Euskal Herriko Agintaritzaren Aldizkaria

141. zk., 2026ko uztailaren 27a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

XEDAPEN OROKORRAK

KULTURA ETA HIZKUNTZA POLITIKA SAILA

3327

100/2026 DEKRETUA, ekainaren 23koa, Jarduera Fisikoaren eta Kirolaren Euskal Kontseilua arautzen duena.

Euskadiko Jarduera Fisikoaren eta Kirolaren martxoaren 30eko 2/2023 Legearen 6. artikuluan jasotzen da Jarduera Fisikoaren eta Kirolaren Euskal Kontseilua, administrazio publikoei aholkularitza emateko, kontsulta eta jarraipena egiteko eta eztabaida sektoriala gauzatzeko organo goren gisa, Euskal Autonomia Erkidegoko jarduera fisikoaren eta kirolaren arloko politikari lotutako gaietan. Organo hori kirolaren arloko eskumena duen Eusko Jaurlaritzaren sailari atxikita egongo da, eta halabeharrez Autonomia Erkidegoko Administrazio orokorreko ordezkariek osatuko dute batik bat kirol-, hezkuntza- eta osasun-arlokoek, eta, orobat, EAEko foru- eta udal-administrazioetako eta euskal kirol-federazioetako ordezkariek. Halaber, Kontseiluko kide izango dira jarduera fisikoaren eta kirolaren esparruan ospe handia duten pertsonak, esparru horretan eskumena duen Autonomia Erkidegoko Administrazio orokorreko sailaren titularrak izendatuta.

Euskadiko Jarduera Fisikoaren eta Kirolaren martxoaren 30eko 2/2023 Legeak ezartzen du Jarduera Fisikoaren eta Kirolaren Euskal Kontseiluaren barruan eratuko direla lege horretan aurreikusten diren azpibatzorde guztiak, bai eta osoko bilkurak erabakitzen dituenak ere. Halaber, erakundearteko koordinazio-mahai bat eratuko da, arlo berberak eragindako administrazio publikoen jarduketen koordinazioa bermatze aldera, emaitza komun bat lortzeko helburuarekin, eraginkortasunez eta efizientziaz, hutsunerik eta bikoiztasunik gabe.

Dekretu honen helburua da organo bat eratzea, euskal kirolaren esparruko sektore publiko eta pribatu guztietako ordezkariak elkartzeko. Jarduera Fisikoaren eta Kirolaren Euskal Kontseilua parte-hartze, kontsulta, eztabaida edo aholkularitza ahalbidetzen duen organo balioduna izango bada, ziurtatu behar da gure kirol-sistemako ikuspegi eta sentsibilitate guztiak bertan bilduta egotea. Gainera, Kontseiluaren osaerari lotutako aldaketa horrekin batera, antolaketa- eta funtzionamendu-arau berri batzuk ezarri dira, Jarduera Fisikoaren eta Kirolaren Euskal Kontseilua biziagoa eta eraginkorragoa izan dadin.

Bestalde, Jarduera Fisikoaren eta Kirolaren Euskal Kontseiluaren osaera, izendapen-sistema, funtzionamendu-araubidea eta eginkizunak erregelamenduz ezarriko dira, gorago aipatutako 2/2023 Legearen 6.3 artikuluaren arabera. Era berean, 2/2023 Legearen 3.2 f) artikuluak Euskal Autonomia Erkidegoko erakunde komunei esleitzen die Jarduera Fisikoaren eta Kirolaren Euskal Kontseilua arautzeko eta antolatzeko eskumena.

Dekretuan, halaber, emakumeen eta gizonen berdintasun eragingarria jasotzen da, Jarduera Fisikoaren eta Kirolaren Euskal Kontseiluaren funtsezko printzipio gisa, eta generoaren eta kirolaren arloko aditu bat Kontseiluan egotea ere aurreikusita dago. Horretarako, osaera orekatua eta parekidea lortzeko irizpideak ezartzen dira, bereziki kideen izendapena betetzen duten kargu instituzionalaren arabera egiten ez denean; hala, historikoki indarrean egon diren desberdinkeriak gainditzen lagunduko da, eta bermatuko da genero-ikuspegia aplikatuko dela kirol-politiken arloan, bai aholkularitza ematen denean, bai horretaz eztabaidatzean, bai kirol-politikak egitean.

Ondorioz, Jaurlaritzako lehenengo lehendakariorde eta Kultura eta Hizkuntza Politikako sailburuaren proposamenez, Euskadiko Aholku Batzorde Juridikoarekin bat etorrita, eta Gobernu Kontseiluak 2026ko ekainaren 23an egindako bilkuran proposamena eztabaidatu eta onartu ondoren, hau

XEDATZEN DUT:

I. KAPITULUA

XEDAPEN OROKORRAK

1. artikulua.– Xedea.

Dekretu honen xedea da Jarduera Fisikoaren eta Kirolaren Euskal Kontseiluaren antolaketa, osaera, izendatze-sistema, izendapena, funtzionamendu-araubidea eta eginkizunak arautzea.

2. artikulua.– Definizioa.

Jarduera Fisikoaren eta Kirolaren Euskal Kontseilua Euskal Autonomia Erkidegoko organo gorena da jarduera fisikoaren eta kirolaren arloko politikari lotutako gaietan, administrazio publikoei aholkularitza emateko, kontsulta eta jarraipena egiteko eta eztabaida sektoriala gauzatzeko.

3. artikulua.– Atxikipen organikoa.

Jarduera Fisikoaren eta Kirolaren Euskal Kontseilua Autonomia Erkidegoko Administrazio orokorrean kirolaren arloko eskumena duen sailari atxikita dago, baina ez da sail horren hierarkia-egituran integratuko.

4. artikulua.– Eginkizunak.

Eginkizun hauek izango ditu Jarduera Fisikoaren eta Kirolaren Euskal Kontseiluak:

a) Euskal Autonomia Erkidegorako kirol-politika orokorraren gidalerroak proposatzea, eta botere publikoen kirol-politiken lankidetza, koordinazioa eta egituraketa bermatzeko neurriak proposatzea.

b) Jarduera fisikoarekin eta kirolarekin lotutako xedapen orokorren proiektuei buruzko informazioa ematea.

c) Kirol-modalitate eta -azpimodalitateen kalifikazioari buruzko informazioa ematea.

d) Euskal kirol-federazioak eratzeko eta errebokatzeko prozesu guztiei buruzko informazioa ematea.

e) Euskal Autonomia Erkidegoko kirol-politikari eragiten dioten eta kirolaren arloko administrazio publikoek bere ardurapean jartzen duten bestelako gai orori buruz informatzea.

f) Euskal Autonomia Erkidegoko kirol-politikari eragiten dioten gaietan, euskal administrazio publikoetako organoei iradokizunak eta jarduera-proposamenak zuzentzea.

g) Kontseiluaren jarduera, Euskal Autonomia Erkidegoko kirol-egoera eta dagozkion gomendioak jasoko dituen urteko memoria onartzea.

h) Euskal Autonomia Erkidegoko politika orokorreko gidalerroak proposatzea Jarduera Fisikoaren Euskal Agentziaren zerbitzuarekin lankidetza estuan arituz, bizimodu aktiboa eta osasungarria sustatzeko.

i) Bestelako eginkizunak, baldin eta organo horren esku-hartzea nahitaezkoa bada beste xedapen batzuen arabera.

5. artikulua.– Administrazio publikoen lankidetza-betebeharra.

Euskal Autonomia Erkidegoko administrazio publikoetako organoek Jarduera Fisikoaren eta Kirolaren Euskal Kontseiluak agindutako eginkizunak behar bezala betetzeko eskatzen dien laguntza eskaini beharko dute.

II. KAPITULUA

ANTOLAKETA, OSAERA, IZENDATZEKO SISTEMA ETA EGINKIZUNAK

6. artikulua.– Antolaketa.

Honako hauek izango dira Jarduera Fisikoaren eta Kirolaren Euskal Kontseiluko kide:

a) Osoko Bilkura.

b) Administrazio Publikoen Jarduera Fisikoaren eta Kirolaren Batzordea (aurrerantzean, HAKOBA Kirola).

c) Unibertsitate Kirolaren Azpibatzordea.

d) Jarduera fisikoan eta kirolean edozein arrazoirengatik agertutako indarkeria, intolerantzia eta diskriminazioaren aurkako azpibatzordea.

e) Lehendakaria.

f) Lehendakariordea.

g) Idazkaria.

7. artikulua.– Osoko Bilkuraren osaera eta izendapena.

1.– Honako hauek izango dira Jarduera Fisikoaren eta Kirolaren Euskal Kontseiluaren Osoko Bilkurako kide:

a) Eusko Jaurlaritzan jarduera fisikoaren edo kirolaren arloko eskumena duen saileko titularra.

b) Jarduera Fisikoaren eta Kirolaren zuzendaritzako titularra.

c) EHUko Hezkuntza eta Kirol Fakultateko Kirolaren Ataleko dekanoa.

d) Gutxienez zuzendari-maila duen pertsona bat, Osasun Saileko titularrak izendatuta.

e) Gutxienez zuzendari-maila duen pertsona bat, Hezkuntza Saileko titularrak izendatuta.

f) Gutxienez zuzendari-maila duen pertsona bat, Segurtasun Saileko titularrak izendatuta.

g) Hiru foru-aldundietan kirolaren arloko eskumena duten zuzendaritzetako titularrak.

h) Hiru hiriburuetako kirol-zinegotziak.

i) Udal-administrazioa ordezkatuko duen pertsona bat, Kultura eta Hizkuntza Politika Saileko titularrak izendatuta, EUDELen (Euskadiko Udalen Elkartea) proposamenaren arabera.

j) Euskal Herriko Jarduera Fisikoaren eta Kirolaren Zientzietako Lizentziadunen Elkargo Ofizialaren ordezkari bat, Kultura eta Hizkuntza Politika saileko titularrak izendatuta.

k) Euskal Kirol Federazioen Batasuneko lehendakaria edo hark eskuordetzen duena.

l) Modalitate olinpikoko euskal kirol-federazioen ordezkari bat, Kultura eta Hizkuntza Politika Saileko titularrak izendatuta.

m) Modalitate ez-olinpikoko euskal kirol-federazioen ordezkari bat, Kultura eta Hizkuntza Politika Saileko titularrak izendatuta.

n) Euskadiko Jarduera Fisikoaren eta Kirolaren Legeak zehaztutako bertako kirol-diziplinen euskal kirol-federazioen ordezkari bat, Kultura eta Hizkuntza Politika Saileko titularrak izendatuta.

ñ) Jarduera fisikoa eta kirol inklusibo eta egokituaren ordezkari bat, Kultura eta Hizkuntza Politika Saileko titularrak izendatuta.

o) Kirolaren industrien ordezkari bat, Kultura eta Hizkuntza Politika Saileko titularrak izendatuta.

p) Genero eta kirolaren arloko aditu bat, Kultura eta Hizkuntza Politika Saileko titularrak izendatuta.

q) Jarduera fisikoan eta kirolean edozein arrazoirengatik agertutako indarkeriaren, intolerantziaren eta diskriminazioaren aurkako borrokaren arloko aditu bat, Kultura eta Hizkuntza Politika Saileko titularrak izendatuta.

r) Basque Team Fundazioaren ordezkari bat, Kultura eta Hizkuntza Politika Saileko titularrak izendatuta.

s) Jarduera fisikoaren eta kirolaren esparruan ospe handia duten hiru pertsona gehienez, Kultura eta Hizkuntza Politika Saileko titularrak izendatuta.

t) Kultura eta Hizkuntza Politikako titularrak izendatutako Kultura eta Hizkuntza Politika Saileko funtzionario bat izango da Jarduera Fisikoaren eta Kirolaren Euskal Kontseiluko idazkaria; hitza izango du, baina botorik ez.

2.– Jarduera Fisikoaren eta Kirolaren Euskal Kontseiluaren Osoko Bilkurako lehendakariak eska dezake aztertzen diren gaietan adituak diren pertsonak bilkuretan parte hartzea; hitza izango dute, baina botorik ez.

3.– Kultura eta Hizkuntza Politikako titularraren agindu baten bidez izendatuko dira Jarduera Fisikoaren eta Kirolaren Euskal Kontseiluaren Osoko Bilkurako kideak. Agindu hori Euskal Herriko Agintaritzaren Aldizkarian argitaratuko da.

4.– Jarduera Fisikoaren eta Kirolaren Euskal Kontseiluko organoetako kideak izendatzerakoan, ahaleginak egingo dira emakumeen eta gizonen presentzia orekatua izan dadin, berdintasunaren arloan indarrean dagoen araudiaren arabera.

8. artikulua.– Osoko Bilkuraren eginkizunak.

Kontseiluaren Osoko Bilkurak eskumen hauek izango ditu:

a) Euskal Autonomia Erkidegoan jarduera fisikoaren eta kirolaren esparruko politikari eragiten dioten ildoak proposatzea.

b) Kirolarekin zerikusia duten xedapen orokorren proiektuei buruzko irizpenak onartzea, bai eta Jarduera Fisikoaren eta Kirolaren Euskal Kontseiluak esku hartu behar duen txostenak eta proposamenak ere.

c) Kontseiluaren jarduera, kirolaren egoera Euskal Autonomia Erkidegoan eta dagozkion gomendioak jasotzen dituen urteko memoria onartzea.

d) Osoko Bilkuran dauden kirol-sektore publiko eta pribatuak ordezkatzen dituzten eta euren esparruan sortzen diren azpibatzordeetako kideak izendatzea.

e) Kontseiluko lehendakariak egokitzat jotzen dituen kirolaren-esparruko gaietan esku hartzea.

f) HAKOBA Kirolak egindako txostenak onartzea, hala badagokio.

9. artikulua.– Osoko Bilkurako kideen kargu-aldia.

1.– 7.1 artikuluko a), b), c), d), e), f), g), h) eta k) apartatuetan aipatutako Jarduera Fisikoaren eta Kirolaren Euskal Kontseiluaren Osoko Bilkurako kideek karguari eutsiko diote, harik eta beren kargua edo izaera galtzen duten arte, kargu edo izaera hori izateagatik izendatu baitira.

2.– Artikulu bereko i) eta j) apartatuetan aipatutako kideek, berriz, izendatu dituzten entitateek formalki horien aldaketa jakinarazi arte beteko dituzte karguak.

3.– Gainerako kideen kargu-aldia lau urtekoa izango da, eta epe hori luzatu ahal izango da. Kide horietakoren bat hiltzen bada, gaitasuna galtzen badu, karguari uko egiten badio edo antzeko arrazoiren bat suertatzen bada, haren ordez sartzen dena ordezkatuari gelditzen zitzaion denboran egongo da karguan. Aipatutako gorabeherengatik hutsik gelditzen diren karguak hilabetean beteko dira, Kontseiluko idazkariari horren berri ematen zaionetik aurrera. Kargutik kendutako kide bat ordezten duenaren kargu-aldia lehen izendatutakoari geratzen zaion denborarako baino ez da izango.

4.– Artikulu honetako 3. apartatuan aipatzen diren kideei dagokienez, Kultura eta Hizkuntza Politikako Saileko titularra aldatzen bada, titular berriak Kontseiluaren osaera berrikusteko aukera izango du, aurreko puntuan adierazitako epea amaitu gabe egonda ere. Halaber, Kultura eta Hizkuntza Politika Saileko titularrak kargugabetu ditzake kide horiek, baldin eta organoak arrazoitzen badu ez dituztela betetzen Jarduera Fisikoaren eta Kirolaren Euskal Kontseiluko kide izateagatik dagozkien betebeharrak.

5.– Kontseiluko kideek, oro har, eta aurkakoa adostu ezean, beren eginkizunak betetzen jarraituko dute, ordezkoen izendapena indarrean sartu arte.

10. artikulua.– HAKOBA Kirola.

1.– Jarduera Fisikoaren eta Kirolaren Euskal Kontseiluaren baitan erakunde-koordinaziorako mahaia sortuko da, jarduera fisikoaren eta kirolaren arloan eskumena duten administrazio publikoen jardueren koordinazioa bideratzeko, eta HAKOBA Kirola izena jarriko zaio.

2.– Honako hauek hartuko dute parte Jarduera Fisikoaren eta Kirolaren Euskal Kontseiluaren HAKOBA Kirolan (Herri Administrazioen Koordinazio Batzordea):

a) Eusko Jaurlaritzan jarduera fisikoaren edo kirolaren arloko eskumena duen saileko titularra.

b) Jarduera Fisikoaren eta Kirolaren zuzendaritzako titularra.

c) Gutxienez zuzendari-maila duen pertsona bat, Eusko Jaurlaritzan jarduera fisikoaren eta kirolaren arloko eskumena duen saileko titularrak izendatua.

d) Hiru foru-aldundietan jarduera fisikoaren eta kirolaren arloan eskumena duten foru-diputatuak.

e) Hiru hiriburuetako kirol-zinegotziek.

f) Udal-administrazioa ordezkatuko duen pertsona batek, Kultura eta Hizkuntza Politika Saileko titularrak izendatuta, EUDELen (Euskadiko Udalen Elkartea) proposamenaren arabera.

g) Jarduera Fisikoaren eta Kirolaren Euskal Kontseiluko idazkari jarduteko izendatutako funtzionarioa; hitza izango du, baina botorik ez.

3.– HAKOBA Kirolako lehendakaria Eusko Jaurlaritzan jarduera fisikoaren edo kirolaren arloko eskumena duen saileko titularra izango da, edo hark eskuordetzen duena.

4.– Jarduera Fisikoaren eta Kirolaren Euskal Kontseiluko HAKOBA Kiroleko lehendakariak aztertzen diren gaietan adituak diren pertsonak bilkuretan parte hartzea eska dezake; hitza izango dute, baina botorik ez.

5.– Honako eginkizun hauek ditu HAKOBA Kirolak:

a) Inplikatutako erakunde publikoen politikak koordinatzea, bakoitza bere jarduera- eta eskumen-eremuan.

b) Jarduera fisikoaren eta kirolaren arloko datuak, informazioak, esperientziak eta ezagutzak partekatzea.

c) Ildo estrategikoak eta ekintzak modu koordinatuan kudeatzea, eta, behar izanez gero, jarduerak hobetzeko proposamenak egitea.

d) Lurraldeko eta euskal kirol-federazioak eratzeko nahitaezko txostena egitea, gerora Osoko Bilkurak onar dezan.

e) Jarduera bat kirol-modalitatetzat kalifikatzeko eta hura osatzen duten diziplinak zehazteko nahitaezko txostena egitea, gerora Osoko Bilkurak onar dezan.

f) Kirol federazioei dagozkien eginkizunak betetzeko kirol-entitateak gaitzeko nahitaezko txostena egitea, gerora Osoko Bilkurak onar dezan.

g) Kirol ekipamenduen erroldak egiteko irizpide uniformeei buruzko txostena egitea, gerora Osoko Bilkurak onar dezan.

h) Euskal federazioen eta lurralde federazioen onarpena baliogabetzeko nahitaezko txostena egitea, gerora Osoko Bilkurak onar dezan.

i) Kontseiluaren jardueraren urteko memoria egitea, gerora Osoko Bilkurak onar dezan.

j) Jarduera Fisikoaren eta Kirolaren Euskal Kontseiluaren egutegia eta jarduketa-lehentasunak ezartzea.

k) Osoko Bilkurak agindutako bestelako eginkizunak.

11. artikulua.– Unibertsitate Kirolaren Euskal Azpibatzordea.

1.– Unibertsitate Kirolaren Euskal Azpibatzordea sortzen da aholkularitza, kontsulta, jarraipen eta eztabaidarako organo izango dena.

2.– Unibertsitate Kirolaren Euskal Azpibatzordea Jarduera Fisikoaren eta Kirolaren titularrak zuzenduko du, eta Kontseiluaren Osoko Bilkurarako izendatutako Euskal Herriko Unibertsitateko (EHU) Hezkuntza eta Kirol Fakultateko Kirolaren Ataleko dekanotzako ordezkaria izango du kide. Halaber, Azpibatzordean parte hartuko dute EAEko unibertsitateetako ordezkariek, Jarduera Fisikoaren eta Kirolaren zuzendariak proposatuta.

3.– Unibertsitate Kirolaren Azpibatzordeak eginkizun hauek izango ditu:

a) Unibertsitate-kirolaren alorreko ildo eta proposamen orokorrak formulatzea eta unibertsitate-kirola sustatzeko programak egitea.

b) Euskal Autonomia Erkidegoko unibertsitateen arteko kirol-jarduerak koordinatzea eta horien jarraipena egitea.

c) Euskal Autonomia Erkidegoko unibertsitateen arteko kirol-lehiaketen antolaketa koordinatzea eta horien jarraipena egitea.

d) Beste lurralde-eremu batzuetako antzeko organoekiko lankidetza instituzionala, lehiaketen antolaketa Euskal Autonomia Erkidegoaren eremuz gaindikoa denean.

e) Kirol-instalazioen plangintza eta kudeaketa koordinatzea eta arlo horretan laguntza teknikoa ematea, unibertsitate-kirolaren alorreko jarduerak programatzeko orduan ahalik eta koherentziarik handiena egon dadin, betiere, horretarako dauden espazioak eta eskaria kontuan hartuta.

f) Unibertsitate-kirolarekin lotutako kontuen inguruko txostenak eta gomendioak ematea.

g) Azterlanak, ikerketak eta prestakuntza-ikastaroak egitea eta programak idaztea, betiere, unibertsitatearen esparruan kirol-jarduerak dituen helburuak lortzeko.

h) Helburuak berdintsuak dituzten erakunde edo organo publiko zein pribatuekiko lankidetza bultzatzea.

i) Bere eginkizunak behar bezala burutzeko esleitzen zaizkion antzeko beste batzuk.

12. artikulua.– Jarduera fisikoan eta kirolean edozein arrazoirengatik agertutako indarkeria, intolerantzia eta diskriminazioaren kontrako azpibatzordea.

1.– Jarduera fisikoan eta kirolean indarkeria, intolerantzia eta diskriminazioaren aurkako azpibatzordea sortuko da, indarkeria- edo diskriminazio-mota oro desagerrarazteko aholkularitza emateko, kontsulta eta jarraipena egiteko, eta neurriak proposatzeko.

2.– Azpibatzordea Jarduera Fisikoaren eta Kirolaren zuzendariak zuzenduko du, eta Kontseiluaren Osoko Bilkuran indarkeriaren, intolerantziaren eta diskriminazioaren aurkako borrokaren arloko aditu izendatutakoa izango du kide. Azpibatzordearen kide izango dira, halaber, arlo horretan eskumenak dituzten administrazio publikoak eta kirol-erakundeak ordezkatzen dituzten pertsonak, eta jarduera fisikoan eta kirolean edozein arrazoirengatik agertutako indarkeria, intolerantzia eta diskriminazioaren prebentzioan ospe handia duten pertsonak, Jarduera Fisikoaren eta Kirolaren zuzendariaren proposamenez izendatuak.

3.– Honako eginkizun hauek izango ditu:

a) Euskal Autonomia Erkidegoan egindako jarduera fisikoan eta kirol-lehiaketetan edozein arrazoirengatik agertutako indarkeria, intolerantzia eta diskriminazioari buruzko datuak bildu eta argitaratzea.

b) Jarduera fisikoan eta kirolean edozein arrazoirengatik agertutako indarkeria, intolerantzia eta diskriminazioaren zergatiei eta ondorioei buruzko txostenak eta azterlanak egitea.

c) Prebentzio-ekintzak sustatzea, emakumeen aurkako indarkeriaren esparruan eta sexu-jazarpenaren edo sexuan oinarritutako jazarpenaren esparruan bereziki.

d) Gomendioak egitea kirolaren arloko klub, elkarte eta federazioetarako, kirol-lehiaketak antolatzen dituzten gainerako erakundeetarako edo pertsonentzako eta kirolerako eta jarduera fisikorako instalazioen titularrentzako.

e) Informazioa ematea kirol-lehiaketen, kirol-diziplinaren eta kirolerako eta jarduera fisikorako instalazioen arloko xedapen-proiektuei buruz.

f) Jardunbide egokien kodea egitea, kirol-erakundeetarako eta kirolaren arloan esku hartzen duten gainerako eragileentzako oinarri izan dadin.

g) Jarduera fisikoan eta kirolean edozein arrazoirengatik agertutako indarkeria, intolerantzia eta diskriminazioa desagerrarazten lagunduko duen eginkizun oro.

13. artikulua.– Azpibatzordeak.

1.– Arlo zehatzei buruzko lanak eta txostenak egiteko, azpibatzordeak sortu ahal izango dira, Kontseiluaren Osoko Bilkurak hala erabakiz gero. Azpibatzorde horien eginkizun nagusiak izango dira Osoko Bilkurari eta HAKOBAri laguntzea haien eginkizunak betetzen, eta azterlanak, proposamenak edo txostenak egitea, Osoko Bilkurak eztabaidatu eta onar ditzan.

2.– Jarduera fisikoaren eta kirolaren arlo espezifikoak jorratzeko eta kide anitzeko organo horiei laguntzeko sortzen den azpibatzorde horietako bakoitzean, pertsona bat eta sei pertsona bitartean izango dira, Kontseiluaren Osoko Bilkurak izendatuak.

3.– Aipatutako azpibatzorde bakoitzeko lehendakaria izango da Eusko Jaurlaritzan jarduera fisikoaren eta kirolaren arloko eskumena duen zuzendaria.

4.– Azpibatzordeek Kontseiluko idazkariaren laguntza izango dute. Jarduera Fisikoaren eta Kirolaren Euskal Kontseiluko idazkaria izango da azpibatzordeetako idazkari, edo hark eskuordetzen duena.

5.– Azpibatzordeetako lehendakaritzak bilkuretan aztertzen diren gaietan adituak diren pertsonek parte hartzea eska dezake; hitza izango dute, baina botorik ez.

14. artikulua.– Kontseiluko lehendakaria.

1.– Kultura eta Hizkuntza Politika Saileko titularra izango da Jarduera Fisikoaren eta Kirolaren Euskal Kontseiluaren Osoko Bilkurako lehendakari, edo hark eskuordetzen duena.

2.– Honako eginkizun hauek izango ditu Jarduera Fisikoaren eta Kirolaren Euskal Kontseiluaren lehendakariak:

a) Jarduera Fisikoaren eta Kirolaren Euskal Kontseilua ordezkatzea.

b) Bilkuretarako deia egitea, Idazkaritzaren bidez.

c) Bileren gai-zerrenda zehaztea.

d) Bilkuretarako zein azterlan egin behar diren zehaztea eta Kontseiluko edo azpibatzordeetako zein kidek egingo dituzten aukeratzea.

e) Bilkurei hasiera eta amaiera ematea.

f) Eztabaidak zuzentzea, parte-hartzaile bakoitzari hitza emanez, esku-hartzeak moderatuz eta, hala badagokio, horien iraupena mugatuz, guztien parte-hartzea ahalbidetzeko eta bilkuren martxa ona bermatzeko.

g) Erabakiak hartzerakoan berdinketarik bada, bere botoaren bitartez erabakitzea.

h) Bere sinadurarekin baimentzea Jarduera Fisikoaren eta Kirolaren Euskal Kontseiluaren aktak baimentzea.

i) Dekretu honek edo indarrean dauden arauek esleitutako gainerako eginkizunak.

3.– Eginkizun horiek Kontseiluko lehendakariordeari eskuordetu dakizkioke, edo hark eskuordetzen duenari.

15. artikulua.– Kontseiluko lehendakariordetza.

1.– Jarduera Fisikoaren eta Kirolaren zuzendaria izango da Jarduera Fisikoaren eta Kirolaren Euskal Kontseiluko lehendakariorde, edo hark eskuordetzen duena.

2.– Honako eginkizun hauek izango ditu Kontseiluko lehendakariordeak:

a) Lehendakariaren kargua hutsik badago, hura kanpoan edo gaixorik badago edo antzeko bestelako arrazoiren bat gertatuz gero, haren ordez aritzea.

b) Lehendakariak eskuordetutako eginkizunak burutzea.

16. artikulua.– Idazkaritza.

1.– Kultura eta Hizkuntza Politikako sailburuak sail horretako funtzionarioen artean izendatutako funtzionarioa izango da Kontseiluko, Osoko Bilkurako eta HAKOBAko idazkari. Idazkari horri –hitza izango du, baina botorik ez– sail horretako beste funtzionario batzuek lagundu ahal izango diote.

2.– Kontseiluan idazkari jardungo duenak jarraian aipatzen diren eginkizunak izango ditu, Sektore Publikoaren Araubide Juridikoaren urriaren 1eko 40/2015 Legearen 16. artikuluan kide anitzeko organoetako idazkariei esleitzen zaizkienez gain:

a) Bilkuretako aztergaien zerrenda prestatzea eta bidaltzea.

b) Lehendakaritzaren aginduz batzordearen bilkuretarako deia egitea.

c) Lehendakariarekin batera bilkuretarako aktak idatzi eta igortzea.

d) Akta, txosten eta erabakien egiaztagiriak egitea.

e) Jarduera Fisikoaren eta Kirolaren Euskal Kontseiluaren kontsulta, espediente eta gainerako dokumentuen sarrera-irteera erregistroa eramatea.

f) Kontseiluaren azpibatzordeetan koordinazio-lanak egitea.

g) Kide anitzeko organoetako idazkariei dagozkien gainerako eginkizunak.

3.– Idazkariaren kargua hutsik badago, hura kanpoan edo gaixorik badago edo legezko bestelako arrazoiren bat gertatuz gero, lehendakaritzak izendatutako bokal batek edo Kultura eta Hizkuntza Politika Saileko funtzionario batek jardungo du haren ordez.

4.– Jarduera fisikoaren eta kirolaren arloan eskumena duen sailean dauden giza baliabideekin eta bitarteko materialekin egingo da jarduera Fisikoaren eta Kirolaren Euskal Kontseiluko kide anitzeko organoen administrazio-laguntza eta kudeaketa.

17. artikulua.– Kontseiluko kideen eskubideak eta betebeharrak.

Honako eginkizun hauek dituzte Jarduera Fisikoaren eta Kirolaren Euskal Kontseiluko kide anitzeko organoetako kideek:

a) Bilkuretara joatea eta horietan parte hartzea.

b) Botoa ematea, zergatia adieraztea, eta, gehiengoarekin bat ez datozenean, boto partikularra ematea.

c) Kide anitzeko organo bateko kide diren aldetik dagozkien beste betebehar guztiak.

III. KAPITULUA

FUNTZIONAMENDUA

18. artikulua.– Osoko Bilkuraren funtzionamendua eta saioak.

Jarduera Fisikoaren eta Kirolaren Euskal Kontseiluaren Osoko Bilkurak urtean behin egingo du ohiko bilkura. Kontseiluak ezohiko bilkurak egin ahal izango ditu, lehendakariaren ekimenez edo kontseilukideen bi herenek hala eskatuta.

Azken kasu horretan, eskaera idatziz egin beharko da, eta bilkuran aztertu beharreko gaia edo gaiak adierazi beharko dira idazki horretan. Ondoren, Osoko Bilkurako lehendakariak bilkurarako deia egingo du 15 eguneko epean, eskaera jaso eta hurrengo egunetik aurrera.

19. artikulua.– HAKOBA Kirolaren funtzionamendua eta saioak.

HAKOBA Kirolak gutxienez sei hilabeterik behin egingo du ohiko bilkura. Batzordeak ezohiko bilkurak egin ahal izango ditu, lehendakariaren ekimenez edo batzordekideen bi herenek hala eskatuta.

Azken kasu horretan, eskaera idatziz egin beharko da, eta bilkuran aztertu beharreko gaia edo gaiak adierazi beharko dira idazki horretan. Ondoren, lehendakariak bilkurarako deia egingo du 15 eguneko epean, eskaera jaso eta hurrengo egunetik aurrera.

20. artikulua.– Azpibatzordeen funtzionamendua.

1.– Azpibatzordeak iraunkorrak izan daitezke edo ez, eta eratze-erabakian jasotakoarekin bat etorriz jardungo dute.

2.– Azpibatzordeak eratze-erabakian ezarritako ohiko maiztasunaren arabera bilduko dira. Kontseiluak ezohiko bilkurak egin ahal izango ditu, lehendakariaren ekimenez edo kontseilukideen bi herenek hala eskatuta.

Azken kasu horretan, eskaera idatziz egin beharko da, eta bilkuran aztertu beharreko gaia edo gaiak adierazi beharko dira idazki horretan. Ondoren, lehendakariak bilkurarako deia egingo du 15 eguneko epean, eskaera jaso eta hurrengo egunetik aurrera.

21. artikulua.– Deialdiak.

1.– Jarduera Fisikoaren eta Kirolaren Euskal Kontseiluaren deialdiak, jarduketa-maila orotan, lehendakariaren aginduz egingo dira, gutxienez zazpi egun natural lehenagoko aurrerapenarekin. Deialdian, honako hauek zehaztu beharko dira: gai-zerrenda, eta bilkura egiteko eguna, tokia eta ordua.

2.– Premiazko kasuetan, deialdia 48 orduko gutxieneko aurrerapenez egingo da, eta premiazkoa dela berariaz justifikatu beharko da deialdiaren erabakian bertan.

22. artikulua.– Bilkuren gai-zerrenda.

Osoko Bilkurako, HAKOBA Kirolako eta Jarduera Fisikoaren eta Kirolaren Euskal Kontseiluaren azpibatzordeetako kideek, beren jarduketa-mailaren esparruan, dagokion organoaren lehendakariari gai-zerrendan puntu jakin bat sartzeko proposamena egin diezaiokete; betiere 48 orduko aurrerapenarekin egin beharko dute, eta proposamena justifikatzeko txosten labur bat helarazi beharko diote.

23. artikulua.– Jarduera Fisikoaren eta Kirolaren Euskal Kontseiluaren eraketa.

1.– Jarduera Fisikoaren eta Kirolaren Euskal Kontseilua, jarduketa-maila orotan, modu baliozkoan eratuko da, baldin eta lehenengo deialdian kideen erdiak gehi bat bertaratzen badira. Bilkurak baliozkoak izateko, lehendakaria eta idazkaria beti bertaratu beharko dira.

2.– Quorum nahikorik ez badago, bigarren deialdian eratzeko aukera izango da, lehenengo deialdia baino hogeita hamar minutu geroago. Kasu horretan, nahikoa izango da kideen herena bertan egotea, lehendakaria eta idazkaria bertan direla.

24. artikulua.– Erabakiak hartzea.

1.– Jarduera Fisikoaren eta Kirolaren Euskal Kontseiluko Osoko Bilkuran, HAKOBA Kirolan edo azpibatzordeetan bozkatzen diren txostenak, gomendioak eta bestelako testuak bertaratutako kideen gehiengo soilez onetsiko dira. Halaber, berdinketa lehendakariaren kalitatezko botoak ebatziko du.

2.– Boto zuzen, pertsonal eta eskuordeezinaren printzipioen araberakoa izango da bozketa-sistema, eta isilpeko botoa bermatu beharko da, kideetako batek lehendakariari hala eskatzen dionean.

25. artikulua.– Boto partikularrak.

1.– Jarduera Fisikoaren eta Kirolaren Euskal Kontseiluko kideek gehiengoaren erabakien aurka boto partikularra eman dezakete dagokien jarduketa-mailan, baldin eta bilkura amaitu aurretik hala iragartzen badute.

2.– Boto partikularrak bilkura amaitu eta bost egun naturaleko epean bidali behar zaizkio, idatziz, Kontseiluko idazkariari. Boto partikular horiek gehiengoaren erabakiaren testuari erantsiko zaizkio.

26. artikulua.– Aktak.

1.– Akta batean jasoko dira Osoko Bilkuraren, HAKOBA Kirolaren eta Jarduera Fisikoaren eta Kirolaren Euskal Kontseiluko azpibatzordeen erabakiak. Aktak honako datu hauek jasoko ditu:

a) Bilkuraren eguna, ordua eta tokia.

b) Bertaratuen izen-abizenak eta noren ordezkaritzan diharduten.

c) Aztertutako gaiak eta eztabaidatutakoaren eta hartutako erabakien laburpentxo bat.

2.– Aktak dagokion organo anitzeko idazkariak sinatu beharko ditu lehendakariaren oniritziarekin, eta bilkura horretan bertan edo hurrengoan aurkeztuko dira onar daitezen.

3.– Interes legitimoa dutela egiaztatzen dutenek eta Kontseiluko kideek idazkariarengana jo dezakete onartutako testuen egiaztagiria eskatzeko.

27. artikulua.– Gastuak.

Jarduera Fisikoaren eta Kirolaren Euskal Kontseiluko kideei edo bertan parte hartzen duten adituei ez zaie ordainsaririk emango. Dena dela, gastuak eta dietak ordainduko zaizkie, otsailaren 2ko 16/1993 Dekretuan zerbitzu-arrazoiengatik oro har aurreikusten diren baldintza, kopuru eta mugen arabera.

IV. KAPITULUA

TXOSTENAK EGITEKO ETA ONARTZEKO PROZEDURA

28. artikulua.– Kontseiluko txostenen helburua.

Jarduera Fisikoaren eta Kirolaren Euskal Kontseiluko txostenak dira administrazio publikoetako beste organo batzuetan kontsultak egiteko ohiko modua, araudian aurreikusitako kasuetan edo organo horiek berariaz eskatuta.

29. artikulua.– Esku-hartzea eskatzeko epea.

Jarduera Fisikoaren eta Kirolaren Euskal Kontseiluak esku hartzeko eskaera kontsulta egin duen organoaren erabakiaren bidez egingo da. Horrekin batera, txostenaren xede izango den proiektua edo espedientearen kopia helarazi beharko da.

30. artikulua.– Txostena egitea eta onartzea.

Kontseiluko lehendakariak, esku hartzeko eskaera jaso ondoren, dagokion txostena egin eta onartuko duen organoa izendatuko du, organo bakoitzaren eskumenen arabera.

31. artikulua.– Txostenaren edukia.

1.– Txostenean, kontseiluaren iritziaz gain, gaia onartu den bilkuraren eguna eta bertaratu diren kideen izena jasoko dira. Halaber, aho batez onartu den ala lehendakariaren boto erabakitzailearen bidez onartu den jasoko da.

2.– Emandako boto partikularrak gehituko zaizkio txostenari, eta, bertan, egilearen eta bat egin duten kideen izenak jasoko dira.

32. artikulua.– Txostena helaraztea.

Txostena kontsulta egin duen organoari helaraziko zaio, eta Kontseiluko lehendakariak eta idazkariak sinatuko dute.

33. artikulua.– Txostenen izaera.

1.– Jarduera Fisikoaren eta Kirolaren Euskal Kontseiluak nahitaez esku hartu beharko du dekretu honetan edo bestelako arauetan aurreikusitako kasu guztietan.

2.– Jarduera Fisikoaren eta Kirolaren Euskal Kontseiluaren txostenak ez dira lotesleak izango, salbu eta araudiz kontrakoa xedatzen bada.

34. artikulua.– Txosten berri baten beharra.

Txostenaren xede den lege-aurreproiektuan edo erregelamendu-xedapenaren proiektuan aurrerago aldaketak egiten badira, eta aldaketa horietan kontuan hartu ez badira Jarduera Fisikoaren eta Kirolaren Euskal Kontseiluaren iradokizunak edo proposamenak, xedapen horien inguruko beste kontsulta bat egingo zaio Kontseiluari.

XEDAPEN GEHIGARRI BAKARRA.– Jarduera Fisikoaren eta Kirolaren Euskal Kontseiluaren lehen osoko bilkuraren osaera-proposamena.

Dekretu honen 7. artikuluan aurreikusitako ondorioetarako, lehenengo kontseilukideak izendatzeko, deialdi zuzena jasoko ez dutenez, honela jokatuko da:

– Dekretu hau indarrean jarri eta hilabeteko epean, Jarduera Fisikoaren eta Kirolaren Euskal Kontseiluaren Osoko Bilkuran ordezkaritza duten Administrazio Publiko edo entitate guztiek Jarduera Fisikoaren eta Kirolaren Zuzendaritzari jakinaraziko diote nor proposatzen dituzten kasuan kasuko kargua betetzeko.

– Adierazitako epea amaitu eta hamabost egun gehigarriko epean, Kultura eta Hizkuntza Politikako sailburuak Kontseiluko kideak izendatuko ditu.

XEDAPEN INDARGABETZAILE BAKARRA

Berariaz indargabeturik geratzen da Kirolaren Euskal Kontseilua arautzen duen azaroaren 7ko 220/2000 Dekretua, baita dekretu honetan ezarritakoari kontra egiten dioten xedapenak ere, izan maila berekoak edo beheragokoak.

AZKEN XEDAPEN BAKARRA.– Indarrean jartzea

Dekretu hau Euskal Herriko Agintaritzaren Aldizkarian argitaratu eta hurrengo egunean jarriko da indarrean.

Vitoria-Gasteizen, 2026ko ekainaren 23an.

Lehendakaria,

IMANOL PRADALES GIL.

Jaurlaritzako lehenengo lehendakariorde eta Kultura eta Hizkuntza Politikako sailburua,

IBONE BENGOETXEA OTAOLEA.

Azterketa dokumentala