Euskal Herriko Agintaritzaren Aldizkaria

145. zk., 2026ko uztailaren 31, ostirala

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

INDUSTRIA, TRANTSIZIO ENERGETIKO ETA JASANGARRITASUNAREN SAILA

3432

EBAZPENA, 2026ko ekainaren 30ekoa, Ingurumen Administrazioaren zuzendariarena, zeinaren bidez formulatzen baita Elgoibarren (Gipuzkoa) 9003 eta 9010 euskarrien artean Elgoibar-Lasao 1 eta 2 zirkuitu bikoitzeko 30 kV-ko goi tentsioko linea elektrikoak eraberritzeko i-DE, Redes Eléctricas Inteligentes S.A.U.k sustatutako proiektuaren ingurumen-inpaktuaren txostena.

AURREKARIAK

2026ko martxoaren 11n, Industria, Trantsizio Energetiko eta Jasangarritasunaren Sailaren Gipuzkoako lurralde-ordezkaritzak Ingurumen Administrazioaren zuzendariari eskatu zion has zezala Elgoibarren 9003 eta 9010 euskarrien artean Elgoibar-Lasao 1 eta 2 zirkuitu bikoitzeko 30 kV-ko goi tentsioko linea elektrikoak eraberritzeko i-DE, Redes Eléctricas Inteligentes S.A.U.k sustatutako proiektuaren ingurumen-inpaktuaren ebaluazio sinplifikatua.

Euskadiko Ingurumen Administrazioaren abenduaren 9ko 10/2021 Legearen aplikazio-esparruan egin da eskabidea, eta arau horrek arautzen ez dituen alderdietan, berriz, Ingurumen-ebaluazioari buruzko abenduaren 9ko 21/2013 Legearen aplikazio-esparruan.

Euskadiko Ingurumen Administrazioaren abenduaren 9ko 10/2021 Legearen 79. artikulua betez, Eusko Jaurlaritzako Ingurumen Administrazioaren zuzendariak kontsulta-izapidea abiarazi zuen 2026ko apirilaren 1ean, ukitutako administrazio publikoei eta interesdunei kontsulta egiteko. Era berean, organo substantiboari jakinarazi zitzaion izapidea hasi zela.

Halaber, espedientean jasotako dokumentuak eskuragarri egon ziren Industria, Trantsizio Energetiko eta Jasangarritasunaren Saileko web-orrian, interesdun orok aukera izan zezan ingurumenaren arloan egokitzat jotzen zituen oharrak egiteko.

Jasotako txostenak aztertuta, egiaztatu da ingurumen-organoak badituela ingurumen-inpaktuaren txostena egiteko behar diren judizio-elementu guztiak, Euskadiko Ingurumen Administrazioaren abenduaren 9ko 10/2021 Legearen 79. artikuluari jarraikiz.

ZUZENBIDEKO OINARRIAK

Euskadiko Ingurumen Administrazioaren abenduaren 9ko 10/2021 Legearen 60. artikuluan xedatutakoaren arabera, dagokion ingurumen-ebaluazioko prozeduraren mende jarri behar dira, nahitaez, ingurumenean ondorio nabarmenak izan ditzaketen plan, programa eta proiektuak, bai eta haien aldaketak eta berrikuspenak ere, ingurumen-babes handia bermatzeko eta garapen jasangarria sustatzeko.

Proiektua ingurumen-inpaktuaren ebaluazio sinplifikatuaren mende dago; izan ere, aurretik dagoen proiektu bate aldaketa da, eta, berez, bete egiten du Euskadiko Ingurumen Administrazioaren abenduaren 9ko 10/2021 Legearen II.E eranskineko 4.b) paragrafoan xedatutakoa: «15 kV-eko edo tentsio handiagoa eta 1 km-ko edo gehiagoko luzera duten energia elektrikoaren transmisiorako lineak eraikitzea, oso-osorik lurzoru urbanizatuaren zorupetik igarotzen direnean izan ezik, bai eta haiekin loturiko azpiestazioak ere».

Proiektuaren ingurumen-inpaktuaren ebaluazio-espedientean dauden dokumentu teknikoak eta txostenak aztertu ondoren, eta ikusita proiektuaren ingurumen-dokumentua zuzena dela eta indarrean dagoen araudian xedatutako alderdietara egokitzen dela, Ingurumen Administrazioaren Zuzendaritzak ingurumen-inpaktuaren txosten hau ematen du (organo hori da eskuduna Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duen abenduaren 3ko 410/2024 Dekretuaren arabera). Txosten horretan aztertzen da ea aipatutako proiektuak ingurumenean ondorio nabarmenak izan ditzakeen eta, horren ondorioz, proiektuari ingurumen-inpaktuaren ebaluazio arruntaren prozedura egin behar zaion; hala ez den kasuetan, proiektua garatzean ingurumena egokiro babesteko bete beharreko baldintzak ezartzen dira txostenean.

Honako hauek hartu dira kontuan: 10/2021 Legea, abenduaren 9koa, Euskadiko Ingurumen Administrazioarena; 21/2013 Legea, abenduaren 9koa, Ingurumen-ebaluazioari buruzkoa; 410/2024 Dekretua, abenduaren 3koa, Industria, Trantsizio Energetiko eta Jasangarritasunaren Sailaren egitura organikoa eta funtzionala ezartzen duena; 39/2015 Legea, urriaren 1ekoa, Administrazio Publikoen Administrazio Prozedura Erkidearena; 40/2015 Legea, urriaren 1ekoa, Sektore Publikoaren Araubide Juridikoarena, eta aplikatzekoa den gainerako araudia. Horrenbestez, hau

EBAZTEN DUT:

Lehenengoa.– Formulatzea Elgoibarren (Gipuzkoa) 9003 eta 9010 euskarrien artean Elgoibar-Lasao 1 eta 2 zirkuitu bikoitzeko 30 kV-ko goi tentsioko linea elektrikoak eraberritzeko i-DE, Redes Eléctricas Inteligentes S.A.U.k sustatutako proiektuaren ingurumen-inpaktuaren txostena, honako baldintza hauetan:

A) Proiektuaren xedea da aipatutako linea elektrikoaren 1,93 km-ko luzerako zati bat berritzeko beharrezkoak diren lanak egitea.

B) Elgoibarren (Gipuzkoa) 9003 eta 9010 euskarrien artean Elgoibar-Lasao 1 eta 2 zirkuitu bikoitzeko 30 kV-ko goi tentsioko linea elektrikoak eraberritzeko proiektuaren ingurumen-inpaktuaren txostena egiten duen ebazpen honetan (aurrerantzean, Proiektua), proiektuaren ingurumen-dokumentuaren edukia aztertzen da, abenduaren 9ko 10/2021 Legearen II.F eranskinean ezarritako irizpideekin bat:

1.– Proiektuaren ezaugarriak.

Hauek dira aurreikusitako jarduketak: 6 sareta-euskarri metaliko berri eraikitzea egungo 6 euskarri ordezkatzeko, eta zirkuitu bikoitzeko linea elektriko berri bat instalatzea proiektuaren xede den tartearen 1 930 metroetan. Ordezkatuko diren egungo 6 euskarriak desmuntatuko dira, baita haien artean dagoen eroalea ere.

Euskarri berriak jartzeko beharrezkoak diren lanerako plataformek 50 m²-ko azalera izango dute euskarri bakoitzeko. Proiektuaren arabera, obra-fasean aldi baterako okupazioaren azalera 300 m²-koa izango da, eta okupazio iraunkorrarena, berriz, 64,87 m²-koa.

Proiektatutako euskarrientzat 6 zimendu berri egingo dira, eta zenbatesten da indusketa-bolumena 94,81 m³-koa izango dela.

Proiektua lehendik dagoen aireko zortasun-eremuaren barruan garatuko da; beraz, ez da beharrezkoa izango eremua handitzea. Aztertutako dokumentazioaren arabera, ez da ireki beharko sarbide berririk; asko jota, lehendik dauden sarbideak egokitu beharko dira.

Alternatibei dagokienez, 0 alternatiba aurkeztu da, hau da, proiektua ez gauzatzearena, eta, horrez gain, proiektua gauzatzeko beste bi alternatiba.

0 alternatiba baztertu egin da, ez baitu hobetzen lehendik dagoen linea elektrikoa.

1. alternatiba hautatu da; izan ere, baliatu egiten du lehendik dagoen azpiegitura, eta mantendu egiten ditu egungo korridore elektrikoa eta dauden sarbideak.

2. alternatibak urrundu egiten du linea elektrikoaren trazadura berria San Lorentzo ibaiaren ibilgutik, eta hori ingurumen-hobekuntza da. Alternatiba horrek 1. alternatibaren luzera handixeagoa du (2 090 metro), eta 7 zapi euskarri behar jarri beharko lirateke. Nolanahi ere, azken alternatiba hori baztertu egiten da, korridore elektriko berri bat ireki eta sarbide berriak egin beharko liratekeelako, eta, ondorioz, lurzoru gehiago okupatu beharko litzateke, eta lur-mugimendu handiagoak egin.

2.– Proiektuaren kokapena.

Proiektua Elgoibar udalerriko Azkue-San Roke auzoan garatzen da.

Proiektuaren eraginpeko eremuan ez dago naturagune babesturik, abifauna babesteko eremurik, interes geologikoko gunerik (IGG), hezegune katalogaturik eta kultura-ondarearen elementu ezagunik.

Honako hauek osatzen dute proiektuaren eremuan dagoen landaredia: belardiek, alertzeek (Larix sp.), intsinis pinuek (Pinus radiata) eta haritz gorriek (Quercus rubra), baita hariztien gune batzuk ere (Quercus robur). Ez da identifikatu proiektua gauzatzeak kaltetu dezakeen flora-espezie katalogaturik.

Proiektua garatzen den eremuan Habitaten Zuzentarauaren I. eranskinean jasotako honako habitat hauek daude: 4030 Europako txilardi lehorrak eta 6510 Altitude baxuko sega-belardi pobreak (Alopecurus pratensis, Sanguisorba officinalis); azken horiek dira nagusi eremu horretan. Ez da identifikatu lehentasunezko habitatik.

Proiektatutako linearen berrikuntza Euskal Autonomia Erkidegoko (EAEko) Nekazaritza eta Basozaintzako Lurralde Plan Sektorialak (LPS) nekazaritza eta abeltzaintzako eremu eta landazabal gisa sailkatutako lursailetako segurtasun-eremuaren barruan garatzen da: trantsizioko landa-paisaia eta balio estrategiko handikoa, baita baso-eremua ere. Aireko lineek 2a erabilera onargarria dute eraginpeko kategorietarako.

Linea elektrikoak bi alditan zeharkatzen du San Lorentzo ibaia, bisoi europarraren interes bereziko eremutzat hartzen den zati batean, 2004ko maiatzaren 12ko Foru Aginduaren arabera (Gipuzkoako Lurralde Historikoan bisoi europarra (Mustela lutreola; Linnaeus, 1761) kudeatzeko plana onartzen duena).

Proiektuak zaurgarritasun txikia du arrisku naturalen eta istripu-arriskuen aurrean. Uholde-eremuak identifikatu dira 9004N eta 9005N euskarrien arteko baoaren azpialdean; hala ere, ez dute zuzeneko eraginik euskarri horietan.

3.– Balizko inpaktuaren ezaugarriak.

Aintzat hartuta eremuaren izaera eta proiektuaren ezaugarriak, inpakturik handienak obra-fasean gertatuko dira, honako jarduera hauek egingo baitira: makineria mugitzea, egungo euskarriak desmuntatzea, euskarri berriak muntatzea eta linea elektrikoa jartzea. Funtzionamendu-fasean, egungo trazadurari eusten zaionez, ez da inpaktu gehigarririk sortuko.

Proiektua lehendik dagoen korridore elektrikoaren barruan egingo da, eta ez da aurreikusten obra-eremurako sarbide berririk irekiko denik; horri esker, nabarmen murrizten dira balizko inpaktuak. Proiektuaren arabera, obra-fasean aldi baterako okupazioaren azalera 300 m²-koa izango da, eta okupazio iraunkorrarena, berriz, 64,87 m²-koa. Zenbatesten da 94,81 m³-koa izango dela euskarri berriak instalatzeko aurreikusitako lur-mugimendua.

Linea elektrikoak bi aldiz zeharkatzen du San Lorentzo ibaiaren ibilgua. Lehenengo gurutzaketa 9004N eta 9005N zenbakidun euskarrien artean egingo da, eta kablea esekirik geratuko da ibilguaren gainetik 19,67 metroko altueran; bigarren gurutzaketa, berriz, 9006N eta 9007N euskarrien artean, eta kablea ibaiaren gainetik 23,27 metroko altueran egongo da. Euskarriak ibilgutik urrun daude, eta hurbilena 15 metroko distantzian dago. Beraz, printzipioz, ez zaie zuzenean eragingo ez ibilguari, ez eta bisoi europarraren habitatari ere.

Linea elektrikoak dagoeneko badu zuhaitzetatik babesteko korridore elektrikoa; beraz, ez da beharrezkoa izango landarediaren gaineko eragina handitzea. Lehendik dagoen korridorea eta euskarrietarako sarbideak mantendu baino ez da egin beharko. Ingurumen-dokumentuak babes-neurri gisa jasotzen du debekatuta dagoela zuhaitz-ale helduak moztea.

Nekazaritza eta Basozaintzako LPSak sailkatutako lurzoruen eraginari dagokienez, lehendik dagoen korridore elektrikoa mantentzen denez eta instalazioen diseinua aplikatu beharreko araudi teknikoen arabera egiten denez, ez da aurreikusten partzelen aprobetxamenduaren gaineko eraginik, eta ez da nabarmen aldatuko partzelen egungo okupazioa.

Faunari kalterik ez eragiteko, lehentasunezko aldia ezartzen da (irailaren 1etik otsailaren 15era) obrak eta gainerako jarduketak egiteko, eta ahal izanez gero, udazkenean egin beharko dira (urria-abendua). Linean elektrokutatzearen aurkako neurriak eta gurutzetak jarriko dira 1432/2008 Errege Dekretuan (abuztuaren 29koa, abifauna goi-tentsioko linea elektrikoekin talka egiteaz edo elektrokutatzeaz babesteko neurriak ezartzen dituena) ezarritakoaren arabera.

Bigarrena.– Ebazpen honetan, babes- eta zuzenketa-neurriak eta ingurumen-jarraipeneko kontrolak ezartzen dira, proiektuak ingurumenean ondorio kaltegarri nabarmenik izan ez dezan eta Elgoibarren (Gipuzkoa) 9003 eta 9010 euskarrien artean Elgoibar-Lasao 1 eta 2 zirkuitu bikoitzeko 30 kV-ko goi tentsioko linea elektrikoak eraberritzeko proiektuaren proiektuak ingurumen-inpaktuaren azterketa arrunta egin beharrik izan ez dezan, baldin eta ezarritako babes- eta zuzenketa-neurriak eta ezarritako kontrolak txertatzen badira.

Babes- eta zuzenketa-neurriak indarreko araudiaren arabera gauzatuko dira, hurrengo apartatuetan adierazitakoa kontuan hartuta, eta, aurrekoaren aurkakoa ez den orotan, sustatzaileak organo eskudunaren bidez Eusko Jaurlaritzaren Ingurumen Administrazioaren Zuzendaritzan aurkeztutako dokumentazioan ezarritakoa aintzat hartuta.

Ezarritako neurriek eta kontrolean arituko diren langileek bermatu egin beharko dituzte ingurumen-dokumentuan ezarritako kalitate-helburuak eta ingurumen-txostenean finkatzen direnak.

Neurri horiek guztiak obra kontratatzeko baldintza-agirietan sartu beharko dira, eta baldintza horiek betetzen direla bermatuko duen aurrekontua ere izan beharko dute. Era berean, jardunbide egokiak aplikatuko dira obretan.

Honako apartatu hauetan adierazitako neurriak gehitu beharko dira:

Natura-ondarea babesteko neurriak.

– Obrak, bai eta lurzorua erabiltzea eragiten duten eragiketa osagarriak ere, proiektua gauzatzeko behar-beharrezkoa den gutxieneko eremuan gauzatuko dira. Hala badagokio, beharrezkoak diren mozte-, inauste- eta soiltze-lanak, obrarako sarbideak egokitzea edo hobetzea, eta kontratistaren instalazio-guneak –makineria-parkea, obra-etxetxoak, obra-materialak aldi baterako pilatzeko eremuak eta landare-lurrak eta hondakinak aldi baterako pilatzeko eremuak barne– ingurumenean ahalik eta eraginik txikiena izateko irizpideetan oinarrituz egingo dira, eta, zehazki, drainatze naturaleko sareari eta intereseko landarediari eragitea saihestuko da.

Horretarako, obrak hasi aurretik, kontratistaren instalazioen eremuen mugaketa zehatza egingo da xehetasunezko kartografian.

– Oro har, zuzenean okupatzea aurreikusi ez den eremuetan, ez da kenduko bertako landaredi autoktonoa. Intereseko espezieren baten aleak egoera onean dauden eremuetan, kontu handiz jardun beharko da, eragina proiektua egiteko beharrezkoa den azalerara mugatu dadin.

– Bizkaiko Foru Aldundiaren baimena eduki beharko da lurzoru ez-urbanizagarrian mozketak egiteko. Edonola ere, espezie autoktonoak direnean, ahal den guztietan, inausteari lehentasuna emango zaio, moztearen aurretik.

– Landaredi autoktonoa geldialdi begetatiboan inausiko da (neguan), eta zuhaitzaren alde guztiak inausi beharko dira nahitaez, orekatuta gera dadin.

– Zuhaitzak inaustea, botatzea edo sastrakak kentzea ezinbestekoa bada, motozerrak erabiliko dira horretarako, eta ez makina astunak, modu selektiboan lan egin ahal izateko. Zuhaitzak moztea beti era zuzenduan egingo da, bertako gainerako landarediari kalterik ez eragiteko.

– Obrak egin behar diren lekuetara sartzeko, lehendik dauden bideak erabiliko dira, ahal den neurrian. Lehentasunez, obrek eragindako euskarrietara iristeko sarbideak egokituko dira. Landan zeharreko sarbideak egiteko eta sarbide berriak eraikitzeko lanak, hala dagokionean, lur-mugimendua minimizatuz eta lehen aipatutako eremu kalteberekiko eragina saihestuz egingo dira.

– Gorde beharreko zuhaitzak babestu egingo dira, baldin eta proiektatutako jarduketetan kalteak jasan ditzaketela uste bada.

Fauna babesteko neurriak.

– Proiektuaren eraginpeko eremua bat dator bisoi europarraren Interes Bereziko Eremuarekin, Gipuzkoako Lurralde Historikoan bisoi europarra (Mustela lutreola; Linnaeus, 1761) kudeatzeko plana onartzen duen 2004ko maiatzaren 12ko Foru Aginduan ezartzen denarekin bat. Bisoi europarraren aleengan edo horren balizko habitatean eragina izan dezakeen ezer egin aurretik, honako hauek kontuan hartuko dira: azaroaren 25eko 9/2021 Legea, EAEko natura-ondarea kontserbatzeari buruzkoa; uztailaren 9ko 167/1996 Dekretua, Basa eta itsas fauna eta landaredian arriskuan dauden espezieen EAEko Zerrenda arautzen duena; eta, dagokionean, foru-organo eskudunak, bisoi europarraren kudeaketa-planaren administrazio arduradun gisa, xedatzen duena.

Prebentzio-neurri gisa, proiektuko lanak mugatu egin beharko dira lan horiek bisoi europarraren (Mustela lutreola) interes bereziko eremuan gauzatu behar direnean, espeziearentzat bereziki sentikorra den garaian. Gutxienez, 9004N eta 9005N euskarrien arteko baoa eta 9006N eta 9007N euskarrien arteko baoa mugatuko dira.

– Era berean, talka egitea saihesteko gailuak jarri behar dira (txoriak babesteko gailuak) linea elektriko berriaren aireko zati osoko lur-konexioko kableetan.

Jabari publiko hidraulikoa babesteari buruzko neurriak.

Aplika daitezkeen prozeduren esparruan, uren arloko organo eskudunak egoera honetan ezarriko dituen baldintzez gain, honako babes- eta zuzenketa-neurri hauek ere hartu beharko dira:

– JPHan edo JPHaren babes-eremuen barruan (zortasuna eta zaintza) egiten diren jarduketa guztiek Uraren Euskal Agentziaren nahitaezko baimena eskuratu beharko dute aldez aurretik. Era berean, baimen horren esparruan zorrotz aztertuko dira ezaugarriak eta eraginak, eta, hala badagokio, dagozkion baldintzak ezarriko dira. Oro har, ezin da makinarik eta ibilgailurik igaro ur-ibilguetan. Ezin izango da egin sare hidrografikoari eragiten dion sarbiderik.

– Ezin da zuhaitzik moztu eta kendu bisoi europarra kudeatzeko planaren eremuan, eta ezin da garbiketarik egin jabari publiko hidraulikoaren zortasun-eremutzat jotako 5 metroetan, ibilguen bi aldeetan.

– Obra egikaritu bitartean, laneko plataformak, materialak biltzeko eremuak eta aldi baterako beste okupazio-eremuak ere ibilguen 5 metroko zortasun-eremuetatik kanpo kokatu beharko dira.

Urak eta lurzoruak babesteko neurriak.

– Oro har, eraikuntza-fasean, ahalik eta efluente kutsatzaile gutxien sortuko da, eta ahalik eta material xehe eta substantzia kutsatzaile gutxien isuriko da drainatze-sarera.

– Hidrokarburoen material xurgatzaile espezifikoa jarri beharko da eskura obretan, istripuz isuri edo ihesen bat gertatuz gero berehala aplikatu ahal izateko.

– Beharrezkoa bada, obra-eremuetan, obren eta jarduera osagarrien ondorioz kutsatzen den ur guztia biltzeko eta kudeatzeko gailuak proiektatu eta eraikiko dira. Haien neurriak zehazteko, kalkulu hidraulikoak egingo dira, solidoei ahalik eta ondoen eusten dietela eta isuriak lokalizatuak eta indarrean dagoen araudiak ezartzen dituen parametro fisiko-kimikoen araberakoak direla bermatzeko.

– Obraren makina-parkera bideratutako azalera eta haren mantentze-gunea drainatze naturaleko saretik isolatuko dira. Zola iragazgaitza eta efluenteak biltzeko sistema bat izango ditu, olio eta erregaiek lurzorua eta ura ez kutsatzeko. Ezin izango da egin erregaien zamalanik, olio-aldaketarik eta lantegiko jarduerarik, horretarako adierazitako eremuetatik kanpo.

– Arreta berezia jarri beharko da hormigoirik edo deribaturik ez isurtzeko inguruko sare hidrografikora irits daitekeen ezein puntutara; horregatik, hormigoi-ontziak edo bestelako makinak garbitzeko leku espezifiko bat planifikatzea gomendatzen da.

– Debekaturik dago, baimen administratiborik izan ezean, ur kontinentalak edo jabari publiko hidraulikoko beste edozein elementu kutsa ditzaketen urak eta hondakinak zuzenean edo zeharka isurtzea.

– Proiektuak Nekazaritza eta Basozaintzako LPSak balio estrategiko handiko lurzoru gisa katalogatutako lurrei eragiten dienez, proiektua behin betiko onetsi aurretik nekazaritza-gaietan eskumena duen foru-organoaren txostena eduki beharko da, Nekazaritza eta Elikagaigintza Politikako abenduaren 23ko 17/2008 Legearen 16. artikuluan xedatuta dagoen bezala.

Paisaia babesteko eta ukitutako eremuak leheneratzeko neurriak.

– Leheneratze-proiektu bat egingo da, eta bertan leheneratu beharreko azalera zehaztu beharko da; horretarako, eremu horiek kartografian identifikatu eta eremu bakoitza leheneratzeko planteamendua ezarri beharko da (espezieak, metodologia, etab.). Azkenean basoei edo zuhaitz-ale autoktonoei eragiten bazaie, landatu beharreko azalera proiektuak eragindako elementu horien azaleraren bikoitza izango da, gutxienez (1:2 ezabatutakoa: leheneratutakoa).– Leheneratze-proiektu hori linea elektrikoa berritzeko proiektuan sartuko da ondorio guztietarako (aurrekontua barne), eta proiektua gauzatu ahal izateko beharrezkoak diren diseinu-datuak jasoko ditu: leheneratu beharreko eremuak, erabili beharreko espezieak, aleen tamaina, landaketa-esparrua, mantentze-lanak, etab. Gipuzkoako Foru Aldundiko Mendietako eta Natura Ondareko Zuzendaritzak baliozkotu beharko du proiektua behin betiko onetsi aurretik.

– Obrek eragindako azalera guztiak leheneratuko dira, hau da:

• Jarduketak gauzatuko diren euskarrien inguruan (euskarri berriak zein desmuntatuko diren euskarriak).

• Linea elektrikoaren azpian, linea zaharra desmuntatu eta berria jartzeko lanen ondorioz guneren bat kaltetu bada.

• Egokitu behar izan diren sarbideetan, edo, hala badagokio, ireki direnetan, mantentze-lanetarako mantendu behar direla behar bezala justifikatzen denean salbu.

– Landare-espezie exotiko inbaditzaileak sartu eta hedatzea hauteman eta saihesteko kontrol-neurriak hartuko dira.

– Bereziki kontrolatuko da landare-estalkia leheneratzeko lurren jatorria, eta ez da erabiliko aipatu diren espezieek kutsatutako lurrik.

– Gainera, sustatzaileak ingurumen-zaintza egin beharko du hurrengo 2 urteetan, obrako lanen ondoren eremu osoan finka daitezkeen espezie exotiko inbaditzaileak identifikatzeko eta ezabatzeko helburuarekin, bereziki obrek eragindako intereseko habitatetan.

Zaraten eta bibrazioen ondorioak minimizatzera zuzendutako neurriak.

– Lanek dirauten artean, beharrezkotzat jotzen diren jarraibide egokiak aplikatuko dira, ordutegien mugaketari, zamalanei, obrako makineriaren mantentze-lanei eta zarata jatorrian murrizteari dagokienez.

– Zaratari buruzko azaroaren 17ko 37/2003 Legea garatzen duen urriaren 19ko 1367/2007 Errege Dekretuaren 22. artikuluan aurreikusitakoaren arabera, zonakatze akustiko, kalitate-helburu eta emisio akustikoei dagokienez, obra-fasean erabiliko diren makinak egokitu egin beharko dira kanpoan erabiltzeko makinen soinu-emisioei buruz indarrean dagoen legerian ezarritako aginduetara, eta, bereziki, eta hala badagokio, 212/2002 Errege Dekretuan (otsailaren 22koa, Kanpoan erabiltzeko makinek ingurumenean sortzen dituzten soinu-emisioak arautzen dituena) eta arau osagarrietan ezarritakora.

– Euskal Autonomia Erkidegoko hots-kutsadurari buruzko urriaren 16ko 213/2012 Dekretuaren 35 bis artikuluan xedatutakoarekin bat etorriz, sei hilabetetik gorako iraupena aurreikusia duten obren kasuan, nahitaez egin beharko da inpaktu akustikoaren azterlana, neurri zuzentzaile egokiak zehazteko.

– Egunez bakarrik egingo da lan.

Hondakinak kudeatzeko neurriak.

– Sortutako hondakin guztiak Ekonomia zirkularrerako hondakinei eta lurzoru kutsatuei buruzko apirilaren 8ko 7/2022 Legean eta aplikatzekoak diren araudi espezifikoetan xedatutakoaren arabera kudeatuko dira, eta, kasuan-kasuan, bereizi egin beharko dira hondakin mota eta helmugarik egokiena zehazteko.

– Hondakinak kudeatzeko hierarkia-printzipioei jarraituz, hondakinak sortzeari aurrea hartzea sustatu behar da, edo, hala badagokio, apirilaren 8ko 7/2022 Legearen 8. artikuluan ezarritako lehentasun-hurrenkeran kudeatu daitezela; hau da: prebentzioa, berrerabiltzeko prestatzea, birziklatzea eta balorizatzeko beste modu batzuk, balorizazio energetikoa barne.

– Hondakinak kasu honetan baino ezin izango dira ezabatu: behar bezala frogatzen bada horiek balorizatzea teknikoki, ekonomikoki eta ingurumenaren ikuspegitik bideraezina dela.

Espresuki debekatuta dago sortzen diren tipologia desberdineko hondakinak elkarrekin edo beste hondakin nahiz efluente batzuekin nahastea; hondakinak jatorritik bertatik bereiziko dira eta horiek bildu eta biltegiratzeko bide egokiak jarriko dira, nahasketak saihesteko.

– Eraikuntzako eta eraispeneko hondakinak Eraikuntza- eta eraispen-hondakinen ekoizpena eta kudeaketa arautzen duen otsailaren 1eko 105/2008 Errege Dekretuan eta Eraikuntza- eta eraispen-hondakinen ekoizpena eta kudeaketa arautzen duen ekainaren 26ko 112/2012 Dekretuan aurreikusitakoa betez kudeatuko dira.

– Gainera, zabortegira bidali beharreko hondakinak kudeatzeko, Hondakinak zabortegietan utziz ezabatzeko jarduera arautzen duen uztailaren 7ko 646/2020 Errege Dekretuari eta Hondakinak hondakindegietan biltegiratuta eta betelanak eginda ezabatzea arautzen duen otsailaren 24ko 49/2009 Dekretuari jarraituko zaie.

– Eremu jakin bat egokituko da, behin-behinean hondakin arriskutsuak pilatzeko, hala nola olio-potoak, iragazkiak, olioak, pinturak eta abar. Gainera, hondakin geldoak biltzeko edukiontzi espezifikoak jarriko dira, hondakin arriskutsuen guneetatik bereizita.

Kutsatuta egon daitezkeen lurzoruen kudeaketarekin lotutako neurriak.

– Lur-mugimenduak lurzorua kutsa dezaketen jarduerak edo instalazioak izan dituzten edo dituzten Ihoberen lurzoruen inbentarioan jasota dauden partzeletan egiten badira, ekainaren 25eko 4/2015 Legean xedatutakoa bete beharko da, Lurzorua kutsatzea saihestu eta kutsatutakoa garbitzekoa.

Airearen kutsadura minimizatzeko neurriak.

– Aldian-aldian, sarbideak garbituko dira, eta, atzemandako hauts-isurketen arabera, ureztatu ere egingo dira. Sarbideek egoera egokian egon beharko dute beti.

Kultura-ondarea babesteko neurriak.

– Euskal Kultura Ondareari buruzko maiatzaren 9ko 6/2019 Legean xedatutakoari jarraituz, lurrak mugitzeko obretan arkeologia-izaerako aztarnarik aurkituz gero, berehala jakinaraziko zaio Bizkaiko Foru Aldundiko Kultura Zuzendaritzari, eta azken horrek zehaztuko du zer neurri hartu behar diren.

Jardunbide egokien sistema bat ezartzea.

Langileek jardunbide egokien sistema bat ezarri beharko dute, helburu hauek, besteak beste, ahalik eta hobekien bermatzeko:

– Lanek okupatzen dituzten mugak kontrolatzea.

– Batasunaren intereseko habitatei eta intereseko habitatei (baso mistoa), ibai-ibilguei eta arriskuan dauden fauna-espezieei eragiten zaien kaltea kontrolatzea.

– Hondakin-uzterik ez egitea, eta olio-isurketen ondorioz edo lurra leku batetik bestera eramateagatik lurzorua eta ura ez kutsatzea.

– Proiektuak eraginpeko eremuan herriguneetako biztanleei enbarazurik ez eragitea zarata eta hautsarekin.

Garbiketa eta obra-akabera.

Obra bukatu ondoren, garbiketa-kanpaina zorrotz bat egingo da; proiektuak ukitutako eremua inolako obra-hondakinik gabe utzi beharko da, eta aldi baterako instalazio guztiak desmuntatu egin beharko dira.

Ingurumen-aholkularitza.

Obra amaitu arte eta haren bermealdian zehar, obra-zuzendaritzak ingurumenaren eta, oro har, neurri babesle eta zuzentzaileen inguruko aholkularitza kualifikatua izan beharko du. Baldintza-agiriak horrelako gaien inguruan esleitzen dizkion eskumenak erabiliz obra-zuzendaritzak ebazpenik eman behar badu, aholkulariek txosten bat egin beharko dute aldez aurretik.

Ingurumen-aholkularitzak, gainera, jardunbide egokien kontrola egingo du, obra egikaritzean. Besteak beste, proiektuko ekintzen eragina aztertuko du, bereziki hauei dagokienez: makinen mugimenduak, hauts eta zarataren sorrera, hondakinen kudeaketa eta natura-ondarearen babesa.

Hirugarrena.– Lehenengo puntuan ezarritako baldintzen arabera, eta betiere ebazpen honetan ezarritako babes- eta zuzenketa-neurriak eta kontrolak hartzen badira, bai eta sustatzaileak planteatutakoak ere –aurrekoen aurkakoak ez badira–, ez da aurreikusten Elgoibarren (Gipuzkoa) 9003 eta 9010 euskarrien artean Elgoibar-Lasao 1 eta 2 zirkuitu bikoitzeko 30 kV-ko goi tentsioko linea elektrikoak eraberritzeko i-DE, Redes Eléctricas Inteligentes S.A.U.k sustatutako proiektua egikaritzean ingurumen-inpaktuaren ebaluazio arrunta egitea.

Laugarrena.– Ebazpen honen edukiaren berri ematea Industria, Trantsizio Energetiko eta Jasangarritasunaren Sailaren Arabako Lurralde Ordezkaritzari.

Bosgarrena.– Ebazpen hau Euskal Herriko Agintaritzaren Aldizkarian argitaratzeko agindua ematea.

Seigarrena.– Euskadiko Ingurumen Administrazioaren abenduaren 9ko 10/2021 Legearen 79.5 artikuluak ezarritakoaren arabera, ingurumen-inpaktuaren txosten honek indarraldia galduko du eta berezko dituen ondorioak sortzeari utziko dio, baldin eta aipatutako proiektua gauzatzen ez bada Euskal Herriko Agintaritzaren Aldizkarian argitaratu eta lau urteko gehieneko epean. Kasu horretan, sustatzaileak berriro hasi beharko du proiektuaren ingurumen-inpaktuaren ebaluazio sinplifikatuaren prozedura.

Vitoria-Gasteiz, 2026ko ekainaren 30a.

Ingurumen Administrazioaren zuzendaria,

NICOLAS GARCIA-BORREGUERO URIBE.

Azterketa dokumentala