Euskal Herriko Agintaritzaren Aldizkaria

206. zk., 2026ko urriaren 28a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

4536

EBAZPENA, 2026ko irailaren 22koa, Ingurumen Administrazioaren zuzendariarena, zeinaren bidez formulatzen baita eraikuntzatik eta eraispenetik eratorritako hondakin ez-arriskutsuak jaso, tratatu eta balorizatzeko Altuna y Uria S.A.k Azpeitiko (Gipuzkoa) udal-mugarteko Sistiaga harrobian sustatutako instalazioaren ingurumen-inpaktuaren txostena.

AURREKARIAK

2026ko ekainaren 1ean, Gipuzkoako Lurralde Ordezkaritzako Meatze Atalak Eusko Jaurlaritzako Ingurumen Administrazioaren Zuzendaritzari eskatu zion Azpeitiko udal-mugartean (Gipuzkoa), Altuna y Uria S.A.k sustatuta, eraikuntzatik eta eraispenetik sortutako hondakin ez-arriskutsuak Sistiaga harrobian jaso, tratatu eta balorizatzeko instalaziorako proiektuaren ingurumen-inpaktuaren txostena emateko. Eskaera Euskadiko Ingurumen Administrazioari buruzko abenduaren 9ko 10/2021 Legean xedatutakoaren arabera egin zen, proiektuaren ingurumen-inpaktuaren ebaluazio sinplifikatuaren prozeduraren esparruan (Ingurumen-Ebaluazioari buruzko abenduaren 9ko 21/2013 Legearen 45. artikuluan eta hurrengoetan arautua).

Abenduaren 9ko 10/2021 Legearen 79. artikulua aplikatzeko, 2026ko uztailaren 8an, Eusko Jaurlaritzako Ingurumen Administrazioaren Zuzendaritzak kontsulta-izapidea egin zien eraginpeko administrazio publikoei eta pertsona interesdunei. Jasotako erantzunen emaitzak eta edukia espedientean sartu dira. Era berean, organo substantiboari jakinarazi zitzaion izapidea hasi zela.

Halaber, espedientean jasotako dokumentuak eskuragarri egon ziren Industria, Trantsizio Energetiko eta Jasangarritasunaren Sailaren web-orrian, interesdun orok aukera izan zezan ingurumenaren arloan egokitzat jotzen zituen oharrak egiteko.

Jasotako txostenak aztertuta, egiaztatu da ingurumen-organoak behar beste judizio-elementu dituela ingurumen-inpaktuaren txostena egiteko, Ingurumen-ebaluazioari buruzko abenduaren 9ko 21/2013 Legearen 47. artikuluari jarraikiz.

ZUZENBIDEKO OINARRIAK

Ingurumen-ebaluazioari buruzko abenduaren 9ko 21/2013 Legearen 7. artikuluan xedatutakoaren arabera, ingurumen-inpaktuaren ebaluazio sinplifikatua egingo zaie II. eranskinean adierazitako proiektuei, bai eta I. eta II. eranskinetan ageri ez arren, zuzenean edo zeharka Natura 2000 Sareko guneetan eragina izan dezaketen proiektuei ere.

Ingurumen-ebaluazioari buruzko abenduaren 9ko 21/2013 Legearen II. eranskineko 9. taldeko b) epigrafean xedatutakoa aplikatuz, ingurumen-inpaktuaren ebaluazio sinplifikatua egingo zaie honako hauei: «Hondakinak deuseztatzeko edo balioztatzeko instalazioak, I. eranskinean sartuta ez daudenak, ekoizpenaren lekuan dauden hondakin arriskugabeen deuseztapena eta balioztapena salbu».

Halaber, II. eranskineko 9. taldeko b) epigrafea aplikatuz, Euskal Autonomia Erkidegoko Ingurumen Administrazioaren abenduaren 9ko 10/2021 Legearen ingurumen-inpaktuaren ebaluazio sinplifikatua egingo zaie «hondakinak deuseztatzeko edo balioztatzeko instalazioei, jarduera aire zabalean edo industrialdeetatik kanpo egiten bada».

Proiektuaren ingurumen-inpaktuaren ebaluazio-espedientean dauden dokumentu teknikoak eta txostenak aztertu ondoren, eta ikusita proiektuaren ingurumen-dokumentua zuzena dela eta indarrean dagoen araudian xedatutako alderdietara egokitzen dela, Ingurumen Administrazioaren Zuzendaritzak ingurumen-inpaktuaren txosten hau egin du (organo hori da eskuduna Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren arabera). Bertan aztertzen da ea aipatutako proiektuak ingurumenean efektu nabarmenak izan ditzakeen eta, horren ondorioz, proiektuari ingurumen-inpaktuaren ebaluazio arruntaren prozedura egin behar zaion; hala ez den kasuetan, proiektua garatzean ingurumena egokiro babesteko bete beharreko baldintzak ezartzen dira txostenean.

Xedapen hauek hartu dira kontuan: 10/2021 Legea, abenduaren 9koa, Euskadiko Ingurumen Administrazioarena; 21/2013 Legea, abenduaren 9koa, Ingurumen-ebaluazioari buruzkoa; 410/2024 Dekretua, abenduaren 3koa, Industria, Trantsizio Energetiko eta Jasangarritasun Sailaren egitura organikoa eta funtzionala ezartzen duena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; 40/2015 Legea, urriaren 1ekoa, Sektore Publikoaren Araubide Juridikoarena, eta aplikatzekoa den gainerako araudia. Horrenbestez, honako hau

EBAZTEN DUT:

Lehenengoa.– Eraikuntzatik eta eraispenetik sortutako hondakin ez-arriskutsuak jaso, tratatu eta balorizatzeko Altuna y Uria S.A.k Azpeitiko (Gipuzkoa) udal-mugarteko Sistiaga harrobian sustatutako instalazioaren ingurumen-inpaktuaren txostena formulatzea, baldintza hauetan:

A) Proiektuaren xedea da Azpeitiko Sistiaga harrobiko esparruan hondakin ez-arriskutsuak eta eraikuntzako eta eraispeneko hondakinak (EEH) balorizatzeko jarduera gauzatzea.

B) Ebazpen honen bidez, eraikuntza eta eraispenetik datozen hondakin ez-arriskutsuak Azpeitiko udal-mugarteko Sistiaga harrobian jaso, tratatu eta balorizatzeko instalaziorako (aurrerantzean, proiektua) ingurumen-inpaktuaren txostena egiten da, eta, bertan, proiektuaren ingurumen-dokumentuaren edukia aztertzen da, abenduaren 9ko 21/2013 Legearen III. eranskinean ezarritako irizpideekin bat etorriz:

1.– Proiektuaren ezaugarriak.

Proiektuaren xedea da eraikuntzatik eta eraispenetik datozen hondakin ez-arriskutsuak (EEH garbiak) jaso, tratatu eta balorizatzeko instalazio bat ezartzea Azpeitiko Sistiaga harrobiko lurretan (UE zk.: 4.760), agregakin birziklatuak lortzeko eta hondakin ez-arriskutsuen kudeatzaile gisa konfiguratzeko.

Instalazioak 1.850 m² inguru hartuko ditu meatze-esparruaren barruan, eta meatze-jarduerak eraldatutako eta lurzoru naturalik gabeko azalera batean kokatuko da. Instalazioak 15 metroko atzeraemangunea izango du Sistiaga errekarekiko, eta ez da jarduketarik egingo zerrenda horretan.

Jarduera honetan R0506 balorizazio-eragiketak egingo dira, eraikuntzako eta eraispeneko hondakin ez-arriskutsuetatik abiatuta agregakin birziklatuak ekoizteko, EHZ kode hauekin:

• (170101) Hormigoia.

• (170102) Adreiluak.

• (170103) Teilak eta zeramikazko materialak.

• (170107) Hormigoi, adreilu, teila eta material zeramikoen nahasketak, 17 01 06 kodean zehaztutakoak ez direnak.

• (170302) 17 03 01 kodean zehaztutakoak ez diren nahasketa bituminosoak.

Hondakin onargarriak geldoak izango dira, eta ez dute izango inpropiorik, hala nola plastikoa, egurrak, metalak, igeltsua, hondakin arriskutsuak, etab.

Proiektuaren helburu nagusia da «agregakin birziklatuak» lortzea, Azpeitiko udalerrian eta eskualde mugakideetan sortzen diren eraikuntzako eta eraispeneko hondakinetatik.

Eraikuntzarako lortuko diren eraikuntzako eta eraispeneko hondakinen agregakin birziklatuak kalitate handikoak izango dira. Hiru frakzio lortzen dira, granulometriaren arabera: 0-20 mm, 20-40 mm eta 40-80 mm.

380 t/h-ko ekoizpen-ahalmena aurreikusten da, jatorrian hautatutako 76.000 m³-ko urteko bolumena tratatzeko. Batez besteko dentsitatea 1,3 t/m³-koa da, eta EEHen 100.000 t/urte. Kalkulatzen da % 92 agregakin birziklatu gisa balorizatuko dela, eta gainerako zatia baztertuak eta inpropioak izango direla, zeinak hondakinen arloan indarrean dagoen araudiaren arabera kudeatu beharko baitira.

Ingurumen-ebaluazio hau R0506 eragiketaren bidez eraikuntza- eta eraispen-hondakinak jaso, tratatu eta balorizatzeko jarduerari dagokio soilik. Ondorioz, ez dira ingurumen-txosten honek ebaluatu eta babestutako xedearen parte prozesuan zehar sortutako errefus-materialetarako egin daitezkeen betelanak, meatze-lehengoratzeak edo beste edozein balorizazio-eragiketa; izan ere, horien helmuga egokitu beharko da hondakinen arloan eskumena duen organoaren zehaztapenetara.

Hondakin onartezinak, errefus-materialak, inpropioak eta hauteman daitezkeen hondakin arriskutsuak bertatik atera eta edukiontzi egokietan biltegiratuko dira, ondoren kudeatzaile baimenduari entregatzeko. Ingurumen-inpaktuari buruzko txosten honek ez du babesten edo ebaluatzen errefus-materialen erabilera meatzaritzako betelanetan edo lehengoratze-lanetan.

Agregakin birziklatuak lortzeko proposatutako irtenbide teknikoa EEHak tratatzeko eta balorizatzeko instalazio bat izango da. Instalazioak kontrol hauek izango ditu: kargen onarpena (baskula eta dokumentazioaren erregistroa), aldez aurreko bereizketa (eskuzkoa eta mekanikoa), apurtzea eta birrintzea (ferrikoak bereizita), baheketa, eta azken sailkapena, agregakin birziklatuak, produktu balorizatu gisa, eta errefus- eta inpropio-frakzioak lortzeko.

Tratamendua birrintze- eta bahetze-ekipo mugikor bidez egingo da. Deskarga-zabaltzatik belar-sastrakak kendu ondoren, EEHak pala batekin kargatzen dira apurtze- eta birrintze-ekipoaren toberan, eta, bertan, frakzio finena kentzen da aurrebahegailuan. Arrabolaren irteeran dagoen bereizle magnetikoarekin kentzen dira metalak. Material birrindua, metalik gabe, baheetaraino eramaten da tamaina desberdinetan sailkatzeko.

Instalazioak hartzen duen eremuan egin beharreko prozesuen eta eragiketen arabera, eremu bereiziak mugatzen dira:

A) Sarrera, harrera, bulegoak eta pisatzeko baskula.

B) Deskargatzeko eta biltegiratzeko gunea. EEH garbien aurretiko biltegiratzea.

C) Tratamendu-gunea (aurre-baheketa, apurketa, birrinketa eta sailkapena).

D) Agregakin birziklatuak metatzeko biltegiratze-eremua.

E) Jardueratik sortutako hondakinak aldi baterako biltegiratzeko eremua.

Jarduera ezartzeko obra zibilari dagokionez, lantegia Sistiaga harrobiaren sarreran dago, eta haren instalazioek EEH balorizatzeko lantegi baten funtzionamenduak eskatzen dituen eremuak eta eskakizun teknikoak dituzte; beraz, ez da obra handirik edo funtsezko aldaketarik egin behar.

Instalazioak okupatu beharreko lursailaren gainean plataforma egokitu bat eraikiko da iragazgaiztea bermatzeko (hormigoizko 20 cm-ko lauza), eta drainatze-sare bat ezarriko da jariatze-ura husteko, haren malda kanal perimetraletara doituz, urak harrobiko dekantazio-putzu orokorrera irits daitezen, Sistiaga errekara isuri aurretik.

Harrobiak dagoeneko baditu azpiegiturak, sarbideak, baskula, hautsa kontrolatzeko sistema, drainatze-sarea, baltsak eta aurretiazko ingurumen- eta meatze-baimenak, ingurumen-inpaktuaren adierazpena eta atmosfera kutsa dezaketen jarduerentzako baimena barne.

Sortutako zarata jarduera egiten den bitartean erabiltzen diren makinei lotutakoa da; besteak beste, ibilgailu motordunek eragindakoa. Gainera, materiala kargatzeko eta deskargatzeko lanek ere zarata sor dezakete. Jarduerari lotutako soinu-mailen igoera arina izatea aurreikusten da, funtzionamendu-ordutegia egunekoa izango delako eta badaudelako jarduerarekin zerikusirik ez duten beste zarata-foku batzuk (harrobiaren jarduera), jardueraren berezko zarata ezkutatzen dutenak.

Proiektuaren arabera, EEHak tratatzeko eta balorizatzeko jarduera amaitu ondoren, harrobirako gaur egun indarrean dagoen Leheneratze Plana aplikatuko zaio eremuari. Plan hori 2017ko martxoaren 17an onartu eta baimendu zuen Ingurumen Administrazioaren zuzendariak, zeinak formulatzen baitu Azpeitiko (Gipuzkoa) «Sistiaga» ustiapen-emakidaren (4760 zk.) ustiapen-proiektuaren aldaketaren ingurumen-inpaktuaren adierazpena, eragindako lursailak meatze-jarduerakoak baitira. Leheneratze-proiektu horren arabera, tratamendu-instalazioa ezartzen den eremuan «plataforma eta material-metak soropilez estaliz» leheneratu behar dira.

2.– Proiektuaren kokalekua.

Instalazioa, gutxi gorabehera 1.850 m²-koa, Azpeitiko Sistiaga harrobiaren barruan dago (UE zk.: 4.760). Harrobiaren sarreran kokatuko da, meatze-jarduerak eraldatu duen eta lurzoru naturalik ez duen azalera batean.

Hauek dira eremuaren ingurumen-ezaugarri nagusiak:

– Eremua ez dator bat Natura 2000 Sareko ezein gunerekin, ezta beste ezein naturagune babesturekin ere. Aztertutako eremuak ez du bat egiten korridore ekologikoekin, hezeguneekin edo interes geologikoko lekuekin.

– Eremua Urolako Unitate Hidrologikoan dago, Kantauri Ekialdeko Demarkazio Hidrografikoko «Urola-D» ur-masara isurtzen den arroan. Lursailaren mendebaldean Sistiaga erreka dago. Eremua ez dator bat Kantauri Ekialdeko Plan Hidrologikoko Eremu Babestuen Erregistroko ezein elementurekin.

– Proiektuaren eremua Gatzume-Tolosa lurpeko ur-masaren gainean dago (ES017MSBT017-003). Eremuaren hegoaldea bat dator Albiztur sektorearekin, zeina interes hidrogeologikoko gunetzat hartzen baita. Materialen iragazkortasuna txikia da porositateagatik, eta eremu osoak ez du akuiferoen kutsadurarekiko kalteberatasun nabarmenik.

– Nekazaritza eta Basozaintzako Lurralde Plan Sektorialaren (aurrerantzean, LPS) arabera, eremua bat dator baso-kategoriarekin. Hala ere, harrobiaren jarduerak eraldatutako eremua da gaur egun.

– GeoEuskadiren Eunis (2019) kartografiaren arabera, instalazioaren eremua harrobiek eta aire zabaleko beste erauzketa-leku batzuek osatzen dute. Eremuan ez da hauteman Batasunaren intereseko habitatik.

– Harrobiaren ingurunea eta jarduera eraldatuta daudenez, ingurunean dagoen fauna ingurumen antropizatu horri lotutakoa izango da. Eremuak ez du ukitzen Batasunaren Intereseko Hegazti Nekrofagoak Elikatzeko EAEko Babes Eremurik, ez goi-tentsioko aireko linea elektrikoetako talken eta elektrokuzioen aurkako Abifaunaren Babes Eremurik, ez eta faunarentzako intereseko beste eremurik ere, dagozkien kudeaketa-planetan sartutakorik.

– Azterketa-eremua Azkoitiko ikuseremuan dago, eta balio ertaina du; beraz, ez dago sartuta EAEko Paisaia Berezi eta Bikainen Katalogoan.

– Partzelan ez dago kultura-ondarearen arloko elementurik.

– Gainerako ingurumen-arriskuei dagokienez, eremuak ez du kalteberatasunik uholde-arriskuen, higadura-arriskuen eta sismikotasun-arriskuen aurrean. Lurzatiaren inguruko landarediak baso-sutea izateko arrisku txikia, handia eta oso handia du. Eremua ez dator bat lurzorua kutsa dezaketen jarduerak edo instalazioak izan dituzten edo dituzten lurzoruen inbentarioko ezein lurzatirekin. Era berean, ez du arriskurik salgai arriskutsuen garraioaren ondorioz, ezta inguruan SEVESO enpresak egotearen ondorioz ere.

– Zaratari dagokionez, aurkeztutako dokumentazioaren arabera, instalazioek bete beharko dituzte Euskal Autonomia Erkidegoko hots-kutsadurari buruzko urriaren 16ko 213/2012 Dekretuan emisio-foku berrietarako ezarritako soinu-mugak.

3.– Balizko inpaktuaren ezaugarriak.

Jarduera ezartzeko aurreikusitako obrak irismen mugatukoak dira (funtsean, iragazgaiztutako plataforma bat –hormigoizko 20 cm-ko lauza– eta jariatze-urak kudeatzeko drainatze-sare bat) eta erauzketa-jarduerak jadanik eraldatuta dauden lurretan egingo dira; ondorioz, eraikuntza-faseari lotutako inpaktuak (zarata sortzea, partikulak isurtzea, hondakinak sortzea, lurzorua eta urak kutsatzea, etab.) aldi baterakoak eta txikiak izango dira.

Obra-fasean, inpaktu nagusiak lurzoruaren eta uren balizko kutsadura-gertakariekin lotutakoak izango dira. Nabarmentzekoa da proiektuaren xede den lurzatiaren mendebaldeko mugan Sistiaga erreka dagoela. Proiektuak adierazten duen arren ibilgutik 15 metroko babes-tartea errespetatzen dela, prebentzio-neurriak ezarri beharko dira eraikuntza-aldian ibilgua ez kutsatzeko.

Faunari eta landarediari dagokienez, ingurunea nabarmen antropizatuta dago, eta espezie sentikorrak hartzeko gaitasun txikia du. Jarduerak ez dakar lurzoru berririk okupatzea edo landaredia kentzea, eta, beraz, inpaktua txikia izango da.

Funtzionamendu-fasean, jarduerak berak sortutako inpaktu nagusiak honako hauekin lotutakoak izango dira: zarata, emisio atmosferikoak, isurketak, energia-kontsumoa, hondakinen sorrera, lurzorua eta urak kutsatzeko arriskua eta baliabideen kontsumoa.

Uren kutsadurari dagokionez, adierazi behar da proiektuak aurreikusten duela drainatze-sare bat eraikitzea jariatze-uretarako, dagoen dekantazio-putzuarekin bat egiten duten kanal perimetralen bidez, Sistiaga errekara isuri aurretik.

Emisio atmosferikoei dagokienez, kutsatzaileen emisioak sortzea aurreikusten da prozesuan. Hala, sustatzaileak, emisioak sortzeko prebentzio-neurri gisa, honako hauek proposatzen ditu: gainazalak ureztatzea, ihinztatze- edo lainoztatze-sistemak erabiltzea, ibilgailuen eta makinen abiadura mugatzea, kamioiak olanen bidez estaltzea, metaketen altuera eta kokapena kontrolatzea eta makineriaren eta instalazioen aldizkako mantentzea.

Zaratari dagokionez, proiektuak adierazten du jarduerak ez duela ekarriko inguruneko zarata-mailak nabarmen handitzerik, egungo egoerarekin alderatuta (Sistiaga harrobiaren jarduera). Era berean, proiektuak ondorioztatzen du jarduerak ez dituela gaindituko immisio-mugak hurbileko erabilera sentikorretan. Nolanahi ere, ez da aurkeztu ezarri beharreko jarduerak etorkizunean igorriko dituen zarata-mailen modelizaziorik.

Jarduera lurzorua kutsa dezakeen jarduera gisa hartzen da abenduaren 26ko 209/2019 Dekretuaren arabera, zeinaren bidez garatzen baita Lurzorua kutsatzea saihestu eta kutsatutakoa garbitzeko ekainaren 25eko 4/2015 Legea. Ondorioz, lurzoruaren egoerari buruzko txosten bat aurkeztu behar da, ingurumen-organo eskudunak, hala badagokio, lurzoruari buruzko neurriak jaso ditzan.

Ingurumen-balorazio hau egiteko, proiektuan deskribatutako R0506 balorizazio-jarduera baino ez da kontuan hartzen. Beraz, ez dira ebaluatzen EEHen tratamendutik datozen materialekin egindako betetze- edo leheneratze-eragiketen balizko ondorioak; izan ere, horiek garatzeko, ingurumen-baimenen organo eskudunaren erabakia beharko da.

Eremuaren eta egin nahi den jardueraren ezaugarriak ikusita, eta aintzat hartuta sustatzaileak proposatutako babes- eta zuzenketa-neurriak, ez da aurreikusten proiektuak aipatutako ingurumen-alderdietan inolako eragin negatibo nabarmenik izango duenik.

Bigarrena.– Ebazpen honetan, babes- eta zuzenketa-neurriak eta ingurumen-jarraipeneko kontrolak ezartzen dira, proiektuak ingurumenean ondorio kaltegarri nabarmenik izan ez dezan eta eraikuntzatik eta eraispenetik sortutako hondakin ez-arriskutsuak Sistiaga harrobian jaso, tratatu eta balorizatzeko instalaziori buruz ingurumen-inpaktuaren azterketa arrunta egin beharrik izan ez dadin, baldin eta ezarritako babes- eta zuzenketa-neurriak txertatzen badira.

Babes- eta zuzenketa-neurriak indarreko araudiaren arabera gauzatuko dira, hurrengo ataletan adierazitakoa kontuan hartuta, eta, aurrekoaren aurkakoa ez den orotan, sustatzaileak organo eskudunaren bidez Eusko Jaurlaritzako Ingurumen Administrazioaren Zuzendaritzan aurkeztutako dokumentazioan ezarritakoa aintzat hartuta.

Bestalde, neurriak eta kontrolerako langile kopurua behar adinakoak izango dira ingurumen-dokumentuan finkatutako kalitate-helburuak eta ingurumen-txostenak xedatuko dituenak bermatzeko.

Neurri horiek guztiak obrak kontratatzeko baldintza-agirietan jaso beharko dira, eta baldintza horiek betetzen direla bermatuko duen aurrekontua ere izan beharko dute. Era berean, obretako jardunbide egokiak aplikatuko dira.

Proiektuaren Ingurumen Baimen Bakarraren izapidean zehazten diren neurriak alde batera utzi gabe, neurri hauek ezartzen dira:

Kutsatuta egon daitezkeen lurzoruei buruzko neurriak:

– Hondakin ez-arriskutsuak tratatu eta deuseztatzea. Lurzorua kutsa dezakeen jarduera da, eta, hori dela eta, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legearen 16. artikuluan ezarritakoaren arabera, jardueraren sustatzaileak lurzoruaren egoerari buruzko txosten bat bidali beharko du, jarduera horrek duen funtsezko baimenaren esparruan, ingurumen-organo eskudunak, hala badagokio, lurzoruari buruzko neurriak sartu ahal izan ditzan.

Urak eta lurzoruak babesteko neurriak.

Isurtzeko baimenak ezartzen dituen baldintzak betetzeaz gain, babes- eta zuzenketa-neurri hauek hartuko dira:

– Proiektuan Sistiaga errekaren ohiko ibilguarekiko ezarritako gutxieneko distantziak errespetatuko dira. Zehazki, instalazioak ibilgutik 15 metrora egon beharko du.

– Instalazioan egiten diren jarduera guztiak gauzatzeko orduan, beharrezkoak diren segurtasun-baldintzak bete beharko dira, lurzorua, lurpeko urak eta lurrazaleko urak ez kutsatzeko.

– Hondakin ez-arriskutsuak jaso, biltegiratu eta prozesatzeko eremuek zoladura iragazgaitza izango dute, eta isuriak biltzeko instalazioak izango dituzte estalpean egonez gero, bai eta urak (hondakin ez-arriskutsuekin kontaktua duen euri-urak barne) bildu, drainatu eta tratatzeko instalazioak ere; hidrokarburoak isuri aurretik bereizteko gailua ere izango dute estali gabeko eremuetan.

– Instalazioko hormigoizko zolata baldintza optimoetan eduki beharko da, hausturarik edo lurzorua eta urak kutsatzeko arriskua duen eremurik gabe.

– Instalaziotik eratorritako euri-ur guztiak isurketa motaren araberako arazketa-gailu egokiak dituzten drainatze-sistemen bidez bideratu beharko dira, eta dagozkien kalkulu hidraulikoen arabera dimentsionatuta egongo dira. Sistema horiek bermatuko dute solidoak ezin hobeki atxikitzen direla eta kolektorera isurtzeko baimenean ezarritako parametro fisiko-kimikoak betetzen dituen isurketa lokalizatua egiten dela.

– Uren arazketa-sistemaren mantentze-lanak behar bestetan egingo dira, sistemak ondo funtzionatuko duela bermatzeko. Lan horietan sartzen dira, halaber, lohia kentzea eta, gero, kudeatzaile baimenduari entregatzea.

– Produktu eta hondakin arriskutsuen biltegia zein makinak biltegiratzeko, konpontzeko, zaintzeko eta haietan olio-aldaketak egiteko eremua eta erregaia hornitzeko gunea toki iragazgaiztu estankoetan egon beharko dira, eta balizko jarioetarako babesak izango dituzte, baita indarrean dagoen araudiaren araberako edukiera nahikoa eta baldintza egokiak ere. Berariaz debekatuta egongo da mantentze-lanak eginkizun horietarako ez den beste kokapen batean egitea.

– Hidrokarburoen material xurgatzaile espezifikoa eduki beharko da, ustekabeko isuri edo ihesen bat gertatuz gero berehala aplikatu ahal izateko.

– Ingurumen Dokumentuan jasotako neurriak aplikatuko dira, lurzorua eta urak babesteari dagokionez. Istripuzko isuriren bat gertatuz gero, zuzenekoa zein zeharkakoa, gertakari hori jakinarazi beharko zaio Uraren Euskal Agentziari, eta lurrazaleko eta lurpeko urei ahalik eta gutxien eragiteko hartutako neurrien berri ere emango zaio.

– Ingurumen Baimen Bakarra izapidetzean, erakunde eskudunaren nahitaezko txosten loteslea lortu beharko da. Txosten horretan, isurketaren ezaugarriak eta hartu beharreko neurri zuzentzaileak zehaztuko dira.

– JPHan edo JPHaren babes-eremuen barruan (zortasuna eta zaintza) egiten diren jarduketa guztiek Uraren Euskal Agentziaren nahitaezko baimena eskuratu beharko dute aldez aurretik. Nahitaezko baimen horretan ezarriko dira dagozkion baldintzak.

– Aurkeztutako dokumentazioan, aurreikusitako ur-kontsumoari dagokionez, ez da zehazten jarduera berriak baliabide hidrikoen eskaria handitzea dakarren, ezta haien jatorria ere. Horri dagokionez, jakinarazten da ezen, ur-aprobetxamendu bat egin nahi badu, sustatzaileak administrazio-emakida bat eskatu beharko diola arroko erakundeari.

Airearen kutsadura minimizatzeko neurriak.

Sustatzaileak proposatutako eraikuntza- eta eraisketa-hondakinak balorizatzeko jardueraren berri eman beharko dio Eusko Jaurlaritzako Ingurumen Administrazioaren Zuzendaritzako Aire Zerbitzuari (horretarako gaitutako bitartekoen bidez), zuzendaritza horrek atmosfera kutsa dezaketen jarduerak (AKDJ) garatzeko baimenari dagozkion oharrak egin ditzan.

Hondakin arriskugabeak kudeatzeko jarduerak honako hauek bete behar ditu: Atmosfera kutsa dezaketen jardueren katalogoa eguneratzen duen eta hura ezartzeko oinarrizko xedapenak finkatzen dituen urtarrilaren 28ko 100/2011 Errege Dekretuan ezarritakoa eta Atmosfera kutsa dezaketen jardueretarako instalazioak arautzen dituen abenduaren 27ko 278/2011 Dekretuan zehazten diren betebeharrak.

AKDJ baimenean ezarritako baldintzak betetzeari kalterik egin gabe, kutsatzaileak aireratzea minimizatu beharko dira, bai konfinatuak, bai lausoak, ahal den neurrian teknika erabilgarri onenak aplikatuz. Bereziki, hauts-itxurako materialaren zamalanetan, garraioan eta pilatze-lanetan sortutako emisio lausoak ahalik eta gehien murrizteko neurriak aplikatuko dira. Horretarako, neurri hauek hartuko dira aintzat:

– Emisioak biltzeko sistemak behar bezala mantenduko dira, eta instalazioa garbi eduki beharko da (sarbideak, igarobideak eta kamioien zamalanetarako guneak). Ibilgailuen eta makinen bideak eta zirkulazio-eremuak garbituko dira, eta ibilgailuen abiadura mugatuta egongo da.

– Zamalanak ahalik eta gutxien egingo dira, eta horiek egiteko orduan, ahalik eta hauts gutxien sortuz jardungo da; besteak beste, materiala deskargatzean, hura erortzen den altuera gutxituz.

– Bestetik, materiala garraiatuko duten kamioiak olanekin edo hautsa harrotzea saihesten duten bestelako elementuekin estali beharko dira.

– Klima-baldintza txarretan (haize bolada handiak, euriteak eta abar), ez dira hauts-itxurako materiala manipulatzeko jarduerak gauzatuko aire zabalean.

– Pilaketa-eremua hezetzeko eta kamioiak igarotzen diren eremuak ureztatzeko sistemak izango dira.

– Lantegiko instalazioen plangintzak, ikuskapenak eta mantentze-lanak egin beharko dira aldian behin, arestian deskribatu diren prebentzio-neurri horien betetze-maila egiaztatzeko.

Zaraten eta bibrazioen ondorioak minimizatzera zuzendutako neurriak.

– Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan zonakatze akustiko, kalitate-helburu eta emisio akustikoei dagokienez aurreikusitakoaren arabera, aire zabaleko jarduera orokorretan erabiliko diren makinak egokitu egin beharko dira kanpoan erabiltzeko makinen soinu-emisioei buruz indarrean dagoen araudian ezarritako aginduetara, eta, bereziki, eta hala badagokie, Kanpoan erabiltzeko makinek ingurumenean sortzen dituzten soinu-emisioak arautzen dituen otsailaren 22ko 212/2002 Errege Dekretuak eta arau osagarriek ezarritakora.

Jardunbide egoki operatiboak aplikatu beharko dira sorburuan zaratak murrizteko, bereziki materialak biltegiratzean, eta horien zamalanetan eta garraioan, baita erabilitako makineriaren mantentze-lanetan ere, eta zaratak eta bibrazioak jatorrian murriztean.

– Jarduera garatzean, eraginpeko eremuan ez dira gaindituko, obrek sortutako zarataren ondorioz, kalitate akustikoko helburuak, urriaren 16ko 213/2012 Dekretuan (Euskal Autonomia Erkidegoko Hots Kutsadurari buruzkoa) ezarriak.

– Jarduerak, betiere, zarata-foku berriei aplikatu beharreko muga-balioak bete beharko ditu, Euskal Autonomia Erkidegoko Hots Kutsadurari buruzko Dekretuaren (urriaren 16ko 213/2012) 51. artikuluari eta aplikatzekoak diren gainerako arauei jarraituz.

Hondakinak kudeatzeko neurriak.

– Sortutako hondakin guztiak Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legean eta aplikatzekoak diren araudi espezifikoetan xedatutakoaren arabera kudeatuko dira, eta, kasuan-kasuan, bereizi egin beharko dira hondakin mota eta helmugarik egokiena zehazteko.

– Hondakinak kudeatzeko hierarkia-printzipioei jarraituz, hondakinak sortzea prebenitu behar da, edo, hala badagokio, apirilaren 8ko 7/2022 Legearen 8. artikuluan ezarritako lehentasun-hurrenkerari jarraituz kudeatu behar dira, hau da: prebenitzea, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa eta deuseztapena barne.

– Hondakinak deuseztatzeko, ezinbestekoa izango da aldez aurretik behar bezala justifikatzea ez dela bideragarria haiek balorizatzea teknikoki, ekonomikoki edo ingurumenaren aldetik.

– Berariaz debekatuta dago sortzen diren tipologia bakoitzeko hondakinak elkarrekin edo beste hondakin edota efluente batzuekin nahastea. Hondakinak jatorritik bertatik bereiziko dira, eta horiek biltzeko eta biltegiratzeko baliabide egokiak jarriko dira, hala nahastea ekiditeko, nola, obran edo instalazioan bertan ez badira berrerabiliko, kudeatzaile baimendu bati entregatzeko.

– Zabortegira bidali beharreko hondakinak sortuz gero, hauen arabera kudeatuko dira: 646/2020 Errege Dekretua, uztailaren 7koa, Hondakinak zabortegietan utziz ezabatzeko jarduera arautzen duena, eta 49/2009 Dekretua, otsailaren 24koa, Hondakinak hondakindegietan biltegiratuta eta betelanak eginda ezabatzea arautzen duena.

– Hondakin arriskutsuak biltzeko sistemak bereiziak izango dira, duten tipologia dela eta, isurketaren bat gertatuz gero, nahasita, arriskutsuago bihurtu edo kudeaketa zaildu dezaketen kasuetan. Halaber, Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen 21. artikuluan ezarritako segurtasun-arauak bete beharko dituzte, eta itxita egon beharko dute kudeatzaileari eman arte, isurita edo lurrunduta gal ez daitezen.

– Sortutako olio erabilia Industriako olio erabiliaren kudeaketa arautzen duen ekainaren 2ko 679/2006 Errege Dekretuaren arabera kudeatuko da. Olio erabiliak, kudeatzaile baimendu bati eman arte, estalpean utziko dira behar bezala etiketatutako depositu estankoetan; zolata iragazgaitz baten gainean egon beharko dute, kubo txikietan edo ihesei eta isuriei eusteko sistemen barruan.

– Eraikuntza- eta eraispen-hondakinak tratatzean sortutako errefus-materialak kudeatzaile baimendu baten bidez edo hondakinen arloko organo eskudunak berariaz baimendutako beste edozein kudeaketa-bide erabiliz kudeatu beharko dira.

Jarduera uztea.

– Behin instalazioaren bizitza baliagarria amaituta, oro har kutsadura sor dezaketen elementu guztiak desmuntatu eta erretiratu beharko dira, eta dagokion kudeatzaile baimenduari emango zaizkio, kasuan kasuko tratamendu egokia egin dezan, indarrean dagoen legediaren arabera.

– Era berean, jarduera bertan behera utzi ondoren, titularrak ebaluatuko du lurzorua nola dagoen eta instalazioak erabilitako, ekoitzitako edo zabaldutako substantzia arriskutsu esanguratsuek lurpeko uretan zer-nolako kutsadura eragin duten, eta, halaber, organo honi emango dio ebaluazio horren emaitzen berri. Ebaluazioak erakusten badu instalazioak lurzoruaren edo lurpeko uren kutsadura nabarmena eragin duela, betiere lurzoruaren kalitatea adierazteko izapidean lurzoruaren kalitatea ikertzeko idatzi diren txostenetan ezarritako egoerarekin alderatuta, titularrak neurri egokiak hartuko ditu kutsadura horri aurre egiteko eta instalazioa lehengo egoerara ekartzeko, Ingurumen-erantzukizunari buruzko urriaren 23ko 26/2007 Legearen II. eranskineko arauei jarraikiz. Halaber, jarduera utzi ondoren, garbiketa-kanpaina sakona egin beharko da, obra-hondarrak kenduz eta, beharrezkoa bada, aldi baterako instalazio guztiak desmuntatuz.

Hirugarrena.– Zehaztu behar da ez dela uste izatekoa proiektua gauzatuta kalte handirik egingo zaionik ingurumenari, lehenengo puntuan ezarritakoaren arabera, baldin eta ezartzen badira ebazpen honetan jasotako babes- eta zuzenketa-neurriak eta kontrolak, baita sustatzaileak proposatutakoak ere –aipatutako horien aurkakoak ez badira–. Beraz, ez da beharrezkotzat jotzen Azpeitiko udal-mugartean (Gipuzkoa) eraikuntzan eta eraispenean sortutako hondakin ez-arriskutsuak Sistiaga harrobian jaso, tratatu eta balorizatzeko Altuna y Uria S.A.k sustatu duen instalazioari ingurumen-inpaktuaren ebaluazio arrunta egitea.

Laugarrena.– Ebazpen honen edukia jakinaraztea Gipuzkoako Lurralde Ordezkaritzako Meatze Atalari.

Bosgarrena.– Ebazpen hau Euskal Herriko Agintaritzaren Aldizkarian argitaratzeko agintzea.

Seigarrena.– Euskadiko Ingurumen Administrazioaren abenduaren 9ko 10/2021 Legearen 79.5 artikuluak ezarritakoaren arabera, aipatutako proiektua gauzatzen ez bada Euskal Herriko Agintaritzaren Aldizkarian argitaratu eta lau urteko gehieneko epean, ingurumen-inpaktuaren txosten honek indarra galduko du, eta berezko dituen ondoreak sortzeari utziko dio. Halako kasuetan, sustatzaileak berriro hasi beharko du proiektuaren ingurumen-inpaktuaren ebaluazio sinplifikatuaren prozedura.

Vitoria-Gasteiz, 2026ko irailaren 22a.

Ingurumen Administrazioaren zuzendaria,

NICOLAS GARCIA-BORREGUERO URIBE.

Azterketa dokumentala