Euskal Herriko Agintaritzaren Aldizkaria

136. zk., 2026ko uztailaren 20a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

HEZKUNTZA SAILA

3261

95/2026 DEKRETUA, ekainaren 16koa, CEIP Deusto HLHI ikastetxea CPI Deustuko Ikastola IPI ikastetxean integratzen duena, Bilbon (Bizkaia).

Euskal Autonomia Erkidegoko Estatutuaren arabera, Euskal Autonomia Erkidegoari dagokio hezkuntzaren arloko eskumena bere osotasunean, maila, gradu, modalitate eta espezialitate guztietan. Era berean, berari dagokio irakaskuntza publikoaren arloko ikastetxeak sortzea, eraldatzea eta kentzea.

Hezkuntzaren programazio orokorra eta ikastetxe publikoen eskola programazioak hezkuntza-administrazioaren eskumenekoak dira, 2023ko abenduaren 21eko 17/2023 Legean, Euskal Autonomia Erkidegoko Hezkuntzarenean, ezarritakoaren arabera.

Euskal hezkuntza-sistemaren plangintza estrategikoaren esparruan, hezkuntza-eskaintza egokitzea demografia-bilakaerara eta komunitatearen beharrizanetara lehentasunezko helburua da. Eskola-mapak, programaziorako funtsezko tresna gisa, hezkuntza-errealitatea ikuspegi integral eta dinamiko batetik aztertzea ahalbidetzen du, baliabideen kudeaketa eraginkorragoa, bidezkoagoa eta iraunkorragoa sustatuz. Plangintza-prozesu hori hezkuntzarako sarbidean berdintasuna bermatzera, baliabideen banaketa optimizatzera, gizarte-kohesioa sendotzera eta hezkuntza-komunitatearen partaidetza sustatzera bideratuta dago.

Dekretu honen xede diren ikastetxeen berrantolaketa 2022ko apirilaren 7ko Hezkuntza-Itunetik eta 2023ko abenduaren 21eko Euskal Autonomia Erkidegoko Hezkuntzaren 17/2023 Legetik eratorritako jarraibideen esparruan kokatzen da. Bi dokumentuek eskaintza publiko nahikoa eta orekatuaren sustapena bultzatzen dute, jaiotza-tasaren bilakaerara eta hezkuntza-sistemaren inklusioaren, kalitatearen eta iraunkortasunaren printzipioetara egokituta. Testuinguru honetan, ikastetxeak bateratzeak aukera ematen du sistemaren egungo erronkei hobeto erantzuteko, jarraikortasun pedagogikoa, antolaketa-eraginkortasuna eta hezkuntza-komunitatearen kohesioa bermatuz, aldi berean eskola-segregazioaren murrizketan modu positiboan eraginez.

Programazio horren esparruan, eta hezkuntza-eskaintza eskari demografikoaren bilakaerara eta baliabideen plangintzaren beharretara egokitzeko helburuarekin, egokitzat jo da CEIP Deusto HLHI ikastetxea CPI Deustuko Ikastola IPI ikastetxean integratzea, Bilboko (Bizkaia) Deustu auzoan kokatuta daude biak.

Bateratze horren ondorioz, CPI Deustuko Ikastola IPI izena mantenduko da, egoitza udalerri berean izanda. Neurri horrek antolaketa-, pedagogia- eta kudeaketa-eraginkortasuna hobetzea ahalbidetuko du, eta inplikatutako hezkuntza-komunitatearen ezagutzarekin eta parte-hartzearekin hartu da.

Horrenbestez, Hezkuntzako sailburuaren proposamenez, eta Gobernu Kontseiluak 2026ko ekainaren 16an egindako bilkuran gaia aztertu eta onartu ondoren,

XEDATZEN DUT:

1. artikulua.– Xedea.

Dekretu honen xedea da CEIP Deusto HLHI ikastetxea CPI Deustuko Ikastola IPI ikastetxean integratzea, ikastetxe publiko bakarra osatuz ezaugarri hauekin:

Izena: CPI Deustuko Ikastola IPI.

Izen espezifikoa: «Deustuko Ikastola».

Kodea: 48002331.

EAEko kodea: 014508.

Herria: Bilbao.

Udalerria: Bilbao.

Lurralde Historia: Bizkaia.

Helbidea: Iruña kalea, 2, 48014, Bilbao.

2. artikulua.– Integrazioaren ondoriozko eragina.

Integrazioa eta izen berria 2026ko irailaren 1ean izango dira eraginkorrak, 2026-2027 ikasturtearen hasierarekin bat etorriz.

3. artikulua.– Ikasleen eta langileen atxikipena.

Integratutako ikastetxeetako ikasleak eta langileak ikastetxe berrira atxiki egingo dira, indarrean dagoen araudiaren arabera dituzten eskubide eta baldintza guztiak mantenduta.

AZKEN XEDAPEN BAKARRA.– Eraginkortasuna.

Dekretu honek indarra izango du 2026ko irailaren 1etik aurrera.

Vitoria-Gasteizen, 2026ko ekainaren 16an.

Lehendakaria,

IMANOL PRADALES GIL.

Hezkuntzako sailburua,

MARÍA BEGOÑA PEDROSA LOBATO.

Azterketa dokumentala