Euskal Herriko Agintaritzaren Aldizkaria

168. zk., 2026ko irailaren 3a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

3781

EBAZPENA, 2026ko maiatzaren 28koa, Ingurumen sailburuordearena, zeinaren bidez berrikusten eta aldatzen baita Befesa Zinc Aer S.A. enpresari Erandioko udal-mugartean zinka duten hondakinak tratatu eta berreskuratzeko jardueraren harira emandako ingurumen-baimen integratua.

EGITATEAK

1.– Ingurumen sailburuordearen 2007ko uztailaren 24ko Ebazpenaren bidez, Befesa Zinc Aser S.A.-ri ingurumen-baimen integratua eman zitzaion Erandioko (Bizkaia) udal-mugartean duen lantegian zinka eta beruna duten hondakinak tratatu eta berreskuratzeko jarduerarako.

2.– Ingurumen sailburuordearen 2009ko urriaren 5eko Ebazpenaren bidez, Befesa Zinc Aser S.A.-ri Erandioko udalerrian (Bizkaia) zinka eta beruna duten hondakinak tratatu eta berreskuratzeko jarduerarako eman zitzaion ingurumen-baimen integratua aldatu eta indarrean sartu zen, eta, horrenbestez, 16-I-01-000000000001 baimen-zenbakia esleitu zitzaion.

3.– Ingurumen, Lurralde Plangintza, Nekazaritza eta Arrantzako sailburuaren 2010eko martxoaren 2ko Aginduaren bidez, Befesa Zinc Aser S.A.-k Ingurumen sailburuordearen 2009ko urriaren 5eko Ebazpenaren aurka jarritako gora jotzeko errekurtsoa ebatzi zen.

4.– Ingurumen sailburuordearen 2011ko maiatzaren 20ko Ebazpenaren bidez aldatu egin zen Befesa Zinc Aser S.A.-ri Erandioko udalerrian (Bizkaia) zinka eta beruna duten hondakinak tratatu eta berreskuratzeko jardueren harira emandako ingurumen-baimen integratua, eta, horrenbestez, 16-I-01-000000000053 baimen-zenbakia esleitu zitzaion, kudeatzeko hondakin mota onargarriak gehituz.

5.– 2016ko ekainaren 30eko Europar Batasuneko Aldizkari Ofizialean argitaratu zen Batzordearen 2016ko ekainaren 13ko Betearazpen Erabakia, zeinaren bidez ezartzen baitira teknika erabilgarri onenei (TEO) buruzko ondorioak, metal ez-burdinazkoen industrietarako Europako Parlamentuaren eta Kontseiluaren 2010/75/EB Zuzentarauaren arabera (2016/1032/EB Erabakia).

6.– 2016ko abenduaren 31n, Estatuko Aldizkari Ofizialean argitaratu zen 1/2016 Legegintzako Errege Dekretua, abenduaren 16koa, Kutsaduraren Prebentzio eta Kontrol Integratuari buruzko Legearen testu bategina onartzen duena.

7.– Aipatutako testu bateginaren 26. artikuluan daude ezarrita baimena berrikusteko baldintzak. Horri jarraituz, lau urteko epean, instalazioaren jarduera nagusiari dagozkion TEOen inguruko ondorioak argitaratzen direnetik aurrera, organo eskudunak ziurtatuko du instalazioaren baimenaren baldintza guztiak berrikusi direla eta, beharrezkoa izanez gero, egokitu direla, eta instalazioak aipatutako TEO erreferentzia-agirien ondorio aplikagarriak betetzen dituela.

8.– Ingurumen sailburuordearen 2019ko urriaren 3ko Ebazpenaren bidez aldatu egin zen Befesa Zinc Aser S.A.-ri Erandioko udalerrian (Bizkaia) zinka eta beruna duten hondakinak tratatu eta berreskuratzeko jardueraren harira emandako ingurumen-baimen integratua, bi silo gehiago instalatu, zamalanen gune perimetralean itxitura berria jarri, oxidazio termiko birsortzaileko sistema berria ezarri eta kudeatu beharreko zazpi EHZ kode berri ezartzeko.

9.– 2020ko otsailaren 20an, Befesa Zinc Aser S.A.-k ingurumen-baimen integratua berrikusteko eskatutako dokumentazioa aurkeztu zuen.

10.– Aurkeztutako agiriak nahikoak zirela egiaztatu ondoren, Ingurumen sailburuordearen 2020ko martxoaren 11ko Ebazpenaren bidez, Befesa Zinc Aser S.A.-ren ingurumen-baimen integratuaren berrikuspena jendaurrean jartzea erabaki zen, 30 egun balioduneko epean, egoki iritzitako alegazioak aurkezteko. Euskal Herriko Agintaritzaren Aldizkarian eta Arabako Lurralde Historikoaren Aldizkari Ofizialean argitaratu zen, bietan 2020ko apirilaren 27an, eta Bizkaiko Aldizkari Ofizialean 2020ko ekainaren 19an.

11.– Ingurumen-baimen integratua jendaurrean jartzeko izapideak amaitutakoan, alegaziorik ez dela aurkeztu egiaztatu da.

12.– Urriaren 18ko 815/2013 Errege Dekretuaren 16. artikuluan xedatutakoa betez, 2020ko apirilaren 27an, Eusko Jaurlaritzako Ingurumen Administrazioaren Zuzendaritzak txostena eskatu zien Erandioko Udalari, URAri eta Bilbao Bizkaia Ur Partzuergoari.

13.– Urriaren 18ko 815/2013 Errege Dekretuaren 16. artikuluan xedatutakoa betez, 2020ko maiatzaren 5ean, Eusko Jaurlaritzako Ingurumen Administrazioaren Zuzendaritzak txostena eskatu zion Osasun Sailari.

14.– 2020ko maiatzaren 7an eta 2020ko uztailaren 2an, Bilbao Bizkaia Ur Partzuergoak eta Eusko Jaurlaritzako Osasun Sailak, hurrenez hurren, txostenak igorri zituzten, espedientean jasotako emaitzarekin.

15.– Ingurumen sailburuordearen 2020ko maiatzaren 25eko Ebazpenaren bidez, ingurumen-baimen integratua aldatu beharra dakarren instalazioaren aldaketa ez-funtsezkotzat jo zen Befesa Zinc Aser S.A.-k Erandion (Bizkaia) zinka eta beruna duten hondakinak tratatu eta berreskuratzeko jardueran jakinarazitako aldaketa-proiektua, zeina bigarren hozte-dorrea instalatzean datzan.

16.– 2020ko ekainaren 16an, ingurumen-organoko zerbitzu teknikoek ikuskapen-bisita egin zuten, teknika erabilgarri onenak ezarri zirela egiaztatzeko. AAI00053/MTD akta egin zen, eta espedientean dago horren emaitza.

17.– Ingurumen sailburuordearen 2020ko ekainaren 29ko Ebazpenaren bidez, instalazioaren aldaketa ez-funtsezkotzat jo zen Befesa Zinc Aser S.A.-k Erandion zinka eta beruna duten hondakinak tratatu eta berreskuratzeko jardueran jakinarazitako aldaketa, hau da, ingurumen-baimen integratuaren baldintzak Batzordearen 2016ko ekainaren 13ko Betearazpen Erabakira egokitzea, eta, beraz, haren ingurumen-baimen integratua aldatu behar da. Erabaki horren bidez, teknika erabilgarri onenei (TEO) buruzko ondorioak ezartzen dira, Europako Parlamentuaren eta Kontseiluaren metal ez-burdinazkoen industrietarako 2010/75/EB Zuzentarauaren arabera (2016/1032/EB Erabakia).

18.– Ingurumen sailburuordearen 2021eko urtarrilaren 11ko Ebazpenaren bidez, ingurumen-baimen integratua aldatzeko beharra dakarren instalazioaren aldaketa ez-funtsezkotzat jo zen Befesa Zinc Aser S.A.-k Erandion zinka eta beruna duten hondakinak tratatu eta berreskuratzeko jardueran jakinarazitako aldaketa-proiektua, zeina sortutako hondakin arriskutsu eta ez-arriskutsuen taulak eguneratzean datzan.

19.– Ingurumen sailburuordearen 2021eko urtarrilaren 14ko Ebazpenaren bidez, Befesa Zinc Aser S.A.-k jakinarazitako aldaketa-proposamena instalazioaren aldaketa ez-funtsezkotzat jo zen, ingurumen-baimen integratua aldatzea eskatzen duena, Erandion zinka eta beruna duten hondakinak tratatu eta berreskuratzeko jardueran; aldaketan bi silo berri instalatuko ziren, bakoitza 225 m3-koa.

20.– 2021eko abuztuaren 11n, Bilbao Bizkaia Ur Partzuergoak SIRen bidez Erandioko udalerrian dagoen Befesa Zinc Aser S.A. Enpresaren kolektorera isurtzeko baimena aldatzeko akordioa igorri zuen.

21.– Ingurumen sailburuordearen 2021eko irailaren 13ko Ebazpenaren bidez, instalazioaren aldaketa ez-funtsezkotzat jo zen Befesa Zinc Aser S.A.-k Erandion zinka eta beruna duten hondakinak tratatu eta berreskuratzeko jardueran jakinarazitako aldaketa-proiektua, hau da, 1. Fokurako partikulen SMEC sistema instalatzeko beharra dela-eta, eta, beraz, ez da haren ingurumen-baimen integratua aldatu behar.

22.– Ingurumen sailburuordearen 2021eko irailaren 13ko Ebazpenaren bidez, Befesa Zinc Aser S.A.-k jakinarazitako aldaketa-proposamena instalazioaren aldaketa ez-funtsezkotzat jo zen, ingurumen-baimen integratua aldatzea eskatzen duena, Erandion zinka eta beruna duten hondakinak tratatu eta berreskuratzeko jardueran; aldaketa «balorizatu aurretik aldi baterako biltegiratzearen» kudeaketa-prozesua txertatzean eta sortutako hondakinen zerrenda eguneratzean datza.

23.– Ingurumen sailburuordearen 2021eko irailaren 21eko Ebazpenaren bidez, Befesa Zinc Aser S.A.-k jakinarazitako aldaketa-proposamena instalazioaren aldaketa ez-funtsezkotzat jo zen, ingurumen-baimen integratua aldatzea eskatzen duena, Erandion zinka eta beruna duten hondakinak tratatu eta berreskuratzeko jardueran; aldaketa hondakinen kudeatzailearen kode berria txertatzean datza (10 05 10* EHZ).

24.– 2022ko apirilaren 9an, Estatuko Aldizkari Ofizialean argitaratu zen Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legea.

25.– Ingurumen sailburuordearen 2022ko azaroaren 14ko Ebazpenaren bidez, Befesa Zinc Aser S.A.-k jakinarazitako aldaketa-proposamena instalazioaren aldaketa ez-funtsezkotzat jo zen, ingurumen-baimen integratua aldatzea eskatzen duena, Erandion zinka eta beruna duten hondakinak tratatu eta berreskuratzeko jardueran; aldaketa kudeatzeko hondakin berria txertatzean datza: «Galdaketa-jatorriko finak» (11 05 02 EHZ).

26.– Ingurumen sailburuordearen 2023ko ekainaren 16ko Ebazpenaren bidez, instalazioaren aldaketa ez-funtsezkotzat jo zen Befesa Zinc Aser S.A.-k Erandion zinka eta beruna duten hondakinak tratatu eta berreskuratzeko jardueran jakinarazitako aldaketa-proiektua, hau da, egungo sarbidea aldatu behar da, espaloia, ertzak eta fabrikara sartzeko ibia egokitzeko beharrak direla eta, eta, beraz, ez da haren ingurumen-baimen integratua aldatu behar.

27.– 2023ko azaroaren 13an, industria-emisioei eta poluzioaren prebentzioari eta kontrol integratuari buruzko uztailaren 1eko 16/2002 Legea garatzen duen urriaren 18ko 815/2013 Errege Dekretuaren 15.7 eta 16. artikuluak aplikatuz, espedientea Befesa Zinc Aser S.A.-ren esku jarri zen.

28.– 2023ko azaroaren 28an, Befesa Zinc Aser S.A.-k alegazioak aurkeztu zituen, idazki baten bidez, labur adierazita. Ebazpen honen eranskinean daude jasota, labur, erakunde honek horiez egindako oharrekin batera.

29.– Ingurumen Jasangarritasunaren sailburuordearen 2024ko otsailaren 9ko Ebazpenaren eta horri 2024ko otsailaren 29an egindako hutsen zuzenketaren bidez, Befesa Zinc Aser S.A.-k jakinarazitako aldaketa-proposamena instalazioaren aldaketa ez-funtsezkotzat jo zen, ingurumen-baimen integratua aldatzea eskatzen duena, Erandion zinka duten hondakinak tratatu eta berreskuratzeko jardueran; hau da, kudeatu beharreko hondakin berri gisa gehituko da 06 03 15* EHZ duen hondakina, calier oxidoa.

30.– 2024ko apirilaren 30ean Europar Batasunaren Aldizkari Ofizialean argitaratu zen 2024ko apirilaren 11ko Europako Parlamentuaren eta Kontseiluaren 2024/1157 (EB) Erregelamendua. Erregelamendu horrek 1257/2013 (EB) eta 2020/1056 (EB) Erregelamenduak aldatzen ditu, eta hondakinak lekualdatzeari buruzko 1013/2006 (EE) Erregelamendua indargabetzen du.

31.– 2025eko urriaren 22an, Befesa Zinc Aser S.A.-k eskatu zuen ferrositaren hondakin-izaera etentzat jotzeko: Zn berreskuratzeko waelz prozesuko labean lurrundu gabeko materiala, altzairu-fabriketako arku elektrikozko labeetan sortutako altzairugintza-hautsetatik abiatuta, funtsean burdin, kaltzio eta silize oxidoak (10 05 01 EHZ Lehen eta bigarren mailako ekoizpeneko zaborra (Zinkaren termometalurgiaren hondakinak).

32.– 2026ko maiatzaren 7an eta 8an, Ingurumen Administrazioaren Zuzendaritzako Hondakinen Kudeaketa Zerbitzuak honako ondorio hauetarako ferrositaren hondakinaren izaera etentzat jotzeari buruzko txostenak igorri zituen:

• Oinarri-azpietarako agregakina Bilboko portuko zelaigunerako.

• Agregakina Berriz Recycling Company enpresaren (Artxandan dagoen hondakin ez-arriskutsuen hondakindegia) eta Garbikerren (Artigas eta Jata) hondakin ez-arriskutsuen zabortegiak egokitu eta eraikitzeko.

• Agregakina, hormigoia, nahasketa bituminosoak eta agregakin ekologikoetarako lehengaiak fabrikatzeari lotutako jardueretan (karbonatazio arinduzko teknologiaren bidez egindakoak).

ZUZENBIDEKO OINARRIAK

1.– 2016ko ekainaren 30ean, Europar Batasuneko Aldizkari Ofizialean argitaratu zen Batzordearen 2016ko ekainaren 13ko Betearazpen-erabakia, zeinaren bidez ezartzen baitira teknika erabilgarri onenei (TEO) buruzko ondorioak, metal ez-burdinazkoen industrietarako Europako Parlamentuaren eta Kontseiluaren 2010/75/EB Zuzentarauaren arabera (2016/1032/EB Erabakia).

2.– 2016ko abenduaren 31n, Estatuko Aldizkari Ofizialean argitaratu zen 1/2016 Legegintzako Errege Dekretua, abenduaren 16koa, Kutsaduraren Prebentzio eta Kontrol Integratuari buruzko Legearen testu bategina onartzen duena.

3.– Aipatutako testu bateginaren 26. artikuluan daude ezarrita baimena berrikusteko baldintzak. Horri jarraituz, lau urteko epean, instalazioaren jarduera nagusiari dagozkion TEOen inguruko ondorioak argitaratzen direnetik aurrera, organo eskudunak ziurtatuko du instalazioaren baimenaren baldintza guztiak berrikusi direla eta, beharrezkoa izanez gero, egokitu direla, eta instalazioak aipatutako TEO erreferentzia-agirien ondorio aplikagarriak betetzen dituela.

4.– 2019ko urriaren 15eko Estatuko Aldizkari Ofizialean urriaren 10eko TEC/1023/2019 Agindua argitaratu zen, zeinean ezartzen baita noiztik aurrera eskatu ahal izango zaien nahitaezko finantza-bermea Ingurumen Erantzukizunari buruzko urriaren 23ko 26/2007 Legearen III. eranskinean jasotako jarduerei –ekainaren 22ko ARM/1783/2011 Aginduaren bidez 3. lehentasun-mailakotzat sailkatuak–.

5.– 2020ko urtarrilaren 27an, Euskal Herriko Agintaritzaren Aldizkarian argitaratu zen 4/2020 Dekretua, urtarrilaren 21ekoa, zeinaren bidez indargabetu egiten baita irailaren 25eko 183/2012 Dekretua, Ingurumeneko administrazio-prozeduretan zerbitzu elektronikoen erabilera arautzeko eta ingurumenean eragina duten jardueren Euskal Autonomia Erkidegoko erregistroa sortzeko eta arautzeko dena.

6.– 2020ko martxoaren 14an, martxoaren 14ko 463/2020 Errege Dekretua argitaratu eta indarrean jarri zen. Horren bidez, COVID-19ak eragindako krisi sanitarioaren egoera kudeatzeko alarma-egoera deklaratu zen. Administrazio-epeak bertan behera utzi ziren, eta berriro hasi ziren 2020ko ekainaren 1ean, maiatzaren 22ko 537/2020 Errege Dekretuan ezarritakoaren arabera, eta martxoaren 14ko 463/2020 Errege Dekretuak aitortutako alarma-egoera luzatu zen.

7.– Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legeak indarrik gabe utzi zuen Hondakinei eta Lurzoru Kutsatuei buruzko uztailaren 28ko 22/2011 Legea. Beraz, aldatu egin behar dira ingurumen-baimen integratuaren lehen apartatua eta bigarren apartatua.

8.– Aipatutako apirilaren 8ko 7/2022 Legearen 5. artikuluko hirugarren apartatuarekin bat, Europar Batasunaren edo nazioaren mailan irizpide zehatzak ezarri ez direnean, kudeatzaileak eskatuta eta kudeatzaileak egiaztatzeko aurkeztutako agirien bidez 1. apartatuko baldintzak betetzen direla egiaztatu ostean, 33. artikuluaren arabera emandako baimenean autonomia-erkidego batek jaso ahalko du bere lurraldean dagoen instalazio batean hondakin balorizatu bat jada ez dela hondakina izango eta autonomia-erkidego horretan bertan dagoen jarduera edo industria-prozesu batean erabiliko dela.

9.– Ingurumen-baimen integratua eman ondoren, ingurumenari buruzko araudi berria promulgatu da; beraz, egokia da Ingurumeneko sailburuordearen 2007ko uztailaren 24ko Ebazpenaren baldintzak indarrean dagoen araudi berrira egokitzea, ofizioz, ebazpen horren bosgarren apartatuan ezarritakoari eta Ingurumen-ebaluazioari buruzko abenduaren 9ko 21/2013 Legearen 44. artikuluan ezarritakoari jarraikiz.

10.– Administrazio Publikoen Administrazio Prozedura Erkidearen urriaren 1eko 39/2015 Legearen 72. artikuluan, izapideen kontzentrazioari buruzkoan, xedatutakoa aplikatuko da: «Administrazioa sinplifikatzeko printzipioarekin bat, egintza bakar batean erabakiko dira izaeragatik batera bultza daitezkeen eta nahitaez bata bestearen ondoren bete beharrekoak ez diren izapide guztiak».

11.– Ingurumen Sailburuordetzak ebazpen hau emateko eskumena du, Euskadiko Ingurumen Administrazioaren abenduaren 9ko 10/2021 Legean eta Ekonomiaren Garapen, Jasangarritasun eta Ingurumen Sailaren egitura organikoa eta funtzionala ezartzen duen otsailaren 23ko 68/2021 Dekretuan xedatutakoaren arabera.

Aipatutako legeria eta aplikagarri diren gainerako arau orokorrak eta berariazkoak aintzat hartuta, honako hau

EBAZTEN DUT:

Lehenengoa.– Befesa Zinc Aser S.A.-ri Erandioko udal-mugartean (Bizkaia) zinka duten hondakinak tratatu eta berreskuratzeko jarduerarako emandako ingurumen-baimen integratua berrikustea, baimenaren baldintzak Batzordearen 2016ko ekainaren 13ko Betearazpen Erabakian jasotako moduan egokitu, eta baimen horretan bildutako neurri teknikoak eta baldintzak 2020ko ekainaren 29ko Ebazpenaren bidez ingurumen-baimen integratuan txertatzeko, eta Hondakinak eta Lurzoru Kutsatuak arautu eta Ekonomia Zirkularra bultzatzeko 7/2022 Legearen baldintzetara egokitzeko.

Bigarrena.– E.1.6 Ferrositaren Hondakin Izaera Amaitutzat Jotzea apartatuan ferrosita dagoeneko hondakina izan ez dadin ezarritako baldintzak jasotzea.

Hirugarrena.– 2007ko uztailaren 24ko Ebazpenaren bidez Befesa Zinc Aser S.A.-ri zinka duten hondakinak tratatu eta berreskuratzeko jarduerarako emandako ingurumen-baimen integratua aldatzea, jarraian jaso den moduan gera dadin:

«Lehenengoa.– Befesa Zinc Aser S.A.-ri, zeinak helbide soziala Erandioko udal-mugarteko (Bizkaia) Bilbao-Plentzia errepideko 21. zenbakian duen eta IFK hau duen: A48171102, ingurumen-baimen integratua ematea, helbide horretako instalazioetan zinka duten hondakinak tratatu eta berreskuratzeko jarduerarako, ebazpen honen Bigarren atalean ezarritako baldintzekin.

Jarduera Kutsaduraren Prebentzio eta Kontrol Integratuari buruzko Legearen testu bategina onesteko abenduaren 16ko 1/2016 Legegintzako Errege Dekretuaren 1. eranskinean jasota dago. Hain zuzen ere, 2.5.a, «Mineral, kontzentratu edo lehengai sekundarioekin prozedura metalurgiko, kimiko edo elektrolitikoen bidez metal ez-ferroso gordinak ekoizteko instalazioak».

Instalazioak 18 silo ditu, 2.550 m3 baino gehiagoko guztizko edukierarekin, eta horien helburua da hautsezko lehengaiak jasotzea. Gainera, pabiloi itxi eta estalia du, zoru iragazgaitza duena, solteko hautsezko lehengaiak jasotzeko; bigarren pabiloi itxi eta estaliak ere zoru iragazgaitza du, eta bertan, hasiera batean, azken produktua biltegiratzen da, baina lehenago segmentutan banatzen da, eta solteko altzairugintzako hautsak gordetzeko balio dezake.

Tratamendua eta berreskuratzea bi prozesuren bidez egiten da: bata pirometalurgikoa (Waelz prozesua) eta bestea hidrometalurgikoa (Double Leaching Waelz Oxide prozesua).

Prozesuaren ondoriozko produktu nagusia Waelz Oxidoa da.

Waelz prozesua.

Altzairu-fabrikatik eratorritako hondakin-hautsak, erreduktoreekin eta karearekin batera, Waelz labean sartzen dira, eta bertan erredukzio-/oxidazio-erreakzioak ematen dira, zinka hondakin horretan dauden gainerako elementuetatik bereizteko. Hondakin hori berriz oxidatzen da labean bertan, Waelz oxidoa eratuz.

Ondoren, labean sortutako Waelz oxido hori gas-korrontearen bidez garraiatzen da, labetik gasak arazteko sistemara; sistema honako hauek osatzen dute: jalkitze-ganberak, egokitze-dorreak, elektroiragazkiak, mahuka-iragazkiak eta oxidazio termiko birsortzaileak.

Oxidazio termiko birsortzaileko sistemaren helburua da Waelz tximiniak atmosferara emititzen duena murriztea, prozesuaren KOL eta KO parametroetan (TEO). Halaber, sistemak bero-trukagailu gisa diharduten elementuak ditu, prozesuaren efizientzia termikoa hobetuz.

Double Leaching Waelz Oxide prozesua.

Behin jasota, Waelz oxidoa garbiketa bikoitzeko prozesu batetik igarotzen da, dituen halogenoak (kloruroak, nagusiki) eta alkalinoak desagerrarazteko. Lixibiazio-prozesuan erabilitako ura ur-tratamenduko instalazioetara ponpatzen da, eta bertan tratamendu fisiko-kimikoa egiten da, hondar-metalak prezipitatu eta bereizteko.

Altzairugintzako hautsean dauden eta labean berreskuratu ez diren gainerako elementuek, funtsean, burdin oxidoak, kareak eta silizeak ferrosita izeneko bigarren mailako produktua sortzen dute. Produktu gisa merkaturatzen ez den ferrosita hondakin ez-arriskutsu gisa kudeatzen da.

Labetik ateratzen den sarrak (ferrosita) tenperatura oso altua du, eta manipulatu eta biltegiratzeko derrigorrez hoztu egin behar da. Sarra grabitatearen bidez labearen ahotik ur-putzu batera erortzen da, eta bertan etengabe hozten da. Behin hoztuta, putzuaren hondotik ateratzen da errasketa bidez, eta ferrosita-biltegira eramaten da.

Putzura isurtzen den ura berriz zirkulatzen da, gehiegizko ur-kontsumoa saihesteko. Hori dela eta, putzuko ura etengabe hozten da hozte-zirkuitu batean, honako hauek dituenean: hodi-itxurako trukagailua eta karkasa, jalkitze-tanga eta bi hozte-dorre.

Instalazioaren tratamendu-gaitasuna 160.000 t lehor/urte da.

Instalazioan nagusiki gas naturala erabiltzen da, urtean gutxi gorabehera 7.000.000 kWh-ra iritsiz; gasa Waelz labean nahiz errekuntza osteko instalazioan erabiltzen da. Gainera, gutxi gorabehera energia elektrikoko 8.000.000 kWh eta 75.000 litro gasolio kontsumitzen dira, barne-garraioan.

Atmosferara isuritako kutsatzaile nagusiak partikulak dira, Waelzen prozesuan sortutako metalez gain.

Enpresaren barne-sarea banatzailea da, ur-beltzak eta industria-urak bereizita biltzen baitira.

Lixibiazio-instalaziotik ateratzen diren urek arazte prozesu fisiko-kimikotik igaroko dira Urak Tratatzeko Instalazioetan, eta horren bidez egon litezkeen konposatu metalikoen arrastoak araztuko dira. Efluentetik kendutako metal-lohi guztiak Waelz labean berriz prozesatuko dira. Tratatutako efluentea Bilbao Bizkaia Ur Partzuergoaren kolektorera isuriko da.

Ur sanitarioak bulego-, laborategi- eta aldagela-jardueretatik eratorritako hondakin-urak dira. Ur horiek prozesuko uretatik bereizitako kanalizazio-sistema dute, nahiz eta partzuergoaren kolektoreko puntu berdinean isuriko diren.

Euri-ura ekaitzen tangetan biltzen eta biltegiratzen da, sedimentazio-kutxatilen eta kanalizazioen sistema baten bidez. Bildutako euri-ura ekoizpen-prozesuan berrerabiltzen da sareko urarekin batera (Waelz prozesuan nahiz Waelz oxidoa lixibiatzeko prozesuan); beraz, ez da euri-urik isurtzen.

Sortutako hondakin arriskutsuak zein ez-arriskutsuak ekipoak mantentzeko eta instalazioa eta Waelz prozesua zaintzeko jarduera orokorretatik datoz, nagusiki.

Metal ez-burdinazkoen industrietarako teknika erabilgarri onenei buruzko (TEO) ondorioak zehazten dituen Europako Batzordearen 2016ko ekainaren 13ko Betearazpen Erabakian adierazitakoa betetzeko behar diren baliabide teknikoak eta antolaketakoak ditu. Aipatutako ondorioetatik, honako hauek aplikatu behar dira: TEO1, TEO2, TEO3, TEO4, TEO5, TEO6, TEO7, TEO8, TEO9, TEO10, TEO11, TEO14, TEO15, TEO16, TEO17, TEO18, TEO19, TEO121, TEO122, TEO123, TEO124, TEO125, TEO126.»

«Bigarrena.– Erandioko udalerrian kokatutako instalazioetan, zinka duten hondakinak tratatu eta berreskuratzeko jarduera gauzatzeko, Befesa Zinc Aser S.A. enpresari honako baldintzak eta betekizunak ezartzea:

A) Erantzukizun zibileko asegurua egin beharko du, sei milioi hirurehun eta hamabi mila zazpiehun eta hirurogeita hamazortzi (6.312.778) eurokoa, baimendu den jarduera gauzatzearen ondorioz hirugarren pertsonei edo haien ondasunei eragindako kalteak eta hondatutako ingurumena konpontzearen eta berreskuratzearen kostuak ordaindu ahal izateko.

Aseguru horren zenbatekoa urtero eguneratu daiteke, aurreko 12 hilabeteetako Kontsumoko Prezioen Indizearen (KPI) arabera handituta.

B) Bederatzirehun eta berrogeita hemeretzi mila bostehun eta berrogeita bat (959.541) euroko fidantza jartzea, Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legearen 23. artikuluaren 5.b) letran xedatutakoari jarraikiz. Fidantza horren zenbatekoa hondakinak tratatzeko eta biltegiratzeko gehieneko ahalmenen arabera zehazten da.

Fidantza horren zenbatekoa urtero eguneratu ahal izango da, aurreko 12 hilabeteetako kontsumoko prezioen indizearen (KPI) arabera handituta.

Jarritako fidantza ez da itzuliko, ingurumen-organo honek Befesa Zinc Aser S.A.-k sustatutako hondakin arriskutsuak kudeatzeko jarduera uztea baimendu arte edo dagokionean jarduera uzteko finkatzen diren baldintzak bete arte; baldintza horiek, betiere, lurzoruaren kalitate-adierazpenean ezartzen diren betekizunak barne hartuko dituzte.

C) Befesa Zinc Aser S.A. 3. lehentasun-mailako operadore gisa dago sailkatuta ekainaren 22ko ARM/1783/2011 Aginduan. Agindu horrek ministro-aginduak onartzeko lehentasun-ordena eta egutegia ezartzen ditu, eta horiek oinarritzat hartuta, Ingurumen Erantzukizunari buruzko urriaren 23ko 26/2007 Legearen azken xedapenetako laugarrenean (urriaren 23ko APM/1040/2017 Aginduak aldatzen duena) aurreikusitako nahitaezko finantza-bermea eratzea eska daiteke.

Artikulu horren hirugarren apartatuaren arabera, operadoreak ingurumen-arriskuen azterketa eguneratuko du egokitzat jotzen duen guztietan, eta jardueran, instalazioan edo baimenean funtsezko aldaketak egiten direnean.

Jardueraren operadoreak ingurumen-kalteak prebenitzeko, saihesteko eta konpontzeko neurriak hartu eta betearazi behar ditu, eta horien kostuak ordaindu behar ditu, zenbatekoa dena dela, baita dolorik, errurik edo zabarkeriarik egon gabe ere, Ingurumen Erantzukizunari buruzko Legearen 19.1 artikuluan adierazten den bezala.

D) Befesa Zinc Aser S.A.-k administrazioarekiko harremanez arduratuko den goi-tituludunari buruz emandako datuen edozein aldaketaren berri emango dio ingurumen-organoari.

E) Sustatzaileak ingurumen-organo honetan aurkeztu dituen agirietan aurreikusi bezala gauzatuko dira babes- eta zuzenketa-neurriak, indarrean den araudiaren arabera eta hurrengo apartatuetan ezarritakoari jarraituz:

E.1.– Befesa Zinc Aser S.A. enpresak kudeatu beharreko hondakinak hartu, ikuskatu eta biltegiratzeko baldintzak eta kontrolak.

Instalazioan balorizazioa egiteko har daitezkeen hondakinak hurrengo ataletan daude zehaztuta, horiek behar bezala kudeatzeko zehaztapenekin batera.

Lantegian tratatu beharrekotzat jotzen den hondakin-jatorri bakoitzeko, eragileak hondakin hori onartzeko eskabidea bidali beharko du Ingurumen Organo honetara, horrek onets dezan, eta, behar izanez gero, hondakina onartzeko parametro mugatzaile edo baldintzatzaileen proposamena erantsiko da.

Hondakin jakin bat onartzea egiaztatu ondoren, Befesa Zinc Aser S.A.-k dokumentu horren titularrari onarpena ziurtatzen duen agiria igorriko dio, onarpen horren baldintzak ezarriz.

E.1.1.– Hondakin onargarriak.

– Waelz labearen bidez metalak berreskuratzea (R0402).

Gehienez 160.000 tona lehor/urte prozesatzeko gaitasuneko instalazioak Europako Hondakinen Zerrendako hondakinak tratatuko ditu. Zerrenda hori Batzordearen 2014ko abenduaren 18ko Erabakiaren bidez argitaratu zen, zeinaren bidez aldatu egin zen 2000/532/EE Erabakia –hondakinen zerrendari buruzkoa–, bat etorriz Europako Parlamentuaren eta Batzordearen 2008/98/EE Zuzentarauarekin, epigrafe honekin:

(Ikusi .PDF Fitxategia)

Kopuru horiek orientagarriak eta ez-mugatzaileak dira, eta beti ekoizpen-prozesuan tratatzeko urteko 160.000 t lehorren gehieneko kopurua errespetatuko da.

Instalazioan inola ere ezingo dira onartu ebazpen honetan zehaztu ez diren hondakinak, ez eta, hondakin onargarrien artean adierazitakoak izanik ere, beste hondakin mota generikoren batekin kutsatuta daudenak ere.

Taulan jasota daudenen artean, hondakin arriskutsuak onargarriak izango dira, baldin eta arriskutsua izatea metalen presentziaren ondorio bada.

«Araztegiko lohiak» izeneko hondakinen kasuan, ulertu behar da horien barne daudela instalazioko efluenteak tratatzean (iragazteko opilak) sortutako hondakinak ere.

Euskal Autonomia Erkidegoko (EAE) Hondakin Arriskutsuak Kudeatzeko Planaren helburuak betetzen direla bermatzeko, lurralde horretan dauden altzairugintzako hautsak onartzeko eskaerak lehentasunez ebatziko dira. Instalazioetan lurraldetik bertatik ez datozen beste hondakin batzuen edo altzairugintzako beste hauts batzuen tratamendua aurretik adierazitakoa betetzearen mende geratuko da.

Era berean, zinka edo beruna duten beste hondakin batzuk onartu ahalko dira, metalak eta Waelz teknologiaren bidez baloriza daitezkeen elementuen ondorioz toxikoak direnean, baldin eta berun edo kadmioaren pisuaren kontzentrazioak ez badu % 50 edo% 10 gainditzen, hurrenez hurren.

Kasu honetan, instalazioetan tratatuko diren hondakin mota berri bakoitzerako ere organoaren aurretiazko baimena lortu beharko da. Horretarako, sustatzaileak eskaerari hondakinaren hasierako karakterizazioa gehituko dio, tratatu ahal dela egiaztatzeko, baita hondakina instalazioetan onartzeko muga-parametroen edo baldintzen parametroak ere.

Hondakin sukoiak, leherkorrak edo 50 ppm baino gehiagoko PCB edukia dutenak ez dira inola ere onartuko.

– Aldi baterako biltegiratzea (R1301).

(Ikusi .PDF Fitxategia)

E.1.2.– Hondakinen sarrera kontrolatzea.

a) Instalaziora tratatzera iristen diren hondakinen kontrol bat izan beharko da, aldez aurretik karakterizatuz, hondakin horiek ebazpen honetako baldintzen arabera onargarriak direla bermatzeko.

b) Hondakin zehatz bat onartzeko aukera egiaztatu eta gero, enpresak onarpenaren egiaztagiria igorriko dio hondakinaren titularrari, onarpenaren baldintzak zehaztuta.

c) Hondakina jaso aurretik, baldintza horiek betetzen direla egiaztatu beharko da, eta, hala badagokio, jasotze hori formalizatuko da. Horretarako, identifikaziorako agirian, edo horren baliokidea den agiri ofizialean, kudeatzaileari dagokion apartatua bete beharko da.

d) Befesa Zinc Aser S.A. enpresak egiaztatu beharko du hondakin arriskutsuak Erandio udalerrian kokatutako instalazioetara eramateko erabiliko den garraioak horrelako gaiak garraiatzeko indarrean den legeriak ezarritako baldintzak betetzen dituela; garraio hori Befesa Zinc Aser S.A.-ren eskumena izango da. Horren inguruan antzematen den gorabehera oro berehala jakinarazi beharko dio ingurumen-organoari, beharrezkoak diren neurriak har ditzan.

e) Hondakinak beste autonomia-erkidego batetik EAEra ekartzeko, identifikazio-agiri bat aurkeztu beharko da, jarraipena eta kontrola egiteko, Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legearen 31.2 artikuluari jarraikiz.

E.1.3.– Jasotako hondakinak biltegiratzea.

a) Tratatu beharreko hondakinak biltegiratzeko instalazioek lurzoru iragazgaitzak izango dituzte, aurreikusitako zamak jasateko eta egon litezkeen ihes edo jarioei eusteko gai direnak.

b) Instalazioan onartutako hondakinak biltegiratzeko orduan, prezipitazio atmosferikoak sartzea eta haizeak hondakinak arrastatzea saihestu beharko da.

c) Hautsezko eta soltean hartutako hondakinak biltegiratu egingo dira siloetan tratatu arte eta pabiloiaren barruan. Salbuespen gisa, prozesua eteten denean edo biltegiratze-pabiloia konpondu behar denean, euste-horma perimetrala soilik duen gune estalia erabili ahalko da hondakin horiek gordetzeko. Horretarako, Begesa Zinc Aser S.A.-k eskaera egin beharko dio ingurumen-organoari, gutxienez honako hauek adieraziz: eskaera arrazoitzen duten kausak, biltegiratzea aurreikusi den gehieneko stock-a, isurtze barreiatuak prebenitu edo murrizteko hartutako neurriak eta biltegiratze horrek zenbat iraungo duen.

d) Jasotako eta aldez aurretik zakuratutako hondakin arriskutsu eta ez-arriskutsuak guztiz hermetiko mantenduko dira. Hermetikotasuna bermatu ezin denean, aurreko paragrafoan solteko hondakinetarako zehaztutako baldintzetan biltegiratuko dira.

e) Balorizatu beharreko hondakin ez-arriskutsuak gehienez bi urtez biltegiratuko dira.

f) Balorizatu beharreko hondakin arriskutsuak gehienez sei hilabetez biltegiratuko dira.

g) Hondakinak desagertu edo galtzen badira, edo ihesen bat gertatzen bada, berehala jakinaraziko zaie gertatutakoa ingurumen-organo honi eta, udal-mugartean gertatzen bada, Erandioko Udalari.

E.1.4.– Kudeatutako hondakinen datuen erregistroa.

Befesa Zinc Aser S.A.-k formatu elektronikoan artxibo kronologikoa izan beharko du, eta bertan honako hauek jasoko dira, ordena kronologikoan: balorizatu edo desagerraraziko den hondakinaren kopurua, izaera eta jatorria, eta, hala dagokionean, helmuga, bilketa-maiztasuna, garraiobidea eta ondoriozko hondakinerako aurreikusitako tratamendu metodoa, baita produktu, material eta substantzien helmuga ere. Artxibo kronologikoaren inskripzioak, aplikatzekoa denean, apirilaren 8ko 7/2022 Legearen II. eta III. eranskinen arabera baimendutako tratamendu-eragiketa bakoitzeko egingo dira. Baztertutako hondakinen kasuan, kopurua, baztertu den hondakinaren enpresa ekoizlea, baztertzearen arrazoia, baztertu den hondakinaren azken helmuga eta beste gorabehera batzuk jakinaraziko dira. Aipatutako fitxategi kronologikoan hondakinen ekoizpen- eta kudeaketa-lanen agiri bidezko egiaztapenean bildutako informazioa sartu behar da. Artxibo kronologikoa hondakinen ekoizpen- eta kudeaketa-lanetarako eskatutako egiaztagirietako informazioa oinarri hartuta egingo da.

Azpiproduktuak sortzen dituzten erakunde edo enpresek erregistro kronologiko bat izango dute, azpiproduktu gisa ekoitzitako eta kudeatutako kantitateak eta horien helmugak biltzen dituena. Era berean, azpiproduktuak erabiltzen dituzten entitate edo enpresek erregistro kronologiko bat izango dute, haien izaera, erabilitako kopuruak eta jatorria biltzen dituena.

Fitxategi hori gutxienez bost urtez gorde beharko da, eta urtero bidali beharko zaio ingurumen-organo honi, dagokion urteko Ingurumena Zaintzeko Programaren barruan.

Apirilaren 8ko 7/2022 Legearen 65. artikuluan ezarritakoaren arabera, Befesa Zinc Aser S.A.-k, datuak jaso ondorengo urteko martxoaren 1a baino lehen eta dagokion ingurumena zaintzeko programaren barruan, artxibo kronologikoan jasotako informazioaren laburpen-memoria bat aurkeztu beharko du, zeinak lege horren XV. eranskinean agertzen den gutxieneko edukia barne hartu beharko baitu.

Aurreko apartatuetan adierazitako agiriak Ingurumen-organora bidaliko dira, Euskal Autonomia Erkidegoko Administrazio Orokorrak eskura jarritako kanal, sistema edo aplikazio informatikoak erabiliz.

E.1.5.– Estatuz kanpotik inportatutako hondakinak.

Kudeatu beharreko hondakinak Espainia kanpotik datozen kasuetan, Europako Parlamentuaren eta Kontseiluaren 2024ko apirilaren 11ko (EB) 2024/1157 Erregelamenduan –hondakinen lekualdaketei buruzkoa– ezarritakoa bete beharko da. Erregelamendu horrek (EB) 1257/2013 eta (EB) 2020/1056 Erregelamenduak aldatzen ditu, eta (EE) 1013/2006 Erregelamendua indargabetzen du.

Gainera, aurreikusten bada zabortegian deuseztatu beharko direla inportatu beharreko hondakinak zein inportatutako hondakinen helmugako instalazioan aurreikusitako balorizatze-tratamendutik lortutako korronte nabarmenen bat, orduan, kontsulta bat egin beharko zaio organo honi, justifikatuz aurreikusitako mugaz gaindiko lekualdaketak bat datozela EAEko Hondakinak Prebenitzeko eta Kudeatzeko 2030 Planean zehaztutako hondakinen inguruko plangintzaren helburuekin.

E.1.6.– Ferrosita Hondakin Izateari Uzteko Adierazpena.

Honako erabilera hauetarako ferrosita hondakin izateari utziko diola adierazten da:

1.– Oinarri-azpietarako agregakina Bilboko portuko zelaigunerako (A4 kaia ixtea eta A3 kaia eraikitzea).

2.– Agregakina Berriz Recycling Company enpresaren (Artxandan dagoen hondakin ez-arriskutsuen hondakindegia) eta Garbikerren (Artigas eta Jata) hondakin ez-arriskutsuen zabortegiak egokitu eta eraikitzeko.

3.– Agregakina hormigoia eta nahasketa bituminosoak fabrikatzeari lotutako jardueretan.

– Aipatutako erabileretarako honako baldintza orokor hauek bete beharko dira:

a) Balorizazio-eragiketarako sarrerako material gisa baimendutako hondakinak:

– 10 05 01 EHZ Ekoizpen primarioko eta sekundarioko sarrak (Zinkaren termometalurgiaren hondakinak). Altzairu-fabriketako arku elektrikodun labeetan sortutako altzairugintzako hautsetatik abiatuta Zn berreskuratzeko Waelz prozesuko labeko ferrosita - material ez-hegakorra.

– Altzairugintzako hautsetatik abiatuta prozesu pirometalurgikoan (Waelz izenekoan) sortu ez diren sarrak ez dira onartuko.

– Tratamenduaren sarreran hondakinak onartzeko, langile kualifikatuak egongo dira kontrol-lana egiten. Hartara, ikusizko ikuskaritza egin eta erantsitako dokumentazioa aztertuta, irizpide hori betetzen ez duten hondakinak identifikatu beharko dituzte.

– Beharrezkoa bada, laborategi-saiakuntzak egingo dira aplikatu beharreko legediari jarraikiz, hondakinen arriskugarritasun-ezaugarriak zehazteko.

b) Baimendutako tratamendu-prozedurak eta -teknikak.

– Hoztea: sarrak hozteko uretan murgilduko dira.

– Hasierako baheketa: granulometriaren araberako banaketa mekanikoa.

– Txikitu eta birrintzea: beharrezkoa denean, erabilera bakoitzaren arabera eskakizun teknikoaren arabera tamaina egokia bermatzeko eta ahalik eta elementu arrotz gehien kentzeko metodoak erabiliko dira.

– Baheketa fina: beharrezkoa denean, baheketa fina egingo da, erabilera bakoitzaren eskakizun teknikoaren araberako tamaina egokia bermatzeko.

– Metatu eta biltegiratzea: ferrosita bahetu ondoren biltzen da, eta ondorengo erabileraren arabera sailkatu eta biltegiratzen da, ferrosita motak nahastea saihestuz. Biltegiratze-guneak bereizita egongo dira. Higiene- eta segurtasun-baldintza egokitan gorde beharko dira, apirilaren 8ko 7/2022 Legearen 23. artikuluaren terminoetan. Metaketa azalera iragazgaitzetan egingo da, zoladura egokiarekin, eta inguruko maldak lixibiatuak bideratzeko moduan diseinatuko dira, halakorik sortzen bada. Lixibiatu horiek bildu eta tratatzeko sistema izango da, araudiaren araberakoa.

c) Kalitate-irizpideak.

– Baimendutako erabilera bakoitzeko E.1.6.1, E.1.6.2 eta E.1.6.3 apartatuetan zehaztutako kalitate-irizpideak bete beharko dira.

d) Hondakin izateari uzteko irizpideak betetzen direla frogatzeko kudeaketa-sistemak.

– Ekoizleak kudeaketa-sistema ziurtatu bat ezarriko du, erabilera bakoitzerako adierazitako irizpideak betetzen direla egiaztatzeko. Baimendutako erabilera bakoitzeko bete beharreko kalitate-irizpideak E.1.6.1, E.1.6.2 eta E.1.6.3 apartatuetan zehaztu dira.

– Kasu guztietan, ferrosita ekoizteko erabilera bakoitzerako eskatutako kudeaketa-sistema kanpo-erakunde batek auditatu eta egiaztatuko du, fabrikako ekoizpen kontrolaren aldeko ziurtagiria lortuz, aplikatu beharreko legedian edo araudian oinarrituta (adibidez, ISO9001, CE marka, etab.).

– Ekoizleak agintari eskudunei kudeaketa-sistemarako eta dagozkien erregistroetarako sarbidea erraztuko die, hala eskatzen zaienean.

e) Adostasun-adierazpena izateko betekizuna.

– Hondakin izateari utzi dioten tratatutako sarra-bidalketa guztietarako, ekoizleak adostasun-adierazpena igorriko du, ferrosita hondakin izateari uzteko adierazpenari buruz hondakinak kudeatzeko zerbitzuak igorritako txostenean jasota dagoen ereduaren araberakoa.

– Ekoizleak adostasun-adierazpena transmitituko dio hondakin izateari utzi dion ferrositaren hurrengo edukitzaileari.

– Ekoizleak adostasun-adierazpenaren kopia bat gordeko du gutxienez bost urtez, ematen den datatik aurrera, eta agintari eskudunen esku jarriko du eskatzen zaionean.

– Adostasun-adierazpena edozein modutan eman daiteke; hau da, paperean edo formatu elektronikoan, betiere haren benetakotasuna, edukiaren osotasuna eta irakurgarritasuna berma baldin badaitezke adierazpena ematen den egunetik hasi eta gorde beharreko aldi guztian.

– Bidalketa bakoitzaren garraioan, adostasun-adierazpenak ere egon beharko du. Bidalketa hainbat garraio-unitatetan egiten bada, bakoitzak adostasun-adierazpenaren kopia bat eduki beharko du.

Horretaz gain, baimendutako erabilera bakoitzerako honako baldintza zehatz hauek beteko dira:

E.1.6.1.– Ferrosita oinarri-azpikoetarako agregakin gisa erabiltzea Bilboko portuko zelaigunerako (A4 kaia ixtea eta A3 kaia eraikitzea).

a) Kalitate-irizpideak.

• Baldintza teknikoak. Ferrositaren ekoizpenak honako araudi hau bete beharko du:

– (EB) 2024/3110 Erregelamendua, 2024ko azaroaren 27koa, Europako Parlamentuarena eta Kontseiluarena, zeinaren bidez eraikuntzako produktuak merkaturatzeko arau harmonizatuak ezartzen baitira.

– Errepide eta Zubietan (PG-3) Errepide eta Zubietan Obrak egiteko Preskripzio Tekniko Orokorren Agiriak, Bilboko portuan itsasotik bereganatutako zabalguneetan eta estaldura iragazgaitzeko guneetan.

– Bilboko portu-agintaritzak ezarritako baldintza teknikoak.

• Ingurumen-baldintzak. Ferrositaren ekoizpenak honako araudi hau bete beharko du:

– (EE) 1907/2006 Erregelamendua, Europako Parlamentuaren eta Kontseiluarena, substantzia eta prestakin kimikoak Erregistratu, Ebaluatu, Baimendu eta Mugatzeari buruzkoa (REACH).

– 1272/2008/EEE Erregelamendua, substantziak eta nahasketak Sailkatu, Etiketatu eta Ontziratzeari buruzkoa (CLP).

– Ferrositaren lixibiatuen saiakuntzek ezin dituzte gainditu honako hauek hondakin ez-arriskutsuen zabortegietarako zehaztutako onarpen-mugak: hondakinak hondakindegietan biltegiratuta eta betelanak eginda ezabatzea arautzen duen otsailaren 24ko 49/2009 Dekretua eta Hondakinak zabortegietan utziz ezabatzeko jarduera arautzen duen uztailaren 7ko 646/2020 Errege Dekretua.

– 459/2013 Dekretua, abenduaren 10ekoa, Lurretik itsasora egiten diren isurketei buruzkoa. (I. eranskina).

b) Ekoizleak kudeaketa-sistema ziurtatu bat ezarriko du, kalitate-irizpideei buruzko atalean adierazitako irizpideak betetzen direla egiaztatzeko. Honako eskakizun eta kontrol-betekizun hauek izango ditu:

(Ikusi .PDF Fitxategia)

c) Baldintza gehigarriak.

– Ferrosita obran jartzeaz arduratzen diren eraikuntzako langileen kasuan: aplikatutako neurriek saihestu edo murriztu beharko dute langile horiek materialetan dauden kutsatzaileekiko duten esposizio fisikoa, eta komeni da ferrosita manipulatzen den une guztietan (deskargatzea, zabaltzea, konpaktatzea) kabina itxiak dituzten makinak erabiltzea.

– Ferrosita oinarri-azpi gisa jarriko da erabilitako harea-betelanaren goiko aldean, itsasgoraren unerik gorenean itsasoaren mailaren gainean gutxienez 2 metroko kotan.

– Ferrositak azaleko estaldura izan beharko du, 1 metroko lodieran, k = 1x10-7 m/s-ko iragazkortasun hidrauliko asea duena.

E.1.6.2.– Ferrosita agregakin gisa erabiltzea Berriz Recycling Company enpresaren (Artxandan dagoen hondakin ez-arriskutsuen hondakindegia) eta Garbikerren (Artigas eta Jata) hondakin ez-arriskutsuen zabortegiak egokitu eta eraikitzeko.

a) Kalitate-irizpideak.

• Baldintza teknikoak. Ferrositaren ekoizpenak honako araudi hau bete beharko du:

– Hondakinen xede den zabortegi motaren onarpen-baldintzak. 646/2020 Errege Dekretua, uztailaren 7koa, Hondakinak zabortegietan utziz ezabatzeko jarduera arautzen duena (II. eranskina).

• Ingurumen-baldintzak. Ferrositaren ekoizpenak honako araudi hau bete beharko du:

– (EE) 1907/2006 Erregelamendua, Europako Parlamentuaren eta Kontseiluarena, substantzia eta prestakin kimikoak Erregistratu, Ebaluatu, Baimendu eta Mugatzeari buruzkoa (REACH).

– 1272/2008/EEE Erregelamendua, substantziak eta nahasketak Sailkatu, Etiketatu eta Ontziratzeari buruzkoa (CLP).

– Ferrositaren lixibiatuen saiakuntzek ezin dituzte gainditu honako hauek hondakin ez-arriskutsuen zabortegietarako zehaztutako onarpen-mugak: hondakinak hondakindegietan biltegiratuta eta betelanak eginda ezabatzea arautzen duen otsailaren 24ko 49/2009 Dekretua eta Hondakinak zabortegietan utziz ezabatzeko jarduera arautzen duen uztailaren 7ko 646/2020 Errege Dekretua.

b) Ekoizleak kudeaketa-sistema ziurtatu bat ezarriko du, kalitate-irizpideei buruzko atalean adierazitako irizpideak betetzen direla egiaztatzeko. Honako eskakizun eta kontrol-betekizun hauek izango ditu:

(Ikusi .PDF Fitxategia)

c) Baldintza gehigarriak.

– Betetze-probak egin beharko dira, Hondakinak zabortegietan utziz deuseztatzeko jarduera arautzen duen uztailaren 7ko 646/2020 Errege Dekretuaren arabera, gutxienez parametro honi dagokionez: pH. Lixibiatuari dagokionez: kromoa, nikela, kobrea, beruna eta zinka.

– Betetze-probak 500 tonatik behin egin beharko dira.

– Substantzia erabilera hauetarako merkaturatu nahi bada: «Hondakin ez-arriskutsuen zabortegiak zigilatzeko agregakin-geruzak jartzea». Erabilera hori aztertu eta segurtasun-fitxan (SDF) jaso behar da.

E.1.6.3.– Ferrosita agregakin gisa erabiltzea hormigoia eta nahaste bituminosoak fabrikatzeari lotutako jardueretan.

a) Kalitate-irizpideak.

• Baldintza teknikoak. Ferrositaren ekoizpenak honako araudi hau bete beharko du:

– (EB) 2024/3110 Erregelamendua, 2024ko azaroaren 27koa, Europako Parlamentuarena eta Kontseiluarena, zeinaren bidez eraikuntzako produktuak merkaturatzeko arau harmonizatuak ezartzen baitira.

– Hormigoia fabrikatzeko agregakin gisa erabiltzeko, UNE-EN 12620 araua bete beharko da.

– Nahaste bituminosoak fabrikatzeko agregakin gisa erabiltzeko, UNE-EN 13043 araua bete beharko da.

• Ingurumen-baldintzak. Ferrositaren ekoizpenak honako araudi hau bete beharko du:

– (EE) 1907/2006 Erregelamendua, Europako Parlamentuaren eta Kontseiluarena, substantzia eta prestakin kimikoak Erregistratu, Ebaluatu, Baimendu eta Mugatzeari buruzkoa (REACH).

– 1272/2008/EEE Erregelamendua, substantziak eta nahasketak Sailkatu, Etiketatu eta Ontziratzeari buruzkoa (CLP).

b) Ekoizleak kudeaketa-sistema ziurtatu bat ezarriko du, kalitate-irizpideei buruzko atalean adierazitako irizpideak betetzen direla egiaztatzeko. Honako eskakizun eta kontrol-betekizun hauek izango ditu:

(Ikusi .PDF Fitxategia)

c) Baldintza gehigarriak.

– Substantzia erabilera hauetarako merkaturatu nahi bada: «agregakina hormigoiaren eta nahaste bituminosoen fabrikazioari lotutako jardueretan», erabilera hori SDFan aztertu eta jaso behar da.

E.2.– Airearen kalitatea babesteko baldintzak.

E.2.1.– Baldintza orokorrak.

Befesa Zinc Aser S.A.-ren instalazioaren ustiapenean bete beharreko baldintza da atmosferarako isurietan ez gainditzea ebazpen honetan ezarritako isurien muga-balioak, eta ingurumen-organoak jarraibide teknikoetan ezarritako baldintza teknikoak betetzea.

Prozesuan atmosferara isurtzen den gai kutsatzaile oro bildu eta ihesbide egokienean zehar kanpora bideratu beharko da, behar denean, gasak arazteko sistema batetik igaro ondoren, zeina isuri horien ezaugarrien arabera diseinatutako baita.

Arau orokor honetatik salbuetsi ahalko dira isuri konfinatu gabeak, baldin eta teknikoki edota ekonomikoki atzeman ezin badira edo ingurunean oso eragin txikia dutela frogatuta badago.

Neurri egokiak hartuko dira ustekabeko isurketarik ez egiteko, eta haien efluenteek giza osasunerako nahiz gizartearen segurtasunerako arriskutsuak izan ez daitezen. Gas-efluenteak tratatzeko instalazioak behar bezala ustiatu eta mantenduko dira; alegia, efluenteen tenperatura- eta konposizio-aldaketei efikaziaz aurre egiteko moduan. Era berean, ahalik eta gehien murriztuko dira instalazio horiek gaizki dabiltzan edo geldirik dauden aldiak.

Proiektuan kutsadura atmosferikoaren inguruan aipatzen diren neurriak beti beteko dira, bereziki hautsa ez aireratzeko neurriak, hala nola agregakin multzoak ureztatzea edo bideak garbitzea.

Instalazioaren titularrek abenduaren 27ko 278/2011 Dekretuaren 5. artikuluan jasotako betebeharrak bete beharko dituzte (278/2011 Dekretua, Atmosfera kutsa dezaketen jarduerak burutzen dituzten instalazioak arautzen dituena).

Atmosferaren arloko eskumenak dituen sailak argitaratutako jarraibide tekniko guztiak bete beharko dituzte honako elementu hauek: atala, neurketa-gunea, laginketa-guneak, neurketa-portuak, irisgarritasuna eta iturrien segurtasuna eta zerbitzuak.

Organo horrek foku berri bat baimendu ondoren, hura abiarazten denetik sei hilabete igaro baino lehen, ingurumen-kontroleko erakunde batek egindako hasierako IKE txosten bat igorri beharko da. Nolanahi ere, epe hori luzatzeko eskatu ahalko dio ingurumenaren gaineko organoari, betiere behar bezala justifikatutako arrazoiak direla medio.

E.2.2.– Fokuak identifikatzea. Katalogazioa.

Befesa Zinc Aser S.A.-ren instalazioak honako foku konfinatu hauek ditu, Airearen Kalitateari eta Atmosferaren Babesari buruzko azaroaren 15eko 34/2007 Legearen atmosfera kutsa dezaketen jardueren katalogoan jasotako A 03 03 08 01 (Bigarren mailako zinkaren ekoizpena, galdatzeko ahalmena > 20 t/egun) jarduerari lotuak:

(Ikusi .PDF Fitxategia)

E.2.3.– Isurien muga-balioak.

Instalazioa ustiatzean, isuri atmosferikoak ezin dira maximo hauek baino handiagoak izan:

(Ikusi .PDF Fitxategia)

Balio horiek baldintza hauei lotuta daude: 273 K-ko tenperatura, 101,3 kPa-ko presioa, eta gas lehorra.

1.– Laginketa-aldiko batezbestekoak isurien muga-balioak gainditzen ez baditu, isurien muga-balioak betetzen direla ulertuko da.

Ondorio horietarako, laginketa-aldiko batezbestekoa honela kalkulatuko da: gutxienez 30 minutuko ondoz ondoko hiru neurketaren batezbestekoa, neurketa bakoitzari baimen honetan zehaztutako metodoari dagokion konfiantza-tartea kenduta, edo, horrelakorik ez badago, jarraian zehaztutakoa.

PCDD/Fen kasuan, laginketa-aldiko batezbestekoa honela kalkulatuko da: gutxienez 6 orduko laginketa-aldi baterako neurketaren batezbestekoa, neurketa horri baimen honetan zehaztutako metodoari dagokion konfiantza-tartea kenduta, edo, horrelakorik ez badago, jarraian zehaztutakoa.

Baimen horretan ezarritako metodoak zehazten ez badu, neurtutako emaitza bakar baten % 95eko konfiantza-tarteen balioek ez dituzte gaindituko isurtzeen muga-balioen ehuneko hauek:

• Partikulak, guztira: % 30.

• Karbono monoxidoa: % 10.

• Sufre dioxidoa: % 20.

• Nitrogeno dioxidoa: % 20.

• Karbono organikoa, guztira: % 30.

• Hidrogeno kloruroa: % 40.

• Hidrogeno fluoruroa: % 40.

• Metal astunak: % 40.

• Poliklorodibenzodioxinak eta poliklorodibenzofuranoak: % 40.

2.– Jarraian neurtutako parametroen neurketei dagokienez, aurreko isurien muga-balioak betetzen direla ebatziko da honako baldintza hauek betetzen badira:

a) Baliotutako eguneroko batez besteko balioek gehieneko isurketa-balioa gainditzen ez dutenean, eta

b) Urtebetean zehar neurtutako orduko batez besteko balio egiaztatuen ehuneko 95ek ez dutenean gainditzen % 200 ezarritako gehieneko isurketa-balioa.

Gehieneko isurketa-balioetan zehaztutako 100eko 95eko konfiantza-tartearen balioak ezin izango ditu aurretik aipatutako gehieneko isurketa-balioen ehunekoak gainditu.

Orduaren eta egunaren arabera neurtutako balio baliozkotuak ustiapen-epe eraginkorrean zehaztuko dira (abiarazte- eta gelditze-aldiak izan ezik), baliozkotutako orduko batez besteko balioak erabilita; balio horiek arestian zehaztutako konfiantza-tartearen balioa eskuratzean neurtzen dira.

Erregistro-denbora ez-baliozkotzat jotzen dira neurketa-ekipoen mantentze-lanak, matxurak edo funtzionamendu okerra.

Ikusten bada isurien muga-balioren bat betetzen ez dela, behar diren zuzenketa-neurriak hartu beharko dira luzamendurik gabe, eta, berehala, ez-betetzearen, zuzenketa-neurrien eta haien epeen berri eman beharko zaio ingurumenaren arloko eskumenak dituen sailari.

E.2.4.– Gasak bildu eta kanporatzeko sistemak.

Fokuetako hondakin-gasak kanporatzeko tximiniak ez dira egongo bigarren apartatuaren E.2.2 azpiapartatuan ezarritako goreneko kotatik behera. Atmosferaren arloko eskumenak dituen sailak argitaratutako jarraibide tekniko guztiak bete beharko dituzte honako elementu hauek: atala, neurketa-gunea, laginketa-guneak, neurketa-portuak, irisgarritasuna eta iturrien segurtasuna eta zerbitzuak.

E.2.5.– Isurtze barreiatuak murriztea.

Partikulen isuri ez-konfinatuak gerta daitezke altzairugintzako hautsa deskargatzean, biltegiratze-siloetara aldatzean eta lehengaiak Waelz labean kargatzean.

Isurtze barreiatuak minimizatzeko helburuarekin, biltegiratze-siloetan partikulak hartzeko sistemak jarriko dira. Horrez gain, lehengaiak eta gaiak garraiatzeko eta labean kargatzeko uhalak eta bestelako gailuak erabat estaliko dira.

E.3.– Instalazioan sortutako hondakinak egoki kudeatzen direla bermatzeko baldintzak.

Instalazioetan sortutako hondakin guztiak Hondakinak eta lurzoru kutsatuak arautu eta ekonomia zirkularra bultzatzeko apirilaren 8ko 7/2022 Legean eta aplikatzekoak diren araudi espezifikoetan ezarritakoaren arabera kudeatuko dira, eta, beharrezkoa bada, karakterizatu egin beharko dira, euren izaera eta helmugarik egokiena zehazteko.

Berariaz debekatuta dago sortzen diren tipologia ezberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira, eta horiek bildu eta biltegiratzeko bide egokiak jarriko dira, nahasketak ekiditeko.

Hondakinen kudeaketari buruzko printzipio hierarkikoei jarraituz, hondakin oro balorizatu egin behar da, eta, horretarako, balorizatzaile baimendu bati entregatu beharko zaizkio. Birsortzea edo berrerabiltzea lehenetsiko da balorizatzeko beste edozein modu material edo energetikoren aurretik. Hondakinak deuseztatzeko, ezinbestekoa izango da aldez aurretik behar bezala justifikatzea haiek balioztatzea ez dela bideragarria teknikoki, ekonomikoki edo ingurumenaren aldetik. Justifikazio tekniko hori lortzeko, hondakin hori onartzeko baimenduta dauden hiru kudeatzailek ezetza eman behar diote kasuan kasuko hondakina balorizatzeari.

Era berean, Euskal Autonomia Erkidegoan instalazio baimendurik badago hondakin zehatz batzuk tratatzeko, hondakin horiek instalazio horietara bidali beharko dira lehentasunez, autosufizientzia- eta gertutasun-printzipioei jarraituz.

Hondakinen azken destinoa zabortegi baimenduan ezabatzea dela aurreikusten baldin bada, orduan hondakin horiek ezaugarritu egingo dira, Kontseiluaren 2002ko abenduaren 19ko 2003/33/EE Erabakiak, hondakinak hondakindegietan hartzeko irizpideak eta prozedurak ezartzen dituenak, xedatutakoari jarraikiz, eta otsailaren 24ko 49/2009 Dekretuak, hondakinak hondakindegietan biltegiratuta eta betelanak eginda ezabatzea arautzen duenak, ezarritako jarraibideen arabera.

Hondakinak biltegiratzeko eremuak edo eremuek lurzoru estankoa izan beharko dute. Haien egoera fisiko, likido edo oretsua dela-eta, edo haien inpregnazio-mailarengatik isurketak eragin edo lixibiatuak sor ditzaketen hondakin arriskutsuentzat ontziak edo bilketa-sistema egokiak jarriko dira izan litezkeen isuriak kanpora isurtzea saihesteko. Bilketa-sistemek independenteak izan behar dute isuriren bat gertatu eta nahasiz gero arrisku handiagoa edo kudeaketa zailagoa duten hondakin motetarako Hondakinak, bereziki hautsezko, euri-urarekin bustitzea edo haizeak arrastatzea saihestuko da, eta, beharrezkoa izanez gero, estali egingo dira.

Hondakinak lehen aldiz atera aurretik, kudeatzaile baimenduari ematen zaizkion hondakinak behar bezala identifikatu eta sailkatzen direla justifikatu beharko da, bereziki hondakin arriskutsuen izaerari eta arriskugarritasun-ezaugarriei dagokienez, betiere honako hauetan ezarritako irizpideei jarraikiz: Europako Hondakinen Zerrenda, Batzordearen 2014ko abenduaren 18ko Erabakiz argitaratua, zeinaren bidez aldatzen baita Hondakinen Zerrendari buruzko 2000/532/EE Erabakia; Batzordearen 2014ko abenduaren 18ko (EB) 1357/2014 Erregelamendua, zeinaren bidez ordezten baita Europako Parlamentuaren eta Kontseiluaren 2008/98/EE Zuzentarauaren III. eranskina (hondakinei buruzko zuzentarau horrek zuzentarau jakin batzuk baliogabetu zituen). Hori egiaztatu ondoren, eguneratu egingo dira baimen honetan jasota dauden eta berori izapidetzeko orduan indarrean zeuden identifikazioa eta sailkapena.

Hondakinak desagertu edo galtzen badira, edo ihesen bat gertatzen bada, berehala jakinaraziko zaio gertatutakoa ingurumen-organo honi, eta gertakaria udalerrian jazo bada, Erandioko Udalari.

Oro har, ebakuatu aurretik hondakin guztiek izan beharko dute kudeatzaile baimendu batek emandako tratamendu-kontratua, onarpen horretarako kondizioak zehaztuta. Hala badagokio, arrazoitu egin beharko da proposatutako kudeaketa modua ebazpen honetako hondakin-kudeaketari buruzko printzipio hierarkikoei egokitzen zaiela. Befesa Zinc Aser S.A.-k fitxategian erregistratu eta gorde beharko ditu tratamendu-kontratuak edo horien baliokidea den agiri ofiziala, nahitaezkoak direnean, hiru urtez gutxienez.

Halaber, otsailaren 24ko 49/2009 Dekretuarekin, hondakinak zabortegian biltegiratuta eta betelanak eginda ezabatzea arautzen duenarekin bat etorriz, hondakinak zabortegi baimendu batera eraman aurretik, jarraipenerako eta kontrolerako dagokion agiria bete beharko da. Agiri horiek bost urtez gorde beharko dira.

Hori hala izanik, hondakinak lekualdatzeko, identifikazio-agiri bat aurkeztu beharko da, jarraipena eta kontrola egiteko, Ekonomia zirkularra bultzatzeko eta Hondakinei eta lurzoru kutsatuei buruzko apirilaren 8ko 7/2022 Legearen 31.2 artikuluari jarraikiz.

Sortutako hondakinak beste autonomia-erkidego batzuetara lekualdatzeko, Estatuaren lurraldearen barruan hondakinak lekualdatzea arautzen duen ekainaren 2ko 553/2020 Errege Dekretua eta Euskal Autonomia Erkidegoan gerora egiten den arau horren garapena bete beharko dira.

Nahitaezko aurretiko jakinarazpen-kasuetan, apirilaren 8ko 7/2022 Legearen 31 artikuluan aurreikusitako eta ekainaren 2ko 553/2020 Errege Dekretuaren 9. artikuluan garatutako kausetako bat gertatzen denean, hala organo honek nola helmugako autonomia-erkidegoko organo eskudunak hondakinak garraiatzearen aurka egin ahalko dute; arrazoitutako erabakia garraio-jakinarazpena aurkeztu eta gehienez hamar eguneko epean jakinarazi beharko diote operadoreari.

Hondakinak Espainiatik kanpora esportatzen diren kasuetan, Europako Parlamentuaren eta Kontseiluaren 2024ko apirilaren 11ko (EB) 2024/1157 Erregelamenduan –hondakinen lekualdaketei buruzkoa– ezarritakoa bete beharko da. Erregelamendu horrek (EB)1257/2013 eta (EB) 2020/1056 erregelamenduak aldatzen ditu, eta (EE) 1013/2006 Erregelamendua indargabetzen du.

Sustatzailea merkataritza- edo industria-ontzi baten azken jabea bada, abenduaren 27ko 1055/2022 Errege Dekretuaren 44. artikuluan xedatutako betekizunak bete beharko ditu. Ontzi erabiliak eta ontzi-hondakinak materialaren arabera behar bezala bereizita eta baldintza egokitan entregatu behar dira; ontzi erabiliak agente ekonomiko (hornitzaile) bati emango zaizkio berrerabiltzeko, eta ontzi-hondakinak, berriz, baimendutako berreskuratzaile, birziklatzaile edo balorizatzaile bati emango zaizkio.

Befesa Zinc Aser S.A.-k urtero adierazi beharko dio ingurumen-organoari sortutako hondakin arriskutsuen jatorria zein den, zein kantitate sortu den, zer erabilera emango zaion eta adierazpenaren xede den ekitaldiaren amaieran zeintzuk dauden aldi baterako biltegiratuta. Datu horiekin batera, dagokion urteko ingurumena zaintzeko programa bidaliko du.

Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legearen 64. artikuluaren arabera, Befesa Zinc Aser S.A.-k formatu elektronikoko artxibo kronologiko bat izan beharko du, non jasoko baitira, ordena kronologikoan, sortutako hondakinen kopurua, mota eta jatorria, bai eta berrerabiltzeko, birziklatzeko, beste balorizazio-eragiketa batzuk egiteko eta deuseztatzeko produktu, material edo substantzien eta horien ondoriozko hondakinen kopurua ere; eta, hala badagokio, eragiketa horien ondorioz sortutako hondakinaren helmuga, bilketaren maiztasuna, garraiobidea eta aurreikusitako tratamendu-metodoa ere inskribatuko dira, bai eta produktu, material eta substantzien helmuga ere. Artxibo kronologikoaren inskripzioak, aplikatzekoa denean, apirilaren 8ko 7/2022 Legearen II. eta III. eranskinen arabera baimendutako tratamendu-eragiketa bakoitzeko egingo dira. Artxibo kronologikoa hondakinen ekoizpen- eta kudeaketa-lanetarako eskatutako egiaztagirietako informazioa oinarri hartuta egingo da. Fitxategi hori gutxienez bost urtez gorde beharko da, eta urtero bidali beharko zaio ingurumen-organo honi, dagokion urteko Ingurumena Zaintzeko Programaren barruan.

Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legearen 65. artikuluan ezarritakoaren arabera, Befesa Zinc Aser S.A.-k, datuak jaso ondorengo urteko martxoaren 1 baino lehen eta dagokion ingurumena zaintzeko programaren barruan, artxibo kronologikoan jasotako informazioaren laburpen-memoria bat aurkeztu beharko du, zeinak lege horren XV. eranskinean agertzen den gutxieneko edukia barne hartu beharko baitu.

Instalazioan sortutako hondakinen kantitateak –ebazpen honetan daude jasota– orientagarriak dira soilik; kantitate horiek kalkulatzeko, kontuan hartu dira jardueraren ekoizpen-gorabeherak eta ekoizpenaren eta sortutako hondakinen arteko erlazioa. Azken datu horiek jardueraren adierazleetan ageri dira. Hargatik eragotzi gabe abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 10. artikuluan ezarritakoa (4.d apartatua), instalazioko aldaketak kalifikatzeko, kasu honetan soilik eskatu beharko da baimena egokitzea: baldin eta sortutako hondakinen kantitatea handitzeak aurretik ezarri diren biltegiratze- eta ontziratze-baldintzak aldatu beharra badakar.

Hondakinak kudeatzeko ingurumen-organoari entregatu behar zaizkion dokumentu guztiak Euskal Autonomia Erkidegoko Administrazio Orokorrak eskura jarritako kanal, sistema edo aplikazio informatikoak erabilita helaraziko zaizkio.

E.3.1.– Hondakin arriskutsuak.

Sustatzaileak hondakin arriskutsu hauek aitortu ditu:

(Ikusi .PDF Fitxategia)

a) Hondakin arriskutsu bakoitzari dagokion izendapena eta kodifikazioa hondakin bakoitzaren egoera eta ezaugarriak kontuan hartuta ezartzen da, eta horiei buruzko informazioa baimena izapidetzerakoan jasotzen da. Kode batzuek aldaketaren bat izan badezakete ere, beste batzuk, oinarrizkoak direlako, aldatu gabe utzi behar dira ekoizpen-jardueran zehar. Horiek definitzen dituzte mota eta hondakinaren osagai arriskutsuak. Kudeaketa-bideetan hierarkizazioa egokia dela egiaztatzeko eta Hondakinak Kudeatzeko Europako Estrategian bai Hondakinak Prebenitzeko eta Kudeatzeko Euskadiko 2030 Planean ezarritakoa betetzen dela bermatzeko, organo honek onartu egin beharko du hondakin bakoitzaren tratamendu-kontratuetan jasotako informazioa, dagokion baimendutako kudeatzaileak horretarako eskaera egin ostean. Egiaztatzeak garrantzi berezia izango du, batez ere, berreskuratzea edo balorizatzea kudeatzeko eragiketa-kodearen arabera kudeatu diren hondakinen tratamendu-kontratuetan uzte- edo ezabatze-kodeak balioztatzea eskatzen bada.

b) Hondakin arriskutsuak ontziratzeko, indarrean dagoen araudian ezarritako segurtasun-arauak bete beharko dira. Hondakin arriskutsuak dauzkaten ontziek eta bilgarriek etiketa argia, irakurgarria eta ezabagaitza eduki beharko dute, eta itxita egon beharko dute kudeatzaileari eman arte, edukiak isurita edo lurrunduta gal ez daitezen.

c) Hondakin arriskutsuak gehienez 6 hilabetez eduki behar dira biltegiratuta. Salbuespen-egoeretan, epe hori aldatu ahalko du ingurumen-organoak, behar bezala justifikatutako arrazoiak tarteko direla, eta betiere giza osasuna eta ingurumena babestuko direla bermatzen bada.

d) Hondakinak kudeatzaile baimenduaren instalazioetara eraman aurretik, nahitaezko baldintza izango da agiri baten bidez egiaztatzea kudeatzaile baimendu horrek hondakinak onartu dituela. Agiri horretan hondakinak onartzeko baldintzak ezarriko dira, eta egiaztatu egingo da tratatu beharreko hondakinaren ezaugarriak bat datozela administrazio-baimenarekin. Agiri hori Ingurumen Organoari bidaliko zaio hondakina lehenengoz atera aurretik eta, behar izanez gero, hondakinen kudeatzaile berri batengana eraman aurretik. Beharrezkoa bada, karakterizazio zehatza egingo da, proposatutako tratamendua egokia den aztertzeko. Hala badagokio, arrazoitu egin beharko da proposatutako kudeaketa modua ebazpen honetako hondakin-kudeaketari buruzko printzipio hierarkikoei egokitzen zaiela.

e) Hondakin arriskutsuak eraman aurretik eta, hala badagokio, horretarako egin beharreko jakinarazpena aurretiaz eginda dagoela, araudian zehaztutako moduan, identifikaziorako agiria bete beharko da; agiri horren ale bat garraiolariari emango zaio, eta zamarekin batera eraman beharko da jatorritik helmugaraino. Befesa Zinc Aser S.A.-k artxiboan erregistratu eta gutxienez hiru urtez gorde beharko ditu tratamendu-kontratuak eta identifikazio-agiriak edo agiri ofizial baliokideak.

f) Egiaztatu egin beharko da baimendutako kudeatzailearen instalazioetara hondakin arriskutsuak eramateko garraioak bete egiten dituela halako salgaiak garraiatzeari buruzko indarreko legerian eskatutako betekizunak.

g) Befesa Zinc Aser S.A. enpresak ekainaren 2ko 679/2006 Errege Dekretuari, Industrian erabilitako olioaren kudeaketa arautzen duenari, jarraituz kudeatu beharko du sortutako olio erabilia.

h) Gailu elektriko eta elektronikoen hondakinei buruzko otsailaren 20ko 110/2015 Errege Dekretuan xedatutakoaren arabera kudeatuko dira ekipamendu elektriko eta elektronikoen hondakinak –besteak beste, lanpara fluoreszenteenak–. Halaber, Pilei eta Metagailuei eta Haien Hondakinen Ingurumen Kudeaketari buruzko otsailaren 1eko 106/2008 Errege Dekretuan xedatutakoa bete beharko dute pilen eta metagailuen hondakinek. Kudeatzaile baimenduaren tratamendu-kontratua izateko, garraioaren aurretiko jakinarazpena egiteko eta identifikazio-agiria betetzeko betebeharretik salbu egongo dira kudeaketa-sistema integratuko kudeaketa-azpiegituretara eramaten diren hondakinak, bai eta toki-entitateei ematen zaizkienak ere, gaika bildutako udal-hondakinekin eta haien parekoak direnekin batera kudeatu ditzaten, baldin eta dagokion toki-entitateek entrega horiek egin direla egiaztatzen badute. Toki-erakundeei eman-izanaren egiaztagiriak gutxienez bost urtez gorde beharko dira.

i) Befesa Zinc Aser, S.A.-k, PCB eduki dezaketen gailuak dituenez, haiek egoki kudeatu daitezen, xedapen hauetan ezarritako eskakizunak bete behar ditu nahitaez: 1378/1999 Errege Dekretua, abuztuaren 27koa, Poliklorobifeniloak, poliklorotrifeniloak eta horiek dituzten gailuak ezabatzeko eta kudeatzeko neurriak ezartzen dituena, eta 228/2006 Errege Dekretua, otsailaren 24koa, errege-dekretu hori aldatzen duena.

j) Baldin eta Befesa Zinc Aser S.A.-k ozono-geruza agortzen duten substantziei buruzko Europako Parlamentuaren eta Kontseiluaren 2009ko irailaren 16ko (EE) 1005/2009 Erregelamenduan zehaztutako gai erabiliak baditu, gai horiek berreskuratu egingo dira aldeek onetsitako bitarteko teknikoen bidez suntsitzeko, edo ingurumenaren ikuspegitik onargarria den beste edozein suntsitze-bide tekniko erabiliz, edota birziklatzeko edo birsortzeko xedez, tresnak berrikusi eta mantentzeko eragiketetan nahiz desmuntatu edo suntsitu aurretik.

k) Urtean 10 tonatik gora hondakin arriskutsuren hasierako ekoizlea bada, apirilaren 8ko 7/2022 Legearen 18.7 artikuluari jarraituz, Befesa Zinc Aser, S.A.-k minimizazio-plan bat izan beharko du, eta, planaren barruan, sortutako hondakin arriskutsuen kopurua eta horien arriskugarritasuna murrizteko hartuko dituen neurriak jaso beharko ditu. Plana agintaritza eskudunen eskura egongo da, eta, lau urtean behin, ekoizleak emaitzen berri eman beharko dio ingurumen-organo horri. Aurreko betebeharretik salbuetsita egongo da EMAS ziurtagiria badu, edo mota horretako hondakinak minimizatzeko neurriak barne hartzen dituen beste sistema baliokideren bat; horretarako, dagokion informazioa ingurumen-adierazpen baliozkotuan jaso beharko da.

l) Amiantoa duten hondakinak hautemanez gero, Befesa Zinc Aser S.A. enpresak amiantoak ingurumenean eragitea prebenitzeko eta eragin hori murrizteko 108/1991 Errege Dekretuan (3. art.) ezarritako betekizunak bete behar izango ditu. Horrez gain, amiantoa duten hondakinak kudeatzeko egingo diren manipulazioak, 396/2006 Errege Dekretuan ezarritako aginduen arabera burutuko dira; dekretu horren bidez ezarri ziren amiantoarekin lan egiterakoan segurtasun- eta osasun-arloan bete behar diren gutxieneko baldintzak.

E.3.2.– Hondakin ez-arriskutsuak:

Sustatzaileak adierazitako hondakin ez-arriskutsuak hauek dira:

(Ikusi .PDF Fitxategia)

a) Material erregogorraren kasuan (EHZ 16 11 04) kasuan, hondakin horrek ispilu-sarrera du gaur egun indarrean dagoen Europako hondakinen zerrendan. Bada, horiek hondakin ez-arriskutsutzat hartuko dira, baldin eta lehenengo aldiz ebakuatu baino lehen karakterizatzen badira; karakterizazio horren emaitzak ingurumen-organora bidali beharko dira, proposatutako kudeaketa egokia ote den egiaztatzeko. Baldin eta hondakin hori arriskutsua dela ezartzen bada, ebazpen honetako E.3.1. apartatuan jasotako xedapenak aplikatuko dira.

b) Hondakin horiek ezabatzeko direnean ezin dira urtebete baino gehiagoz biltegiratuta eduki. Hondakinen azken helburua balioztatzea denean, 2 urtez gorde ahal izango dira.

E.4.– Ontziak merkaturatzea. Prebentziorako eta ekodiseinurako enpresa-plana.

Enpresak produktu ontziratuak eta enbalajedunak merkaturatzen baditu, bilgarri horien gaineko informazioa eman beharko du urtero, martxoaren 31 baino lehen; horretarako, Ontzien Gaineko Urteko Adierazpena egin beharko du. Datu horiekin batera, dagokion urteko ingurumena zaintzeko programa bidaliko du.

Halaber, Ontzien eta ontzi-hondakinen abenduaren 27ko 1055/2022 Errege Dekretuaren 43. artikuluan hornitzaileei ezartzen zaizkien betebeharrak bete beharko ditu.

Sustatzailea behartuta dago bosturteko Prebentzio eta Ekodiseinuko Enpresa Plana aplikatzera, urte natural batean, ontziratutako produktuak edo industria- edo merkataritza-ontziak merkaturatzen baditu eta jarraian zehazten diren kantitateak gainditzen dituzten hondakinak sortzen baditu:

– 250 tona, beira soilik bada.

– 50 tona, altzairua soilik bada.

– 30 tona, soilik aluminioa bada.

– 20 tona, plastikoa soilik bada.

– 20 tona, zura soilik bada.

– 15 tona, soilik kartoia edo material konposatuak badira.

– 300 tona, zenbait material badira, eta bakoitzak, bera bakarrik hartuta, ez baditu lehen aipatutako kantitateak gainditzen.

Prebentzio eta Ekodiseinuko Enpresa Plan horrek kontuan hartuko ditu ontzien hondakinak prebenitzeko tresnetan jasotako zehaztapenak. Halaber, aurreko planetako helburuen betetze-mailaren laburpena txertatu beharko du, prebentzio-helburu kuantifikatu berriak adierazita, baita horiek erdiesteko neurriak eta betetzen dituela kontrolatzeko mekanismoak ere, abenduaren 27ko 1055/2022 Errege Dekretuaren 18. artikuluari jarraikiz. Plana amaitu eta hiru hilabeteko epean, planari buruzko txostena bidali beharko da, eta bertan jasotako prebentzio-neurrien betetze-mailaren berri eman beharko du.

Bost urtean behin bidali beharko ditu aipatu bi agiri horiek, dagokion urteko ingurumena zaintzeko programarekin batera.

E.5.– Saneamendu-sarera isurtzeko baldintzak.

E.5.1.– Isurien sailkapena, jatorria, ingurune hartzailea eta kokalekua.

Isurketa sortzen duen jarduera-mota nagusia: metalurgia ez-burdinazkoa.

Mota-taldea-EJSN: 2443.

(Ikusi .PDF Fitxategia)

E.5.2.– Isuriaren emari eta bolumenak.

• Industria-isurketa: 207.465 m³/urte.

• Langileen komuneko urak eta ur beltzak: 2.987 m³/urte.

Azken karga kutsatzailea (365 egun urtean).

(Ikusi .PDF Fitxategia)

Tauletan jasotako emariak eta bolumenak erreferentziako urte bateko balantzeari dagozkio, eta, beraz, urtez urte alda daitezke.

E.5.3.– Isurien muga-balioak.

Saneamendu-sarera egiten den isurketaren parametroak honako hauek izango dira, bakoitzerako zehazten diren gehieneko muga-balioekin:

(Ikusi .PDF Fitxategia)

Ezingo dira diluzio-teknikak erabili isurien muga-balioak lortzeko.

a) Euri-urak instalazioan erabiltzeko bilduko dira. Kanalizazio-sarearen bidez bildu eta garraiatuko dira; sare hori urak garraia ditzakeen solido esekiak dekantatzeko prestatuta dauden hori sedimentazio-kutxek osatzen dute. Bildutako ura euri-uren andeleraino ponpatuko da, eta zepa-hobia elikatzeko eta lixibiazio-edo waelz prozesura ekarpenak egiteko erabili ahal izango da. Euri-ur gehiegi isurtzen bada tangara, efluenteak tratatzeko instalaziora gainezkatuko da.

b) Azken kolektorean balbula bat jarriko da laginak hartzeko eta isurketak aztertzek, bai eta datuak kontrolatzeko eta erregistratzeko honako ekipamendu hauek ere:

Emaria eta totalizatzailea etengabe neurtzea.

Parametroak: tenperatura, pH-a, eroankortasun elektrikoa eta solido esekiak.

E.5.4.– Arazteko eta husteko instalazioak.

Araztegiko tratamendu-sistemak metalen prezipitazioa, koagulazio-malutapena eta dekantazio lamelarra ditu, solido esekiak murrizteko.

Behar izanez gero, enpresak oxidatu beharko ditu metalak hauspeatzeko gehitzen diren gehiegizko sulfuro disolbatuak.

Tratamendu-sisteman sortzen diren lohiak ekoizpen-prozesuan berrerabiltzen dira.

Partzuergoak kadmioa murrizteko tratamendu osagarriak eskatu ahal izango ditu, baldin eta Galindoko HUAn metal horren balantze orokorrek, kalitate-helburuak lortzeak eta Europako, Estatuko edo autonomia-erkidegoko arauak betetzeko beharrak hala justifikatzen badute.

E.6.– Lurzoruaren kalitatea babesteko neurri orokorrak.

Hautsezko materialak arrastaka eramatea minimizatuko da, ondorengo neurri orokorrak ezarriz:

• Haize zakarra dabilenean hautsezko solidoak manipulatzea saihestea.

• Materialak paletatik deskargatzean, garaiera mugatzea.

• Salbuespenezko egoeretan eta ingurumen-organoak baimena eman ondoren, tratatu beharreko hautsezko hondakinak aurreikusitako biltegiratze-pabiloitik edo siloetatik kanpo biltegiratu ahal izango dira.

Urtarrilaren 14ko 9/2005 Errege Dekretuan eta ekainaren 25eko 4/2015 Legean ezarritako betebeharrak betez aurkeztutako lurzoruaren aurretiazko egoera txostenaren arabera eta txosten horretan jasotako gomendioei jarraituz, uneoro materialak biltegiratzeko gunea nola urak husteko sistema modu egokian mantentzen direla ziurtatzera bideratutako jardunbide egokiak aplikatzea proposatu beharko du Befesa Zinc Aser S.A.-k. Neurri horiek prebentziorako mantentze-lanen eskuliburuan sartuko dira, eta bertan, ikuskapen- eta kontrol-programa eguneratu bat sartuko da.

Egindako jarraibideak aurkeztu beharko ditu organo honen aurrean, atal honetan ezarritakoari jarraituz enpresak proposatutako prozedurak modu xehatuan jasoz.

Befesa Zinc Aser S.A.-k dokumentu bakar bat aurkeztuko du, 2020ko urtarrilaren 23ko Aginduaren bidez onartutako jarraibide teknikoari jarraikiz, edukiei eta entrega-aldizkakotasunari dagokienez; gutxienez, 5 urtean behin.

Nolanahi ere, lurzoruaren kalitatea ikertu eta berreskuratzeko lanak egin ditzakeen egiaztatutako entitate batek egin beharko du agiri bakarra, eta eduki hauek izango ditu: lurzoruaren egoerari buruzko aldizkako txostena, oinarrizko txostena eta lurzoruen eta lurpeko uren kontrola eta jarraipena egiteko agiriak, jarraian aipatutako araudian ezarritako obligazioak beteta betiere.

• 9/2005 Errege Dekretua, urtarrilaren 14koa, Lurzorua kutsatzeko arriskua eragiten duten jardueren zerrenda eta lurzoruak kutsatu deklaratzeko irizpideak eta estandarrak ezartzen dituena.

• Urriaren 18ko 815/2013 Errege Dekretua, Industriako isurketen erregelamendua onartu eta Kutsaduraren Prebentzio eta Kontrol Integratuaren uztailaren 1eko 16/2002 Legea garatzen duena.

• Ekainaren 25eko 4/2015 Legea, Lurzoruaren kutsadura prebenitzekoa eta zuzentzekoa.

• 1/2016 Legegintzako Errege Dekretua, abenduaren 16koa, Kutsaduraren Prebentzio eta Kontrol Integratuaren Legearen testu bategina onartzen duena.

• Agindua, 2020ko urtarrilaren 23koa, Ingurumen, Lurralde Plangintza eta Etxebizitzako sailburuarena, zeinaren bidez jarraibide tekniko bat onartzen baita, Kutsaduraren prebentzio eta kontrol integratuari buruzko Legearen testu bategina onartzen duen abenduaren 16ko 1/2016 Legegintzako Errege Dekretuan xedatutakoa interpretatzeari eta aplikatzeari buruzkoa, lurzoruaren eta lurpeko uren egoera zehazteko oinarrizko txosten bat eskatzeari lotua.

Lur-mugimenduak.

Sustatzaileak baldintza hauek bete beharko ditu instalazioetan egindako aldaketek eragindako lur-mugimenduei dagokienez:

1.– Aurreikusten bada aldaketaren bat egin behar dela instalazioa baimenduta dagoen partzelaren barruan, eta aldaketa horren ondorioz lurrak mugitu behar badira:

a) Ekainaren 25eko 4/2015 Legearen 25. artikuluaren 1c apartatuan jasotzen denari jarraikiz, induskatu beharreko materialak (lurrak, obra-hondakinak, etab.) karakterizatu egin beharko ditu jardueraren sustatzaileak, ekintza kutsatzaileen ondorioz erasan zaien ala ez egiaztatzearren, eta, karakterizazio horren emaitzen arabera, haiek kudeatzeko modu egokiena zehaztearren.

b) Jarduketa horretan aurreikusten bada induskatu beharreko materialen bolumena 500 m^3-tik gorakoa dela (zolatak barne), edo jarduketa egin bitartean gainditze hori antzemango balitz, nahitaezkoa izango da lurzoruaren kalitatea ikertzeko eta oneratzeko akreditatutako entitate batek egindako indusketa selektiborako plan bat aurkeztea. Indusketa-planak abenduaren 26ko 209/2019 Dekretuaren IV. eranskinean adierazitako edukia jaso beharko du, eta ingurumen-organoak onartu beharko du, gauzatu aurretik.

c) Hondeatu beharreko bolumena 500 m³-tik beherakoa bada, aldaketaren jakinarazpenak honako informazio hau jaso beharko du:

– Jarduketaren pertsona fisiko edo juridiko sustatzailearen eta jarduketa burutuko duen kontratudunaren identifikazioa.

– Jarduketaren xede den lekua non dagoen, baita Lurzoruaren Kalitatearen Administrazio Erregistroaren erreferentzia ere.

– Jarduketaren xede den eremuaren mugaketa eta azalera. Jakinarazpenean, partzela eta jarduketa-eremua zehatz-mehatz non dauden jakitea ahalbidetzen duten planoak erantsiko dira.

– Jarduketaren deskribapen xehatua.

– Hondeatuko diren materialen bolumena, zolatak barne.

– Ingurumen-jarraipeneko lanen eta azken txostena egitearen arduradunaren identifikazioa; artikulu honetan aipatutako kasuetan erakunde egiaztatua izan beharko du.

– Jarduketa hasteko aurreikusitako datak.

d) Aurreko kasuetako edozeinetan, obra egin ondoren, azken txostena bidali beharko du. Bertan, lurren karakterizazioaren emaitzak adierazi beharko dira; horrez gain, induskatutako materialen berrerabilera edo kudeaketa egokia egiaztatzeko txosten bat ere bidali beharko da. Indusketaren bolumena 100 m³-tik gorakoa bada, entitate egiaztatu batek egingo ditu ingurumen-jarraipenerako lanak eta txostena.

e) Arau orokor gisa, Kutsatutako lurzoruetan indusketa selektiboak egiteko gidan jasotzen diren irizpideak beteko dira. Esteka honetan eskura daiteke gida:

https://www.ihobe.eus/eu/kutsatutako lurzoruetan indusketa selektiboak egiteko gida

f) Soberakinak zabortegian biltegiratuta hustu nahi izanez gero, Hondakinak hondakindegian biltegiratuta eta betelanak eginda ezabatzea arautzen duen otsailaren 24ko 49/2009 Dekretuan ezarritakoari jarraikiz egingo da hondakinen karakterizazioa. Oro har, laginketa gauzatzeko, hondeatu beharreko materialen karakterizazio-kanpaina diseinatzerakoan kontuan hartu behar diren oinarrizko irizpideei jarraituko zaie. Irizpide horiek abenduaren 26ko 209/2019 Dekretuaren IV. eranskinean eta gidaren 10.2.6 zenbakian daude jasota (Induskatu behar diren lurzoruen «in situ» laginketa).

g) Soberako materialak instalazio berean berrerabili ahal izateko, material horiek honako balioa izan beharko dute: lurzorua kutsatzea saihestu eta kutsatutakoa garbitzeko ekainaren 25eko 4/2015 Legean ezarritako VIE-B (industria-erabilera) balioaren azpitikoa, eta lur horien hidrokarburo-edukia ezin izango da arriskutsua izan. Horretarako, entitate egiaztatu batek egin beharko ditu laginketa eta analisia, 199/2006 Dekretuaren arabera (199/2006 Dekretua, urriaren 10ekoa, lurzoruaren kalitatea ikertu eta berreskuratzeko erakundeak egiaztatzeko sistema ezartzen duena, eta erakunde horiek lurzoruaren kalitatearen gainean egindako ikerketen edukia eta norainokoa zehazten dituena).

h) Ekainaren 25eko 4/2015 Legean xedatutako EBA-A ebaluazioko balio-adierazleak eta TPHetarako 50 mg/kg baino balio txikiagoak lortzen dituzten lurrak lur garbitzat hartuko dira, eta beraz, onartu egingo dira baimendutako edozein betelanetarako.

i) Substratu harritsu ona murrizketarik gabe kudeatu ahalko da. Lurzoru naturalaren parekoa den substratu harritsu meteorizatuaren kasuan, aurreko puntuetan ezarritako irizpidea beteko da.

2.– Instalazioa baimenduta dagoen partzelatik kanpo aldaketaren bat aurreikusten bada (lurzoru berria okupatuz) eta okupatzea aurreikusten den lurzoru berriak lehenago ekainaren 25eko 4/2015 Legearen I. eranskinean jasotako jardueraren bat jasan badu, sustatzaileak lurzoruaren arloko deklarazioa lortu beharko du, planteatutako aldaketak hasi aurretik.

Horrez gainera, ekainaren 25eko 4/2015 Legeak 22. artikuluaren 2. apartatuan dioenaren arabera, lurraren kutsadura-aztarnak aurkitzen badira, horren berri eman beharko zaie dagokion udalari eta ingurumen-organoari, hark ezar ditzan hartu beharreko neurriak, aipatutako 4/2015 Legearen 23. artikuluaren 1.e apartatuari jarraikiz betiere.

E.7.– Zaratari buruzko baldintzak.

Jarraian zehaztutako mailak ez gainditzeko behar diren neurri guztiak hartuko dira, hargatik eragotzi gabe Erandioko Udalaren Arau Subsidiarioetan jasotako neurriak:

a) Jarduera honako hauei egokitu behar zaie: etxebizitzen barrualdean entzungo den zarata ezin izango da inoiz ere 40 dB (A) baino handiagoa izan Leq 60 segundo etengabeko balioan neurtuta, 08:00ak eta 22:00ak bitartean, leiho eta ateak itxita, ezta 45 dB (A) ere gehieneko baliorik altuenetan.

b) Jarduera honako hauei egokitu behar zaie: etxebizitzen barrualdean entzungo den zarata ezin izango da inoiz ere 30 dB (A) baino handiagoa izan Leq 60 segundo etengabeko balioan neurtuta, 22:00ak eta 08:00ak bitartean, leiho eta ateak itxita, ezta 35 dB (A) ere gehieneko baliorik altuenetan.

c) Jarduerak ez du 1. taulan adierazitakoa baino zarata handiagoa egingo, 4 m-ko altueran neurtuta (egoera berezietan izan ezik; horietan, pantailatzeak saihesteko behar den altuera hartuko da), industria-esparruaren kanpoaldeko itxituraren perimetro osoan.

(Ikusi .PDF Fitxategia)

Abian den instalazioak, 1. taulan finkatutako mugak betetzeaz gain, ez du eguneko inolako baliotan (LAeq,d, LAeq,e eta LAeq,n) 1. taulan adierazitako balioak baino 3 dB-etik gorako gehikuntzarik gaindituko.

Gainera, jardueraren gainerakotik bereizitako prozesuaren jardun modu bat baldin badago, jardun modu horri lotutako zarata-maila bat zehaztu beharko da (LAeq,Ti), non Ti baita jardun modu horren iraupen-denbora. Maila horrek ez ditu gaindituko 1. taulan 5 dB-etan finkatutako balioak.

d) Zamalanetan eta materiala kamioietan garraiatzean egiten den zaratak ez du gaindituko sentiberatasun akustiko handieneko guneetako zarata-maila.

F) Ingurumena Zaintzeko Programa.

Ingurumena zaintzeko programa sustatzaileak aurkeztutako agirietan eta apartatu hauetan ezarritakoaren arabera gauzatu beharko da:

F.1.– Isuri atmosferikoak kontrolatzea.

F.1.1.– Kanpoko kontrolak.

a) Befesa Zinc Aser S.A. enpresak isurien kontrola egin beharko du, informazio honi jarraituz:

(Ikusi .PDF Fitxategia)

b) Puntu honetako a) apartatuan aipatutako neurketa guztiak Administrazioaren II. mailako ingurumen-lankidetzako entitate (ILE) batek egin beharko ditu, urriaren 16ko 212/2012 Dekretuan jasotzen den bezala; eta aldizkako neurketa horiei buruzko txostenek, berriz, Ingurumen sailburuaren 2012ko uztailaren 11ko Aginduan eskatzen diren eskakizun guztiak bete beharko dituzte, batik bat honako hauei dagozkienak: neurketaren helburua eta plana, neurketen adierazgarritasuna, neurketa kopurua eta neurketa bakoitzaren banako iraupena eta erreferentzia-metodoak hautatzeko irizpidea.

c) Halaber, a) letran azaldutako isuri-foku baten kontrola egin behar den urtean, foku horrek funtzionatzen badu urtean hamabi aldiz baino gutxiagoko batez besteko maiztasunarekin, eta isuri bakoitzak ordubete baino gehiago irauten duela, edo, bestela, edozein maiztasunarekin, baldin eta isuriaren iraupen globala plantaren funtzionamendu-denboraren ehuneko bostetik gora bada, urte horretan ez da beharrezkoa izango foku horren kontrolik egitea, eta hurrengo urtean egin beharko da, baldin eta kontroletik salbuesteko baldintzek irauten ez badute. Inguruabar hori dagokion urteko ingurumena zaintzeko programan justifikatu beharko da.

F.1.2.– Neurketa jarraitua.

Befesa Zinc Aser S.A.-k guztizko partikulen etengabeko neurketa egin beharko du Waelz labearen tximiniari dagokion 1. fokuan.

Isurtzeak etengabe neurtzeko sistema Euskal Autonomia Erkidegoko Airearen Kalitatea Zaindu eta Kontrolatzeko Sarera konektatu beharko da.

Isuriak etengabe neurtzeko sistemen (IENS) instalazioa, kalibrazioa, kontrola, mantentze-lanak eta jakinarazpenak, eta ekipamenduen, neurketa-sekzio eta -tokien ezaugarriak UNE-EN 14181 arauan eta ingurumen-arloko eskumenak dituen Sailak argitaratutako jarraibide teknikoetan ezarritako baldintzen araberakoak izan beharko dute.

Instalazioen titularrek izango dute ardura IENSaren datuak eskuratzeko, tratatzeko eta jakinarazteko, eta IENSak erregistratutako datuak gutxienez 10 urtez gorde beharko dira.

FE01 isuri-fokurako («Waelz labea»), neurketarako ekipamenduen erabilgarritasuna, hau da, baliozko datuak lortzeko aldien ehunekoa, gutxienez urteko benetako jardunaren % 90ekoa izango da, ingurumen-organo honek bestelako baimenik ematen ez badu behintzat.

IENSa ondoz ondoko 15 egunetan baino gehiagotan ondo ez badabil, Ingurumen Lankidetzako Erakunde (ILE) batek aldizkako kontrolak (hamabostean behin) egin beharko ditu, 15 eguneko aldizkakotasunarekin gertaera hasi denetik isurien etengabeko neurketa-sistema behar bezala ibili arte.

Instalazioen titularrak IENSaren funtzionamenduari buruzko urteko txosten bat igorri beharko du, betiere ingurumen-arloko eskumenak dituen sailak argitaratutako jarraibide teknikoetan ezarritakoaren arabera.

F.1.3.– Lortutako emaitzen erregistroa.

Erregistro bat egingo da eguneratutako agiriekin, honako hauetan ezarritakoari jarraikiz, betiere: Atmosfera kutsa dezaketen jardueren katalogoa eguneratzen duen eta hura ezartzeko oinarrizko xedapenak finkatzen dituen urtarrilaren 28ko 100/2011 Errege Dekretuaren 8. artikulua eta Atmosfera kutsa dezaketen jardueretarako instalazioak arautzen dituen abenduaren 27ko 278/2011 Dekretuaren III. eranskina.

Erregistro hori eguneratuta eta ingurumen-ikuskatzaileen eskura egongo da.

F.2.– Isuritako uraren kalitatea kontrolatzea.

a) Sustatzaileak aurkeztu dituen agirien arabera, analisi hauek egingo dira:

(Ikusi .PDF Fitxategia)

b) Isurketen kontrolen emaitzak honako hauei bidaliko zaizkie:

– Ingurumen-organoari, Ebazpen honetan ezarritako epeak eta baldintzak betez.

c) Isurketak baimenaren eskakizun guztiak betetzen dituela iritziko da, baldin eta puntu honetako a) apartatuan ezarritako kontrol-parametro guztiek betetzen badituzte ebazpen honetan ezarritako mugak.

d) Befesa Zinc Aser S.A.-k ekipamendu egokia izango du isuritako efluentearen emariari, pH-ari, eroankortasunari, tenperaturari eta solidoei buruzko datuak denbora errealean eta etengabe biltegiratzeko eta telekomunikatzeko. Kaudalimetroa urtero egiaztatuko da.

e) Gainera, isurketen autokontrolerako sistema bat izango du datuen eta gorabeheren erregistroekin. Sistema horretan, astero aztertuko dira parametro hauek:

– Metal totalak eta disolbatutakoak (As, Cd, Pb, Zn, Cr, Cu, Fe, Ni, Hg, Ag), kloruroak, sulfatoak, sulfuro disolbatuak eta solido esekiak (24 orduko lagin konposatu batekoak).

f) Baimenaren titularrak egoera onean mantendu beharko ditu isuria jasaten duten obrak eta instalazioak. Horretarako, hodiak begiz ikuskatuko dira, egon daitezkeen anomaliak detektatzeko eta, hala badagokio, neurri zuzentzaile egokiak aurreikusteko.

F.3.– Ferrositaren kontrola.

a) Urtero, Ingurumena Zaintzeko Programaren esparruan, ferrosita-irteerei buruzko informazio xehatua emango zaio ingurumen-organoari, honako alderdi hauek barne:

– Ferrositaren azken hartzailearen identifikazioa. Ferrosita balorizatu edo desagerrarazi den identifikatu beharko da. Ferrositak hondakin izateari utzi badio, helmugaren, erabileraren eta kopuruen berri emango da.

– Ferrosita zabortegian kudeatu behar bada, xede duen hondakindegi motaren onarpen-baldintzak bete beharko ditu: 646/2020 Errege Dekretua, uztailaren 7koa, Hondakinak zabortegietan utziz ezabatzeko jarduera arautzen duena (II. eranskina).

F.4.– Zarata kontrolatzea.

a) Hiru urtean behin akustika-baldintzak kontrolatuko dira jarduera garatzen den lurzatiaren kanpoaldean, etxebizitzetara zarata gehien heltzen den zonan.

b) Neurketa bidezko ebaluazio guztiak Administrazioaren II. mailako entitate laguntzaile batek egin beharko ditu, bat etorriz urriaren 16ko 212/2012 Dekretuan ezarritakoarekin. Entitate horrek UNE-EN ISO/IEC 17025 arauaren araberako egiaztagiria eduki beharko du akustikaren arloan espazio- eta denbora-laginketa egiteko. Nolanahi ere, ingurumen organoak ebaluazio horiek egiten dituzten erakundeek gaitasun tekniko egokia dutela zainduko du.

c) Ebaluazio-metodoak eta prozedurak eta ebaluazio horiei buruzko txostenak ingurumen-organo honek emandako jarraibide teknikoetan ezarritakora egokituko dira.

F.5.– Jardueraren adierazleak kontrolatzea.

Sustatzaileak taula honetan agertzen diren jardueraren gaineko parametro-adierazleen jarraipena egingo du urtero, ingurumenean duten eragina aztertzeko, eta dagokion urteko ingurumena zaintzeko programarekin batera aurkeztuko du.

(Ikusi .PDF Fitxategia)

F.6.– Emaitzak kontrolatzea eta igortzea.

Ingurumena Zaintzeko Programa osatzen duten txostenen eta azterketen emaitzak behar bezala erregistratu behar dira, eta ingurumen-organo honetara bidali, organoaren webgunean dagoen bidalketa-prozedura telematikoari jarraikiz:

https://www.euskadi.eus/baimena/IBI-ippc/web01-tramite/eu/

Era horretan, aipatutako programak zehaztutako aldian egiten diren kontrol guztiak, ibilgura edo itsasora isuritako urei dagozkienak izan ezik, ingurumena zaintzeko programarekin batera bakarrik aurkeztuko dira, eta erreferentziako urtea amaitu ondoren.

Ezarritako baldintzak urratzen diren kasuetan bidali beharko da berehalako jakinarazpena ingurumen-organora, gertatutakoaren berri izan ondoren; horretarako, helbide elektroniko hauek erabili beharko dira: ippc@euskadi.eus e inspeccionambiental@euskadi.eus.

Horrez gain, urtean behin baino gehiagotan egiten diren kontrolak kontrola egiten den urteari dagokion programaren barruan baino ez dira bidaliko.

Emaitza horiek urtero bidaliko dira, martxoaren 31 baino lehen, eta txosten bat aurkeztu beharko da zaintza-programaren emaitzekin batera. Txosten horretan sartuko dira babes- eta zuzenketa-neurrien eta prozeduren kontrolerako eta ingurumenaren kalitaterako sistemen funtzionamendua eta emaitzen analisia; bereziki aipatuko dira epe horretan izandako gorabehera nagusiak, eta haien balizko kausak eta konponbideak azaldu; halaber, laginak nola hartu diren zehaztuko da, aldez aurretik hala egin ez bada.

F.7.– Ingurumena zaintzeko programari buruzko agiri bategina.

Sustatzaileak ingurumena zaintzeko programaren agiri bategina egin beharko du, eta bertan bildu beharko ditu aurkeztutako agirietan proposatutako betebeharrak eta ebazpen honetan jasotakoak. Programa horrek honako hauek zehaztu beharko ditu: kontrolatu beharreko parametroak, parametro bakoitzerako erreferentzia-mailak, analisi edo neurketen maiztasuna, laginketak eta analisiak egiteko teknikak, eta laginak hartzeko puntuen kokapen xehatua. Halaber, dagokion aurrekontua jaso beharko du.

Era berean, ingurumena zaintzeko programak jardueraren adierazleak zehaztu eta adierazle horiek aztertzeko sistematika barruan izan beharko du, horien arabera enpresan bertan ingurumen-hobekuntza ziurtatzeko ezarritako neurrien eta mekanismoen efikazia egiaztatzeko (ingurumen-adierazleak).

F.8.– Ingurumeneko finantza-bermea kontrolatzea, Ingurumena Zaintzeko Programaren (IZP) barruan.

IZParekin batera, honako dokumentu hauek bidali beharko dira, programa aurkezteko prozedura telematikoan gaitutako dokumentu-ereduak erabilita:

– Finantza-bermea eratu behar izanez gero, indarrean dagoen aseguru-polizaren kopia edo eratutako finantza-berme motaren ziurtagiria aurkeztu beharko da. Araua aplikatuz dagokion finantza-bermearen nahitaezko gutxieneko zenbatekoa urtero eguneratuko da, KPIaren arabera.

– Ingurumeneko finantza-bermea eratzetik salbuetsita egonez gero, eta 300.000 eta 2.000.000 euro bitarteko zenbatekoarekin konpon daitezkeen kalteak eragin ditzaketen operadoreak izanez gero (Ingurumen erantzukizunari buruzko urriaren 23ko 26/2007 Legearen 28.b artikulua), erakunde independente batek emandako ziurtagiriaren kopia aurkeztu beharko da; erakunde horrek etengabe atxikirik egon behar du Batasunaren Ingurumen Kudeaketako eta Ikuskaritzako Sistemara (EMAS) edo indarrean den UNE-EN ISO 14001 Ingurumen Kudeaketarako Sistemara.

G) Prebentzio neurriak eta funtzionamendu baldintzak ohiz kanpoko egoeretan.

G.1.– Instalazioa gelditzeko eta abiarazteko eragiketak eta mantentze-lanetarako programatutako eragiketak.

Programatutako urteko mantentze-lanei dagokienez, sortuko diren isurien eta hondakinen zenbatespena egin beharko du enpresak, eta dagokionean, horiek kudeatzeko eta tratatzeko proposamena ere bai.

Instalazioa geldiaraztean nahiz abiaraztean, mantentze-eragiketetan eta ohiz kanpoko egoeretan sortutako hondakinak kudeatu beharko dira, bigarren apartatuko E.3. azpiapartatuan ezarritakoarekin bat etorriz. «Instalazioan ekoitzitako hondakinen kudeaketa zuzena bermatzeko baldintzak» jarraitu beharko dira, baina ez da beharrezkoa izango hondakin horiek baimendutako hondakinen zerrendan jasota egotea.

G.2.– Jarduera etetea.

Jarduerari lege hauek aplikatu behar zaizkio: 4/2015 Legea, ekainaren 25ekoa, lurzorua kutsatzea saihestu eta kutsatutakoa garbitzekoa, eta 9/2005 Errege Dekretua, urtarrilaren 14koa, kutsadura sor dezaketen jardueren zerrenda eta lurzoru kutsatuen adierazpenerako irizpide eta estandarrak ezartzekoa. Horrenbestez, Befesa Zinc Aser, S.A.-k jarduera uzte horren berri eman beharko dio ingurumen-organoari, bi hilabeteko epea agortu baino lehen; jakinarazpen horrekin batera, jarduketa-proposamen bat ere aurkeztu beharko da, erakunde horrek ezar dezan noraino iristen diren bere betebeharrak eta lurzoruaren kalitatea deklaratzeko prozedura hasteko epea noiz hasiko den beranduenez, ekainaren 25eko 4/2015 Legeak 31.3 artikuluan xedatutakoari jarraikiz.

Jarduera bertan behera utzi baino lehen, Befesa Zinc Aser S.A.-k instalazioetan dauden hondakin guztiak kudeatu beharko ditu, ebazpen honen bigarren apartatuaren E.3 azpiapartatuan ezarritakoari jarraikiz.

G.3.– Ezohiko funtzionamendu-kasuan aplikatzeko prebentziozko neurriak eta jarduketak.

Aurkeztutako dokumentuetan egindako proposamenean zehaztuta dauden prebentzio-neurriez eta ezohiko egoeretan aplikatu beharreko funtzionamendu-baldintzez gain, ondorengo apartatuetan aipatzen diren baldintzak bete beharko dira:

a) Instalazioen prebentziozko mantentze-lanak.

Prebentzioko mantentze-lanen eskuliburua eduki beharko da instalazioen egoera bermatzeko, batez ere istripuz isuri edo ihesak daudenean kutsadura ekiditeko eskuragarri dauden bideei eta ezarritako segurtasun-neurriei dagokienez. Ihesik izanez gero, lurzorua babesteko hartu beharreko neurriak zehaztuko dira, eta zehatz adieraziko da hauei dagokien guztia: eraikuntza-materialak (iragazgaiztasuna), biltegiratzeko neurri bereziak (substantzia arriskutsuak), gerta litezkeen ihesei antzemateko neurriak edo gehiegizko betetzeaz ohartarazteko alarma-sistemak, fabrikako kolektoreen sarea zaindu eta garbitzekoak (sistematikoki garbitu beharra, maiztasuna, garbiketa mota) eta lurzoru gaineko jarioak biltzeko sistemak.

Aurreko paragrafoan adierazitako eskuliburuak ikuskapen eta kontrolerako programa jaso beharko du, hauek bilduko dituena: estankotasun-probak, mailen eta adierazleen egoera, balbulak, presioa arintzeko sistema, hormen egoera eta lodieren neurketa, andelen barnealdearen begi-bidezko ikuskapenak (hormena eta estaldurena) eta kubetetako detekzio-sistemen aldizkako kontrol sistematikoa, lurzorua kutsa dezakeen edozein egoerari aurrea hartzeko.

Era berean, atmosferara eta uretara egindako isuriak eta atmosfera nahiz urak kutsatzea prebenitzeko eta zuzentzeko sistemen (arazketa, minimizazioa, etab.) eta ikuskatu eta kontrolatzeko ekipoen egoera ona bermatzeko neurriak jaso beharko dira.

Urak arazteko prozesuan pilatutako hondakin solidoak eta lohiak behar den maiztasunez aterako dira, instalazioa behar bezala ibil dadin. Hondakin horiek ez dira ibai-ibilgura hustuko aldizkako garbiketa egiten denean; bildu egin beharko dira, kudeatzeko edo zabortegi baimendu batera eramateko. Hala dagokionean, hondoan hustubiderik ez duten depositu iragazgaitzetan gordeko dira. Inoiz ez dira pilatuko euri-uren jariatzearen ondorioz ibilgu publikoa kutsatzeko arriskua egon daitekeen guneetan.

Pabiloien barruan zolatak garbitzean sortutako urak tratamendu-lerrora bidaliko dira, edo, bestela, kudeatzaile baimendu batek kudeatuko ditu.

Ez dago baimenduta hondakin-urak bypass bidez isurtzea arazketa-instalazioetan.

Programatutako mantentze-lanetan derrigorrez bypass bidez isuriak egin behar badira, titularrak ingurumen-organo honi jakinaraziko dio aurretiaz, segurtasun-neurrien eta isurketak ingurune hartzailearen kalitatearen gainean duen eragina ahal den neurrian gutxitzeko neurrien funtzionamendua zehaztuz. Bypass horrek aurreikusi gabeko isurketaren bat badago, titularrak segurtasun-neurrien funtzionamendua egiaztatu beharko du, eta dagokion txostena ingurumen-organora bidali (apartatu honetako i) letran adierazitakoari jarraituz).

b) Era berean, erregistro bat eduki behar da, eta bertan, aldizka egindako mantentze-lanak eta antzemandako gorabeherak jasotzen dituena.

c) Titularrak behar diren bitartekoak izango ditu arazketa-instalazioak zuzen ustiatzeko eta ustekabeko isurketak prebenitzeko hartu diren segurtasun-neurriak abian izateko.

d) Erabilitako olioak, efluenteen arazketako hondakinak, besteak beste, eta orokorrean, fabrikan sortutako hondakinak maneiatzeak lurzorua eta ura kutsa dezake. Beraz, isuriak, jarioak edo ihesak gertatzeko arriskua izan dezaketen lur zatien azalera guztiak irazgaiztuko dira.

e) Hondakinak eta hautsezko produktuak higiene- eta segurtasun-baldintza egokietan biltegiratuko dira. Hautsezko hondakinak eta produktuak silo itxietan edo pabiloiaren barruan biltegiratu behar dira, haizeak eraman ez ditzan.

f) Prozesurako behar diren lehengaiak, erregaiak eta produktuak ingurunean ez sakabanatzeko moduan biltegiratuko dira.

g) Segurtasun-tarteei eta babes-neurriei dagokienez, biltegiratze-instalazioek betebehar batzuk konplitu beharko dituzte; zehazki, produktu kimikoak biltegiratzeari buruz indarrean dagoen araudian ezarritakoak.

h) Larrialdirik gertatuz gero, berehala eta eraginkortasunez esku hartzeko beharrezkoak diren material guztiak edukiko dira, kantitate nahikoan: berriro ontziratzeko erreserbako edukiontziak, beharrezkoa izanez gero; gerta daitezkeen jarioei eusteko produktu xurgatzaile selektiboak, segurtasuneko edukiontziak, hesiak eta kaltetutako ingurunean isolatzeko seinaleztapen-elementuak eta norbera babesteko ekipamendu bereziak.

i) Gorabeherarik gertatuz gero, agintariei jakinaraztea.

Ingurunearen edo jardueraren kontrolaren gainean kalteak eragin ditzakeen gorabehera edo anomaliaren bat gertatuz gero, sustatzaileak berehala jakinarazi beharko dio gorabehera edo anomalia hori ingurumen-organoari, ippc@euskadi.eus e inspeccionambiental@euskadi.eus helbide elektronikoak erabiliz.

Jakinarazpenean, gutxienez, alderdi hauek adierazi beharko dira gutxienez:

– Gorabehera mota.

– Jatorriak eta kausak (unean zehaztu daitezkeenak).

– Berehala aplikatutako zuzenketa- edo euste-neurriak.

– Sortutako ondorioak.

– Epe laburrera aurreikusitako jarduketak, halakorik balego.

Gorabehera edo arazo larriren bat izanez gero, eta, betiere istripuz izandako emisio edo isuriren bat egonez gero, berehala jakinarazi beharko zaie SOS DEIAK zerbitzuari eta Erandioko Udalari. Ondoren, gehienez ere 48 orduko epean, istripuaren ondorioz sortutako egoera zehatz-mehatz jasotzen duen txosten bat bidali beharko zaio ingurumen-organoari. Txosten horretan, datu hauek agertuko dira gutxienez:

– Gorabehera mota.

– Gertakaria non, zergatik eta zer ordutan gertatu zen.

– Haren iraupena.

– Ustekabeko isurketa gertatuz gero, emaria eta isuritako gaiak eta ingurune hartzailean antzeman daitekeen eragina zehaztu beharko dira, haren analisia barne hartuta.

– Mailak gainditu badira, isurtzeei buruzko datuak.

– Eragindako kalteen balioespena.

– Hartutako neurri zuzentzaileak.

– Ezohiko gertaera berriro ez gertatzeko prebentzio-neurriak.

– Prebentzio-neurriak eraginkortasunez aplikatzeko aurreikusitako epeak.

Baimenaren baldintzak urratzen dituen isurketa gertatzen bada eta, gainera, pertsonen osasunerako arriskutsua bada edo sistema naturalen orekari modu larrian kalte egin badiezaioke, titularrak berehala etengo du isuri hori, eta, horrez gain, gertaeraren berri eman beharko die Euskal Autonomia Erkidegoko Administrazioko Uraren Euskal Agentziari eta babes zibilaren eta ingurumenaren arloan ardurak dituzten organismoei, baita SOS DEIAK (112) larrialdi-zerbitzuei ere, behar diren neurriak hartu ditzaten.

j) Aurrekoaz gain, industria-isurketarik eginez gero, Befesa Zinc Aser S.A.-k Bilbao Bizkaia Ur Partzuergoak ezarritako larrialdi-protokoloa jarri beharko du abian, kolektorera industria-isurketa egiteko.

k) Larrialdi-egoeretan, babes zibilari buruzko legerian ezarritakoa bete beharko da, eta araudi horretan ezarritako baldintza guztiak bete beharko dira.

G.4.– Jarduera aldi baterako etetea.

Jarduera aldi baterako etetea eskatuz gero, Industriako Emisioei buruzko Erregelamendua onartzen duen urriaren 18ko 815/2013 Errege Dekretuaren 13. artikuluan arautu bezala, Befesa Zinc Aser, S.A.– k, aldi baterako etete-eskabidearekin batera, dokumentu bat bidali beharko du lantegia jardunik gabe egonda ere aplikagarriak zaizkion ingurumen-baimen integratuan ezarritako kontrolak eta eskakizunak nola beteko dituen adierazteko.

Era berean, jarduera berriz hasi baino lehen, instalazioek egokiro funtzionatzen dutela ziurtatu beharko da, ingurumenean eragina duen isurketa edo emisio oro saihesteko.

H) Neurri babesleak eta zuzentzaileak, bai eta ingurumena zaintzeko programa ere, aldatzeko egin ahal izango dira, eta halaber neurtu behar diren parametroak, neurketen maiztasuna eta parametroen mugak, hala komeni bada araudi berria indarrean jartzeagatik edo inplikatutako sistemen egiturari eta funtzionamenduari buruzko ezagutza garrantzitsu berrietara egokitzeko beharragatik. Era berean, neurri babesle eta zuzentzaileak eta ingurumena zaintzeko programa aldatu ahal izango dira jardueraren sustatzaileak hala eskatuta, edo ofizioz, ingurumena zaintzeko programak lortutako emaitzak ikusita.

I) Urtean behin, martxoaren azken eguna baino lehen, Befesa Zinc Aser, S.A.-k aurreko urteko emisio atmosferikoei eta uretara egindako isuriei eta sortutako hondakin mota guztiei buruzko datuen ingurumen-adierazpena igorriko dio Ingurumeneko Sailburuordetzari, E-PRTR-Euskadi Kutsatzaileen Emisio eta Transferentzia Inbentarioa egiteko eta eguneratuta edukitzeko, bat etorriz 508/2007 Errege Dekretuarekin.

Informazio hori bidaltzeko, Euskal Autonomia Erkidegoko Administrazio Orokorrak eskura jarritako kanalak, sistemak edo aplikazio informatikoak erabiliko dira.

Ingurumen-adierazpena publikoa izango da, bat etorriz uztailaren 18ko 27/2006 Legearen xedapenekin. Lege horren bidez, informazioa eskuragarri izateko, herritarren partaidetzarako eta ingurumen-gaietan justizia eskura izateko eskubideak arautzen dira (2003/4/EE eta 2003/2005/EE zuzentarauak jasotzen ditu). Horrez gain, une oro bermatu beharko da Datu Pertsonalak Babesteko eta Eskubide Digitalak Bermatzeko abenduaren 5eko 3/2018 Lege Organikoan ezarritakoa betetzen dela.

J) Instalazioetan aldaketak egin ahal izateko, aldez aurretik honako helbide elektroniko honetan eskuragarri dagoen inprimakia bete beharko da:

https://www.euskadi.eus/contenidos/serv_proc_comunicacion/p_comu_20194 158 89 9329/procedures/proc_20194 158 89 9905/eu_def/adjuntos/Formulario_modificaciones_eu.docx

Organo honen onespena ere eskatu beharko da, abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginaren 10. artikuluan xedatutakoa betetzeko.

Industriako Isurpenen Erregelamendua onartu eta Kutsaduraren Prebentzio eta Kontrol Integratuari buruzko uztailaren 1eko 16/2002 Legea garatzen duen urriaren 18ko 815/2013 Errege Dekretuaren 14.1 artikuluak ezartzen ditu aldaketa funtsezkotzat jotzeko irizpideak.

Nolanahi ere, bat etorriz aipatutako urriaren 18ko 815/2013 Errege Dekretuaren 14.2 artikuluan xedatutakoarekin, irizpide horiek orientagarriak dira, eta ingurumen-organoak kalifikatuko du eskatutako aldaketa, funtsezkotzat edo ez-funtsezkotzat jota, bat etorriz Kutsaduraren Prebentzio eta Kontrol Integratuaren Legearen testu bategina onartzen duen abenduaren 16ko 1/2016 Legegintzako Errege Dekretuaren 10. artikuluan ezarritako irizpideekin.

Era berean, proiektua aldatzen den kasuetan, aplikatzekoa izango da Ingurumen-ebaluazioari buruzko abenduaren 9ko 21/2013 Legearen 7.1.c eta 7.2.c artikuluetan xedatutakoa.

Baldin eta aldaketak lurzoru berria okupatzea aurreikusten badu eta aipatutako lurzoruak lurzorua kutsa dezaketen jarduerak edo instalazioak baditu edo izan baditu, okupatu beharreko kokalekuaren lurzoru-kalitatearen adierazpena eduki beharko da aldaketa gauzatu aurretik, bat etorriz Lurzorua Kutsatzea Saihestu eta Kutsatutakoa Garbitzeko ekainaren 25eko 4/2015 Legean ezarritakoarekin.

«Bosgarrena.– Ingurumen-baimen integratuaren berrikuspena ofizioz egingo da honako kasu hauetan:

a) Instalazioak eragindako kutsaduraren ondorioz ezarritako isurien mugako balioak berrikustea edo berriak hartzea komeni denean.

b) Isuriak nabarmen murriztu daitezkeenean, teknika erabilgarri onenetan egindako aldaketa handien ondorioz gehiegizko kosturik izan gabe.

c) Prozesuaren edo jardueraren funtzionamendu-segurtasuna dela eta, beste teknika batzuk erabili behar badira.

d) Urei buruzko legedian ezarritakoaren arabera, arroaz arduratzen den organismoak irizten badio badirela ingurumen-baimen integratua berrikustea justifikatzen duten inguruabarrak, Estatuko Administrazio Orokorrak kudeatzen dituen arroetako jabari publiko hidraulikora isurtzeari dagokionez. Kasu horretan, arroko organismoak, txosten lotesle bidez, organo eskudunera joko du ingurumen-baimen integratua eman dezan, gehienez hogei eguneko epean hasteko aldaketa-prozesua.

e) Instalazioari aplikagarri zaion sektoreko legediak hala eskatzen badu, edo abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuaren Legearen testu bateginaren 22.3 artikuluari jarraikiz, ingurumen-kalitateko arau berriak edo berrikusiak betetzea beharrezkoa bada.

f) Aplikatu beharreko araudi berria indarrean jartzen bada.

g) Ingurunearen egitura eta funtzionamenduari buruzko ezagutza esanguratsu berrietara egokitzeko beharra ikusten bada, bereziki inplikatutako sistemen hauskortasuna areagotzen dela antzematen bada.

h) Ingurumena zaintzeko programan jasotako emaitzen edo bestelako oharren arabera, ingurumen-inpakturako ezarritako babes-, zuzenketa- edo konpentsazio-neurriak akastunak direla egiaztatzen bada.

i) Abenduaren 16ko 1/2016 Legegintzako Errege Dekretuaren bidez onartutako Kutsaduraren Prebentzio eta Kontrol Integratuaren Legearen testu bateginaren 26. artikuluko 1., 2. eta 3. apartatuetan ezarritakoaren araberako analisia eginda, aldatu egin behar dela ondorioztatzen bada.

Ingurumen-baimen integratua berrikusteak ez dakar kalte-ordaina jasotzeko eskubidea, hala ezarrita baitago abenduaren 16ko 1/2016 Legegintzako Errege Dekretuak onartutako Kutsaduraren prebentzio eta kontrol integratuari buruzko Legearen testu bateginaren 26.5 artikuluan».

«Zazpigarrena.– Honakoek eragingo dute baimen hau iraungitzea:

– Befesa Zinc Aser, S.A. enpresaren nortasun juridikoa iraungitzea indarreko araudiak aurreikusitako kasuetan.

– Burdina eta altzairua ekoizteko fabriketan sortzen diren hondakinak tratatu, berreskuratu eta birziklatzeko jarduera etetea Befesa Zinc Aser, S.A. enpresak eskatuta, urtebete baino gehiagorako, baimendutako aldi baterako etena ez bada.»

Laugarrena.– Abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 5.d) artikuluan xedatutakoari jarraikiz, ebazpen honen xede den zinka duten hondakinak tratatzeko eta berreskuratzeko jardueran gerta litekeen titulartasun-aldaketa oro jakinarazi beharko dio Befesa Zinc Aser S.A.-k ingurumen-organoari, azken horrek onar dezan.

Bosgarrena.– Ingurumen-baimen integratu honetan ezarritako baldintzak ez betetzea arau-hauste astun edo oso astun gisa tipifikatuta dago abenduaren 16ko 1/2016 Legegintzako Errege Dekretuak onartutako Kutsaduraren Prebentzio eta Kontrol Integratuari buruzko Legearen testu bateginaren 31. artikuluari jarraituz, eta aipatutako legearen 32. artikuluan jasotako zehapenak ezartzea ekar dezake.

Seigarrena.– Ebazpen honen edukia jakinaraztea Befesa Zinc Aser S.A.-ri, Erandioko Udalari, ingurumen-baimen integratua berrikusteko prozeduran parte hartu duten erakundeei, eta gainerako interesdunei.

Zazpigarrena.– Ingurumen-baimen integratuaren berrikuspen hau Euskal Herriko Agintaritzaren Aldizkarian argitaratzeko agintzea.

Zortzigarrena.– Ebazpen honek ez dio amaiera ematen administrazio-bideari, eta, beronen aurka, gora jotzeko errekurtsoa aurkez dakioke Industria, Trantsizio Energetiko eta Jasangarritasuneko sailburuari, hilabeteko epean, ebazpen hau jakinarazi eta hurrengo egunetik aurrera, bat etorriz Administrazio Publikoen Administrazio Prozedura Erkidearen urriaren 1eko 39/2015 Legearen 121. artikuluan eta hurrengoetan xedatutakoarekin.

Vitoria-Gasteiz, 2026ko maiatzaren 28a.

Ingurumeneko sailburuordea,

JOSU BILBAO BEGOÑA.

ERANSKINA

BEFESA ZINC ASER S.A.-K ENTZUNALDI-IZAPIDEAN EGINDAKO ALEGAZIOEN ANALISIA

2023ko azaroaren 28an, Befesa Zinc Aser S.A.-k entzunaldi-izapidean bidali zioten ebazpen-proposamenari buruzko alegazio-idazkia aurkeztu zion ingurumen-organoari. Agirian, gai hauek jasotzen dira:

1.– Befesa Zinc Aser enpresaren jarduera gisa aipatzen da zink eta beruna duten hondakinak tratatzea eta berreskuratzea.

BZArentzat interesgarriak diren hondakinak zinka dutenak dira, berunik ez badute ere. Gure helburua ez da Pb berreskuratzea, nahiz eta Zn berreskuratzean lortzen den. Horregatik, BZAren jarduerari buruzko esaldietan berunari buruzko erreferentzia kentzea proposatzen dugu.

Erantzuna:

Alegazioa onartu da, eta ebazpenaren edukia aldatu da.

2.– Aldatzea Befesa Zinc Aser S.A.-ri 2007ko uztailaren 24ko Ebazpenaren bidez emandako ingurumen-baimen integratua (zinka duten hondakinak tratatzeko eta berreskuratzeko jarduera), eta, ildo horretan, ebazpen horretako lehenengo, bigarren, bosgarren eta zazpigarren apartatuak ere aldatzea. Honela geratuko dira idatzita:

Proposamena, ebazpen honen bidez ingurumen-baimen integratuaren (IBI) atal guztiak jasoko dituen testu bateratua sartzeko, eta ez soilik atal horien aldaketak.

Erantzuna:

Ebazpen hau ingurumen-baimen integratu osoaren bertsio bategin eguneratua da, eta dagozkion apartatuetako aldaketak barne hartzen ditu.

3.– Proposamenaren testuan ez da berariaz jasotzen hondakinen ekoizle/kudeatzailearen koderik.

Hondakinak kudeatzeko/ekoizteko figura horiei guztiei dagozkien BZAren kode espezifikoak gure IBIaren zenbakia ez badira, eta kontuan hartuta erakunde jakin batzuek horiek eskatu ohi dituztela, proposatzen dugu IBIan hondakinen kudeatzaile/ekoizle (txikia edo ez) gisako kode espezifikoak (arriskutsua eta/edo ez-arriskutsua) sartzea edo informazio hori duen ziurtagiri bat izatea.

Erantzuna:

BZAren baimen-zenbakia 16 – I-01-000000000053 da, eta horri lotuta daude hondakinak kudeatzeko eta ekoizteko eragiketa guztiak.

4.– Instalazioak 18 ditu, eta edukiera 2.550 m³ ingurukoa da guztira hautsezko eta soltean tratatu gabe jasotako lehengaia hartzeko.

Paragrafo hori ulergaitza da. Gainera, uste dugu egokiagoa dela E1.1 puntura mugitzea.

Proposamena: apartatu honetatik paragrafo hori ezabatzea eta E.1.1 atalera eramatea: instalazioak 18 silo ditu, eta edukiera 2.550 m³ ingurukoa da guztira hautsezko lehengaiak zisterna-kamioietan jasotzeko. Gainera, nabe itxi bat dago (estalita dago eta lurzoru estankoa du) hautsezko lehengaiak soltean hartzeko, eta bigarren nabe estali bat (hori ere estalita dago eta lurzoru estankoa du). Bigarren horretan, hasiera batean, azken produktua biltegiratzen da, baina, aldez aurretik segmentatuta, ontziratu gabeko altzairugintzako hautsa ere gorde liteke.

Erantzuna:

Alegazioa onartu da, eta ebazpenaren edukia aldatu da.

5.– Tratamendua eta berreskuratzea bi prozesuren bidez egiten da: bata pirometalurgikoa (Waelz prozesua) eta bestea hidrometalurgikoa (Double Leaching Waelz Oxide prozesua).

Paragrafo horren ondoren testu hau sartzea proposatzen dugu: «Prozesuaren ondoriozko produktu nagusia Waelz oxidoa da.»

Erantzuna:

Alegazioa onartu da, eta ebazpenaren edukia aldatu da.

6.– Instalazioan tratatu beharreko hondakinak, gehienez 160.000 tona urtean...

Lehorrean tratatzeko gaitasuna 160000 t/urte bada, gaitasun onargarriak handiagoa izan behar du, bi arrazoirengatik:

1) Hondakinak hezetasun pixka batekin jasotzen dira eta horrek onartutako pisua areagotu dezake (jasotzen den moduan pisatzen da, hau da, heze).

2) Ekoizpen-prozesuaren jarraipena bermatuko duen lehengaiaren gutxieneko izakinak behar dira.

Horregatik, aldaketa hau proposatzen dugu: «Instalazioan tratatu beharreko hondakinak: gehienez 160.000 tona lehor prozesatuko dira urtean...»

Erantzuna:

Alegazioa onartu da, eta ebazpenaren edukia aldatu da.

7.– Oxidazio-labeko zink-kontzentratuak (EHZ kodea: 10 05 99).

Ikus Ingurumen sailburuordearen 2021eko irailaren 21eko Ebazpena, zeinaren bidez instalazioaren aldaketa ez-funtsezkotzat jo baitzen Befesa Zinc Aser, S.A.– k Erandion zinka duten hondakinak tratatu eta berreskuratzeko jardueran jakinarazitako aldaketa-proiektua.

Ebazpen horretan, hondakin moten eta horien EHZ (Europako Hondakinen Zerrenda) kodeen taula eguneratuta agertzen da. Bertan, «Oxidazio-labeko zink-kontzentratuak» izeneko hondakinari EHZ kodea aldatzen zaio (100599tik 100510*ra), eta, gainera, «Beste kategorietan zehaztuta ez dauden beste hondakin batzuk» izeneko hondakin berri bat sartzen da, 100599 kodearekin.

Erantzuna:

Alegazioa onartu da, eta ebazpenaren edukia aldatu da.

8.– Hondakin onargarrien taula.

Interesgarria eta erabilgarria izango litzateke IBIaz bestelako dokumentu ziurtatu bat izatea, kudeatzailearen kodea eta hondakin onargarriak soilik jasoko dituena, ziurtagiri hori gure bezeroei eman ahal izateko.

Erantzuna:

Ebazpeneko E.1.1 Hondakin onargarriak atalak barne hartzen ditu baimendutako kudeaketa-eragiketa bakoitzerako hondakin onargarriak.

9.– «Araztegiko lohiak» izeneko hondakinen kasuan, ulertu behar da horien barne daudela instalazioko efluenteak tratatzean (iragazteko opilak) sortutako hondakinak ere.

Kontuan hartuta gure waelz labean sortutako hondakin propio mota batzuk (E.3.1 eta E.3.2 ataletan adierazitako hondakin arriskutsuak eta ez-arriskutsuak) tratatzeko bideragarritasun teknikoa eta sortutako kopuru txikiak, sortutako hondakin batzuen autokudeaketa gehitzea eskatzen dugu. Horregatik, paragrafoaren ordez testu hauek gehitzea proposatzen dugu:

E.3.1 apartatuan (Sortutako hondakin arriskutsuak).

«Instalazioan sortutako hondakin hauek autokudeatu eta labean tratatzea onartuko da:

13 02 05* «Koipe erabiliak».

13 02 05* «Olio erabiliak».

13 07 01* «Gasolio erabilia».

15 02 02* «Olioz, koipez edo prozesuko materialez bustitako ehunak».

E.3.2 apartatuan (Sortutako hondakin ez-arriskutsuak).

«Instalazioan sortutako hondakin hauek autokudeatu eta labean tratatzea onartuko da:

15 01 13 «Zura»

16 11 04 «Adreilu erregogor erabilia»

Erantzuna:

Apirilaren 8ko 7/2022 Legeak berariaz arautzen du autokudeaketa, eta 20.1 artikuluan adierazten du hasierako ekoizleak bere kabuz tratatu ditzakeela bere hondakinak, baldin eta tratamendu-eragiketa egiteko dagokion baimena badu.

Hortaz, alderdi horiek eskatzeko, instalazioaren baimenaren aldaketa jakinarazi beharko da.

10.– Euskal Autonomia Erkidegoko (EAE) Hondakin Arriskutsuak Kudeatzeko Planaren helburuak betetzen direla bermatzeko, lurralde horretan kokatutako enpresek egindako altzairugintzako hautsak onartzeko eskaerak lehentasunez hartuko dira kontuan. Instalazioetan lurraldetik bertatik ez datozen beste hondakin batzuen edo altzairugintzako beste hauts batzuen tratamendua aurretik adierazitakoa betetzearen mende geratuko da.

Hurbiltasun-printzipioa lehenesteko, kontuan hartu behar da ezaugarri tekniko eta ekonomiko komertzialen berdintasuna.

Horregatik, «lehenetsiaren» ondoren, hau gehitzea proposatzen dugu: «baldintza tekniko (hondakinaren kalitatea) eta ekonomiko-komertzial berdinetan».

Erantzuna:

Apirilaren 8ko 7/2022 Legearen 9. artikuluaren arabera, hondakin horiek sorlekutik hurbilen dauden instalazioetan tratatzearen alde egingo da, ingurumena eta osasun publikoa ahalik eta gehien babestuko dutela bermatuko duten teknologia eta metodo egokienak erabilita eta hondakinen kudeaketan ingurumenaren eraginkortasun- eta babes-eskakizunak kontuan hartuta.

Era berean, Euskadiko hondakinak prebenitu eta kudeatzeko 2030eko planaren oinarrizko printzipioetako bat autosufizientzia-, hurbiltasun- eta unibertsaltasun-printzipioa da. Printzipio horren arabera: batez ere garraioari lotutako ingurumen-arriskuak eta -inpaktuak minimizatzeko, hondakinak hurbilen dauden instalazio egokietan tratatu beharko dira, eta horrek azpiegitura-sare nahikoa ezartzea eskatuko du. Sare horrek antzeko arreta-baldintzak bermatu beharko ditu edozein ekoizlerentzat, kokapen geografikoa eta hondakin mota edozein izanda ere.

Bestalde, BZAk testua aldatzeko egindako proposamena ez da zehatza, eta ingurumen-organo honek ezin ditu identifikatu aipatzen dituen hondakinen izaera, jatorria eta osaera; halaber, eta alegatzaileari aukera ematen dio hondakinak onartzeko baldintzak arbitrarioki ezartzeko.

Horregatik guztiagatik, aurkeztutako alegazioa ez da onartu.

11.– Ezin izango dira inola ere onartu hondakin sukoiak, leherkorrak edo 50 ppm-tik gorako PCB dutenak.

• Jasotzen ditugun hondakinak, beren izaera eta jatorria direla eta, ez dira inoiz sukoiak edo leherkorrak.

• PCBei dagokienez, txatarrek eta altzairutegi bakoitzak erabiltzen duen prestaketak baldintzatzen dute, baina hondakinaren ekoizleak ziurtatu behar du, 850/2004 Erregelamendu bateratuaren arabera.

Horregatik, paragrafo hori kentzea proposatzen da.

Erantzuna:

2016ko ekainaren 30eko Europar Batasuneko Aldizkari Ofizialean argitaratu zen Batzordearen 2016ko ekainaren 13ko Betearazpen Erabakiaren arabera, zeinaren bidez ezartzen baitira teknika erabilgarri onenei (TEO) buruzko ondorioak, metal ez-burdinazkoen industrietarako Europako Parlamentuaren eta Kontseiluaren 2010/75/EB Zuzentarauaren arabera (2016/1032/EB Erabakia), izaera horretako hondakinik ez kudeatzea eskatzen da.

Hortaz, ez da alegazioa onartu.

12.– g) Baldin eta hondakinak desagertu edo galtzen badira edo ihesen bat gertatzen bada, berehala jakinarazi beharko zaie gertatutakoa Ingurumen Jasangarritasuneko Sailburuordetza honi eta Erandioko Udalari.

Erandioko Udalari jakinarazteko betebeharra zehaztea proposatzen da, ez baitu ez bitartekorik, ez jarduteko eskumenik, gertakaria udalerrian gertatzen den kasuetan izan ezik. Proposatu den testua:

«g) Baldin eta hondakinak desagertu edo galtzen badira edo ihesen bat gertatzen bada, berehala jakinarazi beharko zaie gertatutakoa Ingurumen Jasangarritasuneko Sailburuordetzari eta gertakaria udalerrian jazo bada, Erandioko Udalari.»

Alegazio hori bera aurkezten da paragrafo bererako, hemen:

• Hirugarren puntua. Bigarrena. E.3. Instalazioan sortutako hondakinak egoki kudeatzen direla bermatzeko baldintzak.

• Hirugarren puntua. Bigarrena. E.3.1. Hondakin arriskutsuak, h) apartatua.

Erantzuna:

Alegazioa onartu da, eta ebazpenaren edukia aldatu da.

13.– Urtean 10 tona hondakin ez-arriskutsu baino gehiago sortuz gero, Hondakinak eta Lurzoru Kutsatuak arautu eta Ekonomia Zirkularra bultzatzeko apirilaren 8ko 7/2022 Legearen 64. artikuluaren arabera, Befesa Zinc Aser, S.A.-k formatu elektronikoko artxibo kronologiko bat izan beharko du, non jasoko baitira, ordena kronologikoan, sortutako hondakinen kopurua, mota eta jatorria, bai eta berrerabiltzeko, birziklatzeko, beste balorizazio-eragiketa batzuk egiteko eta deuseztatzeko produktu, material edo substantzien eta horien ondoriozko hondakinen kopurua ere; eta, hala badagokio, eragiketa horien ondorioz sortutako hondakinaren helmuga, bilketaren maiztasuna, garraiobidea eta aurreikusitako tratamendu-metodoa ere inskribatuko dira, bai eta produktu, material eta substantzien helmuga ere.

Kontuan hartuta E.1.4. puntuko paragrafo hori jasotako hondakinei buruzko E.1 puntuaren barruan dagoela (ez ekoitzitakoei buruzkoa), ez da argi ulertzen adierazitakoa.

Gure ustez, paragrafo hori ekoitzitako hondakinei buruzko E.3 puntuan egon beharko litzateke. Baina, jasotako hondakinei dagokienez, testua honela egokitu beharko litzateke:

• Hondakin ez-arriskutsuetara mugatzen den argitzea.

• Artxibo kronologikoan zer informazio sartu behar den zehaztea; izan ere, kontuan izan behar da eskatzen diren datu asko ez dituela hondakinaren kudeatzaileak erabaki, eta ez daudela haren eskura.

Erantzuna:

Alegazioa onartu da, eta ebazpenaren edukia aldatu da.

14.– Artxibo kronologiko hori bost urtez gorde beharko da gutxienez eta urtero bidali beharko da Ingurumen Jasangarritasuneko Sailburuordetzara, dagokion urteko ingurumena zaintzeko programaren barruan.

– Jasotako hondakinei buruzko paragrafo honetan, artxibatze-aldia 5 urtekoa dela zehazten da, baina sortutako hondakinei buruzko E.3.1 eta E.3.2 apartatuetan artxibatze-aldia 3 urtekoa da.

Horregatik, kasu guztietan baieztatzeko eskatzen dugu ea artxibo kronologikoa gorde beharreko urte kopurua atal bakoitzean hondakin bakoitzerako adierazitakoa den edo eguneratu egin behar diren.

– Aurreko paragrafoetan adierazitakotik ondorioztatzen denez, ulertzen da artxibo kronologikoan CT, DI eta NT agiriak ere barne daudela. Halaber, adierazi da fitxategi kronologiko hori formatu elektronikoan egongo dela eskuragai. Jasotzen diren milaka kamioien ondorioz urtero sortzen den paper-kopurua kontuan hartuta, baliagarria eta komenigarria litzateke CT-DI-NT eta lotutako dokumentuetarako finkatutako kontserbazio-aldiaren harira honako hau argitzea:

• Administrazioaren tresna informatikoan (IKS, eSIR edo beste plataforma batzuk) sartuta dauden dokumentuak paper-formatuan gorde behar diren.

• Eskaneatutako dokumentuek balio duten edo jatorrizkoa paper-euskarrian mantendu behar diren tresna informatiko batean sartuta ez dauden dokumentuak (adibidez, baskulako tiketak, etab.).

Alegazio horiek aurkeztu dira, halaber, apartatu hauen testuari dagokionez:

• E.3.1. Hondakin arriskutsuak.

• E.3.2. Hondakin ez-arriskutsuak.

Erantzuna:

Apirilaren 8ko 7/2022 Legearen 64. artikuluak ezartzen du artxibo kronologikoko informazioa gutxienez bost urtez gordeko dela.

Bestalde, Estatuaren barruko hondakinen lekualdaketa arautzen duen ekainaren 2ko 553/2020 Errege Dekretuaren 6. artikuluak honako hau ezartzen du: «Garraioaren operadoreak eta lekualdaketan esku hartzen duten kudeatzaileek, garraiolaria barne, informazioa sartuko dute beren artxibo kronologikoetan, eta gutxienez hiru urtez gordeko dute identifikazio-agiriaren kopia bat (hartzaileak sinatuta), non hondakinak entregatu eta onartu direla jasoko baita».

Alegazioa onartu da, eta ebazpenaren edukia aldatu da.

15.– Gainera, aurreikusten bada zabortegian deuseztatu beharko direla inportatu beharreko hondakinak zein inportatutako hondakinen helmugako instalazioan aurreikusitako balorizatze- eta deuseztatze-tratamendutik lortutako korronte nabarmenen bat, orduan, kontsulta bat egin beharko zaio organo honi, justifikatuz aurreikusitako mugaz gaindiko lekualdaketak bat datozela EAEko Hondakinak Prebenitu eta Kudeatzeko 2030 Planean zehaztutako hondakinen inguruko plangintzaren helburuekin.

Ulertzen den arren errekerimendu horren helburua hondakinen inportazio justifikatu gabea eragoztea dela, beharrezkotzat jotzen dugu zehaztea, honako alderdi hauek kontuan hartuta:

• gure prozesu metalurgikoa altzairugintzako hautsa izeneko hondakin arriskutsua balorizatzeko tratamendua dela.

• prozesuan, Estatuko altzairugintzako hautsekin batera, inguruko herrialdeetatik inportatutako altzairugintzako hautsak ere balorizatzen dira.

• Ferrosita prozesu metalurgiko horretan lortutako azpiproduktua da.

• egoera jakin batzuetan, baliteke soberako ferrosita zabortegi batera bidali behar izatea.

Horregatik, eskatzen dugu nolabait adierazteko edo zehazteko letra lodiz nabarmendutako testua ez dela inportatutako altzairugintzako hautsen tratamendutik sortutako ferrositari buruzkoa, zabortegirako bidean dagoenean.

Erantzuna:

E.1.6 atalean jasota dago hondakin izateari utziko diola ferrositak honako erabilera hauen kasuan:

– Berriz Recycling Companyren (Artxandako hondakin ez-arriskutsuen zabortegia) eta Garbikerren (Artigas eta Jata) hondakin ez-arriskutsuen zabortegietako egokitzapenean eta eraikuntza-obretan agregakin gisa erabiltzean.

Agregakin gisa erabiltzen denean hormigoia eta nahasketa bituminosoak fabrikatzeari lotutako jardueretan.

– Bilboko portuko betelan-zabalguneetan oinarri-azpietarako agregakin gisa erabiltzean.

Bestalde, Europako Parlamentuaren eta Kontseiluaren 2024ko apirilaren 11ko 2024/1157 Erregelamenduak (hondakinen lekualdaketei buruzkoa, 1257/2013 eta 2020/1056 Erregelamenduak aldatzen ditu eta 1013/2006 Erregelamendua indargabetzen du), informazioa emateko betebeharra ezartzen du ondorengo tarteko eta amaierako balorizazio-eragiketak edo tarteko edo amaierako desagerrarazte-eragiketak aurreikusten dituzten instalazio guztiei buruz.

Hortaz, ez da alegazioa onartu.

16.– Apartatu batzuk errepikatu egiten dira E.3 apartatu orokorrean (sortutako hondakinei buruzkoa) eta E.3.1 (Hondakin arriskutsuak) eta E.3.2 (hondakin ez-arriskutsuak) azpiapartatuetan.

Errepikakorra ez izateko, proposatzen da sortutako hondakin arriskutsuei eta hondakin ez-arriskutsuei berdin eragiten dieten puntuak E.3 atal orokorrean jasotzea, eta E.3.1 eta E.3.2 azpiapartatuetan hondakin arriskutsuei eta ez-arriskutsuei buruzko alderdi espezifikoak soilik jasotzea, hurrenez hurren.

Erantzuna:

Alegazioa onartu da, eta ebazpenaren edukia aldatu da.

17.– Taulako «hondakin-uren mota» zutabean, lerro berean aipatzen dira euri-urak eta isurketa-urak.

Argitu behar da euri-urak ez direla kolektorera isurtzen. Ur-hornitzaileetatik jasotzen diren urekin gertatu bezala, euri-urak ere ekoizpen-prozesuan aprobetxatzen dira.

Horregatik, sareko urak ez dira aipatzen hondakin-ur gisa, eta, hortaz, euri-urak ere ez lirateke sartu behar hondakin-ur gisa.

Proposamena: taulan euri-uren erreferentzia kentzea.

Alegazio hori bera aurkeztu da F.2. a) puntuko taulari dagokionez.

Erantzuna:

Alegazioa onartu da, eta ebazpenaren edukia aldatu da.

18.– Befesa Zinc Aser S.A.-k dokumentu bakar bat aurkeztuko du, 2020ko urtarrilaren 23ko Aginduaren bidez onartutako jarraibide teknikoari jarraikiz, edukiei eta entrega-aldizkakotasunari dagokienez; gutxienez, 5 urtean behin.

Dokumentu bakarra osatzen duten txostenen aldizkakotasun desberdinak kontuan hartuta (oinarrizko txostena behin egiten da; egoerari buruzko aldizkako txostena 5 urtean behin; uren kontrolari eta jarraipenari buruzko txostena 5 urtean behin; eta lurren kontrolari eta jarraipenari buruzkoa 10 urtean behin), adierazitakoaren arabera, horietako bat eguneratzen den bakoitzean guztiak aurkeztu beharko lirateke, urte desberdinetakoak izan arren.

Hori argitzeko eskatzen dugu.

Erantzuna:

2020ko urtarrilaren 23ko Ingurumen, Lurralde Plangintza eta Etxebizitzako sailburuaren Agindua, zeinaren bidez jarraibide tekniko bat onartzen baita, Kutsaduraren prebentzio eta kontrol integratuari buruzko Legearen testu bategina onartzen duen abenduaren 16ko 1/2016 Legegintzako Errege Dekretuan xedatutakoa interpretatzeari eta aplikatzeari buruzkoa, lurzoruaren eta lurpeko uren egoera zehazteko oinarrizko txosten bat eskatzeari lotua.

Agindu horretan, zehatz-mehatz azaltzen dira IPPC jardueren betebeharrak, lurzorua eta lurpeko urak babesteari dagokionez. Betebehar horien artean daude lurzoruaren egoerari buruzko aurretiazko/aldizkako txostena 5 urtean behin aurkeztea, oinarrizko txostena aurkeztea eta lurpeko uren aldizkako kontrola egitea gutxienez bost urtean behin, eta lurzoruarena hamar urtean behin egitea.

Era berean, Aginduak ezartzen du deskribatutako betebeharrak edo ondorengo ekintzak betetzen direla egiaztatzen duten dokumentuak (aldizkako egoera-txostenak eta lurzoruen eta lurpeko uren kontrolaren eta jarraipenaren emaitzak) batera aurkeztuko direla dokumentu bakar batean.

19.– Bildutako kutsatzaileak eta horien neurketa-maiztasuna.

Hg-ren neurketa-maiztasunean inkongruentzia bat dago; alde batetik, Cd+Hg-ren lerroan lau hilean behineko maiztasuna adierazten da, eta, bestetik, Hg-ren lerroan, berriz, urterokoa.

Kontuan hartuta, parametro batzuetarako, isuritako balioen datu historikoak gehieneko isurketa-balioen oso azpitik daudela (baita kasu batzuetan detekzio-mugaren azpitik ere), kontrol-maiztasuna taulan adierazitakoaren arabera aldatzeko eskatzen dugu. Horretarako, proposatzen da parametro batzuen maiztasuna handitzea eta besteena murriztea.

Erantzuna:

Alegazioa onartu da, eta ebazpenaren edukia aldatu da.

20.– Befesa Zinc Aser S.A.-ren instalazioetan jasotako koke eta antrazita partida bakoitza aztertuko da, sustatzaileak 2007ko martxoaren 14an egindako proposamenaren arabera.

Apartatu hori 2007ko IBIan sartu zen orduan ez zegoelako KOLentzako gehieneko isurketa-baliorik eta, nolabait, onar zitekeen agente murriztaileen lurrunkorren edukia gutxi gorabehera jarraitua eta kontrolatua bazen KOLak gutxi gorabehera kontrolatuta egongo zirela. BATC berrietan KOLetarako gehieneko isurketa-balio bat finkatzen denez, ez du zentzurik paragrafo hori guztia IBI berrian sartzeak.

Horregatik, apartatu hori kentzea proposatzen da, ez baitakar ekarpenik.

Erantzuna:

Alegazioa onartu da, eta ebazpenaren edukia aldatu da.

21.– Sei hilean behin, saiakuntza eta analisi hauek egingo ditu IKOk:

– Osagai nagusiak dituen produktuaren ezaugarriak.

– «EP» lixibiazio-testa: ekotoxikotasuna.

– EN12457 lixibiazio-testa, 3. zatia, eta lixibiatuaren analisia: pH-a, eroankortasuna, metalak (Zn, Pb, Cd, Cr, Ni eta As).

1) Ekotoxikotasuna (EP eta EC5O). Saiakuntza hori ez da erabiltzen, eta uste dugu hura garatzen duen ministro-agindua (1989ko urriaren 13ko Agindua, hondakin toxiko eta arriskutsuak bereizteko metodoak zehazten dituena) ez dagoela indarrean. Proposamena: kentzeko eskatzen dugu.

2) EN 12457-3 lixibiazioa. Lixibiazio-saiakuntzaren 3. zatia ez da oso ohikoa mota horretako laginetarako, eta batez ere 4. zatia eskatzen da, errazagoa baita. Horregatik guztiagatik, EN 12457 (4. zatia) lixibazio-testa egiteko eskatzen dugu, EN 12457 3. zatiaren ordez.

Erantzuna:

Alegazioa zati batean onartu da.

Ferrosita hondakintzat hartzen bada, eta, hortaz, zabortegian kudeatu behar bada, xede duen hondakindegi motaren onarpen- baldintzak bete beharko ditu: 646/2020 Errege Dekretua, uztailaren 7koa, Hondakinak zabortegietan utziz ezabatzeko jarduera arautzen duena (II. eranskina).

22.– Hautsezko produktuak biltegiratzeko, silo itxiak edo hautsa xurgatzeko sistemak dituzten pabiloi estali eta itxiak eduki beharko dira.

Gure pabiloi estali eta itxietako xurgapen-sistemak teknikoki bideraezinak dira, bolumen handia dutelako. Pabiloi itxi horietan, xurgatzea ordezteko beste sistema batzuk daude, besteak beste lainoztapena.

Horregatik, paragrafo hori beste honekin ordeztea proposatzen dugu:

«e) Hautsezko produktuak biltegiratzeko, hautsa xurgatzeko sistemak dituzten silo itxiak edukiko dira. Era berean, pabiloi estali eta itxietan biltegiratu ahal izango dira. Pabiloi horiek hautsa hartzeko eta atxikitzeko sistemak izango dituzte, teknikoki eta ekonomikoki bideragarriak bada.»

Erantzuna:

Apirilaren 8ko 7/2022 Legearen 21. artikuluak ezartzen du hondakinak higiene- eta segurtasun-baldintza egokietan biltegiratu behar direla. Horrek esan nahi du, hautsezko hondakinen kasuan, beharrezko neurriak hartu behar direla horiek barreiatzea, isurtzea edo kutsatzea saihesteko.

Gaur egun, hautsezko hondakinak silo itxietan edo pabiloi estali eta guztiz itxietan biltegiratzen dira. Pabiloietan, hautsa barreiatzea saihesteko, ura lainoztatzen da, pabiloiko hautsa xurgatzeko sistemaren alternatiba gisa.

Uste dugu BZAk hartutako neurriak egokiak direla hautsezko hondakinak barreiatzea, isurtzea edo kutsatzea saihesteko. Hortaz, alegazioa zati batean onartu da, eta ebazpenaren edukia aldatu da.

Azterketa dokumentala