RSS
198. zk., 2026ko urriaren 16a, ostirala
- Bestelako formatuak:
- PDF (142 KB - 4 orri.)
- EPUB (117 KB)
- Testu elebiduna
Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da
BESTELAKO XEDAPENAK
JUSTIZIA ETA GIZA ESKUBIDEEN SAILA
4337
155/2026 DEKRETUA, irailaren 29koa, Barakaldoko barruti judizialeko Bulego Judizialari eta Bake-Epaitegiei dagozkien Justizia Administrazioaren zerbitzuko langileen lanpostu-zerrendak onartzeko dekretuak partzialki indargabetzekoa.
Urtarrilaren 2ko 1/2025 Lege Organikoak, Justiziaren Zerbitzu Publikoaren efizientziarako neurriei buruzkoak, aldatzen du I. tituluan uztailaren 1eko 6/1985 Lege Organikoa, Justizia Administrazioaren antolamendua berritzekoa.
Lege organikoak dakartzan aldaketek ondorioak dituzte zenbait esparrutan. Hala, aldaketa horietako batek ondorioak ditu, alde batetik, lehen auzialdi judizialaren konfigurazioan, auzialdiko auzitegiak sortzearekin pertsona bakarreko epaitegien eredutik kide anitzeko antolakuntza batera igarotzen baita; eragina du, bestetik, bai bake-epaitegietan, udalerriko justizia-bulego bihurtzen baitira, bai bake-epaitegietako idazkaritzen elkarteetan, udalerrietako justizia-bulegoen elkarte bihurtuta.
Bestalde, apirilaren 28ko 6/2021 Lege Organikoak ere –Erregistro Zibilaren uztailaren 21eko 20/2011 Legea aldatzen duen apirilaren 28ko 6/2021 Legearen osagarria, zeinaren bidez aldatzen baita Botere Judizialaren uztailaren 1eko 6/1985 Lege Organikoa– aldaketa ekarri zuen, zeren, haren bitartez, Erregistro Zibilaren Bulegoa, bulego judizialean integratu gabeko unitate bat, Justizia Administrazioak zerbitzu publiko hori Erregistro Zibilaren Legeak eta Erregistro Zibilaren Erregelamenduak agindu eran emateko baliatzen duen antolaera-eremua bihurtzen baita, funtzionalki Justizia Ministerioari lotua Segurtasun Juridikoaren eta Fede Publikoaren Zuzendaritza Nagusiaren bidez.
Urtarrilaren 2ko 1/2025 Lege Organikoaren lehen xedapen iragankorrean hala xedaturik, auzialdiko auzitegiak modu mailakatuan eratuko dira.
Seigarren xedapen iragankorrean, urtarrilaren 2ko 1/2025 Lege Organiko berak ezartzen du ezen bake-epaitegiak udalerriko justizia-bulego bihurtuko direla kasuan kasuko auzialdiko auzitegiaren eraketarako aurreikusia dagoen datan, eta data berean bihurtuko direla bake-epaitegietako idazkaritzen elkarteak udalerriko justizia-bulegoen elkarte.
Euskal Autonomia Erkidegoaren esparruan, bi aurreikuspen horiek eragin zuzena dute, besteak beste, Barakaldoko barruti judizialetako bulego judizialean, bake-epaitegietan eta bake-epaitegietako idazkaritzen elkarteetan.
Haren 436. artikuluari egindako berridazketarekin, uztailaren 1eko 6/1985 Lege Organikoak ezartzen du bulego judizialaren jarduera, lege prozesalen aplikazioak definitua, zerbitzu komunen bidez gauzatuko dela. Zerbitzu horiek barnean hartuko dituzte izapidetze-zerbitzu komunak eta, hala badagokio, xedatzen diren bestelako zerbitzu komunak, zeinetan integratuak egongo baitira beren zereginengatik funtzionalki lotuta dauden lanpostuak. Aurreikusten du legeak, gainera, bulego judizialak diseinu malgua izango duela, eta haren tamaina eta antolamendua horretarako eskumena duen administrazio publikoak zehaztuko dituela, bulegoaren beraren jardueraren arabera.
Era berean, urtarrilaren 2ko 1/2025 Lege Organikoak aurreikusten du bosgarren xedapen iragankorrean bulego judizialaren eta auzialdiko auzitegien ezarpena aldi berean egingo dela, legeak berak zehazten duen eran, eta, hala izan dadin, justiziaren alorrean eskumenak dituzten autonomia-erkidegoek bulego horietako bakoitzeko lanpostu-zerrendak egin beharko dituztela, eta, sindikatuekin negoziatu ondoren, onartu. Ondoren, lanpostuok hornitzeko urratsera pasatuko da.
Lanpostu-zerrendak Justizia Administrazioaren barne-egiturak antolatzeko tresna dira, eta, urtarrilaren 2ko 1/2025 Lege Organikoak ekarritako aldaketen ondorioz, arloan eskumena duen administrazioak berriz egin eta onartu egin beharko ditu. Kudeaketa, Izapidetze eta Laguntza Judizialeko kidegoetako funtzionarioen antolamendurako lanpostu-zerrendak uztailaren 1eko 6/1985 Lege Organikoak 521. artikuluan xedatzen duen eran onartu eta argitaratuko dira.
Lanpostu-zerrenda berriak onartzeko tresna juridikoari dagokionez, uztailaren 1eko 6/1985 Lege Organikoak berrikuntza bat txertatzen du 522. artikuluan, betekizun gisa xedatzen baitu ezen bere jarduketa-eremuko lanpostu-zerrenden onartzeko tresnak horretarako eskumena duen zuzendaritza-zentroko titularraren ebazpen bat izan beharko duela, Justizia eta Giza Eskubideetako sailburuaren ebazpen bat, alegia.
Horren guztiaren ondorioz, eta aipatutako lege-aldaketak gauzatze aldera, dekretu honek hauexek ditu xede:
– Partzialki indargabetzea 179/2011 Dekretua, uztailaren 26koa, zeinaren bidez onartzen baitira Justizia Administrazioaren Euskal Autonomia Erkidegoko lanpostu-zerrendak. Kasu honetan, indargabetzeak soilik izango ditu ondorioak Barakaldoko barruti judizialerako aurreikuspenetan.
Zehaztu beharra dago dekretuari indargabetze partzialak egiten ari zaizkiola, barruti judizialetako lanpostu-zerrendei modu mailakatuan eragiten diotelarik, bulego judizialaren eredu berriaren ezarpenak aurrera egin ahala, hain zuzen.
– Indargabeturik uztea otsailaren 17ko 16/2015 Dekretua, zeinaren bidez onartuak izan baitziren Justizia Administrazioaren Euskal Autonomia Erkidegoko zenbait lanpostu-zerrenda, zehazki Barakaldoko barruti judizialekoak.
Azaldutakoagatik, Justizia eta Giza Eskubideetako sailburuak hala proposatuta eta Jaurlaritzaren Kontseiluak 2026ko irailaren 29ko saioan aztertuta eta onartuta, honako hau
XEDATZEN DUT:
Lehenengo artikulua.– Partzialki indargabetzea 179/2011 Dekretua, uztailaren 26koa, zeinaren bidez onartzen baitira Justizia Administrazioaren Euskal Autonomia Erkidegoko lanpostu-zerrendak, zehazki Barakaldoko barruti judizialerako aurreikuspenei dagokienez.
Era honetan, erabateko indarra hartzen dute Justizia eta Giza Eskubideen sailburuaren 2025eko uztailaren 2ko Aginduan Barakaldoko barruti judizialari buruz emandako xedapenek, delako agindu horren bidez onartua izan baitzen Justizia Administrazioaren zerbitzura Euskal Autonomia Erkidegoko udalerrietako justizia-bulegoetan eta justizia-bulegoen elkarteetan diharduten langileen lanpostuen zerrenda.
Dekretuak, hala ere, indarrean jarraituko du Barakaldo eta Bilbori buruzko xedapenei dagokienez, harik eta bulego judiziala barruti judizial horietan ondorio guztietarako ezarria den arte.
Bigarren artikulua.– Indargabe uztea otsailaren 17ko 16/2015 Dekretua, zeinaren bidez onartuak izan baitziren Justizia Administrazioaren Euskal Autonomia Erkidegoko zenbait lanpostu-zerrenda, zehazki Barakaldoko bulego judizialekoak.
AZKEN XEDAPENETAKO LEHENENGOA
Dekretu honek ondorioak izango ditu dagozkion lanpostu-zerrenda berriak indarrean hastearekin batera.
AZKEN XEDAPENETAKO BIGARRENA
Dekretu honek amaiera ematen dio administrazio-bideari, eta haren aurka aukerako berraztertzeko errekurtsoa aurkez dakioke Gobernu Kontseiluari hilabeteko epean, epe hori dekretua argitaratu eta hurrengo egunean zenbatzen hasita. Bestela, administrazioarekiko auzi-errekurtsoa aurkez daiteke, bi hilabeteko epean, Euskal Autonomia Erkidegoko Justizia Auzitegi Nagusiko Administrazioarekiko Auzien Salan, epea dekretua argitaratu eta hurrengo egunetik aurrera.
Vitoria-Gasteizen, 2026ko irailaren 29an.
Lehendakaria,
IMANOL PRADALES GIL.
Justizia eta Giza Eskubideen sailburua,
MARÍA JESÚS CARMEN SAN JOSÉ LÓPEZ.