Euskal Herriko Agintaritzaren Aldizkaria

121. zk., 2026ko ekainaren 29a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

MUGIKORTASUN JASANGARRIAREN SAILA

2904

EBAZPENA, 2026ko ekainaren 10ekoa, Garraio Azpiegituren zuzendariarena, zeinaren bidez ontzat ematen baita «Vitoria-Gasteizko tranbia Zabalganara –Mariturri adarra– zabaltzeko eraikuntza-proiektua».

Zabalgana auzoa da Vitoria-Gasteizko jendetsuena, ia 30.000 biztanle baititu, eta hazten ari den biztanleria gazteak osatzen du; izan ere, batez besteko adina 35,7 urtekoa da, eta biztanleriaren % 25ek baino gehiagok 18 urte baino gutxiago ditu. Horregatik guztiagatik, Zabalgana tranbia-linea baten bidez erdigunearekin lotzea udalaren eta auzoen eskaria da duela urte batzuetatik hona.

Tranbia-hedapen berriaren helburu nagusia da garraio publikoaren sarea hobetzea, eta gaitasun handiko garraiobideak elkarren artean hurbiltzea, hala nola tranbia eta BEI, auzoaren konektibitatea optimizatuz; izan ere, mugimendu-fluxu handia dago hiriaren erdigunerantz, bertan biltzen baitira merkataritza- eta negozio-guneak.

Azkenik, Vitoria-Gasteizko tranbia Zabalganara luzatzeko lanak 3 eraikuntza-proiektutan banatzen dira:

– Vitoria-Gasteizko tranbia Zabalganara zabaltzeko eraikuntza-proiektua – Erdialdeko adarra: Lovaina plazatik –tranbia-sarearekin lotzen den lekutik– Zabalgana hiribidea eta Nazio Batuen hiribidea lotzen dituen biribilguneraino doa. Bertan, bi adarretan banatzen da: Mariturri adarra hegoalderantz eta Aldaia adarra mendebalderantz.

– Vitoria-Gasteizko tranbia Zabalganara zabaltzeko eraikuntza-proiektua- Mariturri adarra: Giza Eskubideen Hiribidea biribilgunean hasten da, Sofia Erreginaren hiribidea 1 parean dagoen geltokiraino.

– Vitoria-Gasteizko tranbia Zabalganara zabaltzeko eraikuntza-proiektua- Aldaia adarra: zati komuna Nazio Batuen hiribidean banatzen den biribilgunetik metro gutxira hasten da, Nazio Batuen hiribidearen 47 parean dagoen geltokiraino. Ebazpen honek hartzen duen tartea.

Vitoria-Gasteizko tranbia Zabalganara –Mariturri adarra– zabaltzeko eraikuntza-proiektuaren xedea da Zabalganarako tranbia zabaltzeko tartea planifikatu, diseinatu, definitu eta baloratzea: Nazio Batuen hiribidearekiko biribilgunetik Zabalgana hiribidean zehar doa, Giza Eskubideen hiribiderantz biratzen du, Iruña Veleiatik jarraitzen du eta Sofia Erreginaren hiribideko 1. zenbakiaren parean amaitzen da; 2.100 metro inguruko luzera du, zabalera metrikoko trenbide bikoitzarekin; aipatutako kaleen erdibitzailean ezarrita dago, eta 4 geraleku berri ditu. Aireko lineako zutoinen zimenduak, ainguraketa-buloiak, tranbia- eta bide-seinaleztapeneko kanalizazioak eta kutxetak, komunikazioak, hornidura elektrikoa eta elektrifikazioa sartzen dira, baina ez dira sartzen instalazio horien lineak, ezta katenaria-zutoinen eta horien ainguraketa-plaken hornidura ere.

Vitoria-Gasteizko tranbia Zabalganara zabaltzeko eraikuntza-proiektuaren helburua tranbia-sistema Zabalganarantz zabaltzea da, Lovaina plazako egungo trazadurarekiko loturan hasita. Handitze hori inguruko geltokirantz doa, Vitoria-Gasteizko kale nagusiak zeharkatuz, Zabalgana hiribidera iritsi arte. Bertan, bi adarretan banatuko da.

Azpiegitura berriak 5,5 km inguruko luzera izango du. Ibilbideak zati komun bat izango du hiriaren erdigunetik, Lovainan, Zabalgana hiribidera iritsi arte. Bertan, bi adarretan banatuko da, Zabalganarantz; bata Aldaiara eta bestea Mariturrira. Lehenengo kilometroak zati komunari dagozkio, eta tranbien igarotze-maiztasuna 7,5 minutukoa izango da. Mariturrirako eta Aldaiarako adarretan, zerbitzuen maiztasuna 15 minutukoa izango da, bi zerbitzutatik bat adar bakoitzera joango baita.

Linea berrian zehar, 11 geraleku proiektatuko dira bidaiarien zerbitzurako: 5 tarte komunean, 4 Mariturrirako adarrean eta 2 Aldaiarako adarrean. Azpimarratzekoa da Lovainako geralekua, zeinak egungo lineekiko interkonexio-puntu gisa balioko baitu, baina trenbide independenteetan; beraz, erabiltzaileek tranbia-aldaketa egin beharko dute.

Lehen aipatu bezala, tranbia-linea horren eraikuntza hiru proiektutan banatzen da. Jarraian, Vitoria-Gasteizko tranbia Zabalganara –Mariturri adarra– zabaltzeko eraikuntza-proiektua idazteko kontuan hartu beharreko alderdiak zehaztuko dira.

Ebazpen honekin onartzen den proiektuak Mariturri tranbia-plataformaren 2,1 km inguruko exekuzioa aurreikusten du, Zabalgana hiribideko erdibitzailean hasten dena, Nazio Batuen hiribidearekiko biribilgunearen ondoren. Lantarongo Gaztelua kalearekiko bidegurutzearen parean dago lehenengo geralekua. Ondoren, Giza Eskubideen hiribiderantz egiten du bira, eta han bigarren geralekua eraikiko da, operazio partzialetarako bretelle bat duena.

Tranbia Giza Eskubideen hiribideko erdibitzailetik igarotzen da, noranzko bakoitzeko errei bakarra mantentzen duen bide-konfigurazioarekin, biribilguneetarako sarbideetan izan ezik, horietan errei gehigarriak baitaude bertan sartzea errazteko. Trazadurak Iruña-Veleia hiribidearekiko biribilguneraino jarraitzen du, non laurogeita hamar gradu hegoalderantz biratzen duen, bide horretara sartuz.

Tranbia-azpiegiturak erdibitzailea okupatzen jarraitzen du hiribide horretan, eta errei bakarra geratuko da noranzko bakoitzeko. Iruña-Veleiako hasierako atalean izen bereko geltokia kokatuko da. Ondoren, trazadura Sofia Erreginaren hiribidearekin gurutzatzen den biribilgunera iristen da, eta mendebalderantz biratzen du, hiribide horren erdibitzailetik jarraitzeko. Azken sekzio horrek, halaber, errei bateko sekzio bat hartzen du noranzko bakoitzeko, tranbiaren ezarpena dela eta.

Trazadura Sofia Erreginaren hiribidearen 1. zenbakiaren parean amaitzen da, bertan baitago adarraren terminal-geralekua. Geraleku horrek aurreko bretelle bat izango du, tranbia-ibilgailuek behar dituzten maniobrak egin ahal izateko, linearen terminal-puntua baita.

Proiektuaren exekuzio materialeko aurrekontuaren zenbatekoa hamazazpi milioi zortziehun eta hamabi mila laurehun eta laurogeita hemezortzi euro eta zortzi zentimokoa da (17.812.498,08 euro); lizitazioaren oinarrizko aurrekontua, BEZa barne, hogeita bost milioi seiehun eta berrogeita zortzi mila berrehun eta hamabost euro eta laurogeita hemezortzi zentimokoa da (25.648.215,98 euro), eta Administrazioari jakinarazteko aurrekontua hogeita bi milioi bostehun eta hogeita hamazortzi mila ehun eta hirurogeita bat euro eta berrogeita hemeretzi zentimokoa (22.538.161,59 euro), BEZa kanpo.

Obrak egiteko hogeita zazpi (27) hilabeteko epea aurreikusten da.

Euskal Trenbide Sareko (ETS) Zerbitzu Teknikoek egiaztatu dute proiektu honek bere xedeari erantzuten diola eta Sektore Publikoko Kontratuen Legeak eta Administrazio Publikoen Kontratuen Legearen Erregelamendu Orokorrak eskatutako baldintzak betetzen dituela, kontrata bidez egikaritzeko behar diren alderdi nahikoak jasotzen baititu; halaber maila formalean berrikusi du proiektua eta berresten du bete egiten duela Sektore Publikoko Kontratuen Legean eta Administrazio Publikoen Kontratuen Legearen Erregelamendu Orokorrean ezarritakoa, beharrezko dokumentuak eta indarrean dagoen araudia sartzeari dagokionez, edukiari, sinadurei eta alderdi formalei, beharrezko kalkulu-oinarri eta -hipotesiei eta Sektore Publikoko Kontratuen Legearen 233.1 artikuluan zerrendatutako edukiari dagokienez.

Organo honek eskumena du euskal trenbide sareko obren proiektuak onartzeko, hala xedatzen baitu 382/2024 Dekretuak 11.2.b) artikuluan –azaroaren 19koa, Mugikortasun Jasangarriaren Sailaren egitura organikoa eta funtzionala ezartzen duena–.

Aipatutako xedapenak, horiekin bat datozenak eta oro har aplikatu beharrekoak ikusita, hau

EBAZTEN DUT:

Lehenengoa.– «Vitoria-Gasteizko tranbia Zabalganara –Mariturri adarra– zabaltzeko eraikuntza-proiektua» onartzea. Lizitazioaren oinarrizko aurrekontua, BEZa barne, hogeita bost milioi seiehun eta berrogeita zortzi mila berrehun eta hamabost euro eta laurogeita hemezortzi zentimokoa da (25.648.215,98 euro), eta obrak egiteko epea hogeita zazpi (27) hilabetekoa izango dela aurreikusi da.

Bigarrena.– Eraikuntza-proiektu hau onartzeak berekin dakar obrak onura publikokoak edo interes sozialekoak direla deklaratzea, okupatzeko beharra adieraztea eta dagokion eraikuntza-proiektuaren beraren eranskinean zerrendatuta dauden ukitutako ondasunak eta eskubideak lehenbailehen okupatu behar direla adieraztea.

Ebazpen hau ez da behin betikoa administrazio-bidean, eta, beronen aurka, interesdunek gora jotzeko errekurtsoa aurkez diezaiokete Azpiegituren eta Mugikortasun Jasangarriaren sailburuordeari, hilabeteko epean, ebazpena jakinarazi edo argitaratu eta hurrengo egunetik aurrera zenbatzen hasita. Idazki hori organo honi edo Azpiegituren eta Mugikortasun Jasangarriaren sailburuordeari bidali beharko zaio.

Administrazio publikoek administrazioarekiko auzi-errekurtsoa jarri ahal izango dute, bi (2) hilabeteko epean, Euskal Autonomia Erkidegoko Justizia Auzitegi Nagusiko administrazioarekiko auzien aretoan, hargatik eragotzi gabe aurretiazko errekerimendua egin ahal izatea, Administrazioarekiko Auzien Jurisdikzioa arautzen duen uztailaren 13ko 29/1998 Legearen 44. artikuluan zehaztutako moduan eta epean.

Jendaurrean jartzen da, guztiek horren berri izan dezaten.

Vitoria-Gasteiz, 2026ko ekainaren 10a.

Garraio Azpiegituren zuzendaria,

MARÍA DOLORES DE JUAN DE MIGUEL.

Azterketa dokumentala