
211. zk., 2026ko azaroaren 4a, asteazkena
- Bestelako formatuak:
- PDF (299 KB - 31 orri.)
- EPUB (845 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
AGINTARIAK ETA LANGILEAK
Oposizioak eta lehiaketak
HEZKUNTZA SAILA
4644
AGINDUA, 2026ko urriaren 8koa, Hezkuntzako sailburuarena, zeinaren bidez autonomia-erkidego mailako lekualdatze-lehiaketarako deialdia iragartzen baita Hezkuntza Administrazioaren zerbitzura dauden ikuskatzaileen kidegoetako funtzionarioentzat eta Hezkuntzako ikuskatzaileentzat, Euskal Autonomia Erkidegoko Administrazioari atxikitako Hezkuntzako Ikuskatzailetzako lanpostuak betetzeko.
Hezkuntza Saileko Hezkuntzako Ikuskaritzan lanpostu hutsak daude. Hortaz, lekualdatze-lehiaketarako deialdia egitea aurreikusten da, autonomia-erkidego honen berezko kudeaketaren lurralde-eremuan, xedapen hauetan ezarritakoaren arabera: Hezkuntzaren maiatzaren 3ko 2/2006 Lege Organikoaren seigarren xedapen gehigarriaren 4. apartatua, Euskal Herriko Autonomi Elkarteko Unibertsitatekoez kanpoko Irakaskuntzarako Irakasleen Kidegoei buruzko otsailaren 19ko 2/1993 Legearen 23. artikulua eta Unibertsitatez kanpoko irakaskuntzako irakasleen zenbait kidego sortzeko abenduaren 19ko 15/2008 Legearen 5.2 artikulu-zatia.
Era berean, deialdi honen II. eranskineko merezimenduen baremoari dagokionez, kontuan hartu behar da Auzitegi Gorenaren oraintsuko jurisprudentzia, zeinaren arabera ezin baitira desberdin baloratu karrerako funtzionario gisa, langile finko gisa, bitarteko funtzionario edo iraupen jakineko langile gisa eta lan-kontratuko langile gisa egindako zerbitzuak, baldin eta lanpostu berberetakoak badira eta eginkizunak berdinak edo antzekoak badira. Izan ere, bestela EBJAren jurisprudentziaren arabera, diskriminazio-tratua egongo litzateke, zeina Kontseiluaren 1999ko ekainaren 28ko 1999/70/EE Zuzentarauak debekatzen baitu. Zuzentarau horrek iraupen jakineko lanari buruzko Europako Sindikatuen Konfederazioaren (ESK), Europako Erkidegoko Industrien Batasunaren (UNICE) eta Enpresa Publikoen Europako Zentroaren (CEEP) Esparru Akordioa jasotzen du.
Horrenbestez, aipatutako araudian xedatutakoaren babesean eta Hezkuntzako Ikuskatzailetzan lanpostu hutsak daudenez, hau
EBAZTEN DUT:
Artikulu bakarra.– Deialdia.
1.– Autonomia-erkidego mailako lekualdatze-lehiaketarako deialdia egitea Hezkuntza Administrazioaren zerbitzura dauden ikuskatzaileen kidegoetako funtzionarioentzat eta seigarren, zazpigarren eta zortzigarren oinarrietako kasuetan dauden Hezkuntzako ikuskatzaileentzat.
2.– Deialdi hau arautuko duten oinarriak onartzea.
AZKEN XEDAPENETAKO LEHENENGOA.– Ondorioak.
Agindu honek Euskal Herriko Agintaritzaren Aldizkarian argitaratu eta hurrengo egunetik aurrera izango ditu ondorioak.
AZKEN XEDAPENETAKO LEHENENGOA.– Errekurtsoak.
Agindu honen aurka, aukerako berraztertze-errekurtsoa aurkeztu ahal izango zaio Hezkuntzako sailburuari, hilabeteko epean, agindua Euskal Herriko Agintaritzaren Aldizkarian argitaratu eta hurrengo egunetik aurrera; bestela, administrazioarekiko auzi-errekurtsoa jarri ahal izango da Administrazioarekiko Auzien Epaitegian, bi hilabeteko epean, agindu hau Euskal Herriko Agintaritzaren Aldizkarian argitaratu eta hurrengo egunetik aurrera.
Vitoria-Gasteiz, 2026ko urriaren 8a.
Hezkuntzako sailburua,
MARÍA BEGOÑA PEDROSA LOBATO.
OINARRIAK
SUMARIOA
I. KAPITULUA.– Oinarri orokorrak.
II. KAPITULUA.– Eskakizunak eta parte-hartzearen ezaugarriak.
III. KAPITULUA.– Borondatezko parte-hartzea.
IV. KAPITULUA.– Nahitaezko parte-hartzea.
V. KAPITULUA.– Herri edo barruti baterako lehentasun-eskubidea.
VI. KAPITULUA.– Parte hartzeko eskabideak.
VII. KAPITULUA.– Merezimenduen baremoa aplikatzea.
VIII. KAPITULUA.– Prozeduran onartua izateari eta puntuazio-emateari buruzko ebazpenak.
IX. KAPITULUA.– Destinoak esleitzeko ebazpenak eta lanpostuaz jabetzea.
X. KAPITULUA.– Datu pertsonalak.
I. ERANSKINA.– Zentroen zerrenda.
II. ERANSKINA.– Merezimenduen baremoa.
III. ERANSKINA.– 2026-2027ko Lekualdatze-lehiaketan parte hartzeko eskabidea.
IV. ERANSKINA.– Lurralde-kodeak eta hizkuntza-eskakizunak.
OINARRIAK
I. KAPITULUA
OINARRI OROKORRAK
Lehenengoa.– Deialdia.
1.– Autonomia-erkidego mailako lekualdatze-lehiaketarako deialdia iragartzen da Euskal Autonomia Erkidegoko Hezkuntza Administrazioko ikuskatzaileentzat eta Hezkuntza Administrazioaren zerbitzura dauden ikuskatzaileen kidegoetako karrerako funtzionarioentzat. Era berean, kidego horietako praktiketako funtzionarioen autonomia-erkidego mailako lekualdatze-lehiaketarako deialdia egiten da.
2.– Lehiaketa honetan, xedapen hauek bete behar dira:
– Hezkuntzari buruzko maiatzaren 3ko 2/2006 Lege Organikoa.
– Enplegatu Publikoaren Oinarrizko Estatutuaren Legearen testu bategina onartzen duen urriaren 30eko 5/2015 Legegintzako Errege Dekretua.
– Funtzio Publikoa Eraldatzeko Neurriei buruzko abuztuaren 2ko 30/1984 Legea, aipatutako estatutuaren arau bidezko garapena eman arte indarrean jarraitzen duten artikuluetan.
– Euskal Autonomia Erkidegoko unibertsitatez kanpoko irakaskuntzako irakasleen kidegoei buruzko Legearen testu bategina onartzen duen irailaren 21eko 4/2023 Legegintzako Dekretua.
– Abenduaren 11ko 343/2001 Dekretua, Hezkuntzako ikuskatzaile lanpostuetarako hizkuntza-eskakizunak eta eskakizun horien derrigortasuna esleitzeko araubide berezia ezartzen duena.
– Azaroaren 9ko 297/2010 Dekretua, euskararen ezagutza egiaztatzen duten titulu eta ziurtagirien arteko baliokidetzak finkatu eta Hizkuntzen Europako Erreferentzia Esparru Bateratuko mailekin baliokidetzekoa (uztailaren 4ko 187/2017 Dekretuaren eta apirilaren 18ko 65/2023 Dekretuaren bidez aldatua).
– Maiatzaren 15eko 73/2012 Dekretua, atzerriko hizkuntzen titulu eta ziurtagiriei buruzkoa, Euskal Autonomia Erkidegoko unibertsitatez kanpoko irakaskuntzako zentro publiko eta pribatuetan irakasgaiak edo irakats-arloak atzerriko hizkuntzetan emateko hizkuntza-gaitasunaren betekizunak ezartzen dituena (eta 2022ko ekainaren 16ko Agindua, dekretu horren eranskina eguneratzekoa).
– 11/2022 Legea, abenduaren 1ekoa, Euskal Enplegu Publikoari buruzkoa.
– Aplika daitezkeen gainerako xedapenak eta deialdi honetan ebatzitakoa.
Bigarrena.– Eskaintzen diren lanpostuak.
1.– Lehiaketa honetan eskaintzen diren lanpostuak behin-behinean eta behin betiko finkatuko dira Langileen Kudeaketarako zuzendariaren ebazpen baten bidez. Behin-behinean, destinoen behin-behineko esleipenaren ebazpena eman baino lehen finkatuko dira, eta, behin betiko, destinoak behin betiko esleitzeko ebazpena eman baino lehen. Ebazpen horiek argitaratuko dira Euskal Autonomia Erkidegoko Hezkuntza Sailaren http://www.euskadi.eus/eusko-jaurlaritza/hezkuntza-saila/ webgunean eta https://hezigunea.euskadi.eus webgunean
2.– Eskaintzen diren lanpostuen artean sartuko dira 2025eko abenduaren 31n dauden lanpostu hutsak eta lehiaketaren ebazpena ematean geratzen direnak. Gainera, nahitaezko erretiroen ondorioz 2025-2026 ikasturtearen amaierara arte sortzen diren lanpostu hutsak ere sartu ahalko dira. Batzuk zein besteak hezkuntza-plangintzan haien funtzionamenduaren jarraitutasuna aurreikusita dagoenean eskainiko dira, eta zentro berean irakasleen egonkortasunerako ezartzen diren irizpideen arabera.
3.– Hutsik geratzen diren lanpostuen definizioan akatsen bat gertatzen bada edo eskolako plangintzan aurreikusi gabeko jarraitutasuna duen lanposturen bat bada, dagokion aldaketa argitaratuko da.
II. KAPITULUA
ESKAKIZUNAK ETA PARTE-HARTZEAREN EZAUGARRIAK
Hirugarrena.– Eskakizunak.
1.– Deialdi honetan parte hartu ahal izango dute Euskal Autonomia Erkidegoko Hezkuntza Administrazioaren zerbitzura dauden ikuskarien kidegoetako karrerako eta praktiketako funtzionarioek eta Hezkuntzako ikuskatzaileek.
2.– Aurreko 1. apartatuko betekizun horiek eskabideak aurkezteko epea amaitzerako bete beharko dira, eta lanpostua jabetzan hartu arte eutsi beharko zaie.
Laugarrena.– Parte-hartzearen ezaugarriak.
1.– Parte-hartzea nahitaezkoa izango da zazpigarren eta zortzigarren oinarrian jasotako egoeretan.
2.– Parte-hartzea borondatezkoa izango da seigarren oinarrian jasotako egoeretan.
Bosgarrena.– Hizkuntza-eskakizuna.
1.– Hezkuntza Ikuskaritzako lanpostuetan hizkuntza-eskakizunak eta derrigortasunak esleitzeko berariazko araubidea ezartzen duen abenduaren 11ko 343/2001 Dekretuaren arabera, Hezkuntza Ikuskaritzako lanpostu guztiek 2. hizkuntza-eskakizuna dute esleituta, derrigortasun-data igarota. Ondorioz, ezinbestekoa izango da dagokion hizkuntza-eskakizuna egiaztatuta izatea, edo azaroaren 9ko 297/2010 Dekretuak aipatzen dituen hizkuntza-tituluak edo -ziurtagiriak izatea (297/2010 Dekretua, euskararen jakite-maila egiaztatzen duten tituluak eta ziurtagiriak baliokidetzeko eta Hizkuntzen Europako Erreferentzia Marko Bateratuko mailekin parekatzeko dena; apirilaren 18ko 65/2023 Dekretuak aldatu zuen).
2.– Ez da eskakizun, titulu edo akreditazio baliokiderik egiaztatu behar, baldin eta egiaztatzen bada 47/2012 Dekretuaren 2. eta 3. artikuluetan aurreikusitako salbuespenak gertatzen direla, dekretu horretan ezarritako eran –apirilaren 3ko 47/2012 Dekretua, Euskaraz egindako ikasketa ofizialak onartzen eta euskarazko tituluekin eta ziurtagiriekin egiaztatzeko salbuespenak ezartzen dituena–.
III. KAPITULUA
BORONDATEZKO PARTE-HARTZEA
Seigarrena.– Borondatezko parte-hartzea.
1.1.– Deialdi honetan eskaintzen diren lanpostuetan borondatez parte hartu ahal izango dute Eusko Jaurlaritzako Hezkuntza Sailari atxikita dauden karrerako funtzionarioek, baldin eta jarraian adierazten diren egoeretako batean badaude:
a) Zerbitzu aktiboan, Eusko Jaurlaritzako Hezkuntza Sailari atxikitako Hezkuntzako Ikuskatzailetzako lanpostuetan behin betiko destinoarekin, baldin eta, ikasturte honen amaierarako, gutxienez bi urte iragan badira behin betiko azken destinoaz jabetu zirenetik.
b) Aitortutako zerbitzu berezietan, Euskal Autonomia Erkidegoko Hezkuntza Sailari atxikitako Hezkuntzako Ikuskatzailetzako lanpostuetan, baldin eta, ikasturte honen amaierarako, gutxienez bi urte iragan badira behin betiko azken destinoaz jabetu zirenetik.
c) Aitortutako borondatezko eszedentzia mota ezberdinetan, Euskal Autonomia Erkidegoko Hezkuntza Sailari atxikitako Hezkuntzako Ikuskatzailetzako lanpostuetan.
Urriaren 30eko 5/2015 Legegintzako Errege Dekretuaren bidez onartutako Enplegatu Publikoaren Oinarrizko Estatutuaren Legearen Testu Bateginaren 89.1 artikuluko a) eta b) apartatuetan aurreikusitakoaren arabera, norbere edo familiaren interesagatik borondatezko eszedentzian dauden funtzionarioek, ikasturte honen amaierarako, eszedentziara igaro zirenetik bi urte iragan izana ezinbesteko izango dute parte hartu ahal izateko.
d) Aitortutako eginkizun-gabetzean, Euskal Autonomia Erkidegoko Hezkuntza Sailari atxikitako Hezkuntzako Ikuskatzailetzako lanpostuetan, betiere urte honetako ikasturtea amaitzen denean eginkizun-gabetzeko diziplina-zigorraren iraunaldia bukatu bada eta gutxienez urte bi pasatu badira behin betiko azken destinoaz jabetu zirenetik.
IV. KAPITULUA
NAHITAEZKO PARTE-HARTZEA
Zazpigarrena.– Nahitaezko parte-hartzea.
Lehiaketa honetan nahitaez parte hartu behar dute jarraian adierazten diren egoeretako batean dauden funtzionarioek:
a) Euskal Autonomia Erkidegoko Hezkuntza Sailari atxikitako Hezkuntzako Ikuskatzailetzako lanpostuetan 2025-2026 ikasturtean behin-behineko destinoa duten funtzionarioak.
Lehiaketa honetan parte hartzen ez badute, edo, parte hartuta ere, nahikoa lanpostu huts eskatzen ez badute, ofizioz eman ahalko zaie behin betiko destinoa behin-behineko jarduna duten lurralde historikoko Hezkuntzako Ikuskatzailetzako zentroetan, I. eranskinean ikuskatzailetza-zentroak argitaratuta dauden hurrenkerari jarraituz.
b) Eszedentziatik edo destinoko behin betiko lanpostua galtzea eragin dien eginkizun-gabetzetik datozen funtzionarioak, baldin eta, deialdi hau argitaratzen den eguna baino lehen, zerbitzu aktibora itzuli badira eta itzulera hori dela-eta Hezkuntza Sailaren kudeaketa-eremuren batean behin-behineko destinoa lortu badute.
Lehiaketa honetan parte hartzen ez badute, edo, parte hartuta ere, nahikoa lanpostu huts eskatzen ez badute, behin-behineko jarduna izan duten lurralde historikoan dauden zentroetan eman ahalko zaie ofizioz behin betiko destinoa, I. eranskinean ikuskatzailetza-zentroak argitaratuta dauden hurrenkerari jarraituz, edo bestela, destinoa eman zain geratuko dira.
c) Nahitaezko eszedentzian edo destinoko lanpostua galtzea eragin dien eginkizun-gabetze irmoan dauden funtzionarioak, zigorra bete eta gero behin-behinean itzultzerik lortu ez badute, eta egoera hori aitortu bazaie Euskal Autonomia Erkidegoko Hezkuntza Sailari atxikitako zentroren batean.
Lehiaketa honetan parte hartzen ez badute edo, parte hartu arren, behar beste lanpostu eskatzen ez badute eta, hala, behin betiko destinorik lortzen ez badute, borondatezko eszedentzian geldituko dira, Langile Publikoaren Oinarrizko Estatutuari buruzko urriaren 30eko 5/2015 Legegintzako Errege Dekretuaren 89.1.a) artikuluan aurreikusten den moduan.
d) Epaia betetzeagatik edo errekurtsoa ebazteagatik behin betiko destinoa galdu duten funtzionarioak, edo behin betiko betetzen zuten lanpostua desagerrarazi delako galdu dutenak.
Parte hartzen ez badute, ofizioz esleitu ahal izango zaie behin betiko destinoa, behin-behinean zerbitzuak ematen dituzten lurralde historikoaren barruan, galdegiten diren eskakizunak betetzen dituzten lanpostuetan jarduteko, I. eranskinean argitaratutako ikuskaritza-zentroen hurrenkerari jarraituz.
e) Behin betiko lanpostua galduta, beren kidegoan zerbitzu aktiboan mantenduz Administrazioko beste lanpostu batzuk izatera pasa ziren funtzionarioak, baldin hura utzi eta behin-behineko destinoa lortu badute gaur egun Hezkuntza Sailari atxikitako lanpostuetan.
Lehiaketa honetan parte hartzen ez badute, edo, parte hartuta ere, nahikoa lanpostu huts eskatzen ez badute, ofizioz eman ahalko zaie behin betiko destinoa behin-behineko jarduna duten lurralde historikoko Hezkuntzako Ikuskatzailetzako zentroetan, I. eranskinean ikuskaritza-zentroak argitaratuta dauden hurrenkerari jarraituz.
Zortzigarrena.– Praktiketako funtzionarioen parte-hartzea.
1.– Lekualdatze-lehiaketa honetan parte hartu beharko dute praktiketako funtzionario izendatutako pertsonek, halakorik badago, baita deitzen diren hurrengoetan ere, harik eta autonomia-erkidego honetan behin betiko lehen destinoa lortzen duten arte.
2.– Pertsona horien destinoak esleitzeko, praktiketako funtzionario izendatzeko Hezkuntzako sailburuaren aginduan agertzen den hurrenkera-zenbakia bakarrik hartuko da kontutan; beraz, ez dute merezimenduen egiaztagiririk aurkeztu behar.
3.– Eskabidea aurkezten ez dutenei edo, aurkeztu arren, behar adina plaza eskatzen ez dutenei, praktikaldia egiten ari diren lurralde historikoko ikuskaritza-zentroetan esleituko zaie behin betiko destinoa edo, hori ezinezkoa bada, agindu honen I. eranskinean agertzen diren ikuskaritza-zentroetan, eranskin horretako hurrenkeraren arabera.
4.– Zortzigarren oinarri honetan aipatzen diren pertsonak, aurreko apartatuetan ezarritakoaren arabera behin betiko destinoa lortzen ez badute, behin-behineko destinoan geratuko dira 2025-2026 ikasturtean praktikaldia egin duten lurralde historikoan.
5.– Nolanahi ere, dagokien destinoa praktikaldia gainditu izanak eta ikuskatzaileen kidegoetako karrerako funtzionario izendatu izanak baldintzatuta dago.
V. KAPITULUA
HERRI EDO BARRUTI BATERAKO LEHENTASUN-ESKUBIDEA
Bederatzigarrena.– Egoerak eta baldintzak.
Herri edo barruti bateko zentroetan behin betiko destinoa lortzeko lehentasun-eskubidea izango dute jarraian adierazten diren egoeraren batean dauden eta ezarritako baldintzak betetzen dituzten parte-hartzaileek, zerrendan jasota dauden hurrenkeran:
a) Zentro batean betetzen zuten behin betiko lanpostua desagerrarazi edo aldatzen denean, beste behin betiko destino bat lortu arte, lehentasun-eskubidea izango dute lanpostu bat lortzeko plaza edo lanpostua desagerrarazi den herri bereko beste zentro batean edo, hala badagokio, lanpostua desagerrarazi den zentroa dagoen barrutiko beste zentro batean.
b) Administrazio publikoan beste lanpostu bat betetzera pasa direnak, behin betiko betetzen zuten irakasle-lanpostua galduta, baldin eta azken lanpostua utzi badute.
c) Senitartekoak edo seme-alabak zaintzeko borondatezko eszedentzia eskuratu ostean –urriaren 30eko 5/2015 Legegintzako Errege Dekretuaren bidez onartutako Enplegatu Publikoaren Oinarrizko Estatutuaren Legearen testu bateginaren 89.1.c) artikuluan aurreikusia–, betetzen zuten behin betiko lanpostua galdu dutenak aplikatu beharreko araudiak zehaztutako lanpostua gordetzeko aldia amaitzeagatik, eta zerbitzu aktibora itzuli nahi badute edo behin-behinean itzuli badira.
d) Betetzen zuten behin betiko lanpostua galdu dutenak, epaia bete beharra edo administrazio-errekurtsoaren ebazpena bete beharra dela eta.
e) Ezintasun iraunkorraren ondorioz erretiroa aitortuta eduki ondoren, zerbitzu aktiborako birgaitu diren funtzionarioak.
Karrerako bi funtzionario edo gehiago daudenean aurreko apartatuetan adierazitako egoeran, merezimenduen baremoa aplikatzean puntuazio altuena lortzen duenari esleituko zaio lanpostua. Puntuazioaren guztizkoan berdinketarik gertatuz gero, baremoaren apartatu bakoitzeko puntuazio altuenari begiratuz eta apartatuek baremoan duten hurrenkera kontuan hartuz ebatziko da, hurrenez hurren. Hala ere, berdinketak bere horretan jarraitzen badu, azpiapartatuetan lortutako puntuak hartuko dira aintzat, baremoan agertzen diren hurrenkerari jarraituz. Bi kasuotan, apartatu bakoitzean kontuan izango den puntuazioa ezin izango da izan baremoan apartatu bakoitzerako finkatutako puntuaziorik altuena baino handiagoa, ezta, azpiapartatuen kasuan, azpiapartatu horiei dagokien apartatuak daukan puntuaziorik altuena baino handiagoa ere. Irizpide horiek aplikatzean azpiapartatu bat edo gehiago sartuta dauden apartatuaren puntuaziorik altuenera iristen bada, ez dira kontuan izango gainerako azpiapartatuetako puntuazioak. Beharrezkoa bada, berdinketa apurtzeko irizpide gisa erabiliko dira kidegoan sartzeko erabili zen hautazko prozeduraren urtea eta aukeratua izateko lortu zen puntuazioa.
Apartatu honetan adierazitako egoeretan egonda lehentasun-eskubideaz baliatu nahi duten funtzionarioek kidegoan behin betiko destinoa izan zuten azken herri edo barrutirako erabili ahal izango dute.
Herri edo barruti baterako lehentasun-eskubideren batez baliatzen diren parte-hartzaileek hau adierazi beharko dute parte hartzeko eskabidean:
1.– «Herri edo barruti baterako lehentasun-eskubidea baliatuz gero bete beharrekoa» epigrafean, eskubidea erabili nahi den herri edo barrutiaren kodea adierazi behar da, bai eta lehentasun-eskubidea izateko arrazoia ere.
2.– Jarraian, eskubide horretaz baliatzeko espezialitatearen (plaza mota) + hizkuntza-eskakizunaren (bertako hizkuntza) kodea ezarriko da. Lehentasun hori kontuan hartuko da herria, espezialitatea eta hizkuntza-eskakizuna/derrigortasun-data erreserbatzeko.
3.– Zentro jakin bat lortzeko, lehentasun-hurrenkeraren arabera, «Eskatzen diren plazak» idazpuruan, eskubidez dagozkion herriko zentro guztiak adierazi behar dira, eta, barrutiko lehentasun-eskubidea izanez gero, aukeran eskatutako herrietako zentro guztiak, herriak bloke homogeneotan multzokatuta. Herriaren kodea bakarrik adieraziz gero, lanpostuak hutsik dituzten bertako edozein zentrotan emango zaio destinoa. Aitzitik, ez baditu eskatzen eskubidez dagozkion herriko zentro guztiak, edo, barrutiko lehentasun-eskubidea izanda, aukeran eskatutako herrietako zentro guztiak, lanpostu hutsak dituzten herri horietako gainerako zentroetan eman ahal izango zaio destinoa, I. eranskinean jasotako zerrendaren hurrenkeran.
Herri edo barruti bateko lehentasun-eskubideaz baliatuta, herriaren, espezialitatearen eta hizkuntza-eskakizunaren erreserba lortu ostean, lekualdatze-lehiaketan lehentasun-eskubiderik gabe parte hartzen duten gainerakoen arabera lortuko dute destinoa zentro jakin batean, baremoan lortutako puntuazioaren arabera.
VI. KAPITULUA
PARTE HARTZEKO ESKABIDEAK
Hamargarrena.– Eskabideak formalizatzeko epea. Galdegiten diren eskakizunen egiaztagiriak eta merezimenduak alegatzeko orria eta haien egiaztagiriak aurkezteko epea eta tokia.
1.– Eskabideak formalizatzeko eta dokumentuak aurkezteko epea.
2026ko azaroaren 5tik 26ra bitartekoa izango da, biak barne, eskabideak formalizatu eta dokumentuak aurkezteko epea.
Adierazitako epe hori amaitzen denean, ez da onartuko ez eskabiderik, ez egindako eskabideetako aldaketarik, ez aurkeztutako merezimenduei buruzko dokumenturik.
Eskabidea Internet bidez bete behar denez, gomendatzen da behar besteko aurrerapenaz betetzen hastea, eskatzaileari sor dakizkiokeen zailtasunak aurreikusteko.
Parte hartzeko eskakizun guztiak, hargatik eragotzi gabe agindu honetako seigarren oinarrian ezarritakoa, bai eta alegatutako merezimenduak ere, eskabideak aurkezteko epea amaitzen den datan eduki beharko dira eta esleitutako lanpostuaren jabetza hartu arte eutsi beharko zaie.
2.– Dokumentuak aurkezteko tokia:
Betekizunak edo merezimenduak Interneteko helbide honetan aurkeztuko dira: https://hezigunea.euskadi.eus (NAN/AIZ + pasahitza edo XLNets-en erabiltzaileak), edo «Eremu pertsonala – Izapideak langileen sailarekin – Ikuskatzaileen lekualdatze-lehiaketa – onartzeko eskabidea». Baremoa ezartzea nahi duzun apartatu bakoitzari dagokion dokumentazioa aurkeztu beharko duzu, eta, azkenik, «Dokumentazioa entregatzen amaitzea eta erregistratzea» sakatu behar duzu, https://hezigunea.euskadi.eus webgunean. Aplikazio informatikoaren bidez, entregatu izanaren egiaztagiria lortu daiteke, erregistro-datarekin. Apartatuei dokumentuak gehitzen bazaizkie baina prozesua ez bada amaitzen «Amaitu dokumentazioa entregatzea eta erregistratzea» apartatuan klikatuta, dokumentaziorik entregatu ez dela ulertuko da. Nolanahi ere, baldintzak eta merezimenduak entregatzeko aurreikusitako aplikazio informatikoan zehaztuko diren jarraibideak bete beharko dira.
Hamaikagarrena.– Eskabideak.
Lehiakideak eskabide-orri bakarra aurkeztuko du. Elektronikoki betetzeko eskabide hori Interneteko helbide honetan egongo da: https://hezigunea.euskadi.eus
1.– Lekualdatze-lehiaketan parte hartzeko, borondatez (seigarren oinarria) zein nahitaez (zazpigarren eta zortzigarren oinarriak), irakasle-gunean eskuragarri dagoen eskabide elektronikoa bete beharko da. Hara sartzeko, https://hezigunea.euskadi.eus helbidea erabiliko da, eta, ondoren, erabiltzailea eta irakasleen posta elektronikoaren (Hezigunea) pasahitza idatziko dira, edo, hori eduki ezean, NAN-zenbakia eta aipatutako gunera sartzeko pasahitza. Sartzeko pasahitza ahaztuz gero, aipatutako helbidean hori berreskuratzeko bidea aurki daiteke, «Pasahitza ahaztu dut» apartatuan.
Pasahitza sartu ostean, Ikuskatzaileen Lekualdatze-lehiaketak – Onarpen-eskabidea gunera jo behar da.
2.– Eskabidea osorik bete ondoren, sinatu eta eskaneatu egin beharko da, https://hezigunea.euskadi.eus helbidean aurkezteko. Ondoren, merezimendu bat edo batzuk baloratzea nahi baduzu, aipatutako helbidean (https://hezigunea.euskadi.eus) «dokumentuak» izeneko esteka aurkituko duzu.
3.– Lanpostu-eskabideak «Eskatzen diren lanpostuak» idazpuruan adieraziko dira; zentro edo herri jakin baterako egin daitezke, eta bi modalitateak bateragarriak dira. Azken kasu horretan, lanpostu hutsa edo erresulta duen herriko lehen zentroa esleituko da, oinarri hauen I. eranskinean adierazitako hurrenkera berean. Lanpostu-eskabide bakoitza zentroaren edo herriaren, espezialitatearen, bertako hizkuntzaren (hizkuntza-eskakizuna) gehikuntzaren/konbinazioaren emaitza da.
4.– Eskabideak oinarri hauen I. eranskinean ageri diren ikuskatzailetza-zentroetan egin beharko dira.
5.– Edonola ere, parte-hartzaileek eskabideetan adierazitako kodeei dagozkien lanpostuak zehazki eskatu direla hartuko da kontuan. Eskabideetako kodeak ez badira existitzen, osatu gabeak badira edo bat ez badatoz langile parte-hartzaileak eska ditzakeen lanpostuekin, baliogabetu egingo dira. Aurreko arrazoiengatik eskabide guztiak baliogabetuko balira, lehiakidea destinoen esleipenetik baztertuko litzateke, hargatik eragotzi gabe deialdi honetan destinoa ofizioz esleitzeko aurreikusten diren egoerak.
6.– «Adingabearen babesa» izeneko apartatua bete beharko dute eskabidean lehiakideek, delitu hauetakoren batengatik epai irmoaren bidez zigorrik ez dutela jaso egiaztatzeko: sexu-askatasun eta -osotasunaren aurkako delituak –sexu-erasoa eta -abusua, sexu-jazarpena, exhibizionismoa eta sexu-probokazioa, prostituzioa, sexu-esplotazioa eta adingabeak galbidean jartzea– eta gizakien salerosketagatiko delituak. Apartatu hori betetzen duenean, izangaiak adieraziko du ea baimena ematen dion Hezkuntza Sailari, hautatua izanez gero, 1/1996 Lege Organikoaren 13.5 artikuluan adierazitako ziurtagiria eskuratzeko bere izenean. Baimenik ematen ez badio eta esleipenduna bada, Sexu Delitugileen Erregistro Zentralaren ziurtagiri bat aurkeztu beharko du, delitu horiengatik zigorrik jaso ez duela egiaztatzen duena.
Dena den, baimena lehenago eman dutenei ez zaie apartatu hau erakutsiko eskabidean.
Hamabigarrena.– Merezimenduak eta aurkeztu beharreko beste dokumentu batzuk alegatu eta egiaztatzea.
1.– Laugarrren apartatuan jasotako kasuan izan ezik, lehiakideak, merezimenduren bat baloratzea nahi badu, «Merezimenduak alegatzeko eta egiaztatzeko orria» bete eta aurkeztu beharko du, eta, orri horretan, puntuak jaso ditzaketen merezimendu guztiak aipatuko ditu, bakoitzari dagokion II. eranskineko («Merezimenduen baremoa») epigrafe zehatza adierazita. Horrez gain, dagokion epigrafean adierazitako egiaztagiriak erantsiko dizkio orri horri, kasu hauetan izan ezik: epigrafe horrek berariaz adieraztea merezimendua ofizioz zenbatuko dela eta merezimendu hori eskatzaileari dagokion Langileen Erregistroan jasota egotea; ondorio horietarako, eskatzaileak egiaztatu beharko du erregistroan jasota dagoela, hirugarren apartatuan adierazitakoaren arabera. Merezimendua Langileen Erregistroan jasota ez badago, aipatutako orrian alegatu beharko du, eta merezimendu hori egiaztatzeko agiriak aurkeztu beharko ditu. Agiriak eta alegazioak egin eta merezimenduak aurkezteko orria aurkezteko lekua hamargarren oinarrian adierazitakoa da: (https://hezigunea.euskadi.eus).
2.– Argitalpenei dagokienez (4.1 apartatua), jatorrizko alearen ordez, azalaren kopia eta argitalpenaren lehen 10 orrialdeak aurkeztu ahal izango dira, baita ISBNaren eta egilearen datuak agertzen diren orria ere. Beharrezkoa izanez gero, argitalpena geroago eskatuko da.
3.– Langileen Erregistroan dagoen informazioa kontsultatzeko, helbide honetara jo beharko da: https://hezigunea.euskadi.eus (sartu erabiltzailea eta pasahitza) – Espediente pertsonala. Eta, ondoren, honako apartatu hauek kontsultatu ahalko dira:
Zerbitzu-orria.
Tituluak.
Ikastaroak.
Zuzendaritza-karguak.
4.– Praktikak egiten ari diren funtzionarioek ez dute aurkeztu beharko merezimenduak alegatu eta egiaztatzeko dokumenturik.
5.– Gaztelania edo euskara ez den beste hizkuntza batean emandako dokumentuekin batera, dagokion itzulpen ofiziala aurkeztu beharko da Euskal Autonomia Erkidegoko bi hizkuntza ofizialetako batean, dagokion kontsulatuak edo bulego diplomatikoak zinpeko edo baliozkotutako itzultzaile batek egina. Salbuespen izango dira Hizkuntzen Europako Erreferentzia Marko Bateratuko mailak egiaztatzen dituzten hizkuntza-ziurtagiriak eta titularren argitalpenak.
6.– Edonola ere, Administrazioak behar diren azalpen eta dokumentuak eskatu ahal izango dizkie lehiakideei, merezimenduei dagokienez sortutako zalantzak eta erreklamazioak ebazteko.
Eskatzaileak izango dira aurkeztutako dokumentuen egiatasunaren erantzuleak. Dokumenturen bat faltsua bada edo manipulatuta badago, parte-hartzaileak deialdi honetan parte hartzeko eskubidea galduko du, bestelako erantzukizunak alde batera utzi gabe.
7.– Parte-hartzaileek eskubidea izango dute aurkeztu dituzten jatorrizko dokumentuak berreskuratzeko (II. eranskineko 4.1 apartatuan –«Argitalpenak»– baremoa ezartzeko aurkeztutako dokumentuak). Langileak Kudeatzeko Zuzendaritzak zehazten duen lekuan eta epean jaso ahal izango ditu, lekualdatze-lehiaketa amaitu ondoren, baldin parte-hartzaileren batek errekurtsorik aurkezten ez badu; halakorik eginez gero, egiaztapen edo froga gisa atxiki ahal izango dira dokumentuak.
8.– Eskabideak aurkezteko epea amaitzen denean bete beharko dira alegatutako merezimenduak. Ez dira kontuan hartuko eskabidearekin batera aurkeztu beharreko merezimenduak alegatzeko orrian alegatu ez diren merezimenduak, ez eta eskabideak aurkezteko epean agiri bidez egiaztatu ez direnak ere.
9.– Aurkeztutako eskabideak edo dokumentazioak ez baditu betetzen deialdi honetan ezarritako baldintzak, interesdunari eskatuko zaio akatsa zuzentzeko edo nahitaezko agiriak aurkezteko, Administrazio Publikoen Administrazio Prozedura Erkidearen urriaren 1eko 39/2015 Legearen 68. artikuluan xedatutakoaren arabera, eta adieraziko zaio hala egin ezean eskaeran atzera egin duela ulertuko dela.
VII. KAPITULUA
MEREZIMENDUEN BAREMOA APLIKATZEA
Hamahirugarrena.– Merezimenduen baremoa aplikatzeaz arduratuko diren unitate eta organoak.
Lehiakideek adierazi dituzten merezimenduak ebaluatzeko, puntuazioen baremoko 3. eta 4.1 apartatuei dagokienez, baremazio-batzordea izendatuko du Hezkuntza Saileko Langileak Kudeatzeko zuzendariak. Batzorde horietan, kontrako oinarri sendoko arrazoirik ez bada adierazten, gizonek zein emakumeek gutxienez % 40ko ordezkaritza izango dute, Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuaren 21. artikuluan xedatutakoaren arabera.
Honako kide hauek osatuko dute baremazio-batzordea:
Batzordeburua: Hezkuntzako ikuskatzaileen kidegoko edo Hezkuntza Administrazioaren zerbitzura dauden ikuskatzaileen kidegoko funtzionario bat.
Batzordekideak: Hezkuntzako ikuskatzaileen kidegoko edo Hezkuntza Administrazioaren zerbitzura dauden ikuskatzaileen kidegoko 4 funtzionario, jardunean daudenak.
Langileak Kudeatzeko zuzendariak izendatuko du baremazio-batzordeko burua, aurrez zozketaz izendatutako batzordekideen artetik. Era berean, idazkari-lanak egiteko, aurrez zozketaz izendatutako batzordekideen artetik batzordeburuak proposatzen duen pertsona izendatuko du Langileak Kudeatzeko zuzendariak.
Ordezkaritza handiena duten antolakunde sindikalek ordezkari bat izendatu ahal izango dute batzorde bakoitzean, begirale-lanak egiteko.
Baremazio-batzordea izendatzeko irizpide berberei jarraituz izendatu ahal izango dira ordezko batzordekideak. Baremazio-batzordeen funtzionamendua Sektore Publikoaren Araubide Juridikoaren urriaren 1eko 40/2015 Legean ezarritakoari lotuko zaio, eta lege horren 23. eta 24. artikuluetan abstentzioari eta errefusatzeari buruz ezarritako arauak aplikatuko zaizkie batzordekideei.
Langileak Kudeatzeko zuzendariak gaian espezialistak diren bi aholkulari sartu ahalko ditu hala egitea beharrezkoa dela iritzitako batzordeetan.
Otsailaren 2ko 16/1993 Dekretuaren (26ko EHAA) 6. eta 16. artikuluetan xedatzen diren ondorioetarako, ekainaren 13ko 121/2006 Dekretuan (ekainaren 26ko EHAA) –zerbitzuarengatiko ordainketengatik eman behar diren kalte-ordainen zenbatekoak gaurkotzen dituena eta aipatutako 16/1993 Dekretua hirugarrenez aldatzen duena– xedatuaren arabera ordainduko dira bidaia-gastuei dagozkien kalte-ordainak.
Baremazio-batzordearen osaera Euskal Autonomia Erkidegoko Hezkuntza Sailaren webgunean argitaratuko da: http://www.euskadi.eus/eusko-jaurlaritza/hezkuntza-saila eta https://hezigunea.euskadi.eus
Dagokion administrazio-unitateak emango du baremoaren gainerako apartatuetan lehiakideei dagokien puntuazioa.
VIII. KAPITULUA
PROZEDURAN ONARTUA IZATEARI ETA PUNTUAZIO-EMATEARI BURUZKO EBAZPENAK
Hamalaugarrena.– Onartuen, baztertuen eta puntuazioaren behin-behineko ebazpena.
1.– Langileak Kudeatzeko Zuzendaritzan baremazio-batzordeen aktak eta langile-unitateek esleitutako puntuazioa jaso ostean (baremoa ezarri behar dieten merezimenduei dagokienez), ebazpena emango du Langileak Kudeatzeko zuzendariak, eta behin-behinean onetsiko dira onartutako eta baztertutako parte-hartzaileen zerrendak; azken kasu horretan, baztertzeko arrazoia zein den adieraziko du. Gainera, baremoko apartatu bakoitzean onartutako parte-hartzaileei emandako puntuazioa jakinaraziko du.
Ebazpena eta behin-behineko zerrendak interesdunei jakinarazte aldera, sail honen Interneteko helbidean emango dira argitara: https://hezigunea.euskadi.eus
Era berean, aipatutako behin-behineko zerrenda horiekin batera, lehiakide bakoitzak parte-hartzailearen fitxa jasoko du, zeina parte hartzen duten langileen eskura egongo baita Langileak Kudeatzeko zuzendariaren aipatu ebazpenean ezartzen den epean. Han, ikusgai jarriko dira parte-hartzaile bakoitzaren identifikazio-datuak, parte-hartzea, merezimenduak eta eskatutako lanpostuak.
2.– Lehiakideek erreklamazioak aurkeztu ahal izango dituzte behin-behineko ebazpen horren aurka, eta, horretarako, 10 egun balioduneko epea izango dute, adierazitako Interneteko helbidean argitaratzen denetik aurrera.
3.– Epe horretan bertan zuzendu ahal izango dira forma-akatsak dituzten merezimenduak, eta onartuen zerrendekin batera argitaratuko dira. Interesdunak ez baditu zuzentzen, adierazitako epean, kanpoan uztea eragin duen akatsa edo beste akats batzuk, eskaeran atzera egin duela ulertuko da, Administrazio Publikoen Administrazio Prozedura Erkidearen urriaren 1eko 39/2015 Legearen 68. artikuluan xedatutakoaren arabera.
Hamabosgarrena.– Onartuen, baztertuen eta puntuazioaren behin betiko ebazpena.
1.– Aurkeztutako erreklamazioak aztertuta, Langileak Kudeatzeko zuzendariak ebazpena emango du, onartutako eta baztertutako parte-hartzaileen zerrendak behin betiko onesteko; azken kasu horretan, baztertzeko arrazoia zein den adieraziko du. Gainera, baremoko apartatu bakoitzean onartutako parte-hartzaileei emandako puntuazioa ere jakinaraziko du.
2.– Aipatutako behin betiko ebazpen horren aurka, interesdunek gora jotzeko errekurtsoa aurkeztu ahal izango diote sail honetako Administrazio eta Zerbitzuen sailburuordeari, hilabeteko epean, zerrenda Interneten argitaratu eta hurrengo egunetik aurrera. Nahi duten pertsonek gora jotzeko errekurtsoa aurkeztu ahal izango dute aipatutako behin betiko ebazpenean horretarako adierazitako lekuetan edo, halakorik ezean, Tramitagune plataformaren bidez edo Administrazio Publikoen Administrazio Prozedura Erkidearen urriaren 1eko 39/2015 Legean aurreikusitako edozein bide erabiliz.
IX. KAPITULUA
DESTINOAK ESLEITZEKO EBAZPENAK ETA LANPOSTUAZ JABETZEA
Hamaseigarrena.– Destinoak behin-behinean esleitzea.
1.– Eskainitako lanpostu hutsen eta, hala badagokio, erresulten behin-behineko esleipena hurrenkera honen arabera egingo da:
a) Lehenik, bederatzigarren oinarrian zerrendatutako kasuetan, herri edo barruti baterako lehentasun-eskubideari dagozkionak, eta, kasu bakoitzaren barruan, aipatutako baremoa aplikatuz lortutako puntuazio handienak emango du lehentasun-hurrenkera. Eskubide hori baliatzen den herri edo barrutian plaza huts nahikorik ez badago eskatzen duten lehiakide guztientzat, bakoitzaren puntuazioa gorabehera, plaza hutsetako bat bermatuko zaio lehentasunezko eskubidea duen parte-hartzaileari, eta, beraz, parte-hartzaileak lehentasuna izango du destinoa lortzeko puntuazio handiagoa duen parte-hartzaile baten aurretik. Hala eta guztiz ere, zentro jakin bat esleitzeko lehentasun-eskubidea dela-eta herria edo barrutia eta espezialitatea bermatuta, eskubide hori baliatzen duen parte-hartzailea bere kidego eta espezialitate bereko gainerako parte-hartzaileekin lehiatuko da, merezimenduen baremoaren arabera emandako puntuazioari jarraikiz.
b) Bigarrenik, gainerako parte-hartzaileen eskaerak esleituko dira, praktiketako funtzionarioenak izan ezik, eta plazak esleitzeko lehentasun-hurrenkera merezimenduen baremoa aplikatuta lortutako puntuazio handienak emango du.
c) Aipatutako esleipenak egin ondoren, praktiketako funtzionarioei destinoa esleituko zaie, praktiketako funtzionario-izendapenean agertzen diren hurrenkera kontuan hartuta.
2.– Deialdia aurreko lehentasun-hurrenkeran ebatziko da, aurreko apartatuetako bakoitzean parte hartzen dutenen aldeko lanpostu hutsak eta erresultak esleitzeko lehentasunaren arabera. Horrela, ezingo zaio plazarik esleitu horietako batean parte hartzen duen eskatzaile bati, baldin eta aurreko apartatuan eskubide hobea duen eskatzaile bat badago; hori guztia, alde batera utzi gabe lehentasun-eskubidea gauzatzen dutenei plaza zehatz bat esleitzeari dagokiona, deialdi honen bederatzigarren oinarrian ezarritakoaren arabera.
3.– Langileak Kudeatzeko zuzendariaren ebazpen baten bidez, destinoen behin-behineko esleipena onartuko da lortutako puntuazioari eta parte-hartzaileen eskabideen lehentasunei jarraituta, eta ebazpen hori, esleipenaren behin-behineko zerrendekin batera, sail honen https://hezigunea.euskadi.eus webgunean argitaratuko da, interesdunei jakinarazteko.
4.– Puntuazioaren guztizkoan berdinketarik gertatuz gero, baremoaren apartatu bakoitzeko puntuazio altuenari begiratuz eta apartatuek baremoan duten hurrenkera kontuan hartuz ebatziko da, hurrenez hurren.
Hala ere berdinketak jarraitzen badu, azpiapartatuetan lortutako puntuak hartuko dira aintzat, baina, lehen bezala, baremoan agertzen diren hurrenkerari jarraituz.
Bi kasuotan, apartatu bakoitzean kontuan izango den puntuazioa ezin izango da izan baremoan apartatu bakoitzerako finkatutako puntuaziorik altuena baino handiagoa, ezta, azpiapartatuen kasuan, azpiapartatu horiei dagokien apartatuak daukan puntuaziorik altuena baino handiagoa ere. Irizpide horiek aplikatzean azpiapartatu bat edo gehiago dagokien apartatuaren puntuaziorik altuenera iristen badira, ez dira kontuan izango gainerako azpiapartatuetan izandako puntuazioak.
Beharrezkoa balitz, kidegoan sartzeko oposizioak egin zituzten urtea hartuko litzateke kontuan azken irizpide gisa, zaharrena lehenetsiz berrienaren aldean, eta urtearen barruan, prozesuan lortutako puntuaziorik altuena lehenetsiz baxuenaren aldean.
Hamazazpigarrena.– Erreklamazioak eta uko-egiteak.
Lehiakideek behin-behineko esleipena dela-eta erreklamazioak aurkeztu ahalko dituzte 5 egun balioduneko epean, esleipen hori Hezkuntza Sailaren Interneteko helbidean https://hezigunea.euskadi.eus argitaratu eta hurrengo egunetik aurrera. Lehiakide boluntarioek, epe horretan bertan, lekualdatze-lehiaketan parte hartzeari uko egin diezaiokete, eta lehiaketan parte hartzeko eskabidean idatzitako eskaera guztiei eragiten diela ulertuko da.
Genero-indarkeriaren biktima den eta IV. kapituluan nahitaez parte hartu behar duen pertsonari soilik onartuko zaio behin-behinean esleitutako lanpostuari uko egitea. Horretarako, 5 egun balioduneko epe berean, bere izaera egiaztatzen duten agiriak aurkeztu beharko ditu, baita lanpostuaren eta aipatutako neurri judizialen (babes-agindua edo antzekoa) arteko bateraezintasuna egiaztatzen dutenak ere. Kasu horretan, ez da ulertuko lekualdatze-lehiaketari uko egin dionik, eta behin-behinean esleitutako plazari bakarrik egingo dio uko.
Horren ondorioetarako, kontuan izan behar da behin-behineko ebazpenean destinorik ez lortzeak ez duela adierazi nahi behin betiko ebazpenean lortuko ez denik. Era berean, behin-behineko esleipenean destinoa lortu izanak ez du esan nahi behin betiko esleipenean destinoa lortuko denik edo behin-behineko esleipenean lortutako destino berari eutsiko zaionik.
Hemezortzigarrena.– Lanpostu hutsen behin betiko esleipena.
Erreklamazioak aztertuta eta, hala badagokio, aurreko oinarrian aurreikusitako uko-egiteak onartuta, destinoen behin betiko esleipena onartzeko agindua emango du Hezkuntzako sailburuak. Agindu hori Euskal Herriko Agintaritzaren Aldizkarian argitaratuko da, eta, aginduan, lehiaketako destinoen behin betiko zerrendak non eta noiz argitaratuko diren jakinaraziko da.
Destino-esleipena hamaseigarren oinarriko 1. paragrafoan lanpostu hutsak esleitzeko ezarritako ordenaren arabera egingo da, aintzat hartutako eskaeren eta merezimenduen arabera.
Behin betiko esleipenaren aurka interesdunek gora jotzeko errekurtsoa aurkeztu ahal izango diote sail honetako Administrazio eta Zerbitzuen sailburuordeari, hilabeteko epean, zerrenda Hezkuntza Sailaren Interneteko helbidean (https://hezigunea.euskadi.eus) argitaratu eta hurrengo egunetik hasita. Nahi duten pertsonek gora jotzeko errekurtsoa aurkeztu ahal izango dute aipatutako behin betiko ebazpenean horretarako adierazitako lekuetan edo, halakorik ezean, Tramitagune plataformaren bidez edo Administrazio Publikoen Administrazio Prozedura Erkidearen urriaren 1eko 39/2015 Legean aurreikusitako edozein bide erabiliz.
Hemeretzigarrena.– Zerbitzu aktibora itzultzea.
Eszedentzian dauden eta lehiaketaren ondorioz zerbitzu aktibora itzultzen diren ikuskatzaileek dokumentu hauek aurkeztu beharko dituzte dagokien Hezkuntzako lurralde-ordezkaritzan (esleitutako destinoa dagoen lurraldearen arabera):
1.– Eszedentziarako aginduaren kopia.
2.– Irakaskuntzarekin bateraezina den gabezia edo gaixotasun fisiko edo psikikorik ez duela adierazten duen medikuaren ziurtagiri ofiziala.
3.– Zinpeko aitorpena edo hitzematea, non adierazten baita ez dagoela Estatuko, tokiko edo Autonomia Erkidegoko Administrazioaren inongo kidegotatik bereizita eta ez dagoela funtzio publikoetan jarduteko desgaituta diziplina-espediente baten ondorioz.
Hala ere, lehiaketa honetan destinoa lortu duten baina beste irakasleen kidego batean zerbitzu aktiboan daudenek ez dituzte aurkeztu beharko aipatutako dokumentuak.
Nolanahi ere, hurrengo oinarrian adierazitako jabetze-eguna baino lehen aurkeztu beharko dira agiriak.
Hogeigarrena.– Lanpostuaz jabetzea.
2026ko irailaren 1ean hartuko dira jabetzan destino berriak, eta aurreko destinoak 2026ko abuztuaren 31n utziko dira.
Hogeita batgarrena.– Destinoei ezin uko egitea.
Lehiaketaren behin betiko ebazpenean esleitutako destinoei ezin izango zaie uko egin. Genero-indarkeriaren biktima den pertsona batek lekualdatze-lehiaketan nahitaez parte hartuz gero bakarrik uko egin ahal izango zaio esleitutako lanpostuari, baldin eta esleitutako plaza bateraezina bada indarrean dagoen urruntze-aginduan jasotako xedapenekin. Kasu horretan, uko egiteko eskabidearekin batera, bere izaera egiaztatzen duten agiriak aurkeztu beharko ditu, bai eta lanpostuaren eta aipatutako neurri judizialen (babes-agindua edo antzekoa) arteko bateraezintasuna egiaztatzen dutenak ere.
Hogeita bigarrena.– Ordainsariak.
Destinoa lortzen duten eremuari dagozkion ordainketa-arauen arabera jasoko dute beren ordainsaria oinarri hauen babespean araututako deialdiaren bidez beren jatorriaz bestelako kudeaketa-eremu batean behin betiko destinoa lortu duten funtzionarioek.
X. KAPITULUA
DATU PERTSONALAK
Hogeita hirugarrena.– Datuen babesari buruzko oinarrizko informazioa.
Zure datu pertsonalak tratatu eta tratamendu-jarduera honetan sartuko dira: Hautaketa-prozesuak eta lanpostuak betetzea.
– Arduraduna: Langileriaren Kudeaketa Zuzendaritza, Hezkuntza Saila.
– Helburua: Euskal Autonomia Erkidegoko ikastetxe publikoetako irakasleen eta irakasle ez diren langileen estaldura: Enplegu Publikorako Eskaintzak, Lekualdatze Lehiaketa eta Autodesplazamendua Hezkuntza Berezian.
– Legitimazioa:
– Legezko betebehar aplikagarriak betetzeko beharrezko tratamendua.
– Interes publikoaren alde edo tratamenduaren arduradunari emandako botere publikoak gauzatzearen alde egindako misioa betetzeko beharrezko tratamendua.
– Hartzaileak:
– Estatuko Administrazioaren beste organo batzuk.
– Autonomia-erkidegoko beste órgano batzuk.
– Sindikatuak eta pertsona-batzordeak.
– Eskubideak: datuak eskuratzeko, zuzentzeko eta ezabatzeko eskubidea duzu, baita informazio gehigarrian jasotzen diren beste eskubide batzuk ere (www.euskadi.eus/servicios/10842/).
– Informazio gehigarria: datuen babesari buruzko informazio gehigarria eta xehatua gure web-orrian kontsultatu dezakezu: www.euskadi.eus/clausulas-informativas/web01-sedepd/es/transparencia/048000-capa2-eu.shtml
– Araudia:
– Datuak babesteko Erregelamendu Orokorra (https://eur-lex.europa.eu/ES/legal-content/summary/general-data-protection-regulation-gdpr.html).
– 3/2018 Lege Organikoa, abenduaren 5ekoa, Datu Pertsonalak Babestekoa eta Eskubide Digitalak Bermatzekoa (https://www.boe.es/buscar/act.php?id=BOE-A-2018-16673).
RSS