Euskal Herriko Agintaritzaren Aldizkaria

144. zk., 2026ko uztailaren 30a, osteguna

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HEZKUNTZA SAILA

3399

EBAZPENA, 2026ko uztailaren 15ekoa, Administrazio eta Zerbitzuen sailburuordearena, zeinaren bidez arautzen baita Hezkuntzako sailburuaren 2025eko otsailaren 24ko Aginduaren bidez deitutako hautaketa-prozeduretan hautatutako izangaien praktika-fasea. Agindu horren bidez, Euskal Autonomia Erkidegoko Bigarren Hezkuntzako irakasleen kidegoan sartzeko eta horra iristeko hautaketa-prozedurak iragarri ziren.

Hezkuntzako sailburuaren 2025eko otsailaren 24ko Aginduaren bidez deitutako hautaketa-prozeduretan hautatutako izangaiek praktika-fasea egin behar dute, eta praktiketako funtzionario izendatu behar dira Hezkuntzako sailburuaren agindu bidez.

2025eko otsailaren 24ko Agindu horrek berak IX. kapituluan ezartzen ditu erregulazio honen xede den praktika-faseari aplikatu beharreko oinarrizko baldintzak, eta Administrazio eta Zerbitzuen sailburuordea gaitzen du horretarako.

Hezkuntzako sailburuaren 2026ko uztailaren 9ko Aginduaren bidez, Euskal Autonomia Erkidegoko Bigarren Hezkuntzako irakasleen kidegoko praktiketako funtzionario izendatu dira aipatutako prozeduran hautatutako izangaiak.

Beraz, bidezkoa da praktika-fasea arautzea, iraupena eta baldintzak zehaztea, Kalifikazio-batzordearen eta esku hartzen duten gainerako eragileen osaera eta eskumenak definitzea, eta ebaluatzeko prozedurak eta irizpideak ezartzea.

Ondorioz, honako hau

EBAZTEN DUT:

Lehenengoa.– Kalifikazio-batzordea.

1.1.– Euskal Autonomia Erkidegoko (aurrerantzean, EAE) Bigarren Hezkuntzako Irakasleen Kidegoan praktiketako funtzionario izendatutako pertsonek egindako praktikak Kalifikazio-batzordeak kalifikatuko ditu. Batzorde horren osaera jarraian ezarriko da.

1.2.– EAEn Kalifikazio-batzorde bakarra eratzen da, eta honako hauek osatuko dute:

– Alicia Epelde Murguia andrea, Hezkuntzako ikuskaria, batzordeburua izango da.

– Maite Lizartza Urrestarazu andrea, Hezkuntzako ikuskaria, batzordekide izango da.

– Mikel Amezaga Amezua jauna, Hezkuntzako ikuskaria, batzordekidea izango da.

– Maria Cruz Delgado Salmerón andrea, Hezkuntzako ikuskaria, batzordekide izango da.

Kideren bat absente edo gaixorik badago, Langileak Kudeatzeko zuzendariak izendatutako beste hezkuntza-ikuskari batek ordezkatu ahal izango du, ikuskari nagusiak proposatuta.

1.3.– Kalifikazio-batzordeko kideak Sektore Publikoaren Araubide Juridikoaren urriaren 1eko 40/2015 Legearen 23. eta 24. artikuluetan aurreikusitako abstentzio- eta errekusazio-kausen eraginpean egongo dira.

1.4.– Kalifikazio-batzorde bakarra formalki eratu beharko da 5 egun balioduneko epean, ebazpen hau Euskal Herriko Agintaritzaren Aldizkarian argitaratu eta hurrengo egunetik aurrera. Eraketa hori ezin izango da gauzatu kide guztiak bertan ez badaude, salbu eta Langileak Kudeatzeko zuzendariak balioetsi beharreko inguruabar bereziak gertatzen badira. Eratze-egintzaren akta egingo da, eta Langileak Kudeatzeko Zuzendaritzari bidaliko zaio.

1.5.– Kalifikazio-batzordeak, bere eginkizunak betetzean, hala behar izanez gero, hezkuntza-ikuskaritzako lantaldeen laguntza eskatu ahal izango du. Lantalde horiek irakasleen funtzioa ebaluatzearekin lotuta egongo dira. Halaber, izangaiek praktika-fasea zer ikastetxetan garatzen duten, ikastetxe horietako erreferentziako ikuskarien laguntza ere eskatu ahal izango du kalifikazio-batzordeak, baita Hezkuntzako Administrazio Publikoko gainerako zerbitzuena ere.

1.6.– Zerbitzuen ondoriozko kalte-ordainei buruzko otsailaren 2ko 16/1993 Dekretuan aurreikusitakoa aplikatuko zaio Kalifikazio-batzordeari.

Bigarrena.– Praktika-fasearen tutoretza.

2.1.– Praktiketako funtzionarioek praktikaldia irakasle tutore batek gainbegiratuta egingo dute. Destinoko ikastetxeko zuzendaritzak izendatuko du irakasle tutore hori, praktikaldia arautzen duten jarraibideek ezarritako epearen barruan, eta berehala jakinaraziko zaio Kalifikazio-batzordeari, dagokion erreferentziazko ikuskatzailearen bidez. Irakasle horiek ikastetxean destinoa duten karrerako funtzionarioen artetik aukeratuko dira.

2.2.– Praktiketako funtzionarioen irakasle tutoreen izendapenari dagokionez, aparteko, aurreikusi gabeko edo gerora sortutako inguruabar guztiak berehala jakinarazi beharko zaizkio erreferentziazko ikuskariari, Kalifikazio-batzordeari helaraz diezazkion. Batzordeak, azken buruan, ahalik eta lasterren ebatziko du, kasuaren inguruabar zehatzen, ikastetxearen benetako aukeren eta azkenean izendatutako pertsonaren egokitasunaren arabera. Nolanahi ere, karrerako funtzionario izan beharko du.

2.3.– Praktiketako fasean, irakasle tutoreen eginkizunak izango dira praktiketako funtzionarioei aholkuak ematea, laguntzea eta ebaluatzea, besteak beste, honako alderdi hauei buruz:

– Irakaskuntza-jardueraren plangintza.

– Irakaskuntza-jardueraren garapena.

– Ikasleak ebaluatzeko prozedurak eta irizpideak.

– Koordinazio didaktikoa.

– Tutoretza- eta orientazio-planak.

– Hezkuntza-premia espezifikoak, hezkuntza inklusiboa eta aniztasunarekiko arreta.

– Familiekiko harremanak, ikasle adingabeen kasuan.

2.4.– Ikastetxeko zuzendaritzak bermatu beharko du irakasle tutoreak gutxienez hiru aldiz bisitatuko duela praktiketako funtzionarioaren ikasgela, prestakuntza-behaketa edo irakaskuntza-jardueraren eredua egiteko, horri buruzko hausnarketa sustatzeko, hobetzeko orientabideak proposatzeko eta ebidentziak biltzeko azken ebaluazioa egite aldera. Bisitak prozesuaren hasierako faseari, garapenari eta amaierari lotuta egongo dira.

2.5.– Praktikaldia amaitzean, tutoretza-lanak egin dituzten irakasleek txosten bat egingo dute, izangaiak egindako lanari buruz ebazpen honen eranskinean agertzen diren alderdiei buruz. Horri erantsiko zaio tutoreak praktiketako funtzionarioaren gelara egindako bisiten ondorioen dokumentua, edo horri buruzko informazio garrantzitsuak egiaztatzen dituen beste edozein.

2.6.– Beharrezkoa izanez gero, ikastetxe bakoitzaren aukera eta beharrizan zehatzen, irakasle-plantillaren eta administrazio-egoeraren arabera, irakasle berak aldi berean egin ahal izango ditu praktiketako funtzionario baten baino gehiagoren tutoretza-lanak.

Hirugarrena.– Zuzendariaren eginkizunak.

3.1.– Praktika-fasean zehar, ikastetxeko zuzendariak praktiketako funtzionarioei aholkuak eta informazioa emango dizkie, besteak beste, honako alderdi hauei buruz:

– Ikastetxearen Hezkuntza Proiektua.

– Ikastetxearen Urteko Plana eta Urteko Memoria.

– AJA eta Bizikidetza Plana.

– Ikastetxearen proiektuak eta jarduera-protokoloak.

– Gobernu-organoen eta koordinazio didaktikoaren funtzionamendua.

– Hezkuntza-komunitatean parte hartzea.

3.2.– Ikastetxeko zuzendariak, halaber, praktiketako funtzionarioaren gela bisitatu ahal izango du, azken ebaluazioa egiteko ebidentziak jasotzeko.

3.3.– Praktikaldia amaitzean, ikastetxeko zuzendariak txosten bat egingo du, ebazpen honen eranskinean agertzen diren alderdien gainean izangaiak egindako lana ebaluatzeko. Txosten horrekin batera, ondorio horietarako garrantzitsutzat jotzen dituen jarduketa espezifikoen edo informazio osagarrien egiaztagiriak aurkeztuko ditu.

3.4.– Zuzendariak unean-unean jakinarazi beharko dio Hezkuntza Ikuskaritzari, erreferentziazko ikuskatzailearen bidez, ezagutzen duen edozein gorabehera edo inguruabar, baldin eta, haren ustez, eragina izan badezake ikastetxean destinoa duten praktiketako funtzionarioen praktika-fasearen garapenean eta ebaluazioan, eta, halakoetan, Ikuskaritzaren edo administrazio eskudunaren beste edozein instantziaren esku-hartze espezifikoa eskatu beharko du.

Laugarrena.– Hezkuntza-ikuskaritzaren eginkizunak.

4.1.– Izangaiaren praktikaldiko ikastetxearen erreferentziazko ikuskariak lagundu, aholkatu eta gainbegiratuko du praktiketako irakasle funtzionarioen ebaluazio-prozesua, ezarritako prozeduraren arabera, eta, besteak beste, honako alderdi hauek hartuko ditu kontuan:

– Praktika-fasean aplikatu beharreko araudiari buruzko aholkularitza ematea.

– Irakasle tutorearen izendapena ikus-onestea.

– Praktika-faseko ebaluazio-prozedurei, -irizpideei eta -dokumentuei buruzko aholkularitza ematea.

– Kalifikazio-batzordeari jakinaraztea ezohiko edozein inguruabar, eragina izan dezakeen heinean praktika-fasea behar bezala garatzeko edo esleitutako zentroetan destinoa duten praktiketako funtzionarioen ebaluazio-prozesurako.

– Ofiziozko zuzeneko esku-hartze espezifikoa egitea Kalifikazio-batzordeak eskatutako kasuetan edo ikastetxeko zuzendaritzak eskatuta, 3.4 puntuan ezarritakoaren arabera.

– Gainbegiratzen dituen ikastetxeetako irakasle tutoreak eta zuzendariak egindako ebaluazio-txostenen azken txosten ikus-onetsia aintzat hartzea.

– Txosten espezifikoa egitea, edozein arrazoirengatik zuzeneko esku-hartzea behar izan den kasuetan.

Bosgarrena.– Praktika-fasea ebaluatzea.

5.1.– Izangaien azken ebaluazioa Kalifikazio-batzordeak egingo du, honako hauek oinarri hartuta:

– Ikastetxeko zuzendariak eta irakasle tutoreak egindako txostenak eta haiei erantsitako dokumentazioa eta erreferentziazko ikuskariaren txosten ikus-onetsia.

– Tutoreak eta zuzendariak praktiketako funtzionarioaren gelara egindako bisiten erregistroa, eta horri buruz sortu den dokumentazioa.

– Gainera, aurrez ezarritakoaren arabera hezkuntza-ikuskaritzaren edozein esku-hartze mota eskatu den kasuetan, erreferentziazko ikuskatzailearen txosten espezifikoa.

– Izangaiaren azken memoria, baldin eta Kalifikazio-batzordeak, zuzendariak edo erreferentziazko ikuskatzaileak berariaz eskatu badu.

– Ebazpen honen eranskinean jasotako adierazleekin zerikusia duen beste edozein dokumentazio osagarri, praktika-fasea arautzen duen araudian jasotako betekizunekin zerikusia duena edo praktiketako funtzionarioa ebaluatzeko garrantzitsutzat jotzen dena.

5.2.– Praktika-faseko kalifikazioa «gai» edo «ez gai» izango da. Praktiketako funtzionarioen kalifikazioa «Ez gai» izango da, baldin eta izangaiak ez badu finkatutako maila lortzen eranskinean ezarritako adierazle guzti-guztietan.

5.3.– «Ez gai» kalifikazioa duten praktiketako funtzionarioek, Langileak Kudeatzeko zuzendariak jakinarazi ondoren, alegazioak aurkeztu ahal izango dituzte kalifikazio horren aurka, bost eguneko epean, jakinarazten den egunetik zenbatzen hasita, Administrazio Publikoen Administrazio Prozedura Erkidearen urriaren 1eko 39/2015 Legearen 76. artikuluan ezarritakoaren arabera. Epe hori igarota, Langileak Kudeatzeko zuzendariak dagokion ebazpena emango du, eta Kalifikazio Batzordeari eta interesdunari bidaliko zaie.

Seigarrena.– Praktika-fasearen garapena eta iraupena.

6.1.– Hezkuntzako sailburuaren 2025eko otsailaren 24ko Aginduan xedatutakoaren arabera, hautatutako izangaiak irakasteko gai diren egiaztatzea da praktika-fasearen helburua. Praktika-faseak ikasturte bat iraungo du, eta, oro har, praktika-fasea bukatutzat jotzeko eta ebaluatu ahal izateko, izangaiek sei hilabete eman beharko dute zuzeneko irakaskuntzan, gutxienez 2/3ko eguneko lanaldiarekin.

Salbuespenezko kasuetan, praktiketako funtzionarioa aldi baterako ezintasun-egoeran, amatasun- edo aitatasun-lizentzian edo beste ezinbesteko kasu batean badago (ustekabeko eta saihetsezineko salbuespenezko egoera) eta egoera horrek praktika-fasea ohiko moduan garatzea eragozten badio, Kalifikazio-batzordeak baloratu eta onartu ondoren, praktikaldia gutxienez hiru hilabete eta egun batekoa izango da modu jarraituan (horietatik gutxienez 60 egun ikasgelan zuzenean edo beste hezkuntza-testuinguru batean bete beharko dira), eguneroko jardunean gutxienez 2/3ko eguneko lanaldiarekin. Kasu horietan, lehentasuna emango zaio ikuskaritza irakaskuntza-jarduna garatzeko saioren batera joateari.

6.2.– Agindu horretan aurreikusitakoa aplikatuko zaie, halaber, goragoko maila batean sailkatuta dagoen irakasleen beste kidego batera iristeko prozeduran hautatutako pertsonei eta praktika-fasea egitetik salbuesteko kasuei.

6.3.– Hautatutako pertsonek praktika-fasea egin beharko dute horretarako esleitutako destinoetan, eta hautaketa-prozesuari uko egiten diotela ulertuko da 2026-2027 ikasturteko lehen lanegunean sartzen ez badira, salbu eta 2025eko otsailaren 24ko Aginduaren 13.1 oinarrian ezarritakoaren arabera praktika-fasea atzeratzea onartu bazaie edo Langileak Kudeatzeko zuzendariaren aurrean behar bezala egiaztatutako ezinbesteko arrazoiengatik ezinezkoa izan bazaie.

6.4.– Ikasturtearen lehen egunetan, ikastetxeko zuzendaritzak erreferentziazko ikuskatzaileari jakinaraziko dio –eta azken horrek, era berean, Kalifikazio-batzordeari– praktiketako funtzionarioak benetan karguaz jabetu direla, eta aditzera emango du zein den izangai bakoitzari izendatutako tutorea; horrez gain, praktika-fasearen garapenean eragina izan dezakeen inguruabarren bat jakiten badu, horren berri ere emango du.

6.5.– Praktika-fasea 2027ko ekainaren 30ean amaitzen dutenak eta ebaluazio positiboa lortzen dutenak karrerako funtzionario izendatuko dira Hezkuntzako sailburuaren dagokion izendapen-aginduaren bidez. Agindu horrek 2027ko irailaren 1etik aurrera izango ditu ondorioak.

6.6.– «Ez gai» deklaratutako pertsonak praktiketako funtzionario gisa hasi beharko du lanean «ez gai» deklaratu eta hurrengo ikasturtean, eta praktika-fasea behin bakarrik errepikatu ahal izango du.

Lanean hasten ez diren edo bigarren aldiz «ez gai» deklaratzen diren pertsonek karrerako funtzionario izendatzeko eskubide guztiak galduko dituzte. Deialdia egin duen agintaritzak deklaratuko du eskubide horiek galdu direla, ebazpen arrazoitu baten bidez.

Zazpigarrena.– Langileak Kudeatzeko zuzendariari ahalmena ematen zaio praktika-fasea garatzeko beharrezkoak diren jarraibideak emateko eta ebazpen honetan berariaz aurreikusi ez diren kasu guztiak ebazteko.

Zortzigarrena.– Ebazpen honen aurka, gora jotzeko errekurtsoa aurkeztu ahal izango zaio Hezkuntzako sailburuari, hilabeteko epean, ebazpena Euskal Herriko Agintaritzaren Aldizkarian argitaratu eta hurrengo egunetik aurrera.

Vitoria-Gasteiz, 2026ko uztailaren 15a.

Administrazio eta Zerbitzuen sailburuordea,

BLANCA MARÍA GUERRERO OCEJO.

(Ikusi .PDF Fitxategia)

Azterketa dokumentala