Euskal Herriko Agintaritzaren Aldizkaria

111. zk., 2026ko ekainaren 15a, astelehena

Hemen ikusgai dauden gainerako formatuen edukia PDF dokumentu elektroniko ofizial eta jatorrizkoa eraldatuz lortu da

BESTELAKO XEDAPENAK

ETXEBIZITZA ETA HIRI AGENDA SAILA

2607

AGINDUA, 2026ko ekainaren 4koa, Etxebizitza eta Hiri Agendako sailburuarena, zeinaren bidez aldatzen baita 2026ko maiatzaren 13ko Aginduaren zortzigarren ebazpen-zatia (agindu haren bidez, 63 etxebizitza baztertu eta hasiera ematen baitzaio Bilbao udalerriko Bolueta eremuan babes ofizialeko 81 etxebizitza eta Monte Eretzan babes ofizialeko 19 etxebizitza errentamenduan esleitzeko prozedurari).

AURREKARIAK

Lehenengoa.– Etxebizitza eta Hiri Agendako sailburuaren 2026ko maiatzaren 13ko Aginduaren bidez, 63 etxebizitza baztertu eta hasiera eman zitzaion Bilbao udalerriko Bolueta eremuan babes ofizialeko 81 etxebizitza eta Monte Eretzan babes ofizialeko 19 etxebizitza errentamenduan esleitzeko prozedurari.

Bigarrena.– Lehenengo aurrekarian aipatutako Aginduaren zortzigarren ebazpen-zatian, 2012ko urriaren 15eko Aginduaren 47 bis 2 artikuluari egiten zaio erreferentzia; Etxebizitza, Herri Lan eta Garraioetako sailburuaren agindu hori etxebizitza eskatzaileen erregistroari eta babes ofizialeko etxebizitzak nahiz araubide autonomikoko zuzkidura bizitokiak esleitzeko prozedurei buruzkoa da, eta artikulu horretan ezartzen da nola sailkatu behar diren kolektibo batean baino gehiagotan sartzen diren pertsonak edo bizikidetza unitateak.

Hala ere, Etxebizitzaren arloko erregelamenduzko xedapenak presaz aldatzeko apirilaren 21eko 55/2026 Dekretua indarrean jartzearekin batera, adierazitako apartatu haren aldaketa ere indarrean jarri da, hain zuzen, dekretuaren VIII. kapituluan xedatutakoa. Horrenbestez, beharrezkoa da aurrez emandako Agindua egokitzea.

ZUZENBIDEKO OINARRIAK

Lehenengoa.– Etxebizitza eta Hiri Agendako sailburuari dagokio agindu hau xedatzea, bat etorrita araudi hauetan ezarritakoekin: martxoaren 4ko 39/2008 Dekretua, Babes publikoko etxebizitzen araubide juridikoari eta etxebizitzaren eta lurzoruaren inguruko finantza-neurriei buruzkoa –12. artikulua, zehazki–, eta Etxebizitza, Herri Lan eta Garraioetako sailburuaren 2012ko urriaren 15eko Agindua, Etxebizitza-eskatzaileen erregistroari eta babes ofizialeko etxebizitzak nahiz araubide autonomikoko zuzkidura-bizitokiak esleitzeko prozedurei buruzkoa –48. artikulua, zehazki–.

EBAZTEN DUT:

Lehenengoa.– Etxebizitza eta Hiri Agendako sailburuaren 2026ko maiatzaren 13ko Aginduaren zortzigarren ebazpen-zatia aldatzea (agindu horren bidez, 63 etxebizitza baztertu eta hasiera ematen baitzaio Bilbao udalerriko Bolueta eremuan babes ofizialeko 81 etxebizitza eta Monte Eretzan babes ofizialeko 19 etxebizitza errentamenduan esleitzeko prozedurari). Horrenbestez, zortzigarren ebazpen-zatia honela geratuko da:

«Zortzigarrena.– 2012ko urriaren 15eko Aginduaren 47 bis 2. artikuluak xedatzen duenari jarraituz, kolektibo batekoak baino gehiagokoak diren pertsona edo bizikidetza-unitateak lehentasun honen arabera sartuko dira kupoetan: eskubide subjektiboa izatea, 36 urtetik beherakoak izatea, premia berezia izatea eta kupo orokorrekoak izatea.

Aurreko paragrafoan araututakoaz salbuetsita daude mugikortasun urri iraunkorra egiaztatu duten pertsonak. Haiek mugikortasun urriko kupoan baino ez dute parte hartuko, hain zuzen, etxe egokitu bat eskuratzeko.»

Bigarrena.– Agindu honen aurka, aukerako berraztertze-errekurtsoa jar dakioke Etxebizitza eta Hiri Agendako sailburuari, hilabeteko epean; bestela, zuzenean administrazioarekiko auzi-errekurtsoa jar daiteke, bi hilabeteko epean, Euskal Autonomia Erkidegoko Justizia Auzitegi Nagusiko Administrazioarekiko Auzien Salan. Errekurtso biak aurkezteko epea hasiko da agindu hau Euskal Herriko Agintaritzaren Aldizkarian argitaratu eta hurrengo egunean.

Vitoria-Gasteiz, 2026ko ekainaren 4a.

Etxebizitza eta Hiri Agendako sailburua,

DENIS ITXASO GONZÁLEZ.

Azterketa dokumentala