1. – Gobernu Kontseilurako edo Batzorde Iraunkorrerako proposamena edo erabakia aurkeztu nahi duten unibertsitateko organoek, kasuan kasuko alorrean eskumenak dauzkan Zuzendaritza Kontseiluko kidearen bitartez emango diote hasiera prozedurari.

2. – Hori dela eta, kide anitzeko organoaren bilera eguna baino hilabete lehenago bidaliko da Gizarte Kontseiluarentzako proposamena kasuan kasuko errektoreordetzara, Idazkaritza Nagusira edo Gerentziara. Erabaki proposamenari buruzko dokumentuak bi hizkuntzetan egongo dira; eta, ahal den neurrian, proposamen horien eranskinak ere bi hizkuntzetan egongo dira.

3. – Arautegi honetako 7.2. artikuluan aipatzen diren Gobernu Kontseiluko kideen proposamenen kasuan 17.1. artikuluan xedatutakoa beteko da.

1. – Zuzendaritza Kontseiluko kasuan kasuko kideak, beharrezkoa izanez gero, txostenak bildu eta Idazkaritza Nagusira bidaliko du espediente osoa (ahal izanez gero euskarri informatikoan), organoaren bilera eguna baino hamabost egun lehenago.

2. – Idazkari nagusiak, errektorearen aginduz, kide anitzeko organoak aztertuko dituen gaien zerrenda egingo du. Bertan bilduko beharko dira epearen barruan bidalitako erabaki proposamenak eta gainerako gaiak.

1. – Kapitulu honetan adierazitako epeak ezin dira luzatu eta, horrexegatik, epez kanpo heldutako erabaki proposamenak kide anitzeko organoaren hurrengo bilerarako geratuko dira.

2. – Errektoreak ezagutzera emandako aztergaien zerrenda luzatu ahal izango du salbuespenezko kasuetan, baldin eta kide anitzeko organoko kideei dokumentazioa bidaltzeko epea, arautegi honetako 6. artikuluan zehaztutakoa, betetzen bada.

1. – Arautegien proposamenak unibertsitateko Idazkaritza Nagusian aurkeztuko dira eta idazkaritzak Estatutuak eta Arautegiak Garatzeko Batzordera bidaliko ditu, txostenarekin batera.

2. – Batzorde horrek Idazkaritza Nagusiak bidalitako proposamena aztertuko du eta, beharrezkoa izanez gero, aldaketak egingo ditu.

3. – Testuaren lehen bertsio osoa Gobernu Kontseiluan aurkeztuko da, eta zuzenketak egiteko epea irekiko.

1. – Gobernu Kontseiluko kide guztiek egin ahal izango dituzte zuzenketak horretarako egongo den epearen barruan, batzordeko buruari bidaliko dioten idatzi arrazoituaren bitartez. Unibertsitateko kideek ere zuzenketak aurkeztu ahal izango dituzte, baina Gobernu Kontseiluko kideren batek babesa eman beharko die zuzenketa horiei bere sinadurarekin, eta kide hori izango da zuzenketak aurkezteko arduraduna.

2. – Batzordeko buruak erabakiko du aurkeztutako zuzenketak onartuko diren ala ez. Zuzenketaren bat ez onartzea erabakiz gero, azaldu egin beharko du arrazoia.

3. – Batzordeak, proposamenak tramitatzean, beharrezkotzat hartzen dituen egokitzapenak egin ahal izango ditu testuan, ikusitako akatsak zuzentzeko eta kontraesanak saihesteko. Egokitzapen horiek egin ahal izateko beharrezkoa izango da bertaratutako kide guztien adostasuna.

1. – Osoko zuzenketa aurkeztu ahal izateko, Gobernu Kontseiluko kideen heren baten babesa izan beharko da, gutxienez, eta zuzenketarekin batera ordezko testu arrazoitua proposatu beharko da.

2. – Batzordeak osoko zuzenketa horiek aztertuko ditu eta, ondoren, bere iritzia bidaliko dio Gobernu Kontseiluari.

3. – Osoko zuzenketa onartzen den Gobernu Kontseiluaren bileran bertan epe bat irekiko da zuzenketak egiteko ordezko testuari. Dena dela, testu horri ezin izango zaio egin osoko zuzenketarik.

1. – Artikuluei egindako zuzenketak, testua gehitu, aldatu edo kentzeko izango dira.

2. – Tramiterako onartu diren zuzenketekin aurrera egin ahal izateko, batzordearen bileran bertaratutako batzordeko kideen bi herenen aldeko botoa beharko da. Berdinketarik egonez gero, batzordeko buruaren kalitate botoak erabakiko du.

1. – Zuzenketak aztertzen hasi baino lehenago, batzordeko buruak jakinarazi egingo dio Gobernu Kontseiluari zeintzuk diren 20.3. artikuluari jarraiki testuan egin diren egokitzapenak.

2. – Batzordearen bilerara bertaratutako kideen bi herenek onartu ez dituzten zuzenketak aurkeztu zituztenek Gobernu Kontseiluak azter ditzala eska ditzakete.

1. – Kapitulu honetan xedatutakoa nahitaez aplikatu beharko da EHUk erakunde publikoekin eta pertsona fisiko edo juridikoekin egingo dituen lankidetza hitzarmenetan, hau da, hitzarmen horien xedea alde guztien intereseko helburuetara iristea bada euren eskumeneko alorretan edota kontratu administratibo edo pribatuen helburuak ez direnak betetzea.

2. – Edukiaren arabera, lankidetza hitzarmena hauxe izango da: hitzarmeneko aldeen arteko konpromisoa, alde horien guztien intereseko gaia aurrera eraman ahal izateko.

3. – Tramiteak erraztea aldera, Idazkaritza Nagusiak hitzarmenak egiteko prozedura, motak eta ereduak ezarriko ditu, horretarako aukera ematen duten esparru guztietan.

4. – EHUko Idazkaritza Nagusian hitzarmenen erregistroa egongo da.

Lankidetza hitzarmentzat hartu ahal diren arren, ondoren aipatzen diren itunei ez zaie aplikatuko kapitulu honetan xedatutakoa:

1. Osasun erakundeekin egindako itunak (ekainaren 28ko 1558/1986 Errege Dekretua, unibertsitateen eta osasun erakundeen arteko itunak egiteko oinarri orokorrak xedatzen dituena).

2. Unibertsitateko ikasketak irakasten dituzten ikastegiak atxikitzeko hitzarmenak (EHUren Estatutuetako 216. artikulua).

3. Unibertsitate arteko sailak eratzeko beste unibertsitate batzuekin egindako hitzarmenak (unibertsitateetako sailei buruzko abenduaren 12ko 2360/1984 Errege Dekretuko 6. artikulua).

4. Unibertsitateko ikerketa institutuak eratu, aldatu edo kentzeko egindako hitzarmenak (Estatutuetako 210. artikulua).

5. Ikastetxe nagusiak eta unibertsitateko kideentzako egoitzak sortzeko egindako hitzarmenak (EHUren Estatutuetako 299. artikulua).

6. Enpresekin egindako heziketarako lankidetza programak (uztailaren 19ko 1497/1981 Errege Dekretua eta irailaren 9ko 1845/1994 Errege Dekretua).

7. Arautegi berezia duen beste edozein hitzarmen, bai unibertsitateari buruzkoa bai orokorra.

Hitzarmenek, gutxienez, honakoak zehaztu beharko dituzte:

1. Hitzarmena zein organok sinatzen duten, zein ahalmen juridiko duten, eta alde bakoitza zein eskumenez baliatzen den. Era berean, berariaz jasoko da alde biek elkarri aitortzen diotela hitzarmenean egiteko ahalmena, eta alde bakoitzak bere erakundea behartzeko gaitasuna daukala.

2. Hitzarmena finantzatzeko era eta, beharrezkoak izango badira, giza baliabideak eta baliabide materialak.

3. Hitzarmena betetzeko adostuko diren jarduerak.

4. Hitzarmena gestionatzeko erakunde bat sortu behar den ala ez. Erakunde horrek, besteak beste, hitzarmenaren inguruan sor litezkeen interpretazio eta betetze arazoak konpondu beharko lituzke.

5. Hitzarmena noiztik noiz arte egongo den indarrean eta zelako luzapena izango duen, sinatzaileek halakorik adostuko balute.

6. Hitzarmena amaitzeko arrazoiak, aurreko atalean esandakoaz gainera, bai eta kontratua amaituko balitz, aurrera eramaten ari diren zereginei bukaera emateko modua ere.

1. – Hitzarmenak egin nahi badira, ondoren aipatzen diren errektoreordetzek tramitatuko dituzte euren ekimenak edo unibertsitateko ikastegiek, sailek, ikerketa institutuek eta zerbitzuek egindakoak:

   1. Kasuan kasuko campuseko errektoreordetzak, hitzarmena campus bakar bateko organoen bitartez garatuko denean.

   2. Arloan eskumena daukan errektoreordetzak, hitzarmenak campus batekin baino gehiagorekin badauka zerikusia.

2. – Hitzarmenak campus batekin baino gehiagorekin eta gestio arlo batekin baino gehiagorekin daukanean lotura, Idazkaritza Nagusira bidaliko da, Zuzendaritza Kontseiluak esan dezan zein errektoreordetzak daukan eskumena hitzarmena tramitatzeko.

3. – Errektoreordetza eskudunak espediente administratiboa tramitatuko du, eta bertan jasoko dira hitzarmena izenpetzeko beharrezkoak diren aurrekari guztiak. Hain zuzen ere, dokumentu hauek erantsi beharko zaizkio espedienteari:

   1. Hitzarmena egiteko arrazoiak agertzen dituen memoria. Bertan jasoko dira, besteak beste, hitzarmena sinatzeko beharra edo abantailak, aurrera eramango diren jarduerak (iraupena eta egutegia zehaztuta, bai eta onuradunak ere, nortzuk izango diren jakiterik badago), aldeek euren gain hartzen dituzten konpromisoak, beharrezkoa izango den azpiegitura, eta hitzarmenean xedatutako helburuak betetzeko dauden langileak eta bitartekoak, besteak beste.

   2. Gerentziaren txostena, hitzarmenean jasotako eragiketak aurrekontuan sartzeari buruzkoa, bai eta hitzarmenean jasotako gainerakoei buruzkoa ere, horiek Gerentziaren eskumena den alorrekoak badira.

   3. Hitzarmenarekin zerikusia daukaten arloetako errektoreordetza guztien txostena edo, bestela, kasuan kasuko campuseko errektoreordetzarena.

   4. Hitzarmena abian jartzeak zuzenean eragiten dien gainerako ikastegi, sail, institutu eta zerbitzuen txostena.

   5. Lege Aholkularitzaren txostena.

   6. Hitzarmeneko testuaren zirriborroa, gutxienez 26. artikuluan zehaztutakoak jaso beharko dituena.

1. – Campus bati lotutako hitzarmenak Campuseko Batzarrak eman beharko ditu ontzat.

2. – Hitzarmenaren aplikazio eremua campusa baino haratago doanean, edo langileak kontratatu behar direnean, Gobernu Kontseiluko Batzorde Iraunkorrak onartu beharko du hitzarmena.

3. – Edonola ere, honako hauek Gobernu Kontseiluan aurkeztuko dira, ontzat eman ditzan:

   1. Hitzarmena egitearen alde ez dagoen txostenen bat daukaten espedienteak.

   2. Ondareari buruzko hitzarmenak, hitzarmenaren gaia honako hau denean salbu: ondasunaren erabilera lagatzea Euskal Herriko Unibertsitateari, edo ikerlanetako jabetza ukiezinen eta bestelako emaitzen administrazioa.

      90.000 euro baino gehiagoko konpromisoa dakarten hitzarmenak, langileen gastuak barne.

   3. Unibertsitateari 90.000 euro baino gehiagoko diru sarrera ekarriko dioten hitzarmenak.

      Edozein modutan ere, campusetako batzarrek eta Batzorde Iraunkorrak ontzat emandako hitzarmenen berri izan beharko du Gobernu Kontseiluak eta, horrexegatik, hitzarmenen zerrenda igorriko da organo horren bileretara.

4. – Era berean, artikulu honetan jasotako arauak aplikatuko dira hitzarmenak modu agerian luzatu eta aldatuko direnean.

1. – Hitzarmeneko testuan jaso ahal izango da hitzarmena proposamena egin duen organoko ordezkariak izenpetuko duela. Bestela, tramitazioaz arduratu den errektoreordetzak izenpetuko du. Arlo bati eta campus bati baino gehiagori lotutako hitzarmenak errektoreak izenpetuko ditu, edo hark bere ordez izendatuko duen pertsonak.

2. – Dena dela, errektoreak hitzarmen guztiak izenpetu ahal izango ditu, aldeetako ordezkarien izena eta izana ikusita.

3. – Arautegian jasota badago, organo eskudunak zuzenean izenpetu ahal izango du hitzarmena, Campuseko Batzarrari, Batzorde Iraunkorrari edo Gobernu Kontseiluari aurkezteke.

4. – Oro har, hitzarmenaren tramitazioaz arduratu den Zuzendaritza Kontseiluko kideak betearaziko du hitzarmena; dena dela, proposamena egin zuen organoari eskuordetu ahal izango dio eginkizun hori.

1. – Arautegi honetan aipatzen diren batzordeez gain, Gobernu Kontseiluak beste batzorde batzuk eratu ahal izango du, gaiak lantzeko hala egitea komenigarria dela iruditzen bazaio.

2. – Batzorde horiek aldi baterako izan daitezke, edo iraunkorrak. Batzordeen osaera eta eginkizunak eurak eratzeko akordioan jasoko dira.

3. – Dena dela, eta ez bada bestelakorik erabakitzen beren-beregi, erabakiak hartzeko ahalmena izango duten batzordeen kasuan errespetatu egin beharko dira Estatutuek Gobernu Kontseilurako ezartzen dituzten ehunekoak ordezkaritzetan. Halakoetarako, unibertsitateko ikerketa institutuen ordezkaria sailetako zuzendarien taldean sartuko da.

4. – Gobernu Kontseiluak funtzionamendu arautegi espezifikoak onartu ahal izango ditu batzordeetarako baina, oro har, arautegi honetako I. tituluan jasotako xedapenak aplikatuko dira.

1. – Batzorde guztietako burua errektorea izango da, eta hark bere ordez izendatzen duen pertsona. Errektoreak batzordeko buru izateko izendatzen duen pertsona ez bada Zuzendaritza Kontseiluko kideetako bat, berak zehaztuko du pertsona hori zenbateraino salbuetsiko den irakaslanetik, bai eta bestelako xehetasunak ere, eta jakinaren gainean jarriko du Gobernu Kontseilua.

2. – Bestelakorik zehazten ez bada, batzordeko idazkaria batzordeko kideetako bat izango da, batzordeak berak aukeratuko duena kideen artetik.

1. – Batzordeetako kideak lau urterik behin hautatuko dira Gobernu Kontseiluko kideen artetik, ikasleen ordezkariak izan ezik. Ordezkariok urtero hautatuko dira.

2. – Gobernu Kontseiluko batzordeak hautatzeko deialdian zehaztuko da zein izango den talde bakoitzaren hautagai zerrenda kolektibo, itxi eta ordenatuak aurkezteko epea eta prozedura.

3. – Honako talde hauek osatzen dute Gobernu Kontseilua:

   • Ikastegietako dekano eta zuzendariak.

   • Sailetako eta ikerketa institutuetako zuzendariak.

   • Ikasleen ordezkariak.

   • Unibertsitateko irakasleen kidegoetako funtzionario doktoreen ordezkariak.

   • Bestelako irakasle eta ikertzaileen ordezkariak.

   • Administrazio eta zerbitzuetako langileen ordezkariak.

   • Gizarte Kontseiluak izendatutako kideak.

   • Errektoreak izendatutako kideak.

4. – Hautagai zerrenda bik edo gehiagok boto kopuru bera lortzen badute, beste botazio bat egingo da zerrenda horiek hartuta. Orduan ere berdinketa izanez gero, zozketa egingo da.

1. – Gobernu Kontseiluak, Batzorde Iraunkorra eratu ahal izango du eta, egokitzat joz gero, desegin, gehiengo osoa alde badago.

2. – Gobernu Kontseiluko Batzorde Iraunkorra honako hauek osatuko dute: batzordeko buru izango den errektoreak, edo hark bere ordez izendatzen duen pertsonak; idazkari nagusiak, batzordeko idazkari ere izango dena; gerenteak; eta beste 12 kidek, Gobernu Kontseiluko taldeetako kideek hautatuak euren artetik. Hamabi kide horiek honela banatuko dira:

   • irakasle funtzionario doktoreen bi ordezkari.

   • gainerako irakasle eta ikertzaileen ordezkari bat.

   • ikasleen ordezkari bat.

   • Administrazio eta zerbitzuetako langileen ordezkari bat.

   • Ikastegietako dekano eta zuzendarien bi ordezkari.

   • Sailetako eta ikerketa institutuetako zuzendarien ordezkari bat.

     Aipatutakoez gain, beste hauek ere Batzorde Iraunkorreko kide izango dira: errektoreak izendatutako hiru ordezkari, Gobernu Kontseilurako errektoreak izendatutakoen artetik aukeratuak (unibertsitateko kidego bakoitzeko bat: ikaslea, irakaslea, eta administrazio eta zerbitzuetako langilea); eta Gizarte Kontseiluak Gobernu Kontseilurako izendatutako kideen ordezkari bat.

1. – Hauek dira Batzorde Iraunkorraren eginkizunak:

   1. Ikastegien arautegiak onartzea, legeak agintzen duen legekoztasun txostena aldekoa bada.

   2. Batzordearen eskumenekoak diren hitzarmenak egitea onartzea.

   3. Irakasle eta ikertzaileen lanpostuen zerrendetako edo administrazio eta zerbitzuetako lanpostuen zerrendetako aldaketak onartzea, legeak agintzen dituen txosten guztiak aldekoak badira, eta sindikatuen ordezkarien gehiengoa ez badago gai horiek Batzorde Iraunkorrean eztabaidatzearen aurka.

   4. Ohorezko lankideen izendapenak onartzea.

   5. Unibertsitatearen berezko tituluen eta ikastaro osagarrien luzapenak edo funtsezkoak ez diren aldaketak onartzea, baldin eta legeak agintzen dituen txosten guztiak aldekoak badira.

   6. Gizarte Kontseiluaren onespena behar ez duten aurrekontuko transferentziak onartzea, baldin eta Batzorde Ekonomikoak horien aldeko iritzia eman badu.

   7. Kasuan kasuko ekitaldiko aurrekontuaren luzapena egokitzeko irizpideak onartzea, beharrezkoa izanez gero.

   8. Gobernu Kontseiluko kideen gehiengo osoak hala erabakita, organo horrek eskuordetuko dizkion gainerako guztiak.

2. – Batzorde Iraunkorrak beti eraman ahal izango ditu bere eskumeneko gaiak Gobernu Kontseilura eta organo horrek, era berean, Batzorde Iraunkorraren eskumenen bat bereganatu ahal izango du unean unean.

3. – Errektoreak Batzorde Iraunkorrak hartutako erabakien berri emango dio Gobernu Kontseiluari.

4. – Batzorde Iraunkorrean, kideen gehiengo osoaren aldeko botoa beharko da erabakiak hartzeko.

1. – Batzorde Iraunkorra gutxienez bi aldiz bilduko da hiruhilabetean, eskolaldian zehar.

2. – Arautegi honetako I. tituluan xedatutako guztia aplikatuko zaio Batzorde Iraunkorrari.

3. – Batzorde Iraunkorra balioz eratzeko, gutxienez kideen erdiak egon beharko du bertan.

4. – Batzorde Iraunkorrean, kideen gehiengo osoaren aldeko botoa beharko da erabakiak hartzeko.

1. – Ekonomia Batzordeko burua errektorea edo hark bere ordez izendatzen duen pertsona izango da, eta honako hauek osatuko dute:

   1. Gerenteak.

   2. Ikastegietako dekano eta zuzendarien bi ordezkarik.

   3. Sailetako eta ikerketa institutuetako zuzendarien ordezkari batek.

   4. Unibertsitateko irakasleen kidegoetako funtzionario doktoreen bi ordezkarik.

   5. Gainerako irakasle eta ikertzaileen ordezkari batek.

   6. Ikasleen ordezkari batek.

   7. Administrazio eta zerbitzuetako langileen ordezkari batek.

   8. Gizarte Kontseiluak izendatutako kideen ordezkari batek.

   9. Errektoreak izendatutako kideen ordezkari batek.

2. – Batzordeko idazkari teknikoa Kontabilitate eta Aurrekontuetako gerenteordea izango da, eta hitz egin ahal izango du baina ez botoa eman.

Hauek dira Ekonomia Batzordearen eginkizunak:

1. Urteko premien memoria, urte anitzerako programazioaren proiektua eta unibertsitatearen aurrekontuen proiektua prestatzeko zereginetan parte hartzea, eta dokumentu horiei buruzko iritzia ematea Gobernu Kontseiluan aurkeztu baino lehen.

2. Kreditu transferentziak eta aurrekontua banatzeko irizpideak onartzeko proposamena egitea Gobernu Kontseiluari edo, behar izanez gero, Batzorde Iraunkorrari.

3. Aurrekontua betearazteko arauei buruz egin beharreko txostena egitea. Arauok Gerentziak proposatuko ditu, eta Gobernu Kontseiluak onartuko.

4. Kasuan kasuko ekitaldiko aurrekontua luzatzeko irizpideei buruzko iritzia ematea, Gerentziak hala proposatzen badio.

5. Gastua gainbegiratzea eta txostena egitea kontu orokorrez eta ekitaldiaren kitapenaz, bai eta urteko txosten ekonomikoa ere, Gobernu Kontseiluari eta Gizarte Kontseiluari aurkeztu aurretik eta beti ere urteko lehenengo seihilabetearen barruan.

6. Gobernu Kontseiluak, diru kopuruagatik zein interes bereziagatik, zehaztuko dituen kontratazioen berri eman beharko zaio hiru hilabeterik behin Ekonomia Batzordeari; batzordeak, era berean, egokitzat hartzen dituenen berri emango dio Gobernu Kontseiluari.

7. Txostena egitea balio handiko ondasun higigarriak eta ondasun higiezinak saldu edo beste batzuen esku uzteko proposamenez.

8. Inbentarioan jasotako ondasunak desafektatzeko prozedura onartzea, Gerentziak hala proposatzen badio.

9. EHUren administrazio baldintza orokorren orriak onartzea, kontratazio administratiboan aplikatu beharreko legeriak arautzen dituen obra, hornigai eta zerbitzu kontratuetarako, Gerentziak hala proposatzen badio eta legezkotasun txostena jaso ondoren.

10. Gobernu Kontseiluak ekonomia eta aurrekontu gaietan bere gain uzten dituen gainerako guztiak.

1. – Estatutuak eta Arautegiak Garatzeko Batzordeko burua errektorea izango da, edo hark bere ordez izendatzen duen pertsona. Idazkaria idazkari nagusia izango da, edo hark bere ordez izendatzen duen pertsona. Idazkariak hitza eta botoa izango ditu.

2. – Aipatutakoez gain, ondoren adierazten diren Gobernu Kontseiluko taldeek ordezkari bana izango dute Estatutuak eta Arautegiak Garatzeko Batzordean:

   • Irakasle funtzionario doktoreek.

   • Gainerako irakasle eta ikertzaileek.

   • Ikasleek.

   • Administrazio eta zerbitzuetako langileek.

   • Ikastegietako dekano eta zuzendariek.

   • Sailetako eta ikerketa institutuetako zuzendariek.

   • Gizarte Kontseiluak.

3. – Errektoreak izendatutako kideak dagozkien taldeetan sartuko dira Estatutuak eta Arautegiak Garatzeko Batzordea hautatzeko.

Hauek dira Estatutuak eta Arautegiak Garatzeko Batzordearen eginkizunak: Estatutuak garatzeko arautegiak prestatzea eta arautegiei buruzko txostenak egitea, bai eta Estatutuetan zehaztutako batzordeek edo Gobernu Kontseiluaren batzorde ordezkariek tramitatu behar ez dituzten arautegi orokorrak ere.