Euskal Herriko Agintaritzaren Aldizkaria

174. zk., 2026ko irailaren 11, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

3866

EBAZPENA, 2026ko abuztuaren 13koa, Ingurumen Administrazioaren zuzendariarena, zeinaren bidez formulatzen baita «Altzo-Bidania 30 kV-eko aireko linea egokitzea, 9001. eta 9013. euskarrien artean, linearen hornidura hobetzeko Altzo, Alegia eta Tolosa udal-mugarteetan (Gipuzkoa)» izeneko zirkuitu bikoitzeko 30 kV-eko aireko eta lurpeko linea elektrikoko proiektuaren ingurumen-inpaktuaren txostena, i-DE, Redes Eléctricas Inteligentes S.A.U.k sustatutakoa.

AURREKARIAK

2026ko maiatzaren 28an, Industria, Trantsizio Energetiko eta Jasangarritasunaren Sailaren Gipuzkoako Lurralde Ordezkaritzak eskatu zion Ingurumen Administrazioaren Zuzendaritzari has zedila «Altzo-Bidania 30 kV-eko aireko linea egokitzea, 9001. eta 9013. euskarrien artean, linearen hornidura hobetzeko Altzo, Alegia eta Tolosa udal-mugarteetan (Gipuzkoa)» izeneko zirkuitu bikoitzeko 30 kV-eko aireko eta lurpeko linea elektrikoko proiektuaren ingurumen-inpaktuaren ebaluazio sinplifikatua, proiektuaren ingurumen-inpaktuaren ebaluazio sinplifikatuaren prozeduraren esparruan. Prozedura hori Ingurumen-ebaluazioari buruzko abenduaren 9ko 21/2013 Legearen II. kapituluaren 2. atalean dago araututa.

Abenduaren 9ko 10/2021 Legearen 79. artikulua aplikatuz, 2026ko ekainaren 4an, Eusko Jaurlaritzako Ingurumen Administrazioaren Zuzendaritzak izapidea hasi zuen kontsultak egiteko eragindako administrazio publikoei eta interesdunei. Kontsulta-izapidea egiteko legez ezarritako epea bukatuta, zenbait organismoren txostenak jaso dira, eta haien emaitza espedientean dago jasota. Era berean, organo substantiboari jakinarazi zitzaion izapidea hasi zela.

Halaber, espedientea osatzen duten dokumentuak eskuragarri egon ziren Industria, Trantsizio Energetiko eta Jasangarritasunaren Sailaren webgunean, interesdun orok ingurumenaren arloan egokitzat jotzen zituen oharrak egiteko.

Jasotako txostenak aztertuta, egiaztatu da ingurumen-organoak ingurumen-inpaktuaren txostena egiteko behar diren judizio-elementu guztiak dituela, Euskadiko Ingurumen Administrazioaren abenduaren 9ko 10/2021 Legearen 79. artikuluari jarraikiz.

ZUZENBIDEKO OINARRIAK

Euskadiko Ingurumen Administrazioaren abenduaren 9ko 10/2021 Legearen 60. artikuluan xedatutakoaren arabera, dagokion ingurumen-ebaluazioko prozeduraren mende jarri behar dira, nahitaez, ingurumenean ondore nabarmenak izan ditzaketen plan, programa eta proiektuak, bai eta haien aldaketak eta berrikuspenak ere, ingurumen-babes handia bermatzeko eta garapen jasangarria sustatzeko.

Era berean, aintzat hartu da Euskadiko Ingurumen Administrazioaren abenduaren 9ko 10/2021 Legearen II.E eranskinaren 4.b) epigrafean xedatutakoa: «15 kV-eko edo tentsio handiagoa eta 1 km-ko edo gehiagoko luzera duten energia elektrikoaren transmisiorako lineak eraikitzea, oso-osorik lurzoru urbanizatuaren zorupetik igarotzen direnean izan ezik, bai eta haiekin loturiko azpiestazioak ere».

Proiektuaren ingurumen-inpaktuaren ebaluazio-espedientean dauden dokumentu teknikoak eta txostenak aztertu ondoren, eta ikusita proiektuaren ingurumen-dokumentua zuzena dela eta indarrean dagoen araudian xedatutako alderdietara egokitzen dela, Ingurumen Administrazioaren Zuzendaritzak ingurumen-inpaktuaren txosten hau ematen du (organo hori da eskuduna Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren arabera). Bertan aztertzen da ea aipatutako proiektuak ingurumenean ondorio nabarmenak izan ditzakeen eta, horren ondorioz, proiektuari ingurumen-inpaktuaren ebaluazio arruntaren prozedura egin behar zaion; hala ez den kasuetan, proiektua garatzean ingurumena egokiro babesteko bete beharreko baldintzak ezartzen dira txostenean.

Kontuan hartu dira honako hauek: 10/2021 Legea, abenduaren 9koa, Euskadiko Ingurumen Administrazioarena; 21/2013 Legea, abenduaren 9koa, Ingurumen-ebaluazioari buruzkoa; 410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; 40/2015 Legea, urriaren 1ekoa, Sektore Publikoaren Araubide Juridikoarena; eta aplikatzekoa den gainerako araudia. Horiek horrela, honako hau

EBAZTEN DUT:

Lehenengoa.– «Altzo-Bidania 30 kV-eko aireko linea egokitzea, 9001. eta 9013. euskarrien artean, linearen hornidura hobetzeko Altzo, Alegia eta Tolosa udal-mugarteetan (Gipuzkoa)» izeneko zirkuitu bikoitzeko 30 kV-eko aireko eta lurpeko linea elektrikoko proiektuaren ingurumen-inpaktuaren txostena formulatzea, i-DE, Redes Eléctricas Inteligentes, S.A.U.k sustatutakoa, honako baldintza hauetan:

A) Proiektuaren helburua da energia elektrikoko banaketa-instalazioak hobetzea. Horretarako, Altzo-Bidania linea (301904) ordeztu nahi da; egun, zirkuitu bakunekoa da, 30 kV-ekoa, eta zirkuitu bikoitzeko sarea jarri nahi da, 2.447 metro luzekoa, 9001. eta 9013. euskarrien artean.

B) Ebazpen honen bidez ingurumen-inpaktuaren txostena ematen da «Altzo-Bidania 30 kV-eko aireko linea egokitzea, 9001. eta 9013. euskarrien artean, linearen hornidura hobetzeko Altzo, Alegia eta Tolosa udal-mugarteetan (Gipuzkoa)» izeneko zirkuitu bikoitzeko 30 kV-eko aireko eta lurpeko linea elektrikoko proiekturako (aurrerantzean, proiektua), eta aztertu egiten da proiektuaren ingurumen-dokumentuaren edukia, abenduaren 9ko 10/2021 Legearen II. F eranskinean ezarritako irizpideen arabera:

1.– Proiektuaren ezaugarriak.

Dokumentu honetan deskribatzen dira energia elektrikoko banaketa-instalazioak hobetzeko beharrezkoak diren lanen ezaugarri orokorrak. Altzo-Bidania linea (301904) ordeztu nahi da; egun, zirkuitu bakunekoa da, 30 kV-ekoa, eta zirkuitu bikoitzeko sarea jarri nahi da, 2.447 metro luzekoa, 9001. eta 9013. euskarrien artean. Instalazio berriek ahalmen nahikoa izango dute erabilera-eremu horretako egungo eta etorkizuneko eskaria asetzeko.

2,44 km luzeko lineak 112 metro ditu lurpean eta 2.335 metro airean.

Proiektatutako aldaketak honako fase hauek izango ditu:

– Euskarri berriak jartzea: 9001, 9002, 9003, 9004, 9005, 9006, 9007, 9008, 9009, 9010, 9011 eta 9012.

– Zirkuitu bikoitzeko eroale berria jartzea 9001. euskarritik 9013. euskarriraino.

– 2 OCRM-36-EE-PAT jartzea 9001. euskarri proiektatuan.

– Kanalizazio eta linea berria zirkuitu bikoitzean Altzo TAtik 9001. euskarrira.

Energia elektrikoko banaketa-instalazioak egokitzeko, egungo linea desmuntatu behar da, bai eta Altzo TAtik 9013. euskarrira doan egungo eroalea eta egungo euskarriak desegin ere.

Obrek iraun bitartean mozketak saihesteko, erabaki da proiektatutako linea egungoarekiko paraleloan jartzea, baina lanak gutxieneko segurtasun-tartea errespetatua egin ahal izateko nahikoa bereizketarekin.

Linea berriak hauek zeharkatzen ditu: N-I Madril-Irun errepidea, Oria ibaia, Muñolegoerreka, Aierdierreka, 4 ibarbide eta bi linea elektriko (400 kV-eko bat eta 220 kV-eko beste bat).

Proiektuaren memoriaren arabera, txostenean aztertu behar den lurzati zuhaiztunaren azalera, bai aireko eremua bai babes-eremua, 5 Ha-tik beherakoa da.

Lan horietarako, proiektatutako euskarrietarako sarbidea, gehien bat, egungo pisten edo zorbidearen bidezkoa izango da; hala ere, aldi baterako pista berriak ere ireki beharko dira. Proiektatutako linea soilik aldenduko da fikziozko lerro paralelo horretatik azpiegituraren bat (linea elektrikoa, GI-3713 errepidea, Casfalt pabiloia) libratu behar denean.

Bidalitako dokumentazioan ez da zehaztu obrak egikaritzeko eperik, baina obren faserako ingurumena zaintzeko programaren aurrekontutik ondorioztatu daiteke epea 8 hilabetekoa izango dela.

Jarduketa-eremuak ez du behartzen abuztuaren 29ko 1432/2008 EDan (goi-tentsioko aireko linea elektrikoetan hegaztiak elektrokuziotik eta talketatik babesteko neurri teknikoak ezartzen dituena) zehaztutakoa betetzera. Proiektuak barne hartzen du hegazti-fauna babesteko elementuak instalatzea 9001. eta 9007. euskarrien artean; zehazki, 9001. euskarrian neurri hauek hartuko dira:

– Isolagailuak jarriko dira 1.000 mm-ko gutxieneko tartea egoteko gurutzetaren puntaren eta lotura-graparen artean.

– Zubiak forratzea.

– Grapak eta terminalak forratzea.

– Tximistorratzak forratzea.

408.294,35 euro da proiektua egikaritzeko guztizko aurrekontua (BEZa barne).

Ingurumen-dokumentuan zehazten da zer-nolako hondakinak sortzea aurreikusten den obretan, LER kodeen bidez (MAM/304/2002).

Adierazten da, halaber, proiektua egikaritzean sortuko den hondakinen bolumen handiena euskarriak hondeatu eta suntsitzearen ondoriozkoak izango direla, bai eta lurrak eta EEHak zabortegira eramango direla eta metalak birziklatuko direla ere.

Alternatibei dagokienez, ingurumen-dokumentuak jasotzen du ez dagokiola beste alternatibarik aztertzea energia elektrikoko aireko banaketa-azpiegituren segurtasun-eskakizunak betetzea baino. Lurpeko alternatibaren bidez fauna, paisaia eta erabilera tradizionaletako afekzioa saihestuko litzateke, baina baztertu egin da kostu ekonomikoa handia delako.

2.– Proiektuaren kokalekua.

Proiektuaren eremua Tolosa, Alegia eta Altzoko udal-mugarteetan dago. Linea, batez ere, baso-sailek eta soroek okupatutako lurzoruetatik igarotzen da.

Proiektuaren eremua Oriako Unitate Hidrografikoan dago, Kantauri Ekialdeko Demarkazio Hidrografikoan; zehazki, jarduketa-eremua Salubita (mendebaldeko erdia) eta Oria VI (ekialdeko erdia) ur-masen isuri-arroetan dago. Lineak Oria ibaia, Muñolegoerreka erreka, izenik gabeko beste erreka bat eta Aierdierreka erreka zeharkatzen ditu.

Lurpeko urei dagokienez, eremua Gatzume-Tolosa masari dagokio, eta bat dator Albiztur Sektorearekin; azken horrek, aldi berean, interes hidrogeologikoko gune batekin bat egiten du.

Basozaintzako LPSaren arabera, trazadura kategoria hauetan sartutako lurzoruen gainetik igarotzen da: Nekazaritza eta Basozaintza, Landa Paisaia eta Basoak.

Eremuan ez dago kudeaketa-plan onetsia duen fauna mehatxatuaren interes bereziko gunerik. Bestetik, eremua ez dago hegaztiak goi-tentsioko linea elektrikoetan talka ez egiteko eta ez elektrokutatzeko babes-eremuan. Agindu honen bidez deklaratu ziren eremu horiek: Agindua, 2016ko maiatzaren 6koa, Ingurumen eta Lurralde Politikako sailburuarena, zeinaren bidez mugatzen baitira mehatxupean dauden hegazti-espezieen ugalketa, elikadura, sakabanatze eta kontzentrazioko lehentasunezko eremuak eta argitaratzen baitira abifaunaren babes-eremuak. Hala ere, trazatuarekiko 500 metro baino gutxiagora, hegazti nekrofagoentzako interes bereziko eremu bat dago; eremu hori, gainera, hegaztiak goi-tentsioko linea elektrikoetan talka ez egiteko eta ez elektrokutatzeko babes-eremuen parte da.

Eremuko landaredia hauen arteko mosaikoa da: baso-plantazioak, sega-belardiak, ortuari eta fruta-arbolen laboreak, espezie autoktonoen heskaiak belardi horien mugetan eta hostozabal autoktonoen masak, trazatuaren hego-ekialdeko pagadi azidofiloen masak nabarmenduta. Era berean, ur-ibilguen bazterretan, bereziki Oria ibaikoetan, ibaiertzeko landareak daude.

Jarduketen esparruan Batasunaren intereseko bi habitat (BIH) daude: «Sega-belardi atlantikoak, artzaintzarik gabekoak» (6510 kodea) Aldabatxiki inguruan, «Pagadi azidofilo atlantiarrak, Ilex oihanpedunak, eta batzuetan Taxus-dunak» (9120 BIH), linearen trazatuaren mendebaldeko erdian, eta «Alnus glutinosa eta Fraxinus excelsior-eko ibarbasoak» (91E0*), Altzoko AETaren inguruan, zehazki Oria ibaiaren ezkerraldean. Era berean, hostozabal autoktonoen masak (hala nola, hariztia), heskai autoktonoenak eta haltzadi edo baso mistoko masa txikiak, ibarbideetan daudenak ibilguen eta jariatze-uren ondoan, interes handiko formazioak dira eskualde mailan.

EAEko azpiegitura berdeari dagokionez, 9011. euskarriaren egikaritze-eremuak bat egiten du Hernio – Araxes Harana igarobide ekologikoarekin, eta 9009. eta 9012. euskarrien arteko tarteak bat egiten du Lurralde Antolamenduaren Gidalerroek (LAG) identifikatutako igarobide ekologikoarekin.

Eremua ez dago ezein naturagune babestutan, ez eta Natura 2000 Sareko gune bakar batean ere. Jarduketa-eremua ez dago jasota EAEko intereseko naturaguneen katalogo irekian, ezta EAEko hezeguneen inbentarioan, onura publikoko mendietan edo geologia-intereseko lekuetan ere.

Ekialdeko Demarkazioko Plan Hidrologikoko Eremu Babestuen Erregistroaren arabera, Salubita ibaiko ur-masa «hornidura-harpenak dituzten masak» gisa identifikatzen da.

Eremua Albiztur eta Alegiako ikus-arroetan dago, zeinek paisaia-balio handia eta ertaina duten, hurrenez hurren, eta bietako paisaia ohikoa da. Albizturreko arroa ez dago EAEko Paisaia Berezien eta Apartekoen Katalogoan.

Ingurumen-arriskuei dagokienez, 9001. euskarria eta Altzoko AETa uholde-arriskuko eremuan daude, 100 eta 500 urteko errepikatze-denborarekin, hurrenez hurren. Oriaren zati hori uholde-arrisku potentzial nabarmena duen eremuaren barruan dago (ARPSI) III. taldeko «ES017-GIP-14-3».

Bestetik, kutsa dezaketen jarduerak edo instalazioak izan dituzten edo dituzten lurzoruen inbentarioan daude proiektu honen eremuko hiru lurzati (20071-00026, 20071-00056 eta 20007-00006 kodeak). 20007-00006 lurzatia Altzo ATari dagokio, non lurpeko linearen zati bat hondeatu nahi den.

Beste alde batetik, linea akuiferoen kutsadurarekiko urratze-arrisku oso handia duten eremuetatik igarotzen da, Albiztur Sektorean (eremuaren mendebaldeko erdia), bai eta urratze-arrisku ertaineko eremuekin ere, ekialdeko erdian. Oro har, eremuan baso-suteak egoteko arriskua txikia da, eta ez da identifikatu higadura-arriskua izan dezaketen eremurik. Hala ere, Altzo AETaren ondoan, RUSLE metodoaren araberako benetako higaduraren kartografiak adierazten du muturreko higadura-prozesuan dauden eremuak daudela.

Ondarearen arabera, 9008. euskarritik 100 metrora iparralderantz, Intxaurmuntegi I haitzuloa dago (45. fitxa), kultura-ondasun deklaratutakoa monumentu-multzoaren kategorian (AGINDUA, 2015eko azaroaren 2koa, Hezkuntza, Hizkuntza Politika eta Kulturako sailburuarena, zeinaren bidez II. eranskinean zerrendatzen diren Gipuzkoako Lurralde Historikoko haitzuloetako aztarnategiak Kultura-ondasun gisa sartzen diren, Monumentu Multzo kategoriarekin, Euskal Kultura Ondarearen Inbentario Nagusian –2015eko azaroaren 11ko EHAA, 215 zk.–), eta, horren ondoan, Intxaurmuntegi II haitzuloa (44. fitxa). Horrez gain, Donejakue bidea (zehazki, barnealdeko trazatua) Altzoko AETtik igarotzen da.

3.– Balizko inpaktuaren ezaugarriak.

Proiektuaren izaera eta ezaugarriak kontuan hartuta, inpakturik nabarmenenak obren fasean sortuko dira. Proiektua aurrera eramatearen ondoriozko jarduketak egiteko, lan-plataformak sortu beharko dira euskarri bakoitzaren inguruan eta aldi baterako sarbide berriak ireki eta egungo bideak egokitu beharko dira; hortaz, lur-mugimenduak egongo dira, eta lurzorua okupatu eta trinkotu egingo da makinen eta materialen joan-etorrien ondorioz.

Ezin dira zehatz kalkulatu egingo diren lur-mugimenduak eta sarbide berriak irekitzeak eta egungo bideak egokitzeak eragingo duen guztizko azalera. Hala ere, proiektatutako jarduketetan oinarrituta, a priori, eragina ez da nabarmena izango.

Era berean, hamabi euskarri berri zimendatzeko, zehaztu gabeko lur-mugimenduen bolumena eragingo da. Ingurumen-dokumentuaren arabera, euskarri berrien eragin-azalera konpentsatu egingo da; izan ere, lurzorua askatuko da, egungo lineako euskarriak deseginda. Ildo horretan, eskuragarri dagoen kartografiaren arabera, lineak interes handiko landaredia duten eremuak zeharkatzen ditu (BIH eta baso autoktonoak). Nolanahi ere, proiektatutako euskarri berriak desmuntatuko direnengandik hurbil instalatuko dira; eta, emandako dokumentazioaren arabera, eroale berria egungoarekiko paraleloan jarriko da. Soilik aldenduko da 9001-9003, 9005-9008 eta 9009-9011 euskarrien artean.

Ingurumen-dokumentuak jasotzen du hostozabal autoktono helduen zenbait multzori eragingo zaiola, 7.037 m²-ko azaleran (9120 BIHko 4.652 m² eta 91E0*ko 2.385 m²). Lan-plataformak eta euskarri berriak gauzatzeak, eta sarbideak irekitzeak lehendik dagoen landaredia kentzea ere ekarriko dute.

Ingurumen-dokumentuak jasotzen du flora aloktono inbaditzailea dagoela (Buddleja davidii eta Pyracantha generoko aleak) eremuan, eta horrek handitu egiten duela landare horiek sakabanatzeko arriskua. Horrenbestez, neurriak hartu beharko dira horri buruz, bereziki lur-mugimenduak egingo badira espezie horiek dauden eremuetan.

Faunari dagokionez, ingurumen-dokumentuan ohartarazten da baso-igel gorriaren errunaldiak daudela bide batzuetan, eta kontrolak eta neurriak ezarri dira espezie horrekiko afekzio zuzena saihesteko (obrak hasi aurreko prospekzioa, obra-aldiak mugatzea espeziearen ugalketa-garaietan eta abar). Bestetik, intereseko abifauna ere identifikatu da. Hortaz, zuzenketa-neurri gisa planteatu da txoriak babesteko gailuak jartzea 9001. eta 9007. euskarrien artean.

Bestalde, jarduketen ondorioz, aldi baterako eta leku jakin batzuetan, gutxitu egingo da faunaren eta gizakien habitaten kalitatea (zarata handitzea, hautsa, bibrazioak eta abar), lurzoruak edo urak kutsatu ahalko dira lurra mugitzean sortutako istripu edo gertatutako isurtzeen edo jariatzeen ondorioz, hondakinak sortuko dira eta linearen zortasun- eta babes-eremua irekitzeko edo mantentzeko ebaketa- edo inausketa-lanak egingo dira. Proposatutako jarduketen garrantzia kontuan hartuta, ingurumen-dokumentuak bateragarritzat jotzen ditu inpaktu horiek.

Proiektatutako trazadurak Oria ibaia zeharkatzen du 9001. eta 9002. euskarrien artean, Muñolegorerreka erreka 9004. eta 9005. euskarrien artean, izenik ez duen beste erreka bat 9008. eta 9009. euskarrien artean, eta Aierdierreka erreka 9009. eta 9010. euskarrien artean. Aurretik adierazi den moduan, 91E0* BIHaren afekzioa 2.385 m²-koa da.

Kontuan izan beharko da ondare-intereseko elementuak daudela jarduketa-eremutik gertu (Intxaurmuntegiko haitzuloak), bai eta Donejakue bidea ere. Horri dagokionez, Euskal Kultura Ondarearen maiatzaren 9ko 6/2019 Legea beteko da, eta, hala badagokio, beharrezkoak diren prebentzio- eta zuzenketa-neurriak ezarriko dira.

Eremuan lurzorua kutsa dezaketen jarduerak edo instalazioak dituzten edo izan dituzten lurzoruen inbentarioan sartutako lurzatiak daudenez, Lurzorua kutsatzea saihestu eta kutsatutakoa garbitzeko ekainaren 25eko 4/2015 Legean xedatutakoari jarraitu beharko zaio. Hala ere, ingurumen-dokumentuan jasotakoa bete beharko da.

Uholde-arriskuari dagokionez, arlo horretan indarrean dagoen legeria eta organo eskudunak egindako oharrak bete beharko dira. Bestalde, obrek irauten duten bitartean, urak har ditzakeen eremuetan materialak metatzea saihestu beharko da, eta, hala badagokio, horiek azkar kentzeko protokoloak ezarri beharko dira, balizko uholdeak aurreikusi badira.

Obrek iraun bitartean, neurriak hartu beharko dira akuiferoen kutsadurarekiko urratze-arrisku handiko eremuan (Albiztur Sektorea eta interes hidrogeologikoko eremu bat).

Funtzionamendu-fasean, inpaktu nagusiak hegazti-faunarengan izango dira, talka egiteko eta elektrokutatzeko arriskuagatik, baita paisaian ere. Funtsean, lehendik dagoen trazadura egokitu behar denez, eta, gainera, ingurumen-dokumentuaren arabera, linea elektrikoan elektrokuzioaren eta talken aurkako neurri egokiak txertatuko direnez, inpaktu horiek moderatutzat joko dira.

Bigarrena.– Ebazpen honetan, babes- eta zuzenketa-neurriak eta ingurumen-jarraipeneko kontrolak ezartzen dira, proiektuak ingurumenean ondorio kaltegarri nabarmenik izan ez dezan eta «Altzo-Bidania 30 kV-eko aireko linea egokitzea, 9001. eta 9013. euskarrien artean, linearen hornidura hobetzeko Altzo, Alegia eta Tolosa udal-mugarteetan (Gipuzkoa)» izeneko zirkuitu bikoitzeko 30 kV-eko aireko eta lurpeko linea elektrikoko proiektuak ingurumen-inpaktuaren ebaluazio arrunta egin beharrik izan ez dadin, baldin eta ezarritako babes- eta zuzenketa-neurriak txertatzen badira.

Babes- eta zuzenketa-neurriak indarreko araudiaren arabera gauzatuko dira, hurrengo apartatuetan adierazitakoa kontuan hartuta, eta, aurrekoaren aurkakoa ez den orotan, sustatzaileak organo eskudunaren bidez Eusko Jaurlaritzaren Ingurumen Administrazioaren Zuzendaritzan aurkeztutako dokumentazioan ezarritakoa aintzat hartuta.

Bestalde, neurriak eta kontrolerako langile kopurua behar adinakoak izango dira ingurumen-dokumentuan finkatutako kalitate-helburuak eta ingurumen-txostenak xedatuko dituenak bermatzeko.

Neurri horiek guztiak obrak kontratatzeko baldintza-agirietan jaso beharko dira, eta baldintza horiek betetzen direla bermatuko duen aurrekontua ere izan beharko dute. Era berean, obretako jardunbide egokiak aplikatuko dira.

Honako apartatu hauetan adierazitako neurriak gehitu beharko dira:

Natura-ondarea babesteko neurriak.

– Obrak, bai eta lurzorua erabiltzea eragiten duten eragiketa osagarriak ere, proiektua gauzatzeko behar-beharrezkoa den gutxieneko eremuan gauzatuko dira. Hala badagokio, beharrezkoak diren mozte-, inauste- eta soiltze-lanak, obra-sarreren irekierak eta kontratistaren instalazio-guneak –makineria-parkea, obra-etxetxoak, obra-materialak aldi baterako pilatzeko eremuak eta landare-lurrak eta hondakinak aldi baterako pilatzeko eremuak barne– ingurumenean ahalik eta eraginik txikiena izateko irizpideetan oinarrituz egingo dira, eta, zehazki, ahal den neurrian, drainatze naturaleko sareari, intereseko landarediari eta uholde-eremuei eragitea saihestuko da.

Horretarako, obrak hasi aurretik, kontratistaren instalazioen eremuen mugaketa zehatza egingo da xehetasunezko kartografian.

– Eusko Jaurlaritzako Natura Ondarearen eta Klima Aldaketarekiko Egokitzapenaren Zuzendaritzarekin bat etorriz, zuinketa- eta eskokatze-lanak botanikako teknikari adituek berrikusiko dituzte, Woodwardia radicans edo intereseko beste espezieen presentzia detektatzeko eta, hala badagokio, beharrezkoak diren babes-neurriak hartzeko.

– Oro har, zuhaitz autoktonoen kontserbazioa lehenetsiko da, eta inausketa selektiboak egingo dira mozketak egin beharrean; zuzenean okupatzea aurreikusi ez den eremuetan, ez da kenduko bertako landaredi naturala. Intereseko espezieren baten aleak egoera onean dauden eremuetan, kontu handiz jardun beharko da, eragina proiektua egiteko beharrezkoa den azalerara mugatu dadin.

– Landaredi autoktonoa geldialdi begetatiboan inausiko da (neguan), eta zuhaitzaren alde guztiak inausi beharko dira nahitaez, orekatuta gera dadin.

– Gorde beharreko zuhaitzak babestu egingo dira, baldin eta proiektatutako jarduketetan kalteak jasan ditzaketela uste bada.

– Ezinbestekoa da talkaren eta elektrokuzioaren aurkako neurriak aplikatzea aireko trazadura osoan, eta ez soilik 9007. eta 9001. euskarrien arteko tartean. Horretarako, halaber, indarreko araudiaren araberako soluzioak ezarriko dira, hegaztien hilkortasun-arriskua murrizteko eta linearen balio-bizitza osoan mantentzen direla bermatzeko.

– Budleja davidii eta Pyracantha generoko aleak daudenez, ezinbestekoa da proiektuak eragindako eremuari lotutako Espezie inbaditzaileak erauzi eta kontrolatzeko plan bat prestatzea. Plan horretan definituko dira, gutxienez, alderdi hauek: egungo fokuen inbentarioa eta kartografia xehatua; lur-mugimenduen eta makinen zirkulazioaren ondorioz sakabanatze-arriskua dagoen eremuen identifikazioa eta mugapena; landare-hondakinak erauzteko eta kudeatzeko protokoloak; makinak, ekipoak eta ibilgailuak garbitzeko neurriak; eta propaguluak izan ditzaketen lurrak eta materialak kontrolatzeko prozedurak. Planak izapide hauek izan behar ditu kontuan:

• Bereziki kontrolatuko da landare-estalkia leheneratzeko lurren jatorria, eta ez da erabiliko aipatu diren espezieek kutsatutako lurrik.

• Espezie inbaditzaileak dauden eremuetako eskokatze- eta hondeaketa-lanak espezie bakoitzerako ezarritako berariazko protokoloen arabera gauzatuko dira. Eremu horretako landare-lurra ezingo da landaberritzeko erabili, eta baimendutako instalazioetan kudeatu beharko da. Baimendutako betelanetarako erabiltzen bada, bermatu beharko da propagulurik gabeko materialez estalita geratzen dela, eta 3 metrora egon beharko du, gutxienez, gainazalarekiko.

• Erabiltzen diren makina guztiek garbi egon beharko dute, lokatz- edo lur-arrastorik gabe, halakoetan inguruan koka daitezkeen espezie inbaditzaileen propaguluak edo haziak egon baitaitezke.

– Gainera, sustatzaileak ingurumen-zaintza egin beharko du hurrengo 2 urteetan, obrako lanen ondoren eremu osoan finka daitezkeen espezie exotiko inbaditzaileak identifikatzeko eta ezabatzeko helburuarekin, bereziki obrek eragindako intereseko habitatetan.

Paisaia babesteko eta ukitutako eremuak lehengoratzeko neurriak.

Eusko Jaurlaritzako Natura Ondarearen eta Klima Aldaketarekiko Egokitzapenaren Zuzendaritzarekin bat:

– Ingurumena leheneratzeko proiektu bat idatziko da. Horretan definituko dira obrek eragindako eremu guztiak (pilatze-eremuak, lan-eremuak, sarbideak eta abar) ingurumenaren aldetik leheneratzeko prozesua eta eraginpeko hostozabal autoktono helduen masen 7.037 m²-en konpentsazioa; zehazki, zuhaitz autoktonoen masen 14.074 m² landatuko dira (1:2 konpentsazio-irizpidea (kendutakoa: leheneratutakoa)). Konpentsazio horren bidez bermatu beharko da eragindako balio naturalak berreskuratuko direla. Komeni da aurreikusitako leheneratze-jarduketetan arreta berezia jartzea aldi baterako okupatuko diren eremuen paisaia-integrazioan. Bermatuko da landare-estalkia berrezarriko dela eta obrak egin aurreko baldintzak berreskuratuko direla, bereziki sentikortasun bisual handiagoko eremuetan edo paisaia-intereseko elementuetatik gertu daudenetan.

– Obrek eragindako azalera guztiak leheneratuko dira, hau da:

• Eragingo diren euskarrien inguruan.

• Linea elektrikoaren azpian, linea zaharra desmuntatu eta berria jartzeko lanen ondorioz guneren bat kaltetu bada.

• Egokitu behar izan diren sarbideetan, edo, hala badagokio, ireki direnetan, mantentze-lanetarako mantendu behar direla behar bezala justifikatzen denean salbu.

– Ingurumena leheneratzeko proiektuan zehaztuko dira hauek guztiak: leheneratu behar diren eremuak (jarduketen xehetasunaren plano geoerreferentziatuak), erabili behar diren espezieak, diseinu ekologikoko irizpideak, egikaritzeko egutegia, landatzeko metodologia eta esparrua, plantazioen bermealdia (3 urtekoa izan beharko da, landareen behin betiko errotzea bermatzeko), behar bezalako garapena eta mantentzea bermatuko duten jarraipen-mekanismoak, aurrekontu banakatua eta abar.

– Pagadi atlantikoaren berezko zuhaitz-espezieak erabiliko dira (hala nola, Fagus sylvatica e Ilex aquifolium) habitata eta eragindako igarobide ekologikoak funtzionalki berreskuratzen direla bermatzeko. Ildo horretan, Hernio-Araxes igarobide ekologikoekin (3 eta 4) bat datozen eremuetan aurreikusitako leheneratze-jarduketen bidez bermatu beharko da igarobideen konektagarritasun ekologikoa eta funtzionaltasuna kontserbatzen dela.

– Landareztatze-lanak inguruko habitatetako espezie autoktonoekin eta ahalik eta lasterren egingo dira, haizearen higadura-prozesuak eta solidoak ibilguetara arrastatzea ekiditeko.

– Landareztatu beharreko eremuaren antzeko klima- eta lurzoru-baldintzak izan eta barietate autoktonoak ekoizten dituzten tokiko haztegi egiaztatu eta akreditatuetatik datozen haziak eta landareak erabiltzea aholkatzen da.

– Leheneratze-proiektuak zenbait urtetarako jarraipen-programa bat barne hartuko du, adierazle kuantifikagarriak dituena (plantazioen biziraupena, landare-estalkia, espezie inbaditzaileen kontrola eta leheneratutako habitaten bilakaera), egiaztatzeko neurriak eraginkorrak direla eta bermatzeko eragindako balio naturalak berreskuratzen direla.

Uholde-arriskua txikiagotzeko eta jabari publiko hidraulikoa babesteko neurriak.

Uraren Euskal Agentziarekin (URA) bat:

– JPHko babes-eremuetan (zortasun-eremuak eta zaintza-eremuak) jarduketak egiteko, Kantauriko Konfederazio Hidrografikoaren derrigorrezko baimena eskuratu beharko da. Baimen hori Uraren Euskal Agentziak izapidetuko du eta bertan zehaztuko dira jarduketak gauzatzean kontuan izan beharko diren neurriak.

– 9001. euskarriak (kenduko den egungoa nahiz proiektatutako berria) uholde-arriskuko eremuan daude (100 urteko errepikatze-denborakoa). Hori dela eta, Kantauri Ekialdeko Plan Hidrologikoaren arauan jasotako preskripzioak bete beharko dira (35/2023 Errege Dekretua, urtarrilaren 24koa, zenbait plan hidrologikoren berrikuspena onartzen duena, besteak beste Mendebaldeko Kantauriko, Ekialdeko Kantauriko eta Ebroko demarkazio hidrografikoenak) uholde-arriskuaren arloan; zehazki, 37.6 artikuluan jasotakoa bete beharko da, zeinean ezartzen baita uholde-arriskuko eremuan ezin dela hondakin-pilaketarik egin.

Urak eta lurzoruak babesteko neurriak.

– Oro har, eraikuntza fasean, ahalik eta efluente kutsatzaile gutxien sortuko da, eta ahalik eta material xehe eta substantzia kutsatzaile gutxien isuriko da drainatze-sarera. Debekatuta daude urak uhertzea eragin dezaketen jarduerak, eta obrak geldiarazi egin beharko dira meteorologiak premisa hori betetzea eragozten badu.

– Eraikuntza-proiektuan beharrezko neurriak ezarriko dira eraikuntza- eta eraiste-faseetan istripuz gertatutako isurtze edo jariatzeak saihesteko, eta lurrazpiko fluxuetara infiltratzea ekiditeko. Hidrokarburoen xurgatzaile espezifikoa jarri beharko da eskura obretan, istripuz isuri edo ihesen bat gertatuz gero berehala aplikatu ahal izateko.

– Beharrezkoa bada, obra-eremuetan, obren eta jarduera osagarrien ondorioz kutsatzen den ur guztia biltzeko eta kudeatzeko gailuak proiektatu eta eraikiko dira. Haien neurriak zehazteko, kalkulu hidraulikoak egingo dira, solidoei ahalik eta ondoen eusten dietela eta isuriak lokalizatuak eta indarrean dagoen araudiak ezartzen dituen parametro fisiko-kimikoen araberakoak direla bermatzeko.

– Obraren makina-parkera bideratutako azalera eta haren mantentze-gunea drainatze naturaleko saretik isolatuko dira. Zola iragazgaitza eta efluenteak biltzeko sistema bat izango ditu, olioek eta erregaiek ez ditzaten lurzorua eta ura kutsatu. Ezin izango da erregaien zamalanik, olio-aldaketarik eta konponketa-lantegiko jarduerarik egin horretarako adierazitako eremuetatik kanpo.

– Arreta berezia jarri beharko da hormigoirik edo deribaturik ez isurtzeko inguruko sare hidrografikora irits daitekeen ezein puntutara; horregatik, hormigoi-ontziak edo bestelako makinak garbitzeko leku espezifiko bat planifikatzea gomendatzen da.

– Debekaturik dago, baimen administratiborik izan ezean, ur kontinentalak edo jabari publiko hidraulikoko beste edozein elementu kutsa ditzaketen urak eta hondakinak zuzenean edo zeharka isurtzea.

Zaraten eta bibrazioen ondorioak minimizatzera zuzendutako neurriak.

– Lanek dirauten artean, beharrezkotzat jotzen diren jarraibide egokiak aplikatuko dira, ordutegien mugaketari, zamalanei, obrako makineriaren mantentze-lanei eta zarata jatorrian murrizteari dagokienez.

– Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan aurreikusitakoaren arabera, zonakatze akustiko, kalitate-helburu eta emisio akustikoei dagokienez, obrak egitean erabiliko diren makinak egokitu egin beharko dira kanpoan erabiltzeko makinen soinu-emisioei buruz indarrean dagoen legerian ezarritako aginduetara, eta, bereziki, eta hala badagokio, Kanpoan erabiltzeko makinek ingurumenean sortzen dituzten soinu-emisioak arautzen dituen otsailaren 22ko 212/2002 Errege Dekretuan eta arau osagarrietan ezarritakora.

– Euskal Autonomia Erkidegoko hots-kutsadurari buruzko urriaren 16ko 213/2012 Dekretuaren 35 bis artikuluan xedatutakoarekin bat etorriz, sei hilabetetik gorako iraupena aurreikusia duten obren kasuan, nahitaez egin beharko da inpaktu akustikoaren azterlana, zuzenketa-neurri egokiak zehazteko.

– Egunez bakarrik egingo da lan.

Hondakinak kudeatzeko neurriak.

– Sortutako hondakin guztiak Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legean eta aplikatzekoak diren araudi espezifikoetan xedatutakoaren arabera kudeatuko dira, eta, kasuan-kasuan, bereizi egin beharko dira hondakin mota eta helmugarik egokiena zehazteko.

– Hondakinak kudeatzeko hierarkia-printzipioei jarraituz, hondakinak sortzea prebenitu behar da, edo, hala badagokio, apirilaren 8ko 7/2022 Legearen 8. artikuluan ezarritako lehentasun-hurrenkerari jarraituz kudeatu behar dira, hau da: prebenitzea, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa eta deuseztapena barne.

– Hondakinak deuseztatzeko, ezinbestekoa izango da aldez aurretik behar bezala justifikatzea ez dela bideragarria haiek balorizatzea teknikoki, ekonomikoki edo ingurumenaren aldetik.

– Espresuki debekatuta dago sortzen diren tipologia desberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira eta horiek bildu eta biltegiratzeko bide egokiak jarriko dira, nahasketak saihesteko.

– Eraikuntzako eta eraispeneko hondakinak Eraikuntza- eta eraispen-hondakinen ekoizpena eta kudeaketa arautzen duen otsailaren 1eko 105/2008 Errege Dekretuan eta Eraikuntza- eta eraispen-hondakinen ekoizpena eta kudeaketa arautzen duen ekainaren 26ko 112/2012 Dekretuan aurreikusitakoa betez kudeatuko dira.

– Zabortegira bidali behar diren hondakinak hain zuzen ere Hondakinak zabortegietan utziz ezabatzeko jarduera arautzen duen uztailaren 7ko 646/2020 Errege Dekretuaren eta Hondakinak hondakindegietan biltegiratuta eta betelanak eginda ezabatzea arautzen duen otsailaren 24ko 49/2009 Dekretuaren arabera kudeatuko dira.

– Jarduerako soberakinak betelanak egiteko erabiltzen badira, aipatutako otsailaren 24ko 49/2009 Dekretuan ezarritako baldintzak bete beharko dira.

– Betelanak jalkitzeko, kutsatzaile-edukia A ebaluazioko balio adierazleetan (EBA-A) ezarritako baloreen azpitik duten materialak bakarrik baimenduko dira. Lurzorua Kutsatzea Saihestu eta Kutsatutakoa Garbitzeko ekainaren 25eko 4/2015 Legearen III. eranskinean daude jasota adierazle horiek.

– Hondakin arriskutsuak biltzeko sistemak bereiziak izango dira, duten tipologia dela eta, isurketaren bat gertatuz gero, nahasita, arriskutsuago bihurtu edo kudeaketa zaildu dezaketen kasuetan. Halaber, Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen 21. artikuluan ezarritako segurtasun-arauak bete beharko dituzte, eta itxita egon beharko dute kudeatzaileari eman arte, isurita edo lurrunduta gal ez daitezen.

– Industrian erabilitako olioaren kudeaketa arautzen duen ekainaren 2ko 679/2006 Errege Dekretuari jarraituz kudeatu beharko da sortutako olio erabilia. Olio erabiliak, kudeatzaile baimendu bati eman arte, estalpean utziko dira behar bezala etiketatutako depositu estankoetan; zolata iragazgaitz baten gainean egon beharko dute, kubo txikietan edo ihesei eta isuriei eusteko sistemen barruan.

– Eremu jakin bat egokituko da, behin-behinean hondakin arriskutsuak pilatzeko, hala nola olio-potoak, iragazkiak, olioak, pinturak eta abar. Gainera, hondakin geldoak biltzeko edukiontzi espezifikoak jarriko dira, hondakin arriskutsuen guneetatik bereizita.

Kutsatuta egon daitezkeen lurzoruen kudeaketarekin lotutako neurriak.

– Aurreikusitako jarduketak lurzorua kutsa dezaketen jarduerak edo instalazioak dituzten edo izan dituzten lurzoruen inbentarioan (Ihobe) sartutako lurzatietan egingo direnez, kontuan izan behar da 4/2015 Legearen 23. artikuluan aurreikusitako inguruabarretako bat gertatzen denean eta 24. edo 25. artikuluetan jasotako salbuespen-kasuak aplikatu behar ez direnean, lurzoruaren kalitatea deklaratzeko prozedura abiarazi beharko da, dagozkion ikerketa-azterlanak aurkeztearen bidez.

– Edonola ere, kontuan hartuko da 4/2015 Legearen 25. artikuluaren 5. apartatuaren arabera, proiektu bat egiteko inbentarioan jasota dauden lurzatietan hondeatu behar bada, aurreikusitako jarduketak ingurumen-organoari jakinarazi beharko zaizkiola, eta hondeaketa-bolumena 500 m³-tik gorakoa bada (zolatak barne), indusketa selektiborako plan bat idatzi beharko dela.

Airearen kutsadura minimizatzeko neurriak.

– Aldian-aldian, sarbideak garbituko dira, eta, atzemandako hauts-isurketen arabera, ureztatu ere egingo dira. Sarbideek egoera egokian egon beharko dute beti.

– Hezetasun-egoera egokietan garraiatuko da indusketa-materiala, hain zuzen ere, zama estaltzeko gailuak dituzten ibilgailuetan, lohi eta partikularik ez barreiatzearren.

Kultura-ondarea babesteko neurriak.

– Euskal Kultura Ondarearen Zentroaren txostenaren arabera, proiektuak 2015eko azaroaren 2ko Aginduan ezarritako zehaztapenak bete beharko ditu (Agindua, 2015eko azaroaren 2koa, Hezkuntza, Hizkuntza Politika eta Kulturako sailburuarena, zeinaren bidez Gipuzkoako Lurralde Historikoko haitzuloetako aztarnategiak sartzen diren Euskal Kultura Ondarearen Inbentario Nagusian); horren bidez, monumentu-multzoaren kategoriako kultura-ondasun deklaratzen da Intxaurmuintegi I haitzuloa, eta horren babesa arautzen da. Horrez gain, aginduan ezarritako kontserbazio-irizpideak errespetatu eta inguru horretan jarduketak mugatu beharko dira, eta dagokion baimena eskuratu beharko da horri eragin diezaiokeen edozein esku-hartze egiteko.

– Intxaurmuintegi II haitzuloari dagokionez, Euskal Kultura Ondarearen Zentroak ustezko zona arkeologikoaren proposamena egin duenez, kontuan izango da, dagokion babes-espedientea abiarazi arte, horrelako eremuetarako aurreikusitako araubidea aplikatuko zaiola, bat etorriz Euskal Kultura Ondarearen maiatzaren 9ko 6/2019 Legearen 65. artikuluan ezarritakoarekin.

– Maiatzaren 9ko 6/2019 Legean xedatutakoari jarraituz, lurrak mugitzeko obretan arkeologia-izaerako aztarnarik aurkituz gero, berehala jakinaraziko zaio Bizkaiko Foru Aldundiko Kultura Zuzendaritzari, eta azken horrek zehaztuko du zer neurri hartu behar diren.

Jardunbide egokien sistema bat ezartzea.

Langileek jardunbide egokien sistema bat ezarri beharko dute, helburu hauek, besteak beste, ahalik eta hobekien bermatzeko:

– Lanek okupatzen dituzten mugak kontrolatzea.

– Batasunaren intereseko habitatei eta intereseko habitatei (baso mistoa), ibai-ibilguei eta arriskuan dauden fauna-espezieei eragiten zaien kaltea kontrolatzea.

– Hondakin-uzterik ez egitea, eta olio-isurketen ondorioz edo lurra leku batetik bestera eramateagatik lurzorua eta ura ez kutsatzea.

– Proiektuak afektazio-eremuan herriguneetako biztanleei enbarazurik ez eragitea zarata eta hautsarekin.

Garbiketa eta obra-akabera.

Obrak bukatu ondoren, garbiketa-kanpaina zorrotz bat egingo da; proiektuaren eraginpeko eremua batere obra-hondakinik gabe utzi beharko da, eta aldi baterako instalazio guztiak desegin beharko dira.

Ingurumen-aholkularitza.

Obra amaitu arte eta horren berme-aldian zehar, obra-zuzendaritzak ingurumenaren, eta oro har, babes- eta zuzenketa-neurrien inguruan kualifikatutako aholkularitza izan beharko du. Baldintza-agiriak horrelako gaien inguruan esleitzen dizkion eskumenak erabiliz obra-zuzendaritzak ebazpenik eman behar badu, aholkulariek txosten bat egin beharko dute aldez aurretik.

Ingurumen-aholkularitzak, gainera, jardunbide egokien kontrola egingo du, obrak gauzatzean. Besteak beste, proiektuaren ekintzen eragina aztertuko du, bereziki honako hauei dagokienez: makinen mugimenduak, hauts eta zarataren sorrera, hondakinen kudeaketa eta natura-ondarearen babesa.

Hirugarrena.– Zehaztea, lehenengo puntuan ezarritakoaren arabera, eta betiere ebazpen honetan jasotako babes- eta zuzenketa-neurriak hartzen eta adierazitako kontrolak ezartzen badira, baita sustatzaileak proposatutakoak ere –aurrekoen aurkakoak ez badira–, ez dela aurreikusten «Altzo-Bidania 30 kV-eko aireko linea egokitzea, 9001. eta 9013. euskarrien artean, linearen hornidura hobetzeko Altzo, Alegia eta Tolosa udal-mugarteetan (Gipuzkoa)» izeneko zirkuitu bikoitzeko 30 kV-eko aireko eta lurpeko linea elektrikoko proiektuak, i-DE, Redes Eléctricas Inteligentes, S.A.U.k sustatutakoak, ingurumen-inpaktuaren ebaluazio arrunta egin behar izatea.

Laugarrena.– Ebazpen honen edukiaren berri ematea Industria, Trantsizio Energetiko eta Jasangarritasunaren Sailaren Arabako Lurralde Ordezkaritzari.

Bosgarrena.– Ebazpen hau Euskal Herriko Agintaritzaren Aldizkarian argitaratzeko agindua ematea.

Seigarrena.– Euskadiko Ingurumen Administrazioaren abenduaren 9ko 10/2021 Legearen 79.5 artikuluak ezarritakoaren arabera, ingurumen-inpaktuaren txosten honek indarraldia galduko du eta berezko dituen ondorioak sortzeari utziko dio, baldin eta aipatutako proiektua gauzatzen ez bada Euskal Herriko Agintaritzaren Aldizkarian argitaratu eta lau urteko gehieneko epean. Halako kasuetan, sustatzaileak berriro hasi beharko du proiektuaren ingurumen-inpaktuaren ebaluazio sinplifikatuaren prozedura.

Vitoria-Gasteiz, 2026ko abuztuaren 13a.

Ingurumen Administrazioaren zuzendaria,

NICOLAS GARCIA-BORREGUERO URIBE.

Azterketa dokumentala