– Hauek izango dira Fakultateko Batzarraren osakideak: dekanoa, fakultateko idazkari akademikoa, administratzailea eta aukeratutako 22 kide, azken hauek unibertsitateko kidegoen artean era honetan banatutakoak:

– Fakultateko Batzarreko hamahiru kide hautetsi unibertsitateko irakasle funtzionarioak edo doktore titulua duten kontratuko irakasleak izango dira, fakultatera atxikitako irakasleen artean behar beste funtzionario doktore ez baldin badago, UPV/EHUko Ikastegien Oinarrizko Arautegiaren bigarren xedapen iragankorrean zehaztutakoari jarraiki.

– Gainerako irakasle eta ikertzailek bi ordezkari hautetsi izango dituzte.

– Batzarreko bost kide hautetsi ikasleen ordezkari izango dira.

– Batzarreko bi kide hautetsi administrazio eta zerbitzuetako pertsonalaren ordezkari izango dira.

Dekanotza-taldea osatuko duten pertsonak izendatzeko dekanoaren proposamenak honakoak errespetatu beharko ditu: Fakultateko Batzarreko kide guztien % 51 unibertsitateko irakasle funtzionarioak edo doktore titulua duten kontratuko irakasleak izango dira, fakultatera atxikitako irakasleen artean behar beste funtzionario doktore ez baldin badago, UPV/EHUko Ikastegien Oinarrizko Arautegiaren bigarren xedapen iragankorrean zehaztutakoari jarraiki.

– Fakultateko Batzarrak bere arautegia izango du funtzionamendurako eta, kide hautatuak lau urterik behin aldatuko dira. Salbuespena ikasleen ordezkariak izango dira, horiek urtero aldatuko baitira.

– Ikastegi Batzarreko kideak hautatzean Estatutuek xedatutakoa eta UPV/EHUko Hauteskunde Arautegi Orokorrean zehaztutako prozedura bete beharko dira.

– Fakultateko Batzarra da kide anitzeko ohiko gobernu organoa ikastegian.

– Fakultateko Batzarrak ikastegiaren bizitza akademikoan eragina daukaten oinarrizko erabaki guztiak hartu behar ditu, batez ere honakoak:

1. Ikastegiaren arautegia prestatu eta Gobernu Kontseiluari proposatzea, hark onar dezan.

2. Ikastegiko dekanoa hautatu, bere kideen artetik.

3. Gobernu organoei irakasleen plantillan eta administrazio eta zerbitzuetako pertsonalaren plantillan dauden beharrizanak aurkeztea.

4. Unibertsitateko planetan biltzen diren helburuak ikastegira egokitzeko plana onartzea.

5. Hizkuntza-normalkuntzarako planak betetzeko eta plan horiei jarraipena egiteko fakultateak dauzkan premien memoriak aurkeztea Campuseko Errektoreordetzari, hark errektoreari edo, hala dagokionean, Gobernu Kontseiluari bidera diezazkion.

6. Fakultateari atxikitako irakasle-lanpostuen eskariez iritzia ematea.

7. Ikasketa-planak eta euren aldaketak egin eta proposatzea Gobernu Kontseiluari, bai eta titulazioak ezarri, aldatu eta kentzeko proposamenak ere.

8. Irakasteko behar diren azpiegituren planak edo irakaskuntzan nahiz ikerkuntzan sortutako bestelako premien planak aztertu eta onartzea. Fakultateari atxikitako sailek proposatuko dizkiote planok.

9. Ikastegiak eskaintzen dituen ikasketen kalitatea aldiro ebaluatuko dela bermatzea, eta unibertsitatearen zerbitzu publikoa hobetzeko neurriak proposatzea.

10. Bere zereginak betetzeko egoki diren batzordeak eratu eta izendatzea eta batzorde horien kideak hautatzea. Kideok, arautegi honetan eratutako batzordeetan gertatu bezala, ez dute zertan Fakultateko Batzarreko kide izan.

11. Irakasleen eta ikasleen ordezkaria izendatzea Campuseko Batzarrerako. Ikasleen ordezkaria izendatzeko proposamena fakultateko Ikasleen Kontseiluak luzatuko du.

12. Ikastegiak, beharrezkoa izanez gero, ohorezko aitorpenak emateko erabiliko dituen moduak zabaldu eta arautzea.

13. Estatutuek eta beroriek garatzen dituzten arauek bere gain uzten dituzten gainerako eginkizun guztiak, edo UPV/EHUko beste gobernu organoek eskuordetzen dizkiotenak.

– Fakultateko Batzarrak ohiko bileran eztabaidatu eta bozkatuko ditu urteko memoria, eginkizunen plana eta urteko txosten ekonomikoa. Dokumentu horiek dekanoak aurkeztuko ditu bileran. Memoria eta eginkizunen plana behin onartuta, Campuseko Batzarrari eta Gobernu Kontseiluari bidaliko zaizkie, jakitun egon daitezen.

– Fakultatean Batzorde Iraunkor bat egongo da, unibertsitateko kidegoek Fakultateko Batzarrean dauzkaten ordezkarien ehuneko berberak izango dituena. Beraz, Batzorde Iraunkorra honakoek osatuko dute: dekanoak edo hark bere ordez izendatzen duen dekanordeak, idazkari akademikoak, unibertsitateko irakasle funtzionarioak diren edo/eta doktore titulua duten kontratuko lau irakasle, fakultatera atxikitako irakasleen artean behar beste funtzionario doktore ez baldin badago, UPV/EHUko Ikastegien Oinarrizko Arautegiaren bigarren xedapen iragankorrean zehaztutakoari jarraiki, gainerako irakasle eta ikertzaileen ordezkari batek, bi ikaslek eta AZPko kide batek.

– Fakultateko Batzarrak honako eginkizunak eskuordetu ahal izango dizkio Batzorde Iraunkorrari:

1. Gobernu organoei irakasleen plantillan eta administrazio eta zerbitzuetako pertsonalaren plantillan dauden beharrizanak aurkeztea.

2. Unibertsitateko planetan biltzen diren helburuak ikastegira egokitzeko plana onartzea.

3. Hizkuntza-normalkuntzarako planak betetzeko eta plan horiei jarraipena egiteko fakultateak dauzkan premien memoriak aurkeztea Campuseko Errektoreordetzari, hark errektoreari edo, hala dagokionean, Gobernu Kontseiluari bidera diezazkion.

4. Fakultateari atxikitako irakasle-lanpostuen eskariez iritzia ematea.

5. Ikasketa-planak eta euren aldaketak egin eta proposatzea Gobernu Kontseiluari, bai eta titulazioak ezarri, aldatu eta kentzeko proposamenak ere.

6. Irakasteko behar diren azpiegituren planak edo irakaskuntzan nahiz ikerkuntzan sortutako bestelako premien planak aztertu eta onartzea. Fakultateari atxikitako sailek proposatuko dizkiote planok.

7. Irakasleen eta ikasleen ordezkaria izendatzea Campuseko Batzarrerako. Ikasleen ordezkaria izendatzeko proposamena fakultateko Ikasleen Kontseiluak luzatuko du.

8. Ikastegiak, beharrezkoa izanez gero, ohorezko aitorpenak emateko erabiliko dituen moduak zabaldu eta arautzea.

9. Estatutuek eta beroriek garatzen dituzten arauek bere gain uzten dituzten gainerako eginkizun guztiak, edo UPV/EHUko beste gobernu organoek eskuordetzen dizkiotenak.

– Fakultateko batzorde bereziak honakoak izango dira:

1. Akademia Antolakuntzako eta Ikasketak Baliozkotzeko Batzordea.

2. Euskara Batzordea.

3. Ekonomia Batzordea.

4. Kalitate eta Hobekuntzaren Analisi Batzordea.

5. Praktika Batzordea.

– Fakultatean Akademia Antolakuntzako eta Ikasketak Baliozkotzeko Batzorde bat egongo da. Batzordeko burua dekanoa izango da, edo hark bere ordez izendatzen duen dekanordea. Batzordeko kideak honakoak izango dira: idazkari akademikoa, batzordeko idazkaria izango dena, bost irakasle eta hiru ikasle. Fakultateko dekanotzak bermatuko du fakultateko kasuan kasuko bulegoak aholkularitza teknikoa emango diola batzordeari. Akademia Antolakuntzako eta Ikasketak Baliozkotzeko Batzordeak, eskuordetuko zaizkion eginkizunez gain, ikasketak baliozkotzeko eta aukera askeko kredituak amortizatzeko ikasleek aurkeztuko dituzten eskariak ebatziko ditu, indarreko legeriari jarraiki. Batzorde honek hartutako erabakien aurka errekurtsoak aurkeztu ahal izango zaizkio errektoreari.

– Fakultatean Euskara Batzorde bat ere egongo da, parte-hartze eta aholkularitza-organoa izango dena. Batzorde horren helburua izango da euskararen erabilera bultzatzea fakultatean, UPV/EHUren plangintza orokorrari jarraiki. Euskara Batzordeko kide izango dira: dekanoa edo hark bere ordez izendatutako pertsona, hiru irakasle, hiru ikasle eta AZPko kide bat. Batzordeko idazkari ikastegiko idazkaria izango da. Hauek dira batzorde honen eginkizunak:

1. Fakultatean euskarari buruzko planen inguruko informazioa eta aholkua eman eta proposamenak egitea.

2. Unibertsitateko Euskara Batzordeari jarraiki, fakultatean plan espezifikoak antolatu eta bultzatzea, beti elebitasunean aurrera egiteko.

3. Euskaraz irakastea eta ikertzea ahalbidetuko duten oinarrizko material zehatzak prestatzen sailek egiten dituzten lanak koordinatzea.

– Fakultatean Ekonomia Batzorde bat ere egongo da. Batzorde hau aholkularitza-organoa izango da, eta honakoek osatuko dute: dekanoak edo hark bere ordez izendatzen duen pertsonak, bost irakaslek, hiru ikaslek, AZPko kide batek eta fakultateko idazkariak, batzordeko idazkari izango denak. Ekonomia Batzordearen eginkizuna dekanoari aurrekontuarekin eta ekonomia gestioarekin laguntza eskaintzea izango da, eta bereziki:

1. Urteroko aurrekontu-proiektuari buruzko iritzia ematea Fakultateko Batzarrean aurkeztu baino lehen.

2. Fakultatearen aurrekontu-funtsen gastua gainbegiratzea eta ekitaldiko azken kontuen txostenak egitea, Fakultateko Batzarrari aurkezteko.

3. Ikastegiko administratzaileari fakultatearen zuzendaritza, antolakuntza eta ekonomi gestioan laguntzea.

4. UPV/EHUko ekonomi agintarien aurrean jardutea, fakultate honetako sailekiko bereizkeria ekiditearren ikerkuntzarako hornidurari dagokionez.

5. Ikasleei, euren jarduerak finantzatzeko helburuaz, Unibertsitate-Hedakuntzarako Funtsak lortzen laguntzea.

– Kalitate eta Hobekuntzaren Analisi Batzorde bat ere egongo da fakultatean. Batzorde hau aholkularitza-organoa izango da, eta honakoek osatuko dute: dekanoak edo hark bere ordez izendatzen duen pertsonak, administratzaileak, bulego-burutzak, fakultatean burutza duten sailetako zuzendariek, edo horiek euren ordez izendatutako pertsonek, lau irakaslek eta lau ikaslek eta ikastegiko idazkariak, idazkari lanak egingo dituenak. Hauek dira batzorde honen eginkizunak:

1. Fakultatearen funtzionamenduaren ebaluazioa bultzatu eta gestioaren eta irakaskuntzaren kalitatea hobetzeko neurriak proposatzea, horretarako honakoak eredutzat hartuz: titulazioaren ebaluazio instituzionalerako ezarritako kalitate adierazleak, Europako bat-egite prozesutik eratorritako irizpideak eta UPV/EHUko plan estrategikoak.

2. Proposatutako hobekuntza-ekimenen ezarpen eta garapenaren jarraipena egitea.

– Praktika Batzorde bat ere egongo da fakultatean. Batzorde hau aholkularitza-organoa izango da eta honakoek osatuko dute: dekanoak edo honek eskuordetutako pertsonak, administratzaileak (idazkari izango denak), 4 irakaslek eta 2 ikaslek. Hauek dira batzorde honen eginkizunak:

1. Praktikak egituratu eta antolatzea, programa markoa eta urteroko plazen eskaintza eginez eta antolakuntzari lotutako gainerako arazoak konponduz.

2. Praktiken gestio administratiboa egitea, lankidetza-hitzarmenak eginez, dagokion enkargua egitea eta ikasle bakoitzaren praktiketako oinarrizko datuak erregistratzea.

3. Praktikak koordinatzea hauek dirauten artean eta erakunde laguntzaileetako arduradunekin harremanetan egotea sor litezkeen arazoak konpontzeko.

4. Tutoreei, ikasleei, eta praktikak egiten direneko erakundeetako arduradunei ebaluazio-inkestak egin eta inkestok koordinatzea, ikasleen ebaluazioa eta kalifikazioa gainbegiratzea eta urteroko azken txostena egitea.

– Bileretarako deiak ohikoak eta ezohikoak izango dira.

– Bileretarako deiak, oro har, ohikoak izango dira. Fakultateko Batzarrak ohiko bilera bi egingo ditu seihileko bakoitzean.

– Ezohiko bilera egingo da bileran aztertuko den gaiak hala eskatzen duenean eta, baita ere, arautegi aplikagarriak xedatutako kasuetan. Ezohiko bileretako aztergaien zerrendan ez dira agertuko gai hauek: aurreko akten onespena eta galde-eskeak.

– Presazko bilerak ezohikoak izango dira eta deia gutxienez 24 ordu lehenago egin beharko da. Halakoetan, bilera egiteko arrazoia benetan premiazkoa dela onartu beharko da bileraren hasieran, 12.3 artikuluan ezarritakoaren arabera (organoko kideen bi heren baino gehiago egon beharko dira bileran eta botazioa eginda gehiengo absolutuak gaia premiazkotzat jo beharko du). Onartzen ez bada, bilera bertan behera geratuko da besterik gabe.

– Kide anitzeko organoetako buruek egin behar dute kasuan kasuko organoaren bilerarako deia.

Dena dela, kide anitzeko organoko kideen % 25ek hala eskatzen badu, bilerarako deia egin beharko da. Bilera ezohikoa izango da, eta, gehienera ere, zazpi egun balioduneko epean egingo da, eskaera egiten denetik hasita.

– Bilerarako deia organoko idazkariak bideratuko du, denbora nahikoarekin eta, edonola ere, bileraren data baino hiru egun lehenago. Deialdian adieraziko da bilera non egingo den, zein ordutan, eta zeintzuk gai aztertuko diren bertan. Organoko kideek denboraz eskuratu beharko dituzte aztergaiei dagozkien dokumentuak eta, edonola ere, bileraren data baino 24 ordu lehenago.

– Betiere, aztergaiak osatzen dituzten puntuak zehatz-mehatz jasoko dira deialdian. Puntu horien artean agertu beharko dira organoko kideen % 10ek, gutxienez, bilera baino 48 ordu lehenago erregistro bidez eskatutakoak. Ezin izango da hartu aztergaietan agertzen ez diren puntuei buruzko erabakirik, baina organoko kideen bi heren baino gehiago badaude bileran, eta botazioa eginda gehiengo osoak gaia premiazkoa dela uste badu, erabakia hartu ahal izango da.

– Organoko kideei posta elektroniko bidez bidaliko zaie bilerarako deialdia eta egun horretan bertan organoak jarduera daukan egoitzetan eta gainerako tokietan eman beharko da argitara, jende guztia jakinaren gainean egon dadin.

– Kide anitzeko organoko kide izatea norberari dagokion ezaugarria da eta ezin da beste inoren gain utzi. Estatutuen 228. artikuluan aipatutako arrazoiengatik utziko dio organoko kide batek kide izateari.

– Organoa behin eratuta, hutsik geratzen diren lekuak kasuan kasuko zerrendetako ordezkoek beteko dituzte. Aipatutako irizpideari jarraitu ondoren bete gabe geratzen den plaza-kopurua talde bateko kideen % 50 baino handiagoa edo organoko kideen % 30 baino handiagoa bada, hauteskunde partzialak egingo dira. Modu horretan hautatutakoak kide izango dira agintaldia amaitu arte.

– Kide anitzeko organoetako kideek dagokien organoaren bileretara joateko eskubidea eta betebeharra dute, eta arautegi honek agintzen dizkien eginkizunak betetzekoa. Bileretara joateak unibertsitateko gainerako betebeharrak betetzetik salbuetsiko ditu organoetako kideak, baina kasuan kasuko organoek beharrezko neurriak hartuko dituzte betebehar horiek bete egiten direla eta zerbitzua eman egiten dela bermatzeko.

– Kide anitzeko organoetako kideek eskubidea dute euren eginkizunak aurrera eramateko beharrezkoak izan ditzaketen dokumentazioa eta informazioa eskatu eta eskuratzeko. Eskariak erregistro bidez tramitatuko dira eta dokumentazioa eta informazioa gehienez astebeteko epean emango da.

– Kide anitzeko organoa balioz eratzeko, beharrezkoa izango da kideen gehiengo osoa egotea lehen deialdian, edo kideen heren bat egotea, gutxienez, bigarren deialdian. Lehen eta bigarren deialdiaren artean egon beharreko tartea hamabost minututakoa izango da. Edonola ere, organoko buruak eta idazkariak beti egon behar dute edo, bestela, euren ordezkoek.

– Organoa bigarren deialdian eratzeko beharrezko quoruma bozketa guztietan izango da beharrezkoa.

– Botoa eskuordetu ahalko da, dekanoaren aukeraketan ez ezik, honako baldintzak betetzen direnean:

• Kide anitzeko organoko kide bakoitzak beste baten ordez baino ezin izango du eman botoa.

• Organoa eratzeko quorumari dagokionez, ez dira kontuan hartuko eskuordetutako botoak.

• Organoetako kideek idatziz adierazi beharko dute botoa eskuordetu egin dutela, eta idatzi hori bilerako aktari erantsiko zaio.

• Botoa eskuordetu duen kidea Batzarrean egoteak batzar horretarako botoa eskuordetzea balio gabe utzi edo ezeztatu egingo du.

– Kide anitzeko organoko buruak bermatu egin behar du bilera behar bezala betetzen ari dela eta, arrazoirik egonez gero, bertan behera uzteko erabakia har dezake.

– Eztabaidak aztergaiei jarraituz egingo dira. Dena dela, beharrezkoa izanez gero, kide anitzeko organoak bileraren ordena aldatzeko erabakia har dezake organoko buruak egindako proposamenari jarraituz.

– Organoko buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte hartzeen kopurua ere.

– Kide anitzeko organoetako kideek aktan agerrarazi ahalko dute euren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto partikularrak beti agerraraziko dira proposamenekin batera.

– Egoki deritzonean, kide anitzeko organoko buruak organoko kide ez diren pertsonak gonbida ditzake bileretara, aztergaien zerrendako punturen batekin zerikusia duen iritzia edo informazioa eman dezaten. Aktan jaso egingo da bileran gonbidatuak izan direla, botoa emateko eskubidea izan ez arren.

– Erabakiak hartu ahal izateko, emandako boto baliodunen artetik gehiengo osoa behar izango da, Estatutuek, arautegi honek edo gainerako lege xedapenek beste gehiengoren bat eskatzen ez duten kasuetan izan ezik. Horrenbestez, proposamen bakarra izanez gero, onartu egingo da aldeko botoak kontrakoak baino gehiago badira. Bi proposamen daudenean, aldeko boto gehien lortzen duena onartuko da. Proposamenak bi baino gehiago direnean, emandako botoen gehiengoa lortzen duena onartuko da; edo, lehenengo botazioan boto gehien lortu duten bi proposamenak hartuta, bigarren botazioan boto gehien lortzen duena. Berdinketa izanez gero, berriro egingo da botazioa; hala ere berdinketa izanez gero, organoko buruaren kalitate botoak erabakiko du.

– Botazioa isilpekoa izango da kide anitzeko organoko kideren batek hala eskatzen duenean. Dena dela, botazioa beti izango da isilpekoa pertsonei buruzkoa denean.

– Aurkako botoa ematen dutenek ez dute izango kide anitzeko organoak hartutako erabakien erantzukizunik aurkako boto hori ematearen arrazoia jasota uzten badute. Horretarako, botazioa isilpekoa denean, interesdunak boto-txartela emango dio organoaren idazkariari botazioko unean eta, txartel horrekin batera, emandako botoaren arrazoia azaltzen duen testua. Boto-txartela eta testua aktari erantsiko zaizkio. Halaber, abstenitzen direnak erantzukizunetik salbuetsita geratuko dira.

– Idazkariak bilerako akta egingo du. Akta bileran bertan edo hurrengoan onartuko da, eta aktaren zirriborroa hurrengo bilerako gai zerrendari dagozkion dokumentuekin batera banatuko da. Akta onartu ostean, idazkariak sinatu eta organoko buruak ontzat eman behar du.

– Aktan honako hauek jasoko dira nahitaez: bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; botazioak (nola egin diren) eta emaitzak; hartutako erabakien edukia eta, egoki ikusiz gero, arrazoiaren azalpen laburra.

– Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko kideek euren parte-hartzea edo proposamena aktetan hitzez hitz jasotzeko eskatu ahalko dute. Horretarako, idatziz aurkeztu behar dute eskaera egin eta segituan edo, bestela, organoko buruak adierazitako epean.

– Kide anitzeko organoko kideek aktan aldaketak egiteko proposamenak egin ahal izango dituzte akta onartzeko unean. Idazkariak egiaztatu egingo ditu proposatutako aldaketak eta, gehiengoak aldeko botoa ematen badu, onartu egin beharko dira.

– Kide anitzeko organoa aldatu baino lehen, bilera egin beharko da onartzeke dauden akta guztiak onartzeko. Bilera hori egitea ezinezkoa gertatzen bada, akten zirriborroak bidaliko zaizkie kide anitzeko organoko kide zirenei, eta hamar eguneko epea emango zaie edukiari buruzko erreklamazioak egiteko. Esandako epean erreklamaziorik aurkeztu ezean, aktak onartutzat emango dira; erreklamaziorik aurkeztu gero, kide anitzeko organo aldatuak egingo duen lehenengo bileran onartu beharko dira aktak.

– Behin onartuta, aktak fakultateko iragarki-taulan argitaratuko dira, eta ikastegiko kideek kontsultetarako eskuratu ahal izango dituzte ikastegiko Idazkaritza Akademikoan, beti ere pertsonen intimitatea gordeta.

– Idazkariak kide anitzeko organoak hartutako erabakien fede emango du eta ziurtagiriak egingo ditu.

– Kide anitzeko organoak hartutako erabakiak fakultateko iragarki-oholean emango dira argitara gehienez ere bilera egin eta hiru egun balioduneko epean, eta pertsonen intimitatea behar bezala babestuta. Organoko buruak eta idazkariak ziurtatu beharko dute hartutako erabakiak argitara ematen direla eta gutxienez hilabete egongo direla argitaratuta jendaurrean. Izan ere, epe horren barruan egongo da aukera errektoreari kasuan kasuko errekurtsoa aurkezteko.

– Aipatutakoaz gain, pertsonei buruzko erabakiak interesdunei jakinarazi beharko zaizkie. Erabakiak jakinarazpena egiten den unetik aurrera izango ditu ondorioak. Jakinarazpena Administrazio Prozeduraren Legean xedatutako moduan egingo da.

– Kide anitzeko organoak hartutako erabakiek onartzen direnetik aurrera izango dute eragina, erabakian bertan kontrakorik adierazi ezean. Erabakiak publikoak dira eta unibertsitateko kasuan kasuko organoak jakinaren gainean jarriko dira.

– Arautegi honetako 6. artikuluan aipatzen diren kide anitzeko organoek hartzen dituzten erabakien kontra gorako errekurtsoa aurkeztu ahal izango zaio errektoreari, hilabeteko epean.