera diezazkion.

   6. Fakultateari atxikitako irakasle-lanpostuen eskariez iritzia ematea.

   7. Ikasketa-planak eta beren aldaketak egin eta proposatzea Gobernu-kontseiluari, bai eta titulazioak ezarri, aldatu eta kentzeko proposamenak ere.

   8. Irakasteko behar diren azpiegituren planak edo irakaskuntzan nahiz ikerkuntzan sortutako bestelako premien planak onartzea, aldez aurretik balorazio orokor bat eginda.

   9. Fakultateak eskaintzen dituen ikasketen kalitatea aldiro ebaluatuko dena bermatzea, eta unibertsitatearen zerbitzu publikoa hobetzeko neurriak proposatzea.

   10. Bere zereginak betetzeko egoki diren batzordeak eratzea.

   11. Irakasleen eta ikasleen ordezkaria izendatzea campuseko batzarrerako; ikasleen ordezkaria izendatzeko proposamena Fakultateko Ikasle- Kontseiluak luzatuta.

   12. Fakultateak, beharrezkoa izanez gero, ohorezko aitorpenak adierazi eta emateko erabiliko dituen moduak zabaldu eta arautzea.

   13. Estatutuek eta beroriek garatzen dituzten arauek bere gain uzten dituzten gainerako eginkizun guztiak, edo UPV/EHUko beste gobernu-organoek eskuordetzen dizkionak.

3. – Fakultateko Batzarrak ohiko bileran eztabaidatu eta bozkatuko ditu urteko oroitidazkia, eginkizun-plana eta urteko txosten ekonomikoa, Dekanoak aurkeztuta. Oroitidazkia eta eginkizunen plana behin onartuta, Campuseko Batzarrari eta Gobernu-kontseiluari bidaliko zaizkie, jakitun egon daitezen.

1. – Farmazia Fakultateko batzordeak honakoak izango dira:

   1. Akademia-Antolakuntza eta Ikasketak Baliozkotzekoa.

   2. Euskara.

   3. Ikerkuntza.

   4. Ekonomikoa.

   5. Prebentzio eta Segurtasuna.

   6. Kalitatea.

2. – Batzorde guztiak, bere kide hautatuei dagokienez, lau urterik behin eraberrituko dira, ikasleen ordezkariak salbuetsita, horiek urtero aldatuko baitira, eta halabeharrez Fakultateko Batzarreko kide izan behar ez dutenak.

3. – Talde bakoitzak bere ordezkariak hautatuko ditu, beharrezkoa bada botazioaren bidez.

4. – Batzordeen eraketa-ekitaldian, batzorde bakoitzak bere idazkaria hautatuko du.

Akademia-Antolakuntza eta Ikasketak Baliozkotzeko Batzordeko burua Dekanoa izango da, edo hark bere ordez izendatuko lukeen Dekanordea. Honez gain, batzordea Idazkari Akademikoak, irakasleen 5 ordezkarik, titulazio bakoitzeko gutxienez bana ordezkari izateko aukeratutakoak, eta ikasleen 3 ordezkarik, titulazio bakoitzeko gehienez bana ordezkari izateko aukeratutakoak, osatuko dute.

Fakultateko zuzendaritzak bermatuko du Fakultateko kasuan kasuko bulegoak aholkularitza teknikoa emango diola batzordeari.

1. – Akademia-Antolakuntza eta Ikasketak Baliozkotzeko Batzordeak ikasleek aurkeztuko dituzten eskariak ebatziko ditu indarreko legeriari jarraiki, ikasketak baliozkotzeko, aukera askeko kredituak amortizatzeko eta kreditu baliokideak aintzat hartzeko. Batzorde horrek hartutako ebazpenen aurkako errekurtsoak Errektoreari aurkeztu ahal izango zaizkio.

2. – Gainera, Akademia-Antolakuntza eta Ikasketak Baliozkotzeko batzordearen eginkizunak honako hauek izango dira:

   1. Sailek proposatutako irakaskuntza-programaz iritzia ematea eta beronen antolakuntza Fakultate Batzarrari proposatzea, examinetarako eta eskola teoriko zein praktikoetarako egutegi egokiak ezarriz.

   2. Irakasgaien edukietan egon daitezkeen gainezartze-kasuak baloratzea.

   3. Irakaskuntzarako eremuen erabilera aztertzea, baliabideen probetxu egokiena lortzeko asmoz.

   4. Irakaskuntza-jardueragatik sor daitezkeen gatazketan artekariarena egin; irakaskuntzarekin erlazionatutako gatazkentzat ebazpenak proposatzea, sailen mailatik at geratzen direnean edo sailek konpontzerik ez dutenean.

   5. Aplika daitezkeen irakaskuntza-moduluak aztertzea, bai eta onar daitezkeen ikasleen kopurua ere.

   6. Ikasketa-planen garapena ikuskatu eta koordinatzea, bai eta emaitzen balorazioa ere.

   7. Epaimahai akademikoetako kideen izendapena Fakultateko Batzarrari proposatzea.

   8. Fakultateko Batzarrak bere gain uzten dituen edo arautegiak ematen dizkion eginkizun guztiak onartzea.

3. – Akademia-Antolakuntza eta Ikasketak Baliozkotzeko batzordeari laguntzeko, Farmazia-Fakultatean irakasten diren graduko titulazio bakoitzerako batzorde tekniko bat osatuko da eta hauek proposamenak aurkeztuko dizkiote Akademia-Antolakuntza eta Ikasketak Baliozkotzeko Batzordeari. Batzorde teknikoen arteko koordinatzailea Akademia-Antolakuntzarako Dekanordea izango da.

4. – Batzorde teknikoak osatu dituzten kideak izango dira:

   1. Dekanoak izendatutako titulazioaren koordinatzaile bat, zein batzordeko burua izango baita.

   2. Titulazioan irakaskuntza-zama handien duten jakintza-arloko lau irakasle, dagokien sailek proposatuta.

   3. Ikasleak, bana titulazioaren ziklo bakoitzeko, Fakultateko Ikasleen Kontseiluak proposatutakoak.

5. – Titulazioen batzordeen eginkizun eta aztergai izango dira:

   1. Titulazioen jarraipena egitea.

   2. Ikasketa-planak ikuskatzea, koordinatzea eta eraberritzea.

   3. Farmazia-Fakultatearen menpeko titulazioen arazo espezifikoak analizatzea.

   4. Fakultateko Akademia-Antolakuntzarako eta Ikasketak Baliokidetzeko Batzordeak eslei diezazkiokeen gai guztiak onartzea.

Euskara Batzordea, parte hartze eta aholkularitza-organoa izango da eta batzorde horren helburua izango da euskararen erabilera bultzatzea Fakultatean, UPV/EHUren plangintza orokorrari jarraiki. Euskara-Batzordeko burua Dekanoa izango da, edo hark bere ordez izendatuko lukeen pertsona eta, gainera, irakasleen 3 ordezkarik, AZPren 2 ordezkarik eta ikasleen 2 ordezkarik osatuko dute.

1. – Euskara Batzordearen eginkizunak izango dira:

   1. Fakultateko euskararako plangintzei buruzko informazioa, aholkua ematea eta proposamenak egitea.

   2. Unibertsitateko Euskara Batzordeari jarraiki, Fakultaterako plangintza espezifikoak antolatu eta bultzatu, beti elebitasunean aurrera egiteko.

   3. Sailen arteko koordinatzailea izatea irakaskuntza eta ikerkuntza euskaraz egiteko behar den oinarrizko materiala prestatzeko orduan.

Ikerkuntza Batzordea aholku-emailea izango da eta Dekanoa izango du buru eta, gainera, irakasle doktore funtzionarioen 3 ordezkarik, gainontzeko irakasle eta ikertzaile doktoreen 2 ordezkarik, trebatzen ari diren irakasle eta ikertzaileen ordezkari batek eta AZPren ordezkari batek osatuko dute.

1. – Ikerkuntza Batzordearen eginkizunak dira:

   1. Ikerkuntzan laguntzeko zerbitzu komunen sorrera eta abiaraztea bultzatzea.

   2. Sailen, ikerkuntzarako erakunde publikoen eta enpresa publiko zein pribatuen arteko konexioa sustatzea.

   3. Ikerkuntzarako eremuen erabilera aztertzea, baliabideen probetxu egokiena lortzeko asmoz.

   4. Fakultatean lantzen diren ikerkuntza-gaien berri emateko hitzaldi eta mintegiak burutzea eta bultzatzea.

   5. Ikerkuntzaren kalitatea eta irakasleen eta ikertzaileen heziketa zientifikoa sustatu.

   6. Fakultateko Batzarrak bere gain uzten dituen edo arautegiak ematen dizkion eginkizun guztiak onartzea.

Batzorde Ekonomikoa aholku-emailea izango da eta Dekanoak, batzordeko burua izango denak, Idazkari Akademikoak, batzordeko idazkaria izango denak, Fakultateko Administratzaileak, irakasleen 4 ordezkarik, AZPren ordezkari batek eta ikasleen 2 ordezkarik osatuko dute.

1. – Batzorde ekonomikoaren eginkizunak dira:

   1. Fakultateari emandako aurrekontuen banapena proposatzea eta jarraipen ekonomikoa egitea.

   2. Urteroko oroitidazki ekonomikoa Fakultateko Batzarrari aurkeztea.

   3. Gradu-ondoko tituluen aurrekontuari buruzko iritzia ematea, bai eta Fakultateko beste behin behineko diru-iturriei buruzkoa ere.

   4. Fakultate Batzarrak bere gain uzten dituen edo arautegiak ematen dizkion eginkizun guztiak onartzea.

Prebentziorako eta Segurtasunerako Batzordea aholku-emailea izango da. Bere burua Dekanoa izango da, edo honek bere ordez izendatuko lukeen pertsonak eta, gainera, Fakultateko Administratzaileak, 3 irakasleen 3 ordezkarik, trebatzen ari den AZPren ordezkari batek, administrazioko eta zerbitzuetako langileen bi ordezkarik eta ikasleen ordezkari batek osatuko dute.

1. – Prebentziorako eta Segurtasunerako Batzordea UPV/EHUko Errektorearen 2003ko apirilaren 7ko erabakiarekin bat etorrita arituko da, UPV/EHUko prebentziorako berezko zerbitzuaren eraketa, antolakuntza eta funtzionamenduari dagokienez, eta bere eginkizunak dira:

   1. Konposatu eta hondakin kimikoak eta biologikoak manipulatzeko, biltzeko eta ezabatzeko arauak Fakultateko Batzarrari proposatzea.

   2. Segurtasunerako arautegiak jakitera ematea eta betetzen direla zaintzea.

   3. Fakultateko instalakuntzak, muntaiak zein gailuak mantentzeak eta aldatzeak sor ditzaketen arriskuak aztertzea eta informatzea.

   4. Fakultate Batzarrak bere gain uzten dituen edo arautegiak ematen dizkion eginkizun guztiak onartzea.

Kalitate Batzordea aholku-emailea izango da eta Dekanoak, batzordeko burua izango denak, Fakultateko Administratzaileak, irakasleen 4 ordezkarik, administrazio eta zerbitzuetako pertsonalaren 2 ordezkarik eta ikasleen 2 ordezkarik osatuko dute.

1. – Kalitate Batzordearen eginkizunak izango dira:

   1. Kalitatearen kultura sustatzea.

   2. Titulazioen ebaluazioetatik eratorritako hobekuntza-planen aplikazioaren jarraipena egitea.

   3. Fakultateko kalitateko gidaliburua egitea eta bere jarraipena zaintzea.

   4. Fakultate Batzarrak bere gain uzten dituen edo arautegiak ematen dizkion eginkizun guztiak onartzea.

1. – Bileretarako deiak ohikoak eta ezohikoak izango dira.

2. – Bileretarako deiak, oro har, ohikoak izango dira. Fakultateko Batzarrak ohiko bilera bi egingo ditu, gutxienez, seihileko bakoitzean.

3. – Ezohiko bilera egingo da bileran aztertuko den gaiak hala eskatzen duenean eta, halaber, arautegi aplikagarriak xedatutako kasuetan. Ezohiko bileretako aztergaien zerrendan ez dira agertuko aurreko akten onespena eta galde-eskeak izeneko aztergaiak.

4. – Presazko bilerak ezohikoak izango dira eta deia gutxienez 24 ordu lehenago egin beharko da. Halakoetan, bilera egiteko arrazoia benetan premiazkoa dela berretsi behar da bileraren hasieran. Berresten ez bada, bilera bertan behera geratuko da besterik gabe.

1. – Kide anitzeko organoetako buruek egin behar dute kasuan kasuko organoaren bilerarako deia.

   Dena dela, kide anitzeko organoko kideen % 25ek hala eskatzen badu, biltzeko deia egin beharko da eta bilera ezohikoa izango da, eta, gehienera ere, zazpi egun balioduneko epean egingo da, eskaera egiten denetik hasita.

2. – Bilerarako deia organoko Idazkariak bideratuko du, denbora nahikoarekin eta, edonola ere, bileraren data baino hiru egun lehenago. Deialdian adieraziko da bilera non egingo den, zer ordutan, eta zeintzuk gai aztertuko diren bertan. Aztertu beharreko gaiei buruzko dokumentuak aurrerapen nahikoaz eskuratzeko aukera izan behar dute organoko kideek, eta, edonola ere, bilera baino 24 ordu lehenago.

3. – Deialdian aztergaiak osatzen dituzten puntuak jasoko dira zehatz-mehatz. Aztergaietan agertzen ez diren puntuei buruzko erabakirik ezingo da hartu; baina organoko kideen bi heren baino gehiago badaude bileran, eta botazioa eginda gehiengo absolutuak gaia premiazkoa dela uste badu, erabakia hartu ahal izango da.

4. – Aztergaietan agertu beharko dira organoko kideen % 10ek gutxienez, erregistroaren bitartez eta beranduenez deialdia baino 72 ordu lehenago eskatutako puntuak.

5. – Organoak jarduera daukan egoitzetan eta gainerako tokietan eman beharko da argitara deialdia, organoko kideei bilerarako deia egiten zaien egun berean, jende guztia jakinaren gainean egon dadin.

1. – Kide anitzeko organoko kide izatea norberari dagokion ezaugarria da eta ezin da beste inoren gain utzi, honako egoeretan utziko diolarik organoko kide batek kide izateari (UPV/EHUren estatutuetako 228. artikulua):

   1. Hilez gero edo ezintasuna izanez gero;

   2. Hauteskundeak baliogabetuz gero;

   3. Agintaldiaren amaiera.

   4. Dimisioa aurkeztuz gero.

   5. UPV/EHUkoa, Fakultatekoa edo hautatu izan zeneko taldeko kidea izateari uztea.

   6. Hiru saietara jarraian ez etortzea justifikaziorik gabe, edo sei ez jarraitutan.

2. – Organoa behin eratuta, hutsik geratuko diren lekuak kasuan kasuko zerrendetako ordezkoek beteko dituzte. Aipatutako irizpideari jarraiki eta bete ezin den leku kopurua kideentzako lekuen % 50ekoa edo handiagoa edo organoetako kideentzako lekuen % 30ekoa edo handiagoa bada, hauteskunde partzialak egin behar dira lekuak betetzeko. Modu horretan hautatutakoak kide izango dira agintaldia amaitu arte.

1. – Kide anitzeko organoetako kideek organoen bileretara joateko eskubidea eta joan beharra daukate, eta UPV/EHUko Ikastegien Oinarrizko Arautegiak betearazten dizkien eginkizunak betetzekoa. Bileretara joateak unibertsitateko gainerako betebeharrak betetzetik salbuetsiko ditu kontseiluko kideak, baina kasuan kasuko organoek beharrezko neurriak hartuko dituzte betebehar horiek bete egiten direla eta zerbitzua eman egiten dela bermatzeko.

2. – Kide anitzeko organoetako kideek eskubidea dute beren eginkizunak aurrera eramateko beharrezkoa izan ditzaketen dokumentazioa eta informazioa eskatu eta eskuratzeko. Dekanotza-taldeak eginkizun hori erraztuko du, eskatutakoa gehienez bost egun balioduneko epean bere esku jarriz, ohiko bideen bitartez eta, beti ere, pertsonen intimitatea behar bezala babestuz.

1. – Kide anitzeko organoak balioz eratzeko beharrezkoa izango da kideen gehiengo osoa egotea bertan lehen deialdian; edo kideen heren bat, gutxienez, bigarren deialdian. Lehen eta bigarren deialdiaren artean egon beharreko tartea 10 minututakoa izango da. Edonola ere, organoko Buruak eta Idazkariak beti egon behar dute edo, bestela, euren ordezkoek.

2. – Bozketa guztietan kide anitzeko organoko gutxienez kideen herenaren presentzia beharko da.

1. – Kide anitzeko organoko Buruak bilera behar bezala gara dadila bermatuko du eta, horretarako arrazoirik egonez gero, bertan behera utzi ahal izango du.

2. – Eztabaidak aztergaiei jarraituz egingo dira. Dena dela, beharrezkoa izanez gero, kide anitzeko organoak bileraren ordena aldatzeko erabakia har dezake, organoko buruak proposamena egin ondoren.

3. – Organoko Buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte hartzeen kopurua ere.

4. – Kide anitzeko organoetako kideek aktan agerrarazi ahal izango dute beren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto partikularrak beti agerrarazi behar dira proposamenekin batera.

5. – Kide anitzeko organoko buruak organoko kide ez diren pertsonak gonbidatu ahal izango ditu bileretara, egoki deritzonean, aztergaietako punturen batekin zerikusia daukan iritzia edo informazioa kide anitzeko organoari eman diezaioten. Gonbidatuen izen-abizenak bilerako aktan jasoko dira, botoa emateko eskubidea izango ez duten arren.

6. – Fakultateko edozein kidek eskubidea izango du kide anitzeko organoen bileratara joateko baimena organoaren buruari eskatzeko. Eskaera onartuz gero, joan daiteke, hitzarekin baina botorik gabe.

1. – Erabakiak hartu ahal izateko, emandako boto baliodunen artetik gehiengo osoa behar izango da, Estatutuek, Arautegi honek edo gainerako lege-xedapenek beste gehiengoren bat eskatzen ez duten kasuetan izan ezik. Horrenbestez, proposamen bakarra izanez gero, onartu egingo da aldeko botoak kontrakoak baino gehiago badira. Bi proposamen daudenean, aldeko boto gehien lortzen duena onartuko da. Proposamenak bi baino gehiago direnean, emandako botoen gehiengoa lortzen duena onartuko da; edo, lehenengo botazioan boto gehien lortu duten bi proposamenak hartuta, bigarren botazioan boto gehien lortzen duena.

   Berdinketa izanez gero, berriro bozkatuko da; eta berriro berdinduz gero, organoko Buruaren kalitate-botoak erabakiko du.

2. – Botazioa isilpekoa izango da kide anitzeko organoko kideren batek eskatzen duenean. Dena dela, beti izango da isilpekoa pertsonei buruzkoa denean.

3. – Aurkako botoa ematen dutenek edo abstenitu egiten direnak horretarako arrazoia azalduz gero, ez dute erantzukizunik izango kide anitzeko organoak hartutako erabakietan. Bozketa isilpekoa bada, interesatuak boto-txartela emango dio organoko Idazkariari bozkatzerakoan, eta, txartel horrekin batera, emandako botoaren arrazoia azaltzen duen testua. Boto-txartela eta testua aktari erantsiko zaizkio.

1. – Idazkariak bilerako akta egingo du. Aktak bileran bertan edo hurrengoan onartuko dira, eta hurrengo bilerako aztergaiei dagozkien dokumentuekin batera banatuko dira akten zirriborroak. Aktak, behin onartuta, Idazkariak sinatuko ditu eta organoko Buruak ontzat emango.

2. – Aktan nahitaez jasoko dira bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; botazioak (nola egin diren) eta emaitzak; hartutako erabakien edukia eta, egokitzat ikusiz gero, arrazoiaren azalpen laburra.

3. – Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko edozein kidek eskatu ahal izango du bere parte-hartzea edo proposamena hitzez hitz jasotzeko aktan eta, horretarako, idatziz aurkeztu beharko du testua, eskaera egin eta segituan edo, bestela, organoko buruak esango duen moduan.

4. – Kide anitzeko organoko kideek aktan aldaketak egiteko proposamenak egin ahal izango dituzte akta onartzeko unean. Idazkariak proposatu den aldaketa egiaztatuko du, eta gehiengoak aldeko botoa ematen badu, onartu egingo da.

5. – Kide anitzeko organoa aldatu baino lehen bilera bat egin beharko da onartzeke dauden akta guztiak onartzeko. Bilera hori egitea ezinezkoa bada, akten zirriborroak bidali behar zaizkie kide anitzeko organoko kide zirenei, eta hamar eguneko epea eman edukiari buruzko erreklamazioak egiteko. Esandako epean erreklamaziorik aurkeztu ezean, aktak onartutzat emango dira; erreklamaziorik aurkeztu gero, kide anitzeko organo aldatuak egingo duen lehenengo bileran onartu beharko dira aktak.

6. – Behin onartuta, Fakultateko iragarki-taulan argitaratuko dira, beti ere pertsonen intimitatea gordeta, eta ikastegiko kideek eskuratu ahal izango dituzte kontsultetarako ikastegiko Idazkaritza Akademikoan.

1. – Idazkariak kide anitzeko organoak hartutako erabakien fede emango du eta ziurtagiriak egingo ditu.

2. – Fakultate Batzarrak hartutako erabakiak Fakultateko iragarki-taulan emango dira argitara gehien ere hiru egun balioduneko epean, eta pertsonen intimitatea behar bezala babestuta. Erabaki hauek, gutxien dela, hilabetean egongo dira argitaratuta. Gainera, pertsonei buruzko erabakiak interesatuei jakinarazi beharko zaizkie zuzenean. Erabakiek argitaraturik egingo duten hilabetean zehar, epeak ere korrituko dira Errektoregoaren aurrean egin beharreko errekurtsoa egiteari dagokionean.

3. – Akademia-Antolakuntza eta Ikasketak Baliozkotzeko Batzordeak hartutako erabakiak interesatuei jakinarazi beharko zaizkie zuzenean.

1. – Kide anitzeko organoak hartutako erabakiek onartzen direnetik aurrera izango dituzte ondorioak, erabakian bertan beste ezer adierazi ez bada behintzat. Erabakiak publikoak dira eta unibertsitateko kasuan kasuko organoak jakinaren gainean jarriko dira.

2. – Kide anitzeko organoek hartzen dituzten erabakien kontra gorako errekurtsoa aurkeztu ahal izango zaio Errektoreari, hilabeteko epean.