– Hauek izango dira Eskolako Batzarra osatzen duten kideak Donostiako Unibertsitate Eskola Politeknikoan: zuzendaria, idazkari akademikoa, eskolako administratzailea, eta 75 kide, unibertsitateko kidegoen artean banatuko direnak.

– Donostiako Unibertsitate Eskola Politeknikoan Eskolako Batzarreko berezko kide izango dira zuzendariak bilerako aztergaien arabera hautatuko dituen 3 zuzendariorde.

– Eskolako Batzarreko kide guztien % 51 (hautaturiko 38 kide eta berezko 4 kide) unibertsitateko irakasleen kidegoetako funtzionario izango da.

– Eskolako Batzarrean lan kontratudun irakasleak, administrazio eta zerbitzuetako langileak eta ikasleak egongo dira, banaketa honen arabera: lan kontratudun 14 irakasle (% 18), administrazio eta zerbitzuetako 8 langile (% 11), eta 15 ikasle (% 20).

– Donostiako Unibertsitate Eskola Politeknikoan, Eskolako Batzarrak bere funtzionamendurako arautegia izango du eta, kide hautatuak lau urterik behin aldatuko dira. Salbuespena ikasleen ordezkariak izango dira, horiek urtero aldatuko baitira.

– Donostiako Unibertsitate Eskola Politeknikoan, Eskolako Batzarreko kideak hautatzean bete egin beharko da Estatutuek xedatutakoa eta EHUko Hauteskunde Arautegi Orokorrean zehaztutako prozedura.

– Eskolako Batzarra da kide anitzeko ohiko gobernu organoa Donostiako Unibertsitate Eskola Politeknikoan.

– Eskolako Batzarrak eskolaren bizitza akademikoan eragina daukaten oinarrizko erabaki guztiak hartu behar ditu Donostiako Unibertsitate Eskola Politeknikoan, batez ere honakoak:

1. Eskolako arautegiaren proposamena onartu eta Gobernu Kontseiluari proposatzea, hark onar dezan.

2. Eskolako zuzendaria hautatzea.

3. Gobernu organoei administrazio eta zerbitzuetako langileen eta irakasleen plantillan dauden beharrizanak aurkeztea.

4. Unibertsitateko planetan biltzen diren helburuak eskolara egokitzeko plana onartzea.

5. Hizkuntza normalkuntzako planak betetzeko eta plan horiei jarraipena egiteko eskolak dauzkan premien memoriak aurkeztea Campuseko Errektoreordetzari, hark errektoreari edo, hala dagokionean, Gobernu Kontseiluari bidera diezazkion.

6. Eskolari atxikitako irakasle lanpostuen eskarien berri ematea.

7. Ikasketa planak eta euren aldaketak egin eta Gobernu Kontseiluari proposatzea, bai eta titulazioak ezarri, aldatu eta kentzeko proposamenak ere.

8. Irakasteko behar diren azpiegituren planak edo irakaskuntzan nahiz ikerkuntzan sortutako bestelako premien planak aztertu eta onartzea, kontuan hartuta eskolari atxikitako sail edo sail atalen iritzia.

9. Eskolak eskaintzen dituen ikasketen kalitatea aldiro ebaluatuko dela bermatzea, eta unibertsitatearen zerbitzu publikoa hobetzeko neurriak proposatzea.

10. Bere zereginak betetzeko egoki diren batzordeak eratzea.

11. Campuseko Batzarrerako irakasleen eta ikasleen ordezkaria izendatzea. Ikasleen ordezkaria izendatzeko proposamena eskolako Ikasleen Kontseiluak egingo du.

12. Eskolak, beharrezkoa izanez gero, bere esker ona adierazteko erabiliko dituen moduak zabaldu eta arautzea.

13. Zuzendariak aurkeztutako urteko kudeaketa plana eta aurrekontu-proiektua onartzea.

14. Eskolaren sarrera eta gastuen zerrenda zehaztasunez jasoko duen urteko txosten ekonomikoa eztabaidatu eta bozkatzea.

15. Estatutuek eta beroriek garatzen dituzten arauek bere esku uzten dituzten gainerako eginkizun guztiak, edo EHUko beste gobernu organoek eskuordetzen dizkiotenak.

– Eskolako Batzarrak ohiko bileran onartuko ditu urteko memoria eta eginkizunen plana, Donostiako Unibertsitate Eskola Politeknikoan. Dokumentu horiek zuzendariak aurkeztuko ditu bileran. Memoria eta eginkizunen plana behin onartuta, Campuseko Batzarrari eta Gobernu Kontseiluari bidaliko zaizkio, jakitun egon daitezen.

– Hiru hilez behin Eskolaren kontuen egoera eguneratuaren berri emango zaio Eskolako Batzarrari.

– Donostiako Unibertsitate Eskola Politeknikoan, Eskolako Batzarrak Batzorde Iraunkorra hautatuko du bere kideen artetik, eta egokitzat jotzen dituen eginkizunak eskuordetuko dizkio. Edozelan ere, Batzarrak ezin izango ditu eskuordetu 8.2 artikuluko a), b), i), eta j) paragrafoetan aipatutako eginkizunak.

– Hauek izango dira Eskolako Batzorde Iraunkorraren kideak: zuzendaria, azken horrek hautatutako zuzendariorde 1, idazkari akademikoa, administratzailea, eta 15 kide gehiago, honela banatuta: unibertsitateko irakasleen kidegoetako 8 funtzionario (% 51), beste irakasle eta ikertzaileen 2 ordezkari (% 18), 3 ikasle (% 20), AZPko 2 kide (% 11).

– Batzorde Iraunkorreko kideak hautatzeko hautagai-zerrendak (itxiak eta ordenatuak) aurkeztu beharko dira eta bete egin beharko da EHUko Hauteskunde Arautegi Orokorrean zehaztutako prozedura. Kideen hautaketa hondar handienaren sistema proportzionalaren bidez egingo da.

– Batzarrak eskuordeturiko eginkizun hauek izango ditu:

1. Irakaskuntza ekipamenduaren aurrekontuaren banaketa proposatzea baita eskolari esleitu dakizkiokeen ohiz kanpoko beste aurrekontu batzuena ere.

2. Etengabeko prestakuntzako programak proposatzea.

– Donostiako Unibertsitate Eskola Politeknikoak Akademia Antolakuntzako eta Ikasketak Baliozkotzeko Batzordea hautatuko du eta honako eginkizunak eskuordetuko zaizkio:

1. Ikasketak baliozkotzeko eta aukera askeko kredituak amortizatzeko ikasleek aurkeztuko dituzten eskariak ebatziko ditu, indarreko legeriari jarraiki. Batzorde horrek hartutako erabakien aurkako errekurtsoak aurkeztu ahal izango zaizkio errektoreari.

2. Akademia Antolakuntzako zuzendariordeari behar dituen gaietan aholkuak ematea.

3. Eskatuko zaizkion gaiei buruzko txostenak egitea.

– Batzordeko burua Eskolako zuzendaria izango da, edo hark bere ordez izendatzen duen pertsona. Akademia Antolakuntzako zuzendariak, idazkari akademikoak, 7 irakaslek eta ikasleen ordezkari batek osatuko dute batzordea. Batzorde honetan aritzeko ez da beharrezkoa izango Eskolako Batzarreko kide izatea. Eskolako zuzendaritzak bermatuko du eskolako kasuan kasuko bulegoak aholkularitza teknikoa emango diola batzordeari.

– Akademia Antolakuntzako eta Ikasketak Baliozkotzeko Batzordeko kideak hautatzeko hautagai-zerrendak (itxiak eta ordenatuak) aurkeztu beharko dira eta bete egin beharko da EHUko Hauteskunde Arautegi Orokorrean zehaztutako prozedura. Kideen hautaketa hondar handienaren sistema proportzionalaren bidez egingo da.

– Donostiako Unibertsitate Eskola Politeknikoak Euskara batzordea hautatuko du, parte-hartze eta aholkularitza organoa izango dena. Batzorde horren helburua eskolan euskararen erabilera bultzatzea izango da, EHUren plangintza orokorrari jarraiki.

– Batzordeko burua zuzendaritza-taldeko kideen artetik Euskara koordinatzaile funtzioa duena izango da. 7 irakaslek, ikasleen ordezkari batek eta AZPko kideen ordezkari batek osatuko dute batzordea. Batzorde honetan aritzeko ez da beharrezkoa izango Eskolako Batzarreko kide izatea. Euskara Batzordeak egingo duen lehenengo bileran, batzordekideen artean idazkari lanak egingo dituena aukeratuko da.

– Euskara batzordeko kideak hautatzeko hautagai-zerrendak (itxiak eta ordenatuak) aurkeztu beharko dira eta bete egin beharko da EHUko Hauteskunde Arautegi Orokorrean zehaztutako prozedura. Kideen hautaketa hondar handienaren sistema proportzionalaren bidez egingo da.

– Donostiako Unibertsitate Eskola Politeknikoak Liburutegi batzordea hautatuko du, parte-hartze, orientabide eta aholkularitza organoa izango dena, eta honako eginkizunak izango dituena:

1. Erosketa-politika ezartzea, Unibertsitateko Liburutegi batzordeak finkatu dituen ildoei jarraiki.

2. Sailen edo liburutegiko erabiltzaileen proposamenak, iradokizunak eta erreklamazioak jaso, aztertu eta, behar izanez gero, ebaztea.

3. Unibertsitateko Liburutegi batzordeari Eskolako liburutegiko mailegu zerbitzua eraenduko duten arauak proposatzea.

4. Aurrekontua sailen artean banatzea, irizpide objektiboen arabera, ikasleen oinarrizko bibliografiarako eta erreferentzia-obretarako fondoak esleituko direla bermatuta.

5. Interes orokorreko edozein arazoren ardura hartzea, Liburutegiaren arloaren barruan.

– Batzordeko burua Ikastegiko zuzendaria izango da, edo hark bere ordez izendatzen duen zuzendaritza-taldeko kidea, eta berarekin batera, liburutegiko arduradunak, hiru irakaslek, eta bi ikaslek osatuko dute batzordea. Liburutegiko Batzordeak egingo duen lehenengo bileran, batzordekideen artean idazkari lanak egingo dituena aukeratuko da.

– Bileretarako deiak ohikoak eta ezohikoak izango dira.

– Deialdiek ohiko bileretarako izan behar dute oro har. Eskolako Batzarrak ohiko bilera bi egingo ditu seihileko bakoitzean.

– Ezohiko bilera egingo da bileran aztertuko den gaiak hala eskatzen duenean eta, baita ere, arautegi aplikagarriak xedatutako kasuetan. Ezohiko bileretako aztergaien zerrendan ez dira agertuko gai hauek: aurreko akten onespena eta galde-eskeak.

– Presazko bilerak ez ohikoak dira eta deia gutxienez 24 ordu lehenago egin behar da. Halakoetan, bilera egiteko arrazoia benetan premiazkoa dela onartu beharko da bileraren hasieran. Onartzen ez bada, bilera bertan behera geratuko da besterik gabe.

– Kide anitzeko organoetako buruak egin behar du bileretarako deia.

Dena dela, kide anitzeko organoko kideen % 25ak hala eskatzen badu, bilerarako deia egin beharko da. Bilera ezohikoa izango da eta gehienera ere zazpi egun balioduneko epean egingo da, eskaera egiten denetik hasita.

– Bilerarako deiak organoko idazkariak bideratu behar ditu, aurrerapen nahikoaz eta, edonola ere, bilerak baino gutxienez 72 ordu lehenago. Bilerak non egingo diren, zein ordutan eta zein gai aztertuko diren adierazi behar da deialdian. Aztertu beharreko gaiei buruzko dokumentuak aurrerapen nahikoaz eskuratzeko aukera izan behar dute organoko kideek, eta, edonola ere, bilera baino 48 ordu lehenago.

– Gai zerrenda osatzen duten puntuak zehatz-mehatz jaso behar dira deialdietan. Puntu horien artean, organoko kideen gutxienez % 10ek organoko buruari bilera egin baino 96 ordu lehenago idatziz eskatutakoek agertu behar dute. Aztergaietan agertzen ez diren puntuei buruzko erabakirik ezingo da hartu; baina organoko kideen bi heren baino gehiago badaude bileran, eta botazioa eginda gehiengo absolutuak gaia premiazkoa dela uste badu, erabakia hartu ahal izango da.

– Organoak jarduera daukan egoitzetan eta gainerako tokietan eman beharko da argitara deialdia, organoko kideei bilerarako deia egiten zaien egun berean, jende guztia jakinaren gainean egon dadin.

– Kide anitzeko organoko kide izatea pertsonala eta besterenezina da. Estatutuetako 228. artikuluan aipatutako egoeretan utziko dio organoko kide batek kide izateari baita organoen elkarren segidako hiru bileratara edo txandakako bost bileratara huts egiteagatik ere (utziko dio kide izateari).

– Organoa eratu ostean, hutsik geratzen diren lekuak kasuan kasuko zerrendetako ordezkoek bete behar dituzte. Aipatutako irizpideari jarraiki, bete ezin den leku kopurua kideentzako lekuen % 50ekoa edo handiagoa, edo organoetako kideentzako lekuen % 30ekoa edo handiagoa bada, hauteskunde partzialak egingo dira lekuak betetzeko. Modu horretara hautatuak kide izango dira agintaldia amaitu arte.

– Kide anitzeko organoetako kideek organoen bileretara joateko eskubidea eta beharra daukate, eta arautegi honek agintzen dizkien eginkizunak betetzekoa. Bileretara joanez gero, organoetako kideek ez dituzte unibertsitateko gainerako eginkizunak betetzeko beharra izango, baina kasuan kasuko organoek beharrezko neurriak hartu behar dituzte betebehar horiek betetzea ahalbidetzeko eta zerbitzua eman egiten dela bermatzeko.

– Kide anitzeko organoko kideek eskubidea dute euren eginkizunak aurrera eramateko beharrezko izan ditzaketen dokumentazioa eta informazioa dagokion kide anitzeko organoaren Idazkaritzari eskatu eta eskuratzeko, hurrengo 48 orduetan gehienez ere.

– Kide anitzeko organoak balioz eratzeko, beharrezkoa da kideen gehiengo osoa egotea lehen deialdian, edo kideen gutxienez heren bat egotea bigarren deialdian. Lehen eta bigarren deialdiaren artean 15 minutuko tartea egon beharko da. Edonola ere, organoko buruak eta idazkariak beti egon behar dute edo, bestela, euren ordezkoek.

– Organoa bigarren deialdian eratzeko beharrezko quoruma bozketa guztietan da beharrezkoa.

– Kide anitzeko organoko buruak bilera behar bezala antolatuko du eta, horretarako arrazoirik egonez gero, bertan behera utzi ahal izango du.

– Eztabaidak gai zerrendari jarraiki egingo dira. Dena dela, beharrezkoa izanez gero, kide anitzeko organoak bileraren ordena aldatzea erabaki dezake organoko buruak egindako proposamenari jarraituz.

– Organoko buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte hartzeen kopurua ere.

– Kide anitzeko organoetako kideek aktan agerrarazi ahal izango dute euren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto bereziak beti agerrarazi behar dira haiekin batera.

– Kide anitzeko organoko buruak organoko kide ez diren pertsonak gonbidatu ahal izango ditu bileretara egoki deritzonean, aztergaietako punturen batekin zerikusia daukan iritzia edo informazioa eman diezaioten kide anitzeko organoari. Gonbidatuen izen-abizenak bilerako aktan jasoko dira, botoa emateko eskubidea izango ez duten arren.

– Erabakiak hartu ahal izateko, emandako boto baliodunen artetik gehiengo soila behar izango da, Estatutuek edo gainerako lege xedapenek beste gehiengoren bat eskatzen duten kasuetan izan ezik. Horrenbestez, proposamen bakarra izanez gero, onartu egingo da aldeko botoak kontrakoak baino gehiago badira. Bi proposamen badaude, aldeko boto gehien lortzen dituena onartuko da. Proposamenak bi baino gehiago direnean, lehenengo botazioan emandako botoen erabateko gehiengoa lortzen duena onartuko da; edo, lehenengo botazioan boto gehien lortu dituzten bi proposamenak hartuta, bigarren botazioan boto gehien lortzen dituena.

Berdinketa izanez gero, boto-kopuru berdina lortu duten proposamenak hartuta, berriro egingo da botazioa; eta hala ere berdinketa izanez gero, organoko buruaren kalitate botoak erabakiko du.

– Botazioa isilpekoa izango da kide anitzeko organoko kideren batek eskatzen duenean. Dena dela, botazioa beti izango da isilpekoa pertsonei buruzkoa denean.

– Abstentzioa aurkeztu edo aurkako botoa ematen dutenek eta horretarako arrazoia azaldu, ez dute erantzukizunik izango kide anitzeko organoak hartutako erabakietan legezkotasuna hausten bada. Botazioa isilpekoa denean, interesdunak botoaren arrazoia azaltzen duen testua eman beharko dio organoko idazkariari, boto txartelarekin batera. Boto txartelak eta testuak aktari erantsi beharko zaizkio.

– Idazkariak bilerako akta egin behar du. Akta bileran bertan edo hurrengoan onartu behar da, eta aktaren zirriborroa hurrengo bilerako gai zerrendari dagozkion dokumentuekin batera banatuko da. Akta onartu ostean, idazkariak sinatu eta organoko buruak ontzat eman behar du.

– Aktan honako hauek jasoko dira nahitaez: bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; bozkatzeko era eta emaitzak; hartutako erabakien edukia eta, egokitzat ikusiz gero, arrazoiaren azalpen laburra.

– Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko edozein kidek euren parte hartzea edo proposamena aktetan hitzez hitz jasotzeko eska dezakete. Horretarako, idatziz aurkeztu behar dute testua eskaera egin eta segituan edo, bestela, organoko buruak adierazitako epean.

– Kide anitzeko organoko kideek aktan aldaketak egiteko proposamenak egin ahal izango dituzte akta onartzeko unean. Idazkariak egiaztatu egin behar ditu proposatutako aldaketak eta, gehiengoak aldeko botoa ematen badu, onartu egin behar dira.

– Kide anitzeko organoa aldatu baino lehen, bilera egin behar da onartzeke dauden akta guztiak onartzeko. Bilera hori egitea ezinezkoa bada, akten zirriborroak bidali behar zaizkie kide anitzeko organoko kide zirenei, eta hamar eguneko epea eman haien edukiari buruzko erreklamazioak egiteko. Epe horretan erreklamaziorik aurkezten ez bada, aktak onartutzat emango dira; Erreklamaziorik aurkeztu gero, kide anitzeko organo aldatuak egingo duen lehen bileran onartu beharko dira aktak.

– Aktak, behin onartuta, eskolako kideek eskuratu ahal izango dituzte kontsultetarako Eskolako web orrian, pertsonen intimitatea babestuta.

– Idazkariak kide anitzeko organoak hartutako erabakien fede eman behar du eta ziurtagiriak egin behar ditu.

– Hartutako erabakiak, gehienez ere hiru egun balioduneko epean argitara emango dira eta onartutako akta argitaratu arte egongo dira argitaratuta jendaurrean Eskolako web orrian, pertsonen intimitatea babestuta.

– Aipatutakoaz gain, pertsonei buruzko erabakiak jakinarazi egin beharko zaizkie interesatuei. Erabakiak jakinarazpena egiten den unetik aurrera izango ditu ondorioak. Jakinarazpena Administrazio Prozeduraren Legean xedatutako moduan egingo da.

– Kide anitzeko organoak hartutako erabakiek onartzen direnetik aurrera dute eragina, erabakian bertan kontrakorik adierazi ezean. Erabakiak publikoak dira eta unibertsitateko kasuan kasuko organoak jakinaren gainean jarriko dira.

– Arautegi honetako 6. artikuluan aipatzen diren kide anitzeko organoek hartzen dituzten erabakien kontra gorako errekurtsoa aurkeztu ahal izango zaio errektoreari, hilabeteko epean.