Euskal Herriko Agintaritzaren Aldizkaria

212. zk., 2026ko azaroaren 5a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

AGINTARIAK ETA LANGILEAK

Oposizioak eta lehiaketak

OSAKIDETZA-EUSKAL OSASUN ZERBITZUA

4667

4641/2026 EBAZPENA, urriaren 8koa, Bilbo-Basurtuko Erakunde Sanitario Integratuko zuzendari-gerentearena, zeinaren bidez deialdia egiten baita Estrategiari eta Osasun-emaitzei Laguntzeko Unitateko gainbegirale lanpostu bat izendapen askez hornitzeko Osakidetza-Euskal osasun zerbitzuko Bilbo-Basurtuko Erakunde Sanitario Integratuan.

Bilbo-Basurtuko ESIko Estrategiari eta Osasun-emaitzei Laguntzeko Unitateko gainbegiralearen lanpostua hutsik dago. Hori dela-eta, bat etorriz Euskadiko Antolamendu Sanitarioaren ekainaren 26ko 8/1997 Legearen 28. artikuluaren hirugarren arau komunean, Osakidetza-Euskal osasun zerbitzuko lanpostu funtzionalak arautzen dituen uztailaren 19ko 186/2005 Dekretuan eta azaroaren 11ko 255/1997 Dekretuan xedatutakoarekin, Zuzendaritza Gerentzia honek erabaki du deialdi publikoa iragartzea aipatutako lanpostua izendapen askez hornitzeko, oinarri hauen arabera:

OINARRIAK

Lehenengoa.– Parte hartzeko baldintzak.

Deialdi honetan parte hartu ahal izango dute baldintza hauek betetzen dituztela egiaztatzen dutenek:

a) Estatutupeko, funtzionario edo langile lan-kontratudun finkoa izatea Osakidetza-Euskal osasun zerbitzuko edozein zerbitzu-erakundetan eta lanpostua jabetzan edukitzea B1 lanbide-taldean.

b) B1 lanbide-taldeko titulua edukitzea.

c) Gutxienez 3 urteko lan-esperientzia izatea B1 lanbide-taldean.

d) Uztailaren 19ko 186/2005 Dekretuaren eta Osakidetza-Euskal osasun zerbitzuko Euskara Planaren gainerako betebeharrak betetzea.

Bigarrena.– Deitutako lanpostuak eginkizun hauek ditu:

1.– Estrategia eta kudeaketa-sistema diseinatzea eta hobetzea:

– ESIaren premiak eta kudeaketa-egituraren ondoriozko balio erantsia aztertzea (gaur egungo sistema, indarreko edo balizko ziurtagiriak, eraginkortasunik ezak...).

2.– Proposamenak lantzea eta horiek inplementatzen lidergoa izatea:

– Estrategiaren diseinuan, inplementazioan eta hedapenaren jarraipenean inplikatzea (plan estrategikoa, kudeaketa-plana eta kudeaketa-akordioak).

– Programa-kontratua koordinatzea.

3.– Prozesuen eta zerbitzuen hobekuntzak eta berrikuntza bultzatzea:

– Bottom-up proiektuak koordinatzea eta bultzatzea.

– Lidergoa izatea balioan oinarritutako arretarekin lotutako ekimenak eta hobekuntzak garatzen.

– Lidergoa izatea ebaluazio-, berrikuntza- eta kudeaketa-ereduak inplementatzen, bai eredu sanitarioak (erreferentzia-unitateak, egiaztapenak, etab.), bai ez-sanitarioak.

4.– Gobernu ona, lidergoa eta gardentasuna:

– Lidergoa eta parte-hartzea izatea hobekuntza-taldeetan, batzordeetan eta antzekoetan, bai ESIkoetan, bai Osakidetza-Euskal osasun zerbitzutik kanpokoetan. ESIaren ordezkaritza kanpoko foroetan.

– Gizarte-erantzukizun korporatiboarekin lotutako alderdiak bultzatzea eta babestea: inkestak, harrera hobetzea, lidergoa, interes-taldeekin harremana, iradokizunak kudeatzea...

– Kanpoko aintzatespenak/sariak aurkezten laguntzea.

5.– Informazio-sistemak diseinatzea eta hobetzea:

– Informazio asistentziala ustiatzen laguntzea: aginte-koadroak diseinatzea, adierazleen ustiapena hobetzea, txostenak egitea.

Hirugarrena.– Kontuan hartu beharreko merezimenduak.

– Prestakuntza eta esperientzia izatea lantaldeak kudeatzen eta koordinatzen.

– Asistentzia-arloko kudeaketa-tresnak erabiltzen prestakuntza eta esperientzia izatea (OAS, eOsabide, Osabide-AP, etab.).

– Ofimatikari buruzko ezagutza: Word, Excel, Access, PowerPoint.

– Hizkuntzak jakitea (ingelesa, frantsesa eta/edo alemana).

Lanpostu hau betetzeko interesgarria izan daitekeen eta balioa erants dezakeen edozein merezimendu aurkeztu ahalko da.

Laugarrena.– Euskararen ezagutza.

Osakidetza-Euskal osasun zerbitzuan Euskararen erabilera normalizatzeko martxoaren 18ko 67/2003 Dekretuak eta berau garatzen duten arauek xedatutakoaren arabera egingo da balorazioa.

Bosgarrena.– Eskabideak aurkezteko epea eta modua.

Interesdunek Osakidetza-Euskal osasun zerbitzuko Bilbo-Basurtuko Erakunde Sanitario Integratuko Langileen Zuzendaritzara bidali beharko dituzte eskabideak (Montevideo hiribidea 18, 48013 Bilbao). Horretarako 15 egun balioduneko epea izango dute, ebazpen hau EHAAn argitaratu eta hurrengo egunetik aurrera. Halaber, Administrazio Publikoen Administrazio Prozedura Erkidearen urriaren 1eko 39/2015 Legearen 16.4 artikuluan ezarritako eran aurkeztu ahalko dira eskabideak.

Interesdunek Bilbo-Basurtuko ESIko Langileen Zuzendaritzara bidali beharko dute eskabidea (Montevideo hiribidea 18, 48013 Bilbao), beren datu pertsonal guztiekin eta dokumentatutako curriculum vitaearekin batera.

Dokumentu hauek aurkeztu beharko dira:

– NANaren, pasaportearen edo gidabaimenaren fotokopia konpultsatua.

– Funtzionario edo estatutupeko langile izendapenaren fotokopia konpultsatua edo, hala badagokio, langile lan-kontratudun finkoa dela egiaztatzen duen agiriarena.

– Baldintzak betetzen dituela egiaztatzen duten dokumentu guztien fotokopia konpultsatua.

– Merezimendu baloragarriak egiaztatzen dituzten dokumentu guztien fotokopia konpultsatua.

Osakidetza-Euskal osasun zerbitzuaren Curriculum Vitae aplikazio informatiko korporatiboan behar bezala baliozkotuta dauden alderdiak ez dira ziurtatu behar izango aurreko paragrafoan azaldu den moduan; hala ere, izangaiak horren berri eman beharko du eskabidean.

Seigarrena.– Balorazio Batzordea.

Batzorde bat eratuko da aurkezten diren eskabideak baloratzeko, eta izangaiei horren berri emango zaie.

Batzordeak, eskabideak baloratu ondoren, eginbide osagarriak egitea erabaki ahal izango du. Izangaiei jakinaraziko zaizkie eginbide horiek, eta baliteke elkarrizketa pertsonala egitea egokitzat jotzen diren hautagaiekin.

Izangaien balorazioa egindakoan, eta berau kontuan hartuta, dagokion izendapena egiteko proposamena aurkeztuko da. Lanpostua hutsik uztea proposa dezake epaimahaiak, betiere aurrez txosten arrazoitua eginez, baldin eta izangaiek betetzen ez badituzte bete beharreko baldintzak.

Akta egingo da Batzordea biltzen den bakoitzean. Bertan, aurkeztutako izangaiak eta gauzatutako eginbide osagarriak (halakorik balego) zerrendatuko dira, eta emango dira lanpostua euretako bati esleitzeko edo deialdia hutsik uzteko kontuan hartutako arrazoiak.

Zazpigarrena.– Hautaketa-prozedura.

Ezin izango dira baloratu, inolaz ere, deialdia EHAAn argitaratzen den egunean eskuratu gabe dauden merezimenduak, ez eta eskabideak aurkezteko epea amaitu aurretik behar bezala alegatu eta egiaztatu ez direnak ere.

Zortzigarrena.– Prozedurari amaiera ematen dion ebazpena.

Osakidetza-Euskal osasun zerbitzuko Bilbo-Basurtuko Erakunde Sanitario Integratuko zuzendari-gerentearen ebazpenaren bidez amaituko da honen bidez hasitako prozedura (lanpostua esleitzea edo hutsik uztea), eta Euskal Herriko Agintaritzaren Aldizkarian eta Osakidetza-Euskal osasun zerbitzuaren intranetean zein webgune korporatiboan argitaratuko da.

Ebazpen horrek ondorioak izango ditu EHAAn argitaratzen den egunetik aurrera, bertan besterik xedatu ezean.

Bederatzigarrena.– Ebazpen honen aurkako errekurtsoak.

Ebazpen honen aurka gora jotzeko errekurtsoa aurkeztu ahal izango zaio Osakidetza-Euskal osasun zerbitzuko zuzendari nagusiari. Horretarako, hilabeteko epea izango da, Ebazpena Euskal Herriko Agintaritzaren Aldizkarian argitaratu eta hurrengo egunetik aurrera.

Bilbao, 2026ko urriaren 8a.

Bilbo-Basurtuko ESIko zuzendari-gerentea,

JESÚS MARÍA LARRAÑAGA GARITANO.

Azterketa dokumentala