1. – Hauek izango dira, Fakultateko Batzarreko osakideak: dekanoa, dekanordeak, idazkari akademikoa, fakultateko administratzailea eta fakultateko 30 kide, honako era honetan unibertsitateko kidegoen artean banatuta: unibertsitateko irakasleen kidegoetako 16 funtzionario, administrazio eta zerbitzuetako 4 langile, 6 ikasle eta 4 kontratudun irakasle edota ikerlari.

   Dekanoak, dekanotza-taldea osatzeko egiten duen izendapen-proposamenean, kontuan izan behar du Fakultateko Batzarreko kide guztien % 51k unibertsitateko kidegoetako funtzionarioa izan behar duela.

2. – Fakultateko Batzarrak bere arautegia izango du funtzionamendurako eta, kide hautatuak lau urterik behin aldatuko dira. Salbuespena ikasleen ordezkariak izango dira, horiek urtero aldatuko baitira.

3. – Fakultateko Batzarreko kideak hautatzean bete egin beharko da Estatutuek xedatutakoa eta EHUko Hauteskunde Arautegi Orokorrean zehaztutako prozedura.

1. – Fakultateko Batzarra da kide anitzeko ohiko gobernu-organoa Filosofia eta Hezkuntza Zientzien Fakultatean.

2. – Filosofia eta Hezkuntza Zientzien Fakultateko Batzarrak fakultatearen bizitza akademikoan eragina daukaten oinarrizko erabaki guztiak hartu behar ditu, batez ere honakoak:

   1. Fakultatearen arautegia prestatu eta Gobernu Kontseiluari proposatzea, hark onar dezan.

   2. Gobernu-organoei irakasleen plantilan eta administrazio eta zerbitzuetako langileen plantilan dauden beharrizanak aurkeztea.

   3. Unibertsitateko planetan biltzen diren helburuak fakultatera egokitzeko plana onartzea.

   4. Hizkuntza normalkuntzako planak betetzeko eta plan horiei jarraipena egiteko fakultateak dauzkan premien memoriak aurkeztea Gipuzkoako Campuseko Errektoreordetzari, hark errektoreari edo, hala dagokionean, Gobernu Kontseiluari bidera diezazkion.

   5. Fakultateari atxikitako irakasle lanpostuen eskariez iritzia ematea.

   6. Ikasketa-planak eta euren aldaketak egin eta proposatzea Gobernu Kontseiluari, bai eta titulazioak ezarri, aldatu eta kentzeko proposamenak ere.

   7. Irakasteko behar diren azpiegituren planak edo irakaskuntzan nahiz ikerkuntzan sortutako bestelako premien planak aztertu eta onartzea, kontuan hartuta fakultateari atxikitako sail edo sail atalen iritzia.

   8. Fakultateak eskaintzen dituen ikasketen kalitatea aldiro ebaluatuko dena bermatzea, eta unibertsitatearen zerbitzu publikoa hobetzeko neurriak proposatzea.

   9. Bere zereginak betetzeko egoki diren batzordeak eratzea.

   10. Irakasleen eta ikasleen ordezkaria izendatzea Gipuzkoako Campuseko Batzarrerako. Ikasleen ordezkaria izendatzeko proposamena ikastegiko Ikasleen Kontseiluak egingo du.

   11. Fakultateak, beharrezkoa izanez gero, bere esker ona adierazteko erabiliko dituen moduak zabaldu eta arautzea.

   12. Estatutuek eta beroriek garatzen dituzten arauek bere gain uzten dituzten gainerako eginkizun guztiak, edo UPV/EHUko beste gobernu-organoek eskuordetzen dizkionak.

3. – Fakultateko Batzarrak ohiko bileran eztabaidatu eta bozkatuko ditu urteko memoria, eginkizunen plana eta urteko txosten ekonomikoa. Dokumentu horiek dekanoak aurkeztuko ditu bileran. Memoria eta eginkizunen plana behin onartuta, Gipuzkoako Campuseko Batzarrari eta Gobernu Kontseiluari bidaliko zaizkie, jakitun egon daitezen.

Batzordearen burua dekanoa edo bera ordezkatzen duena izango da eta idazkaria fakultateko idazkari akademikoa. Beraietaz gain, Fakultateko Batzordeko beste zazpi kidek osatuko dute Fakultateko Batzorde Iraunkorra, unibertsitateko kidegoen artetik honako era honetan aukeratuta: unibertsitateko irakasleen kidegoetako hiru funtzionario, (idazkari akademikoa funtzionarioa ez balitz, aukeratzen diren irakasle funtzionarioen kopurua laukoa izango da), administrazio eta zerbitzuetako langile bat, bi ikasle eta gainontzekoa kontratudun irakasle edota ikerlari. Batzordearen eginkizunak Fakultatearen Batzordearen berberak izango dira, a), h) eta i) ataletan azaltzen direnak izan ezik. Batzorde Iraunkorra premiazko baldintzak daudenean baino ez da bilduko, eta horretarako beharrezkoa da kideen erdia gehi bat egotea. Batzordeak balioz hartutako erabakiei buruzko informazioa Fakultate Batzarreko hurrengo ohiko bileran emango da eta, hala badagokie, hartutako erabakiak berretsiko dira.

1. – Fakultateko Akademia Antolakuntza eta Ikasketak Baliozkotzeko Batzordearen burua dekanoa edo hark bere ordez izendatzen duen pertsona izango da. Batzordearen idazkaria fakultateko idazkari akademikoa izango da. Fakultatean kokatuta dauden sail edo sail-atal bakoitzeko ordezkari banak eta bi ikaslek osatuko dute batzordea. Ez da izango beharrezkoa Fakultateko Batzarreko kide izatea batzorde honetan aritzeko. Fakultateko dekanoak bermatuko du ikastegiko kasuan kasuko bulegoak aholkularitza teknikoa emango diola batzordeari.

   Akademia Antolakuntzako eta Ikasketak Baliozkotzeko Batzordeak, eskuordetuko zaizkion eginkizunez gain, ikasketak baliozkotzeko eta aukera askeko kredituak amortizatzeko ikasleek aurkeztuko dituzten eskariak ebatziko ditu, indarreko legeriari jarraiki. Batzorde horrek hartutako ebazpenen aurkako errekurtsoak aurkeztu ahal izango zaizkio errektoreari.

2. – Fakultateko Euskarako Batzordea parte-hartze eta aholkularitza organoa izango da. Batzorde honen helburua izango da euskararen erabilera bultzatzea fakultatean, UPV/EHUren plangintza orokorrari jarraiki. Batzordearen burua dekanoa edo hark bere ordez izendatzen duen pertsona izango da. Dekanoaz gain, fakultatean kokatuta dauden sail edo sail-atal bakoitzeko ordezkari banak, AZPko ordezkari batek eta bi ikaslek osatuko dute batzordea. Ez da izango beharrezkoa Fakultateko Batzarreko kide izatea batzorde honetan aritzeko.

3. – Fakultateko Batzarrak zentroan irakasten diren graduko titulu bakoitzeko Graduko Koordinazioko Batzorde bana sortuko du. Aholkularitza-organoak izango dira. Hauek izango dira haien ardurak: titulazioaren kalitatea zaintzea, Dekanotzak edota Fakultateko Batzarrak eskatu ahala titulazioari buruzko aholkularitza ematea eta haren gestiorako hobekuntza-proposamenak egitea, bai aspektu orokor eta ohikoetan (irakaskuntza-eskaintzaren koordinazioa eta egokitasuna, praktikak, gizartearen aurreko aurkezpena e.a) bai alderdi zehatz eta espezifikoetan (gizartearen aurreko irudia, hobekuntza planak, e.a).

   Batzordearen burua dekanoa edo hark bere ordez izendatzen duen pertsona izango da. Dekanoaz gain, fakultatean kokatuta dagoen eta titulazio horretan irakaskuntza duen sail edo sail-atal bakoitzeko ordezkari banak, AZPko ordezkari batek eta bi ikaslek osatuko dute batzordea. Ez da izango beharrezkoa Fakultateko Batzarreko kide izatea batzorde honetako kide izateko. Batzordeak hala iruditzen bazaio, gonbitea luza diezaioke edozein pertsonari haren aholkua eman dezan.

1. – Bileretarako deiak ohikoak eta ezohikoak izango dira.

2. – Bileretarako deiak, oro har, ohikoak izango dira. Fakultateko Batzarrak ohiko bilera bi egingo ditu seihileko bakoitzean.

3. – Ezohiko bilera egingo da bileran aztertuko den gaiak hala eskatzen duenean eta, baita ere, arautegi aplikagarriak xedatutako kasuetan. Ezohiko bileretako aztergaien zerrendan ez dira agertuko gai hauek: aurreko akten onespena eta galde-eskeak.

4. – Presazko bilerak ezohikoak izango dira eta deia gutxienez 24 ordu lehenago egin beharko da. Halakoetan, bilera egiteko arrazoia benetan premiazkoa dela onartu beharko da bileraren hasieran. Onartzen ez bada, bilera bertan behera geratuko da besterik gabe.

1. – Kide anitzeko organoetako buruek egin behar dute kasuan kasuko organoaren bilerarako deia.

   Dena dela, kide anitzeko organoko kideen % 25ek hala eskatzen badute, bilerarako deia egin beharko da. Bilera ezohikoa izango da eta gehienera ere zazpi egun balioduneko epean egingo da, eskaera egiten denetik hasita.

2. – Bilerarako deia organoko idazkariak bideratuko du, denbora nahikoarekin eta, edonola ere, bileraren data baino hiru egun lehenago. Deialdian adieraziko da bilera non egingo den, zein ordutan, eta zeintzuk gai aztertuko diren bertan. Organoko kideek denboraz eskuratu beharko dituzte aztergaiei dagozkien dokumentuak eta, edonola ere, bileraren data baino 24 ordu lehenago.

3. – Edonola ere, aztergaiak osatzen dituzten puntuak zehatz eta mehatz jasoko dira deialdian. Puntu horien artean agertu beharko dira organoko kideen % 10ek, gutxienez, behar den garaian eta moduan eskatutakoak. Aztergaietan agertzen ez diren puntuei buruzko erabakirik ezingo da hartu; baina organoko kideen bi heren baino gehiago badaude bileran, eta botazioa eginda gehiengo absolutuak gaia premiazkoa dela uste badu, erabakia hartu ahal izango da.

4. – Organoak jarduera daukan egoitzetan eta gainerako tokietan eman beharko da argitara deialdia, organoko kideei bilerarako deia egiten zaien egun berean, jende guztia jakinaren gainean egon dadin.

1. – Kide anitzeko organoko kide izatea norberari dagokion ezaugarria da eta ezin da beste inoren gain utzi. Estatutuetako 228. artikuluan aipatutako egoeretan utziko dio organoko kide batek kide izateari.

2. – Organoa behin eratuta, hutsik geratuko diren lekuak kasuan kasuko zerrendetako ordezkoek beteko dituzte. Aipatutako irizpideari jarraitu ondoren bete gabe geratzen den plaza kopurua talde bateko kideen % 50 baino handiagoa edo organoko kideen % 30 baino handiagoa bada, hauteskunde partzialak egingo dira. Modu horretara hautatuak kide izango dira agintaldia amaitu arte.

1. – Kide anitzeko organoetako kideek organoen bileretara joateko eskubidea eta joan beharra daukate, eta arautegi honek betearazten dizkien eginkizunak betetzekoa. Bileretara joateak unibertsitateko gainerako betebeharrak betetzetik salbuetsiko ditu organoetako kideak, baina kasuan kasuko organoek beharrezko neurriak hartuko dituzte betebehar horiek bete egiten direla eta zerbitzua eman egiten dela bermatzeko.

2. – Kide anitzeko organoetako kideek eskubidea dute euren eginkizunak aurrera eramateko beharrezkoa izan ditzaketen dokumentazioa eta informazioa eskatu eta eskuratzeko. Horretarako, idatziz, eskaera egin ondoren, dekanotzara jo dezakete 48 ordutako epean.

1. – Kide anitzeko organoak balioz eratzeko beharrezkoa izango da bertan kideen gehiengo absolutua egotea lehen deialdian; edo kideen heren bat, gutxienez, bigarren deialdian. Lehen eta bigarren deialdiaren artean 30 minututako tarteak egon beharko du. Edonola ere, organoko burua eta idazkaria beti egon beharko dira edo, bestela, euren ordezkoak.

2. – Organoa bigarren deialdian eratzeko beharrezkoa izango den quoruma beharrezkoa izango da bozketa guztietan.

1. – Kide anitzeko organoko buruak bilera behar bezala antolatuko du eta, horretarako arrazoirik egonez gero, bertan behera utzi ahal izango du.

2. – Eztabaidak aztergaiei jarraituz egingo dira. Dena dela, beharrezkoa izanez gero, kide anitzeko organoak bileraren ordena aldatzeko erabakia har dezake, organoko buruak proposamena egin ondoren.

3. – Organoko buruak, beharrezko ikusten badu, eztabaidaren denbora mugatu ahal izango du, bai eta gaiaren botazioa egin aurretik egon daitezkeen parte hartzeen kopurua ere.

4. – Kide anitzeko organoetako kideek aktan agerrarazi ahal izango dute euren botoa eta horren azalpena. Azalpen hori idatziz eman beharko dute botazioa egitean. Unibertsitateko beste organo batzuei egindako proposamenak badira, kideen boto partikularrak beti agerraraziko dira haiekin batera.

5. – Kide anitzeko organoko buruak organoko kide ez diren pertsonak gonbidatu ahal izango ditu bileretara egoki deritzonean, aztergaietako punturen batekin zerikusia daukan iritzia edo informazioa eman diezaioten kide anitzeko organoari. Gonbidatuen izen-abizenak bilerako aktan jasoko dira, botoa emateko eskubidea izango ez duten arren.

1. – Erabakiak hartu ahal izateko, emandako boto baliodunen artetik gehiengo sinplea beharko da, Estatutuek edo gainerako lege-xedapenek beste gehiengoren bat eskatzen ez duten kasuetan izan ezik. Proposamen bakarra dagoenean, onartua izango da aldeko botoak kontrakoak baino gehiago badira. Bi proposamen daudenean, aldeko boto gehien lortzen dituena onartuko da. Proposamenak bi baino gehiago direnean, emandako botoen gehiengoa lortzen duena onartuko da; edo, lehenengo botazioan boto gehien lortu dituzten bi proposamenak hartuta, bigarren botazioan boto gehien lortzen dituena.

   Berdinketa izanez gero, berriro egingo da botazioa; eta hala ere berdinketa izanez gero, organoko buruaren kalitate botoak erabakiko du.

2. – Botazioa isilpekoa izango da kide anitzeko organoko kideren batek eskatzen duenean. Dena dela, botazioa beti izango da isilpekoa pertsonei buruzkoa denean.

3. – Aurkako botoa ematen dutenek edo abstenitu egiten direnek, eta horretarako arrazoia azaldu, ez dute erantzukizunik izango kide anitzeko organoak hartutako erabakietan. Botazioa isilpekoa bada, interesatuak boto txartela emango dio organoko idazkariari botazioko unean eta, txartel horrekin batera, emandako botoaren arrazoia azaltzen duen testua. Boto txartela eta testua aktari erantsiko zaizkio.

1. – Idazkariak bilerako akta egingo du. Aktak bileran bertan edo hurrengoan onartuko dira, eta hurrengo bilerako aztergaiei dagozkien dokumentuekin batera banatuko dira akten zirriborroak. Aktak, behin onartuta, idazkariak sinatuko ditu eta organoko buruak ontzat emango.

2. – Aktan honako hauek jasoko dira nahitaez: bilerara etorri direnen eta etorri ez direnen zerrenda; aztergaien zerrenda; bileraren tokia eta eguna; bileran aztertutako puntuak; botazioak (nola egin diren) eta emaitzak; hartutako erabakien edukia eta, egokitzat ikusiz gero, arrazoiaren azalpen laburra.

3. – Aktan boto partikularrak ere jasoko dira, kide anitzeko organoko kasuan kasuko kideek hala eskatzen badute. Kide anitzeko organoko edozein kidek eskatu ahal izango du bere parte hartzea edo proposamena hitzez hitz jasotzeko aktan. Horretarako, idatziz aurkeztu beharko du testua eskaera egin eta segituan edo, bestela, organoko buruak esango duen moduan.

4. – Kide anitzeko organoko kideek aktan aldaketak egiteko proposamenak egin ahal izango dituzte akta onartzeko unean. Idazkariak proposatu den aldaketa egiaztatuko du, eta gehiengoak aldeko botoa ematen badu, onartu egingo da.

5. – Kide anitzeko organoa aldatu baino lehen bilera bat egin beharko da onartzeke dauden akta guztiak onartzeko. Bilera hori egitea ezinezkoa gertatzen bada, akten zirriborroak bidaliko zaizkie kide anitzeko organoko kide zirenei eta hamar eguneko epea emango zaie erreklamazioak egiteko. Ez bada aurkezten erreklamaziorik esandako epearen barruan, aktak onartutzat emango dira. Erreklamaziorik aurkeztu gero, kide anitzeko organo aldatuak egingo duen lehen bileran onartu beharko dira aktak.

6. – Aktak, behin onartuta, argitaratuko dira eta dekanotzako idazkaritzan egongo dira, fakultateko kideek eskuratu ahal izateko dituzten kontsultetarako.

1. – Idazkariak kide anitzeko organoak hartutako erabakien fede emango du eta ziurtagiriak egingo ditu.

2. – Hartutako erabakiak, gehien ere hiru egun balioduneko epean, Dekanotzako iragarki taulan argitaratuko dira pertsonen intimitatea babestuta. Organoko buruak eta idazkariak ziurtatu beharko dute hartutako erabakiak argitara ematen direla eta gutxienez hilabete egongo direla argitaratuta jendaurrean. Izan ere, epe horren barruan egongo da aukera kasuan kasuko errekurtsoa aurkezteko errektoreari.

3. – Aipatutakoaz gain, pertsonei buruzko erabakiak jakinarazi egin beharko zaizkie interesatuei. Erabakiak jakinarazpena egiten den unetik aurrera izango ditu ondorioak. Jakinarazpena Administrazio Prozeduraren Legean xedatutako moduan egingo da.

1. – Kide anitzeko organoak hartutako erabakiek onartzen direnetik aurrera izango dituzte ondorioak, erabakian bertan beste ezer adierazi ez bada behintzat. Erabakiak publikoak dira eta unibertsitateko kasuan kasuko organoak jakinaren gainean jarriko dira.

2. – Arautegi honetako 7. artikuluan aipatzen diren kide anitzeko organoek hartzen dituzten erabakien kontra gorako errekurtsoa aurkeztu ahal izango zaio errektoreari, hilabeteko epean.