Euskal Herriko Agintaritzaren Aldizkaria

118. zk., 2026ko ekainaren 24a, asteazkena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

IRAGARKIAK

Bestelako xedapenak

LEHENDAKARITZA

2817

EBAZPENA, 2026ko ekainaren 17koa, Komunikazio eta Berrikuntza Sozialaren idazkari nagusiarena, 2030 Agenda Bonuen Programako dirulaguntzetarako deialdia egiten duena 2026rako.

Komunikazio eta Berrikuntza Sozialaren Idazkaritza Nagusiak 2030 Agenda Bonuen Programako dirulaguntzen deialdia egin du. Deialdiaren helburua da 2030 Agendaren zabalkundea eta ezagutza soziala sustatzea euskal herritarren artean, bai eta haren printzipio eta helburuen inguruko inplikazio aktiboa sustatzea ere. Laguntza horien bidez, dibulgaziozko ekimenak, hezkuntzakoak, prestakuntzakoak eta herritarren partaidetzaren arloko ekimenak bultzatu nahi dira, elkarte–sareari lagunduz, 2030 Agendaren balioak eta edukiak Euskal Autonomia Erkidegoan zabaltzeko eta gizartea dinamizatzeko.

Ebazpen hau Dirulaguntzen Araubidea Erregulatzeko abenduaren 21eko 20/2023 Legeak arautuko du.

Deialdi honen xede den dirulaguntza Lehendakaritzaren Lau Urteko Dirulaguntzen Plan Estrategikoan jasota dago, zeina Lehendakaritzaren 2024–2027 Dirulaguntzen Lau Urteko Plan Estrategikoa onartzen duen Koordinazio eta Gizarte Komunikazioko idazkari nagusiaren 2024ko otsailaren 12ko Ebazpenaren bidez onartu baitzen eta helbide honetan argitaratu (https://www.euskadi.eus/proyecto/plan–estrategico–de–subvenciones–de–lehendakaritza–2024/web01–s2lehen/es/ bai eta Lehendakaritzaren 2026ko Dirulaguntzen Urteko Planean ere (plan hori Koordinaziorako eta Proiektu Estrategikoetarako idazkari nagusiaren 2026ko martxoaren 29ko Ebazpenaren bidez onartu zen, eta https://www.euskadi.eus/gobierno-vasco/-/proyecto/plan-estrategico-de-subvenciones-de-lehendakaritza-2026/), helbidean argitaratu). Deialdiak 2030 Agenda gizartean zabaltzen eta herritarrak 2030 Agendaren arloan inplikatzen laguntzen du, eta hori da aipatutako planetan jasotako helburu estrategikoetako bat.

Ondorioz, honako hau

EBAZTEN DUT:

Artikulu bakarra.– 2026rako 2030 Agenda Bonuen Programako dirulaguntzen deialdia egitea, eta dirulaguntzak arautzeko oinarriak onartzea.

Deialdi honek Dirulaguntzen Araubidea Erregulatzeko abenduaren 21eko 20/2023 Legeari jarraituko dio.

AZKEN XEDAPENETAKO LEHENENGOA

Ebazpen honek amaiera ematen dio administrazio–bideari, eta, beraren aurka, berraztertzeko errekurtsoa aurkez daiteke organo berean, hilabeteko epean, ebazpena Euskal Herriko Agintaritzaren Aldizkarian argitaratu eta biharamunetik aurrera; bestela, administrazioarekiko auzi–errekurtsoa aurkez daiteke zuzenean, Euskal Autonomia Erkidegoko Auzitegi Nagusiko Administrazioarekiko Auzietako Salan, bi hilabeteko epean, ebazpena Euskal Herriko Agintaritzaren Aldizkarian argitaratu eta biharamunetik aurrera.

AZKEN XEDAPENETAKO BIGARRENA

Ebazpen honek EHAAn argitaratu eta hurrengo egunetik aurrera izango ditu ondorioak.

Vitoria-Gasteiz, 2026ko ekainaren 17a.

Komunikazio eta Berrikuntza Sozialaren idazkari nagusia,

ION MUÑOA ERRASTI.

I. ERANSKINA

EBAZPENA, KOMUNIKAZIO ETA BERRIKUNTZA SOZIALAREN IDAZKARI NAGUSIARENA, 2026RAKO 2030 AGENDA BONUEN PROGRAMAREN DEIALDIA EGITEN DUENA

OINARRIAK

Lehenengoa.– Xedea.

Ebazpen honen xedea da 2026rako 2030 Agenda Bonuen Programako dirulaguntzen deialdia egitea, Euskal Autonomia Erkidegoan 2030 Agendaren inguruko dibulgazioa, ezagutza eta herritarren parte-hartzea sustatzeko.

Bigarrena.– Entitate onuradunak eta betekizunak.

1.– Euskal Autonomia Erkidegoan diharduten irabazi-asmorik gabeko entitateak izan daitezke dirulaguntza honen onuradun. Entitate eskatzaileak legez eratuta egon behar du irabazi-asmorik gabeko entitate gisa, eta Euskal Autonomia Erkidegoko dagokion erregistro ofizialean inskribatuta. Horrek nortasun juridikoa eta irabazi-asmorik gabeko izaera egiaztatzen ditu. Era berean, estatutuetan berariaz jaso behar da irabazi-asmorik ez dagoela, eta ezartzen da lortutako irabaziak oso–osorik entitatearen helburu sozialak betetzeko erabiltzen direla eta inola ere ez dela kideen artean banatzen.

Eskabide honen ondorioetarako, honekin batera doakizu, edo, hala badagokio, Administrazioari baimena ematen zaio erregistroko inskripzioari eta legezko egoerari buruzko datuak egiaztatzeko, indarrean dagoen araudiaren arabera. Era berean, entitateak aitortzen du irabazi-asmorik gabeko entitatea izateko eskatzen diren baldintza guztiak betetzen dituela.

2.– Entitate onuradunek baldintza hauek bete behar dituzte:

a) Dirulaguntzen Araubidea Erregulatzeko abenduaren 21eko 20/2023 Legearen 13. artikuluan arautzen diren eta onuradun izatea eragozten duten egoeretako batean ere ez egotea:

– Epai irmo baten bidez kondenatuak izatea dirulaguntza edo laguntza publikoak lortzeko aukera galtzera, edo prebarikazioagatik, funtzionario-eroskeriagatik, ondasun publikoak bidegabe erabiltzeagatik, eragimen-trafikoagatik, iruzurrengatik eta legearen aurkako ordainarazpenak edo hirigintza-delituak egiteagatik.

– Borondatezko konkurtsoaren deklarazioa eskatu izana, edozein prozeduratan kaudimengabetzat jo izana, konkurtsoan deklaratuta egotea –salbu eta horretan eraginkortasuna hartu badu hitzarmen batek–, esku-hartze judizialaren pean egotea edo Konkurtsoari buruzko uztailaren 9ko 22/2003 Legearen arabera desgaituta egotea, konkurtsoaren kalifikazio-epaian ezarritako desgaitze-aldia amaitu gabe.

– Administrazioarekin egindako edozein kontraturen suntsiarazpen irmoa eragin izana kausaren batean erruduntzat jo dituztela eta.

– Pertsona fisikoa, merkataritza–sozietateetako administratzaileak edo beste pertsona juridiko batzuen legezko ordezkaritza dutenak Herri Administrazioen Zerbitzupeko Langileen Bateraezintasunei buruzko abenduaren 26ko 53/1984 Legean eta Kargu Publikoen Jokabide Kodea eta Interes Gatazkak arautzen dituen ekainaren 26ko 1/2014 Legean aurreikusitako bateraezintasun–araubideko kasuren batean egotea, edo Hauteskunde Araubide Orokorraren ekainaren 19ko 5/1985 Lege Organikoan araututako hautapenezko karguren bat izatea, lege horretan edo gai horiek arautzen dituen autonomia-erkidegoko araudian ezarritako eran.

– Indarrean dauden xedapenek ezarritako zerga–betebeharrak edo Gizarte Segurantzarekikoak egunean ez izatea, erregelamenduz zehazten den moduan.

– Erregelamenduz zerga–paradisu gisa kalifikatutako herrialde edo lurralde batean izatea zerga–egoitza.

– Dirulaguntzak itzultzeko betebeharrak egunean ez izatea, erregelamenduz ezarritako moduan.

– Ebazpen irmo baten bidez, dirulaguntzak lortzeko aukera galtzea dakarren zehapena jaso izana, lege honen edo hala ezartzen duten beste lege batzuen arabera. Zehazki, ezin izango dira dirulaguntzen onuradun edo entitate laguntzaile izan sexu-diskriminazioagatik edo emakumeen eta gizonen berdintasunaren arloko araudia ez betetzeagatik zigor administratibo edo penala jaso duten pertsona fisiko eta juridikoak, dagokion zehapenean ezarritako aldian. Era berean, ezingo dute laguntzarik edo dirulaguntzarik jaso Estatuko araudiaren arabera berdintasun-plan bat indarrean izan behar duten enpresek, ez eta 50 langile baino gehiagoko enpresek ere, baldin eta egiaztatzen ez badute sexu–jazarpena edo sexuan oinarritutako jazarpena prebenitzeko eta horri aurre egiteko neurririk ezarri dutela, emakumeen eta gizonen berdintasunaren arloan Estatuko legeriak ezarritako eran.

– Ekonomia Zirkular baterako Hondakin eta Lurzoru Kutsatuei buruzko apirilaren 8ko 7/2022 Legean edo Euskadiko Ingurumen Administrazioari buruzko abenduaren 9ko 10/2021 Legean aurreikusitako arau-hauste larri edo oso larriagatik zigortuta egotea pertsona fisikoa edo juridikoa, publikoa edo pribatua, administrazio-bidean ebazpen irmo baten bidez, dagozkion neurri zuzentzaileak gauzatu eta zehapena bete arte.

– Desgaitasuna duten pertsonentzako lanpostuak erreserbatzeko legez ezarritako kuota bete ez izana, kuota hori betetzeko neurri alternatiboak martxan jarri direla egiaztatu gabe.

b) Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuan deskribatutako egoeretan ez erortzea.

c) Dirulaguntzen onuradun izateko aurreko ataletan adierazitako inguruabarrak eta betekizunak laguntza-eskabidea aurkezten den unetik ematen den dirulaguntza likidatu arte bete behar dira.

3.– Aurreko paragrafoetan aurreikusitako alderdiak honela egiaztatu beharko dira:

a) Berrikuntza Sozialaren Zuzendaritzak ofizioz egiaztatuko du, elkarreragingarritasun bidez, zerga–betebeharrak eta Gizarte Segurantzarekikoak egunean daudela, Ekonomia eta Ogasuneko sailburuaren 2023ko otsailaren 13ko Aginduaren arabera.

Hala ere, eskatzaileak berariaz ukatu ahal izango du baimena, eta kasu horretan, eskaera egiteko unean, kasuan kasuko organo eskudunak emandako administrazio–ziurtagiri positiboak aurkeztu beharko ditu.

b) Gainerako betekizunak erantzukizunpeko adierazpen baten bidez egiaztatu behar dira, eta adierazpen hori eskabidearekin batera aurkeztuko den formularioan txertatu behar da.

4.– Erantzukizunpeko adierazpenak prozeduran aurkeztu beharreko dokumentazioa ordezten badu, erantzukizunpeko adierazpenean jasotako alderdiak egiazkoak direla egiaztatzeko, hala badagokio, beren burua subjektu onuradun gisa proposatzen dutenek ordeztutako dokumentazioa aurkeztu beharko dute, dena delako dirulaguntza emateko prozedura ebatzi aurretik.

Hirugarrena.– Diruz lagunduko diren jarduerak.

1.– 2030 Agenda Bonuen Programa honako proiektu mota hauek finantzatzera bideratuta dago:

a) Hitzaldiak, eztabaidak, mahai-inguruak, jardunaldiak edo mintegiak antolatzea.

b) Informazio-kanpainak egitea edo informazio- edo dibulgazio-materiala editatzea.

c) Edozein arlotako prestakuntza-programak edo ikastaroak.

d) Ikasleentzako hezkuntza-programak, edozein eremutan.

e) Herritarrek parte hartzeko ekimenak.

f) 2030 Agenda zabaltzen eta ezagutzen laguntzen duten antzeko beste batzuk.

2.– Helburu hauek dituzten proiektuak bakarrik lagunduko dira diruz:

a) 2030 Agendaren eta GJHen edukiaren eta esanahiaren informazioa eta zabalkundea.

b) 2030 Agendari eta GJHei buruzko prestakuntza eta hezkuntza.

c) 2030 Agenda Euskadi kontratu sozialaren esanahiari buruzko elkarrizketa eta herritarren parte-hartzea.

3.– Gainera, proposatutako ekimenek baldintza hauek bete beharko dituzte:

a) Edozein eremutako prestakuntza-jardueretan, gutxienez 15 pertsonak jarduera horietan parte hartzea eskatzen duten lan-proposamenak soilik onartuko dira.

b) Hezkuntza-eremuko jarduerak zuzenean dinamizatzeko proposamenetan, gutxienez ikasgela bateko ikasle guztiak, klaustro bat edo ikastetxe bateko guraso-elkartea inplikatzen dituzten proiektuak baino ez dira onartuko.

c) Udal-esparruetan jarduerak zuzenean dinamizatzeko edo herritarrek parte hartzeko proposamenetan, proiektu hauek soilik onartuko dira: 500 pertsonari baino gehiagori zuzeneko informazioa gutun, mezu elektroniko edo argitalpenen bidez zuzentzen dieten proiektuak. 1.000 biztanletik beherako udalen kasuan, gutxienez 150 laguneko publikoarentzat izan beharko dute, eta gutxienez 40 pertsonak parte hartu beharko dute hitzaldi, foro, jardunaldi eta gisa horretako ekintzetan.

d) Proiektuak Euskal Autonomia Erkidegoko bi hizkuntza ofizialetan garatzea.

4.– Diruz lagundu daitezkeen gastutzat hartzeko, Dirulaguntzen Araubidea Erregulatzeko abenduaren 21eko 20/2023 Legearen 30. artikuluan xedatutakoari jarraituko zaio:

Diruz lagundu daitezkeen gastutzat hartuko dira, lege honetan aurreikusitako ondorioetarako, diruz lagundutako jardueraren izaerari zalantzarik gabe erantzuten diotenak, behar-beharrezkoak direnak eta dirulaguntzen oinarri arautzaileek ezarritako epean egiten direnak. Epe zehatzik ezarri ez bada, dirulaguntza eman den urte naturala amaitu baino lehen egin beharko dira gastuak. Diruz lagundu daitezkeen gastuak eskuratzeko kostua ezin izango da inola ere izan merkatuko balioa baino handiagoa.

Egindako gastutzat hartuko da dirulaguntza arautzeko oinarriek zehaztutako justifikazio-aldia amaitu aurretik benetan ordaindu dena.

Halaber, honako gastu hauek lagundu ahal izango dira diruz:

a) Langile-gastuak (nominak, gizarte-aseguruak, dietak eta bestelako kalte-ordainak...).

b) Materialak erostea.

c) Alokairuak (espazioak, agertokia...).

d) Publizitatea eta harreman publikoak (inprimategiak, mezularitza...).

e) Garraioak.

f) Kanpoko beste zerbitzu batzuk (enpresekin kontratatu beharreko beste zerbitzu batzuk).

g) Jarduera behar bezala garatzeko beharrezkoak diren beste gastu batzuk.

Laugarrena.– Dirulaguntzen zuzkidura ekonomikoa.

Deialdi honetara bideratutako baliabide ekonomikoen zenbateko osoa 400.000 eurokoa da, Euskal Autonomia Erkidegoaren 2026rako Aurrekontu Orokorren kargura. Deialdia norgehiagoka-erregimenean izapidetuko da, balorazio-irizpideen arabera lortutako puntuazioaren arabera.

Bosgarrena.– Dirulaguntzen mugak eta zenbatekoak

1.– Dirulaguntzaren zenbatekoa proiektuaren aurrekontu osoaren % 75 izango da, eskaera bakoitzeko 5.000 euroko mugarekin. Dirulaguntza honen entitate onuradun berak ezin izango du deialdi berean 25.000 eurotik gorako zenbatekoa metatu diruz lagundutako ekintzentzako laguntzak batuta.

2.– Dirulaguntza ordainketa bakarrean ordainduko da, diruz lagundutako jarduera gauzatu dela justifikatu ondoren eta egindako gastua justifikatu ondoren.

Seigarrena.– Eskabideak aurkezteko modua, lekua eta epea.

1.– Eskabideak elektronikoki aurkeztu beharko dira, Euskal Autonomia Erkidegoko Administrazio Publikoaren egoitza elektronikoan (https://www.euskadi.eus/ziurtagiri-elektronikoak) onartutako identifikazioko eta sinadura elektronikoko sistemaren bat erabiliz.

2.– Deialdiko laguntzak jasotzeko eskabideak bide elektronikotik egingo dira, https://www.euskadi.eus/servicios/1210405 webgunean eskuragarri dagoen eredu normalizatuan.

Eskabidearen osteko izapideak, barnean direla jakinarazpenak eta justifikazioak, Euskadiko Administrazio Publikoaren egoitza elektronikoko «Nire Karpeta»ren bidez egingo dira: https://www.euskadi.eus/micarpeta

3.– Elektronikoki ere izapidetu ahal izango da, ordezkari baten bidez. Horretarako, Euskal Autonomia Erkidegoko Administrazio Publikoaren Ahalordetzeen Erregistro Elektronikoan inskribatu ahal izango da, helbide honetan: https://euskadi.eus/representantes

4.– Eskabideak aurkezteko epea hilabetekoa izango da, ebazpen hau Euskal Herriko Agintaritzaren Aldizkarian argitaratu eta hurrengo egunetik aurrera, Dirulaguntzen Araubidea Erregulatzeko abenduaren 21eko 20/2023 Legearen 9.4 b) artikuluan xedatutakoaren arabera.

Zazpigarrena.– Proiektuaren memoria.

Entitate interesdunek egingo den proiektuaren memoria bat aurkeztu beharko dute, eta bertan honako informazio hau zehaztu beharko da:

a) Proiektuaren helburuak.

b) Egin beharreko jardueraren deskribapen laburtua.

c) Aurrekontu xehatua.

d) Jarduteko egutegia.

e) Beren garapenean parte hartu nahi duten pertsonen kopurua.

f) Entitate eskatzaileak proiektua gauzatzeko dituen giza baliabideen eta baliabide materialen adierazpena, entitateak berdintasunaren arloan prestakuntza eta/edo ibilbidea duen pertsonarik baduen zehaztuta.

g) Genero-ikuspegia nola txertatu nahi den.

Zortzigarrena.– Eskabideak zuzentzea.

Eskabidea behar bezala betetzen ez bada edo deialdiaren ebazpenean eskatzen den dokumentazioa aurkezten ez bada, entitate interesdunari eskatuko zaio 10 eguneko epean akatsa zuzentzeko edo nahitaezko agiriak aurkezteko, eta ohartaraziko zaio hala egin ezean eskaeran atzera egin duela pentsatuko dela, Administrazio Publikoen Administrazio Prozedura Erkidearen urriaren 1eko 39/2015 Legearen 68. artikuluan xedatutakoarekin bat etorriz.

Bederatzigarrena.– Lehiaketa bidezko norgehiagoka.

1.– Emakumeen eta gizonen berdintasunerako eta emakumeen aurkako indarkeria matxistarik gabe bizitzeko Legearen testu bategina onartzen duen martxoaren 16ko 1/2023 Legegintzako Dekretuaren 3.10 artikuluan xedatutakoaren arabera, Ebaluazio Batzordeko kide izango diren pertsonen izendapenean emakumeen eta gizonen presentziak orekatua izan behar du.

Dirulaguntzak emateko prozedura norgehiagokakoa izango da. Horretarako, dagokion Ebaluazio Batzordea eratuko da, dirulaguntzen eskaerak aztertu eta ebaluatzeko.

2.– Dirulaguntza eskabideak aztertu eta ebaluatuko dituen Balorazio Batzordeak honako kide hauek izango ditu:

– Asier Aranbarri Urzelai, Berrikuntza Sozialerako eta 2030 Agendarako zuzendaria. Lehendakaria izango da.

– Roberto Urizar Abalos, Berrikuntza Sozialerako eta 2030 Agenda Zuzendaritzako teknikaria. Batzordekide izango da.

– Carolina Aguirre Masque Gelo, Berrikuntza Sozialerako eta 2030 Agenda Zuzendaritzako teknikaria. Batzordeko idazkari-lanak egingo ditu.

3.– Balorazio Batzordeak Amaia Uribe Villar Lehendakaritzako berdintasunerako administrazio-unitateko berdintasun-teknikariaren aholkularitza izango du. Hizpidea izango du, baina botorik ez.

Hamargarrena.– Balorazio-irizpideak.

1.– Proposatutako antzeko proiektuak gauzatzen izandako esperientziaren balorazioa (gehienez 10 puntu).

a) Entitateak proiektu bat kudeatu du azken hiru urteetan. (4 puntu).

b) Entitateak bi proiektu kudeatu ditu azken hiru urteetan. (7 puntu).

c) Entitateak hiru proiektu kudeatu ditu azken hiru urteetan. (10 puntu).

2.– Genero-ikuspegiaren zeharkakotasuna (gehienez 15 puntu).

a) Genero-ikuspegia proiektuan, diseinuan, helburuetan, metodologian eta adierazleetan (10 puntu, gehienez).

– Genero-diagnostikoa: sexuaren arabera bereizitako datuak eta antzemandako desberdintasunen azterketa barne hartzen ditu – 3 puntu.

– Proiektuaren helburuak: genero-arrakalak murriztera edo berdintasuna sustatzera bideratutako helburuak – 3 puntu.

– Berdintasun-ikuspegia eta -praktikak: berdintasunari eta hizkuntza inklusiboaren erabilerari buruzko prestakuntza duten langileak – 3 puntu.

– Adierazleak sartzea – Puntu 1.

b) Emakumeen eta gizonen parte-hartze orekatua proiektuaren garapenean (5 puntu).

3.– Proiektuaren ebaluazioa (gehienez 45 puntu).

a) Kalitate teknikoa (25 puntu, gehienez).

– Egungo egoeraren diagnostikoa eta alternatiben azterketa (gehienez 7 puntu).

• Datu eguneratuak, kausen azterketa eta ondorioak biltzen ditu – 3 puntu.

• argi eta garbi definitutako arazoa eta proiektuak zuzenean eta koherentziaz erantzuten duena – 2 puntu.

• alternatibak aurkezten ditu eta proposatutako jarduera behar bezala justifikatzen du – 2 puntu.

– Proiektuaren plangintza: helburuen, emaitzen eta jardueren arteko koherentzia (5 puntu, gehienez).

• Helburu bakoitzarekin lotutako emaitza; harreman zuzena, neurgarria eta ondo egituratua – 2 puntu.

• Ondo definitutako jarduerak – 2 puntu.

• Kronograma argia eta koherentea du – 1 puntu.

– Emaitzen adierazleak. Nazio Batuek proposatutako GJHak sartzea (gehienez 7 puntu).

• 17+1 GIH lantzeko proiektua – 7 puntu.

• 9 GJH lantzeko proiektua – 5 puntu.

• 6 GJH baino gutxiago lantzeko proiektua – 3 puntu.

– Jarraipena eta ebaluazioa: metodologia eta gauzatze-kronogramara egokitzea (6 puntu, gehienez).

• Jarraipenerako metodologia argia zehazten du (bilerak, txostenak) – 2 puntu.

• Ebaluatzeko adierazle argiak definitzen ditu – 2 puntu.

• Jarraipen-jarduerak zehazten ditu kronograman – puntu 1.

b) Proiektuaren ezarpenaren bideragarritasuna eta helburuak lortzea eta gastuaren eraginkortasuna bermatzeko kontrol-mekanismoak (10 puntu, gehienez).

– Proiektuaren finantzaketa orokorra (gehienez 7 puntu).

• Proiektua, gutxienez % 40ko kanpo-finantzaketarekin – 3 puntu.

• Aurrekontu aurkeztu xehatua eta koherentea – 3 puntu.

• Baterako finantzaketa egiaztatzea – puntu 1.

– Entitatearen baliabide teknikoak, teknologikoak eta materialak, proiektuaren eskura jarriak (3 puntu, gehienez).

• % 100 baliabide propioak – 3 puntu.

c) Biztanleria hartzailea (gehienez 10 puntu).

– Biztanleria hartzailearen kuantifikazioa, zuzenekoa eta zeharkakoa (gehienez 7 puntu).

• Zuzeneko biztanleriaren tamaina – 3 puntu.

• Espero den zuzeneko biztanleriaren eta eskatutako aurrekontuaren arteko erlazioa – 2 puntu.

• Kalkulatzeko metodologia – 2 puntu.

– Lehentasuna haur eta gazteen artean (gehienez 3 puntu).

Hamaikagarrena.– Proiektuak aurkezteko epea.

Diruz lagundutako proiektua 2026an hasi beharko da gauzatzen, eta urte horretako azaroaren 15erako amaituta egon beharko du.

Hamabigarrena.– Dirulaguntzaren justifikazioa.

Dirulaguntzen entitate onuradunek, diruz lagundutako jarduera amaitu eta hurrengo hilabetean, honako dokumentazio hau aurkeztu beharko dute:

1.– Dirulaguntza ematean ezarritako baldintzak betetzen direla justifikatzen duen jarduera-memoria, egindako jarduerak eta lortutako emaitzak adierazita.

2.– Egindako jardueren kostua justifikatzeko memoria ekonomikoa, honako hauek jasoko dituena:

a) Jardueraren gastu eta inbertsioen zerrenda sailkatua, hauek adierazita: hartzekoduna eta dokumentua, zenbatekoa, jaulkipen-data eta, hala badagokio, ordainketa-data. Dirulaguntza aurrekontu baten arabera ematen bada, gertatutako desbideratzeak adieraziko dira.

b) Fakturak edo merkataritzako trafiko juridikoan baliokidea den froga-balioa duten edo eraginkortasun administratiboa duten dokumentuak, aurreko paragrafoan aipatutako zerrendan jasotakoak, eta, hala badagokio, ordainketa egiaztatzen duten agiriak.

c) Tasatzaile independentearen ziurtagiria, behar bezala egiaztatua eta dagokion erregistro ofizialean inskribatua, ondasun higiezinak eskuratuz gero.

d) Hala badagokio, a) idatz-zatian aipatzen den zerrendan sartzen diren kostu orokorrak eta/edo zeharkakoak banatzeko irizpideak adieraztea, dirulaguntzaren oinarri arautzaileek justifikatu beharrik gabe oroharreko prezioan konpentsatzea aurreikusi duten kasuetan izan ezik.

e) Diruz lagundutako jarduera finantzatu duten beste diru-sarrera edo dirulaguntza batzuen zerrenda xehatua, zenbatekoa eta jatorria adierazita.

f) Dirulaguntzen Lege Orokorraren 31.3 artikulua aplikatuz, onuradunak eskatu behar dituen hiru aurrekontuak.

g) Hala badagokio, itzulketaren ordainketa-gutuna, aplikatu gabeko gerakinen kasuan, eta horien ondoriozko interesak.

Hamahirugarrena.– Prozedura kudeatzeko eta ebazteko organo eskudunak.

Laguntzak kudeatzeko organo eskuduna Berrikuntza Soziala eta 2030 Agenda izango da. Aurkeztutako proiektuak zuzendaritza horrek kudeatu eta gainbegiratuko ditu.

Dirulaguntzen Araubidea Erregulatzeko abenduaren 21eko 20/2023 Legearen 21.3 artikuluan xedatutakoaren arabera, Balorazio Batzordeak ezarri diren irizpideen arabera ebaluatuko ditu aurkeztutako eskabideak, eta ebaluazio horren emaitza jasotzen duen txostena egingo du. Txosten hori ikusita, organo kudeatzaileak ebazpen-proposamena egingo du, eta ebazteko eskumena duen organoari helaraziko dio, hark emango baitu dirulaguntzak emateko ebazpena.

Ebazpena Komunikazio eta Berrikuntza Sozialaren Idazkaritza Nagusiko titularrak emango du.

Hamalaugarrena.– Ebazpena.

1.– Dirulaguntzen Araubidea Erregulatzeko abenduaren 21eko 20/2023 Legearen 21. artikuluan ezarritakoarekin bat etorriz, Lehendakaritzaren egitura organikoa eta funtzionala ezartzen duen azaroaren 26ko 388/2024 Dekretuaren 6. artikuluari dagokionez, Komunikazio eta Berrikuntza Sozialaren Idazkaritza Nagusiaren titularrari dagokio eskatutako laguntzak emateko edo ukatzeko ebazpena ematea eta, hala badagokio, emandako laguntzen zenbatekoa zehaztea.

Hartzen den ebazpenean zehaztuko da eskatutako dirulaguntzak eman diren edo, hala badagokio, ukatu diren. Lehenengo kasuan, entitate onuradunen izen soziala, finantzatutako jarduerak eta kasu bakoitzean emandako dirulaguntzaren zenbatekoa adieraziko dira. Ukatutakoen kasuan, eskatzaileen izen soziala eta ukatzeko arrazoiak jasoko dira. Era horretan, berariaz jasoko ditu xedea, zenbatekoa, ordaintzeko modua eta epeak, justifikatzeko modua, eta zein xedapenetan oinarritu den.

2.– Administrazio-bidea amaitzen duen emakida-ebazpenaren aurka, aukerako berraztertzeko errekurtsoa aurkez dakioke organo horri, hilabeteko epean, ebazpena Euskal Herriko Agintaritzaren Aldizkarian argitaratu eta biharamunetik aurrera; bestela, administrazioarekiko auzi-errekurtsoa aurkez daiteke zuzenean, Euskal Autonomia Erkidegoko Auzitegi Nagusiko Administrazioarekiko Auzien Salan, bi hilabeteko epean, ebazpena Euskal Herriko Agintaritzaren Aldizkarian argitaratu eta biharamunetik aurrera, Administrazioarekiko Auzien Jurisdikzioa arautzen duen uztailaren 13ko 29/1998 Legean xedatutakoaren arabera.

3.– Ebazpena Euskal Herriko Agintaritzaren Aldizkarian argitaratuko da, eta jakinarazpenaren ondorioak izango ditu. Argitalpen horren berri eman ahal izango da, halaber, Euskadiko Administrazio Publikoaren egoitza elektronikoaren «Nire karpeta»ren bidez.

4.– Ebazpena 6 hilabeteko epean eman eta jakinarazi beharko zaie interesdunei, eskabideak aurkezteko epea amaitu eta hurrengo egunetik aurrera. Epe hori igaro eta berariazko ebazpenik jakinarazi ez bada, eskaera ezetsitzat jo ahal izango da, Administrazio Publikoen Administrazio Prozedura Erkidearen urriaren 1eko 39/2015 Legearen 25. artikuluan aurreikusitako ondorioetarako.

Hamabosgarrena.– Entitate onuradunen betebeharrak.

1.– Entitate onuradunek Dirulaguntzen Araubidea Erregulatzeko abenduaren 21eko 20/2023 Legearen 14., 27. eta 42. artikuluetan ezarritako betebeharrak bete beharko dituzte.

Hauek dira onuradunaren betebeharrak:

a) Jarduera egitea edo dirulaguntza ematea bidezko egiten duen egoeran egotea.

b) Dirulaguntza eman duen erakundeari justifikatzea dirulaguntza ematea edo jasotzea dakarten betekizunak eta baldintzak betetzen direla, bai eta jarduera egin dela ere. Jarduera hori pertsonei buruzkoa denean, sexuaren arabera bereizitako datuak sartuko dira.

c) Dirulaguntza ematen duen organoak edo erakundeak egin beharreko egiaztapen-jarduketei men egitea, bai eta Kontrol Ekonomikoko Bulegoari dagozkion kontrol-jarduketei ere, Euskal Autonomia Erkidegoko aurrekontu orokorren kontura jasotako dirulaguntzei dagokienez, bai eta Herri Kontuen Euskal Epaitegiaren berariazko araudian aurreikusitakoei eta finantzaketa dela-eta beste kontrol-organo batzuek egiten dituztenei ere.

d) Beste edozein administrazio edo erakunde publiko zein pribatutatik helburu bererako jasotako dirulaguntza, laguntza, diru-sarrera edo baliabideen berri ematea dirulaguntza eman duen erakundeari.

Jakinarazpen hori jakin bezain laster egin beharko da, eta, nolanahi ere, jasotako funtsei emandako erabilera justifikatu aurretik edo unean.

e) Dirulaguntza emateko kontuan hartutako edozein inguruabar objektibo zein subjektibo aldatu bada, horren berri ematea dirulaguntza eman duen erakundeari.

Jakinarazpen hori jakin bezain laster egin beharko da, eta, nolanahi ere, jasotako funtsei emandako erabilera justifikatu aurretik edo unean.

f) Dirulaguntza emateko ebazpen-proposamena eman aurretik eta ordaintzeko unean, zerga-betebeharrak, Gizarte Segurantzarekikoak eta dirulaguntzak itzultzeari dagozkionak egunean dituela egiaztatzea, Euskal Autonomia Erkidegoko Administrazioan ogasunaren arloko eskumena duen saileko titularraren aginduz erregelamenduz zehazten den moduan.

g) Izaera juridikoak hala eskatzen badu, kontabilitate-liburuak, izapidetutako erregistroak eta gainerako dokumentuak behar bezala ikuskatuta edukitzea, kasu bakoitzean onuradunari aplikagarri zaion merkataritzako eta sektoreko legeriak eskatutako moduan, bai eta dirulaguntzak arautzeko oinarriek eskatzen dituzten kontabilitateko egoera-orri eta erregistro espezifiko guztiak ere, egiaztatzeko eta kontrolatzeko ahalmenak behar bezala gauzatzen direla bermatzeko.

h) Jasotako funtsak zertan erabili diren egiaztatzen duten agiriak gordetzea, dokumentu elektronikoak barne, egiaztapen- eta kontrol-jarduketen xede izan daitezkeenean.

i) Lege honen 27. artikuluan jasotako zabalkunde-neurriak hartzea.

j) Lege honen 36. artikuluan aurreikusitako kasuetan, jasotako funtsak edo diruz lagundutako jardueraren kostuaren gaineko soberakina itzultzea.

k) Hizkuntzaren eta irudien erabilera intersekzionala eta, bereziki, sexuaren eta generoaren ikuspegia errespetatuz egitea diruz laguntzen den jarduerak edo proiektuak eskatzen dituen dokumentazio eta material guztietan.

l) Herritarren hizkuntza-eskubideak bermatzea, eta, bereziki, diruz lagundutako jardunarekin zerikusia duten argitalpen, iragarki eta publizitateetan euskararen erabilera bermatzea.

2.– Dirulaguntzen Araubidea Erregulatzeko abenduaren 21eko 20/2023 Legearen 14. artikuluan jasotako betebehar orokorrez gain, entitate onuradun bakoitzaren betebeharrak izango dira:

a) Dirulaguntza ematea eragin zuen proiektua edo jarduera gauzatzea.

b) Laguntzak kudeatzeko eskumena duen organoak eskatzen dituen egiaztapen-jarduerak onartzea, bai eta Kontrol Ekonomikoko Bulegoari legozkiokeenak ere, Euskal Autonomia Erkidegoko Aurrekontu Orokorren kontura jasotako laguntzei eta dirulaguntzei dagokienez, bai eta Herri Kontuen Euskal Epaitegiaren berariazko araudian aurreikusitakoak ere.

c) Beste edozein administrazio edo erakunde publiko zein pribatutatik helburu bererako jasotako dirulaguntza, laguntza, diru-sarrera edo baliabideen berri ematea dirulaguntzak kudeatzeko eskumena duen organoari.

d) Eusko Jaurlaritzaren lankidetza jaso izana berariaz agertzea eta Euskadi Global marka erabiltzea diruz lagundutako jarduera guztietan.

e) Dirulaguntzak kudeatzeko eskumena duen organoari artxibo digital bat ematea, diruz lagundutako proiektuak gauzatzean sortzen diren materialekin, erakunde horrek bere webgunean herritarren eskura jar ditzan, edo horiek jasotzen dituen URL helbide bat ematea, proiektuetarako esteka bat sartu ahal izateko.

f) Diruz lagundutako proiektua garatzean euskara eta gaztelania erabiltzea, bai eta diruz lagundutako proiektuetatik datozen zabalkunde-jardueretan eta argitalpen-materialetan ere.

3.– Entitate onuradunek dirulaguntza onartzeak berekin dakar Dirulaguntzen Araubidea Erregulatzeko abenduaren 21eko 20/2023 Legean ezarritako arau guztiak onartzea, bai eta zerrenda-bermeak eta zehapenen araubidea ere.

Entitate onuradunek 15 eguneko epea dute emandako dirulaguntza onartzeko.

4.– Erantzukizunpeko adierazpen bidez, beste edozein administrazio edo erakunde publiko zein pribatutatik helburu bererako dirulaguntzak, laguntzak, diru-sarrerak edo bestelako baliabideak jaso izana egiaztatu beharko da.

Hamaseigarrena.– Dirulaguntzen bateragarritasuna.

1.– Dekretu honetan aurreikusitako dirulaguntzak bateragarriak dira beste edozein erakunde publikok edo pribatuk xede eta helburu bererako ematen dituenekin, baldin eta horien zenbateko metatuak ez badu gainditzen diruz lagundutako proiektuaren benetako kostua.

2.– Proiektua finantzatzeko emandako laguntzen zenbateko metatuak gainditu egiten badu diruz lagundutako proiektuaren benetako kostua, murriztu egingo da programa honen babesean emandako dirulaguntzaren zenbatekoa, dagokion gehieneko mugaraino.

Hamazazpigarrena.– Diruz lagundutako jarduerak kontratatzea.

Onuradunak diruz laguntzen den jardueraren % 100 kontratatu ahal izango du gehienez. Kontratazioa Dirulaguntzen Araubidea Erregulatzeko abenduaren 21eko 20/2023 Legearen 31. artikuluan ezarritakoaren arabera egin beharko da. Aurreikuspen hori honako arrazoi hauetan oinarritzen da:

Lehenik eta behin, irabazi-asmorik gabeko entitate askok, batez ere txikiek, ez dute egitura teknikorik edo giza baliabide propiorik proiektuetan aurreikusitako jarduera guztiak zuzenean gauzatzeko. Azpikontratazioa ahalbidetzeak erraztu egiten du entitate horiek kalitatezko ekimenak garatu ahal izatea, profil tekniko espezializatuetara sartuz eta jarduerak behar bezala gauzatzen direla bermatuz.

Bigarrenik, finantzatutako proiektuen izaerak entitate onuradunaren ohiko jarduera osatzen ez duten ezagutza espezifikoak, zerbitzu profesionalak edo baliabide materialak eska ditzake. Azpikontratazioak aukera ematen du kanpoko baliabide horiek txertatzeko, eta diruz lagundutako jardueren eraginkortasuna, kalitatea eta inpaktua handitzeko.

Halaber, neurri horrek entitateen arteko aukera-berdintasuna bultzatzen du, eta egitura-gaitasun txikiagoa dutenak deialditik kanpo geratzea saihesten. Horrela, lehia eta aniztasun handiagoa sustatzen da aurkeztutako proiektuetan.

Bestalde, erabateko azpikontratazioak ez dakar funts publikoen gaineko kontrola galtzea, entitate onuradunak une oro baitu proiektua gauzatzearen, helburuak betetzearen eta gastuak behar bezala justifikatzearen gaineko erantzukizuna, dirulaguntzen arloan indarrean dagoen araudiaren arabera.

Azkenik, aurreikuspen hori bat dator baliabide publikoen eraginkortasunaren eta kudeaketa onaren printzipioekin, aukera ematen baitu jarduerak kasu bakoitzean bitarteko egokienak dituzten operadoreek gauzatzeko.

Hemezortzigarrena.– Dirulaguntzaren baldintzak aldatzea:

1.– Dirulaguntza ematen duen organoak, ofizioz edo interesdunak eskatuta, emandako dirulaguntza edo haren baldintzak aldatzea erabaki ahal izango du, honako betekizun hauek betetzen direnean:

a) Aldatzeko aukera hori dirulaguntzen oinarri arautzaileetan aurreikusita egotea.

b) Alde batek eskatua bada, onuradunak jakinarazpena egin dezala, 14.e) artikuluan jasotako betebeharra betez, horren berri izan bezain laster, eta, nolanahi ere, jasotako funtsei emandako erabilera justifikatu aurretik.

c) Zenbatekoa ez handitzea.

d) Benetan egindako edo egingo den jarduera edo jokabidea oinarri arautzaileen xedearen barruan egotea.

e) Aldaketa justifikatzen duten inguruabarrak ez egotea onuradunaren borondatearen mende.

f) Aldaketa eragin duten elementu eta inguruabar berriek, hasierako emakidan gertatu izan balira, dirulaguntza ukatzea eragin izana, eta aldaketa horrek hasieran onetsitako proiektuaren funtsezko aldaketa ez ekartzea.

g) Hirugarrenen eskubideei kalterik ez egitea.

2.– Onuradunak eman zaion dirulaguntzaren zenbateko osoa edo zati bat jaso badu, eta aldaketak dirulaguntzaren zenbatekoa murriztea badakar, Dirulaguntzen Araubidea Erregulatzeko abenduaren 21eko 20/2023 Legearen 40. artikuluan aurreikusitakoari jarraituko zaio.

3.– Entitate onuradunak laguntzak kudeatzeko organo eskudunari jakinarazi beharko dio dirulaguntza emateko kontuan hartu den edozein inguruabar objektibo zein subjektibo aldatu dela, bai eta beste edozein administrazio edo erakunde publiko zein pribatutatik helburu bererako dirulaguntzak, laguntzak, diru-sarrerak edo baliabideak jaso direla ere.

4.– Dirulaguntza emateko kontuan hartutako baldintzak aldatzen badira –betiere dirulaguntzaren xedea betetzat jotzen bada– eta, hala badagokio, aldi berean beste edozein erakunde publiko edo pribatutatik beste dirulaguntza edo laguntza batzuk jasotzen badira, dirulaguntza emateko ebazpena aldatu ahal izango da, baldin eta dirulaguntzaren onuradun izateko gutxieneko baldintzak eta dirulaguntzaren helburua betetzen badira. Dirulaguntza emateko ebazpena eman zuen organoak dagokion ebazpena emango du, emandako dirulaguntzen zenbatekoak murrizteko.

Hemeretzigarrena.– Itzultzeko arrazoiak eta itzultzeko prozedura.

1.– Dirulaguntzen Araubidea Erregulatzeko abenduaren 21eko 20/2023 Legearen 36. artikuluan jasotakoak izango dira itzultzeko arrazoiak. Era berean, jasotako zenbatekoak itzuli beharko dira, eta berandutze-interesak eskatuko dira, dirulaguntza ordaintzen denetik itzulketa bidezkoa dela erabakitzen den egunera arte sortuak, edo zordunak itzulketa egin aurretik egiten duen egunera arte sortuak (lehenago itzultzen baditu), honako kasu hauetan:

a) Justifikatzeko betebeharra ez betetzea edo justifikazioa nahikoa ez izatea, lege honetan eta, hala badagokio, dirulaguntza arautzeko oinarrietan ezarritakoaren arabera.

b) Dirulaguntza lortzea horretarako eskatzen diren baldintzak bete gabe edo faltsututa, bai eta hori eragotzi dutenak ezkutatuta ere.

c) Helburua, jarduera edo proiektua ez betetzea edo dirulaguntzaren xede izan zen jokabidea ez hartzea.

d) Dirulaguntza ematerakoan ezarritako baldintzak ez betetzea.

e) Lege honen 12.5.d), 14.c) eta 42. artikuluetan ezartzen diren kontrol-jarduerei jarkitzea, uko egitea, haiek saihestea edo oztopatzea.

f) Lege honen 27. artikuluan jasotako publizitate-neurriak hartzeko betebeharra ez betetzea.

g) Dirulaguntza bakoitzaren oinarri arautzaileetan aurreikusitako gainerako kasuetan.

h) Europar Batasunaren Funtzionamenduari buruzko Tratatuko 107. artikulutik 109. artikulura bitartean ezarritakoaren arabera, itzultzeko beharra dakarren erabaki bat hartzea.

i) Enpresa-deslokalizazioaren adierazpena, lege honen 51. artikuluan xedatutakoa aplikatuz.

2.– Halaber, diruz lagundutako jardueraren kostuaren gainean lortutako gaindikina itzuli beharko da, eta dagokion berandutze-interesa eskatuko zaio.

3.– Baldin eta onuradunak edo, hala badagokio, entitate laguntzaileak betebehar guztiak betetzera nabarmen hurbiltzen bada eta konpromiso horiek betetzeko zalantzarik gabeko jarduera bat egiaztatzen badu, itzuli beharreko zenbatekoa Dirulaguntzen Araubidea Erregulatzeko abenduaren 21eko 20/2023 Legearen 9.4.m) artikuluan adierazitako irizpideak aplikatzearen araberakoa izango da.

4.– Bestalde, itzulketa-prozedurak Dirulaguntzen Araubidea Erregulatzeko abenduaren 21eko 20/2023 Legearen 40. artikuluan xedatutakoari jarraituko dio. Era berean, prozedura ofizioz hasiko da, organo emailearen erabakiz: bere ekimenez, beste organo batzuen eskaera arrazoituaren bidez edo salaketa bidez. Halaber, Kontrol Ekonomikoko Bulegoak dirulaguntzen finantza-kontrolari buruz egindako txostenaren ondorioz hasiko da. Hala ere, espedientea hastea eta izapidetzea laguntza ematen duena ez den beste organo batean deskontzentratzeko aukera ezarri ahal izango da, eta, nolanahi ere, azken organo horri dagokio espedientea ebaztea.

Itzulketa-prozedura hasteko erabakiak automatikoki etengo ditu dena delako dirulaguntzari dagozkion eta ordaintzeke dauden zenbatekoen igorpenak.

Itzultzeko prozeduraren ebazpena jakinarazteko gehieneko epea hamabi hilabetekoa izango da, hasteko erabakiaren egunetik zenbatzen hasita. Hala ere, epe hori igarotzea eten ahal izango da ebazpen arrazoitu bidez, Dirulaguntzen Araubidea Erregulatzeko abenduaren 21eko 20/2023 Legearen 40.3 artikuluan aurreikusitako kasuetan.

(Ikusi .PDF Fitxategia)

Azterketa dokumentala