Euskal Herriko Agintaritzaren Aldizkaria

206. zk., 2026ko urriaren 28a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

4537

EBAZPENA, 2026ko irailaren 23koa, Ingurumen Administrazioaren zuzendariarena, zeinaren bidez formulatzen baita Vitoria-Gasteizko Arabako Parke Teknologikoko Plan Partzialaren –ST5 Sektoreko OA2.58 (lehengo 11. sektorea)– 11. aldaketaren ingurumen-txosten estrategikoa.

AURREKARIAK

2026ko uztailaren 3an, Vitoria-Gasteizko Udalak Ingurumen Administrazioaren Zuzendaritzari eskatu zion «Vitoria-Gasteizko Arabako Parke Teknologikoko Plan Partzialaren –ST5 Sektoreko OA2.58 (lehengo 11. sektorea)– 11. aldaketa»ren ingurumen-ebaluazio estrategiko sinplifikatua hasteko. Eskabidearekin batera, hainbat dokumentu aurkeztu zituen; besteak beste, Planaren zirriborroa eta ingurumen-dokumentu estrategikoa, Ingurumen-ebaluazioari buruzko abenduaren 9ko 21/2013 Legeak 16. eta 29. artikuluetan ezarritako edukiarekin.

Euskadiko Ingurumen Administrazioaren abenduaren 9ko 10/2021 Legearen 75. artikulua aplikatuz, 2026ko uztailaren 9an, Eusko Jaurlaritzako Ingurumen Administrazioaren Zuzendaritzak eraginpeko administrazio publikoei eta interesdunei kontsultak egiteko izapidea hasi zuen; emaitza espedientean jasota dago. Era berean, Vitoria-Gasteizko Udalari prozedura hasi zela jakinarazi zitzaion.

Halaber, espedientean jasotako dokumentuak eskuragarri egon ziren Industria, Trantsizio Energetiko eta Jasangarritasunaren Sailaren web-orrian, interesdun orok aukera izan zezan ingurumenaren arloan egokitzat jotzen zituen oharrak egiteko.

Erantzuteko legezko epea amaitu eta espedientean jasotako dokumentazio teknikoa aztertu ondoren, egiaztatu da ingurumen-organoak baduela behar beste judizio-elementu ingurumen-txosten estrategikoa formulatzeko, bat etorriz abenduaren 9ko 10/2021 Legearen 75. artikuluarekin.

ZUZENBIDEKO OINARRIAK

Euskadiko Ingurumen Administrazioaren abenduaren 9ko 10/2021 Legearen 60. artikuluan xedatutakoaren arabera, dagokion ingurumen-ebaluazioko prozeduraren mende jarri beharko dira, nahitaez, ingurumenean efektu nabarmenak izan ditzaketen plan, programa eta proiektuak, bai eta haien aldaketak eta berrikuspenak ere, ingurumen-babes handia bermatzeko eta garapen jasangarria sustatzeko.

Plana abenduaren 9ko 10/2021 Legearen 72.2 artikuluan aurreikusitako kasuen artean dago, zeinetan aurreikusten baita zer planek eta programak behar duten ingurumen-organoak egindako ingurumen-ebaluazio estrategiko sinplifikatua, zehaztu ahal izateko planak edo programak ez duela ingurumen-ondore nabarmenik –ingurumen-txosten estrategikoaren arabera–, edo planak edo programak ingurumen-ebaluazio estrategiko arrunta behar duela, ingurumenean ondore nabarmenak izan ditzakeelako.

Planak ez du esparrurik ezartzen ingurumen-inpaktuaren ebaluazioari lotuta dauden proiektuei baimena emateko. Natura 2000 Sareko espazioei ere ez die eragiten, ezta natura-ondareari eta biodibertsitateari buruzko oinarrizko legeriak edo Euskal Autonomia Erkidegoko natura zaintzeko legeria aplikatuz emandako arau-xedapen orokorrek edo nazioarteko hitzarmenek eragindako ingurumen-babeserako araubideren bat duten espazioei ere.

Ingurumen-ebaluazio estrategiko sinplifikatuaren prozedura 75. artikuluan araututa dago, abenduaren 9ko 10/2021 Legearen II.C eranskinean ezarritako irizpideen arabera.

Planaren dokumentazio teknikoa aztertu ostean, eta kontuan hartuta ingurumen-dokumentu estrategikoa zuzena dela eta betetzen dituela indarrean dagoen araudian aurreikusitako alderdiak, Ingurumen Administrazioaren Zuzendaritzak ingurumen-txosten estrategiko hau ematen du, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren arabera. Txosten horretan, aztertzen da ea Planak ondore nabarmenak izan ditzakeen ala ez ingurumenean, eta, beraz, bete behar duen ala ez ingurumen-ebaluazio estrategiko arruntaren prozedura, edo, bestela, zer baldintza ezarri behar diren Plana garatu eta ingurumena behar bezala babesteko.

Kontuan hartu dira honako hauek: 10/2021 Legea, abenduaren 9koa, Euskadiko Ingurumen Administrazioarena; 21/2013 Legea, abenduaren 9koa, Ingurumen-ebaluazioari buruzkoa; 410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; 40/2015 Legea, urriaren 1ekoa, Sektore Publikoaren Araubide Juridikoarena, eta aplikatzekoa den gainerako araudia. Horiek horrela, honako hau

EBAZTEN DUT:

Lehenengoa.– «Vitoria-Gasteizko Arabako Parke Teknologikoko Plan Partzialaren –ST5 Sektoreko OA2.58 (lehengo 11. sektorea)– 11. aldaketa»ren ingurumen-txosten estrategikoa formulatzea, jarraian zehazten den moduan:

A) Planaren deskribapena: helburuak eta jarduketak.

Parke Teknologikoko Plan Partziala –ST5 Industria Sektoreko OA2.58 (lehengo 11. sektorea)– 1995ean onartu zen behin betiko, eta, ordutik, hamar aldaketa puntual egin zaizkio. Vitoria-Gasteizko 2003ko HAPOren berrikusketaren testu bateginak eremu hori araubide iragankorreko lurzoru urbanizagarri gisa sartu zuen (ST-5), eta haren arautzea indarrean den Plan Partzialarekin eta haren aldaketekin lotu.

Indarrean den Vitoria-Gasteizko HAPOk, 2025eko abenduan onartua behin betiko, esparruari eutsi eta izen hau jarri dio: Parke Teknologikoko ST5 Industria Sektoreko OA2.58 (lehengo 11. sektorea); haren antolamendua baliozkotu du. 11. aldaketa hau 2003ko HAPOra nahiz indarrean den 2025eko HAPOra doitzen da.

Vitoria-Gasteizko Arabako Parke Teknologikoko Plan Partzialaren –ST5 Industria Sektoreko OA2.58 (lehengo 11. sektorea)– 11. aldaketaren jarduketa-eremua Vitoria-Gasteiz hiriaren iparraldean dago, Miñaoko Toki Erakunde Txikitik hurbil. 1.171.864 m²-ko azalera du.

Aldaketaren helburua da PTi-1, PT4 eta PT5 eremuetako lurzati hutsen egitura bertan dauden enpresen beharrei egokitzea, eremuaren eraikuntza-parametro nagusiak aldatu gabe. Halaber, doikuntzak egin dira PT4 eta PT5 eremuen lerrokadura-parametroetan, PT1, PT3, PT5 eta PTi-1 eremuetarako erabilera bereizgarrien, bateragarrien eta debekatuen araubidean, PT3-2 eremuaren gehieneko okupazioan eta aparkaleku-zuzkiduraren erregulazioan, eta horiek murriztu ahal izango dira, aldez aurretik justifikatuta, langile-dentsitate txikiko jardueretan.

Antolamendu-proposamena jarduketa nagusi hauetan aurreikusten da:

– PTi-1 eremua: 10.4.2 lurzatiaren azalera 9.351 m² handitzen da, 15.1.1 lurzatiaren zati bat PT5 eremutik bereiziz. Ondorioz, PTi-1 eremua 69.252 m²-ko azalerarekin gelditzen da, eta PT5 eremua, 154.316 m²-rekin.

– PT4 eremua: 14.3.2 lurzatia, 11.367 m²-koa, lekuz aldatu da 14.4.2-1 eta 14.4.2-2 lurzatiekin mugakide den eremura, berdegune gisa kalifikatua, eta, era berean, 11.367 m²-ko azalera bera aldatu da egun 14.3.2 lurzatia dagoen berdegunera. Kokapen-aldaketa horren helburua da 14.4.2-1 eta 14.4.2-2 lurzatietan kokatutako enpresaren hazkundea eta garapena ahalbidetzea, eta, aldi berean, hirigintza-estandarrak betetzen direla bermatzea, ingurunearen ingurumen-oreka arriskuan jarri gabe; izan ere, 14.3.2 lurzatia, mazelan egoteaz gain, ekoizpen-erabilera zailtzen du, eta zuhaitz finkatuak eta paisaia-balioak ditu, aisialdi- eta ingurumen-erabilerarako espazio egokiagoa bihurtzen duena.

– PT3-2 eremua: 8.2 lurzatiaren gehieneko okupazioa handitzen da, eta % 25etik % 56,03ra igarotzen.

– Lerrokatzeak: PT4 eta PT5 eremuetan eraikuntzaren mugimendu-eremuaren atzeraemangunea murriztea edo ezabatzea baimentzen da, baldin eta jabe mugakideen adostasuna badago.

– Erabileren araubidea: PT1, PT3, PT5 eta PTi-1 eremuetako berezko erabileren, erabilera bateragarrien eta debekatuen zerrenda eguneratzen da.

– Aparkalekua: irabazizko aprobetxamendua duten eremuetan aparkaleku-zuzkidura murrizteko aukera gehitu da, Arabako Teknologi Parkea, S.A.ren aldez aurreko baimenarekin eta jardueraren langile-dentsitate txikiaren justifikazioarekin, plantillari, txandei eta funtzionamendu-araubideari buruzko memoriaren bidez.

Gainera, aldaketak dokumentazio grafikoa, azalera eraikigarriak eta hartatik ateratzen diren lurzatien identifikazioa eguneratzen du, eta Ordenantza Erregulatzaileen testu bategin bat gehitzen, aldaketari, onartutako xehetasun-azterketei eta indarrean den HAPOri egokitzen zaiona.

B) Proposatutako Planaren ezaugarriak aztertu ondoren, eta bat etorriz abenduaren 9ko 10/2021 Legearen 75.3 artikuluarekin, aztertu da zein diren lege horren II.C eranskinean ezarritako irizpideak, erabakitzeko ea Plana ingurumen-ebaluazio estrategiko arruntari lotu behar zaion ala ez.

1.– Planaren ezaugarriak, bereziki alderdi hauek aintzat hartuta:

a) Planak zer neurritan ezartzen duen proiektuetarako esparru bat: kontuan hartuta eraginpeko eremuaren kokapena, ingurumen-ezaugarriak, proposatutako aldaketen garrantzia eta planaren esparruan etorkizunean gauzatuko diren proiektuen tasuna, uste da planak ez daukala berezitasunik eta ez duela ingurumen-ebaluazio estrategiko arrunta behar.

b) Planak zer neurritan eragiten duen beste plan edo programa batzuetan, hierarkizatuta daudenak barne: Planak Parke Teknologikoko Plan Partzialaren –ST5 Industria Sektoreko OA2.58 (lehengo 11. sektorea)– hainbat lurzatiren antolamendu xehatua, lerrokatze eta okupazio parametroak eta erabilera-araubidea doitzen ditu. Planak, bere ezaugarriak kontuan hartuta, ez du ingurumen-efektu nabarmenik izango beste plan edo programa batzuetan. Ez da hauteman bateraezintasunik hierarkian gorago dagoen plangintzarekin.

c) Planaren egokitasuna ingurumen-alderdiak barnean hartzeko eta, bereziki, garapen jasangarria sustatzeko: uste da plana egokia dela garapen jasangarria sustatzeko kontuan hartu behar diren alderdiak barnean hartzeko; hain zuzen ere, energia-aurrezpena eta -efizientzia bultzatzeko neurriak sartu daitezke planean.

d) Planarekin lotutako ingurumen-arazo nabarmenak: ez da hauteman plana gauzatzearen ondoriozko ingurumen-arazo nabarmenik, baldin eta planaren eraginpeko eremuarekin lotutako jarduketak eta jarduerak indarrean dagoen araudia betez gauzatzen badira, arlo hauetan, besteak beste: zarata, lurzoruak, ura, hondakinak eta isurketak, segurtasuna, osasuna eta ingurumena.

e) Halaber, uste da Plana egokia dela Europako nahiz Espainiako ingurumen-arloko legedia ezartzeko.

2.– Ondorioen eta eragina jasan dezakeen eremuaren ezaugarriak:

Jarduketa-eremua Vitoria-Gasteiz hiriaren iparraldean dago, Miñaoko Toki Erakunde Txikitik hurbil, eta 1.171.864 m²-ko azalera du. Eremuan ez da ingurumen-balio garrantzitsurik antzeman. Ez du ukitzen Natura 2000 sareko naturagune babesturik, ez eta inbentarioan sartutako beste gune babesturik edo natura-interesekorik ere. Era berean, ez dator bat EAEko Interes Geologikoko Lekuen Inbentarioan sartuta dauden interes geologikoko puntuekin edo lekuekin, ezta EAEko korridore ekologikoen sareko elementuekin ere.

Hidrologiari dagokionez, eremua Ebroko Demarkazio Hidrografikoko Zadorraren unitate hidrologikoan (UH) sartzen da, eta azterketa-eremutik izenik gabeko bi ibai txiki igarotzen dira: horietako bat Parke Teknologikoaren hegoaldeko mugarekiko paraleloan, eta bestea, ipar-mendebaldeko kanpokoaren iparraldean, ureztatze-putzura isurtzen dena. Hegoaldean, Planaren eremuaren hego-ekialdeko muturrean, beste ureztatze-putzu bat dago. Eremuak ez du barne hartzen Ebroko Plan Hidrologikoko Eremu Babestuen Erregistroko elementurik.

Ikuspegi hidrogeologikotik, eremua Euskal Kantauriar Jabari Hidrogeologikoko Kuartango-Agurain lurpeko ur-masaren gainean dago (ES091MSBT013). Eremuak ez du kointziditzen interes hidrogeologikoko kokalekuekin.

Planaren eremuan, onura publikoko mendi bat dago, 688-Araka-Miñao Gutxia. Alabaina, Planak ez du aurreikusten zonifikazio-aldaketarik eremu horretan.

Eremua urbanizatua dago, eta asfaltozko eta eraikitako azalerak dira nagusi. Okupatu ez diren lurzatietan lorategi-zonak daude, bideen arteko espazioetan bezalaxe. Ingurumen-dokumentu estrategikoaren arabera, eremuak ez du flora-espezie mehatxaturik. Azterketa-eremuan, monolabore intentsiboak dira nagusi, eta, eremuaren hego-ekialdean eta hegoaldean, Mesobromiongo belardi eta larreen mosaiko bat dago, hasiera batean ereindako belardiekin eta beste larre mesofilo batzuekin bazka- eta lugorri-laboreekin; hego-mendebaldean, berriz, erkamezti subatlantikoak daude. Planaren eremuan ez da Batasunaren intereseko habitatik identifikatu, baina ingurunean 4090 BIH, 9240 BIH, 6210* BIH eta 91E0* daude.

Ez Planaren eremuan, ez haren ingurune hurbilean, ez da identifikatu fauna mehatxaturik edo Batasunaren intereseko hegazti nekrofagoak kudeatzeko plan onartuen xede den espezierik. Ingurumen-dokumentu estrategikoaren arabera, azterketa-eremuan dauden fauna-espezieak ingurune antropikoetara atxikita daude.

Planaren eremuaren hego-ekialdean, «San Juan baseliza» balizko arkeologia-gunea dago, eta eremutik kanpo, baina ekialdeko muturretik hurbil, «Uribarri Arakako San Andres herrixka eta tenplua» balizko arkeologia-gunea.

Eremuaren egoera akustikoari dagokionez, aurkeztutako inpaktu akustikoaren azterketaren arabera, gaur egungo egoeran nahiz etorkizuneko egoeran behar bezala betetzen dira Euskal Autonomia Erkidegoko hots-kutsadurari buruzko urriaren 16ko 213/2012 Dekretuan ezarritako kalitate akustikoko helburuak.

Ingurumen-arriskuei dagokienez, Plan Partzialaren eremuan 11 kokaleku daude, lurzorua kutsa dezaketen jarduerak dituzten edo izan dituzten lurzoruekin, guztiak ere industrialak, honako Geoiker kode hauekin: 01059-01524, 01059-01523, 01059-01621, 01059-01803, 01059-01769, 01059-01519, 01059-01522, 01059-01520, 01059-01521, 01059-01525 eta 01059-01662; bat ere ez dago azterketa-eremuan.

Planaren ia eremu osoan akuiferoen kalteberatasuna ertaina da, nahiz eta ekialdeko eta hego-mendebaldeko zerrenda batean handia den, eta hegoaldeko muturreko zati txiki batean txikia.

Sute-arriskuari dagokionez, aztergai den eremuaren hego-ekialdeko eremuak, Planaren eremuaren ekialdetik gertu dagoenak, arrisku handia eta ertaina du, dagoen baso-masa trinkoa dela eta.

Bestalde, eremua uholde-arriskuko eremuetatik kanpo dago, V-VI arrisku sismikoko eremu batean dago, ez dago salgai arriskutsuen garraioari lotutako arriskurik, eta ez dago Sevesori lotutako industria kimikorik eremuan, ezta haren ingurune hurbilean ere.

Aurrekoa kontuan hartuta, Planaren garapenak izan ditzakeen eraginak lotuta daude eraikin berriak eraikitzeko obrekin. Horren ondorioz, lurzorua okupatuko da, hondakinak sortuko dira, lurrak mugituko dira eta soberakinak sortuko dira, makinak batetik bestera mugituko dira, istripuzko isurketek lurzoruei eta jariatze-urei eragiteko arriskua sortuko da, biztanleei eragozpenak eragingo zaizkie isuri atmosferiko eta akustikoengatik, etab.

Ontzat jotzen da Parke Teknologikoaren behar berrietarako lurzoru artifizializatua okupatzea, lurzoruaren erabilera arrazionala egitea baitakar, eraldatu gabeko eremu naturalak urbanizatzea saihestuta.

Eremuan kutsatuta egon daitezkeen lurzoruekin kointziditzeari dagokionez, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legean ezarritakoa bete beharko da.

Kultura-ondareari dagokionez, aldatu beharreko lurzatiek elementu babestuei eragiten ez badiete ere, Euskal Kultura Ondareari buruzko maiatzaren 9ko 6/2019 Legean xedatutakoa bete beharko da, Vitoria-Gasteizko 91. zenbakiko (Uribarri Arakako San Andres) eta 92. zenbakiko (San Juan baseliza) Balizko Arkeologia Guneen (BAG) hurbiltasuna dela eta.

Indarrean dagoen legeria eta, bereziki, kutsatuta egon daitezkeen lurzoruari, kultura-ondareari, urei, zaratari, hondakinei eta isurketei buruzkoak betetzen badira, eraginak txikiak izango dira, eta, oro har, aldi baterakoak, itzulgarriak eta lehengoratzeko modukoak. Indarrean den plangintzarekiko Planak proposatutako aldaketek izan ditzaketen eraginak soilik kontuan hartuta, ez da aurreikusten ingurumenean eragin nabarmenik izango duenik.

Aurretik esana, eremuaren gaur egungo egoera, Planetik eratortzen diren jarduketak, eta, orobat, prebentzio-, babes- eta zuzenketa-neurrien aplikazioa kontuan hartuta, ez da espero jarduketa horiek inpaktu nabarmenik sortuko dutenik ingurumenean.

C) Ebazpen honetan, honako neurri babesle eta zuzentzaile hauek ezartzen dira, Planak ingurumenean ondorio kaltegarri nabarmenik izan ez dezan eta «Vitoria-Gasteizko Arabako Parke Teknologikoko Plan Partzialaren –ST5 sektoreko OA2.58 (lehengo 11. sektorea)– 11. aldaketa»ri ingurumen-ebaluazio estrategiko arrunta egin beharrik izan ez dakion, baldin eta ezarritako neurri babesle eta zuzentzaileak txertatzen badira Planean.

Planak jaso beharko dituen zehaztapenen artean, honako hauek daude:

Kutsatuta egon daitezkeen lurzoruekin lotutako neurriak.

Planaren eremuko zenbait lurzati agertzen direnez lurzorua kutsatu dezaketen jarduerak edo instalazioak dituzten edo izan dituzten lurzoruen inbentarioan, Lurzorua Kutsatzea Saihestu eta Kutsatutakoa Garbitzeko ekainaren 25eko 4/2015 Legeak (ak) eta lege hori garatu duen 209/2019 Dekretuak xedatutakoa bete beharko du Planak. Ildo horretan, ekainaren 25eko 4/2015 Legearen 23. artikuluan jasotako inguruabarretako bat gertatzen bada, eta lege beraren 24. edo 25. artikuluetan araututako salbuespenak aplikatzekoak ez badira, lurzoruaren kalitatea deklaratzeko prozedura abiarazi beharko da; eta, horretarako, aztergai den lurzoruaren kalitatearen ikerketa-emaitzak aurkeztu beharko dira. Prozeduraren amaieran, Eusko Jaurlaritzako Ingurumeneko Sailburuordetzak lurzoruaren kalitateari buruzko adierazpena emango du.

Lurzoruaren kalitateari buruzko ikerketak entitate egiaztatuek gauzatu beharko dituzte, aintzat hartuta Lurzoruaren kalitatea ikertu eta berreskuratzeko erakundeak egiaztatzeko sistema ezartzen duen urriaren 10eko 199/2006 Dekretuan ezarritakoa, eta, ikerketen edukia eta norainokoa kontsultatu ahal izateko, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legea garatzen duen abenduaren 26ko 209/2019 Dekretura joko da.

Aurrekoa gorabehera, obrak egin artean, lurzorua kutsatzen duten substantziak daudela adierazten duten zantzu sendoak agertuz gero, horren berri eman beharko zaie, berehala, Vitoria-Gasteizko Udalari eta Ingurumen Sailburuordetzari, azken horrek zehaztu dezan zer neurri hartu behar diren eta zein pertsona fisikok edo juridikok gauzatu behar dituen neurri horiek, bat etorriz Lurzorua kutsatzea saihesteko eta kutsatutakoa garbitzeko ekainaren 25eko 4/2015 Legearen 22.2 artikuluarekin.

Jabari publiko hidraulikoari eta haren babes-eremuei dagozkion neurriak.

Planaren eremuan ibaien bideak daudenez, kontuan hartu beharko da jabari publiko hidraulikoan edo haren babes-eremuetan egin nahi den jarduketa orok Ebroko Konfederazio Hidrografikoaren obra-baimena beharko duela aldez aurretik, zeina Uraren Euskal Agentzian izapidetuko baita. Baimen horren esparruan, jabari publiko hidraulikoaren babes egokia bermatzeko beharrezkoak diren baldintzatzaileak ezarriko dira.

Jabari publiko hidraulikoari eta haren babes-zortasunaren guneari kalterik eragitea ekidin behar da, betiere kontuan hartuta zer ezartzen den EAEko Ibaiertzak eta Errekaertzak Antolatzeko Lurralde Plan Sektorialean, Uraren ekainaren 23ko 1/2006 Legean eta Jabari Publiko Hidraulikoaren Erregelamenduan (apirilaren 11ko 849/1986 Errege Dekretua).

Halaber, eta Jabari Publiko Hidraulikoaren Erregelamenduaren 6. eta 7. artikuluetan ezarritakoaren arabera, jabari publiko hidraulikoaren bost metroko zortasuna errespetatu beharko da, eta urbanizazioko jarduketa edo elementu orotatik libre geratu beharko da. Babes horretan sartuko da ibilguen ertzetan dagoen landaredia ere.

Kultura-ondareari dagozkion neurriak.

Ingurune hurbilean ondare-elementuak egoteari dagokionez, kontuan hartu behar dira Vitoria-Gasteizko Balizko Arkeologia Guneen (BAG) mugaketak: 91. zk. (Uribarri Arakako San Andres) eta 92. zk. (San Juan baseliza), Eusko Jaurlaritzako Kultura Ondarearen Zentroak ezarritakoak. Hala, BAGen kokapena sartu behar da Plan Partzialaren Aldaketaren planoetan.

Hala badagokio, BAG horiei eragin diezaieketen etorkizuneko esku-hartze, obra eta lur-mugimenduetan, Arabako Foru Aldundiko Museo eta Arkeologia Zerbitzuak obra-proiektuei buruzko txostena egin beharko du.

Gainera, lanak egin bitartean aurkikuntza arkeologikorik eginez gero, berehala jakinarazi beharko zaio Arabako Foru Aldundiko Kultura eta Kirol Sailari (Euskal Kultura Ondareari buruzko 6/2019 Legearen 74. artikulua), txostena egin dezan eta zuzenketa-neurri egokiak eman ditzan, bai lurzati horietan, bai gainerakoetan.

Beste prebentzio- eta zuzenketa-neurri batzuk.

Aurreko neurriak gorabehera, garapen-proiektuak gauzatzean aplikatu beharreko neurriak lotuta egongo dira obrak egiteari, lurrak eta soberakinak kudeatzeari, hondakinak sortu eta kudeatzeari, hondeatutako lurzoruak kontrolatzeari, eta urak, airearen kalitatea eta kalitate akustikoa babesteari buruzko jardunbide egokien eskuliburuari. Besteak beste, neurri hauek erantsi beharko zaizkie Planak azkenean onartzen dituen zehaztapenei:

– Obrako langileek erabili beharreko jardunbide egokien eskuliburua. Gai hauekin lotutako alderdiak bilduko ditu, gutxienez: lanaldiak, makineria, uretara isurketak egitea saihestea, ahalik eta hauts eta zarata gutxien sortzea, herritarren lasaitasunean ahalik eta afekzio negatibo gutxien eragitea, hondakinak kudeatzea eta abar.

– Obrak, bai eta lurzorua okupatzea dakarten eragiketa osagarriak ere, egikaritzeko ezinbestekoa den gutxieneko eremuan egingo dira. Kontratistaren instalazio-eremuak, barne hartuta makineria-parkea, obra-txabolak, obrako materialak aldi baterako biltegiratzeko gunea, landare-lurra eta hondakinak aldi baterako pilatzeko guneak, ingurumenari ahalik eta gutxien eragiteko irizpideei jarraituz proiektatuko dira.

– Hondakinak sortu eta kudeatzea: obretan sortutako hondakinak, hondeaketetatik eratorritakoak barne, kudeatuko dira Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legeak araututakoaren arabera eta aplikatzekoak diren araudi espezifikoek agindutakoaren arabera.

Hondakinak kudeatzeko hierarkia-printzipioei jarraituz, hondakinen sortzea prebenitu behar da, edo, hala badagokio, kudeatu daitezela apirilaren 8ko 7/2022 Legearen 8. artikuluan ezarritako lehentasun-hurrenkeran, hau da: prebentzioa, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa barne.

Hondakinak deuseztatzeko, ezinbestekoa izango da aldez aurretik behar bezala justifikatzea haiek balioztatzea ez dela bideragarria teknikoki, ekonomikoki edo ingurumenaren aldetik.

Hondakin arriskutsuak biltzeko sistemak bereiziak izango dira, baldin eta, duten tipologia dela eta, isurketaren bat gertatuz gero, nahasita, arriskutsuago bihurtu edo kudeaketa zaildu dezaketen kasuetan. Hondakin arriskutsuak dituzten edukiontziek edo ontziek Hondakinak eta lurzoru kutsatuak arautzeko eta ekonomia zirkularra bultzatzeko apirilaren 8ko 7/2022 Legeak 21. artikuluan ezarritako segurtasun-arauak bete beharko dituzte, eta itxita egongo dira harik eta kudeatzaileari entregatu arte, isurita edo lurrunduta edukirik galdu ez dezaten. Aipatutako edukiontziak edo ontziak etiketatu egin beharko dira, argi eta irakurtzeko eta ezin ezabatuzko moduan, indarrean dagoen araudiaren arabera.

Gune espezifiko bat egokituko da hondakin arriskutsuak behin-behinean biltegiratzeko, hala nola olio-potoak, iragazkiak, olioak, pinturak eta abar. Gainera, hondakin geldoak biltzeko edukiontzi espezifikoak gaituko dira hondakin arriskutsuen guneetatik bereizita. Halaber, obran zehar eta lanek dirauten artean, elementu estankoak jarriko dira (bidoiak eta abar) sortutako hondakinak biltzeko. Hondakin horiek motaren arabera bereizi beharko dira, aipatutako garbigunean aldi baterako biltegiratu baino lehen.

Espresuki debekatuta dago sortutako hondakin-tipologia desberdinak elkarren artean edo beste hondakin edo efluente batzuekin nahastea. Halako hondakinak jatorrian bereiziko dira, eta bilketa- eta biltegiratze-bitarteko egokiak prestatuko dira nahasketa horiek ekiditeko.

Erabilitako olioak, baimendutako kudeatzaile bati eman arte, estalpean utziko dira, behar bezala etiketatutako andel estankoetan; zola iragazgaitz baten gainean egon beharko dute, kubo txikietan edo ihesei eta isurketei eusteko sistemen barruan.

Araudia betetzea errazagoa izan dadin, lan bakoitzean sortutako hondakinak kudeatzeko sistemak prestatu beharko dira. Lan horien arduradunek kudeatuko dituzte sistema horiek, eta haien ardura izango da langileek sistema horiek behar bezala erabiltzea. Bereziki, ez da inola ere kontrolik gabeko efluenterik sortuko erregaiak eta produktuak biltegiratzetik, makineria mantentzeko lanak egitetik edo hondakinak erretzetik.

Industrian erabilitako olioen kudeaketa arautu duen ekainaren 2ko 679/2006 Errege Dekretuari jarraituz kudeatuko dira olio erabiliak.

Eraikuntza- eta eraispen-hondakinak Eraikuntza- eta eraispen-hondakinen kudeaketa arautu duen ekainaren 26ko 112/2012 Dekretuak xedatutakoaren arabera kudeatuko dira.

– Halakorik izanez gero, obretan sortutako hondeaketa-soberakinak soberakinen biltegi baimendura eraman eta hauen arabera kudeatuko dira: 646/2020 Errege Dekretua, uztailaren 7koa, Hondakinak zabortegietan utziz deuseztatzeko jarduera arautzen duena; eta 49/2009 Dekretua, otsailaren 24koa, Hondakinak hondakindegietan biltegiratuta eta betelanak eginda ezabatzea arautzen duena.

– Lurzoruak eta lurpeko urak babestea: prebentzio- eta zuzenketa-neurriak ezarriko dira dagokion obra-faserako, istripuz izandako isurketen afekzioa saihesteko, bereziki makinen mantentze-lanetan (material xurgatzaileak erabiltzea, isurketekin kutsatutako lurzoruak kentzea eta kudeatzea, eta abar). Ustekabean ezer isuriz gero, berehala jaso beharko dira lurzoru kutsatua eta material xurgatzailea, eta hondakin arriskutsu gisa biltegiratuko eta kudeatuko dira.

Pilaketa-eremuak, instalazio lagungarriak eta makineria-parkea azalera iragazgaitzetan kokatuko dira. Iragazgaitzak ez diren eremuetan makinen mantentze-lanak egitea saihestuko da. Nolanahi ere, hondakinak –bereziki, olio erabiliak– biltzeko sistema izango duen plataforma iragazgaiztu baten gainean egingo dira obran erabiltzen den makineriari erregaia jartzeko, lubrifikatzaileak aldatzeko eta abarrerako lanak, urak kutsatu ez daitezen.

– Obretako zarata: obra-fasean erabilitako makineriak bete egin behar ditu aire zabalean erabiltzen diren makinen soinu-emisioen inguruan indarrean dagoen legerian ezarritako aginduak, Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan ezarritakoaren arabera (zonifikazio akustikoari, kalitate-helburuei eta emisio akustikoei dagokien errege-dekretua) eta, bereziki, hala badagokio, Aire zabalean erabiltzen diren makina jakin batzuen ondoriozko soinu-emisioak arautzen dituen otsailaren 22ko 212/2002 Errege Dekretuan (apirilaren 28ko 524/2006 Errege Dekretuak aldatua) eta arau osagarrietan ezarritakoa.

Obrek dirauten artean, jardunbide operatibo egokiak aplikatu beharko dira zaratak sorburuan bertan murrizteko –bereziki, hondeaketetan, eraispenetan, zamalanetan eta garraio-lanetan–, bai eta erabilitako makineriaren mantentze-lan orokorra egiteko eta zaratak nahiz bibrazioak sorburuan murrizteko ere.

Eguneko lan-ordutegian egingo dira obrak.

Obrek sei hilabete baino gehiago badiraute, beharrezkoa izango da inpaktu akustikoari buruzko azterlan bat egitea, behar diren zuzenketa-neurriak definitzeko, urriaren 16ko 213/2012 Dekretuaren 35 bis artikuluaren arabera.

– Euskal Kultura Ondareari buruzko maiatzaren 9ko 6/2019 Legean ezarritakoa ezertan eragotzi gabe, obretan aztarna arkeologikoren bat egon daitekeela pentsarazten duen zerbait aurkitzen bada, lanak eten egingo dira badaezpada, eta berehala jakinaraziko zaio Arabako Foru Aldundiko Kultura Departamentuari, hark erabakiko baititu hartu beharreko neurriak.

– Kamioiek obrara sartzeko eta handik irteteko erabiltzen dituzten bideak garbi mantendu beharko dira; horretarako, lehentasunez, erratz-makina mekanikoak erabiliko dira, solido esekiak dituzten jariatze-urak sortzea saihesteko.

– Obrek kaltetutako eremuak leheneratzea: proiektua gauzatzearen ondorioz kaltetutako eremu guztiak leheneratuko dira. Hala badagokio, espazio libreetako landareztatze-lanak ahalik eta lasterren egingo dira; horrela, ekidin egingo dira higadura-prozesuak, solidoak drainatze-sarera arrastatzea eta espezie aloktono inbaditzaileen kolonizazioa.

– Berdeguneak loreztatzeko, «Lorategi eta berdegune jasangarriak diseinatzeko eskuliburua» liburuxkan jasotakoa beteko da (Eusko Jaurlaritzako Ingurumen, Lurralde Plangintza eta Etxebizitza Sailak egindako eskuliburua). Espezie autoktonoak erabiliko dira, eta jasangarritasun-irizpideak lehenetsiko dira espezie inbaditzaileak agertzeko arriskua murrizteko. Landareztatze- eta lorategi-lanetan ez dira inola ere erabiliko inbaditzaileak izan daitezkeen espezie aloktonoak; esaterako, Fallopia japonica, Robinia pseudoacacia eta Cortaderia selloana eta beste batzuk. Leheneratze-lanetan erabilitako landare-lurrak flora inbaditzaileko propagulurik ez duela bermatuko da.

– Eraikuntzaren jasangarritasuna: eraikuntza eta eraikingintza jasangarriagoak egiteko behar diren ezaugarriei dagokienez, eraikuntza jasangarrirako gidetan (https://www.ihobe.eus/argitalpenak) jasotako ingurumen-neurri eta -jardunbide egokiak erabiliko dira, eraikinen aurrezki eta energia-efizientzia eta energia berriztagarrien sustapena bultzatzeko. Neurri horiek alderdi hauetan behintzat eragin beharko dute:

• Materialak. Lehengai ez-berriztagarrien kontsumoa murriztea.

• Energia. Energiaren kontsumoa murriztea edo energia gutxiago sortzea iturri berriztaezinen bidez.

• Edateko ura. Edateko uraren kontsumoa murriztea.

• Ur grisak. Ur gris gutxiago sortzea.

• Atmosfera. Gas-, hauts-, bero- eta argi-emisioak murriztea.

• Barnealdeko kalitatea. Barnealdeko airearen kalitatea, erosotasuna eta osasuna hobetzea.

Hirugarrena.– Ebazpen honen edukia Vitoria-Gasteizko Udalari jakinaraztea.

Laugarrena.– Ebazpen hau Euskal Herr iko Agintaritzaren Aldizkarian argitaratzeko agintzea.

Bosgarrena.– Euskadiko Ingurumen Administrazioaren abenduaren 9ko 10/2021 Legearen 75.5 artikuluan ezarritakoaren arabera, ingurumen-ebaluazio estrategiko honek indarra galduko du eta berezko dituen efektuak sortzeari utziko dio, baldin eta, Euskal Herriko Agintaritzaren Aldizkarian argitaratu eta lau urteko epean, «Vitoria-Gasteizko Arabako Parke Teknologikoko Plan Partzialaren –ST5 sektoreko OA2.58 (lehengo 11. sektorea)– 11. aldaketa» onartzen ez bada. Kasu horretan, berriro abiarazi beharko da Planaren ingurumen-ebaluazioa egiteko prozedura, salbu eta ingurumen-organoari haren indarraldia luzatzea eskatzen bazaio. Hori gertatuz gero, ingurumen-organoak, hala badagokio, ingurumen-txosten estrategikoaren beste indarraldi bat xedatuko du, erregelamenduz zehaztu den moduan.

Vitoria-Gasteiz, 2026ko irailaren 23a.

Ingurumen Administrazioaren zuzendaria,

NICOLAS GARCIA-BORREGUERO URIBE.

Azterketa dokumentala