1. – Ikastegiko Batzarreko berezko kide dira: zuzendaria (bera izango da batzarraren burua), zuzendariordeak, idazkari akademikoa eta ikastegiko administratzailea. Kide hautatuak, berriz, honakoak: 22 katedradun edo irakasle titular; 2 irakasle kontratatu; ikasleen 9 ordezkari; eta administrazio eta zerbitzuetako langileen 4 ordezkari.

2. – Ikastegiko Batzarreko kide hautatuak lau urterik behin aldatuko dira. Salbuespena ikasleen ordezkariak izango dira, horiek urtero aldatuko baitira.

1. – Ikastegiko Batzarra da kide anitzeko ohiko gobernu organoa Eskolan.

2. – Ikastegiko Batzarrak ikastegiaren bizitza akademikoan eragina daukaten oinarrizko erabaki guztiak hartu behar ditu, batez ere honakoak:

   1. Ikastegiaren arautegia prestatu eta Gobernu Kontseiluari proposatzea, hark onar dezan.

   2. Eskolako zuzendaria aukeratzea.

   3. Gobernu organoei irakasleen plantillan eta administrazio eta zerbitzuetako langileen plantillan dauden beharrizanak aurkeztea.

   4. Unibertsitate-planetan biltzen diren helburuak ikastegira egokitzeko plana onartzea.

   5. Campuseko errektoreordeari edo, hala dagokionean, Gobernu Kontseiluari aurkeztea, errektore aurrean tramitatzeko, hizkuntza-normalkuntzarako planak betetzeko beharren memoriak eta plan horien jarraipena egitea.

   6. Ikastegira atxikitako irakasle-lanpostuen eskariez informatzea.

   7. Ikasketa-planak eta euren aldaketak egin eta proposatzea Gobernu Kontseiluari, bai eta titulazioak ezarri, aldatu eta kentzeko proposamenak ere.

   8. Irakasteko behar diren azpiegitura-planak edo irakaskuntzan nahiz ikerkuntzan sortutako bestelako premien planak aztertu eta onartzea, kontuan hartuta ikastegiari atxikitako sail edo sail-atalen iritzia.

   9. Ikastegiak eskaintzen dituen ikasketen kalitatea aldiro ebaluatuko dela bermatzea, eta unibertsitatearen zerbitzu publikoa hobetzeko neurriak proposatzea.

   10. Zereginak betetzeko egoki diren batzordeak eratzea.

   11. Irakasleen eta ikasleen ordezkaria izendatzea Campuseko Batzarrerako. Ikasleen ordezkaria izendatzeko proposamena ikastegiko Ikasleen Kontseiluak egingo du.

   12. Ikastegiak, beharrezkoa izanez gero, bere esker ona adierazteko erabiliko dituen moduak zabaldu eta arautzea.

3. – Ikastegiko Batzarrak ohiko bileran eztabaidatu eta bozkatuko ditu urteko memoria, eginkizunen plana eta urteko txosten ekonomikoa. Dokumentu horiek zuzendariak aurkeztuko ditu bileran. Memoria eta eginkizunen plana behin onartuta, Campuseko Batzarrari eta Gobernu Kontseiluari bidaliko zaizkie, jakitun egon daitezen.

1. – Akademia Antolakuntzako eta Ikasketak Baliozkotzeko Batzordearen burua zuzendaria izango da eta hark izendatutako ordezkoa. Zuzendariaz gain honakoak izango dira batzordearen kide: Akademia Antolakuntzako zuzendariordea; ikastegiko idazkaria (batzordeko idazkari izango da eta ez du botorik izango); ikastegira atxikitako egonda arduraldi osoan bost irakasle baino gehiago dituen sail bakoitzeko ordezkari bat; ikastegira atxikitako gainerako sailetako ordezkari bat; eta ikasle bat. Bost irakasle edo gutxiagoko sailen ordezkaria txandakatu egingo da ikasturtero. Ikaslea Ikasleen Kontseiluak izendatuko du.

2. – Akademia Antolakuntzako Batzordea ikasturte bakoitzean berrituko da. Batzordeak ikasketak baliozkotzeko eskaerak ebatziko ditu, bai eta aukera askeko kredituak amortizatzekoak ere, indarrean egongo den legeriari jarraiki. Horiez gain, eskuordetzen zaizkion gainontzeko eginkizunak ere beteko ditu. Ikastegiko zuzendaritzak bermatuko du ikastegiko kasuan kasuko bulegoak aholkularitza teknikoa emango diola batzordeari. Batzordeak hartutako erabakien kontra errekurtsoa aurkez dakioke errektoreari.

Euskara Batzordea parte hartze eta aholkularitza organoa da. Batzorde horren helburua da euskararen erabilera bultzatzea ikastegian, UPV/EHUren plangintza orokorrari jarraiki. Batzordearen burua Euskarako zuzendariordea izango da eta honakoak dira gainontzeko kideak: bi irakasle (bietako bat idazkaria izango da); administrazio eta zerbitzuetako langile bat; eta ikasle bat, guztiak batzarrak izendatuak kasuan kasuko taldeak aukeratuta. Batzordea irekita egongo da ikastegiko gainerako kideentzat ere (hitza baino ez dute izango). Ikasturte bakoitzean berrituko dira kideak.

Kalitate Batzordea eratuko da, aholkularitza eginkizunak izango dituena. Batzordearen burua zuzendaria izango da edo hark bere ordez izendatutako bat, idazkaria, idazkari akademikoa, eta gainontzeko kideak zuzendariak edo Ikastegiko Batzarrak izendatuko ditu. Batzordearen zeregina izango da, oro har, ikastegia hobetzea eta horretarako, ikastegian hobetu beharrekoak aztertu eta ekintzak proposatuko ditu. Ez dira barne hartzen batzordearen funtzionamendurako beste ezaugarri batzuk.

1. – Bilerak ohikoak eta ezohikoak izango dira.

2. – Bilerak, oro har, ohikoak izango dira. Ikastegiko Batzarrak ohiko bilera bi egingo ditu, gutxienez, seihileko bakoitzean. Kide anitzeko gainontzeko organoak gutxienez sei hilabeterik behin bilduko dira.

3. – Ezohiko bilera egingo da bileran aztertuko den gaiak hala eskatzen duenean eta, halaber, arautegi aplikagarriak xedatutako kasuetan. Ezohiko bileretako aztergaien zerrendan ez da agertuko aurreko akten onespena, ez eta galde-eskeak ere.

4. – Presazko bilerak ezohikoak izango dira eta deia gutxienez 24 ordu lehenago egin beharko da. Halakoetan, bilera egiteko arrazoia benetan premiazkoa dela berretsi behar da bileraren hasieran. Berresten ez bada, bilera bertan behera geratuko da besterik gabe.

1. – Kide anitzeko organoetako buruek egin behar dute kasuan kasuko organoaren bilerarako deia. Dena dela, kide anitzeko organoko kideen % 25ek hala eskatzen badu, biltzeko deia egin beharko da. Bilera ezohikoa izango da, eta, gehienera ere, zazpi egun balioduneko epean egingo da, eskaera egiten denetik hasita.

2. – Bilerarako deia organoko idazkariak bideratuko du, denbora nahikoarekin eta, edonola ere, bileraren data baino hiru egun lehenago. Deialdian adieraziko da bilera non egingo den, zer ordutan, eta zeintzuk gai aztertuko diren bertan. Aztertu beharreko gaiei buruzko dokumentuak aurrerapen nahikoaz eskuratzeko aukera izan behar dute Organoko kideek, eta, edonola ere, bilera baino 24 ordu lehenago.

3. – Nolanahi ere, deialdian behar bezala zehaztu beharko da zein diren aztergai-zerrenda osatzen duten puntuak, eta barne egongo dira deialdi aurretik eskatutako puntuak, edo deialdiaren ondoren eskatutakoak, baldin eta bilera baino 24 ordu lehenago kideen % 10ek eskatu badu. Ezin izango da hartu aztergaietan agertzen ez diren puntuei buruzko erabakirik, baina organoko kideen bi heren baino gehiago badaude bileran, eta botazioa eginda gehiengo osoak gaia premiazkoa dela uste badu, erabakia hartu ahal izango da.

4. – Organoak jarduera daukan egoitzetan eta gainerako tokietan eman beharko da argitara deialdia, organoko kideei bilerarako deia egiten zaien egun berean, jende guztia jakinaren gainean egon dadin.

1. – Kide anitzeko organoko kide izatea norberaren ezaugarria da eta ezin zaio beste inori utzi. UPV/EHUren Estatutuetako 228. artikuluan aipatutako egoeretan utziko dio ordezkari batek ordezkari izateari. Horrez gain, kide izateari utziko dio urte batean jarraituko bi bileratara edo ez jarraituko hirutara ez doan kideak. Kide izateari utziko dio, era berean, hamabi hilabeteko tartean egiten diren bileren erdietara ez badoa, nahiz eta ez bertaratzeko arrazoirik izan.

2. – Organoa behin eratuta, hutsik geratuko diren lekuak ordezkoek beteko dituzte. Aipatutako irizpideari jarraitu ondoren bete gabe geratzen den plaza kopurua talde bateko kideen % 50 baino handiagoa edo organoko kideen % 30 baino handiagoa bada, hauteskunde partzialak egingo dira. Modu horretan hautatutakoak kide izango dira agintaldia amaitu arte.

1. – Kide anitzeko organoetako kideek organoen bileretara joateko eskubidea eta joan beharra daukate, eta arautegi honek betearazten dizkien eginkizunak betetzekoa. Bileretara joanez gero, organoetako kideek ez dituzte unibertsitateko gainerako eginkizunak bete behar, baina kasuan kasuko organoek beharrezko neurriak hartu behar dituzte betebehar horiek bete egiten direla eta zerbitzua eman egiten dela bermatzeko.

2. – Kide anitzeko organoetako kideek eskubidea dute euren eginkizunetarako beharrezko izan dezaketen unibertsitateko dokumentazioa eta informazioa eskatzeko. Eskaera idatziz egin behar da, gutxien dela, bilera hasi baino 24 ordu lehenago. Dokumentazio eta informazio horrek ez dauka zertan zerikusirik izan bilerarekin.

1. – Kide anitzeko organoa balioz eratzeko beharrezkoa izango da kideen gehiengo osoa egotea bertan lehen deialdian; edo kideen heren bat, gutxienez, bigarren deialdian. Lehen eta bigarren deialdien artean 5 minutuko tartea gorde beharko da. Edonola ere, organoko buruak eta idazkariak beti egon behar dute edo, bestela, euren ordezkoek.

2. – Bigarren deialdian organoa eratzeko beharrezkoa den quoruma, hau da, kideen herena, bozketa guztietan da beharrezkoa.

1. – Kide anitzeko organoko buruak bilera behar bezala gara dadila bermatuko du eta, horretarako arrazoirik egonez gero, bertan behera utzi ahal izango du.

2. – Eztabaidak aztergaiei jarraituz egingo dira. Dena dela, beharrezkoa izanez gero, kide anitzeko organoak bileraren ordena aldatzea erabaki dezake, organoko buruak proposamena egin ondoren.

3. – Organoko buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte hartzeen kopurua ere.

4. – Kide anitzeko organoetako kideek aktan agerrarazi ahal izango dute beren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto partikularrak beti agerrarazi behar dira proposamenekin batera.

5. – Kide anitzeko organoko buruak, egoki deritzonean, organoko kide ez diren pertsonak gonbidatu ahal izango ditu bileretara aztergaietakoren bati buruzko iritzia edo informazioa eman dezaten. Aldez aurretik gonbidapenik egin ezean, idatzizko eskaria bilera baino gutxienez 24 ordu lehenago egin beharko da adierazita bilerako zein aztergaietan hartuko duen parte gonbidatuak. Aktan jaso egingo da bileran gonbidatuak izan direla; gonbidatuek ez dute botoa emateko eskubiderik.

1. – Erabakiak hartu ahal izateko, emandako boto baliodunen gehiengo soila behar da, Estatutuek edo gainerako lege xedapenek beste gehiengoren bat eskatzen duten kasuetan izan ezik. Horrenbestez, proposamen bakarra izanez gero, onartu egingo da aldeko botoak kontrakoak baino gehiago badira. Bi proposamen badaude, aldeko boto gehien lortzen dituena onartuko da. Proposamenak bi baino gehiago direnean, emandako botoen gehiengoa lortzen duena onartuko da; edo, lehenengo botazioan boto gehien lortu duten bi proposamenak hartuta, bigarren botazioan boto gehien lortzen duena. Berdinketa izanez gero, berriro bozkatuko da; berriro berdinduz gero, organoko buruaren kalitate-botoak erabakiko du.

2. – Botazioa isilpekoa izango da kide anitzeko organoko kideren batek eskatzen duenean. Dena dela, beti izango da isilpekoa pertsonei buruzkoa denean.

3. – Aurkako botoa ematen dutenek eta horretarako arrazoia azaldu, ez dute erantzukizunik izango kide anitzeko organoak hartutako erabakietan. Bozketa isilpekoa bada, interesatuak boto-txartela emango dio organoko idazkariari bozkatzerakoan, eta, txartel horrekin batera, emandako botoaren arrazoia azaltzen duen testua. Boto-txartela eta testua aktari erantsiko zaizkio. Abstenitzen direnak ere erantzukizunetik salbuetsita geratuko dira (30/1992 Legea, Herri Administrazio Araubide Juridikoaren eta Administrazio Prozedura Erkidearena, 27.4 artikulua).

1. – Idazkariak bilerako akta egingo du. Akta bileran bertan edo hurrengoan onartu beharko da. Hurrengo bilerarako utziz gero, kide anitzeko organoko kideei zirriborroa helaraziko zaie, posta elektronikoz, bilera eta hurrengo hiru lanegunetan, hartara aldaketak proposatzeko aukera izan dezaten. Akta onartu ostean, idazkariak sinatu eta organoko buruak ontzat eman behar du.

2. – Aktan nahitaez jasoko dira bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; botazioak (nola egin diren) eta emaitzak; hartutako erabakien edukia eta, egokitzat ikusiz gero, arrazoiaren azalpen laburra.

3. – Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko kideek euren parte hartzea edo proposamena aktetan hitzez hitz jasotzeko eska dezakete. Horretarako, idatziz aurkeztu behar dute testua eskaera egin eta segituan edo, bestela, organoko buruak adierazitako epean.

4. – Kide anitzeko organoko kideek aldaketak proposatu ahal izango dituzte, aktaren zirriborroa hartzen duten unetik akta onartzeko bozketa egiten den arte. Proposamenak idatziz egin behar dira, ezin izango dira aldatu eta aktaren zirriborroari buruzkoak izango dira. Idazkariak egiaztatu egin behar ditu proposatutako aldaketak eta, gehiengoak aldeko botoa ematen badu, onartu egin behar dira.

5. – Kide anitzeko organoa aldatu baino lehen bilera bat egin beharko da onartzeke dauden akta guztiak onartzeko. Bilera hori egitea ezinezkoa bada, akten zirriborroak bidali behar zaizkie kide anitzeko organoko kide zirenei, eta hamar eguneko epea eman edukiari buruzko erreklamazioak egiteko. Esandako epean erreklamaziorik aurkeztu ezean, aktak onartutzat emango dira. Bestela, aldatutako kide anitzeko organoak egiten duen lehen bileran bozkatu beharko dira.

6. – Aktak, behin onartuta, iragarki-ohol ofizialetan argitaratuko dira eta posta elektronikoz bidali kide anitzeko organoko kideei, ikastegiko gainontzeko irakasleei eta AZPkoei, eta Ikasleen Kontseiluari horren bidez ikasleen eskura egon daitezen. Edozelan ere, aktak argitaratzean babestuta egin beharko da pertsonen intimitatea.

1. – Idazkariak kide anitzeko organoak hartutako erabakien fede eman eta ziurtagiriak egingo ditu.

2. – Hartutako erabakiak argitara emango dira iragarki-ohol ofizialean, gehien dela hiru egun balioduneko epean eta pertsonen intimitatea babestuta. Organoko buruak eta idazkariak ziurtatu beharko dute hartutako erabakiak argitara ematen direla, eta, gutxienez, hilabete batez egongo direla argitaratuta jendaurrean. Izan ere, epe horretan egongo da errektoreari errekurtsoak aurkezteko aukera.

3. – Aipatutakoaz gain, pertsonei buruzko erabakiak interesdunei jakinarazi behar zaizkie. Erabakiek jakinarazpena egiten den unetik aurrera dute eragina, eta jakinarazpenak Administrazio Prozeduraren Legean xedatutako moduan egin behar dira.

1. – Kide anitzeko organoak hartutako erabakiek onartzen direnetik aurrera izango dituzte ondorioak, erabakian bertan beste ezer adierazi ez bada behintzat. Erabakiak publikoak dira eta unibertsitateko kasuan kasuko organoei jakinaraziko zaizkie.

2. – Arautegi honetako 6. artikuluan aipatzen diren kide anitzeko organoek hartzen dituzten erabakien kontra gorako errekurtsoa aurkeztu ahal izango zaio errektoreari, hilabeteko epean.